੧੦. ਭਿਕ੍ਖੁਨਿਕ੍ਖਨ੍ਧਕਵਣ੍ਣਨਾ

ਮਹਾਪਜਾਪਤਿਗੋਤਮੀਵਤ੍ਥੁਕਥਾਵਣ੍ਣਨਾ

੪੦੨-੩. ਸੂਨੇਹੀਤਿ ਸੁਤੇਹਿ. ‘‘ਸੇਤਟ੍ਟਿਕਾ ਨਾਮ ਰੋਗਜਾਤੀ’’ਤਿ ਪਾਲ਼ਿ. ‘‘ਸੇਤਟ੍ਠਿਕਾ’’ਤਿ ਅਟ੍ਠਕਥਾ. ‘‘ਪਟਿਸਮ੍ਭਿਦਾਪਤ੍ਤਖੀਣਾਸਵਗ੍ਗਹਣੇਨ ਝਾਨਾਨਿਪਿ ਗਹਿਤਾਨੇਵ ਹੋਨ੍ਤਿ. ਨ ਹਿ ਨਿਜ੍ਝਾਨਿਕਾਨਂ ਸਬ੍ਬਪ੍ਪਕਾਰਾ ਸਮ੍ਪਤ੍ਤਿ ਇਜ੍ਝਤੀ’’ਤਿ ਲਿਖਿਤਂ.

ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾਵਣ੍ਣਨਾ

੪੦੪. ਯਦਗ੍ਗੇਨ ਯਂ ਦਿਵਸਂ ਆਦਿਂ ਕਤ੍ਵਾ. ਤਦੇਵਾਤਿ ਤਸ੍ਮਿਂ ਏਵ ਦਿਵਸੇ. ‘‘ਅਨੁਞਤ੍ਤਿਯਾ’’ਤਿ ਪਾਠੋ. ‘‘ਅਨੁਪਞ੍ਞਤ੍ਤਿਯਾ’’ਤਿ ਨ ਸੁਨ੍ਦਰਂ.

੪੦੫. ‘‘ਪਟਿਗ੍ਗਣ੍ਹਾਮਿ ਯਾਵਜੀਵਂ ਅਨਤਿਕ੍ਕਮਨੀਯੋ’’ਤਿ ਵਤ੍ਵਾ ਇਦਾਨਿ ਕਿਂ ਕਾਰਣਾ ਵਰਂ ਯਾਚਤੀਤਿ ਚੇ? ਪਰੂਪਵਾਦਵਿਵਜ੍ਜਨਤ੍ਥਂ. ਦੁਬ੍ਬੁਦ੍ਧਿਨੋ ਹਿ ਕੇਚਿ ਵਦੇਯ੍ਯੁਂ ‘‘ਮਹਾਪਜਾਪਤਿਯਾ ਪਠਮਂ ਸਮ੍ਪਟਿਚ੍ਛਿਤਤ੍ਤਾ ਉਭਤੋਸਙ੍ਘਸ੍ਸ ਯਥਾਵੁਡ੍ਢਅਭਿਵਾਦਨਂ ਨ ਜਾਤਂ. ਗੋਤਮੀ ਚੇ ਵਰਂ ਯਾਚੇਯ੍ਯ, ਭਗਵਾ ਅਨੁਜਾਨੇਯ੍ਯਾ’’ਤਿ.

੪੦੮. ਵਿਮਾਨੇਤ੍ਵਾਤਿ ਅਪਰਜ੍ਝਿਤ੍ਵਾ.

੪੧੦-੩. ਕਮ੍ਮਪ੍ਪਤ੍ਤਾਯੋਪੀਤਿ ਕਮ੍ਮਾਰਹਾਪਿ. ਆਪਤ੍ਤਿਗਾਮਿਨਿਯੋਪੀਤਿ ਆਪਤ੍ਤਿਂ ਆਪਨ੍ਨਾਯੋਪਿ. ਦ੍ਵੇ ਤਿਸ੍ਸੋ ਭਿਕ੍ਖੁਨਿਯੋਤਿ ਦ੍ਵੀਹਿ ਤੀਹਿ ਭਿਕ੍ਖੁਨੀਹਿ. ‘‘ਮਨੋਸਿਲਿਕਾਯਾ’’ਤਿ ਪਾਠੋ.

੪੨੦. ‘‘ਤੇਨ ਚ ਭਿਕ੍ਖੁ ਨਿਮਨ੍ਤੇਤਬ੍ਬੋ’’ਤਿ ਸਾਮੀਚਿਵਸੇਨ ਵੁਤ੍ਤਂ.

੪੨੨-੩. ‘‘ਅਨੁਜਾਨਾਮਿ…ਪੇ… ਤਾਵਕਾਲਿਕ’’ਨ੍ਤਿ ਪੁਗ੍ਗਲਿਕਂ ਸਨ੍ਧਾਯ ਵੁਤ੍ਤਂ, ਨ ਸਙ੍ਘਿਕਨ੍ਤਿ ਆਚਰਿਯੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਤੁਨਿਯਾ ਕਟਿਸੁਤ੍ਤਕ’’ਨ੍ਤਿ ਵਚਨਤੋ ਭਿਕ੍ਖੁਸ੍ਸ ਵਿਨਿਬਨ੍ਧਂ ਕਟਿਸੁਤ੍ਤਕਂ ਨ ਵਟ੍ਟਤਿ. ਪਗ੍ਘਰਨ੍ਤੀ ਵਿਸਵਿਣਾ. ਵੇਪੁਰਿਸਿਕਾ ਮਸ੍ਸੁਦਾਠੀ.

੪੨੫. ਤਯੋ ਨਿਸ੍ਸਯੇਤਿ ਰੁਕ੍ਖਮੂਲਞ੍ਹਿ ਸਾ ਨ ਲਭਤਿ.

੪੨੬. ਭਤ੍ਤਗ੍ਗੇ ਸਚੇ ਦਾਯਕਾ ਭਿਕ੍ਖੁਨਿਸਙ੍ਘਸ੍ਸ ਭੁਤ੍ਤਵਤੋ ਚਤੁਪਚ੍ਚਯੇ ਦਾਤੁਕਾਮਾ ਹੋਨ੍ਤਿ, ਯਥਾਵੁਡ੍ਢਮੇਵ.

੪੨੭. ਵਿਕਾਲੇਤਿ ਯਾਵ ਵਿਕਾਲੇ ਹੋਨ੍ਤਿ, ਤਾਵ ਪਵਾਰੇਸੁਨ੍ਤਿ ਅਤ੍ਥੋ. ਅਜ੍ਜਤ੍ਤਨਾਤਿ ਅਜ੍ਜਤਨਾ.

੪੨੮. ਅਨੁਵਾਦਨ੍ਤਿ ਇਸ੍ਸਰਿਯਟ੍ਠਾਨਂ. ਇਦਂ ਸਬ੍ਬਂ ‘‘ਅਜ੍ਜਤਗ੍ਗੇ ਓਵਟੋ ਭਿਕ੍ਖੁਨੀਨਂ ਭਿਕ੍ਖੂਸੁ ਵਚਨਪਥੋ’’ਤਿ ਪਞ੍ਞਤ੍ਤਸ੍ਸ ਗਰੁਧਮ੍ਮਸ੍ਸ ਵੀਤਿਕ੍ਕਮਆਪਤ੍ਤਿਪਞ੍ਞਾਪਨਤ੍ਥਂ ਵੁਤ੍ਤਨ੍ਤਿ ਵੇਦਿਤਬ੍ਬਂ, ਅਞ੍ਞਥਾ ਯੇਸਂ ਗਰੁਧਮ੍ਮਾਨਂ ਪਟਿਗ੍ਗਹਣੇਨ ਭਿਕ੍ਖੁਨੀਨਂ ਉਪਸਮ੍ਪਦਾ ਅਨੁਞ੍ਞਾਤਾ, ਤੇਸਂ ਵੀਤਿਕ੍ਕਮੇ ਅਨੁਪਸਮ੍ਪਨ੍ਨਾਵ ਸਿਯਾਤਿ ਆਸਙ੍ਕਾ ਭਵੇਯ੍ਯ.

੪੨੯. ਇਤ੍ਥਿਯੁਤ੍ਤੇਨਾਤਿ ਇਤ੍ਥੀਹਿ ਗਾਵੀਆਦੀਹਿ ਧੁਰਟ੍ਠਾਨੇ ਯੁਤ੍ਤੇਨ. ਪੁਰਿਸਨ੍ਤਰੇਨਾਤਿ ਪੁਰਿਸੇਨ ਅਨ੍ਤਰਿਕੇਨ. ‘‘ਪੁਰਿਸਦੁਤਿਯੇਨਾ’’ਤਿ ਲਿਖਿਤਂ, ਪੁਰਿਸਸਾਰਥਿਨਾਤਿ ਅਧਿਪ੍ਪਾਯੋ. ‘‘ਬਾਲ਼੍ਹਤਰਂ ਅਫਾਸੂ’’ਤਿ ਵਚਨਤੋ ਗਿਲਾਨਾਯ ਵਟ੍ਟਤਿਚ੍ਚੇਵ ਸਿਦ੍ਧਂ, ਭਗਵਨ੍ਤਂ ਆਪੁਚ੍ਛਿਤ੍ਵਾ ਅਨੁਞ੍ਞਾਤਟ੍ਠਾਨੇ ਉਪਸਮ੍ਪਜ੍ਜਿਸ੍ਸਾਮੀਤਿ ਅਧਿਪ੍ਪਾਯੋ.

੪੩੦. ਸਾ ਕੇਨਚਿਦੇਵ ਅਨ੍ਤਰਾਯੇਨਾਤਿ ਸਬ੍ਬਨ੍ਤਰਾਯਸਙ੍ਗਹਨਵਚਨਂ, ਤਸ੍ਮਾ ਤਂ ਨ ਅਨ੍ਤਰਾਯਂ ਕਿਤ੍ਤੇਤ੍ਵਾ, ਵੁਤ੍ਤਨ੍ਤਰਾਯੇਨ ‘‘ਰਾਜਨ੍ਤਰਾਯੇਨਾ’’ਤਿ ਸਾਧੇਤਬ੍ਬਨ੍ਤਿ ਆਚਰਿਯੋ.

੪੩੧-੨. ‘‘ਨਵਕਮ੍ਮਨ੍ਤਿ ਕਤ੍ਵਾ ‘ਏਤ੍ਤਕਾਨਿ ਵਸ੍ਸਾਨਿ ਵਸਤੂ’ਤਿ ਅਪਲੋਕੇਤ੍ਵਾ ਸਙ੍ਘਿਕਭੂਮਿਦਾਨ’’ਨ੍ਤਿ ਲਿਖਿਤਂ. ‘‘ਸਾਗਾਰ’’ਨ੍ਤਿ ਵੁਤ੍ਤਤ੍ਤਾ ਅਗਾਰਪਟਿਸਂਯੁਤ੍ਤਰਹੋਨਿਸਜ੍ਜਸਿਕ੍ਖਾਦਿਵਜ੍ਜਿਤਾਤਿ ਕੇਚਿ, ਯੁਤ੍ਤਮੇਤਂ. ਕਸ੍ਮਾ? ‘‘ਸਹਾਗਾਰਸੇਯ੍ਯਮਤ੍ਤਂ ਠਪੇਤ੍ਵਾ’’ਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪੋਸੇਤੁ’’ਨ੍ਤਿ ਵਚਨਤੋ ਪੋਸਨਯੁਤ੍ਤਕਮ੍ਮਂ ਸਬ੍ਬਂ ਵਟ੍ਟਤਿ ਮਾਤੁਯਾ, ਨ ਅਞ੍ਞੇਸਂ. ਵਸਿਤੁਂ ਚੇ ਨ ਸਕ੍ਕੋਤਿ ਦੁਤਿਯਂ ਵਿਨਾ, ਸਮ੍ਮਨ੍ਨਿਤ੍ਵਾਵ ਦਾਤਬ੍ਬਾ ਤਾਯ ਇਤਿ ਨੋ ਮਤਿ. ਕਿਤ੍ਤਕਂ ਕਾਲਂ? ਵਸਿਤ੍ਵਾ ਚੇ ਦੁਤਿਯਾ ਗਨ੍ਤੁਮਿਚ੍ਛਤਿ, ਅਞ੍ਞਂ ਸਮ੍ਮਨ੍ਨਿਤੁਂ ਯੁਤ੍ਤਾਵ. ਸਾ ਵਿਜਾਤਾ ਲਭੇਤਿ ਆਚਰਿਯੋ.

੪੩੪. ‘‘ਇਦਂ ਓਦਿਸ੍ਸ ਅਨੁਞ੍ਞਾਤਂ ਵਟ੍ਟਤੀਤਿ ਏਕਤੋ ਵਾ ਉਭਤੋ ਵਾ ਅਵਸ੍ਸਵੇ ਸਤਿਪਿ ਵਟ੍ਟਤੀ’’ਤਿ ਲਿਖਿਤਂ. ‘‘ਕੇਸਚ੍ਛੇਦਾਦਿਕਂ ਕਮ੍ਮਂ ਅਨੁਜਾਨਾਮਿ ਸਾਦਿਤੁਂ ’’ਇਚ੍ਚੇਵ ਵੁਤ੍ਤਤ੍ਤਾ ਵੁਤ੍ਤਂ ‘‘ਤਦਞ੍ਞੇ ਸਾਦਿਤੁ’’ਨ੍ਤਿ. ‘‘ਕੇਸਚ੍ਛੇਦਾਦਿਕਂ ਕਮ੍ਮਂ ਅਨੁਜਾਨਾਮਿ, ਭਿਕ੍ਖਵੇ’’ਤਿ ਅਵਤ੍ਵਾ ਏਤ੍ਤਕਂ ਯਸ੍ਮਾ ‘‘ਸਾਦਿਤੁ’’ਨ੍ਤਿ ਭਾਸਿਤਂ, ਤਸ੍ਮਾ ਸਾ ਵਿਚਿਕਿਚ੍ਛਾਯ ਉਭਤੋਪਿ ਅਵਸ੍ਸਵੇ ਅਪਿ ਪਾਰਾਜਿਕਖੇਤ੍ਤੇਨ ਸਾ ਪਾਰਾਜਿਕਂ ਫੁਸਤਿ. ਇਤਿ ਅਟ੍ਠਕਥਾਸ੍ਵੇਤਂ ਸਬ੍ਬਾਸੁਪਿ ਵਿਨਿਚ੍ਛਿਤਂ. ਓਦਿਸ੍ਸਕਾਭਿਲਾਪੋ ਹਿ ਅਞ੍ਞਥਾ ਨਿਬ੍ਬਿਸੇਸਤੋ ਤਂ ਪਮਾਣਂ. ਯਦਿ ਤਥਾ ਭਿਕ੍ਖੁਸ੍ਸ ਕਪ੍ਪਤਿ ਵਿਚਿਕਿਚ੍ਛਾ.

ਕਾਲਮੋਦਿਸ੍ਸ ਨਂ ਪਦਂ, ਨ ਸਤ੍ਤੋਦਿਸ੍ਸਕਞ੍ਹਿ ਤਂ;

ਅਥ ਭਿਕ੍ਖੁਨਿਯਾ ਏਵ, ਕਾਲਮੋਦਿਸ੍ਸ ਭਾਸਿਤਂ.

ਏਵਂ ਪਾਰਾਜਿਕਾਪਤ੍ਤਿ, ਸਿਥਿਲਾਵ ਕਤਾ ਸਿਯਾ;

ਸਬ੍ਬਸੋ ਪਿਹਿਤਂ ਦ੍ਵਾਰਂ, ਸਬ੍ਬਪਾਰਾਜਿਕਸ੍ਮਿਨ੍ਤਿ.

ਨਿਰਤ੍ਥਕਭਾਵਤੋ, ਉਬ੍ਭਜਾਣੁਮਣ੍ਡਲੇ;

ਤਸ੍ਮਾ ਨ ਸਾਦਿਯਨ੍ਤੀਤਿ, ਨਿਦਾਨਵਚਨਕ੍ਕਮਂ.

ਨਿਸ੍ਸਾਯ ਸਤ੍ਥੁਨਾ ਵੁਤ੍ਤਂ, ਸਾਦਿਤੁਨ੍ਤਿ ਨ ਅਞ੍ਞਥਾ;

ਅਤ੍ਤਨੋ ਪਣ੍ਹਿਸਮ੍ਫਸ੍ਸਂ, ਸਾਦਿਤੁਂ ਯੇਨ ਵਾਰਿਤਂ.

ਅਪਿ ਪਾਰਾਜਿਕਕ੍ਖੇਤ੍ਤੇ, ਕਥਂ ਦ੍ਵਾਰਂ ਦਦੇਯ੍ਯ ਸੋ;

ਤਥਾਪਿ ਬੁਦ੍ਧਪੁਤ੍ਤਾਨਂ, ਬੁਦ੍ਧਭਾਸਿਤਭਾਸਿਤਂ.

ਵਚਨਞ੍ਚ ਸਮਾਨੇਨ੍ਤੋ, ਨੋ ਚੇਤ੍ਥ ਯੁਤ੍ਤਿਕਥਾ ਧੀਰਾ;

ਕੇਸਚ੍ਛੇਦਾਦਿਕਮ੍ਮਸ੍ਸ, ਅਵਸ੍ਸਂ ਕਰਣੀਯਤੋ.

ਚਿਤ੍ਤਸ੍ਸ ਚਾਤਿਲੋਲਤ੍ਤਾ, ਗਣਸ੍ਸ ਚ ਅਙ੍ਗਸਮ੍ਪਦਾ-

ਭਾਵਾ ਭਿਕ੍ਖੁਨੀਨਂ ਮਹੇਸਿਨਾ, ਰਕ੍ਖਿਤੁਞ੍ਚ ਅਸਙ੍ਕਤ੍ਤਾ;

ਨਨੁ ਮੋਦਿਸ੍ਸਕਂ ਕਤਨ੍ਤਿ.

ਭਿਕ੍ਖੁਨਿਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.