ਚੂਲ਼ਵਗ੍ਗਵਣ੍ਣਨਾ

੧. ਕਮ੍ਮਕ੍ਖਨ੍ਧਕਵਣ੍ਣਨਾ

ਅਧਮ੍ਮਕਮ੍ਮਦ੍ਵਾਦਸਕਕਥਾਵਣ੍ਣਨਾ

੪. ਅਸਮ੍ਮੁਖਾ ਕਤਂ ਹੋਤੀਤਿਆਦਯੋ ਤਿਕਾ ਕੇਵਲਂ ਦੇਸਨਾਮਤ੍ਤਮੇਵ. ਨ ਹਿ ਤੀਹਿ ਏਵ ਅਙ੍ਗੇਹਿ ਸਮੋਧਾਨੇਹਿ ਅਧਮ੍ਮਕਮ੍ਮਂ ਹੋਤਿ, ਏਕੇਨਪਿ ਹੋਤਿ ਏਵ, ਅਯਮਤ੍ਥੋ ‘‘ਤਿਣ੍ਣਂ, ਭਿਕ੍ਖਵੇ’’ਤਿਆਦਿਪਾਲ਼ਿਯਾ (ਚੂਲ਼ਵ. ੬) ਸਾਧੇਤਬ੍ਬੋ. ‘‘ਅਪ੍ਪਟਿਞ੍ਞਾਯ ਕਤਂ ਹੋਤੀ’’ਤਿ ਲਜ੍ਜਿਂ ਸਨ੍ਧਾਯ ਵੁਤ੍ਤਂ. ਕਣ੍ਹਪਕ੍ਖੇ ‘‘ਅਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤੀ’’ਤਿ ਸੁਕ੍ਕਪਕ੍ਖੇ ‘‘ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤੀ’’ਤਿ ਇਦਂ ਦ੍ਵਯਂ ਪਰਤੋ ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਤਜ੍ਜਨੀਯਕਮ੍ਮਂ ਕਰੇਯ੍ਯ. ਅਧਿਸੀਲੇ ਸੀਲਵਿਪਨ੍ਨੋ ਹੋਤੀ’’ਤਿ ਇਮਿਨਾ ਵਿਰੁਜ੍ਝਤਿ, ਅਦੇਸਨਾਗਾਮਿਨਿਂ ਆਪਨ੍ਨੋ ਹਿ ‘‘ਅਧਿਸੀਲੇ ਸੀਲਵਿਪਨ੍ਨੋ’’ਤਿ ਵੁਚ੍ਚਤੀਤਿ. ਯੁਤ੍ਤਮੇਤਂ, ਕਤ੍ਤੁ ਅਧਿਪ੍ਪਾਯੋ ਏਤ੍ਥ ਚਿਨ੍ਤੇਤਬ੍ਬੋ. ਏਤ੍ਥਾਹ ਉਪਤਿਸ੍ਸਤ੍ਥੇਰੋ ‘‘ਤਜ੍ਜਨੀਯਕਮ੍ਮਸ੍ਸ ਹਿ ਵਿਸੇਸੇਨ ਭਣ੍ਡਨਕਾਰਕਤ੍ਤਂ ਅਙ੍ਗ’ਨ੍ਤਿ ਅਟ੍ਠਕਥਾਯਂ ਵੁਤ੍ਤਂ, ਤਂ ਪਾਲ਼ਿਯਾ ਆਗਤਨਿਦਾਨੇਨ ਯੁਜ੍ਜਤਿ, ਤਸ੍ਮਾ ਸਬ੍ਬਤ੍ਤਿਕੇਸੁਪਿ ਭਣ੍ਡਨਂ ਆਰੋਪੇਤ੍ਵਾ ਭਣ੍ਡਨਪਚ੍ਚਯਾ ਆਪਨ੍ਨਾਪਤ੍ਤਿਵਸੇਨ ਇਦਂ ਕਮ੍ਮਂ ਕਾਤਬ੍ਬਂ, ਤਸ੍ਮਾ ‘ਅਧਿਸੀਲੇ ਸੀਲਵਿਪਨ੍ਨੋ’ਤਿ ਏਤ੍ਥਾਪਿ ਪੁਬ੍ਬਭਾਗੇ ਵਾ ਅਪਰਭਾਗੇ ਵਾ ਚੋਦਨਾਸਾਰਣਾਦਿਕਾਲੇ ਭਣ੍ਡਨਪਚ੍ਚਯਾ ਆਪਨ੍ਨਾਪਤ੍ਤਿਵਸੇਨੇਵ ਕਾਰੇਤਬ੍ਬਂ, ਨ ਕੇਵਲਂ ਸਙ੍ਘਾਦਿਸੇਸਪਚ੍ਚਯਾ ਕਾਤਬ੍ਬ’’ਨ੍ਤਿ. ‘‘ਅਦੇਸਨਾਗਾਮਿਨਿਯਾ ਆਪਤ੍ਤਿਯਾਤਿ ਪਾਰਾਜਿਕਾਪਤ੍ਤਿਯਾ’ਤਿ ਏਤ੍ਤਕਮਤ੍ਤਂ ਵਤ੍ਵਾ ਪਰਤੋ ‘ਅਧਿਸੀਲੇ ਪਾਰਾਜਿਕਸਙ੍ਘਾਦਿਸੇਸੇ ਅਜ੍ਝਾਚਾਰਾ’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤ’’ਨ੍ਤਿ ਲਿਖਿਤਂ. ‘‘ਅਧਿਸੀਲੇ ਸੀਲਵਿਪਨ੍ਨੋ’ਤਿ ਸਙ੍ਘਾਦਿਸੇਸਂ ਸਨ੍ਧਾਯਾ’’ਤਿ ਗਣ੍ਠਿਪਦੇ ਲਿਖਿਤਂ. ਇਦਂ ਪੋਰਾਣਗਣ੍ਠਿਪਦੇ ਪੁਰਿਮਵਚਨੇਨ ਸਮੇਤਿ, ਤਸ੍ਮਾ ਤਤ੍ਥ ਪਚ੍ਛਿਮਂ ਪਾਰਾਜਿਕਪਦਂ ਅਤ੍ਥੁਦ੍ਧਾਰਵਸੇਨ ਵੁਤ੍ਤਂ ਸਿਯਾ, ਅਟ੍ਠਕਥਾਯਞ੍ਚ ‘‘ਅਦੇਸਨਾਗਾਮਿਨਿਯਾਤਿ ਪਾਰਾਜਿਕਾਪਤ੍ਤਿਯਾ ਵਾ ਸਙ੍ਘਾਦਿਸੇਸਾਪਤ੍ਤਿਯਾ ਵਾ’’ਤਿ ਵੁਤ੍ਤਂ, ਤਤ੍ਥ ਪਾਰਾਜਿਕਾਪਤ੍ਤਿ ਅਤ੍ਥੁਦ੍ਧਾਰਵਸੇਨ ਵੁਤ੍ਤਾ ਸਿਯਾ. ਯਤੋ ਗਣ੍ਠਿਪਦੇ ‘‘ਅਧਿਸੀਲੇ ਸੀਲਵਿਪਨ੍ਨੋ’ਤਿ ਸਙ੍ਘਾਦਿਸੇਸਂ ਸਨ੍ਧਾਯਾ’’ਤਿ ਏਤ੍ਤਕਮੇਵ ਲਿਖਿਤਂ, ਤਸ੍ਮਾ ਸਬ੍ਬਤ੍ਥ ਗਣ੍ਠਿਪਦੇ ਸਕਲੇਨ ਨਯੇਨ ਪਾਰਾਜਿਕਾਪਤ੍ਤਿਪਚ੍ਚਯਾ ਉਪ੍ਪਨ੍ਨਭਣ੍ਡਨਹੇਤੁ ਨ ਤਜ੍ਜਨੀਯਕਮ੍ਮਂ ਕਾਤਬ੍ਬਂ ਪਯੋਜਨਾਭਾਵਾ, ਸਙ੍ਘਾਦਿਸੇਸਪਚ੍ਚਯਾ ਕਾਤਬ੍ਬਨ੍ਤਿ ਅਯਮਤ੍ਥੋ ਸਿਦ੍ਧੋ ਹੋਤਿ. ਨ, ਸੁਕ੍ਕਪਕ੍ਖੇ ‘‘ਦੇਸਨਾਗਾਮਿਨਿਯਾ ਆਪਤ੍ਤਿਯਾ ਕਤਂ ਹੋਤੀ’’ਤਿ (ਚੂਲ਼ਵ. ੫) ਵਚਨਤੋਤਿ ਚੇ? ਨ, ਏਕੇਨ ਪਰਿਯਾਯੇਨ ਸਙ੍ਘਾਦਿਸੇਸਸ੍ਸਪਿ ਦੇਸਨਾਗਾਮਿਨਿਵੋਹਾਰਸਮ੍ਭਵਤੋ,

ਯੇਨ ਕਮ੍ਮੇਨ ਸਨ੍ਤਜ੍ਜਨਂ ਕਰੀਯਤਿ, ਤਂ ਤਜ੍ਜਨੀਯਕਮ੍ਮਂ ਨਾਮ. ਯੇਨ ਕਮ੍ਮੇਨ ਨਿਸ੍ਸਾਯ ਤੇ ਵਤ੍ਥਬ੍ਬਨ੍ਤਿ ਨਿਸ੍ਸਿਯਤਿ ਭਜਾਪਿਯਤਿ ਨਿਯਸ੍ਸੋ, ਤਂ ਨਿਯਸਕਮ੍ਮਂ ਨਾਮ. ਯੇਨ ਤਤੋ ਆਵਾਸਤੋ, ਗਾਮਤੋ ਚ ਪਬ੍ਬਾਜੇਨ੍ਤਿ ਕੁਲਦੂਸਕਂ, ਤਂ ਪਬ੍ਬਾਜਨੀਯਕਮ੍ਮਂ ਨਾਮ. ਯੇਨ ਕਮ੍ਮੇਨ ਅਕ੍ਕੁਟ੍ਠਗਹਟ੍ਠਸਮਈਪਮੇਵ ਪਟਿਸਾਰਿਯਤਿ ਸੋ ਅਕ੍ਕੋਸਕੋ ਪਚ੍ਛਾ ਪੇਸਿਯਤਿ, ਤਂ ਪਟਿਸਾਰਣੀਯਕਮ੍ਮਂ ਨਾਮ. ਯੇਨ ਸਮਾਨਸਂਵਾਸਕਭੂਮਿਤੋ ਉਕ੍ਖਿਪਿਯਤਿ. ਛਡ੍ਡੀਯਤਿ ਸਾਤਿਸਾਰੋ ਭਿਕ੍ਖੁਸਙ੍ਘੇਨ, ਤਂ ਕਮ੍ਮਂ ਉਕ੍ਖੇਪਨੀਯਕਮ੍ਮਂ ਨਾਮਾਤਿ ਵੇਦਿਤਬ੍ਬਂ.

੧੧. ‘‘ਨਿਸ੍ਸਾਯ ਤੇ ਵਤ੍ਥਬ੍ਬ’’ਨ੍ਤਿ ਗਰੁਨਿਸ੍ਸਯਂ ਸਨ੍ਧਾਯ ਵੁਤ੍ਤਂ, ਨ ਇਤਰਨ੍ਤਿ.

੨੧. ਅਸ੍ਸਜਿਪੁਨਬ੍ਬਸੁਕਵਤ੍ਥੁਸ੍ਮਿਂ ‘‘ਤੇਸੁ ਵਿਬ੍ਭਨ੍ਤੇਸੁਪਿ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਅਨੁਞ੍ਞਾਤਮ੍ਪਿ ਸਮ੍ਮਾਵਤ੍ਤਨ੍ਤਾਨਂਯੇਵਾ’’ਤਿ ਲਿਖਿਤਂ. ਸਮ੍ਮੁਖਾ ਵੁਤ੍ਤਮੇਵ ਗਿਹਿਪਟਿਸਂਯੁਤ੍ਤਂ ਨਾਮ. ਪਰਮ੍ਮੁਖਾ ਵੁਤ੍ਤਂ ਦੇਸਨਂ ਗਚ੍ਛਤਿ.

੪੧. ਖਮਾਪੇਨ੍ਤੇਨ ‘‘ਖਮਾਹੀ’’ਤਿ ਵਤ੍ਤਬ੍ਬਮਤ੍ਤਮੇਵ, ਨ ਉਕ੍ਕੁਟਿਕਾਦਿਸਾਮੀਚਿਨਾ ਪਯੋਜਨਨ੍ਤਿ. ਅਨੁਦੂਤਨ੍ਤਿ ਸਹਾਯਨ੍ਤਿ ਅਤ੍ਥੋ.

੫੦. ਅਦਸ੍ਸਨੇਯੇਵ ਉਕ੍ਖੇਪਨੀਯਂ ਕਾਤਬ੍ਬਂ, ਨ ਅਞ੍ਞਥਾ. ‘‘ਤਜ੍ਜਨੀਯਾਦਿਕਰਣਕਾਲੇ ਆਪਤ੍ਤਿਂ ਰੋਪੇਤ੍ਵਾ ਤਸ੍ਸਾ ਅਦਸ੍ਸਨੇ, ਅਪ੍ਪਟਿਕਮ੍ਮੇ ਵਾ ਭਣ੍ਡਨਕਾਰਕਾਦਿਅਙ੍ਗੇਹਿ ਕਾਤਬ੍ਬ’’ਨ੍ਤਿ ਲਿਖਿਤਂ.

ਤਜ੍ਜਨੀਯਕਮ੍ਮਾਦੀਸੁ ਅਯਂ ਪਕਿਣ੍ਣਕਵਿਨਿਚ੍ਛਯੋਤਿ ਵੇਦਿਤਬ੍ਬੋ. ਕਿਂ ਤਜ੍ਜਨੀਯਕਮ੍ਮਂ, ਤਜ੍ਜਨੀਯਕਮ੍ਮਸ੍ਸ ਕਿਂ ਮੂਲਂ, ਕਿਂ ਵਤ੍ਥੁ, ਕਿਂ ਪਰਿਯੋਸਾਨਂ, ਕਸ੍ਮਾ ‘‘ਤਜ੍ਜਨੀਯਕਮ੍ਮ’’ਨ੍ਤਿ ਵੁਚ੍ਚਤੀਤਿ? ਕਿਂ ਤਜ੍ਜਨੀਯਕਮ੍ਮਨ੍ਤਿ ਵਤ੍ਥੁਸ੍ਮਿਂ ਸਤਿ ਕਰਣਸਮ੍ਪਤ੍ਤਿ. ਤਜ੍ਜਨੀਯਕਮ੍ਮਸ੍ਸ ਕਿਂ ਮੂਲਨ੍ਤਿ ਸਙ੍ਘੋ ਮੂਲਂ. ਤਜ੍ਜਨੀਯਕਮ੍ਮਸ੍ਸ ਕਿਂ ਵਤ੍ਥੂਤਿ ਕਲਹਜਾਤਾਪਤ੍ਤਿਵਤ੍ਥੁ. ਕਿਂ ਪਰਿਯੋਸਾਨਨ੍ਤਿ ਭਾਵਨਾਪਰਿਯੋਸਾਨਂ. ਕਸ੍ਮਾ ਤਜ੍ਜਨੀਯਕਮ੍ਮਨ੍ਤਿ ਵੁਚ੍ਚਤੀਤਿ ਸਙ੍ਘੋ ਕਲਹਕਾਰਕਪੁਗ੍ਗਲਂ ਕਲਹੇ ਚ ਭੇਦੇ ਚ ਭਯਂ ਦਸ੍ਸੇਤ੍ਵਾ ਖਨ੍ਤਿਯਾ ਜਨੇਤਿ, ਉਪਸਮੇ ਜਨੇਤਿ, ਤਸ੍ਮਾ ‘‘ਤਜ੍ਜਨੀਯਕਮ੍ਮ’’ਨ੍ਤਿ ਵੁਚ੍ਚਤਿ. ਕਥਂ ਤਜ੍ਜਨੀਯਕਮ੍ਮਂ ਕਤਂ ਹੋਤਿ, ਕਥਂ ਅਕਤਂ. ਕਿਨ੍ਤਿ ਚ ਤਜ੍ਜਨੀਯਕਮ੍ਮਂ ਕਤਂ ਹੋਤਿ, ਕਿਨ੍ਤਿ ਚ ਅਕਤਂ. ਕੇਨ ਚ ਤਜ੍ਜਨੀਯਕਮ੍ਮਂ ਕਤਂ ਹੋਤਿ, ਕੇਨ ਚ ਅਕਤਂ. ਕਤ੍ਥ ਚ ਤਜ੍ਜਨੀਯਕਮ੍ਮਂ ਕਤਂ ਹੋਤਿ, ਕਤ੍ਥ ਚ ਅਕਤਂ. ਕਾਯ ਵੇਲਾਯ ਤਜ੍ਜਨੀਯਕਮ੍ਮਂ ਕਤਂ ਹੋਤਿ, ਕਾਯ ਵੇਲਾਯ ਅਕਤਂ ਹੋਤਿ? ਕਥਂ ਤਜ੍ਜਨੀਯਕਮ੍ਮਂ ਕਤਂ ਹੋਤੀਤਿ ਸਮਗ੍ਗੇਨ ਸਙ੍ਘੇਨ ਞਤ੍ਤਿਚਤੁਤ੍ਥੇਨ ਕਮ੍ਮੇਨ. ਕਥਂ ਅਕਤਂ ਹੋਤੀਤਿ ਵਗ੍ਗੇਨ ਸਙ੍ਘੇਨ ਞਤ੍ਤਿਚਤੁਤ੍ਥੇਨ ਕਮ੍ਮੇਨ. ਕਿਨ੍ਤਿ ਚ ਕਤਂ ਹੋਤੀਤਿ ਕਰਣਸਮ੍ਪਤ੍ਤਿਯਾ. ਕਿਨ੍ਤਿ ਚ ਅਕਤਂ ਹੋਤੀਤਿ ਕਰਣਵਿਪਤ੍ਤਿਯਾ. ਕੇਨ ਚ ਕਤਂ ਹੋਤੀਤਿ ਸਙ੍ਘੇਨ. ਕੇਨ ਚ ਅਕਤਂ ਹੋਤੀਤਿ ਗਣੇਨ ਪੁਗ੍ਗਲੇਨ. ਕਤ੍ਥ ਚ ਕਤਂ ਹੋਤੀਤਿ ਯਸ੍ਸ ਪੁਗ੍ਗਲਸ੍ਸ ਸਙ੍ਘੋ ਤਜ੍ਜਨੀਯਕਮ੍ਮਂ ਕਰੋਤਿ, ਤਸ੍ਸ ਪੁਗ੍ਗਲਸ੍ਸ ਸਮ੍ਮੁਖੀਭੂਤੇ. ਕਤ੍ਥ ਚ ਅਕਤਂ ਹੋਤੀਤਿ ਯਸ੍ਸ ਪੁਗ੍ਗਲਸ੍ਸ ਸਙ੍ਘੋ ਤਜ੍ਜਨੀਯਕਮ੍ਮਂ ਕਰੋਤਿ, ਤਸ੍ਸ ਪੁਗ੍ਗਲਸ੍ਸ ਅਸਮ੍ਮੁਖੀਭੂਤੇ. ਕਾਯ ਵੇਲਾਯ ਕਤਂ ਹੋਤੀਤਿ ਯਦਾ ਕਲਹਜਾਤਾਪਤ੍ਤਿ ਸਂਵਿਜ੍ਜਤਿ. ਕਾਯ ਵੇਲਾਯ ਅਕਤਂ ਹੋਤੀਤਿ ਯਦਾ ਕਲਹਜਾਤਾਪਤ੍ਤਿ ਨ ਸਂਵਿਜ੍ਜਤਿ. ਕਤਿਹਾਕਾਰੇਹਿ ਤਜ੍ਜਨੀਯਕਮ੍ਮਸ੍ਸ ਪਤ੍ਤਕਲ੍ਲਂ ਹੋਤਿ, ਕਤਿਹਾਕਾਰੇਹਿ ਅਪਤ੍ਤਕਲ੍ਲਂ? ਸਤ੍ਤਹਾਕਾਰੇਹਿ ਤਜ੍ਜਨੀਯਕਮ੍ਮਸ੍ਸ ਪਤ੍ਤਕਲ੍ਲਂ ਹੋਤਿ, ਸਤ੍ਤਹਾਕਾਰੇਹਿ ਅਪਤ੍ਤਕਲ੍ਲਂ. ਕਤਮੇਹਿ ਸਤ੍ਤਹਾਕਾਰੇਹਿ ਪਤ੍ਤਕਲ੍ਲਂ, ਕਤਮੇਹਿ ਸਤ੍ਤਹਾਕਾਰੇਹਿ ਅਪਤ੍ਤਕਲ੍ਲਂ ਹੋਤਿ? ਕਲਹਜਾਤਾਪਤ੍ਤਿ ਨ ਸਂਵਿਜ੍ਜਤਿ, ਸੋ ਵਾ ਪੁਗ੍ਗਲੋ ਅਸਮ੍ਮੁਖੀਭੂਤੋ ਹੋਤਿ, ਸਙ੍ਘੋ ਵਾ ਵਗ੍ਗੋ ਹੋਤਿ, ਅਸਂਵਾਸਿਕੋ ਵਾ ਪੁਗ੍ਗਲੋ ਤਸ੍ਸਂ ਪਰਿਸਾਯਂ ਸਂਵਿਜ੍ਜਤਿ, ਅਚੋਦਿਤੋ ਵਾ ਹੋਤਿ ਅਸਾਰਿਤੋ ਵਾ, ਆਪਤ੍ਤਿਂ ਵਾ ਅਨਾਰੋਪਿਤੋ. ਇਮੇਹਿ ਸਤ੍ਤਹਾਕਾਰੇਹਿ ਤਜ੍ਜਨੀਯਕਮ੍ਮਸ੍ਸ ਅਪਤ੍ਤਕਲ੍ਲਂ ਹੋਤਿ, ਇਤਰੇਹਿ ਸਤ੍ਤਹਾਕਾਰੇਹਿ ਪਤ੍ਤਕਲ੍ਲਂ ਹੋਤਿ. ਏਵਂ ਸੇਸਕਮ੍ਮੇਸੂਤਿ.

ਕਮ੍ਮਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੨. ਪਾਰਿਵਾਸਿਕਕ੍ਖਨ੍ਧਕਵਣ੍ਣਨਾ

ਪਾਰਿਵਾਸਿਕਵਤ੍ਤਕਥਾਵਣ੍ਣਨਾ

੭੫. ਪਾਰਿਵਾਸਿਕਕ੍ਖਨ੍ਧਕੇ ‘‘ਮਾ ਮਂ ਗਾਮਪ੍ਪਵੇਸਨਂ ਆਪੁਚ੍ਛਥਾਤਿ ਵੁਤ੍ਤੇ ਅਨਾਪੁਚ੍ਛਾਪਿ ਗਾਮਂ ਪਵਿਸਿਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਸਙ੍ਘੋ ਅਤ੍ਤਨੋ ਪਤ੍ਤਟ੍ਠਾਨੇ ਗਹੇਤੁਂ ਵਟ੍ਟਤਿ. ਓਣੋਜਨਂ ਨਾਮ ਵਿਸ੍ਸਜ੍ਜਨਂ. ‘‘ਤਂ ਪਨ ਪਾਰਿਵਾਸਿਕੇਨ ਪਾਪਿਤਸ੍ਸ ਅਤ੍ਤਨਾ ਸਮ੍ਪਟਿਚ੍ਛਿਤਸ੍ਸੇਵ ਪੁਨਦਿਵਸਾਦਿਅਤ੍ਥਾਯ ਵਿਸ੍ਸਜ੍ਜਨਂ ਕਾਤਬ੍ਬਂ, ਅਸਮ੍ਪਟਿਚ੍ਛਿਤ੍ਵਾਯੇਵ ਚੇ ਵਿਸ੍ਸਜ੍ਜੇਤਿ, ਨ ਲਭਤੀ’’ਤਿ ਵੁਤ੍ਤਂ.

੭੬. ਪਕਤਿਯਾਵ ਨਿਸ੍ਸਯੋਤਿ ਏਤ੍ਥ ‘‘ਅਨ੍ਤੇਵਾਸਿਕਾਨਂ ਆਲਯਸਬ੍ਭਾਵੇ ਯਾਵ ਵਸ੍ਸੂਪਨਾਯਿਕਦਿਵਸੋ, ਤਾਵ ਕਪ੍ਪਤਿ, ਤਸ੍ਸ ਆਲਯਸ੍ਸ ਸਬ੍ਭਾਵੇ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤੀਤਿ ਚੇ? ਨ ਵਟ੍ਟਤਿ. ਤਤ੍ਥ ਇਦਾਨਿ ਖਮਾਪੇਯ੍ਯਾਮੀਤਿਆਦਿਨਾ ਵਟ੍ਟਤੀ’’ਤਿ ਵੁਤ੍ਤਂ. ਤਤ੍ਥ ਏਕਨ੍ਤੇਨ ਵਿਸ੍ਸਟ੍ਠਤ੍ਤਾ, ਇਧ ਪਨ ਏਕਨ੍ਤੇਨੇਵ ਦ੍ਵਿਨ੍ਨਮ੍ਪਿ ਸਮਭਾਵੋ ਇਚ੍ਛਿਤਬ੍ਬੋ ਏਵਾਤਿ ਏਕੇ. ਪਟਿਬਲਸ੍ਸ ਵਾ ਭਿਕ੍ਖੁਸ੍ਸਾਤਿ ਏਤ੍ਥ ‘‘ਲਦ੍ਧਸਮ੍ਮੁਤਿਕੇਨ ਆਣਤ੍ਤੋਪਿ ਗਰੁਧਮ੍ਮੇਹਿ, ਅਞ੍ਞੇਹਿ ਵਾ ਓਵਦਿਤੁਂ ਨ ਲਭਤੀ’’ਤਿ ਲਿਖਿਤਂ. ਤਤੋ ਵਾ ਪਾਪਿਟ੍ਠਤਰਾਤਿ ਏਤ੍ਥ ‘‘ਅਸਞ੍ਚਿਚ੍ਚ ਆਪਨ੍ਨਸਞ੍ਚਰਿਤ੍ਤਤੋ ਸੁਕ੍ਕਵਿਸ੍ਸਟ੍ਠਿ ਪਾਪਿਟ੍ਠਤਰਾਤਿ ਅਯਮ੍ਪਿ ਨਯੋ ਯੋਜੇਤਬ੍ਬੋ’’ਤਿ ਵੁਤ੍ਤਂ. ਪਚ੍ਚਯਨ੍ਤਿ ਵਸ੍ਸਾਵਾਸਿਕਂ. ਸੇਨਾਸਨਂ ਨ ਲਭਤਿ ਸੇਯ੍ਯਪਰਿਯਨ੍ਤਭਾਗਿਤਾਯ. ‘‘ਉਦ੍ਦੇਸਾਦੀਨਿ ਦਾਤੁਮ੍ਪਿ ਨ ਲਭਤੀ’’ਤਿ ਵਦਨ੍ਤਿ. ‘‘ਸਚੇ ਦ੍ਵੇ ਪਾਰਿਵਾਸਿਕਾ ਗਤਟ੍ਠਾਨੇ ਅਞ੍ਞਮਞ੍ਞਂ ਪਸ੍ਸਨ੍ਤਿ, ਉਭੋਹਿਪਿ ਅਞ੍ਞਮਞ੍ਞਸ੍ਸ ਆਰੋਚੇਤਬ੍ਬਂ ਅਵਿਸੇਸੇਨ ‘ਆਗਨ੍ਤੁਕੇਨ ਆਰੋਚੇਤਬ੍ਬਂ, ਆਗਨ੍ਤੁਕਸ੍ਸ ਆਰੋਚੇਤਬ੍ਬ’ਨ੍ਤਿ ਵੁਤ੍ਤਤ੍ਤਾ’’ਤਿ ਵੁਤ੍ਤਂ. ਅਞ੍ਞਵਿਹਾਰਗਤੇਨਾਪਿ ਤਤ੍ਥ ਪੁਬ੍ਬੇ ਆਰੋਚਿਤਸ੍ਸ ਪੁਨਾਰੋਚਨਕਿਚ੍ਚਂ ਨਤ੍ਥਿ. ‘‘ਅਨਿਕ੍ਖਿਤ੍ਤਵਤ੍ਤਸ੍ਸ ਬਹਿ ਆਰੋਚਿਤਸ੍ਸ ਯਥਾ ਪੁਨ ਵਿਹਾਰੇ ਆਰੋਚਨਕਿਚ੍ਚਂ ਨਤ੍ਥਿ, ਏਵਂ ‘ਆਗਨ੍ਤੁਕਸੋਧਨਤ੍ਥਂ ਉਪੋਸਥਦਿਵਸੇ ਆਰੋਚੇਤਬ੍ਬ’ਨ੍ਤਿ ਵਚਨਞ੍ਹੇਤ੍ਥ ਸਾਧਕ’’ਨ੍ਤਿ ਵਦਨ੍ਤਿ.

੮੧. ਏਕਚ੍ਛਨ੍ਨੇ ਨਿਸਿਨ੍ਨਸ੍ਸਾਪਿ ਰਤ੍ਤਿਚ੍ਛੇਦਦੁਕ੍ਕਟਾਪਤ੍ਤਿਯੋ ਹੋਨ੍ਤੀਤਿ ਏਕੇ. ਅਵਿਸੇਸੇਨਾਤਿ ਪਾਰਿਵਾਸਿਕਸ੍ਸ ਉਕ੍ਖਿਤ੍ਤਕਸ੍ਸਾਤਿ ਇਮਂ ਭੇਦਂ ਅਕਤ੍ਵਾ. ‘‘ਤਦਹੁਪਸਮ੍ਪਨ੍ਨੇਪਿ ਪਕਤਤ੍ਤੇ’’ਤਿ ਵਚਨਤੋ ਅਨੁਪਸਮ੍ਪਨ੍ਨੇਹਿ ਵਸਿਤੁਂ ਵਟ੍ਟਤਿ. ‘‘ਸਮਵਸ੍ਸਾਤਿ ਏਤੇਨ ਅਪਚ੍ਛਾ ਅਪੁਰਿਮਂ ਨਿਪਜ੍ਜਨੇ ਦ੍ਵਿਨ੍ਨਮ੍ਪਿ ਵਤ੍ਤਭੇਦਾਪਤ੍ਤਿਭਾਵਂ ਦੀਪੇਤੀ’’ਤਿ ਲਿਖਿਤਂ.

ਪਾਰਿਵਾਸਿਕਵਤ੍ਤਕਥਾਵਣ੍ਣਨਾ ਨਿਟ੍ਠਿਤਾ.

ਮੂਲਾਯਪਟਿਕਸ੍ਸਨਾਰਹਵਤ੍ਤਕਥਾਵਣ੍ਣਨਾ

੮੬. ਅਤ੍ਤਨੋ ਅਤ੍ਤਨੋ ਨਵਕਤਰਨ੍ਤਿ ਪਾਰਿਵਾਸਿਕਾਦਿਨਵਕਤਰਂ. ਪਠਮਂ ਸਙ੍ਘਮਜ੍ਝੇ ਪਰਿਵਾਸਂ ਗਹੇਤ੍ਵਾ ਨਿਕ੍ਖਿਤ੍ਤਵਤ੍ਤੇਨ ਪੁਨ ਏਕਸ੍ਸਪਿ ਸਨ੍ਤਿਕੇ ਸਮਾਦਿਯਿਤੁਂ, ਨਿਕ੍ਖਿਪਿਤੁਞ੍ਚ ਵਟ੍ਟਤਿ. ਮਾਨਤ੍ਤੇ ਪਨ ਨਿਕ੍ਖਿਪਿਤੁਂ ਵਟ੍ਟਤਿ. ਊਨੇ ਗਣੇ ਚਰਣਦੋਸਤ੍ਤਾ ਨ ਗਹੇਤੁਨ੍ਤਿ ਏਕੇ. ਪਠਮਂ ਆਦਿਨ੍ਨਵਤ੍ਤਂ ਏਕਸ੍ਸ ਸਨ੍ਤਿਕੇ ਯਥਾ ਨਿਕ੍ਖਿਪਿਤੁਂ ਵਟ੍ਟਤਿ, ਤਥਾ ਸਮਾਦਿਯਿਤੁਮ੍ਪਿ ਵਟ੍ਟਤੀਤਿ ਪੋਰਾਣਗਣ੍ਠਿਪਦੇ.

ਪਾਰਿਵਾਸਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੩. ਸਮੁਚ੍ਚਯਕ੍ਖਨ੍ਧਕਵਣ੍ਣਨਾ

ਸੁਕ੍ਕਵਿਸ੍ਸਟ੍ਠਿਕਥਾਵਣ੍ਣਨਾ

੯੭. ‘‘ਵੇਦਯਾਮੀਤਿ ਜਾਨਾਮਿ, ਚਿਤ੍ਤੇਨ ਸਮ੍ਪਟਿਚ੍ਛਿਤ੍ਵਾ ਸੁਖਂ ਅਨੁਭਵਾਮਿ, ਨ ਤਪ੍ਪਚ੍ਚਯਾ ਅਹਂ ਦੁਕ੍ਖਿਤੋਤਿ ਅਧਿਪ੍ਪਾਯੋ’’ਤਿ ਲਿਖਿਤਂ. ਯਸ੍ਸ ਮਾਲ਼ਕੇ ਨਾਰੋਚਿਤਂ, ਤਸ੍ਸ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ. ਯਸ੍ਸ ਆਰੋਚਿਤਂ, ਤਸ੍ਸ ਪੁਨ ਆਰੋਚਨਕਿਚ੍ਚਂ ਨਤ੍ਥਿ, ਕੇਵਲਂ ਨਿਕ੍ਖਿਪਿਤਬ੍ਬਮੇਵ. ਵਤ੍ਤਂ ਨਿਕ੍ਖਿਪਿਤ੍ਵਾ ਵਸਨ੍ਤਸ੍ਸ ਉਪਚਾਰਸੀਮਾਗਤਾਨਂ ਸਬ੍ਬੇਸਂ ਆਰੋਚਨਕਿਚ੍ਚਂ ਨਤ੍ਥਿ. ਦਿਟ੍ਠਰੂਪਾਨਂ ਸੁਤਸਦ੍ਦਾਨਂ ਆਰੋਚੇਤਬ੍ਬਂ, ਅਦਿਟ੍ਠਅਸ੍ਸੁਤਾਨਮ੍ਪਿ ਅਨ੍ਤੋਦ੍ਵਾਦਸਹਤ੍ਥਗਤਾਨਂ ਆਰੋਚੇਤਬ੍ਬਂ. ‘‘ਇਦਂ ਵਤ੍ਤਂ ਨਿਕ੍ਖਿਪਿਤ੍ਵਾ ਵਸਨ੍ਤਸ੍ਸ ਲਕ੍ਖਣ’’ਨ੍ਤਿ ਵੁਤ੍ਤਂ. ‘‘ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪਤੋ’ਤਿਆਦਿ ਕਿਞ੍ਚਾਪਿ ਪਾਲ਼ਿਯਂ ਨਤ੍ਥਿ, ਅਥ ਖੋ ਅਟ੍ਠਕਥਾਚਰਿਯਾਨਂ ਵਚਨੇਨ ਤਥਾ ਏਵ ਪਟਿਪਜ੍ਜਿਤਬ੍ਬ’’ਨ੍ਤਿ ਚ ਵੁਤ੍ਤਂ. ‘‘ਅਤ੍ਥਿਭਾਵਂ ਸਲ੍ਲਕ੍ਖੇਤ੍ਵਾਤਿ ਦ੍ਵਾਦਸਹਤ੍ਥੇ ਉਪਚਾਰੇ ਸਲ੍ਲਕ੍ਖੇਤ੍ਵਾ, ਅਨਿਕ੍ਖਿਤ੍ਤਵਤ੍ਤਾਨਂ ਉਪਚਾਰਸੀਮਾਯ ਆਗਤਭਾਵਂ ਸਲ੍ਲਕ੍ਖੇਤ੍ਵਾ ਸਹਵਾਸਾਦਿਕਂ ਵੇਦਿਤਬ੍ਬ’’ਨ੍ਤਿ ਚ ਵੁਤ੍ਤਂ. ‘‘ਨਿਕ੍ਖਿਪਨ੍ਤੇਨ ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਂ, ਪਯੋਜਨਂ ਅਤ੍ਥੀ’’ਤਿ ਚ ਵੁਤ੍ਤਂ, ਨ ਪਨ ਤਂ ਪਯੋਜਨਂ ਦਸ੍ਸਿਤਂ. ਚਿਣ੍ਣਮਾਨਤ੍ਤੋ ਭਿਕ੍ਖੁ ਅਬ੍ਭੇਤਬ੍ਬੋਤਿ ਚਿਣ੍ਣਮਾਨਤ੍ਤਸ੍ਸ ਚ ਅਬ੍ਭਾਨਾਰਹਸ੍ਸ ਚ ਨਿਨ੍ਨਾਨਾਕਾਰਣਤ੍ਤਾ ਅਞ੍ਞਥਾ ‘‘ਅਬ੍ਭਾਨਾਰਹੋ ਅਬ੍ਭੇਤਬ੍ਬੋ’’ਤਿ ਵਤ੍ਤਬ੍ਬਂ ਸਿਯਾ. ਉਕ੍ਖੇਪਨੀਯਕਮ੍ਮਕਤੋਪਿ ਅਤ੍ਤਨੋ ਲਦ੍ਧਿਗ੍ਗਹਣਵਸੇਨ ਸਭਾਗਭਿਕ੍ਖੁਮ੍ਹਿ ਸਤਿ ਤਸ੍ਸ ਅਨਾਰੋਚਾਪੇਤੁਂ ਨ ਲਭਤਿ.

ਪਰਿਵਾਸਕਥਾਵਣ੍ਣਨਾ

੧੦੨. ‘‘ਅਨਨ੍ਤਰਾਯਿਕਸ੍ਸ ਪਨ ਅਨ੍ਤਰਾਯਿਕਸਞ੍ਞਾਯ ਛਾਦਯਤੋ ਅਚ੍ਛਨ੍ਨਾਵਾ’’ਤਿ ਪਾਠੋ. ਅਵੇਰਿਭਾਵੇਨ ਸਭਾਗੋ ਅਵੇਰਿਸਭਾਗੋ. ‘‘ਸਭਾਗਸਙ੍ਘਾਦਿਸੇਸਂ ਆਪਨ੍ਨਸ੍ਸ ਪਨ ਸਨ੍ਤਿਕੇ ਆਵਿ ਕਾਤੁਂ ਨ ਵਟ੍ਟਤੀ’’ਤਿ ਪਸਙ੍ਗਤੋ ਇਧੇਵ ਪਕਾਸਿਤਂ. ਲਹੁਕੇਸੁ ਪਟਿਕ੍ਖੇਪੋ ਨਤ੍ਥਿ. ਤਤ੍ਥ ਞਤ੍ਤਿਯਾ ਆਵਿ ਕਤ੍ਵਾ ਉਪੋਸਥਂ ਕਾਤੁਂ ਅਨੁਞ੍ਞਾਤਤ੍ਤਾ ਲਹੁਕਸਭਾਗਂ ਆਵਿ ਕਾਤੁਂ ਵਟ੍ਟਤੀਤਿ. ਸਭਾਗਸਙ੍ਘਾਦਿਸੇਸਂ ਪਨ ਞਤ੍ਤਿਯਾ ਆਰੋਚਨਂ ਨ ਵਟ੍ਟਤੀਤਿ ਕਿਰ. ‘‘ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’ਤਿ (ਮਹਾਵ. ੧੭੧) ਵੁਤ੍ਤਤ੍ਤਾ ਲਹੁਕਸ੍ਸੇਵਾਯਮਨੁਞ੍ਞਾਤਾ. ਨ ਹਿ ਸਕ੍ਕਾ ਸੁਦ੍ਧਸ੍ਸ ਏਕਸ੍ਸ ਸਨ੍ਤਿਕੇ ਸਙ੍ਘਾਦਿਸੇਸਸ੍ਸ ਪਟਿਕਰਣਂ ਕਾਤੁ’’ਨ੍ਤਿ ਲਿਖਿਤਂ. ਲਹੁਕੇਸੁਪਿ ਸਭਾਗਂ ਆਵਿ ਕਾਤੁਂ ਨ ਵਟ੍ਟਤੀਤਿ, ਤਸ੍ਮਾ ਏਵ ਹਿ ਞਤ੍ਤਿਯਾ ਆਵਿਕਰਣਂ ਅਨੁਞ੍ਞਾਤਂ, ਇਤਰਥਾ ਤਂ ਨਿਰਤ੍ਥਕਂ ਸਿਯਾ. ਅਞ੍ਞਮਞ੍ਞਾਰੋਚਨਸ੍ਸ ਵਟ੍ਟਤਿ, ਤਤੋ ਨ ਵਟ੍ਟਤੀਤਿ ਦੀਪਨਤ੍ਥਮੇਵ ਞਤ੍ਤਿਯਾ ਆਵਿਕਰਣਮਨੁਞ੍ਞਾਤਂ, ਤੇਨੇਵ ਇਧ ‘‘ਸਭਾਗਸਙ੍ਘਾਦਿਸੇਸਂ ਆਪਨ੍ਨਸ੍ਸਾ’’ਤਿਆਦਿ ਵੁਤ੍ਤਂ. ਅਯਮਤ੍ਥੋ ‘‘ਏਤ੍ਤਾਵਤਾ ਤੇ ਦ੍ਵੇ ਨਿਰਾਪਤ੍ਤਿਕਾ ਹੋਨ੍ਤਿ, ਤੇਸਂ ਸਨ੍ਤਿਕੇ ਸੇਸੇਹਿ ਸਭਾਗਾਪਤ੍ਤਿਯੋ ਦੇਸੇਤਬ੍ਬਾ’’ਤਿ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਵਚਨੇਨ ਕਙ੍ਖਾਵਿਤਰਣਿਯਂ ਪਕਾਸਿਤੋਵ. ਸਙ੍ਘਾਦਿਸੇਸਂ ਪਨ ਞਤ੍ਤਿਯਾ ਆਰੋਚੇਤ੍ਵਾ ਉਪੋਸਥਂ ਕਾਤੁਂ ਵਟ੍ਟਤਿ. ਤਸ੍ਸਾ ਞਤ੍ਤਿਯਾ ਅਯਮਤ੍ਥੋ ਯਦਾ ਸੁਦ੍ਧਂ ਭਿਕ੍ਖੁਂ ਪਸ੍ਸਿਸ੍ਸਤਿ, ਤਸ੍ਸ ਸਨ੍ਤਿਕੇ ਆਰੋਚਨਵਸੇਨ ਪਟਿਕਰਿਸ੍ਸਤਿ. ਏਵਂ ਪਟਿਕਤੇ ‘‘ਨ ਚ, ਭਿਕ੍ਖਵੇ, ਸਾਪਤ੍ਤਿਕੇਨ ਪਾਤਿਮੋਕ੍ਖਂ ਸੋਤਬ੍ਬਂ, ਯੋ ਸੁਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੮੬) ਵੁਤ੍ਤਾਪਤ੍ਤਿਤੋ ਮੋਕ੍ਖੋ ਹੋਤੀਤਿ, ਤਸ੍ਮਾ ‘‘ਗਰੁਕਂ ਵਾ ਹੋਤੁ ਲਹੁਕਂ ਵਾ, ਞਤ੍ਤਿਯਾ ਆਵਿ ਕਾਤੁਂ ਵਟ੍ਟਤੀ’’ਤਿ ਵੁਤ੍ਤਂ, ਉਭੋਸੁ ਨਯੇਸੁ ਯੁਤ੍ਤਤਰਂ ਗਹੇਤਬ੍ਬਂ.

ਨਾਮਞ੍ਚੇਵ ਆਪਤ੍ਤਿ ਚਾਤਿ ‘‘ਤੇਨ ਤੇਨ ਵੀਤਿਕ੍ਕਮੇਨਾਪਨ੍ਨਾਪਤ੍ਤਿ ਆਪਤ੍ਤਿ. ਨਾਮਨ੍ਤਿ ਤਸ੍ਸਾ ਆਪਤ੍ਤਿਯਾ ਨਾਮ’’ਨ੍ਤਿ ਲਿਖਿਤਂ. ਆਰੋਚੇਤ੍ਵਾ ਨਿਕ੍ਖਿਪਿਤਬ੍ਬਨ੍ਤਿ ਏਤ੍ਥ ਆਰੋਚਨਂ ਵਤ੍ਤਭੇਦਦੁਕ੍ਕਟਪਅਹਰਣਪ੍ਪਯੋਜਨਨ੍ਤਿ ਵੇਦਿਤਬ੍ਬਂ. ਅਕਾਰਣਮੇਤਨ੍ਤਿ ‘‘ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਿ’’ਨ੍ਤਿ ਵੁਤ੍ਤੇ ਵੁਟ੍ਠਾਨਤੋ.

ਦਸਸਤਂ ਰਤ੍ਤਿਸਤਨ੍ਤਿ ਦਸਸਤਂ ਆਪਤ੍ਤਿਯੋ ਰਤ੍ਤਿਸਤਂ ਛਾਦੇਤ੍ਵਾਤਿ ਯੋਜੇਤਬ੍ਬਂ. ਅਗ੍ਘਸਮੋਧਾਨੋ ਨਾਮ ਸਭਾਗਵਤ੍ਥੁਕਾਯੋ ਸਮ੍ਬਹੁਲਾ ਆਪਤ੍ਤਿਯੋ ਆਪਨ੍ਨਸ੍ਸ ਬਹੁਰਤ੍ਤਿਂ ਪਟਿਚ੍ਛਾਦਿਤਾਪਤ੍ਤਿਯਂ ਨਿਕ੍ਖਿਪਿਤ੍ਵਾ ਦਾਤਬ੍ਬੋ, ਇਤਰੋ ਨਾਨਾਵਤ੍ਥੁਕਾਨਂ ਵਸੇਨਾਤਿ ਅਯਮੇਤੇਸਂ ਵਿਸੇਸੋਤਿ.

ਪਰਿਵਾਸਕਥਾਵਣ੍ਣਨਾ ਨਿਟ੍ਠਿਤਾ.

‘‘ਗਾਮਸ੍ਸਾਤਿ ਨ ਵੁਤ੍ਤ’’ਨ੍ਤਿ ਵਚਨਤੋ ਕਿਰ ਗਾਮੂਪਚਾਰੇਪਿ ਵਟ੍ਟਤੀਤਿ ਅਧਿਪ੍ਪਾਯੋਤਿ ਲਿਖਿਤਂ. ਵੁਤ੍ਤਞ੍ਚ ‘‘ਅਯਂ ਪਨ ਵਿਸੇਸੋ’’ਤਿ. ‘‘ਏਤ੍ਥ ਅਟ੍ਠਕਥਾਚਰਿਯਾਵ ਪਮਾਣਂ. ਯੁਤ੍ਤਂ ਨ ਦਿਸ੍ਸਤੀ’’ਤਿ ਲਿਖਿਤਂ. ਅਨੁਗਣ੍ਠਿਪਦੇ ਪਨ ‘‘ਅਯਂ ਪਨ ਵਿਸੇਸੋ, ਆਗਨ੍ਤੁਕਸ੍ਸ…ਪੇ… ਓਕ੍ਕਮਿਤ੍ਵਾ ਗਚ੍ਛਤਿ, ਰਤ੍ਤਿਚ੍ਛੇਦੋ ਹੋਤਿਯੇਵਾ’’ਤਿ ਵਚਨੇ ਹੇਟ੍ਠਾ ‘‘ਅਨ੍ਤੋਅਰੁਣੇ ਏਵ ਨਿਕ੍ਖਮਿਤ੍ਵਾ ਗਾਮੂਪਚਾਰਤੋ ਦ੍ਵੇ ਲੇਡ੍ਡੁਪਾਤੇ ਅਤਿਕ੍ਕਮਿਤ੍ਵਾ’’ਤਿਆਦਿਨਾ ਨਯੇਨ ਗਰੁਂ ਕਤ੍ਵਾ ਵਚਨਤੋ, ਭਿਕ੍ਖੁਨੀਨਂ ਗਰੁਕਵਸੇਨੇਵ ਤਤ੍ਥ ਤਤ੍ਥ ਸਿਕ੍ਖਾਪਦਾਨਂ ਪਞ੍ਞਤ੍ਤਤ੍ਤਾ ਚ ਤਦਨੁਰੂਪਵਸੇਨੇਵ ਅਟ੍ਠਕਥਾਚਰਿਯੇਨ ਭਿਕ੍ਖੁਨੀਨਂ ਗਰੁਂ ਕਤ੍ਵਾ ਮਾਨਤ੍ਤਚਰਣਵਿਧਿਦਸ੍ਸਨਤ੍ਥਂ ‘‘ਯਤ੍ਤਕਾ ਪੁਰੇਭਤ੍ਤਂ ਵਾ’’ਤਿਆਦਿ ਵੁਤ੍ਤਂ. ਕੁਰੁਨ੍ਦਿਆਦੀਸੁ ਵੁਤ੍ਤਵਚਨੇਨ ਕਰੋਨ੍ਤਸ੍ਸਪਿ ਦੋਸੋ ਨਤ੍ਥੀਤਿ ਦਸ੍ਸੇਤੁਂ ਕੇਵਲਂ ਲਕ੍ਖਣਮਤ੍ਤਮੇਵ ਵੁਤ੍ਤਂ, ਤਦੁਭਯਮ੍ਪਿ ਤੇਨ ਤੇਨ ਪਰਿਯਾਯੇਨ ਯੁਜ੍ਜਤਿ, ਵਿਨਿਚ੍ਛਯੇ ਪਤ੍ਤੇ ਲਕ੍ਖਣੇ ਏਵ ਠਾਤਬ੍ਬਤੋ ਕੁਰੁਨ੍ਦਿਆਦੀਸੁ ਵੁਤ੍ਤਵਚਨਂ ਪਚ੍ਛਾ ਵੁਤ੍ਤਂ. ਪਯੋਗੋ ਪਨ ਪੁਰਿਮੋਵ. ਯਥਾ ਚੇਤ੍ਥ, ਤਥਾ ਸਚੇ ਕਾਚਿ ਭਿਕ੍ਖੁਨੀ ਦ੍ਵੇ ਲੇਡ੍ਡੁਪਾਤੇ ਅਨਤਿਕ੍ਕਮਿਤ੍ਵਾ ਅਰੁਣਂ ਉਟ੍ਠਪੇਤਿ, ਦੋਸੋ ਨਤ੍ਥਿ, ਤਥਾਪਿ ਸਬ੍ਬਟ੍ਠਕਥਾਸੁ ਵੁਤ੍ਤਤ੍ਤਾ ‘‘ਪੁਰਿਮਮੇਵ ਆਚਿਣ੍ਣ’’ਨ੍ਤਿ ਵੁਤ੍ਤਂ. ਪਰਿਵਾਸਵਤ੍ਤਾਦੀਨਨ੍ਤਿ ‘‘ਪਰਿਵਾਸਨਿਸ੍ਸਯਪਟਿਪ੍ਪਸ੍ਸਦ੍ਧਿਆਦੀਨਂ ਉਪਚਾਰਸੀਮਾਯ ਪਰਿਚ੍ਛਿਨ੍ਨਤ੍ਤਾ ਭਿਕ੍ਖੁਨੁਪਸ੍ਸਯਸ੍ਸ ਉਪਚਾਰਸੀਮਾਵ ਗਹੇਤਬ੍ਬਾ, ਨ ਗਾਮੋ’’ਤਿ ਲਿਖਿਤਂ. ‘‘ਤਸ੍ਮਿਂ ਗਾਮੇ ਭਿਕ੍ਖਾਚਾਰੋ ਸਮ੍ਪਜ੍ਜਤੀ’ਤਿਆਦਿ ਪਵਾਰਿਤਵਸੇਨ ਵੁਤ੍ਤਂ. ਨ ਹਿ ਤਤ੍ਥ ਅਨ੍ਤੋਗਾਮੇ ਵਿਹਾਰੋ ਅਤ੍ਥੀ’’ਤਿ ਚ ਲਿਖਿਤਂ, ‘‘ਤਮ੍ਪਿ ਤੇਨ ਪਰਿਯਾਯੇਨ ਯੁਜ੍ਜਤਿ, ਨ ਅਤ੍ਥਤੋ’’ਤਿ ਚ.

ਪਟਿਚ੍ਛਨ੍ਨਪਰਿਵਾਸਾਦਿਕਥਾਵਣ੍ਣਨਾ

੧੦੮. ‘‘ਵਿਸੁਂ ਮਾਨਤ੍ਥਂ ਚਰਿਤਬ੍ਬਨ੍ਤਿ ਮੂਲਾਯ ਪਟਿਕਸ੍ਸਨਂ ਅਕਤ੍ਵਾ ਵਿਸੁਂ ਕਮ੍ਮਵਾਚਾਯਾ’’ਤਿ ਚ ਲਿਖਿਤਂ. ‘‘ਸਙ੍ਘਾਦਿਸੇਸਾਪਤ੍ਤੀ’’ਤਿ ਵੁਤ੍ਤਤ੍ਤਾ ਏਕੋਵ, ਏਕਵਤ੍ਥੁਮ੍ਹਿ ਆਪਨ੍ਨਾ ਸਙ੍ਘਾਦਿਸੇਸਾ ਥੁਲ੍ਲਚ੍ਚਯਦੁਕ੍ਕਟਮਿਸ੍ਸਕਾ ਨਾਮ. ਮਕ੍ਖਧਮ੍ਮੋ ਨਾਮ ਛਾਦੇਤੁਕਾਮਤਾ.

੧੪੩. ਧਮ੍ਮਤਾਤਿ ਧਮ੍ਮਤਾਯ, ਤਥਾਤਾਯਾਤਿ ਅਤ੍ਥੋ ‘‘ਅਲਜ੍ਜਿਤਾ’’ਤਿ ਏਤ੍ਥ ਵਿਯ.

੧੪੮. ਪੁਰਿਮਂ ਉਪਾਦਾਯ ਦ੍ਵੇ ਮਾਸਾ ਪਰਿਵਸਿਤਬ੍ਬਾਤਿ ਏਤ੍ਥ ‘‘ਪਰਿਵਸਿਤਦਿਵਸਾਪਿ ਗਣਨੂਪਗਾ ਹੋਨ੍ਤੀ’’ਤਿ ਲਿਖਿਤਂ.

੧੮੪. ਤਸ੍ਮਿਂ ਭੂਮਿਯਨ੍ਤਿ ਤਸ੍ਸਂ ਭੂਮਿਯਂ. ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪੀਤਿਆਦਿ ਜਾਤਿਵਸੇਨੇਕਵਚਨਂ.

ਸਮੁਚ੍ਚਯਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੪. ਸਮਥਕ੍ਖਨ੍ਧਕਵਣ੍ਣਨਾ

ਸਮ੍ਮੁਖਾਵਿਨਯਕਥਾਵਣ੍ਣਨਾ

੧੮੬-੧੮੭. ਯਤ੍ਥ ਯਤ੍ਥ ਕਮ੍ਮਵਾਚਾਯ ‘‘ਅਯ’’ਨ੍ਤਿ ਵਾ ‘‘ਇਮੇ’’ਤਿ ਵਾ ਸਮ੍ਮੁਖਾਨਿਦ੍ਦੇਸਨਿਯਮੋ ਅਤ੍ਥਿ, ਸਬ੍ਬਂ ਤਂ ਕਮ੍ਮਂ ਸਮ੍ਮੁਖਾਕਰਣੀਯਮੇਵ, ਨ ਕੇਵਲਂ ਤਜ੍ਜਨੀਯਾਦਿਪਞ੍ਚਵਿਧਮੇਵ. ਪਞ੍ਚਵਿਧਸ੍ਸੇਵ ਪਨ ਉਦ੍ਧਰਿਤ੍ਵਾ ਦਸ੍ਸਨਂ ਕਮ੍ਮਕ੍ਖਨ੍ਧਕੇ ਤਾਵ ਤਸ੍ਸੇਵ ਪਾਲ਼ਿਆਰੁਲ਼੍ਹਤ੍ਤਾ, ਚਤੁਵੀਸਤਿਯਾ ਪਾਰਾਜਿਕੇਸੁ ਵਿਜ੍ਜਮਾਨੇਸੁ ਪਾਰਾਜਿਕਕਣ੍ਡੇ ਆਗਤਾਨਂਯੇਵ ਚਤੁਨ੍ਨਂ ਉਦ੍ਧਰਿਤ੍ਵਾ ਦਸ੍ਸਨਂ ਵਿਯਾਤਿ ਵੇਦਿਤਬ੍ਬਂ. ਤਤ੍ਥ ‘‘ਪੁਗ੍ਗਲਸ੍ਸ ਸਮ੍ਮੁਖਤਾ ਹਤ੍ਥਪਾਸੂਪਗਮਨਮੇਵਾ’’ਤਿ ਵੁਤ੍ਤਂ, ਤਂ ਕਾਰਣਂ ਸਮ੍ਮੁਖਾਕਰਣੀਯਸ੍ਸਪਿ ਸਮ੍ਮੁਖਾਨਿਦ੍ਦੇਸਨਿਯਮਾਭਾਵਤੋ. ਕਾਮਂ ਅਯਮਤ੍ਥੋ ਕਮ੍ਮਕ੍ਖਨ੍ਧਕੇਯੇਵ ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਤਜ੍ਜਨੀਯਕਮ੍ਮਂ ਅਧਮ੍ਮਕਮ੍ਮਞ੍ਚ ਹੋਤਿ…ਪੇ… ਅਸਮ੍ਮੁਖਾਕਤਂ ਹੋਤੀ’’ਤਿ (ਚੂਲ਼ਵ. ੪) ਵਚਨੇਨੇਵ ਸਿਦ੍ਧੋ, ਤਤ੍ਥ ਪਨ ਆਪਤ੍ਤਿ ਨ ਦਸ੍ਸਿਤਾ. ਇਧ ‘‘ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਤਤ੍ਥ ਭਵਿਤਬ੍ਬਾਪਤ੍ਤਿਦਸ੍ਸਨਤ੍ਥਂ ਇਦਂ ਆਰਦ੍ਧਨ੍ਤਿ ਵੇਦਿਤਬ੍ਬਂ. ‘‘ਸਮ੍ਮੁਖਾਵਿਨਯਪਤਿਰੂਪਕੇਨ ਵੂਪਸਨ੍ਤਮ੍ਪਿ ਸਮ੍ਮੁਖਾਵਿਨਯੇਨੇਵ ਵੂਪਸਨ੍ਤਗਣਨਂ ਗਚ੍ਛਤੀਤਿ ਦਸ੍ਸੇਤੁਂ ‘ਅਧਮ੍ਮਵਾਦੀ ਪੁਗ੍ਗਲੋ’ਤਿਆਦਿ ਆਰਦ੍ਧ’’ਨ੍ਤਿ ਵੁਤ੍ਤਂ, ਲਿਖਿਤਞ੍ਚ. ਏਵਂ ਵੂਪਸਨ੍ਤਂ ਸਮ੍ਮੁਖਾਵਿਨਯਪਤਿਰੂਪਕੇਨ ਵੂਪਸਨ੍ਤਂ ਨਾਮ ਹੋਤਿ, ਨ ਸਮ੍ਮੁਖਾਵਿਨਯੇਨ ਚ ਅਞ੍ਞੇਨ ਕੇਨਚੀਤਿ ਦਸ੍ਸੇਤੁਂ ਇਦਮਾਰਦ੍ਧਨ੍ਤਿ ਆਚਰਿਯੋ.

ਸਤਿਵਿਨਯਕਥਾਵਣ੍ਣਨਾ

੧੯੫. ਦਬ੍ਬਸ੍ਸ ਕਮ੍ਮਵਾਚਾਯ ‘‘ਸਙ੍ਘੋ ਇਮਂ ਆਯਸ੍ਮਨ੍ਤਂ ਦਬ੍ਬ’’ਨ੍ਤਿ ਸਮ੍ਮੁਖਾਨਿਦ੍ਦੇਸੋ ਨਤ੍ਥਿ, ਤਥਾਪਿ ‘‘ਪਠਮਂ ਦਬ੍ਬੋ ਯਾਚਿਤਬ੍ਬੋ’’ਤਿ ਵਚਨੇਨ ਸਮ੍ਮੁਖਾਕਰਣੀਯਤਾ ਤਸ੍ਸ ਸਿਦ੍ਧਾ. ਤਥਾ ਅਞ੍ਞਤ੍ਥਾਪਿ ਯਥਾਸਮ੍ਭਵਂ ਲੇਸੋ ਵੇਦਿਤਬ੍ਬੋ. ਸਤਿਵੇਪੁਲ੍ਲਪ੍ਪਤ੍ਤਸ੍ਸ ਦਾਤਬ੍ਬੋ ਵਿਨਯੋ ਸਤਿਵਿਨਯੋ.

ਅਮੂਲ਼੍ਹਵਿਨਯਕਥਾਵਣ੍ਣਨਾ

੧੯੬-੭. ‘‘ਯਸ੍ਸ ਉਮ੍ਮਤ੍ਤਕਸ੍ਸ ਤਂਤਂਵੀਤਿਕ੍ਕਮਤੋ ਅਨਾਪਤ੍ਤਿ, ਤਾਦਿਸਸ੍ਸੇਵ ਅਮੂਲ਼੍ਹਵਿਨਯਂ ਦਾਤੁਂ ਵਟ੍ਟਤੀਤਿ ਅਮੂਲ਼੍ਹਸ੍ਸ ਕਤ੍ਤਬ੍ਬਵਿਨਯੋ ਅਮੂਲ਼੍ਹਵਿਨਯੋ’’ਤਿ ਲਿਖਿਤਂ, ਤਂ ਯੁਤ੍ਤਂ ‘‘ਸਙ੍ਘੋ ਗਗ੍ਗਸ੍ਸ ਭਿਕ੍ਖੁਨੋ ਅਮੂਲ਼੍ਹਸ੍ਸ ਅਮੂਲ਼੍ਹਵਿਨਯਂ ਦੇਤੀ’’ਤਿ ਵਚਨਤੋ. ‘‘ਤੀਣਿਮਾਨਿ, ਭਿਕ੍ਖਵੇ, ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨੀ’’ਤਿ ਇਮਸ੍ਸ ਵਿਭਙ੍ਗੇ ‘‘ਨ ਸਰਾਮੀ’’ਤਿ ਵਚਨਂ ਵੀਤਿਕ੍ਕਮਕਾਲਂ ਸਨ੍ਧਾਯ ਤਸ੍ਸ ਵਿਭਙ੍ਗਸ੍ਸ ਪਵਤ੍ਤਤ੍ਤਾ. ਅਮੂਲ਼੍ਹਵਿਨਯਦਾਨਕਾਲੇ ਪਨਸ੍ਸ ਅਮੂਲ਼੍ਹਤਾ ਵਿਨਿਚ੍ਛਿਤਬ੍ਬਾ.

ਪਟਿਞ੍ਞਾਤਕਰਣਕਥਾਵਣ੍ਣਨਾ

੨੦੦. ‘‘ਅਪ੍ਪਟਿਞ੍ਞਾਯ ਭਿਕ੍ਖੂਨਂ ਕਮ੍ਮਾਨਿ ਕਰੋਨ੍ਤੀ’’ਤਿ ਆਰਭਨ੍ਤਸ੍ਸ ਕਾਰਣਂ ਵੁਤ੍ਤਮੇਵ. ਪਟਿਞ੍ਞਾਤੇਨ ਕਰਣਂ ਪਟਿਞ੍ਞਾਤਕਰਣਂ.

ਤਸ੍ਸਪਾਪਿਯਸਿਕਾਕਥਾਵਣ੍ਣਨਾ

੨੦੭. ‘‘ਤੀਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਤਸ੍ਸਪਾਪਿਯਸਿਕਾਕਮ੍ਮ’’ਨ੍ਤਿ ਆਰਭਿਤ੍ਵਾ ਪਞ੍ਚ ਅਙ੍ਗਾਨਿ ਦਸ੍ਸੇਤ੍ਵਾ ਪਾਲ਼ਿ ਗਤਾ, ‘‘ਸਾ ਪੇਯ੍ਯਾਲੇਨ ਸਙ੍ਖਿਪਿਤ੍ਵਾ ਗਤਾਤਿ ਞਾਤਬ੍ਬ’’ਨ੍ਤਿ ਲਿਖਿਤਂ. ਤਥਾ ਸੁਕ੍ਕਪਕ੍ਖੇਪਿ.

ਤਿਣਵਤ੍ਥਾਰਕਾਦਿਕਥਾਵਣ੍ਣਨਾ

੨੧੪. ‘‘ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬ’’ਨ੍ਤਿ ਛਨ੍ਦਦਾਨਸ੍ਸ ਪਟਿਕ੍ਖਿਤ੍ਤਤ੍ਤਾ ਪਵਾਰਣਕ੍ਖਨ੍ਧਕਟ੍ਠਕਥਾਯਞ੍ਚ ‘‘ਭਿਨ੍ਨਸ੍ਸ ਹਿ ਸਙ੍ਘਸ੍ਸ ਸਮਗ੍ਗਕਰਣਕਾਲੇ, ਤਿਣਵਤ੍ਥਾਰਕਸਮਥੇ, ਇਮਸ੍ਮਿਞ੍ਚ ਪਵਾਰਣਸਙ੍ਗਹੇਤਿ ਇਮੇਸੁ ਤੀਸੁ ਠਾਨੇਸੁ ਛਨ੍ਦਂ ਦਾਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੪੧) ਵੁਤ੍ਤਤ੍ਤਾ ਇਧ ਆਗਨ੍ਤ੍ਵਾ ਵਾ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾਤਿ ਇਦਂ ਵਿਰੁਜ੍ਝਤਿ ਵਿਯ ਖਾਯਤੀਤਿ ਚੇ? ਨ ਖਾਯਤਿ ਅਧਿਪ੍ਪਾਯਞ੍ਞੂਨਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਵਿਸੁਜ੍ਝਿਤੁਕਾਮੇਹਿ ਸਬ੍ਬੇਹੇਵ ਸਨ੍ਨਿਪਤਿਤਬ੍ਬਂ, ਅਸਨ੍ਨਿਪਤਿਤਸ੍ਸ ਨਤ੍ਥਿ ਸੁਦ੍ਧਿ ਛਨ੍ਦਦਾਯਕਸ੍ਸ. ਕੇਵਲਂ ਤਂ ਕਮ੍ਮਂ ਸਨ੍ਨਿਪਤਿਤਾਨਂ ਸਮ੍ਪਜ੍ਜਤਿ. ਅਟ੍ਠਕਥਾਯਂ ਵਿਸੁਜ੍ਝਿਤੁਕਾਮਾਨਂ ਛਨ੍ਦਂ ਦਾਤੁਂ ਨ ਵਟ੍ਟਤੀਤਿ ਅਧਿਪ੍ਪਾਯੋ. ਇਤਰਥਾ ਪਾਲ਼ਿਯਾ ਚ ਵਿਰੁਜ੍ਝਤਿ. ‘‘ਠਪੇਤ੍ਵਾ ਯੇ ਨ ਤਤ੍ਥ ਹੋਤੀ’’ਤਿ ਹਿ ਅਯਂ ਪਾਲ਼ਿ ਸਨ੍ਨਿਪਾਤਂ ਆਗਨ੍ਤ੍ਵਾ ਛਨ੍ਦਂ ਦਤ੍ਵਾ ਠਿਤਾਨਂ ਅਤ੍ਥਿਤਂ ਦੀਪੇਤਿ. ਨਿਸ੍ਸੀਮਗਤੇ ਸਨ੍ਧਾਯ ਵੁਤ੍ਤਂ ਸਿਯਾਤਿ ਚੇ? ਨਿਸ੍ਸੀਮਗਤੇ ਠਪੇਤ੍ਵਾ ਇਧ ਕਿਂ, ਤਸ੍ਮਾ ਯੋ ਸਾਮਗ੍ਗੀਉਪੋਸਥੇ ਛਨ੍ਦਂ ਦਤ੍ਵਾ ਤਿਟ੍ਠਤਿ ਚੇ, ਨਾਨਾਸਂਵਾਸਕਭੂਮਿਯਂਯੇਵ ਤਿਟ੍ਠਤਿ, ਤਸ੍ਸ ਛਨ੍ਦਦਾਯਕਸ੍ਸ ਪਵਾਰਣਸਙ੍ਗਹੋਪਿ ਨਤ੍ਥਿ. ਯੋ ਚ ਤਿਣਵਤ੍ਥਾਰਕਕਮ੍ਮੇ ਨਾਗਚ੍ਛਤਿ, ਸੋ ਤਾਹਿ ਆਪਤ੍ਤੀਹਿ ਨ ਸੁਜ੍ਝਤੀਤਿ ਵੇਦਿਤਬ੍ਬਂ. ਯਸ੍ਸ ਏਤਂ ਨ ਰੁਚ੍ਚਤਿ, ਤਸ੍ਸ ਪਰਿਵਾਰੇ ਵੁਤ੍ਤਪਰਿਸਤੋ ਕਮ੍ਮਵਿਪਤ੍ਤਿਲਕ੍ਖਣਂ ਵਿਰੁਜ੍ਝਤਿ, ਤਤ੍ਥ ਹਿ ਕੇਵਲਂ ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ ਸਚੇ, ਅਕਤਂ ਤਬ੍ਬਿਪਰੀਤੇਨ ਸਮ੍ਪਤ੍ਤਿਦੀਪਨਤੋਤਿ ਵੁਤ੍ਤਂ ਹੋਤਿ. ਤਥਾ ਪਤ੍ਤਕਲ੍ਲਲਕ੍ਖਣਮ੍ਪਿ ਵਿਰੁਜ੍ਝਤਿ. ਤੇਸੁ ਤੀਸੁ ਠਾਨੇਸੁ ਕਮ੍ਮਪ੍ਪਤ੍ਤਾਯੇਵ ਸਬ੍ਬੇ, ਨ ਤਤ੍ਥ ਛਨ੍ਦਾਰਹੋ ਅਤ੍ਥੀਤਿ ਚੇ? ਨ, ਚਤੁਵਗ੍ਗਾਦਿਕਰਣਵਿਭਾਜਨੇ ਅਵਿਸੇਸੇਤ੍ਵਾ ਛਨ੍ਦਾਰਹਸ੍ਸ ਆਗਤਤ੍ਤਾ, ਤਂ ਸਾਮਞ੍ਞਤੋ ਵੁਤ੍ਤਂ. ਇਦਞ੍ਚ ਆਵੇਣਿਕਲਕ੍ਖਣਂ, ਤੇਨੇਵ ਸਤਿਪਿ ਦਿਟ੍ਠਾਵਿਕਮ੍ਮੇ ਇਦਂ ਪਟਿਕੁਟ੍ਠਕਤਂ ਨ ਹੋਤੀਤਿ ਚੇ? ਨ, ਨਾਨਤ੍ਤਸਭਾਵਤੋ. ਇਧ ਹਿ ਯੇ ਪਨ ‘‘ਨ ਮੇਤਂ ਖਮਤੀ’ਤਿ ਅਞ੍ਞਮਞ੍ਞਂ ਦਿਟ੍ਠਾਵਿਕਮ੍ਮਂ ਕਰੋਨ੍ਤੀ’’ਤਿ (ਚੂਲ਼ਵ. ਅਟ੍ਠ. ੨੧੪) ਵਚਨਤੋ ਨ ਸਙ੍ਘਸ੍ਸ ਦਿਟ੍ਠਾਵਿਕਮ੍ਮਂ ਕਤਂ. ਤਸ੍ਮਿਂ ਸਤਿ ਪਟਿਕੁਟ੍ਠਕਤਮੇਵ ਹੋਤਿ. ਅਞ੍ਞਥਾ ਪੁਬ੍ਬਭਾਗਾ ਤਾ ਞਤ੍ਤਿਯੋ ਨਿਰਤ੍ਥਿਕਾ ਸਿਯੁਂ, ਨ ਚ ਪਰਿਵਾਰਟ੍ਠਕਥਾਯਂ ਛਨ੍ਦਾਰਹਾਧਿਕਾਰੇ ਨਯੋ ਦਿਨ੍ਨੋ. ਪਵਾਰਣਕ੍ਖਨ੍ਧਕਟ੍ਠਕਥਾਯਂ ‘‘ਤੀਸੁ ਠਾਨੇਸੁ ਛਨ੍ਦਂ ਦਾਤੁਂ ਨ ਵਟ੍ਟਤੀ’’ਤਿ (ਮਹਾਵ. ਅਟ੍ਠ. ੨੪੧) ਵੁਤ੍ਤਤ੍ਤਾ ਵਿਰੁਜ੍ਝਤੀਤਿ ਚੇ? ਨ, ਅਟ੍ਠਕਥਾਯ ਪਮਾਣਭਾਵੇ ਸਤਿ ‘‘ਇਧ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ’’ਤਿਆਦਿ ਵਚਨੇ ਸੁਦ੍ਧਿਕਾਮਤੋ ਏਵ ਗਹਿਤੇ ਸਬ੍ਬਂ ਨ ਵਿਰੁਜ੍ਝਤੀਤਿ ਏਕੇ. ‘‘ਆਗਨ੍ਤ੍ਵਾ ਵਾ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ, ਤੇ ਆਪਤ੍ਤੀਹਿ ਨ ਵੁਟ੍ਠਹਨ੍ਤੀ’’ਤਿ ਇਦਂ ਨ ਵਤ੍ਤਬ੍ਬਂ. ਕਸ੍ਮਾ? ਹੇਟ੍ਠਾ ‘‘ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬ’’ਨ੍ਤਿ ਛਨ੍ਦਦਾਨਸ੍ਸ ਪਟਿਕ੍ਖੇਪਵਚਨਤੋ ਅਟ੍ਠਕਥਾਯਂ ‘‘ਤੀਸੁ ਠਾਨੇਸੁ ਛਨ੍ਦਂ ਦਾਤੁਂ ਨ ਵਟ੍ਟਤੀ’’ਤਿ ਵੁਤ੍ਤਤ੍ਤਾ, ਅਨ੍ਧਕਟ੍ਠਕਥਾਯਮ੍ਪਿ ਤਥੇਵ ਵੁਤ੍ਤਤ੍ਤਾ ਚਾਤਿ? ਨ, ਏਕਜ੍ਝਮੇਵ ਕਮ੍ਮੇ ਕਰੀਯਮਾਨੇ ਯੋ ਇਧ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਮ੍ਹਾਕਂ…ਪੇ… ਗਿਹਿਪਟਿਸਂਯੁਤ੍ਤ’’ਨ੍ਤਿ ਸਾਧਾਰਣਞਤ੍ਤਿਂ ਠਪੇਤ੍ਵਾ ਪੁਨ ‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤਾ’’ਤਿਆਦਿਨਾ ਅਸਾਧਾਰਣਞਤ੍ਤਿਯੋ ਠਪੇਤ੍ਵਾ ‘‘ਸੁਣਾਤੁ ਮੇ, ਭਨ੍ਤੇ ਸਙ੍ਘੋ, ਅਮ੍ਹਾਕਂ…ਪੇ… ਏਵਮੇਤਂ ਧਾਰਯਾਮੀ’’ਤਿ ਏਕਤੋਪਕ੍ਖਿਕਾਨਂ ਸਨ੍ਧਿਯਾ ਕਤਾਯ ਤਦਨਨ੍ਤਰੇ ਕੇਨਚਿ ਕਰਣੀਯੇਨ ਛਨ੍ਦਂ ਦਤ੍ਵਾ ਗਚ੍ਛਤਿ, ਤਸ੍ਸ ਆਪਤ੍ਤੀਹਿ ਵੁਟ੍ਠਾਨਂ ਨਤ੍ਥਿ. ਅਪਰੇਸਮ੍ਪਿ ਏਕਤੋਪਕ੍ਖਿਕਾਨਂ ਅਬ੍ਭਨ੍ਤਰੇ ਠਿਤਤ੍ਤਾ ਵਿਭੂਤਤ੍ਤਾ ਕਰਣਸ੍ਸ ਅਯਮਤ੍ਥੋਵ ਵੁਤ੍ਤੋ. ਸਾਧਾਰਣਵਸੇਨ ਦੁਤਿਯਾਯ ਞਤ੍ਤਿਯਾ ਠਪਿਤਾਯ ਯੇ ਤਸ੍ਮਿਂ ਖਣੇ ਞਤ੍ਤਿਦੁਤਿਯਕਮ੍ਮਵਾਚਾਸੁ ਅਨਾਰਦ੍ਧਾਸੁ, ਅਪਰਿਯੋਸਿਤਾਸੁ ਵਾ ਛਨ੍ਦਂ ਦਤ੍ਵਾ ਗਚ੍ਛਨ੍ਤਿ, ਤੇਸਮ੍ਪਿ ਨ ਵੁਟ੍ਠਾਤਿ ਏਵ. ਯੇ ਨ ਤਤ੍ਥ ਹੋਨ੍ਤੀਤਿ ਪਦਸ੍ਸ ਚ ਯੇ ਵੁਤ੍ਤਪ੍ਪਕਾਰੇਨ ਨਯੇਨ ਤਤ੍ਥ ਨ ਹੋਨ੍ਤੀਤਿ ਅਤ੍ਥੋ ਗਹੇਤਬ੍ਬੋ. ਵੁਤ੍ਤਪ੍ਪਕਾਰਤ੍ਥਦੀਪਨਤ੍ਥਞ੍ਚ ਅਟ੍ਠਕਥਾਯਂ ‘‘ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ’’ਤਿ ਇਦਮੇਵ ਅਵਤ੍ਵਾ ‘‘ਯੇ ਪਨ ਤੇਹਿ ਵਾ ਸਦ੍ਧਿਂ ਆਪਤ੍ਤਿਂ ਆਪਜ੍ਜਿਤ੍ਵਾਪਿ ਤਤ੍ਥ ਅਨਾਗਤਾ, ਆਗਨ੍ਤ੍ਵਾ ਵਾ ਛਨ੍ਦਂ ਦਤ੍ਵਾ ਪਰਿਵੇਣਾਦੀਸੁ ਨਿਸਿਨ੍ਨਾ’’ਤਿ ਵੁਤ੍ਤਂ, ਏਵਂ ਪੁਬ੍ਬੇਨਾਪਰਂ ਸਨ੍ਧੀਯਤਿ. ‘‘ਪਾਲ਼ਿਯਾ ਚ ਤਤ੍ਥ ਦਿਟ੍ਠਾਵਿਕਮ੍ਮੇਨ ਕਮ੍ਮਸ੍ਸ ਅਕੁਪ੍ਪਤਾ ਵੇਦਿਤਬ੍ਬਾ’’ਤਿ ਵੁਤ੍ਤਂ.

ਅਧਿਕਰਣਕਥਾਵਣ੍ਣਨਾ

੨੨੦. ਚਿਤ੍ਤੁਪ੍ਪਾਦੋ ਵਿਵਾਦੋ. ਵਿਵਾਦਸਦ੍ਦੋਪਿ ਕਾਰਣੂਪਚਾਰੇਨ ਕੁਸਲਾਦਿਸਙ੍ਖ੍ਯਂ ਗਚ੍ਛਤਿ. ਤਂ ਸਨ੍ਧਾਯ ‘‘ਸਮਥੇਹਿ ਚ ਅਧਿਕਰਣੀਯਤਾਯ ਅਧਿਕਰਣ’’ਨ੍ਤਿ ਵੁਤ੍ਤਂ. ਅਥ ਵਾ ਵਿਵਾਦਹੇਤੁਭੂਤਸ੍ਸ ਚਿਤ੍ਤੁਪ੍ਪਾਦਸ੍ਸ ਵੂਪਸਮੇਨ ਸਮ੍ਭਵਸ੍ਸ ਸਦ੍ਦਸ੍ਸਪਿ ਵੂਪਸਮੋ ਹੋਤੀਤਿ ਚਿਤ੍ਤੁਪ੍ਪਾਦਸ੍ਸਪਿ ਸਮਥੇਹਿ ਅਧਿਕਰਣੀਯਤਾ ਪਰਿਯਾਯੋ ਸਮ੍ਭਵਤਿ. ‘‘ਕੁਸਲਚਿਤ੍ਤਾ ਵਿਵਦਨ੍ਤੀ’’ਤਿ ਵੁਤ੍ਤਵਿਵਾਦੇਪਿ ‘‘ਵਿਪਚ੍ਚਤਾਯ ਵੋਹਾਰੋ’’ਤਿ ਵੁਤ੍ਤਂ, ਨ ਵੁਤ੍ਤਵਚਨਹੇਤੁਵਸੇਨਾਤਿ ਵੇਦਿਤਬ੍ਬਂ.

੨੨੨. ‘‘ਆਪਤ੍ਤਿਞ੍ਹਿ ਆਪਜ੍ਜਨ੍ਤੋ ਕੁਸਲਚਿਤ੍ਤੋ ਵਾ’’ਤਿ ਵਚਨਤੋ ਕੁਸਲਮ੍ਪਿ ਸਿਯਾਤਿ ਚੇ? ਨ ਤਂ ਆਪਤ੍ਤਾਧਿਕਰਣਂ ਸਨ੍ਧਾਯ ਵੁਤ੍ਤਂ, ਯੋ ਆਪਤ੍ਤਿਂ ਆਪਜ੍ਜਤਿ, ਸੋ ਤੀਸੁ ਚਿਤ੍ਤੇਸੁ ਅਞ੍ਞਤਰਚਿਤ੍ਤਸਮਙ੍ਗੀ ਹੁਤ੍ਵਾ ਆਪਜ੍ਜਤੀਤਿ ਦਸ੍ਸਨਤ੍ਥਂ ‘‘ਯਂ ਕੁਸਲਚਿਤ੍ਤੋ ਆਪਜ੍ਜਤੀ’’ਤਿਆਦਿ ਵੁਤ੍ਤਂ. ਯੋ ‘‘ਪਞ੍ਞਤ੍ਤਿਮਤ੍ਤਂ ਆਪਤ੍ਤਾਧਿਕਰਣ’’ਨ੍ਤਿ ਵਦੇਯ੍ਯ, ਤਸ੍ਸ ਅਕੁਸਲਾਦਿਭਾਵੋਪਿ ਆਪਤ੍ਤਾਧਿਕਰਣਸ੍ਸ ਨ ਯੁਜ੍ਜਤੇਵ ਵਿਵਾਦਾਧਿਕਰਣਾਦੀਨਂ ਵਿਯਾਤਿ ਚੇ? ਨ, ‘‘ਨਤ੍ਥਾਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਇਮਿਨਾ ਵਿਰੋਧਸਮ੍ਭਵਤੋ. ਅਨੁਗਣ੍ਠਿਪਦੇ ਪਨ ‘‘ਆਪਤ੍ਤਾਧਿਕਰਣਂ ਨਾਮ ਤਥਾਪਵਤ੍ਤਮਾਨਅਕਉਸਲਚਿਤ੍ਤੁਪ੍ਪਾਦਰੂਪਕ੍ਖਨ੍ਧਾਨਮੇਤਂ ਅਧਿਵਚਨਂ. ਅਵਸਿਟ੍ਠੇਸੁ ਕੁਸਲਾਬ੍ਯਾਕਤਪਞ੍ਞਤ੍ਤੀਸੁ ‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲਂ ਸਿਯਾ ਅਬ੍ਯਾਕਤ’ਨ੍ਤਿ ਵਚਨਤੋ ਪਞ੍ਞਤ੍ਤਿਤਾਵ ਪਟਿਸਿਦ੍ਧਾ ਕੁਸਲਤ੍ਤਿਕੇ ਅਪਰਿਯਾਪਨ੍ਨਤ੍ਤਾ. ਕੁਸਲਪਟਿਸੇਧੇਨੇਵ ਤੇਨ ਸਮਾਨਗਤਿਕਤ੍ਤਾ ਕਿਰਿਯਾਬ੍ਯਾਕਤਾਨਮ੍ਪਿ ਪਟਿਸੇਧੋ ਵੇਦਿਤਬ੍ਬੋ, ਕਿਰਿਯਾਬ੍ਯਾਕਤਾਨਂ ਵਿਯ ਅਨੁਗਮਨਤੋ ਵਿਪਾਕਾਬ੍ਯਾਕਤਾਨਮ੍ਪਿ ਪਟਿਸੇਧੋ ਕਤੋਵ ਹੋਤਿ, ਤਥਾਪਿ ਅਬ੍ਯਾਕਤਸਾਮਞ੍ਞਤੋ ਰੂਪਕ੍ਖਨ੍ਧੇਨ ਸਦ੍ਧਿਂ ਵਿਪਾਕਕਿਰਿਯਾਬ੍ਯਾਕਤਾਨਮ੍ਪਿ ਅਧਿਵਚਨਨ੍ਤਿ ਵੇਦਿਤਬ੍ਬ’’ਨ੍ਤਿ ਵੁਤ੍ਤਂ. ਤਤ੍ਥ ‘‘ਕੁਸਲਚਿਤ੍ਤਂ ਅਙ੍ਗਂ ਹੋਤੀ’’ਤਿ ਵਿਨਯੇ ਅਪਕਤਞ੍ਞੁਨੋ ਸਨ੍ਧਾਯ ਵੁਤ੍ਤਂ ਅਪ੍ਪਹਰਿਤਕਰਣਾਦਿਕੇ ਸਤਿ. ਤਸ੍ਮਾਤਿ ਯਸ੍ਮਾ ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਤ੍ਤੁਂ ਨ ਸਕ੍ਕਾ, ਤਸ੍ਮਾ ਕੁਸਲਚਿਤ੍ਤਂ ਅਙ੍ਗਂ ਨ ਹੋਤੀਤਿ ਅਤ੍ਥੋ. ਯਦਿ ਏਵਂ ਕਸ੍ਮਾ ‘‘ਤਿਚਿਤ੍ਤਂ ਤਿਵੇਦਨ’’ਨ੍ਤਿ ਵੁਚ੍ਚਤੀਤਿ ਚੇ? ਤਂ ਦਸ੍ਸੇਤੁਂ ‘‘ਨਯਿਦ’’ਨ੍ਤਿਆਦਿ ਆਰਦ੍ਧਨ੍ਤਿ ਏਕੇ. ਆਪਤ੍ਤਿਸਮੁਟ੍ਠਾਪਕਚਿਤ੍ਤਂ ਅਙ੍ਗਪ੍ਪਹੋਨਕਚਿਤ੍ਤਂ ਨਾਮ. ‘‘ਏਕਨ੍ਤਤੋਤਿ ਯੇਭੁਯ੍ਯੇਨਾਤਿ ਅਤ੍ਥੋ, ਇਤਰਥਾ ਵਿਰੁਜ੍ਝਤਿ. ਕਸ੍ਮਾ? ‘ਯਸ੍ਸਾ ਸਚਿਤ੍ਤਕਪਕ੍ਖੇ ਚਿਤ੍ਤਂ ਅਕੁਸਲਮੇਵ ਹੋਤੀ’ਤਿ (ਕਙ੍ਖਾ. ਅਟ੍ਠ. ਪਠਮਪਾਰਾਜਿਕਵਣ੍ਣਨਾ) ਵੁਤ੍ਤਤ੍ਤਾ’’ਤਿ ਵਦਨ੍ਤਿ. ਤੇਨ ਕਿਂ? ਵਿਪਾਕੋ ਨਤ੍ਥਿ, ਕਸ੍ਮਾ? ਏਕਨ੍ਤਾਕੁਸਲਤ੍ਤਾ, ਤਸ੍ਮਾ ਕਥਾਵ ਤਤ੍ਥ ਨਤ੍ਥਿ. ਯਤ੍ਥ ਪਨ ਅਤ੍ਥਿ, ਤਂ ਦਸ੍ਸੇਨ੍ਤੋ ‘‘ਯਂ ਪਨ ਪਣ੍ਣਤ੍ਤਿਵਜ੍ਜ’’ਨ੍ਤਿਆਦਿਮਾਹ. ਅਸਞ੍ਚਿਚ੍ਚ ਪਨ ਕਿਞ੍ਚਿ ਅਜਾਨਨ੍ਤਸ੍ਸ…ਪੇ… ਅਬ੍ਯਾਕਤਂ ਹੋਤੀਤਿ ਭਿਕ੍ਖੁਮ੍ਹਿ ਕਮ੍ਮਟ੍ਠਾਨਗਤਚਿਤ੍ਤੇਨ ਨਿਪਨ੍ਨੇ, ਨਿਦ੍ਦਾਯਨ੍ਤੇ ਵਾ ਮਾਤੁਗਾਮੋ ਚੇ ਸੇਯ੍ਯਂ ਕਪ੍ਪੇਤਿ, ਤਸ੍ਸ ਭਿਕ੍ਖੁਨੋ ਵਿਜ੍ਜਮਾਨਮ੍ਪਿ ਕੁਸਲਚਿਤ੍ਤਂ ਆਪਤ੍ਤਿਯਾ ਅਙ੍ਗਂ ਨ ਹੋਤਿ, ਤਸ੍ਮਾ ਤਸ੍ਮਿਂ ਖਣੇ ਸੇਯ੍ਯਾਕਾਰੇਨ ਵਤ੍ਤਮਾਨਰੂਪਮੇਵ ਆਪਤ੍ਤਾਧਿਕਰਣਂ ਨਾਮ. ਭਵਙ੍ਗਚਿਤ੍ਤੇ ਵਿਜ੍ਜਮਾਨੇਪਿ ਏਸੇਵ ਨਯੋ. ਤਸ੍ਮਿਞ੍ਹਿ ਖਣੇ ਉਟ੍ਠਾਤਬ੍ਬੇ ਜਾਤੇ ਅਨੁਟ੍ਠਾਨਤੋ ਰੂਪਕ੍ਖਨ੍ਧੋਵ ਆਪਤ੍ਤਿ ਨਾਮ, ਨ ਵਿਪਾਕੇਨ ਸਦ੍ਧਿਂ. ਸਚੇ ਪਨ ਵਦੇਯ੍ਯ, ਤਸ੍ਸ ਏਵਂਵਾਦਿਨੋ ਅਚਿਤ੍ਤਕਾਨਂ ਕੁਸਲਚਿਤ੍ਤਂ ਆਪਜ੍ਜੇਯ੍ਯ. ਕਿਂ ਵੁਤ੍ਤਂ ਹੋਤਿ? ਏਲ਼ਕਲੋਮਂ ਗਹੇਤ੍ਵਾ ਕਮ੍ਮਟ੍ਠਾਨਮਨਸਿਕਾਰੇਨ ਤਿਯੋਜਨਂ ਅਤਿਕ੍ਕਮਨ੍ਤਸ੍ਸ, ਪਣ੍ਣਤ੍ਤਿਂ ਅਜਾਨਿਤ੍ਵਾ ਪਦਸੋ ਧਮ੍ਮਂ ਵਾਚੇਨ੍ਤਸ੍ਸ ਚ ਆਪਜ੍ਜਿਤਬ੍ਬਾਪਤ੍ਤਿਯਾ ਕੁਸਲਚਿਤ੍ਤਂ ਆਪਜ੍ਜੇਯ੍ਯਾਤਿ. ਆਪਜ੍ਜਤਿਯੇਵਾਤਿ ਚੇ? ਨਾਪਜ੍ਜਤਿ. ਕਸ੍ਮਾ? ‘‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’’ਨ੍ਤਿ ਵਚਨਤੋ.

ਚਲਿਤੋ ਕਾਯੋ, ਪਵਤ੍ਤਾ ਵਾਚਾ, ਅਞ੍ਞਤਰਮੇਵ ਅਙ੍ਗਨ੍ਤਿ ਅਞ੍ਞਤਰਮੇਵ ਆਪਤ੍ਤੀਤਿ ਅਤ੍ਥੋ. ਕੇਵਲਂ ਪਞ੍ਞਤ੍ਤਿਯਾ ਅਕੁਸਲਾਦਿਭਾਵਾਸਮ੍ਭਵਤੋ ਆਪਤ੍ਤਿਤਾ ਨ ਯੁਜ੍ਜਤਿ. ਆਪਤ੍ਤਿਂ ਆਪਜ੍ਜਨ੍ਤੋ ਤੀਸੁ ਅਞ੍ਞਤਰਸਮਙ੍ਗੀ ਹੁਤ੍ਵਾ ਆਪਜ੍ਜਤੀਤਿ ਦਸ੍ਸਨਤ੍ਥਂ ‘‘ਯਂ ਕੁਸਲਚਿਤ੍ਤੋ’’ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਪਥਵੀਖਣਨਾਦੀਸੁ ਕੁਸਲਚਿਤ੍ਤਕ੍ਖਣੇ ਵੀਤਿਕ੍ਕਮਵਸੇਨ ਪਵਤ੍ਤਰੂਪਸਮ੍ਭਵਤੋ ਕੁਸਲਚਿਤ੍ਤੋ ਵਾ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤਿ. ਤਥਾ ਅਬ੍ਯਾਕਤਚਿਤ੍ਤੋ ਵਾ ਅਬ੍ਯਾਕਤਰੂਪਸਙ੍ਖਾਤਂ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤਿ, ਪਾਣਾਤਿਪਾਤਾਦੀਸੁ ਅਕੁਸਲਚਿਤ੍ਤੋ ਵਾ ਅਕੁਸਲਾਪਤ੍ਤਿਂ ਆਪਜ੍ਜਤਿ, ਰੂਪਂ ਪਨੇਤ੍ਥ ਅਬ੍ਬੋਹਾਰਿਕਂ. ਸੁਪਿਨਪਸ੍ਸਨਕਾਲਾਦੀਸੁ ਪਾਣਾਤਿਪਾਤਾਦਿਂ ਕਰੋਨ੍ਤੋ ਸਹਸੇਯ੍ਯਾਦਿਵਸੇਨ ਆਪਜ੍ਜਿਤਬ੍ਬਾਪਤ੍ਤਿਂ ਆਪਜ੍ਜਨ੍ਤੋ ਅਕੁਸਲਚਿਤ੍ਤੋ ਅਬ੍ਯਾਕਤਾਪਤ੍ਤਿਂ ਆਪਜ੍ਜਤੀਤਿ ਵੇਦਿਤਬ੍ਬੋ. ਇਦਂ ਵੁਚ੍ਚਤਿ ਆਪਤ੍ਤਾਧਿਕਰਣਂ ਅਕੁਸਲਨ੍ਤਿ ਅਕੁਸਲਚਿਤ੍ਤੁਪ੍ਪਾਦੋ. ਪੋਰਾਣਗਣ੍ਠਿਪਦੇਸੁ ਪਨ ‘‘ਪੁਥੁਜ੍ਜਨੋ ਕਲ੍ਯਾਣਪੁਥੁਜ੍ਜਨੋ ਸੇਕ੍ਖੋ ਅਰਹਾਤਿ ਚਤ੍ਤਾਰੋ ਪੁਗ੍ਗਲੇ ਦਸ੍ਸੇਤ੍ਵਾ ਤੇਸੁ ਅਰਹਤੋ ਆਪਤ੍ਤਾਧਿਕਰਣਂ ਅਬ੍ਯਾਕਤਮੇਵ, ਤਥਾ ਸੇਕ੍ਖਾਨਂ, ਤਥਾ ਕਲ੍ਯਾਣਪੁਥੁਜ੍ਜਨਸ੍ਸ ਅਸਞ੍ਚਿਚ੍ਚ ਵੀਤਿਕ੍ਕਮਕਾਲੇ ਅਬ੍ਯਾਕਤਮੇਵ. ਇਤਰਸ੍ਸ ਅਕੁਸਲਮ੍ਪਿ ਹੋਤਿ ਅਬ੍ਯਾਕਤਮ੍ਪਿ. ਯਸ੍ਮਾ ਚਸ੍ਸ ਸਞ੍ਚਿਚ੍ਚ ਵੀਤਿਕ੍ਕਮਕਾਲੇ ਅਕੁਸਲਮੇਵ ਹੋਤਿ, ਤਸ੍ਮਾ ਵੁਤ੍ਤਂ ‘ਨਤ੍ਥਿ ਆਪਤ੍ਤਾਧਿਕਰਣਂ ਕੁਸਲ’ਨ੍ਤਿ. ਸਬ੍ਬਤ੍ਥ ਅਬ੍ਯਾਕਤਂ ਨਾਮ ਤਸ੍ਸ ਵਿਪਾਕਾਭਾਵਮਤ੍ਤਂ ਸਨ੍ਧਾਯ ਏਵਂਨਾਮਕਂ ਜਾਤ’’ਨ੍ਤਿ ਲਿਖਿਤਂ, ਵਿਚਾਰੇਤ੍ਵਾ ਗਹੇਤਬ੍ਬਂ.

੨੨੪. ਵਿਵਾਦੋ ਵਿਵਾਦਾਧਿਕਰਣਨ੍ਤਿ ਯੋ ਕੋਚਿ ਵਿਵਾਦੋ, ਸੋ ਸਬ੍ਬੋ ਕਿਂ ਵਿਵਾਦਾਧਿਕਰਣਂ ਨਾਮ ਹੋਤੀਤਿ ਏਕਪੁਚ੍ਛਾ. ‘‘ਵਿਵਾਦੋ ਅਧਿਕਰਣਨ੍ਤਿ ਵਿਵਾਦਾਧਿਕਰਣਮੇਵ ਵਿਵਾਦੋ ਚ ਅਧਿਕਰਣਞ੍ਚਾਤਿ ਪੁਚ੍ਛਤਿ. ਤਦੁਭਯਂ ਵਿਵਾਦਾਧਿਕਰਣਮੇਵਾਤਿ ਪੁਚ੍ਛਤੀਤਿ ਵੁਤ੍ਤਂ ਹੋਤੀ’’ਤਿ ਪੋਰਾਣਗਣ੍ਠਿਪਦੇ ਵੁਤ੍ਤਂ. ਕੇਸੁਚਿ ਪੋਤ੍ਥਕੇਸੁ ਅਯਂ ਪੁਚ੍ਛਾ ਨਤ੍ਥਿ. ਯਦਿ ਏਵਂ ਇਮਾਯ ਨ ਭਵਿਤਬ੍ਬਂ ਵਿਵਾਦੋ ਵਿਵਾਦਾਧਿਕਰਣਂ, ਵਿਵਾਦਾਧਿਕਰਣਂ ਵਿਵਾਦੋ, ਵਿਵਾਦਾਧਿਕਰਣਂ ਵਿਵਾਦੋ ਚੇਵ ਅਧਿਕਰਣਞ੍ਚਾਤਿ ਪਞ੍ਚਪਞ੍ਹਾਹਿ ਭਵਿਤਬ੍ਬਂ ਸਿਯਾ. ਕੇਸੁਚਿ ਪੋਤ੍ਥਕੇਸੁ ਤਿਸ੍ਸੋ, ਕੇਸੁਚਿ ਚਤਸ੍ਸੋ, ਪਞ੍ਚ ਨਤ੍ਥਿ. ਤਤ੍ਥ ਦ੍ਵੇ ਵਿਭਤ੍ਤਾ. ਇਤਰਾਸੁ ਅਧਿਕਰਣਂ ਵਿਵਾਦੋਤਿ ਯਂ ਕਿਞ੍ਚਿ ਅਧਿਕਰਣਂ, ਵਿਵਾਦਸਙ੍ਖ੍ਯਮੇਵ ਗਚ੍ਛਤਿ, ਵਿਵਾਦੋ ਅਧਿਕਰਣਨ੍ਤਿ ਯੋ ਕੋਚਿ ਵਿਵਾਦੋ, ਸੋ ਸਬ੍ਬੋ ਅਧਿਕਰਣਸਙ੍ਖ੍ਯਂ ਗਚ੍ਛਤੀਤਿ ਪੁਚ੍ਛਤਿ. ਏਸ ਨਯੋ ਸਬ੍ਬਤ੍ਥ.

੨੨੮. ਸਮ੍ਮੁਖਾਵਿਨਯਸ੍ਮਿਨ੍ਤਿ ਸਮ੍ਮੁਖਾਵਿਨਯਭਾਵੇ.

੨੩੦. ‘‘ਅਨ੍ਤਰੇਨਾਤਿ ਕਾਰਣੇਨਾ’’ਤਿ ਲਿਖਿਤਂ.

੨੩੩. ਉਬ੍ਬਾਹਿਕਾਯ ਖਿਯ੍ਯਨਕੇ ਪਾਚਿਤ੍ਤਿ ਨ ਵੁਤ੍ਤਾ ਤਤ੍ਥ ਛਨ੍ਦਦਾਨਸ੍ਸ ਨਤ੍ਥਿਤਾਯ.

੨੩੬. ਤਸ੍ਸ ਖੋ ਏਤਨ੍ਤਿ ਏਸੋਤਿ ਅਤ੍ਥੋ ‘‘ਏਤਦਗ੍ਗ’’ਨ੍ਤਿ ਏਤ੍ਥ ਵਿਯ.

੨੩੮. ‘‘ਕਾ ਚ ਤਸ੍ਸ ਪਾਪਿਯਸਿਕਾ’’ਤਿ ਕਿਰ ਪਾਠੋ.

੨੪੨. ‘‘ਕਿਚ੍ਚਮੇਵ ਕਿਚ੍ਚਾਧਿਕਰਣ’’ਨ੍ਤਿ ਵਚਨਤੋ ਅਪਲੋਕਨਕਮ੍ਮਾਦੀਨਮੇਤਂ ਅਧਿਵਚਨਂ, ਤਂ ਵਿਵਾਦਾਧਿਕਰਣਾਦੀਨਿ ਵਿਯ ਸਮਥੇਹਿ ਸਮੇਤਬ੍ਬਂ ਨ ਹੋਤਿ, ਕਿਨ੍ਤੁ ਸਮ੍ਮੁਖਾਵਿਨਯੇਨ ਸਮ੍ਪਜ੍ਜਤੀਤਿ ਅਤ੍ਥੋ.

ਸਮਥਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੫. ਖੁਦ੍ਦਕਵਤ੍ਥੁਕ੍ਖਨ੍ਧਕਵਣ੍ਣਨਾ

ਖੁਦ੍ਦਕਵਤ੍ਥੁਕਥਾਵਣ੍ਣਨਾ

੨੪੪. ਪੁਥੁਪਾਣਿਨਾ ਕਤ੍ਤਬ੍ਬਂ ਕਮ੍ਮਂ ਪੁਥੁਪਾਣਿਕਂ.

੨੪੫. ‘‘ਕਣ੍ਣਤੋ ਨਿਕ੍ਖਨ੍ਤਮੁਤ੍ਤੋਲਮ੍ਬਕਾਦੀਨਂ ਕੁਣ੍ਡਲਾਦੀਨ’’ਨ੍ਤਿ ਲਿਖਿਤਂ. ‘‘ਕਾਯੂਰ’’ਨ੍ਤਿ ਪਾਲ਼ਿਪਾਠੋ. ‘‘ਕੇਯੂਰਾਦੀਨੀ’’ਤਿ ਆਚਰਿਯੇਨੁਦ੍ਧਟਂ.

੨੪੮. ‘‘ਸਾਧੁਗੀਤਂ ਨਾਮ ਪਰਿਨਿਬ੍ਬੁਤਟ੍ਠਾਨੇ ਗੀਤ’’ਨ੍ਤਿ ਲਿਖਿਤਂ. ਦਨ੍ਤਗੀਤਂ ਗਾਯਿਤੁਕਾਮਾਨਂ ਵਾਕ੍ਕਕਰਣੀਯਂ. ਦਨ੍ਤਗੀਤਸ੍ਸ ਵਿਭਾਵਨਤ੍ਥਂ ‘‘ਯਂ ਗਾਯਿਸ੍ਸਾਮਾ’’ਤਿਆਦਿਮਾਹ.

੨੪੯. ਚਤੁਰਸ੍ਸਵਤ੍ਤਂ ਨਾਮ ਚਤੁਪ੍ਪਾਦਗਾਥਾਵਤ੍ਤਂ. ‘‘ਤਰਙ੍ਗਵਤ੍ਤਾਦੀਨਿ ਉਚ੍ਚਾਰਣਵਿਧਾਨਾਨਿ ਨਟ੍ਠਪਯੋਗਾਨੀ’’ਤਿ ਲਿਖਿਤਂ. ਬਾਹਿਰਲੋਮਿਨ੍ਤਿ ਭਾਵਨਪੁਂਸਕਂ, ਯਥਾ ਤਸ੍ਸ ਉਣ੍ਣਪਾਵਾਰਸ੍ਸ ਬਹਿਦ੍ਧਾ ਲੋਮਾਨਿ ਦਿਸ੍ਸਨ੍ਤਿ, ਤਥਾ ਧਾਰੇਨ੍ਤਸ੍ਸ ਦੁਕ੍ਕਟਨ੍ਤਿ ਵੁਤ੍ਤਂ ਹੋਤਿ.

੨੫੧. ਵਿਰੂਪਕ੍ਖੇਹੀਤਿਆਦਿ ਸਹਯੋਗਕਰਣਵਚਨਂ. ਸਰਬੂਤਿ ਗੇਹਗੋਲ਼ਿਕਾ. ਸਾ ਕਿਰ ਸੇਤਾ ਸਵਿਸਾ ਹੋਤਿ. ਸੋਹਨ੍ਤਿ ਯਸ੍ਸ ਮੇ ਏਤੇਹਿ ਮੇਤ੍ਤਂ, ਸੋਹਂ ਨਮੋ ਕਰੋਮਿ ਭਗਵਤੋਤਿ ਸਮ੍ਬਨ੍ਧੋ. ਅਞ੍ਞਮ੍ਹਿ…ਪੇ… ਛੇਤਬ੍ਬਮ੍ਹੀਤਿ ਰਾਗਾਨੁਸਯੇ.

੨੫੨. ਉਟ੍ਟਿਤ੍ਵਾਤਿ ਪਕ੍ਖਿਪਿਤ੍ਵਾ. ਓਤਰਤੂਤਿ ਇਦ੍ਧਿਯਾ ਓਤਾਰੇਤ੍ਵਾ ਗਣ੍ਹਾਤੁ. ਅਨੁਪਰਿਯਾਯੀਤਿ ਅਨੁਪਰਿਬ੍ਭਮਿ.

੨੫੩. ਨ ਅਚ੍ਛੁਪਿਯਨ੍ਤੀਤਿ ਨ ਲਗ੍ਗਨ੍ਤਿ. ਰੂਪਕਾਕਿਣ੍ਣਾਨੀਤਿ ਇਤ੍ਥਿਰੂਪਾਦੀਹਿ ਵੋਕਿਣ੍ਣਾਨਿ.

੨੫੪. ਆਲਿਨ੍ਦਕਮਿਡ੍ਢਿਕਾਦੀਨਨ੍ਤਿ ਪਮੁਖਮਿਡ੍ਢਿਕਾਦੀਨਂ. ਪਰਿਵਤ੍ਤੇਤ੍ਵਾ ਤਤ੍ਥੇਵਾਤਿ ਏਤ੍ਥ ‘‘ਪਰਿਵਤ੍ਤੇਤ੍ਵਾ ਤਤਿਯਵਾਰੇ ਤਤ੍ਥੇਵ ਮਿਡ੍ਢਿਯਾ ਪਤਿਟ੍ਠਾਤੀ’’ਤਿ ਲਿਖਿਤਂ. ਪਰਿਭਣ੍ਡਂ ਨਾਮ ਗੇਹਸ੍ਸ ਬਹਿ ਕੁਟ੍ਟਪਾਦਸ੍ਸ ਥਿਰਭਾਵਤ੍ਥਂ ਕਤਾ ਤਨੁਕਮਿਡ੍ਢਿਕਾ ਵੁਚ੍ਚਤਿ. ਏਤ੍ਥ ‘‘ਪਰਿਵਟ੍ਟਿਤ੍ਵਾ ਪਤ੍ਤੋ ਭਿਜ੍ਜਤੀਤਿ ਅਧਿਕਰਣਭੇਦਾਸਙ੍ਕਾਯ ਅਭਾਵੇ ਠਾਨੇ ਠਪੇਤੁਂ ਵਟ੍ਟਤੀ’’ਤਿ ਲਿਖਿਤਂ. ਪਤ੍ਤਮਾਲ਼ਕੋ ਵਟ੍ਟਿਤ੍ਵਾ ਪਤ੍ਤਾਨਂ ਅਪਤਨਤ੍ਥਂ ਵਟ੍ਟਂ ਵਾ ਚਤੁਰਸ੍ਸਂ ਵਾ ਇਟ੍ਠਕਾਦੀਹਿ ਪਰਿਕ੍ਖਿਪਿਤ੍ਵਾ ਮਾਲ਼ਕਚ੍ਛਨ੍ਨੇਨ ਕਤੋ. ‘‘ਪਤ੍ਤਮਣ੍ਡਲਿਕਾ ਪਤ੍ਤਪਚ੍ਛਿਕਾ ਤਾਲਪਤ੍ਤਾਦੀਹਿ ਕਤਾ’’ਤਿ ਚ ਲਿਖਿਤਂ. ਮਿਡ੍ਢਨ੍ਤੇ ਆਧਾਰਕੇ ਠਪੇਤੁਂ ਵਟ੍ਟਤਿ ਪਤ੍ਤਸਨ੍ਧਾਰਣਤ੍ਥਂ ਵੁਤ੍ਤਤ੍ਤਾ. ਮਞ੍ਚੇ ਆਧਾਰਕੇਪਿ ਨ ਵਟ੍ਟਤਿ ਨਿਸੀਦਨਪਚ੍ਚਯਾ ਵਾਰਿਤਤ੍ਤਾ. ਆਸਨ੍ਨਭੂਮਿਕਤ੍ਤਾ ਓਲਮ੍ਬੇਤੁਂ ਵਟ੍ਟਤਿ.

੨੫੫. ‘‘ਅਂਸਕੂਟੇ ਲਗ੍ਗੇਤ੍ਵਾਤਿ ਵਚਨਤੋ ਅਗ੍ਗਹਤ੍ਥੇ ਲਗ੍ਗੇਤ੍ਵਾ ਅਙ੍ਕੇ ਠਪੇਤੁਂ ਨ ਵਟ੍ਟਤੀ’’ਤਿ ਕੇਚਿ ਵਦਨ੍ਤਿ, ਨ ਸੁਨ੍ਦਰਂ, ‘‘ਨ ਕੇਵਲਂ ਯਸ੍ਸ ਪਤ੍ਤੋ’’ਤਿਆਦਿ ਯਦਿ ਹਤ੍ਥੇਨ ਗਹਿਤਪਤ੍ਤੇ ਭੇਦਸਞ੍ਞਾ, ਪਗੇਵ ਅਞ੍ਞੇਨ ਸਰੀਰਾਵਯਵੇਨਾਤਿ ਕਤ੍ਵਾ ਵੁਤ੍ਤਂ. ਪਾਲ਼ਿਯਂ ਪਨ ਪਚੁਰਵੋਹਾਰਵਸੇਨ ਵੁਤ੍ਤਂ. ਘਟਿਕਪਾਲਮਯਂ ਘਟਿਕਟਾਹਂ. ਛਵਸੀਸਸ੍ਸ ਪਤ੍ਤਨ੍ਤਿ ‘‘ਸਿਲਾਪੁਤ੍ਤਕਸ੍ਸ ਸਰੀਰਂ, ਖੀਰਸ੍ਸ ਧਾਰਾਤਿਆਦਿਵੋਹਾਰਵਸੇਨ ਵੁਤ੍ਤਂ. ਮਞ੍ਚੇ ਨਿਸੀਦਿਤੁਂ ਆਗਤੋਤਿ ਅਤ੍ਥੋ. ‘‘ਪਿਸਾਚਿਲ੍ਲਿਕਾਤਿ ਪਿਸਾਚਦਾਰਕਾ’’ਤਿਪਿ ਵਦਨ੍ਤਿ. ਦਿਨ੍ਨਕਮੇਵ ਪਟਿਗ੍ਗਹਿਤਮੇਵ. ਚਬ੍ਬੇਤ੍ਵਾਤਿ ਖਾਦਿਤ੍ਵਾ. ਅਟ੍ਠਿਕਾਨਿ ਚ ਕਣ੍ਟਕਾਨਿ ਚ ਅਟ੍ਠਿਕਕਣ੍ਟਕਾਨਿ. ‘‘ਏਤੇਸੁ ਸਬ੍ਬੇਸੁ ਪਣ੍ਣਤ੍ਤਿਂ ਜਾਨਾਤੁ ਵਾ, ਮਾ ਵਾ, ਆਪਤ੍ਤਿਯੇਵਾ’’ਤਿ ਲਿਖਿਤਂ.

੨੫੬. ਵਿਪ੍ਫਾਲ਼ੇਤ੍ਵਾਤਿ ਫਾਲ਼ੇਤ੍ਵਾ. ਕਿਣ੍ਣੇਨ ਪੂਰੇਤੁਨ੍ਤਿ ਸੁਰਾਕਿਣ੍ਣੇਨ ਪੂਰੇਤੁਂ. ਬਿਦਲਕਂ ਨਾਮ ਦਿਗੁਣਕਰਣਸਙ੍ਖਾਤਸ੍ਸ ਕਿਰਿਯਾਵਿਸੇਸਸ੍ਸ ਅਧਿਵਚਨਂ. ਕਸ੍ਸ ਦਿਗੁਣਕਰਣਂ? ਯੇਨ ਕਿਲਞ੍ਜਾਦਿਨਾ ਮਹਨ੍ਤਂ ਕਥਿਨਮਤ੍ਥਤਂ, ਤਸ੍ਸ. ਤਞ੍ਹਿ ਦਣ੍ਡਕਥਿਨਪ੍ਪਮਾਣੇਨ ਪਰਿਯਨ੍ਤੇ ਸਂਹਰਿਤ੍ਵਾ ਦਿਗੁਣਂ ਕਾਤਬ੍ਬਂ. ਅਞ੍ਞਥਾ ਖੁਦ੍ਦਕਚੀਵਰਸ੍ਸ ਅਨੁਵਾਤਪਰਿਭਣ੍ਡਾਦਿਵਿਧਾਨਕਰਣੇ ਹਤ੍ਥਸ੍ਸ ਓਕਾਸੋ ਨ ਹੋਤਿ. ਸਲਾਕਾਯ ਸਤਿ ਦ੍ਵਿਨ੍ਨਂ ਚੀਵਰਾਨਂ ਅਞ੍ਞਤਰਂ ਞਤ੍ਵਾ ਸਿਬ੍ਬਿਤਾਸਿਬ੍ਬਿਤਂ ਸੁਖਂ ਪਞ੍ਞਾਯਤਿ. ਦਣ੍ਡਕਥਿਨੇ ਕਤੇ ਨ ਬਹੂਹਿ ਸਹਾਯੇਹਿ ਪਯੋਜਨਂ. ‘‘ਅਸਂਕੁਟਿਤ੍ਵਾ ਚੀਵਰਂ ਸਮਂ ਹੋਤਿ. ਕੋਣਾਪਿ ਸਮਾ ਹੋਨ੍ਤੀ’’ਤਿ ਲਿਖਿਤਂ, ‘‘ਹਲਿਦ੍ਦਿਸੁਤ੍ਤੇਨ ਸਞ੍ਞਾਕਰਣ’’ਨ੍ਤਿ ਵੁਤ੍ਤਤ੍ਤਾ ਹਲਿਦ੍ਦਿਸੁਤ੍ਤੇਨ ਚੀਵਰਂ ਸਿਬ੍ਬੇਤੁਮ੍ਪਿ ਵਟ੍ਟਤੀਤਿ ਸਿਦ੍ਧਂ. ਤਤ੍ਥ ਹਿ ਕੇਚਿ ਅਕਪ੍ਪਿਯਸਞ੍ਞਿਨੋ. ਪਟਿਗ੍ਗਹੋ ਨਾਮ ਅਙ੍ਗੁਲਿਕੋਸੋ.

੨੫੭-੮. ਪਾਤੀਤਿ ਪਟਿਗ੍ਗਹਸਣ੍ਠਾਨਂ. ਪਟਿਗ੍ਗਹਤ੍ਥਵਿਕਨ੍ਤਿ ਅਙ੍ਗੁਲਿਕੋਸਤ੍ਥਵਿਕਂ. ਸੂਚਿਸਤ੍ਥਕਾਨਂ ਪੁਬ੍ਬੇ ਆਵੇਸਨਤ੍ਥਵਿਕਾਯ ਅਨੁਞ੍ਞਾਤਤ੍ਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਭੇਸਜ੍ਜਤ੍ਥਵਿਕ’’ਨ੍ਤਿ ਵੁਤ੍ਤਂ. ਏਤ੍ਥ ਸੂਚਿਸਤ੍ਥਕਾਦੀਨਿਪਿ ਠਪੇਤਬ੍ਬਾਨੀਤਿ ਨਿਦਾਨਂ ਸੂਚੇਤਿ. ਸਚੇਪਿ ਉਪਨਨ੍ਦੋ ਭਿਕ੍ਖੁ ਅਲਜ੍ਜੀ, ਤਥਾਪਿ ਸਨ੍ਤਕਮੇਤਂ ਅਮੂਲਚ੍ਛੇਦਕਤਭਿਕ੍ਖੁਨੋ ਲਜ੍ਜਿਨੋਪਿ ਸਮਾਨਸ੍ਸ ਕਪ੍ਪਤੀਤਿ ਯੁਜ੍ਜਤਿ. ਨ ਸਮ੍ਮਤੀਤਿ ਨ ਪਹੋਤਿ.

੨੬੦-੧. ਬਹਿ ਕੁਟ੍ਟਸ੍ਸ ਸਮਨ੍ਤਤੋ ਨੀਚਵਤ੍ਥੁਕਂ ਕਤ੍ਵਾ ਠਿਤਂ ‘‘ਮਣ੍ਡਲਿਕ’’ਨ੍ਤਿ ਵੁਚ੍ਚਤਿ. ਜਨ੍ਤਾਘਰਪ੍ਪਟਿਚ੍ਛਾਦਿਨਾ ਛਨ੍ਨਸ੍ਸ ਨਗ੍ਗਿਯਂ ਯਸ੍ਸ ਨ ਪਞ੍ਞਾਯਤਿ, ਤਸ੍ਸੇਵ ਪਰਿਕਮ੍ਮਂ ਕਾਤਬ੍ਬਂ. ਏਸ ਨਯੋ ਉਦਕਵਤ੍ਥਪਟਿਚ੍ਛਾਦੀਸੁਪਿ.

੨੬੨-੩. ਪਣਿਯਾ ਨਾਮ ਪਣਿਯਕਾਰਕਾ. ਆਕਡ੍ਢਨਯਨ੍ਤਂ ਆਕਡ੍ਢਿਯਮਾਨਂ ਕੂਪਸ੍ਸ ਉਪਰਿਭਾਗੇ ਪਰਿਬ੍ਭਮਤਿ. ਅਰਹਟਘਟਿਯਨ੍ਤਂ ਸਕਟਚਕ੍ਕਸਣ੍ਠਾਨਯਨ੍ਤਂ. ਤਸ੍ਸ ਅਰੇ ਅਰੇ ਘਟਿਕਾਨਿ ਬਨ੍ਧਿਤ੍ਵਾ ਏਕੇਨ, ਦ੍ਵੀਹਿ ਵਾ ਪਰਿਬ੍ਭਮਿਯਮਾਨਸ੍ਸ ਉਦਕਨਿਬ੍ਬਾਹਨਂ ਵੇਦਿਤਬ੍ਬਂ. ਆਵਿਦ੍ਧਪਕ੍ਖਪਾਸਂ ਨਾਮ ਯਤ੍ਥ ਮਣ੍ਡਲਾਕਾਰੇਨ ਪਕ੍ਖਪਾਸਾ ਬਜ੍ਝਨ੍ਤਿ ਆਵਿਦ੍ਧਵਤ੍ਥਤਾ ਵਿਯ ਆਵਿਦ੍ਧਪਕ੍ਖਪਾਸਕਾ. ਪੁਬ੍ਬੇ ਪਤ੍ਤਸਙ੍ਗੋਪਨਤ੍ਥਂ, ਇਦਾਨਿ ਠਪੇਤਬ੍ਬਂ ਭੁਞ੍ਜਿਤੁਂ ਆਧਾਰਕੋ ਅਨੁਞ੍ਞਾਤੋ.

੨੭੩. ਪਰਗਲਂ ਗਚ੍ਛਤੀਤਿ ਇਮਸ੍ਸ ਪਯੋਗਾਭਾਵਾ ਵਟ੍ਟਤਿ. ਕਮ੍ਮਸਤੇਨਾਤਿ ਮਹਤਾ ਉਸ੍ਸਾਹੇਨ.

੨੭੭-੮. ਲੋਹਭਣ੍ਡਂ ਨਾਮ ਕਂਸਤੋ ਸੇਸਲੋਹਭਣ੍ਡਂ. ਮੁਦ੍ਦਿਕਕਾਯਬਨ੍ਧਨਂ ਨਾਮ ਚਤੁਰਸ੍ਸਂ ਅਕਤ੍ਵਾ ਸਜ੍ਜਿਤਂ. ਪਾਮਙ੍ਗਦਸਾ ਚਤੁਰਸ੍ਸਾ. ਮੁਦਿਙ੍ਗਸਣ੍ਠਾਨੇਨਾਤਿ ਸਙ੍ਘਾਟਿਯਾ ਮੁਦਿਙ੍ਗਸਿਬ੍ਬਨਾਕਾਰੇਨ ਵਰਕਸੀਸਾਕਾਰੇਨ. ਪਵਨਨ੍ਤੋਤਿ ਪਾਸਨ੍ਤੋ. ‘‘ਦਸਾਮੂਲ’’ਨ੍ਤਿ ਚ ਲਿਖਿਤਂ. ਅਕਾਯਬਨ੍ਧਨੇਨ ਸਞ੍ਚਿਚ੍ਚ ਵਾ ਅਸਞ੍ਚਿਚ੍ਚ ਵਾ ਗਾਮਪ੍ਪਵੇਸਨੇ ਆਪਤ੍ਤਿ. ‘‘ਸਰਿਤਟ੍ਠਾਨਤੋ ਬਨ੍ਧਿਤ੍ਵਾ ਪਵਿਸਿਤਬ੍ਬਂ, ਨਿਵਤ੍ਤਿਤਬ੍ਬਂ ਵਾ’’ਤਿ ਲਿਖਿਤਂ.

੨੭੯. ਸਤ੍ਤਙ੍ਗੁਲਂ ਵਾ ਅਟ੍ਠਙ੍ਗੁਲਂ ਵਾਤਿ ਏਤ੍ਥ ‘‘ਸੁਗਤਙ੍ਗੁਲੇਨਾ’’ਤਿ ਅਵੁਤ੍ਤਤ੍ਤਾ ਪਕਤਿਅਙ੍ਗੁਲੇਨ ਸਾਰੁਪ੍ਪਤ੍ਥਾਯ ਵਡ੍ਢੇਤ੍ਵਾਪਿ ਕਰੋਨ੍ਤਿ ਚੇ, ਨ ਦੋਸੋ.

੨੮੦. ਤਾਲਵਣ੍ਟਾਕਾਰੇਨ ਸੀਹਲ਼ਿਤ੍ਥੀਨਂ ਵਿਯ.

ਖੁਦ੍ਦਕਵਤ੍ਥੁਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੬. ਸੇਨਾਸਨਕ੍ਖਨ੍ਧਕਵਣ੍ਣਨਾ

ਵਿਹਾਰਾਨੁਜਾਨਨਕਥਾਵਣ੍ਣਨਾ

੨੯੪. ਨਿਲੀਯਨ੍ਤਿ ਭਿਕ੍ਖੂ ਏਤ੍ਥਾਤਿ ਵਿਹਾਰਾਦਯੋ ਲੇਣਾਨਿ ਨਾਮ. ਆਗਤ-ਵਚਨੇਨ ਤਸ੍ਸਾਗਤਸਙ੍ਘੋਵ ਸਾਮੀ, ਨ ਅਨਾਗਤੋਤਿ ਕੇਚਿ, ਤਂ ਨ ਯੁਜ੍ਜਤਿ ਸਮਾਨਲਾਭਕਤਿਕਾਯ ਸਿਦ੍ਧਤ੍ਤਾ.

੨੯੬-੭. ਦੀਪਿਨਙ੍ਗੁਟ੍ਠੇਨਾਤਿ ਏਤ੍ਥ ‘‘ਦੀਪਿਨਾ ਅਕਪ੍ਪਿਯਚਮ੍ਮਂ ਦਸ੍ਸੇਤੀ’’ਤਿ ਲਿਖਿਤਂ. ਥਮ੍ਭਕਵਾਤਪਾਨਂ ਨਾਮ ਤਿਰਿਯਂ ਦਾਰੂਨਿ ਅਦਤ੍ਵਾ ਉਜੁਕਂ ਠਿਤੇਹੇਵ ਦਾਰੂਹਿ ਕਤ੍ਤਬ੍ਬਂ. ਭਿਸੀਨਂ ਅਨੁਞ੍ਞਾਤਂ ਵਟ੍ਟਤੀਤਿ ਬਿਮ੍ਬੋਹਨੇ ਵਟ੍ਟਤੀਤਿ ਅਤ੍ਥੋ. ਤੂਲਪੂਰਿਤਂ ਭਿਸਿਂ ਅਪਸ੍ਸਯਿਤੁਂ ਨ ਵਟ੍ਟਤਿ ਉਣ੍ਣਾਦੀਨਂਯੇਵ ਅਨੁਞ੍ਞਾਤਤ੍ਤਾ. ਨਿਸੀਦਨਨਿਪਜ੍ਜਨਂ ਸਨ੍ਧਾਯ ਵੁਤ੍ਤਂ, ਤਸ੍ਮਾ ਅਪਸ੍ਸਯਿਤੁਂ ਵਟ੍ਟਤੀਤਿ ਚੇ? ਅਕਪ੍ਪਿਯਨ੍ਤਿ ਨ ਵਟ੍ਟਤੀਤਿ ਕੇਚਿ. ਯਦਿ ਏਵਂ ਅਕਪ੍ਪਿਯਮਞ੍ਚਞ੍ਚ ਅਪਸ੍ਸਯਿਤੁਂ ਨ ਵਟ੍ਟੇਯ੍ਯ. ਯਸ੍ਮਾ ਵਟ੍ਟਤਿ, ਤਸ੍ਮਾ ਦੋਸੋ ਨਤ੍ਥਿ. ਅਪਿਚ ਗਿਲਾਨਸ੍ਸ ਬਿਮ੍ਬੋਹਨਂ ਨਿਪਜ੍ਜਿਤੁਮ੍ਪਿ ਅਨੁਞ੍ਞਾਤਂ, ਤਸ੍ਮਾ ਭਿਸਿਪਿ ਵਟ੍ਟਤਿ ਅਪਸ੍ਸਯਿਤੁਂ. ਆਚਰਿਯਾ ਚ ਅਨੁਜਾਨਨ੍ਤਿ, ਵਲ਼ਞ੍ਜੇਨ੍ਤਿ ਚਾਤਿ ਏਕੇ. ਸਿਮ੍ਬਲਿਤੂਲਸੁਤ੍ਤੇਨ ਸਿਬ੍ਬਿਤਂ ਚੀਵਰਂ ਵਟ੍ਟਤਿ. ਕਸ੍ਮਾ? ਕਪ੍ਪਾਸਸ੍ਸ ਅਨੁਲੋਮਤੋ. ‘‘ਅਕ੍ਕਫਲਸੁਤ੍ਤਮਯਮ੍ਪਿ ਅਕ੍ਕਵਾਕਮਯਮੇਵ ਪਟਿਕ੍ਖਿਤ੍ਤ’’ਨ੍ਤਿ ਤੇ ਏਵ ਵਦਨ੍ਤਿ.

੨੯੮. ਅਨਿਬਨ੍ਧਨੀਯੋ ਅਲਗ੍ਗੋ. ਪਟਿਬਾਹੇਤ੍ਵਾਤਿ ਮਟ੍ਠਂ ਕਤ੍ਵਾ. ‘‘ਸੇਤਵਣ੍ਣਾਦੀਨਂ ਯਥਾਸਙ੍ਖ੍ਯਂ ਇਕ੍ਕਾਸਾਦਯੋ ਬਨ੍ਧਨਤ੍ਥਂ ਵੁਤ੍ਤਾ’’ਤਿ ਲਿਖਿਤਂ.

੩੦੦. ਪਕੁਟ੍ਟਂ ਸਮਨ੍ਤਤੋ ਆਵਿਦ੍ਧਪਮੁਖਂ.

੩੦੩. ਸੁਧਾਲੇਪੋਤਿ ਸੁਧਾਮਤ੍ਤਿਕਾਲੇਪੋ.

੩੦੫. ਆਸਤ੍ਤਿ ਤਣ੍ਹਾ. ਸਨ੍ਤਿਂ ਅਦਰਂ.

੩੦੭. ਕੇਤੁਨ੍ਤਿ ਕਯੇਨ ਗਹੇਤੁਂ.

੩੦੮. ਚਿਤਾਤਿ ਇਟ੍ਠਕਾਯੋ ਕਬਲ਼ੇਨ ਨਿਦ੍ਧਮਨਵਸੇਨ ਛਿਨ੍ਦਿਤ੍ਵਾ ਕਤਾਤਿ ਅਤ੍ਥੋ.

੩੧੦. ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਅਨ੍ਤੇਵਾਸਿਕਾਤਿ ਏਤ੍ਥ ਵੀਸਤਿਵਸ੍ਸਂ ਅਤਿਕ੍ਕਮਿਤ੍ਵਾ ਛਬ੍ਬਗ੍ਗਿਯਾ ਉਪ੍ਪਨ੍ਨਾ. ‘‘ਆਰਾਧਯਿਂਸੁ ਮੇ ਭਿਕ੍ਖੂ ਚਿਤ੍ਤ’’ਨ੍ਤਿ (ਮ. ਨਿ. ੧.੨੨੫) ਵੁਤ੍ਤਤ੍ਤਾ ਅਞ੍ਞਸ੍ਮਿਂ ਕਾਲੇ ਸਾਵਤ੍ਥਿਗਮਨੇ ਉਪ੍ਪਨ੍ਨਂ ਵਤ੍ਥੁਂ ਇਧ ਆਪਤ੍ਤਿਦਸ੍ਸਨਤ੍ਥਂ ਆਹਰਿਤ੍ਵਾ ਵੁਤ੍ਤਨ੍ਤਿ ਯੁਤ੍ਤਂ ਵਿਯ, ਵਿਚਾਰੇਤ੍ਵਾ ਗਹੇਤਬ੍ਬਂ. ਵੁਦ੍ਧਨ੍ਤਿ ਵੁਦ੍ਧਤਰਂ.

੩੧੩. ਸਨ੍ਥਰੇਤਿ ਤਿਣਸਨ੍ਥਰਾਦਯੋ.

ਸੇਨਾਸਨਗ੍ਗਾਹਕਥਾਵਣ੍ਣਨਾ

੩੧੮. ‘‘ਸੇਯ੍ਯਗ੍ਗੇਨਾਤਿ ਮਞ੍ਚਟ੍ਠਾਨਪਰਿਚ੍ਛੇਦੇਨ. ਵਿਹਾਰਗ੍ਗੇਨਾਤਿ ਓਵਰਕਗ੍ਗੇਨਾ’’ਤਿ ਲਿਖਿਤਂ. ਥਾਵਰਾਤਿ ਨਿਯਤਾ. ਪਚ੍ਚਯੇਨੇਵ ਹਿ ਤਨ੍ਤਿ ਤਸ੍ਮਿਂ ਸੇਨਾਸਨੇ ਮਹਾਥੇਰਾ ਤਸ੍ਸ ਪਚ੍ਚਯਸ੍ਸ ਕਾਰਣਾ ਅਞ੍ਞਤ੍ਥ ਅਗਨ੍ਤ੍ਵਾ ਵਸਨ੍ਤਾਯੇਵ ਨਂ ਪਟਿਜਗ੍ਗਿਸ੍ਸਨ੍ਤੀਤਿ ਅਤ੍ਥੋ. ਅਘਟ੍ਟਨਕਮ੍ਮਂ ਦਸ੍ਸੇਤੁਂ ‘‘ਨ ਤਤ੍ਥ ਮਨੁਸ੍ਸਾ’’ਤਿਆਦਿਮਾਹ. ‘‘ਵਿਤਕ੍ਕਂ ਛਿਨ੍ਦਿਤ੍ਵਾ ਸੁਦ੍ਧਚਿਤ੍ਤੇਨ ਗਮਨਵਤ੍ਤੇਨੇਵ ਗਨ੍ਤਬ੍ਬ’’ਨ੍ਤਿ ਪਾਠੋ. ਮੁਦ੍ਦਵੇਦਿਕਾ ਨਾਮ ਚੇਤਿਯਸ੍ਸ ਹਮ੍ਮਿਯਵੇਦਿਕਾ. ਪਟਿਕ੍ਕਮ੍ਮਾਤਿ ਅਪਸਕ੍ਕਿਤ੍ਵਾ. ਸਮਾਨਲਾਭਕਤਿਕਾ ਮੂਲਾਵਾਸੇ ਸਤਿ ਸਿਯਾ, ਮੂਲਾਵਾਸਵਿਨਾਸੇਨ ਕਤਿਕਾਪਿ ਵਿਨਸ੍ਸਤਿ. ਸਮਾਨਲਾਭ-ਵਚਨਂ ਸਤਿ ਦ੍ਵੀਸੁ, ਬਹੂਸੁ ਵਾ ਯੁਜ੍ਜਤਿ, ਤੇਨੇਵ ਏਕਸ੍ਮਿਂ ਅਵਸਿਟ੍ਠੇਤਿ ਨੋ ਮਤਿ. ਤਾਵਕਾਲਿਕਂ ਕਾਲੇਨ ਮੂਲਚ੍ਛੇਦਨਵਸੇਨ ਵਾ ਅਞ੍ਞੇਸਂ ਵਾ ਕਮ੍ਮਂ ਅਞ੍ਞਸ੍ਸ ਸਿਯਾ ਨਾਵਾਯਂ ਸਙ੍ਗਮੋਤਿ ਆਚਰਿਯੋ. ਪੁਗ੍ਗਲਵਸੇਨੇਵ ਕਾਤਬ੍ਬਨ੍ਤਿ ਅਪਲੋਕਨਕਾਲੇ ਸਙ੍ਘੋ ਵਸ੍ਸਂਵੁਤ੍ਥਭਿਕ੍ਖੂਨਂ ਪਾਟੇਕ੍ਕਂ ‘‘ਏਤ੍ਤਕਂ ਵਸ੍ਸਾਵਾਸਿਕਂ ਵਤ੍ਥਂ ਦੇਤਿ, ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਪੁਗ੍ਗਲਮੇਵ ਪਰਾਮਸਿਤ੍ਵਾ ਦਾਤਬ੍ਬਂ, ਨ ਸਙ੍ਘਵਸੇਨ ਕਾਤਬ੍ਬਂ. ਨ ਸਙ੍ਘੋ ਸਙ੍ਘਸ੍ਸ ਏਤ੍ਤਕਂ ਦੇਤੀਤਿ. ‘‘ਏਕਸ੍ਮਿਂ ਆਵਾਸੇ ਸਙ੍ਘਸ੍ਸ ਕਮ੍ਮਂ ਕਰੋਤੀ’ਤਿ ਵਚਨਤੋ ਸਙ੍ਘਵਸੇਨ ਕਾਤਬ੍ਬ’’ਨ੍ਤਿ ਲਿਖਿਤਂ. ਨ ਹਿ ਤਥਾ ਵੁਤ੍ਤੇ ਸਙ੍ਘਸ੍ਸ ਕਿਞ੍ਚਿ ਕਮ੍ਮਂ ਕਤਂ ਨਾਮ ਹੋਤਿ. ‘‘ਸਮ੍ਮਤਸੇਨਾਸਨਗ੍ਗਾਹਾਪਕਤੋ ਅਞ੍ਞੇਨ ਗਾਹਿਤੇਪਿ ਗਾਹੋ ਰੁਹਤਿ ਅਗ੍ਗਹਿਤੁਪਜ੍ਝਾਯਸ੍ਸ ਉਪਸਮ੍ਪਦਾ ਵਿਯਾ’’ਤਿ ਲਿਖਿਤਂ. ‘‘ਕਮ੍ਮਵਾਚਾਯਪਿ ਸਮ੍ਮੁਤਿ ਵਟ੍ਟਤੀ’’ਤਿ ਲਿਖਿਤਂ.

ਅਟ੍ਠਪਿ ਸੋਲ਼ਸਪਿ ਜਨੇਤਿ ਏਤ੍ਥ ਕਿਂ ਵਿਸੁਂ ਵਿਸੁਂ, ਉਦਾਹੁ ਏਕਤੋਤਿ? ਏਕਤੋਪਿ ਵਟ੍ਟਤਿ. ਨ ਹਿ ਤੇ ਤਥਾ ਸਮ੍ਮਤਾ ਸਙ੍ਘੇਨ ਕਮ੍ਮਕਤਾ ਨਾਮ ਹੋਨ੍ਤਿ, ਤੇਨੇਵ ਸਤ੍ਤਸਤਿਕਕ੍ਖਨ੍ਧਕੇ ਏਕਤੋ ਅਟ੍ਠ ਜਨਾ ਸਮ੍ਮਤਾਤਿ. ਤੇਸਂ ਸਮ੍ਮੁਤਿ ਕਮ੍ਮਵਾਚਾਯਪੀਤਿ ਞਤ੍ਤਿਦੁਤਿਯਕਮ੍ਮਵਾਚਾਯਪਿ. ਅਪਲੋਕਨਕਮ੍ਮਸ੍ਸ ਵਤ੍ਥੂਹਿ ਸਾ ਏਵ ਕਮ੍ਮਵਾਚਾ ਲਬ੍ਭਮਾਨਾ ਲਬ੍ਭਤਿ, ਤਸ੍ਸਾ ਚ ਵਤ੍ਥੂਹਿ ਅਪਲੋਕਨਕਮ੍ਮਮੇਵ ਲਬ੍ਭਮਾਨਂ ਲਬ੍ਭਤਿ, ਨ ਅਞ੍ਞਨ੍ਤਿ ਵੇਦਿਤਬ੍ਬਂ. ਇਮਂ ਨਯਂ ਮਿਚ੍ਛਾ ਗਣ੍ਹਨ੍ਤੋ ‘‘ਅਪਲੋਕਨਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਕਾਤੁਂ, ਞਤ੍ਤਿਦੁਤਿਯਕਮ੍ਮਞ੍ਚ ਅਪਲੋਕਨਕਮ੍ਮਂ ਕਾਤੁਂ ਵਟ੍ਟਤੀ’’ਤਿ ਗਣ੍ਹਾਤਿ, ਏਵਞ੍ਚ ਸਤਿ ਕਮ੍ਮਸਙ੍ਕਰਦੋਸੋ ਆਪਜ੍ਜਤਿ. ਮਗ੍ਗੋ ਪੋਕ੍ਖਰਣੀਤਿ ਏਤ੍ਥ ਮਗ੍ਗੋ ਨਾਮ ਮਗ੍ਗੇ ਕਤਦੀਘਸਾਲਾ, ਪੋਕ੍ਖਰਣੀਤਿ ਨਹਾਯਿਤੁਂ ਕਤਪੋਕ੍ਖਰਣੀ. ਏਤਾਨਿ ਹਿ ਅਸੇਨਾਸਨਾਨੀਤਿ ਏਤ੍ਥ ਭਤ੍ਤਸਾਲਾ ਨ ਆਗਤਾ, ਤਸ੍ਮਾ ਤਂ ਸੇਨਾਸਨਨ੍ਤਿ ਚੇ? ਸਾਪਿ ਏਤ੍ਥੇਵ ਪਵਿਟ੍ਠਾ ਵਾਸਤ੍ਥਾਯ ਅਕਤਤ੍ਤਾ. ਭੋਜਨਸਾਲਾ ਪਨ ਉਭਯਤ੍ਥ ਨਾਗਤਾ. ਕਿਞ੍ਚਾਪਿ ਨਾਗਤਾ, ਉਪਰਿ ‘‘ਭੋਜਨਸਾਲਾ ਪਨ ਸੇਨਾਸਨਮੇਵਾ’’ਤਿ (ਚੂਲ਼ਵ. ਅਟ੍ਠ. ੩੧੮) ਵੁਤ੍ਤਤ੍ਤਾ ਸੇਨਾਸਨਂ. ‘‘ਕਪ੍ਪਿਯਕੁਟਿ ਚ ਏਤ੍ਥ ਕਾਤਬ੍ਬਾ’’ਤਿ ਵਦਨ੍ਤਿ, ਤਂ ਨੇਤਿ ਏਕੇ. ਰੁਕ੍ਖਮੂਲਵੇਲ਼ੁਗੁਮ੍ਬਾ ਛਨ੍ਨਾ ਕਵਾਟਬਦ੍ਧਾਵ ਸੇਨਾਸਨਂ. ‘‘ਅਲਾਭਕੇਸੁ ਆਵਾਸੇਸੂਤਿ ਅਲਾਭਕੇਸੁ ਸੇਨਾਸਨੇਸੂ’’ਤਿ ਲਿਖਿਤਂ, ਤਂ ਯੁਤ੍ਤਂ. ਨ ਹਿ ਪਾਟੇਕ੍ਕਂ ਸੇਨਾਸਨਂ ਹੋਤਿ. ਤਂ ਸਞ੍ਞਾਪੇਤ੍ਵਾਤਿ ਏਤ੍ਥ ਪਞ੍ਞਤ੍ਤਿਂ ਅਗਚ੍ਛਨ੍ਤੇ ਬਲਕ੍ਕਾਰੇਨਪਿ ਵਟ੍ਟਤਿ. ਅਯਮ੍ਪੀਤਿ ਪਚ੍ਚਯੋਪਿ.

ਉਪਨਿਬਨ੍ਧਿਤ੍ਵਾਤਿ ਤਸ੍ਸ ਸਮੀਪੇ ਰੁਕ੍ਖਮੂਲਾਦੀਸੁ ਵਸਿਤ੍ਵਾ ਤਤ੍ਥ ਵਤ੍ਤਂ ਕਤ੍ਵਾਤਿ ਅਧਿਪ੍ਪਾਯੋ. ਪਰਿਯਤ੍ਤਿਪਟਿਪਤ੍ਤਿਪਟਿਵੇਧਵਸੇਨ ਤਿਵਿਧਮ੍ਪਿ. ‘‘ਦਸਕਥਾਵਤ੍ਥੁਕਂ ਦਸਅਸੁਭਂ ਦਸਅਨੁਸ੍ਸਤਿ’’ਨ੍ਤਿ ਪਾਠੋ. ‘‘ਪਠਮਭਾਗਂ ਮੁਞ੍ਚਿਤ੍ਵਾਤਿ ਇਦਂ ਚੇ ਪਠਮਗਾਹਿਤਵਤ੍ਥੁਤੋ ਮਹਗ੍ਘਂ ਹੋਤੀ’’ਤਿ ਲਿਖਿਤਂ. ਛਿਨ੍ਨਵਸ੍ਸਾਨਂ ਵਸ੍ਸਾਵਾਸਿਕਂ ਨਾਮ ਪੁਬ੍ਬੇ ਗਹਿਤਵਸ੍ਸਾਵਾਸਿਕਾਨਂ ਪਚ੍ਛਾ ਛਿਨ੍ਨਵਸ੍ਸਾਨਂ. ਭਤਿਨਿਵਿਟ੍ਠਨ੍ਤਿ ਭਤਿਂ ਕਤ੍ਵਾ ਵਿਯ ਨਿਵਿਟ੍ਠਂ ਪਰਿਯਿਟ੍ਠਂ. ‘‘ਸਙ੍ਘਿਕਂ ਪਨ…ਪੇ… ਵਿਬ੍ਭਨ੍ਤੋਪਿ ਲਭਤੇਵਾ’’ਤਿ ਇਦਂ ਤਤ੍ਰੁਪ੍ਪਾਦਂ ਸਨ੍ਧਾਯ ਵੁਤ੍ਤਂ. ਇਮਿਨਾ ਅਪਲੋਕਨਮੇਵ ਪਮਾਣਂ, ਨ ਗਾਹਾਪਨਨ੍ਤਿ ਕੇਚਿ. ਵਿਨਯਧਰਾ ਪਨ ‘‘ਅਮ੍ਹਾਕਂ ਵਿਹਾਰੇ ਵਸ੍ਸਂ ਉਪਗਤਾਨਂ ਏਕੇਕਸ੍ਸ ਤਿਚੀਵਰਂ ਸਙ੍ਘੋ ਦਸ੍ਸਤੀ’ਤਿਆਦਿਨਾ ਅਪਲੋਕਿਤੇਪਿ ਅਭਾਜਿਤਂ ਵਿਬ੍ਭਨ੍ਤਕੋ ਨ ਲਭਤਿ. ‘ਅਪਲੋਕਨਕਮ੍ਮਂ ਕਤ੍ਵਾ ਗਾਹਿਤ’ਨ੍ਤਿ ਵੁਤ੍ਤਤ੍ਤਾ, ‘ਅਭਾਜਿਤੇ ਵਿਬ੍ਭਮਤੀ’ਤਿ ਏਵਂ ਪੁਬ੍ਬੇ ਵੁਤ੍ਤਤ੍ਤਾ ਚਾ’’ਤਿ ਵਦਨ੍ਤਿ. ‘‘ਪਚ੍ਚਯਵਸੇਨਾਤਿ ਗਹਪਤਿਕਂ ਵਾ ਅਞ੍ਞਂ ਵਾ ਵਸ੍ਸਾਵਾਸਿਕਂ ਪਚ੍ਚਯਵਸੇਨ ਗਾਹਿਤ’’ਨ੍ਤਿ ਲਿਖਿਤਂ. ‘‘ਏਕਮੇਵ ਵਤ੍ਥਂ ਦਾਤਬ੍ਬਨ੍ਤਿ ਤਤ੍ਥ ਨਿਸਿਨ੍ਨਾਨਂ ਏਕਮੇਕਂ ਵਤ੍ਥਂ ਪਾਪੁਣਾਤੀ’’ਤਿ ਲਿਖਿਤਂ. ਦੁਤਿਯੋ ਥੇਰਾਸਨੇਤਿ ਅਨੁਭਾਗੋ. ਪਠਮਭਾਗੋ ਅਞ੍ਞਥਾ ਥੇਰੇਨ ਗਹਿਤੋਤਿ ਜਾਨਿਤਬ੍ਬਂ.

ਉਪਨਨ੍ਦਵਤ੍ਥੁਕਥਾਵਣ੍ਣਨਾ

੩੨੦. ਤਿਵਸ੍ਸਨ੍ਤਰੇਨਾਤਿ ਤਿਣ੍ਣਂ ਵਸ੍ਸਾਨਂ ਅਨ੍ਤੋ ਠਿਤੇਨ. ਹਤ੍ਥਿਮ੍ਹਿ ਨਖੋ ਅਸ੍ਸਾਤਿ ਹਤ੍ਥਿਨਖੋ. ਪਾਸਾਦਸ੍ਸ ਨਖੋ ਨਾਮ ਹੇਟ੍ਠਿਮਪਰਿਚ੍ਛੇਦੋ. ਗਿਹਿਵਿਕਟਨੀਹਾਰੇਨਾਤਿ ਗਿਹੀਹਿ ਕਤਨੀਹਾਰੇਨੇਵ. ‘‘ਤੇਹਿ ਅਤ੍ਥਰਿਤ੍ਵਾ ਦਿਨ੍ਨਾਨੇਵ ਨਿਸੀਦਿਤੁਂ ਲਬ੍ਭਨ੍ਤਿ, ਨ ਭਿਕ੍ਖੁਨਾ ਸਯਂ ਅਤ੍ਥਰਿਤ੍ਵਾ ਵਿਸ੍ਸਜ੍ਜਿਤਬ੍ਬਂ ਸਙ੍ਘੇਨ ਅਤ੍ਥਰਾਪੇਤ੍ਵਾ ਵਾ’’ਤਿ ਲਿਖਿਤਂ.

ਅਵਿਸ੍ਸਜ੍ਜਿਯਵਤ੍ਥੁਕਥਾਵਣ੍ਣਨਾ

੩੨੧. ‘‘ਨ ਵਿਸ੍ਸਜ੍ਜੇਤਬ੍ਬਂ ਸਙ੍ਘੇਨ ਵਾ ਗਣੇਨ ਵਾ ਪੁਗ੍ਗਲੇਨ ਵਾ’’ਤਿ ਵਚਨਂ ‘‘ਯਂ ਅਗਰੁਭਣ੍ਡਂ ਵਿਸ੍ਸਜ੍ਜਿਯਂ ਵੇਭਙ੍ਗਿਯਂ ਸਙ੍ਘਿਕਂ, ਤਂ ਗਣੋ ਚੇ ਤਸ੍ਮਿਂ ਆਵਾਸੇ ਵਸਤਿ ਪੁਗ੍ਗਲੋਪਿ ਵਾ, ਗਣੇਨ ਵਾ ਪੁਗ੍ਗਲੇਨ ਵਾ ਵਿਸ੍ਸਜ੍ਜਿਤਂ ਸਙ੍ਘੇਨ ਵਿਸ੍ਸਜ੍ਜਿਤਸਦਿਸਮੇਵ ਹੋਤੀ’’ਤਿ ਅਟ੍ਠਕਥਾਯਂ ਵੁਤ੍ਤਵਚਨਂ ਸਾਧੇਤਿ, ਅਞ੍ਞਥਾ ਏਤ੍ਥ ਗਣਪੁਗ੍ਗਲਗ੍ਗਹਣਂ ਨਿਰਤ੍ਥਕਂ. ਅਰਞ੍ਜਰੋ ਉਦਕਚਾਟਿ, ਅਲਞ੍ਜਲੋ, ਬਹੁਉਦਕਗਣ੍ਹਨਕੋਤਿ ਅਤ੍ਥੋ. ‘‘ਵਟ੍ਟਚਾਟਿ ਵਿਯ ਹੁਤ੍ਵਾ ਥੋਕਂ ਦੀਘਮੁਖੋ ਮਜ੍ਝੇ ਪਰਿਚ੍ਛੇਦਂ ਦਸ੍ਸੇਤ੍ਵਾ ਕਤੋ’’ਤਿ ਲਿਖਿਤਂ. ਮਂਸਦਿਬ੍ਬਧਮ੍ਮਬੁਦ੍ਧਸਮਨ੍ਤਚਕ੍ਖੁਵਸੇਨ ਪਞ੍ਚ.

ਗਰੁਭਣ੍ਡੇਨ ਚ ਗਰੁਭਣ੍ਡਨ੍ਤਿ ਸਂਹਾਰਿਮਂ ਸਨ੍ਧਾਯ ਵੁਤ੍ਤਂ. ਪਤ੍ਤਚੀਵਰਂ ਨਿਕ੍ਖਿਪਿਤੁਨ੍ਤਿ ਅਟ੍ਟਕਚ੍ਛਨ੍ਨੇਨ ਕਤੇ ਮਞ੍ਚੇ. ਵਟ੍ਟਲੋਹਂ ਨਾਮ ਪੀਤਵਣ੍ਣਂ. ਪਾਰਿਹਾਰਿਯਂ ਨ ਵਟ੍ਟਤੀਤਿ ਆਗਨ੍ਤੁਕਸ੍ਸ ਅਦਤ੍ਵਾ ਪਰਿਚਾਰਿਕਹਤ੍ਥਤੋ ਅਤ੍ਤਨੋ ਨਾਮਂ ਲਿਖਾਪੇਤ੍ਵਾ ਗਹੇਤ੍ਵਾ ਯਥਾਸੁਖਂ ਪਰਿਹਰਿਤੁਂ ਨ ਵਟ੍ਟਤਿ. ‘‘ਗਿਹਿਵਿਕਟਨੀਹਾਰੇਨੇਵਾਤਿ ਯਾਵ ਅਤ੍ਤਨੋ ਕਮ੍ਮਨਿਬ੍ਬਤ੍ਤਿ, ਤਾਵ ਗਹੇਤ੍ਵਾ ਦੇਤੀ’’ਤਿ ਲਿਖਿਤਂ. ਸਿਖਰਂ ਨਾਮ ਯੇਨ ਪਰਿਬ੍ਭਮਨ੍ਤਾ ਛਿਨ੍ਦਨ੍ਤਿ. ਪਤ੍ਤਬਨ੍ਧਕੋ ਨਾਮ ਪਤ੍ਤਸ੍ਸ ਗਣ੍ਠਿਆਦਿਕਾਰਕੋ. ‘‘ਪਟਿਮਾਨਂ ਸੁਵਣ੍ਣਾਦਿਪਤ੍ਤਕਾਰਕੋ’’ਤਿਪਿ ਵਦਨ੍ਤਿ. ‘‘ਅਡ੍ਢਬਾਹੂਤਿ ਕਪ੍ਪਰਤੋ ਪਟ੍ਠਾਯ ਯਾਵ ਅਂਸਕੂਟ’’ਨ੍ਤਿ ਲਿਖਿਤਂ. ਇਤੋ ਪਟ੍ਠਾਯਾਤਿ ਇਮਂ ਪਾਲ਼ਿਂ ਆਦਿਂ ਕਤ੍ਵਾ. ਦਣ੍ਡਮੁਗ੍ਗਰੋ ਨਾਮ ਯੇਨ ਰਜਿਤਚੀਵਰਂ ਪੋਥੇਨ੍ਤਿ. ‘ਪਚ੍ਚਤ੍ਥਰਣਗਤਿਕ’ਨ੍ਤਿ ਵੁਤ੍ਤਤ੍ਤਾ, ‘‘ਤਮ੍ਪਿ ਗਰੁਭਣ੍ਡਮੇਵਾਤਿ ਵੁਤ੍ਤਤ੍ਤਾ ਚ ਅਪਿ-ਸਦ੍ਦੇਨ ਪਾਵਾਰਾਦਿਪਚ੍ਚਤ੍ਥਰਣਂ ਸਬ੍ਬਂ ਗਰੁਭਣ੍ਡਮੇਵਾ’’ਤਿ ਵਦਨ੍ਤਿ. ਏਤੇਨੇਵ ਸੁਤ੍ਤੇਨ ਅਞ੍ਞਥਾ ਅਤ੍ਥਂ ਵਤ੍ਵਾ ‘‘ਪਾਵਾਰਾਦਿਪਚ੍ਚਤ੍ਥਰਣਂ ਨ ਗਰੁਭਣ੍ਡਂ, ਭਾਜਨੀਯਮੇਵ, ਸੇਨਾਸਨਤ੍ਥਾਯ ਦਿਨ੍ਨਪਚ੍ਚਤ੍ਥਰਣਮੇਵ ਗਰੁਭਣ੍ਡ’’ਨ੍ਤਿ ਵਦਨ੍ਤਿ, ਉਪਪਰਿਕ੍ਖਿਤਬ੍ਬਂ. ਗਣ੍ਠਿਕਾਤਿ ਚੀਵਰਗਣ੍ਠਿਕਾ. ਭਞ੍ਚਕੋ ਨਾਮ ਸਰਕੋ.

ਨਵਕਮ੍ਮਦਾਨਕਥਾਵਣ੍ਣਨਾ

੩੨੩-੪. ਅਗ੍ਗਲ਼ਬਨ੍ਧਸੂਚਿਦ੍ਵਾਰਕਰਣਮਤ੍ਤੇਨਪਿ. ‘‘ਕਪੋਤਭਣ੍ਡਿਕਾ ਨਾਮ ਵਲ਼ਭਿਯਾ ਉਪਰਿ ਠਪੇਤਬ੍ਬਵਲਯਂ ਵਾ ਤਿਣਚ੍ਛਦਨਗੇਹਸ੍ਸ ਪਿਟ੍ਠਿਵਂਸਸ੍ਸ ਹੇਟ੍ਠਾ ਠਪੇਤਬ੍ਬਂ ਵਾ ਉਭਯਮਸ੍ਸ ਗਤਾ ਦਾਰੂ’’ਤਿ ਲਿਖਿਤਂ. ਕਾਰਨ੍ਤਰਾਤਿ ਤਦਾ ਪੁਨ ਪਵਿਸਟ੍ਠਂ ਪੁਬ੍ਬਪਯੋਜਿਤਾਨਾਨਂ ਵਚਨਪਾਤਸੇਨਾਸਨਵਾਸੋ. ਨ ਪਨ ਪਤਿਸਟ੍ਠਤੋਤਿ ਦਟ੍ਠਬ੍ਬਂ. ਸਬ੍ਬਤ੍ਥ ਵਿਨਟ੍ਠਵਾਸੋ ਨ ਚ ਪਟਿਸੇਧਕੋ ਹੋਤੀਤਿ ਦਟ੍ਠਬ੍ਬੋ. ਦ੍ਵਾਰਵਾਤਪਾਨਾਦੀਨਿ ਅਪਹਰਿਤ੍ਵਾ ਦਾਤੁਂ ਅਸਕ੍ਕੁਣੇਯ੍ਯਤੋ ‘‘ਪਟਿਦਾਤਬ੍ਬਾਨਿਯੇਵਾ’’ਤਿ ਵੁਤ੍ਤਂ. ਗੋਪਾਨਸਿਆਦਯੋ ਦੇਨ੍ਤਸ੍ਸ ਵਿਹਾਰੋ ਪਲੁਜ੍ਜਤੀਤਿ ‘‘ਮੂਲਂ ਵਾ ਦਾਤਬ੍ਬ’’ਨ੍ਤਿਆਦਿ ਵੁਤ੍ਤਨ੍ਤਿ ਏਕੇ. ‘‘ਨੇਵਾਸਿਕਾ ਪਕਤਿਯਾ ਅਨਤ੍ਥਤਾਯ ਭੂਮਿਯਾ ਠਪੇਨ੍ਤਿ ਚੇ, ਤੇਸਮ੍ਪਿ ਅਨਾਪਤ੍ਤਿਯੇਵਾ’’ਤਿ ਲਿਖਿਤਂ. ‘‘ਦ੍ਵਾਰਵਾਤਪਾਨਾਦਯੋ ਅਪਰਿਕਮ੍ਮਕਤਾਪਿ ਅਪਟਿਚ੍ਛਾਦੇਤ੍ਵਾ ਨ ਅਪਸ੍ਸਯਿਤਬ੍ਬਾ’’ਤਿ ਲਿਖਿਤਂ.

ਸਙ੍ਘਭਤ੍ਤਾਦਿਅਨੁਜਾਨਨਕਥਾਵਣ੍ਣਨਾ

ਉਦ੍ਦੇਸਭਤ੍ਤਕਥਾਵਣ੍ਣਨਾ

੩੨੫. ਯਾ ਭਤ੍ਤੁਦ੍ਦੇਸਟ੍ਠਾਨਭੂਤਾਯ ਭੋਜਨਸਾਲਾਯ ਪਕਤਿਠਿਤਿਕਾ. ਦਿਨ੍ਨਂ ਪਨਾਤਿ ਯਥਾ ਸੋ ਦਾਯਕੋ ਦੇਤਿ, ਤਂ ਦਸ੍ਸੇਨ੍ਤੋ ‘‘ਸਙ੍ਘਤੋ ਭਨ੍ਤੇ’’ਤਿਆਦਿਮਾਹ. ਏਕਵਲ਼ਞ੍ਜਨ੍ਤਿ ਏਕਦ੍ਵਾਰੇਨ ਵਲ਼ਞ੍ਜਿਤਬ੍ਬਂ. ਤਿਚੀਵਰਪਰਿਵਾਰਨ੍ਤਿ ਏਤ੍ਥ ‘‘ਉਦਕਮਤ੍ਤਲਾਭੀ ਵਿਯ ਅਞ੍ਞੋਪਿ ਉਦ੍ਦੇਸਭਤ੍ਤਂ ਅਲਭਿਤ੍ਵਾ ਵਤ੍ਥਾਦਿਮਨੇਕਪ੍ਪਕਾਰਂ ਲਭਤਿ ਚੇ, ਤਸ੍ਸੇਵ ਤ’’ਨ੍ਤਿ ਲਿਖਿਤਂ. ‘‘ਉਦ੍ਦੇਸਪਤ੍ਤੇ ਦੇਥਾ’ਤਿ ਵਤ੍ਵਾ ਗਹੇਤ੍ਵਾ ਆਗਤਭਾਵੇਨ ਸਙ੍ਘਸ੍ਸ ਪਰਿਚ੍ਚਤ੍ਤਂ ਨ ਹੋਤਿਯੇਵ ਤਸ੍ਸੇਵ ਹਤ੍ਥੇ ਗਤਤ੍ਤਾ, ਤਸ੍ਮਾ ਤੇਹਿ ਵੁਤ੍ਤਕ੍ਕਮੇਨ ਸਬ੍ਬੇਹਿ ਭਾਜੇਤ੍ਵਾ ਭੁਞ੍ਜਿਤਬ੍ਬ’’ਨ੍ਤਿ ਵੁਤ੍ਤਂ. ਪਟਿਪਾਟਿਪਤ੍ਤਂ ਵਾ ਠਿਤਿਕਾਯ ਠਿਤਪਤ੍ਤਂ ਵਾ. ‘‘ਕੂਟਟ੍ਠਿਤਿਕਾ ਨਾਮ ਅਗ੍ਗਹੇਤਬ੍ਬਾਨਮ੍ਪਿ ਗਾਹਿਤਤ੍ਤਾ’’ਤਿ ਲਿਖਿਤਂ, ‘‘ਪਣੀਤਭਤ੍ਤਟ੍ਠਿਤਿਕਞ੍ਚ ਅਜਾਨਿਤ੍ਵਾ ਮਿਸ੍ਸੇਤ੍ਵਾ ਗਾਹਿਤੇਪਿ ਏਵਮੇਵ ਪਟਿਪਜ੍ਜਿਤਬ੍ਬ’’ਨ੍ਤਿ ਚ ਲਿਖਿਤਂ. ਤਞ੍ਚੇ ਥੇਯ੍ਯਾਯ ਹਰਨ੍ਤਿ ਪਤ੍ਤਹਾਰਕਾ, ਆਣਾਪਕਸ੍ਸ ਗੀਵਾ ਹੋਤਿ. ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍ਵਾਤਿ ਏਤ੍ਥ ‘‘ਤਂਦਿਵਸਮੇਵ ਚੇ ਭਿਕ੍ਖਾ ਲਬ੍ਭਤਿ, ਅਪਰਦਿਵਸਤੋ ਪਟ੍ਠਾਯ ਨ ਲਬ੍ਭਤਿ ਕਿਰਾ’’ਤਿ ਲਿਖਿਤਂ. ਪਚ੍ਛਾ ‘‘ਸਬ੍ਬੋ ਸਙ੍ਘੋ ਪਰਿਭੁਞ੍ਜਤੂ’’ਤਿ ਅਵੁਤ੍ਤੇਪਿ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ. ‘‘ਏਤ੍ਤਕੇ ਭਿਕ੍ਖੂ ਸਙ੍ਘਤੋ ਉਦ੍ਦਿਸਿਤ੍ਵਾ ਦੇਥਾ’ਤਿ ਅਵਤ੍ਵਾ ‘ਏਤ੍ਤਕਾਨਂ ਭਿਕ੍ਖੂਨਂ ਭਤ੍ਤਂ ਗਣ੍ਹਥਾ’ਤਿ ਦਿਨ੍ਨਂ ਸਙ੍ਘਿਕਨਿਮਨ੍ਤਨਂ ਨਾਮਾ’’ਤਿ ਲਿਖਿਤਂ.

ਨਿਮਨ੍ਤਨਭਤ੍ਤਕਥਾਵਣ੍ਣਨਾ

ਪਟਿਪਾਟਿਯਾਤਿ ਯਥਾਲਦ੍ਧਪਟਿਪਾਟਿਯਾ. ਵਿਚ੍ਛਿਨ੍ਦਿਤ੍ਵਾਤਿ ਭਤ੍ਤਂ ਗਣ੍ਹਥਾਤਿ ਪਦਂ ਅਵਤ੍ਵਾ. ਆਲੋਪਸਙ੍ਖੇਪੇਨਾਤਿ ਅਯਂ ਨਯੋ ਨਿਮਨ੍ਤਨਾਯਮੇਵ, ਉਦ੍ਦੇਸਭਤ੍ਤੇ ਪਨ ਏਕਸ੍ਸ ਪਹੋਨਕਪ੍ਪਮਾਣੇ ਏਵ ਠਿਤਿਕਾ ਤਿਟ੍ਠਤਿ. ‘‘ਏਕਵਾਰਨ੍ਤਿ ਯਾਵ ਤਸ੍ਮਿਂ ਆਵਾਸੇ ਵਸਨ੍ਤਿ ਭਿਕ੍ਖੂ, ਸਬ੍ਬੇਵ ਲਭਨ੍ਤੀ’’ਤਿ ਲਿਖਿਤਂ.

ਸਲਾਕਭਤ੍ਤਕਥਾਵਣ੍ਣਨਾ

ਨ ਹਿ ਬਹਿਸੀਮਾਯ ਸਙ੍ਘਲਾਭੋਤਿ ਏਤ੍ਥ ‘‘ਉਦ੍ਦੇਸਭਤ੍ਤਾਦੀਸੁ ਬਹਿਸੀਮਾਯ ਠਿਤਸ੍ਸਪਿ ਚੇ ਉਪਾਸਕਾ ਦੇਨ੍ਤਿ, ਗਹੇਤੁਂ ਲਭਨ੍ਤਿ, ਅਤ੍ਤਨੋਪਿ ਪਾਪੇਤ੍ਵਾ ਗਹਣਂ ਅਨੁਞ੍ਞਾਤਂ, ਤਥਾ ਇਧ ਨ ਵਟ੍ਟਤੀ’’ਤਿ ਵੁਤ੍ਤਂ. ਨ ਪਾਪੁਣਨ੍ਤੀਤਿ ਉਦ੍ਦਿਸਿਤ੍ਵਾਪਿ. ਵਾਰਗਾਮਨ੍ਤਿ ਦੂਰਤ੍ਤਾ ਵਾਰੇਨ ਨਿਗ੍ਗਹੇਨ ਗਨ੍ਤਬ੍ਬਗਾਮੇ. ਫਾਤਿਕਮ੍ਮਮੇਵਾਤਿ ਅਤਿਰੇਕਲਾਭਾ ਚ ਭਵਨ੍ਤਿ. ਸਮ੍ਮੁਖੀਭੂਤਸ੍ਸਾਤਿ ਯੇਭੁਯ੍ਯੇਨ ਚੇ ਭਿਕ੍ਖੂ ਬਹਿਸੀਮਂ ਗਤਾ, ਸਮ੍ਮੁਖੀਭੂਤਸ੍ਸ ਪਾਪੇਤਬ੍ਬਂ. ਸਭਾਗਤ੍ਤਾ ਹਿ ਏਕੇਨ ਲਦ੍ਧਂ ਸਬ੍ਬੇਸਂ ਪਹੋਤਿ, ਤਸ੍ਮਿਮ੍ਪਿ ਅਸਤਿ ਅਤ੍ਤਨੋ ਪਾਪੇਤ੍ਵਾ ਦਾਤਬ੍ਬਂ. ‘‘ਲਦ੍ਧਾ ਵਾ ਅਲਦ੍ਧਾ ਵਾ’’ਤਿ ਵਚਨਸਿਲਿਟ੍ਠਵਸੇਨ ਵੁਤ੍ਤਂ. ਵਿਹਾਰੇ ਅਪਾਪਿਤਂ ਪਨ…ਪੇ… ਨ ਵਟ੍ਟਤੀਤਿ ਸਲਾਕਭਤ੍ਤਂ ਵਿਹਾਰੇ ਉਦ੍ਦਿਸਿਯਤਿ. ਤੇਨ ਪਨ ਦਿਨ੍ਨਸਲਾਕੇਨ. ਤਸ੍ਸਾਤਿ ਗਹੇਤ੍ਵਾ ਗਤਸ੍ਸ. ਸਲਾਕਾ ਗਹੇਤਬ੍ਬਾਤਿ ਯੁਤ੍ਤਂ ਵਿਯ. ਸਬ੍ਬਪੋਤ੍ਥਕੇਸੁ ‘‘ਗਾਹੇਤਬ੍ਬਾ’’ਤਿ ਪਾਠੋ, ਤਸ੍ਮਾ ਤੇਨਾਤਿ ਸਲਾਕਗ੍ਗਾਹਾਪਕੇਨਾਤਿ ਅਤ੍ਥੋ. ‘‘ਚੋਰਿਕਾਯ ਗਹਿਤਤ੍ਤਾ ਨ ਪਾਪੁਣਾਤੀ’’ਤਿ ਵਚਨਤੋ ‘‘ਕੁਟਿਸੋਧਨਂ ਵਟ੍ਟਤੀ’’ਤਿ ਚ ਦੀਪਵਾਸਿਨੋ ਵਦਨ੍ਤਿ ਕਿਰ. ਏਕਂ ਮਹਾਥੇਰਸ੍ਸਾਤਿ ਮਹਾਥੇਰੋ ਵਿਹਾਰਤੋ ਯੇਭੁਯ੍ਯੇਨ ਨ ਗਚ੍ਛਤਿ, ਇਤਰੇ ਕਦਾਚਿ ਗਚ੍ਛਤਿ, ਤਸ੍ਮਾ ਸਭਾਗਾ ਚੇ, ਅਤ੍ਤਨੋ ਪਾਪੇਤ੍ਵਾ ਪੁਨ ਇਤਰੇਸਂ ਦਿਯ੍ਯਤਿ. ਵਿਹਾਰੇ ਥੇਰਸ੍ਸ ਪਤ੍ਤਸਲਾਕਭਤ੍ਤਨ੍ਤਿ ਮਹਾਥੇਰੋ ਏਕਕੋਵ ਵਿਹਾਰੇ ਓਹੀਨੋ, ‘‘ਅਵਸ੍ਸਂ ਸਬ੍ਬਸਲਾਕਾ ਅਤ੍ਤਨੋ ਪਾਪੇਤ੍ਵਾ ਠਿਤੋ’’ਤਿ ਪਟਿਸ੍ਸਯਂ ਗਨ੍ਤ੍ਵਾ ਆਗਨ੍ਤੁਕਭਿਕ੍ਖੂਨਮ੍ਪਿ ਅਦਸ੍ਸਨਤੋ ਕੁਕ੍ਕੁਚ੍ਚਂ ਅਕਤ੍ਵਾ ਭੁਞ੍ਜਨ੍ਤਿ.

ਪਕ੍ਖਿਕਭਤ੍ਤਕਥਾਵਣ੍ਣਨਾ

ਉਪੋਸਥਦਿਵਸੇ ਆਪਤ੍ਤਿਦੇਸਨਂ ਸਨ੍ਧਾਯ ‘‘ਪਰਿਸੁਦ੍ਧਸੀਲਾਨ’’ਨ੍ਤਿ ਆਹ. ਲੇਖਂ ਕਤ੍ਵਾ ਨਿਬਦ੍ਧਾਪਿਤਂ. ‘‘ਆਗਨ੍ਤੁਕਭਤ੍ਤਮ੍ਪਿ ਗਮਿਕਭਤ੍ਤਮ੍ਪੀ’’ਤਿ ਆਗਨ੍ਤੁਕੋਵ ਹੁਤ੍ਵਾ ਗਚ੍ਛਨ੍ਤਂ ਸਨ੍ਧਾਯ ਵੁਤ੍ਤਂ. ਅਨਾਥਗਿਲਾਨੁਪਟ੍ਠਾਕੋਪਿ ਤੇਨ ਦਿਨ੍ਨਂ ਭੁਞ੍ਜਤਿ ਚੇ, ਤਸ੍ਸਪਿ ਪਾਪੇਤਬ੍ਬਮੇਵ. ਗੁਲ਼ਪਿਣ੍ਡਂ ਤਾਲਪਕ੍ਕਮਤ੍ਤਂ.

ਸੇਨਾਸਨਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੭. ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾ

ਛਸਕ੍ਯਪਬ੍ਬਜ੍ਜਾਕਥਾਵਣ੍ਣਨਾ

੩੩੦. ‘‘ਅਨੁਪਿਯਂ ਨਾਮਾ’’ਤਿ ਏਕਵਚਨੇਨ ਦਿਸ੍ਸਤਿ, ਸਤ੍ਤਮਿਯਂ ਪਨ ‘‘ਅਨੁਪਿਯਾਯ’’ਨ੍ਤਿ. ‘‘ਕਾਲ਼ੁਦਾਯਿਪ੍ਪਭੁਤਯੋ ਦਸ ਦੂਤਾ’’ਤਿ ਪਾਠੋ. ‘‘ਨ ਹੇਟ੍ਠਾਪਾਸਾਦਾ ਨ ਹੇਟ੍ਠਾਪਾਸਾਦਂ ਵਾ’’ਤਿ ਲਿਖਿਤਂ.

੩੩੨. ਪੁਬ੍ਬੇ ਪੁਬ੍ਬਕਾਲੇ. ‘‘ਰਞ੍ਞੋ ਸਤੋ’’ਤਿ ਚ ‘‘ਰਞ੍ਞੋਵਸਤੋ’’ਤਿ ਚ ਪਾਠੋ.

੩੩੩. ਨ ਲਾਭਤਣ੍ਹਾ ਇਧ ਕਾਮਤਣ੍ਹਾ, ਝਾਨਸ੍ਸ ਨੇਸਾ ਪਰਿਹਾਨਿ ਹੇਤੁ. ਬੁਦ੍ਧਤ੍ਤਸੀਲਂ ਪਨ ਪਤ੍ਥਯਨ੍ਤੋ ਝਾਨਾਪਿ ਨਟ੍ਠੋਤਿ. ਨਨੁ ਪਤ੍ਤਭਾਵਨਾ. ਮਨੋਮਯਨ੍ਤਿ ਝਾਨਮਨੋਮਯਂ.

੩੩੪. ਸਤ੍ਥਾਰੋਤਿ ਗਣਸਤ੍ਥਾਰੋ.

੩੩੯. ਪੋਤ੍ਥਨਿਕਨ੍ਤਿ ਛੁਰਿਕਂ.

੩੪੦. ਮਨੁਸ੍ਸੇਤਿ ਪੁਰਿਸੇ.

੩੪੧. ਏਕਰਤ੍ਤਾਧਿਕਾਰੇਨ ਰਕ੍ਖਂ ਪਚ੍ਚਾਸੀਸਨ੍ਤਾ ਈਦਿਸਾਤਿ ਦਸ੍ਸਨਤ੍ਥਂ ‘‘ਪਞ੍ਚਿਮੇ’’ਤਿਆਦਿ ਵੁਤ੍ਤਂ. ‘‘ਪੁਬ੍ਬੇ ਰਕ੍ਖਸ੍ਸੇਤ’’ਨ੍ਤਿ ਵੁਤ੍ਤਤ੍ਤਾ ਮਯ੍ਹਂ ਪਨ ਰਕ੍ਖਣੇ ਕਿਚ੍ਚਂ ਨਤ੍ਥੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਪਰੂਪਕ੍ਕਮੇਨ ਤਥਾਗਤਂ ਜੀਵਿਤਾ ਵੋਰੋਪੇਯ੍ਯਾਤਿ ਇਦਂ ਆਣਤ੍ਤਿਯਾ ਆਗਤਤ੍ਤਾ ਏਵਂ ਵੁਤ੍ਤਂ.

੩੪੨. ਮਾ ਆਸਦੋਤਿ ਮਾ ਵਧਕਚਿਤ੍ਤੇਨ ਉਪਗਚ੍ਛ. ਇਤੋਤਿ ਇਮਮ੍ਹਾ ਜੀਵਿਤਮ੍ਹਾ. ‘‘ਯਤੋਤਿ ਯਸ੍ਮਾ, ਯਤੋਤਿ ਵਾ ਗਤਸ੍ਸਾ’’ਤਿ ਲਿਖਿਤਂ. ‘‘ਪਟਿਕੁਟਿਤੋਤਿ ਅਪਸਕ੍ਕਿਤ੍ਵਾ ਸਙ੍ਕੁਚਿਤੋ ਹੁਤ੍ਵਾ ਵਾ ਪਟਿਸਕ੍ਕਤੀ’’ਤਿ ਲਿਖਿਤਂ.

੩੪੩. ਤਿਕਭੋਜਨਨ੍ਤਿ ਤੀਹਿ ਭੁਞ੍ਜਿਤਬ੍ਬਭੋਜਨਂ. ‘‘ਤਿਕਭੋਜਨੀਯ’’ਨ੍ਤਿਪਿ ਪਾਠੋ. ਪਰਿਕਪ੍ਪਤੋ ਹਿ ਤਿਣ੍ਣਂ ਭੁਞ੍ਜਿਤੁਂ ਅਨੁਜਾਨਾਮਿ, ਤਤੋ ਉਦ੍ਧਂ ਗਣਭੋਜਨਮੇਵ ਹੋਤਿ, ਤਸ੍ਸਾਪਿ ਇਦਮੇਵ ਵੁਤ੍ਤਂ. ਇਧ ਅਪੁਬ੍ਬਂ ਨਤ੍ਥਿ. ‘‘ਅਕਤਵਿਞ੍ਞਤ੍ਤਿਲਦ੍ਧਂ ਤਿਣ੍ਣਂ ਭੁਞ੍ਜਨ੍ਤਾਨਂ ਕਿਞ੍ਚਾਪਿ ਤਂ ਗਣਭੋਜਨਂ ਨਾਮ ਨ ਹੋਤਿ, ਵਿਞ੍ਞਤ੍ਤਿਵਸੇਨ ਪਨ ਨ ਵਟ੍ਟਤੀ’’ਤਿ ਲਿਖਿਤਂ. ਤਯੋ ਅਤ੍ਥਵਸੇ ਪਟਿਚ੍ਚਾਤਿ ਏਤ੍ਥਾਪਿ ‘‘ਮਾ ਪਾਪਿਚ੍ਛਾਪਕ੍ਖਂ ਨਿਸ੍ਸਾਯ ਸਙ੍ਘਂ ਭਿਨ੍ਦੇਯ੍ਯੁ’’ਨ੍ਤਿ ਪੇਸਲਾਨਂ ਭਿਕ੍ਖੂਨਂ ਫਾਸੁਵਿਹਾਰਾਯਾਤਿ ਯੋਜੇਤਬ੍ਬਂ. ਕੁਲਾਨੁਦ੍ਦਯਤਾਯ ਚਾਤਿ ਕੁਲਾਨਂ ਪਸਾਦਰਕ੍ਖਣਤ੍ਥਂ. ਵਜ੍ਜਨ੍ਤਿ ਵਜ੍ਜਮੇਵ. ‘‘ਵਜ੍ਜਮਿਮਂ ਫੁਸੇਯ੍ਯਾ’’ਤਿ ਲਿਖਿਤਂ. ‘‘ਵਜ੍ਜਨੀਯਂ ਪੁਗ੍ਗਲਂ ਫੁਸੇਯ੍ਯਾ’’ਤਿ ਵੁਤ੍ਤਂ. ‘‘ਇਮਸ੍ਸ ਮਨੋ ਨ ਫੁਸੇਯ੍ਯਾ’’ਤਿ ਵਤ੍ਤਬ੍ਬਮ੍ਪਿ ਸਿਯਾ. ਚਕ੍ਕਭੇਦਨ੍ਤਿ ਸਾਸਨਭੇਦਂ. ਆਯੁਕਪ੍ਪਨ੍ਤਿ ਏਤ੍ਥ ਕਿਞ੍ਚਾਪਿ ਅਵੀਚਿਮ੍ਹਿ ਆਯੁਪਰਿਮਾਣਂ ਨਤ੍ਥਿ, ਯੇਨ ਪਨ ਕਮ੍ਮੇਨ ਯਤ੍ਤਕਂ ਅਨੁਭਵਿਤਬ੍ਬਂ, ਤਸ੍ਸ ਆਯੁਕਪ੍ਪਨ੍ਤਿ ਵੇਦਿਤਬ੍ਬਂ.

੩੪੫. ‘‘ਅਞ੍ਞਤਰਂ ਆਸਨਂ ਗਹੇਤ੍ਵਾ ਨਿਸੀਦੀ’’ਤਿ ਵਚਨਤੋ ਵਿਸਭਾਗਟ੍ਠਾਨਂ ਗਤਸ੍ਸ ਪੇਸਲਸ੍ਸਪਿ ਭਿਕ੍ਖੁਨੋ ਤੇਸਂ ਆਸਨੇ ਨਿਸੀਦਿਤੁਂ ਵਟ੍ਟਤੀਤਿ ਸਿਦ੍ਧਂ. ਆਗਿਲਾਯਤੀਤਿ ਰੁਜ੍ਜਤਿ. ਆਦੇਸਨਾਪਾਟਿਹਾਰਿਯਾਨੁਸਾਸਨਿਯਾਤਿ ਤਸ੍ਸ ਤਸ੍ਸ ਚਿਤ੍ਤਾਚਾਰਂ ਆਦਿਸ੍ਸ ਆਦਿਸ੍ਸ ਦੇਸਨਾ, ਆਦੇਸਨਾਪਾਟਿਹਾਰਿਯਾਨੁਸਾਸਨੀ. ਇਦ੍ਧਿ ਏਵ ਪਾਟਿਹਾਰਿਯਂ ਇਦ੍ਧਿਪਾਟਿਹਾਰਿਯਂ, ਇਦ੍ਧਿਪਾਟਿਹਾਰਿਯਸਂਯੁਤ੍ਤਾਯ ਅਨੁਸਾਸਨਿਯਾ ਓਵਦਤੀਤਿ ਅਤ੍ਥੋ. ਨਨੁ ਤਂ ਆਵੁਸੋਤਿ ਏਤ੍ਥ ਤਂ ਵਚਨਂ ਨਨੁ ਮਯਾ ਵੁਤ੍ਤੋਸੀਤਿ ਅਤ੍ਥੋ.

੩੪੬-੯. ਸੁਵਿਕ੍ਖਾਲਿਤਨ੍ਤਿ ਸੁਧੋਤਂ. ਸਂਖਾਦਿਤ੍ਵਾਤਿ ਸੁਟ੍ਠੁ ਖਾਦਿਤ੍ਵਾ. ‘‘ਮਹਿਂ ਵਿਕੁਬ੍ਬਤੋਤਿ ਮਹਾਵਿਸਾਲੋ’’ਤਿ ਲਿਖਿਤਂ. ਤਸ੍ਸ ਭਿਸਂ ਘਸਮਾਨਸ੍ਸ. ਤਤ੍ਥ ਨਦੀਸੁ ਜਗ੍ਗਤੋਤਿ ਪਾਲੇਨ੍ਤਸ੍ਸ. ‘‘ਕਿਂ? ਹਤ੍ਥਿਯੂਥਂ ਗਨ੍ਤੁ’’ਨ੍ਤਿ ਵਦਨ੍ਤਿ. ‘‘ਅਸਂਪਾਤੋ’ਤਿ ਪਾਠੋ, ਅਪਤ੍ਤੋ ਹੁਤ੍ਵਾਤਿ ਅਤ੍ਥੋ’’ਤਿ ਲਿਖਿਤਂ. ‘‘ਅਪਾਯਬਹੁਤ੍ਤਾ ਪੁਨ ਦਸ੍ਸਿਤੋ’’ਤਿ ਵੁਤ੍ਤਂ. ‘‘ਏਵਂਸਤੇਤਿ ਏਵਂ ਅਸ੍ਸ ਤੇ ਆਸਵਾ’’ਤਿ ਲਿਖਿਤਂ.

੩੫੦. ‘‘ਵੋਸਾਨਂ ਪਰਿਨਿਟ੍ਠਾਨਂ ਵਾ’’ਤਿ ਚ ਲਿਖਿਤਂ. ਜਾਤੂਤਿ ਦਲ਼੍ਹਤ੍ਥੇ ਨਿਪਾਤੋ. ਮਾ ਉਦਪਜ੍ਜਥਾਤਿ ਮਾ ਉਪ੍ਪਜ੍ਜੇਯ੍ਯ. ‘‘ਸੋ ਪਮਾਦਮਨੁਯੁਞ੍ਜਨ੍ਤੋ’’ਤਿ ਪਾਠੋ. ਅਨਾਦਰਂ ਕੁਸਲੇਸੁ. ਉਦਧਿ ਮਹਾਤਿ ਕਿਤ੍ਤਕੋ ਮਹਾ? ਭੇਸ੍ਮਾ ਯਾਵ ਭਯਾਨਕੋ, ਤਾਵ ਮਹਾਤਿ ਵੁਤ੍ਤਂ ਹੋਤਿ.

੩੫੧. ਨ ਖੋ, ਉਪਾਲਿ, ਭਿਕ੍ਖੁਨੀ ਸਙ੍ਘਂ ਭਿਨ੍ਦਤੀਤਿ ਏਤ੍ਥ ਭਿਕ੍ਖੁ ਸਙ੍ਘਂ ਨ ਭਿਨ੍ਦਤਿ, ਭਿਕ੍ਖੁਨੀ ਸਙ੍ਘਂ ਭਿਨ੍ਦਤੀਤਿ ਕੇਚਿ, ਨੇਤਂ ਗਹੇਤਬ੍ਬਂ. ਕੇਵਲਂ ‘‘ਸਙ੍ਘੋ’’ਤਿ ਵੁਤ੍ਤੇ ਭਿਕ੍ਖੁਸਙ੍ਘੋਵ ਅਧਿਪ੍ਪੇਤੋ. ‘‘ਸਙ੍ਘਸ੍ਸ ਦੇਤਿ, ਉਭਤੋਸਙ੍ਘਸ੍ਸ ਦੇਤਿ ਚਾ’’ਤਿ (ਮਹਾਵ. ੩੭੯) ਮਾਤਿਕਾਵਚਨਮ੍ਪਿ ਸਾਧੇਤਿ. ਤਸ੍ਮਿਂ ਅਧਮ੍ਮਦਿਟ੍ਠਿਭੇਦੇ ਧਮ੍ਮਦਿਟ੍ਠਿ ਸਿਯਾ. ‘‘ਸੀਲਸਤਿਭੇਦੇਸੁਪਿ ਸਮਾਨੋ ਧਮ੍ਮਂ ਕਾਤੁਨ੍ਤਿ ਸਙ੍ਘਭੇਦੇ ਵੇਮਤਿਕੋਪਿ ਤਾਦਿਸੋ ਵਾ’’ਤਿ ਲਿਖਿਤਂ. ਵਿਨਿਧਾਯਾਤਿ ਅਤ੍ਤਨੋ ਵਞ੍ਚਨਾਧਿਪ੍ਪਾਯਤਂ ਛਾਦੇਤ੍ਵਾ.

ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੮. ਵਤ੍ਤਕ੍ਖਨ੍ਧਕਵਣ੍ਣਨਾ

ਆਗਨ੍ਤੁਕਵਤ੍ਤਕਥਾਵਣ੍ਣਨਾ

੩੫੭. ਏਕਸ੍ਮਿਂ ਗਾਮੇ ਅਞ੍ਞਵਿਹਾਰਤੋ ਆਗਤੋਪਿ ਆਗਨ੍ਤੁਕੋਵ. ਤਤ੍ਥ ਕੇਚਿ ਏਵਂ ਵਦਨ੍ਤਿ ‘‘ਆਵਾਸਿਕੋ ਕਤ੍ਥਚਿ ਗਨ੍ਤ੍ਵਾ ਸਚੇ ਆਗਤੋ, ‘ਤੇਨਾਪਿ ਆਗਨ੍ਤੁਕਭਤ੍ਤਂ ਭੁਞ੍ਜਿਤਬ੍ਬ’ਨ੍ਤਿ ਵੁਤ੍ਤਤ੍ਤਾ ਦੂਰਾਗਮਨਂ ਵੁਤ੍ਤਂ ਹੋਤਿ, ਨ ਗਾਮੇ, ਤਸ੍ਮਾ ਨ ਯੁਤ੍ਤ’’ਨ੍ਤਿ. ਤੇ ਵਤ੍ਤਬ੍ਬਾ ‘‘ਆਗਨ੍ਤੁਕਭਤ੍ਤਂ ਨਾਮ ਗਹਟ੍ਠੇਹਿ ਠਪਿਤਂ. ਯਸ੍ਮਿਂ ਨਿਬਦ੍ਧਂ, ਤਤੋ ਅਞ੍ਞਗਾਮਤੋਤਿ ਆਪਨ੍ਨਂ. ਤਥਾ ਵਿਹਾਰਾਧਿਕਾਰਤ੍ਤਾ ਅਞ੍ਞਵਿਹਾਰਤੋ ਆਗਤੋਪਿ ਆਗਨ੍ਤੁਕੋ ਵਾ’’ਤਿ ਆਚਰਿਯਾਨਂ ਸਨ੍ਨਿਟ੍ਠਾਨਂ. ਪਾਨੀਯਂ ਪੁਚ੍ਛਿਤਬ੍ਬਂ, ਪਰਿਭੋਜਨੀਯਂ ਪੁਚ੍ਛਿਤਬ੍ਬਨ੍ਤਿ ਉਦ੍ਧਰਿਤ੍ਵਾ ਘਟਸਰਾਵਾਦਿਗਤਂ ਸਨ੍ਧਾਯ ਪਠਮਂ, ਦੁਤਿਯਂ ਕੂਪਤਲ਼ਾਕਾਦਿਗਤਨ੍ਤਿ ਆਚਰਿਯੋ. ਦੁਤਿਯਵਾਰੇ ਅਤ੍ਤਨੋ ਵਸਨਟ੍ਠਾਨਤ੍ਤਾ ਵਿਸੁਂ ਪੁਚ੍ਛਿਤਬ੍ਬਮੇਵ, ਤਸ੍ਮਾ ਵੁਤ੍ਤਂ ਏਤਂ ‘‘ਪਰਿਚ੍ਛਿਨ੍ਨਭਿਕ੍ਖੋ ਵਾ ਗਾਮੋ’’ਤਿ. ਬਹੂਸੁ ਪੋਤ੍ਥਕੇਸੁ ਦੁਵਿਧਾਪਿ ਯੁਜ੍ਜਤਿ.

ਅਨੁਮੋਦਨਵਤ੍ਤਕਥਾਵਣ੍ਣਨਾ

੩੬੨-੪. ਪਞ੍ਚਮੇ ਅਨੁਮੋਦਨਤ੍ਥਾਯ ਨਿਸਿਨ੍ਨੇ. ‘‘ਮਨੁਸ੍ਸਾਨਂ ਪਰਿਵਿਸਨਟ੍ਠਾਨਨ੍ਤਿ ਯਤ੍ਥ ਮਨੁਸ੍ਸਾ ਸਪੁਤ੍ਤਦਾਰਾ ਆਵਸਿਤ੍ਵਾ ਦੇਨ੍ਤੀ’’ਤਿ ਲਿਖਿਤਂ. ਇਮਸ੍ਮਿਂ ਖਨ੍ਧਕੇ ਆਗਨ੍ਤੁਕਾਵਾਸਿਕਗਮਿਕਾਨੁਮੋਦਨਭਤ੍ਤਗ੍ਗਪਿਣ੍ਡਚਾਰਿਕਾਰਞ੍ਞਕਸੇਨਾਸਨਜਨ੍ਤਾਘਰਵਚ੍ਚਕੁਟਿਉਪਜ੍ਝਾਚਰਿਯਸਦ੍ਧਿਵਿਹਾਰਿਕਨ੍ਤੇਵਾਸਿਕਵਤ੍ਤਾਨਿ ਚੁਦ੍ਦਸ ਮਹਾਵਤ੍ਤਾਨਿ ਨਾਮ. ਅਗ੍ਗਹਿਤਗ੍ਗਹਣੇਨ ਗਣਿਯਮਾਨਾਨਿ ਅਸੀਤਿ ਖਨ੍ਧਕਵਤ੍ਤਾਨਿ ਨਾਮ ਹੋਨ੍ਤਿ.

ਵਤ੍ਤਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੯. ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਵਣ੍ਣਨਾ

ਪਾਤਿਮੋਕ੍ਖੁਦ੍ਦੇਸਯਾਚਨਕਥਾਵਣ੍ਣਨਾ

੩੮੩-੪. ‘‘ਨਨ੍ਦਿਮੁਖੀ’’ਤਿ ਲਿਖਿਤਂ. ਆਯਤਕੇਨੇਵਾਤਿ ਆਦਿਮ੍ਹਿ ਏਵ. ਯਨ੍ਤਿ ਯਸ੍ਮਾ. ਸਵਨ੍ਤਿਯੋ ਮਹਾਨਦਿਯੋ. ‘‘ਮਹਨ੍ਤਭੂਤਾਨ’’ਨ੍ਤਿ ਪਾਠੋ. ਪਤ੍ਤਾਤਿ ਪਤ੍ਵਾ. ‘‘ਸਮੂਲਿਕਾਯ ਠਪੇਤਿ ਅਕਤਾਯਾ’’ਤਿ ਠਪਨਕਸ੍ਸ ਸਞ੍ਞਾਮੂਲਵਸੇਨ ਵੁਤ੍ਤਂ. ਤਂ ਵਤ੍ਥੁਂ ਅਵਿਨਿਚ੍ਛਿਨਿਤ੍ਵਾਵ ਪਰਿਸਾ ਵੁਟ੍ਠਾਤਿ.

ਅਤ੍ਤਾਦਾਨਅਙ੍ਗਕਥਾਵਣ੍ਣਨਾ

੩੯੮-੯. ‘‘ਅਤ੍ਤਾਦਾਨਨ੍ਤਿ ਸਯਂ ਪਰੇਹਿ ਚੋਦਿਤੋ ਅਤ੍ਤਾਨਂ ਸੋਧੇਤੁਂ ਅਨਾਦਿਯਿਤ੍ਵਾ ਪਰੇਸਂ ਵਿਪ੍ਪਟਿਪਤ੍ਤਿਂ ਦਿਸ੍ਵਾ ਸਾਸਨਂ ਸੋਧੇਤੁਂ ਅਤ੍ਤਨਾ ਆਦਿਤਬ੍ਬ’’ਨ੍ਤਿ ਲਿਖਿਤਂ. ਵਸ੍ਸਾਰਤ੍ਤੋਤਿ ਵਸ੍ਸਕਾਲੋ. ਸਪ੍ਪਟਿਮਾਸੋਤਿ ਆਕਡ੍ਢਨਯੁਤ੍ਤੋਤਿ ਅਧਿਪ੍ਪਾਯੋ.

੪੦੧. ਉਪਦਹਾਤਬ੍ਬੋਤਿ ਉਪ੍ਪਾਦੇਤਬ੍ਬੋ, ਵਿਪ੍ਪਟਿਸਾਰਮੁਖੇਨ ਧਾਰੇਤਬ੍ਬੋਤਿ ਅਧਿਪ੍ਪਾਯੋ.

ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

੧੦. ਭਿਕ੍ਖੁਨਿਕ੍ਖਨ੍ਧਕਵਣ੍ਣਨਾ

ਮਹਾਪਜਾਪਤਿਗੋਤਮੀਵਤ੍ਥੁਕਥਾਵਣ੍ਣਨਾ

੪੦੨-੩. ਸੂਨੇਹੀਤਿ ਸੁਤੇਹਿ. ‘‘ਸੇਤਟ੍ਟਿਕਾ ਨਾਮ ਰੋਗਜਾਤੀ’’ਤਿ ਪਾਲ਼ਿ. ‘‘ਸੇਤਟ੍ਠਿਕਾ’’ਤਿ ਅਟ੍ਠਕਥਾ. ‘‘ਪਟਿਸਮ੍ਭਿਦਾਪਤ੍ਤਖੀਣਾਸਵਗ੍ਗਹਣੇਨ ਝਾਨਾਨਿਪਿ ਗਹਿਤਾਨੇਵ ਹੋਨ੍ਤਿ. ਨ ਹਿ ਨਿਜ੍ਝਾਨਿਕਾਨਂ ਸਬ੍ਬਪ੍ਪਕਾਰਾ ਸਮ੍ਪਤ੍ਤਿ ਇਜ੍ਝਤੀ’’ਤਿ ਲਿਖਿਤਂ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾਵਣ੍ਣਨਾ

੪੦੪. ਯਦਗ੍ਗੇਨ ਯਂ ਦਿਵਸਂ ਆਦਿਂ ਕਤ੍ਵਾ. ਤਦੇਵਾਤਿ ਤਸ੍ਮਿਂ ਏਵ ਦਿਵਸੇ. ‘‘ਅਨੁਞਤ੍ਤਿਯਾ’’ਤਿ ਪਾਠੋ. ‘‘ਅਨੁਪਞ੍ਞਤ੍ਤਿਯਾ’’ਤਿ ਨ ਸੁਨ੍ਦਰਂ.

੪੦੫. ‘‘ਪਟਿਗ੍ਗਣ੍ਹਾਮਿ ਯਾਵਜੀਵਂ ਅਨਤਿਕ੍ਕਮਨੀਯੋ’’ਤਿ ਵਤ੍ਵਾ ਇਦਾਨਿ ਕਿਂ ਕਾਰਣਾ ਵਰਂ ਯਾਚਤੀਤਿ ਚੇ? ਪਰੂਪਵਾਦਵਿਵਜ੍ਜਨਤ੍ਥਂ. ਦੁਬ੍ਬੁਦ੍ਧਿਨੋ ਹਿ ਕੇਚਿ ਵਦੇਯ੍ਯੁਂ ‘‘ਮਹਾਪਜਾਪਤਿਯਾ ਪਠਮਂ ਸਮ੍ਪਟਿਚ੍ਛਿਤਤ੍ਤਾ ਉਭਤੋਸਙ੍ਘਸ੍ਸ ਯਥਾਵੁਡ੍ਢਅਭਿਵਾਦਨਂ ਨ ਜਾਤਂ. ਗੋਤਮੀ ਚੇ ਵਰਂ ਯਾਚੇਯ੍ਯ, ਭਗਵਾ ਅਨੁਜਾਨੇਯ੍ਯਾ’’ਤਿ.

੪੦੮. ਵਿਮਾਨੇਤ੍ਵਾਤਿ ਅਪਰਜ੍ਝਿਤ੍ਵਾ.

੪੧੦-੩. ਕਮ੍ਮਪ੍ਪਤ੍ਤਾਯੋਪੀਤਿ ਕਮ੍ਮਾਰਹਾਪਿ. ਆਪਤ੍ਤਿਗਾਮਿਨਿਯੋਪੀਤਿ ਆਪਤ੍ਤਿਂ ਆਪਨ੍ਨਾਯੋਪਿ. ਦ੍ਵੇ ਤਿਸ੍ਸੋ ਭਿਕ੍ਖੁਨਿਯੋਤਿ ਦ੍ਵੀਹਿ ਤੀਹਿ ਭਿਕ੍ਖੁਨੀਹਿ. ‘‘ਮਨੋਸਿਲਿਕਾਯਾ’’ਤਿ ਪਾਠੋ.