੧੨. ਸਤ੍ਤਸਤਿਕਕ੍ਖਨ੍ਧਕਵਣ੍ਣਨਾ

ਦਸਵਤ੍ਥੁਕਥਾਵਣ੍ਣਨਾ

੪੪੬. ਨਿਕ੍ਖਿਤ੍ਤਮਣਿਸੁਵਣ੍ਣਾਤਿ ਸਿਕ੍ਖਾਪਦੇਨੇਵ ਪਟਿਕ੍ਖਿਤ੍ਤਮਣਿਸੁਵਣ੍ਣਾ. ਤਤ੍ਥ ਮਣਿਗ੍ਗਹਣੇਨ ਸਬ੍ਬਂ ਦੁਕ੍ਕਟਵਤ੍ਥੁ, ਸੁਵਣ੍ਣਗ੍ਗਹਣੇਨ ਸਬ੍ਬਂ ਪਾਚਿਤ੍ਤਿਯਵਤ੍ਥੁ ਗਹਿਤਂ ਹੋਤਿ. ਭਿਕ੍ਖਗ੍ਗੇਨ ਭਿਕ੍ਖੁਗਣਨਾਯਾਤਿ ਵੁਤ੍ਤਂ ਹੋਤਿ.

੪੪੭. ਮਹਿਕਾਤਿ ਹਿਮਂ. ਪੋਸਾਤਿ ਸਤ੍ਤਾ. ਸਰਜਾਤਿ ਸਕਿਲੇਸਰਜਾ. ਮਗਾਤਿ ਮਗਸਦਿਸਾ. ਤਸ੍ਮਿਂ ਤਸ੍ਮਿਂ ਵਿਸਯੇ, ਭਵੇ ਵਾ ਨੇਤੀਤਿ ਨੇਤ੍ਤਿ, ਤਣ੍ਹਾਯੇਤਂ ਅਧਿਵਚਨਂ, ਤਾਯ ਸਹ ਵਤ੍ਤਨ੍ਤੀਤਿ ਸਨੇਤ੍ਤਿਕਾ.

੪੫੦-੨. ਅਹੋਗਙ੍ਗੋਤਿ ਪਬ੍ਬਤਸ੍ਸ ਨਾਮਂ. ਅਨੁਮਾਨੇਸ੍ਸਾਮਾਤਿ ਪਞ੍ਞਾਪੇਸ੍ਸਾਮ. ਆਸੁਤਾਤਿ ਸਜ੍ਜਿਤਾ, ‘‘ਅਸੁਤ੍ਤਾ’’ਤਿ ਵਾ ਪਾਠੋ, ਅਨਾਵਿਲਾ ਅਪਕ੍ਕਾ ਤਰੁਣਾ.

੪੫੩. ਉਜ੍ਜਵਿਂਸੁ ਪਟਿਸੋਤੇਨ ਗਚ੍ਛਿਂਸੁ.

੪੫੫. ਅਪ੍ਪੇਵ ਨਾਮਾਤਿ ਸਾਧੁ ਨਾਮ. ਮੂਲਾ ਦਾਯਕਾ ਪੇਸਲਕਾ. ‘‘ਕੁਲ੍ਲਕਵਿਹਾਰੇਨਾਤਿ ਖੁਦ੍ਦਕਵਿਹਾਰੇਨਾ’’ਤਿ ਲਿਖਿਤਂ. ਰੂਪਾਵਤਾਰਤ੍ਤਾ ਕੁਲ੍ਲਕਵਿਹਾਰੋ ਨਾਮ. ਕਥਂ ਪਨੇਤਂ ਪਞ੍ਞਾਯਤਿ, ਯੇਨ ਸਨ੍ਨਿਧਿਕਤਂ ਯਾਵਜੀਵਿਕਂ ਯਾਵਕਾਲਿਕੇਨ ਤਦਹੁਪਟਿਗ੍ਗਹਿਤੇਨ ਸਮ੍ਭਿਨ੍ਨਰਸਂ ਤਦਹੁਪਟਿਗ੍ਗਹਿਤਸਙ੍ਖਯਂ ਆਗਨ੍ਤ੍ਵਾ ਸਨ੍ਨਿਧਿਕਤਾਮਿਸਸਙ੍ਖ੍ਯਮੇਵ ਗਚ੍ਛਤੀਤਿ? ਵੁਚ੍ਚਤੇ – ‘‘ਯਾਵਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਤਦਹੁਪਟਿਗ੍ਗਹਿਤ’’ਨ੍ਤਿ ਵਚਨਤੋ ਪੁਰੇਪਟਿਗ੍ਗਹਿਤਂ ਯਾਵਜੀਵਿਕਂ ਤਦਹੁਪਟਿਗ੍ਗਹਿਤੇਨਾਮਿਸੇਨ ਚੇ ਸਮ੍ਭਿਨ੍ਨਂ, ਪੁਰੇਪਟਿਗ੍ਗਹਿਤਸਙ੍ਖ੍ਯਮੇਵ ਗਚ੍ਛਤੀਤਿ ਸਿਦ੍ਧਂ. ਅਞ੍ਞਥਾ ‘‘ਸਤ੍ਤਾਹਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਪਟਿਗ੍ਗਹਿਤਂ ਸਤ੍ਤਾਹਂ ਕਪ੍ਪਤੀ’’ਤਿ (ਮਹਾਵ. ੩੦੫) ਵੁਤ੍ਤਟ੍ਠਾਨੇ ਵਿਯ ਇਧਾਪਿ ‘‘ਯਾਵਕਾਲਿਕੇਨ, ਭਿਕ੍ਖਵੇ, ਯਾਵਜੀਵਿਕਂ ਪਟਿਗ੍ਗਹਿਤਂ ਕਾਲੇ ਕਪ੍ਪਤੀ’’ਤਿ ਵਦੇਯ੍ਯ, ਤਞ੍ਚਾਵੁਤ੍ਤਂ. ਤਸ੍ਮਾ ਪੁਰੇਪਟਿਗ੍ਗਹਿਤਂ ਤਂ ਆਮਿਸਸਮ੍ਭਿਨ੍ਨਂ ਆਮਿਸਗਤਿਕਮੇਵਾਤਿ ਵੇਦਿਤਬ੍ਬਂ. ਗਣ੍ਠਿਪਦੇ ਪਨ ‘‘ਸਨ੍ਨਿਧਿਕਾਰਕਂ ਖਾਦਨੀਯਂ ਵਾ ਭੋਜਨੀਯਂ ਵਾ’’ਤਿ (ਪਾਚਿ. ੨੫੩) ਵੁਤ੍ਤਂ. ਬ੍ਯਞ੍ਜਨਮਤ੍ਤਂ ਨ ਗਹੇਤਬ੍ਬਂ.

੪੫੭. ਇਧਾਤਿ ਇਮਸ੍ਮਿਂ ਪਾਠੇ. ‘‘‘ਕਾਲੇ ਕਪ੍ਪਤਿ, ਵਿਕਾਲੇ ਨ ਕਪ੍ਪਤੀ’ਤਿ (ਮਹਾਵ. ੩੦੫) ਵੁਤ੍ਤਵਚਨਮਤ੍ਤੇਨ ‘ਵਿਕਾਲੇ ਕਪ੍ਪਤੀ’ਤਿ ਵਿਕਾਲਭੋਜਨਪਾਚਿਤ੍ਤਿਯਂ ਆਵਹਂ ਹੋਤੀਤਿ ਅਤ੍ਥੋ, ‘ਨ ਕਪ੍ਪਤੀ’ਤਿ ਸਨ੍ਨਿਧਿਭੋਜਨਪਾਚਿਤ੍ਤਿਯਂ ਆਵਹਂ ਹੋਤੀਤਿ ਅਤ੍ਥੋ, ਯਦਿ ਸਮ੍ਭਿਨ੍ਨਰਸਂ ਅਜ੍ਜਪਟਿਗ੍ਗਹਿਤਮ੍ਪਿ ਯਾਵਜੀਵਿਕਨ੍ਤਿ ਅਤ੍ਥੋ’’ਤਿ ਲਿਖਿਤਂ. ਸੁਤ੍ਤਵਿਭਙ੍ਗੇਤਿ ਮਾਤਿਕਾਸਙ੍ਖਾਤੇ ਸੁਤ੍ਤੇ ਚ ਤਸ੍ਸ ਪਦਭਾਜਨੀਯਸਙ੍ਖਾਤੇ ਵਿਭਙ੍ਗੇ ਚਾਤਿ ਅਤ੍ਥੋ. ਇਦਂ ਆਗਤਮੇਵ. ਕਤਰਨ੍ਤਿ? ‘‘ਅਤਿਕ੍ਕਾਮਯਤੋ ਛੇਦਨਕ’’ਨ੍ਤਿ ਇਦਂ.

ਤਿਵਿਦਤ੍ਥਿਪਮਾਣਞ੍ਚੇ, ਅਦਸਂ ਤਂ ਨਿਸੀਦਨਂ;

ਨਿਸੀਦਨਂ ਕਥਂ ਹੋਤਿ, ਸਦਸਂ ਤਞ੍ਹਿ ਲਕ੍ਖਣਂ.

ਤਿਵਿਦਤ੍ਥਿਪਮਾਣਂ ਤਂ, ਦਸਾ ਤਤ੍ਥ ਵਿਦਤ੍ਥਿ ਚੇ;

ਤਂਨਿਸੀਦਨਨਾਮਤ੍ਤਾ, ਤਸ੍ਮਿਂ ਛੇਦਨਕਂ ਸਿਯਾ.

ਅਨਿਸੀਦਨਨਾਮਮ੍ਹਿ, ਕਥਂ ਛੇਦਨਕਂ ਭਵੇ;

ਇਤਿ ਚੇ ਨੇਵ ਵਤ੍ਤਬ੍ਬਂ, ਨਿਸੀਦਨਵਿਦਤ੍ਥਿਤੋ.

ਕਪ੍ਪਤੇ ਸਦਸਾਮਤ੍ਤਂ, ਨਿਸੀਦਨਮਿਤਿ ਕਾਰਣਂ;

ਕਥਂ ਯੁਜ੍ਜਤਿ ਨੋ ਚੇਤਂ, ਨਿਸੀਦਨਸ੍ਸ ਨਾਮਕਂ.

ਨਿਸੀਦਨਨ੍ਤਿ ਵੁਤ੍ਤਤ੍ਤਾ, ਪਮਾਣਸਮਤਿਕ੍ਕਮਾ;

ਤਸ੍ਸਾਨੁਮਤਿਹੇਤੁਤ੍ਤਾ, ਤਤ੍ਥ ਛੇਦਨਕਂ ਭਵੇ.

ਜਾਤਰੂਪਕਪ੍ਪੇ –

ਜਾਤਰੂਪਂ ਪਟਿਕ੍ਖਿਤ੍ਤਂ, ਪੁਗ੍ਗਲਸ੍ਸੇਵ ਪਾਲ਼ਿਯਂ;

ਨ ਸਙ੍ਘਸ੍ਸਾਤਿ ਸਙ੍ਘਸ੍ਸ, ਤਞ੍ਚੇ ਕਪ੍ਪਤਿ ਸਬ੍ਬਸੋ.

ਵਿਕਾਲਭੋਜਨਞ੍ਚਾਪਿ, ਪੁਗ੍ਗਲਸ੍ਸੇਵ ਵਾਰਿਤਂ;

ਨ ਸਙ੍ਘਸ੍ਸਾਤਿ ਸਙ੍ਘਸ੍ਸ, ਕਪ੍ਪਤੀਤਿ ਕਥਂ ਸਮਂ.

ਸਤ੍ਤਸਤਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

ਚੂਲ਼ਵਗ੍ਗਵਣ੍ਣਨਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ