੬. ਭੇਸਜ੍ਜਕ੍ਖਨ੍ਧਕਵਣ੍ਣਨਾ
ਪਞ੍ਚਭੇਸਜ੍ਜਾਦਿਕਥਾਵਣ੍ਣਨਾ
੨੬੦. ‘‘ਯਂ ਭੇਸਜ੍ਜਞ੍ਚੇਵ ਅਸ੍ਸਾ’’ਤਿ ਪਰਤੋ ‘‘ਤਦੁਭਯੇਨ ਭਿਯ੍ਯੋਸੋ ਮਤ੍ਤਾਯ ਕਿਸ੍ਸਾ ਹੋਨ੍ਤੀ’’ਤਿਆਦਿਨਾ ਵਿਰੋਧਦਸ੍ਸਨਤੋ ਨਿਦਾਨਾਨਪੇਕ੍ਖਂ ਯਥਾਲਾਭਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਯਥਾਨਿਦਾਨਂ ਕਸ੍ਮਾ ਨ ਵੁਤ੍ਤਨ੍ਤਿ ਚੇ? ਤਦਞ੍ਞਾਪੇਕ੍ਖਾਧਿਪ੍ਪਾਯਤੋ. ਸਬ੍ਬਬੁਦ੍ਧਕਾਲੇਪਿ ਹਿ ਸਪ੍ਪਿਆਦੀਨਂ ਸਤ੍ਤਾਹਕਾਲਿਕਭਾਵਾਪੇਕ੍ਖਾਤਿ ਤਥਾ ਵਚਨੇਨ ਭਗਵਤੋ ਅਧਿਪ੍ਪਾਯੋ, ਤੇਨੇਵ ‘‘ਆਹਾਰਤ੍ਥਞ੍ਚ ਫਰੇਯ੍ਯ, ਨ ਚ ਓਲ਼ਾਰਿਕੋ ਆਹਾਰੋ ਪਞ੍ਞਾਯੇਯ੍ਯਾ’’ਤਿ ਵੁਤ੍ਤਂ. ਤਥਾ ਹਿ ਕਾਲੇ ਪਟਿਗ੍ਗਹੇਤ੍ਵਾ ਕਾਲੇ ਪਰਿਭੁਞ੍ਜਿਤੁਨ੍ਤਿ ਏਤ੍ਥ ਚ ਕਾਲਪਰਿਚ੍ਛੇਦੋ ਨ ਕਤੋ. ਕੁਤੋਯੇਵ ਪਨ ਲਬ੍ਭਾ ਤਦਞ੍ਞਾਪੇਕ੍ਖਾਧਿਪ੍ਪਾਯੋ ਭਗਵਤੋ ਮੂਲਭੇਸਜ੍ਜਾਦੀਨਿ ਤਾਨਿ ਪਟਿਗ੍ਗਹੇਤ੍ਵਾ ਯਾਵਜੀਵਨ੍ਤਿ ਕਾਲਪਰਿਚ੍ਛੇਦੋ. ਯਂ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਾਨਿ ਪਞ੍ਚ ਭੇਸਜ੍ਜਾਨਿ ਕਾਲੇ ਪਟਿਗ੍ਗਹੇਤ੍ਵਾ ਕਾਲੇ ਪਰਿਭੁਞ੍ਜਿਤੁ’’ਨ੍ਤਿ ਵਚਨਂ, ਤਂ ‘‘ਸਨ੍ਨਿਧਿਂ ਕਤ੍ਵਾ ਅਪਰਾਪਰਸ੍ਮਿਂ ਦਿਵਸੇ ਕਾਲੇ ਏਵ ਪਰਿਭੁਞ੍ਜਿਤੁਂ ਅਨੁਜਾਨਾਮੀ’’ਤਿ ਅਧਿਪ੍ਪਾਯਤੋ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਞ੍ਞਥਾ ਅਤਿਸਯਤ੍ਤਾਭਾਵਤੋ ‘‘ਯਂ ਭੇਸਜ੍ਜਞ੍ਚੇਵ ਅਸ੍ਸਾ’’ਤਿਆਦਿ ਵਿਤਕ੍ਕੁਪ੍ਪਾਦੋ ਨ ਸਮ੍ਭਵਤਿ. ਪਣੀਤਭੋਜਨਾਨੁਮਤਿਯਾ ਪਸਿਦ੍ਧਤ੍ਤਾ ਆਬਾਧਾਨੁਰੂਪਸਪ੍ਪਾਯਾਪੇਕ੍ਖਾਯ ਵੁਤ੍ਤਾਨੀਤਿ ਚੇ? ਤਞ੍ਚ ਨ, ਭਿਯ੍ਯੋਸੋ ਮਤ੍ਤਾਯ ਕਿਸਾਦਿਭਾਵਾਪਤ੍ਤਿਦਸ੍ਸਨਤੋ. ਯਥਾ ‘‘ਉਚ੍ਛੁਰਸਂ ਉਪਾਦਾਯ ਫਾਣਿਤ’’ਨ੍ਤਿ ਵੁਤ੍ਤਂ, ਤਥਾ ‘‘ਨਵਨੀਤਂ ਉਪਾਦਾਯ ਸਪ੍ਪਿ’’ਨ੍ਤਿ ਵਤ੍ਤਬ੍ਬਤੋ ਨਵਨੀਤਂ ਵਿਸੁਂ ਨ ਵਤ੍ਤਬ੍ਬਨ੍ਤਿ ਚੇ? ਨ, ਵਿਸੇਸਦਸ੍ਸਨਾਧਿਪ੍ਪਾਯਤੋ. ਯਥਾ ਫਾਣਿਤਗ੍ਗਹਣੇਨ ਸਿਦ੍ਧੇਪਿ ਪਰਤੋ ਉਚ੍ਛੁਰਸੋ ਵਿਸੁਂ ਅਨੁਞ੍ਞਾਤੋ ਉਚ੍ਛੁਸਾਮਞ੍ਞਤੋ ਗੁਲ਼ੋਦਕਟ੍ਠਾਨੇ ਠਪਨਾਧਿਪ੍ਪਾਯਤੋ. ਤਥਾ ਨਵਨੀਤੇ ਵਿਸੇਸਵਿਧਿਦਸ੍ਸਨਾਧਿਪ੍ਪਾਯਤੋ ਨਵਨੀਤਂ ਵਿਸੁਂ ਅਨੁਞ੍ਞਾਤਨ੍ਤਿ ਵੇਦਿਤਬ੍ਬਂ. ਵਿਸੇਸਵਿਧਿ ਪਨਸ੍ਸ ਭੇਸਜ੍ਜਸਿਕ੍ਖਾਪਦਟ੍ਠਕਥਾਵਸੇਨ ਵੇਦਿਤਬ੍ਬਂ. ਵੁਤ੍ਤਞ੍ਹਿ ਤਤ੍ਥ ‘‘ਪਚਿਤ੍ਵਾ ਸਪ੍ਪਿਂ ਕਤ੍ਵਾ ਪਰਿਭੁਞ੍ਜਿਤੁਕਾਮੇਨ ਅਧੋਤਮ੍ਪਿ ਪਚਿਤੁਂ ਵਟ੍ਟਤੀ’’ਤਿ (ਪਾਰਾ. ਅਟ੍ਠ. ੨.੬੨੨). ਤਤ੍ਥ ਸਪ੍ਪਿ ਪਕ੍ਕਾਵ ਹੋਤਿ, ਨਾਪਕ੍ਕਾ. ਤਥਾ ਫਾਣਿਤਮ੍ਪਿ. ਨਵਨੀਤਂ ਅਪਕ੍ਕਮੇਵ.
ਏਤ੍ਥਾਹ – ਨਵਨੀਤਂ ਵਿਯ ਉਚ੍ਛੁਰਸੋਪਿ ਸਤ੍ਤਾਹਕਾਲਿਕਪਾਲ਼ਿਯਂ ਏਵ ਵਤ੍ਤਬ੍ਬੋਤਿ? ਨ ਵਤ੍ਤਬ੍ਬੋ. ਕਸ੍ਮਾ? ਸਤ੍ਤਾਹਕਾਲਿਕਪਾਲ਼ਿਯਂ ਵੁਤ੍ਤੇ ਉਚ੍ਛੁਰਸੋ ਗੁਲ਼ਾਪਦੇਸੇਨ ਯਥਾ ਅਗਿਲਾਨਸ੍ਸ ਫਾਣਿਤਂ ਪਟਿਸਿਦ੍ਧਂ, ਤਥਾ ਉਚ੍ਛੁਰਸੋਪੀਤਿ ਆਪਜ੍ਜਤਿ, ਅਵੁਤ੍ਤੇ ਪਨ ਗੁਲ਼ਂ ਵਿਯ ਸੋ ਫਾਣਿਤਸਙ੍ਖ੍ਯਂ ਨ ਗਚ੍ਛਤਿ. ਇਧ ਅਵਤ੍ਵਾ ਪਚ੍ਛਾ ਵਚਨੇਨ ਗੁਲ਼ੋਦਕਟ੍ਠਾਨੇਵ ਠਪਿਤੋ ਹੋਤਿ. ਤਦਤ੍ਥਮੇਵ ਪਚ੍ਛਾਭਤ੍ਤਂ ਵਟ੍ਟਨਕਪਾਨਕਾਧਿਕਾਰੇ ਵੁਤ੍ਤੋ, ਤਸ੍ਮਾ ਏਵ ਯਾਮਕਾਲਿਕੋਤਿ ਚੇ? ਨ, ਅਟ੍ਠਕਥਾਵਿਰੋਧਤੋ. ਨ ਉਪਾਦਾਯਤ੍ਥਸ੍ਸ ਨਿਸ੍ਸਯਤ੍ਥਤ੍ਤਾਤਿ ਚੇ? ਕਿਂ ਵੁਤ੍ਤਂ ਹੋਤਿ – ‘‘ਉਚ੍ਛੁਰਸਂ ਉਪਾਦਾਯ ਉਚ੍ਛੁਵਿਕਤਿ ਫਾਣਿਤਨ੍ਤਿ ਵੇਦਿਤਬ੍ਬਾ’’ਤਿ (ਪਾਰਾ. ਅਟ੍ਠ. ੨.੬੨੩) ਯਦੇਤਂ ਨਿਸ੍ਸਗ੍ਗਿਯਟ੍ਠਕਥਾਵਚਨਂ, ਤਤ੍ਥ ‘‘ਉਪਾਦਾਯਾ’’ਤਿ ਇਮਸ੍ਸ ਨਿਸ੍ਸਾਯ ਪਚ੍ਚਯਂ ਕਤ੍ਵਾਤਿ ਅਤ੍ਥੋਤਿ. ਨ, ਪਰਤੋ ਅਪਰਕਿਰਿਯਾਯ ਅਦਸ੍ਸਨਤੋ. ਯਥਾ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚਾ’’ਤਿਆਦੀਸੁ (ਮ. ਨਿ. ੧.੨੦੪, ੪੦੦; ੩.੪੨੧, ੪੨੫; ਸਂ. ਨਿ. ੨.੪੩) ‘‘ਪਟਿਚ੍ਚਾ’’ਤਿ ਇਮਸ੍ਸ ਉਸ੍ਸੁਕ੍ਕਵਚਨਸ੍ਸ ‘‘ਉਪ੍ਪਜ੍ਜਤੀ’’ਤਿ ਅਪਰਕਿਰਿਯਾ ਦਿਸ੍ਸਤਿ, ਨ ਤਥਾ ‘‘ਉਚ੍ਛੁਰਸਂ ਉਪਾਦਾਯਾ’’ਤਿ ਏਤ੍ਥ ਅਪਰਕਿਰਿਯਾ ਦਿਸ੍ਸਤੀਤਿ. ਅਯੁਤ੍ਤਮੇਤਂ ਤਤ੍ਥ ਤਦਭਾਵੇਪਿ ਸਿਦ੍ਧਤ੍ਤਾ. ਯਥਾ ‘‘ਚਤ੍ਤਾਰੋ ਚ ਮਹਾਭੂਤਾ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯ ਰੂਪ’’ਨ੍ਤਿ (ਧ. ਸ. ੫੮੪) ਏਤ੍ਥ ਅਪਰਕਿਰਿਯਾਯ ਅਭਾਵੇਪਿ ਉਸ੍ਸੁਕ੍ਕਵਚਨਂ ਸਿਦ੍ਧਂ, ਤਥਾ ਏਤ੍ਥਾਪਿ ਸਿਯਾਤਿ? ਨ, ਤਤ੍ਥ ਪਾਠਸੇਸਾਪੇਕ੍ਖਤ੍ਤਾ. ਯਥਾ ਚਤ੍ਤਾਰੋ ਮਹਾਭੂਤਾ ਉਪਾਦਾਯ ਵੁਤ੍ਤਂ, ਪਵਤ੍ਤਕਂ ਵਾ ਰੂਪਨ੍ਤਿ ਇਮਂ ਪਾਠਸੇਸਂ ਸਾ ਪਾਲ਼ਿ ਅਪੇਕ੍ਖਤਿ, ਨ ਤਥਾ ਇਦਂ ਅਟ੍ਠਕਥਾਵਚਨਂ ਕਞ੍ਚਿ ਪਾਠਂ ਅਪੇਕ੍ਖਤਿ. ਪਰਿਪੁਣ੍ਣਵਾਦਿਨੋ ਹਿ ਅਟ੍ਠਕਥਾਚਰਿਯਾ. ਸਞ੍ਞਾਕਰਣਮਤ੍ਤਂ ਵਾ ਤਸ੍ਸ ਰੂਪਸ੍ਸ. ‘‘ਅਤ੍ਥਿ ਰੂਪਂ ਉਪਾਦਾਯਾ’’ਤਿਆਦੀਸੁ (ਧ. ਸ. ੫੮੪) ਹਿ ਸਞ੍ਞਾਕਰਣਮਤ੍ਤਂ, ਏਵਮਿਧਾਪੀਤਿ ਵੇਦਿਤਬ੍ਬਂ. ਇਧ ਪਨ ‘‘ਉਚ੍ਛੁਰਸਂ ਉਪਾਦਾਯਾ’’ਤਿ ਉਚ੍ਛੁਰਸਂ ਆਦਿਂ ਕਤ੍ਵਾ, ਤਤੋ ਪਟ੍ਠਾਯਾਤਿ ਅਤ੍ਥੋ, ਤਸ੍ਮਾ ‘‘ਉਚ੍ਛੁਰਸੇਨ ਸਂਸਟ੍ਠਂ ਭਤ੍ਤਂ ਅਗਿਲਾਨੋ ਭਿਕ੍ਖੁ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤੋ ਪਣੀਤਭੋਜਨਸਿਕ੍ਖਾਪਦੇਨ ਕਾਰੇਤਬ੍ਬੋ, ਭਿਕ੍ਖੁਨੀ ਪਾਟਿਦੇਸਨਿਯੇਨਾ’’ਤਿ ਵੁਤ੍ਤਂ, ਤਂ ਅਯੁਤ੍ਤਨ੍ਤਿ ਏਕੇ. ਤੇ ਵਿਸੇਸਹੇਤੁਨੋ ਅਭਾਵਂ ਦਸ੍ਸੇਤ੍ਵਾ ਪਞ੍ਞਾਪੇਤਬ੍ਬਾ.
ਏਤ੍ਤਾਵਤਾ ‘‘ਉਚ੍ਛੁਰਸਂ ਉਪਾਦਾਯਾਤਿ ਉਚ੍ਛੁਰਸਂ ਆਦਿਂ ਕਤ੍ਵਾ’’ਤਿਆਦੀਨਂ ਪਦਾਨਂ ਅਤ੍ਥਂ ਮਿਚ੍ਛਾ ਗਹੇਤ੍ਵਾ ਯਦਿ ‘‘ਉਚ੍ਛੁਰਸਂ ਉਪਾਦਾਯਾ’’ਤਿ ਵਚਨੇਨ ਉਚ੍ਛੁਰਸੋ ਫਾਣਿਤਂ ਸਿਯਾ, ‘‘ਅਪਕ੍ਕਾ ਵਾ’’ਤਿ ਵਚਨਂ ਨਿਰਤ੍ਥਕਂ ਅਪਕ੍ਕਵਚਨੇਨ ਉਚ੍ਛੁਰਸਸ੍ਸ ਗਹਿਤਤ੍ਤਾ. ਅਥ ‘‘ਪਕ੍ਕਾ ਵਾ’’ਤਿ ਵਚਨੇਨ ਉਚ੍ਛੁਰਸੋ ਫਾਣਿਤਨ੍ਤਿ ਸਿਦ੍ਧਂ, ‘‘ਉਚ੍ਛੁਰਸਂ ਉਪਾਦਾਯਾ’’ਤਿ ਵਚਨਂ ਨਿਰਤ੍ਥਕਨ੍ਤਿ ਉਤ੍ਤਰਂ ਵੁਤ੍ਤਂ, ਤਂ ਅਨੁਤ੍ਤਰਨ੍ਤਿ ਸਾਧਿਤਂ ਹੋਤਿ. ਸੋ ਚੇਤੇਹਿ ਅਪਕ੍ਕਾ ਵਾਤਿ ਸਾਮਂ ਭਿਕ੍ਖੁਨਾ ਅਪਕ੍ਕਾ ਵਾ. ਅਵਤ੍ਥੁਕਪਕ੍ਕਾ ਵਾਤਿ ਭਿਕ੍ਖੁਨਾਵ ਸਾਮਂ ਵਿਨਾ ਵਤ੍ਥੁਨਾ ਪਕ੍ਕਾ ਵਾਤਿ ਅਤ੍ਥੋ. ਤਸ੍ਮਾ ਅਞ੍ਞਥਾ ‘‘ਸਵਤ੍ਥੁਕਪਕ੍ਕਾ ਵਾ’’ਤਿ ਚ ਵਤ੍ਤਬ੍ਬਨ੍ਤਿ ਅਤ੍ਥੋ ਦਸ੍ਸਿਤੋ, ਸੋ ਦੁਟ੍ਠੁ ਦਸ੍ਸਿਤੋ. ਕਸ੍ਮਾ? ਮਹਾਅਟ੍ਠਕਥਾਯਂ ‘‘ਝਾਮਉਚ੍ਛੁਫਾਣਿਤਂ ਵਾ ਕੋਟ੍ਟਿਤਉਚ੍ਛੁਫਾਣਿਤਂ ਵਾ ਪੁਰੇਭਤ੍ਤਮੇਵ ਵਟ੍ਟਤੀ’’ਤਿ ਵੁਤ੍ਤਤ੍ਤਾ, ‘‘ਸਵਤ੍ਥੁਕਪਕ੍ਕਾ ਵਾ’’ਤਿ ਵਚਨਸ੍ਸ ਚ ਲਦ੍ਧਿਵਿਰੋਧਤੋ ਅਵੁਤ੍ਤਤ੍ਤਾ. ‘‘ਮਹਾਪਚ੍ਚਰਿਯਂ ਪਨ ‘ਏਤਂ ਸਵਤ੍ਥੁਕਪਕ੍ਕਂ ਵਟ੍ਟਤਿ ਨੋ ਵਟ੍ਟਤੀ’ਤਿ ਪੁਚ੍ਛਂ ਕਤ੍ਵਾ ‘ਉਚ੍ਛੁਫਾਣਿਤਂ ਪਚ੍ਛਾਭਤ੍ਤਂ ਨੋ ਵਟ੍ਟਨਕਂ ਨਾਮ ਨਤ੍ਥੀ’ਤਿ ਵੁਤ੍ਤਂ, ਤਂ ਯੁਤ੍ਤ’’ਨ੍ਤਿ (ਪਾਰਾ. ਅਟ੍ਠ. ੨.੬੨੩) ਵੁਤ੍ਤਤ੍ਤਾ ਚ ਸਵਤ੍ਥੁਕਪਕ੍ਕਾ ਵਾਤਿ ਅਤ੍ਥੋ ਚ ਵੁਤ੍ਤੋਯੇਵ ਹੋਤਿ, ਤਸ੍ਮਾ ਦੁਦ੍ਦਸ੍ਸਿਤੋਤਿ ਸਿਦ੍ਧਂ. ਆਹਾਰਤ੍ਥਨ੍ਤਿ ਆਹਾਰਪਯੋਜਨਂ. ਆਹਾਰਕਿਚ੍ਚਂ ਯਾਪਨਨ੍ਤਿ ਅਤ੍ਥੋਤਿ ਚ.
੨੬੨. ਤੇਲਪਰਿਭੋਗੇਨਾਤਿ ਸਤ੍ਤਾਹਕਾਲਿਕਪਰਿਭੋਗੇਨ.
੨੬੩. ਸਤਿ ਪਚ੍ਚਯੇਤਿ ਏਤ੍ਥ ਸਤਿਪਚ੍ਚਯਤਾ ਗਿਲਾਨਾਗਿਲਾਨਵਸੇਨ ਦ੍ਵਿਧਾ ਵੇਦਿਤਬ੍ਬਾ. ਵਿਕਾਲਭੋਜਨਸਿਕ੍ਖਾਪਦਸ੍ਸ ਹਿ ਅਨਾਪਤ੍ਤਿਵਾਰੇ ਯਾਮਕਾਲਿਕਾਦੀਨਂ ਤਿਣ੍ਣਮ੍ਪਿ ਅਵਿਸੇਸੇਨ ਸਤਿਪਚ੍ਚਯਤਾ ਵੁਤ੍ਤਾ. ਇਮਸ੍ਮਿਂ ਖਨ੍ਧਕੇ ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਗੁਲ਼ਂ, ਅਗਿਲਾਨਸ੍ਸ ਗੁਲ਼ੋਦਕਂ, ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਲੋਣਸੋਵੀਰਕਂ, ਅਗਿਲਾਨਸ੍ਸ ਉਦਕਸਮ੍ਭਿਨ੍ਨ’’ਨ੍ਤਿ ਵੁਤ੍ਤਂ. ਤਸ੍ਮਾ ਸਿਦ੍ਧਂ ਸਤਿਪਚ੍ਚਯਤਾ ਗਿਲਾਨਾਗਿਲਾਨਵਸੇਨ ਦੁਵਿਧਾਤਿ. ਅਞ੍ਞਥਾ ਅਸਤਿ ਪਚ੍ਚਯੇ ਗੁਲ਼ੋਦਕਾਦੀਸੁ ਆਪਜ੍ਜਤਿ. ਤਤੋ ਚ ਪਾਲ਼ਿਵਿਰੋਧੋ.
ਪਿਟ੍ਠੇਹੀਤਿ ਪਿਸਿਤਤੇਲੇਹਿ. ਕੋਟ੍ਠਫਲਨ੍ਤਿ ਕੋਟ੍ਠਰੁਕ੍ਖਸ੍ਸ ਫਲਂ. ‘‘ਮਦਨਫਲਂ ਵਾ’’ਤਿ ਚ ਲਿਖਿਤਂ. ਹਿਙ੍ਗੁਜਤੁ ਨਾਮ ਹਿਙ੍ਗੁਰੁਕ੍ਖਸ੍ਸ ਦਣ੍ਡਪਲ੍ਲਵਪਵਾਲ਼ਪਾਕਨਿਪ੍ਫਨ੍ਨਾ. ਹਿਙ੍ਗੁਸਿਪਾਟਿਕਾ ਨਾਮ ਤਸ੍ਸ ਮੂਲਸਾਖਪਾਕਨਿਪ੍ਫਨ੍ਨਾ. ਤਕਂ ਨਾਮ ਤਸ੍ਸ ਰੁਕ੍ਖਸ੍ਸ ਤਚਪਾਕੋਦਕਂ. ਤਕਪਤ੍ਤੀਤਿ ਤਸ੍ਸ ਪਤ੍ਤਪਾਕੋਦਕਂ. ਤਕਪਣ੍ਣੀਤਿ ਤਸ੍ਸ ਫਲਪਾਕੋਦਕਂ. ਅਥ ਵਾ ‘‘ਤਕਂ ਨਾਮ ਲਾਖਾ. ਤਕਪਤ੍ਤੀਤਿ ਕਿਤ੍ਤਿਮਲੋਮਲਾਖਾ. ਤਕਪਣ੍ਣੀਤਿ ਪਕ੍ਕਲਾਖਾ’’ਤਿ ਲਿਖਿਤਂ. ਉਬ੍ਭਿਦਂ ਨਾਮ ਊਸਪਂਸੁਮਯਂ.
੨੬੪. ਛਕਣਂ ਗੋਮਯਂ. ਪਾਕਤਿਕਚੁਣ੍ਣਂ ਨਾਮ ਅਪਕ੍ਕਕਸਾਵਚੁਣ੍ਣਂ, ਤੇਨ ‘‘ਠਪੇਤ੍ਵਾ ਗਨ੍ਧਚੁਣ੍ਣਂ ਸਬ੍ਬਂ ਵਟ੍ਟਤੀ’’ਤਿ ਵਦਨ੍ਤਿ. ਚਾਲਿਤੇਹੀਤਿ ਪਰਿਸ੍ਸਾਵਿਤੇਹਿ.
੨੬੫. ਨਾਨਾਸਮ੍ਭਾਰੇਹਿ ਕਤਨ੍ਤਿ ਨਾਨੋਸਧੇਹਿ.
ਗੁਲ਼ਾਦਿਅਨੁਜਾਨਨਕਥਾਵਣ੍ਣਨਾ
੨੭੪. ਸਾਮਂ ਪਕ੍ਕਂ ਸਮਪਕ੍ਕਨ੍ਤਿ ਦੁਵਿਧਂ ਵਿਯ ਦੀਪੇਤਿ, ਤਸ੍ਮਾ ਖੀਰਾਦੀਸੁ ਉਣ੍ਹਮਤ੍ਤਮੇਵ ਪਾਕੋ. ਤੇਨ ਉਤ੍ਤਣ੍ਡੁਲਾਦਿਸਮਾਨਾ ਹੋਨ੍ਤਿ.
੨੭੬-੮. ‘‘ਬੁਦ੍ਧਪ੍ਪਮੁਖ’ਨ੍ਤਿ ਆਗਤਟ੍ਠਾਨੇ ‘ਭਿਕ੍ਖੁਸਙ੍ਘੋ’ਤਿ ਅਵਤ੍ਵਾ ‘ਸਙ੍ਘੋ’ਤਿ ਵੁਚ੍ਚਤਿ ਭਗਵਨ੍ਤਮ੍ਪਿ ਸਙ੍ਗਹੇਤੁ’’ਨ੍ਤਿ ਵਦਨ੍ਤਿ. ਨਾਗੋਤਿ ਹਤ੍ਥੀ.
੨੭੯. ਸਮ੍ਬਾਧੇਤਿ ਵਚ੍ਚਮਗ੍ਗੇ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਚ ਪਸ੍ਸਾਵਮਗ੍ਗੇਪਿ ਅਨੁਲੋਮਤੋ. ਦਹਨਂ ਪਟਿਕ੍ਖੇਪਾਭਾਵਾ ਵਟ੍ਟਤਿ. ਸਤ੍ਥਵਤ੍ਤਿਕਮ੍ਮਾਨੁਲੋਮਤੋ ਨ ਵਟ੍ਟਤੀਤਿ ਚੇ? ਨ, ਪਟਿਕ੍ਖਿਤ੍ਤਪਟਿਕ੍ਖੇਪਾ, ਪਟਿਕ੍ਖਿਪਿਤਬ੍ਬਸ੍ਸ ਤਪ੍ਪਰਮਤਾਦੀਪਨਤੋ, ਕਿਂ ਵੁਤ੍ਤਂ ਹੋਤਿ? ਪੁਬ੍ਬੇ ਪਟਿਕ੍ਖਿਤ੍ਤਮ੍ਪਿ ਸਤ੍ਥਕਮ੍ਮਂ ਸਮ੍ਪਿਣ੍ਡੇਤ੍ਵਾ ਪਚ੍ਛਾ ‘‘ਨ, ਭਿਕ੍ਖਵੇ…ਪੇ… ਥੁਲ੍ਲਚ੍ਚਯਸ੍ਸਾ’’ਤਿ ਦ੍ਵਿਕ੍ਖਤ੍ਤੁਂ ਸਤ੍ਥਕਮ੍ਮਸ੍ਸ ਪਟਿਕ੍ਖੇਪੋ ਕਤੋ. ਤੇਨ ਸਮ੍ਬਾਧਸ੍ਸ ਸਾਮਨ੍ਤਾ ਦ੍ਵਙ੍ਗੁਲਂ ਪਟਿਕ੍ਖਿਪਿਤਬ੍ਬਂ ਨਾਮ. ਸਤ੍ਥਵਤ੍ਤਿਕਮ੍ਮਤੋ ਉਦ੍ਧਂ ਨਤ੍ਥੀਤਿ ਦੀਪੇਤਿ. ਕਿਞ੍ਚ ਭਿਯ੍ਯੋ ਪੁਬ੍ਬੇ ਸਮ੍ਬਾਧੇਯੇਵ ਸਤ੍ਥਕਮ੍ਮਂ ਪਟਿਕ੍ਖਿਤ੍ਤਂ, ਪਚ੍ਛਾ ਸਮ੍ਬਾਧਸ੍ਸ ਸਾਮਨ੍ਤਾ ਦ੍ਵਙ੍ਗੁਲਮ੍ਪਿ ਪਟਿਕ੍ਖਿਤ੍ਤਂ, ਤਸ੍ਮਾ ਤਸ੍ਸੇਵ ਪਟਿਕ੍ਖੇਪੋ, ਨੇਤਰਸ੍ਸਾਤਿ ਸਿਦ੍ਧਂ. ਏਤ੍ਥ ‘‘ਸਤ੍ਥਂ ਨਾਮ ਸਤ੍ਥਹਾਰਕਂ ਵਾਸ੍ਸ ਪਰਿਯੇਸੇਯ੍ਯਾ’’ਤਿਆਦੀਸੁ ਵਿਯ ਯੇਨ ਛਿਨ੍ਦਤਿ, ਤਂ ਸਬ੍ਬਂ. ਤੇਨ ਵੁਤ੍ਤਂ ‘‘ਕਣ੍ਟਕੇਨ ਵਾ’’ਤਿਆਦਿ. ਖਾਰਦਾਨਂ ਪਨੇਤ੍ਥ ਭਿਕ੍ਖੁਨਿਵਿਭਙ੍ਗੇ ਪਸਾਖੇ ਲੇਪਮੁਖੇਨ ਅਨੁਞ੍ਞਾਤਨ੍ਤਿ ਵੇਦਿਤਬ੍ਬਂ. ਏਕੇ ਪਨ ‘‘ਸਤ੍ਥਕਮ੍ਮਂ ਵਾ’’ਤਿ ਪਾਠਂ ਵਿਕਪ੍ਪੇਤ੍ਵਾ ਵਤ੍ਥਿਕਮ੍ਮਂ ਕਰੋਨ੍ਤਿ. ‘‘ਵਤ੍ਥੀ’’ਤਿ ਕਿਰ ਅਗ੍ਘਿਕਾ ਵੁਚ੍ਚਤਿ. ਤਾਯ ਛਿਨ੍ਦਨਂ ਵਤ੍ਥਿਕਮ੍ਮਂ ਨਾਮਾਤਿ ਚ ਅਤ੍ਥਂ ਵਣ੍ਣਯਨ੍ਤਿ, ਤੇ ‘‘ਸਤ੍ਥਹਾਰਕਂ ਵਾਸ੍ਸ ਪਰਿਯੇਸੇਯ੍ਯਾ’’ਤਿ ਇਮਸ੍ਸ ਪਦਭਾਜਨੀਯਂ ਦਸ੍ਸੇਤ੍ਵਾ ਪਟਿਕ੍ਖਿਪਿਤਬ੍ਬਾ. ਅਣ੍ਡਵੁਡ੍ਢੀਤਿ ਵਾਤਣ੍ਡਕੋ. ਆਦਾਨਵਤ੍ਤੀਤਿ ਆਨਹਵਤ੍ਤਿ.
ਮਨੁਸ੍ਸਮਂਸਪਟਿਕ੍ਖੇਪਕਥਾਵਣ੍ਣਨਾ
੨੮੦. ‘‘ਨ, ਭਿਕ੍ਖਵੇ, ਮਨੁਸ੍ਸਮਂਸਂ…ਪੇ… ਥੁਲ੍ਲਚ੍ਚਯਸ੍ਸਾ’’ਤਿ ਵੁਤ੍ਤਤ੍ਤਾ, ‘‘ਨ ਚ, ਭਿਕ੍ਖਵੇ, ਅਪ੍ਪਟਿ…ਪੇ… ਦੁਕ੍ਕਟਸ੍ਸਾ’’ਤਿ ਚ ਵੁਤ੍ਤਤ੍ਤਾ ਅਪ੍ਪਟਿਵੇਕ੍ਖਣਦੁਕ੍ਕਟਞ੍ਚ ਥੁਲ੍ਲਚ੍ਚਯਞ੍ਚਾਤਿ ਦ੍ਵੇ ਆਪਜ੍ਜਤਿ, ਤਸ੍ਮਾ ਕਪ੍ਪਿਯਮਂਸੇਪਿ ਅਪ੍ਪਟਿਵੇਕ੍ਖਣਪਚ੍ਚਯਾ ਦੁਕ੍ਕਟਮੇਵ. ਕੇਚਿ ‘‘ਮਂਸਭਾਵਂ ਜਾਨਨ੍ਤੋਵ ਆਪਜ੍ਜਤਿ. ਪੂਵਾਦੀਸੁ ਅਜਾਨਨ੍ਤਸ੍ਸ ਕਾ ਪਚ੍ਚਵੇਕ੍ਖਣਾ’’ਤਿ ਵਦਨ੍ਤਿ. ਅਜਾਨਨ੍ਤੋਪਿ ਆਪਜ੍ਜਤਿ ਸਾਮਞ੍ਞੇਨ ਵੁਤ੍ਤਤ੍ਤਾਤਿ ਕੇਚਿ.
ਹਤ੍ਥਿਮਂਸਾਦਿਪਟਿਕ੍ਖੇਪਕਥਾਵਣ੍ਣਨਾ
੨੮੧. ਇਮੇਸਂ …ਪੇ… ਸਬ੍ਬਂ ਨ ਵਟ੍ਟਤੀਤਿ ਇਦਂ ਦਸਨ੍ਨਮ੍ਪਿ ਮਨੁਸ੍ਸਮਂਸਾਦੀਨਂ ਅਕਪ੍ਪਿਯਭਾਵਮਤ੍ਤਪਰਿਦੀਪਨਵਚਨਂ, ਨਾਪਤ੍ਤਿਵਿਭਾਗਦਸ੍ਸਨਵਚਨਂ. ਯਂ ਕਿਞ੍ਚਿ ਞਤ੍ਵਾ ਵਾ ਅਞਤ੍ਵਾ ਵਾ ਖਾਦਨ੍ਤਸ੍ਸ ਆਪਤ੍ਤਿਯੇਵਾਤਿ ਇਦਮ੍ਪਿ ਅਨਿਯਮਿਤਵਚਨਮੇਵ ‘‘ਅਯਂ ਨਾਮ ਆਪਤ੍ਤੀ’’ਤਿ ਅਵੁਤ੍ਤਤ੍ਤਾ. ਤਦੁਭਯਮ੍ਪਿ ਹੇਟ੍ਠਾ ਮਨੁਸ੍ਸਾਦੀਨਂ ਮਂਸਾਦੀਸੁ ਥੁਲ੍ਲਚ੍ਚਯਦੁਕ੍ਕਟਾਪਤ੍ਤਿਯੋ ਹੋਨ੍ਤੀਤਿ ਗਹਿਤਨਯੇਹਿ ਅਧਿਪ੍ਪਾਯੋ ਜਾਨਿਤੁਂ ਸਕ੍ਕਾਤਿ ਏਵਂ ਵੁਤ੍ਤਂ. ਤਤ੍ਰਾਯਂ ਅਧਿਪ੍ਪਾਯੋ – ਯਸ੍ਮਾ ਏਤੇਸਂ ਮਨੁਸ੍ਸਾਦੀਨਂ ਮਂਸਾਦੀਨਿ ਅਕਪ੍ਪਿਯਾਨਿ, ਤਸ੍ਮਾ ਮਨੁਸ੍ਸਾਨਂ ਮਂਸਾਦੀਸੁ ਥੁਲ੍ਲਚ੍ਚਯਾਪਤ੍ਤਿ. ਸੇਸਾਨਂ ਸਬ੍ਬਤ੍ਥ ਦੁਕ੍ਕਟਾਪਤ੍ਤੀਤਿ. ਪਾਠੇਯੇਵ ਹਿ ਲੋਹਿਤਾਦਿਂ ਮਂਸਗਤਿਕਂ ਕਤ੍ਵਾ ‘‘ਨ, ਭਿਕ੍ਖਵੇ, ਮਨੁਸ੍ਸਮਂਸਂ…ਪੇ… ਥੁਲ੍ਲਚ੍ਚਯਸ੍ਸਾ’’ਤਿ ਵੁਤ੍ਤਂ. ਤਤ੍ਥੇਵ ਹਤ੍ਥਾਦੀਨਂ ਮਂਸਾਦੀਸੁਪਿ ਦੁਕ੍ਕਟਾਪਤ੍ਤਿ ਪਞ੍ਞਤ੍ਤਾ. ਤੇਨ ਵੁਤ੍ਤਂ ਸੀਹਲ਼ਟ੍ਠਕਥਾਯਂ ‘‘ਮਨੁਸ੍ਸਮਂਸੇ ਵਾ ਕੇਸੇ ਵਾ ਨਖੇ ਵਾ ਅਟ੍ਠਿਮ੍ਹਿ ਵਾ ਲੋਹਿਤੇ ਵਾ ਥੁਲ੍ਲਚ੍ਚਯਮੇਵਾ’’ਤਿ ਵੁਤ੍ਤਂ. ਇਮਿਨਾ ਏਵ –
‘‘ਅਟ੍ਠਿਪਿ ਲੋਹਿਤਂ ਚਮ੍ਮਂ, ਲੋਮਮੇਸਂ ਨ ਕਪ੍ਪਤੀ’’ਤਿ. –
ਖੁਦ੍ਦਸਿਕ੍ਖਾਗਾਥਾਪਦਸ੍ਸ ਅਤ੍ਥੋ ਚ ਅਧਿਪ੍ਪਾਯੋ ਚ ਸੁਵਿਞ੍ਞੇਯ੍ਯੋਤਿ. ਪਟਿਗ੍ਗਹਣੇਤਿ ਏਤ੍ਥ ਅਨਾਦਰਿਯਦੁਕ੍ਕਟਂ ਵੁਤ੍ਤਂ. ‘‘ਉਦਕਮਨੁਸ੍ਸਾਦਿਮਂਸਮ੍ਪਿ ਨ ਵਟ੍ਟਤੀ’’ਤਿ ਵਦਨ੍ਤਿ. ਨਾਗਰਾਜੇਨ ਵੁਤ੍ਤਾਦੀਨਵੇ ਸਤਿਪਿ ਉਜ੍ਝਾਯਨਾਧਿਕਾਰਮੇਵ ਗਹੇਤ੍ਵਾ ‘‘ਪਟਿਕੂਲਤਾਯਾ’’ਤਿ ਵੁਤ੍ਤਂ.
ਯਾਗੁਮਧੁਗੋਲ਼ਕਾਦਿਕਥਾਵਣ੍ਣਨਾ
੨੮੩. ਯਥਾਧਮ੍ਮੋ ਕਾਰੇਤਬ੍ਬੋਤਿ ਇਦਂ ਸਙ੍ਗੀਤਿਕਾਰਕਵਚਨਂ. ਨ ਹਿ ਭਗਵਾ ਤਮੇਵ ਸਿਕ੍ਖਾਪਦਂ ਦ੍ਵਿਕ੍ਖਤ੍ਤੁਂ ਪਞ੍ਞਪੇਸਿ, ਏਵਂ ਏਵਰੂਪੇਸੂਤਿ ਏਕੇ. ਪਠਮਪਞ੍ਞਤ੍ਤਮੇਵ ਸਨ੍ਧਾਯ ਵੁਤ੍ਤਂ, ਤਥਾਪਿ ਨ ਚ ਤੇ ਭਿਕ੍ਖੂ ਸਾਪਤ੍ਤਿਕਾ ਜਾਤਾ. ਕਥਂ? ਪਰਮ੍ਪਰਭੋਜਨਸਿਕ੍ਖਾਪਦਸ੍ਸ ਅਟ੍ਠੁਪ੍ਪਤ੍ਤਿਯਾ. ‘‘ਅਪਿਚ ਮਯਂ ਕਾਲਸ੍ਸੇਵ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਮ੍ਹਾ’’ਤਿ ਵੁਤ੍ਤਂ. ਮਾਤਿਕਾਵਿਭਙ੍ਗੇ (ਪਾਚਿ. ੨੨੭) ਚ ‘‘ਪਰਮ੍ਪਰਭੋਜਨਂ ਨਾਮ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤੋ, ਤਂ ਠਪੇਤ੍ਵਾ ਅਞ੍ਞਂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਭੁਞ੍ਜਤਿ, ਏਤਂ ਪਰਮ੍ਪਰਭੋਜਨਂ ਨਾਮਾ’’ਤਿ ਵੁਤ੍ਤਂ, ਤਸ੍ਮਾ ਅਞ੍ਞਂ ਭੋਜਨਂ ਨਾਮ ਨਿਮਨ੍ਤਨਤੋ ਲਦ੍ਧਂ ਯਂ ਕਿਞ੍ਚੀਤਿ ਸਿਦ੍ਧਂ. ਯਸ੍ਮਾ ਨ ਭੋਜ੍ਜਯਾਗੁਨਿਮਨ੍ਤਨਤੋ ਲਦ੍ਧਭੋਜਨਂ, ਤਸ੍ਮਾ ‘‘ਏਤ੍ਥ ਅਨਾਪਤ੍ਤੀ’’ਤਿ ਤੇ ਭਿਕ੍ਖੂ ਪਰਿਭੁਞ੍ਜਿਂਸੂਤਿ. ਏਤ੍ਥ ‘‘ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ ਵੁਤ੍ਤਤ੍ਤਾ ਪਨ ਅਞ੍ਞਨਿਮਨ੍ਤਨਤੋ ਲਦ੍ਧਭੋਜਨਮੇਵ ਭੁਞ੍ਜਨ੍ਤਸ੍ਸ ਆਪਤ੍ਤਿ, ਨੇਤਰਨ੍ਤਿ ਅਨੁਞ੍ਞਾਤਂ. ਤਤੋ ਪਟ੍ਠਾਯ ਤਸ੍ਸ ਅਨਾਪਤ੍ਤਿਵਾਰੇ ‘‘ਨਿਚ੍ਚਭਤ੍ਤੇ ਸਲਾਕਭਤ੍ਤੇ ਪਕ੍ਖਿਕੇ ਉਪੋਸਥਿਕੇ ਪਾਟਿਪਦਿਕੇ’’ਤਿ ਵੁਤ੍ਤਂ. ਪੁਬ੍ਬੇ ਵੇਸਾਲਿਯਾ ਪਞ੍ਞਤ੍ਤਕਾਲੇ ਨਤ੍ਥਿ, ਯਦਿ ਅਤ੍ਥਿ, ਅਟ੍ਠੁਪ੍ਪਤ੍ਤਿਮਾਤਿਕਾਵਿਭਙ੍ਗਵਿਰੋਧੋ, ਤਸ੍ਮਾ ‘‘ਅਪਿਚ ਮਯਂ ਕਾਲਸ੍ਸੇਵ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਮ੍ਹਾ’’ਤਿ ਅਟ੍ਠੁਪ੍ਪਤ੍ਤਿਯਂ ਵੁਤ੍ਤਤ੍ਤਾ, ਪਦਭਾਜਨੇਪਿ ‘‘ਅਞ੍ਞਂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਭੁਞ੍ਜਤੀ’’ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਚ ਪਠਮਂ ਵਾ ਪਚ੍ਛਾ ਵਾ ਨਿਮਨ੍ਤਿਤਂ ਭੋਜਨਂ ਠਪੇਤ੍ਵਾ ਅਨਿਮਨ੍ਤਿਤਮੇਵ ਭੁਞ੍ਜਨ੍ਤਸ੍ਸ ਆਪਤ੍ਤਿ, ਨੇਤਰਨ੍ਤਿ ਕਿਞ੍ਚਾਪਿ ਆਪਨ੍ਨਂ, ‘‘ਨ, ਭਿਕ੍ਖਵੇ, ਅਞ੍ਞਤ੍ਰ ਨਿਮਨ੍ਤਿਤੇਨ ਅਞ੍ਞਸ੍ਸ ਭੋਜ੍ਜਯਾਗੁ ਪਰਿਭੁਞ੍ਜਿਤਬ੍ਬਾ’’ਤਿ ਵੁਤ੍ਤਤ੍ਤਾ ਪਨ ਪਠਮਨਿਮਨ੍ਤਿਤਭੋਜਨਤੋ ਅਞ੍ਞਂ ਪਚ੍ਛਾ ਲਦ੍ਧਂ ਨਿਮਨ੍ਤਿਤਭੋਜਨਂ, ਨਿਚ੍ਚਭਤ੍ਤਾਦੀਨਿ ਚ ਭੁਞ੍ਜਨ੍ਤਸ੍ਸ ਆਪਤ੍ਤੀਤਿ ਆਪਜ੍ਜਮਾਨਂ ਵਿਯ ਜਾਤਨ੍ਤਿ ਅਨੁਪਞ੍ਞਤ੍ਤਿਪ੍ਪਸਙ੍ਗਨਿਵਾਰਣਂ, ਅਨਿਮਨ੍ਤਨਭੋਜਨੇ ਆਪਤ੍ਤਿਪ੍ਪਸਙ੍ਗਨਿਵਾਰਣਞ੍ਚ ਕਰੋਨ੍ਤੋ, ਪਠਮਪਞ੍ਞਤ੍ਤਿਸਿਕ੍ਖਾਪਦਮੇਵ ਇਮਿਨਾ ਅਤ੍ਥੇਨ ਪਰਿਣਾਮੇਨ੍ਤੋ ਚ ‘‘ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ ਭਗਵਾ ਆਹ, ਤਸ੍ਮਾ ਤਤੋ ਪਟ੍ਠਾਯ ਪਚ੍ਛਾ ਨਿਮਨ੍ਤਨਭੋਜਨਂ ਭੁਞ੍ਜਨ੍ਤਸ੍ਸੇਵ ਆਪਤ੍ਤਿ. ਤੇਸੁ ਨ ਨਿਚ੍ਚਭਤ੍ਤਾਦੀਨੀਤਿ ਆਪਨ੍ਨਂ. ਤੇਨੇਵਾਯਸ੍ਮਾ ਉਪਾਲਿਤ੍ਥੇਰੋ ਤਸ੍ਸ ਅਨਾਪਤ੍ਤਿਵਾਰੇ ‘‘ਨਿਚ੍ਚਭਤ੍ਤੇ’’ਤਿਆਦੀਨਿ ਪਞ੍ਚ ਪਦਾਨਿ ਪਕ੍ਖਿਪਿਤ੍ਵਾ ਸਙ੍ਗਾਯਿ. ਅਧਿਪ੍ਪਾਯਞ੍ਞੂ ਹਿ ਤੇ ਮਹਾਨਾਗਾ, ਤਸ੍ਮਾ ਪਠਮਮੇਵ ਯਂ ਭਗਵਤਾ ਵੁਤ੍ਤਂ ‘‘ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ ਅਨਾਪਤ੍ਤੀ’’ਤਿ ਵਚਨਂ, ਪਚ੍ਛਾਪਿ ਤਂ ਅਨੁਰਕ੍ਖਨ੍ਤੇਨ ਅਭੋਜਨਂ ਮਧੁਗੋਲ਼ਕਂ ਅਪਰਾਮਸਿਤ੍ਵਾ ਭੋਜ੍ਜਯਾਗੁ ਏਵ ਵੁਤ੍ਤਾਤਿ ਏਵਂ ਆਚਰਿਯੋ.
ਏਤ੍ਥਾਹ – ਯਥਾ ਪਚ੍ਛਾਲਦ੍ਧਲੇਸੇਨ ਥੇਰੇਨ ਨਿਚ੍ਚਭਤ੍ਤਾਦਿਪਕ੍ਖੇਪੋ ਕਤੋ, ਏਵਂ ਕਥਿਨਕ੍ਖਨ੍ਧਕੇ ਪਰਮ੍ਪਰਭੋਜਨਂ ਪਕ੍ਖਿਪਿਤ੍ਵਾ ‘‘ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਛ ਕਪ੍ਪਿਸ੍ਸਨ੍ਤੀ’’ਤਿ ਕਿਮਤ੍ਥਂ ਨ ਵੁਚ੍ਚਨ੍ਤਿ? ਵੁਚ੍ਚਤੇ – ਯਥਾਵੁਤ੍ਤਲੇਸਨਿਦਸ੍ਸਨਤ੍ਥਂ. ਅਞ੍ਞਥਾ ਇਦਂ ਸਿਕ੍ਖਾਪਦਂ ਵੇਸਾਲਿਯਂ, ਅਨ੍ਧਕਵਿਨ੍ਦੇ ਚਾਤਿ ਉਭਯਤ੍ਥ ਉਪਡ੍ਢੁਪਡ੍ਢੇਨ ਪਞ੍ਞਤ੍ਤਂ ਸਿਯਾ. ਨੋ ਚੇ, ਸਾਪਤ੍ਤਿਕਾ ਭਿਕ੍ਖੂ ਸਿਯੁਂ, ਨ ਚ ਤੇ ਸਾਪਤ੍ਤਿਕਾ ਅਪ੍ਪਟਿਕ੍ਖਿਤ੍ਤੇਪਿ ਤੇਸਂ ਕੁਕ੍ਕੁਚ੍ਚਦਸ੍ਸਨਤੋ. ‘‘ਤੇਨ ਹਿ, ਬ੍ਰਾਹ੍ਮਣ, ਭਿਕ੍ਖੂਨਂ ਦੇਹੀਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤੀ’’ਤਿ ਹਿ ਵੁਤ੍ਤਂ. ਤੇਸਞ੍ਹਿ ‘‘ਪਰਿਭੁਞ੍ਜਥਾ’’ਤਿ ਭਗਵਤੋ ਆਣਤ੍ਤਿਯਾ ਪਰਿਭੁਤ੍ਤਾਨਮ੍ਪਿ ‘‘ਓਦਿਸ੍ਸਕਂ ਨੁ ਖੋ ਇਦਂ ਅਮ੍ਹਾਕ’’ਨ੍ਤਿ ਵਿਮਤਿਪ੍ਪਤ੍ਤਾਨਂ ਵਿਮਤਿਵਿਨੋਦਨਤ੍ਥਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਯਾਗੁਞ੍ਚ ਮਧੁਗੋਲ਼ਕਞ੍ਚਾ’’ਤਿ ਵੁਤ੍ਤਂ. ਏਵਮਿਧਾਪੇਤੇ ਪਞ੍ਞਤ੍ਤਂ ਪਰਮ੍ਪਰਭੋਜਨਸਿਕ੍ਖਾਪਦਂ ਓਮਦ੍ਦਿਤ੍ਵਾ ਪਰਮ੍ਪਰਭੋਜਨਂ ਕਥਂ ਭੁਞ੍ਜਿਸ੍ਸਨ੍ਤੀਤਿ. ਏਤ੍ਥਾਹੁ ਕੇਚਿ ਆਚਰਿਯਾ ਪਰਮ੍ਪਰਭੋਜਨਸਿਕ੍ਖਾਪਦੇਨੇਵ ‘‘ਅਞ੍ਞਸ੍ਸ ਭੋਜਨਂ ਨ ਕਪ੍ਪਤੀ’’ਤਿ ਜਾਨਨ੍ਤਾਪਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਯਾਗੁਞ੍ਚਾ’’ਤਿ ਵਿਸੁਂ ਅਨੁਞ੍ਞਾਤਤ੍ਤਾ ‘‘ਪਟਗ੍ਗਿਦਾਨਮਹਾਵਿਕਟਾਦਿ ਵਿਯ ਕਪ੍ਪਤੀ’’ਤਿ ਸਞ੍ਞਾਯ ਭੁਞ੍ਜਿਂਸੁ. ਤੇਨ ਵੁਤ੍ਤਂ ‘‘ਅਪਿਚ ਮਯਂ ਕਾਲਸ੍ਸੇਵ ਭੋਜ੍ਜਯਾਗੁਯਾ ਧਾਤਾ’’ਤਿਆਦਿ, ਤਂ ਅਯੁਤ੍ਤਂ ਤਤ੍ਥ ਅਟ੍ਠੁਪ੍ਪਤ੍ਤਿਮਾਤਿਕਾਵਿਭਙ੍ਗਵਿਰੋਧੇਨ ਅਨਾਪਤ੍ਤਿਵਾਰੇ ਨਿਚ੍ਚਭਤ੍ਤਾਦੀਨਂ ਅਸਮ੍ਭਵਪ੍ਪਸਙ੍ਗਤੋ, ਭਿਕ੍ਖੂਨਂ ਸਾਪਤ੍ਤਿਕਭਾਵਾਨਤਿਕ੍ਕਮਨਤੋ, ਮਿਚ੍ਛਾਗਾਹਹੇਤੁਪ੍ਪਸਙ੍ਗੇਨ ਭਗਵਤਾ ਅਨੁਞ੍ਞਾਤਪ੍ਪਸਙ੍ਗਤੋ ਚ. ਤੇ ਹਿ ਭਿਕ੍ਖੂ ਯਸ੍ਮਾ ਭਗਵਾ ਕਤ੍ਥਚਿ ਵਿਨਯਵਸੇਨ ਕਪ੍ਪਿਯਮ੍ਪਿ ‘‘ਗਾਥਾਭਿਗੀਤਂ ਮੇ ਅਭੋਜਨੇਯ੍ਯ’’ਨ੍ਤਿ (ਸਂ. ਨਿ. ੧.੧੯੪; ਸੁ. ਨਿ. ੮੧; ਮਿ. ਪ. ੪.੫.੯) ਪਟਿਕ੍ਖਿਪਤਿ, ਤਸ੍ਮਾ ਭਗਵਤੋ ਅਧਿਪ੍ਪਾਯਂ ਪਤਿ ‘‘ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤੀ’’ਤਿ ਵੁਤ੍ਤਂ, ਸਿਕ੍ਖਾਪਦਂ ਪਤਿ ਭਗਵਾਪਿ ਅਤ੍ਤਨੋ ਅਧਿਪ੍ਪਾਯਪ੍ਪਕਾਸਨਤ੍ਥਮੇਵ ‘‘ਅਨੁਜਾਨਾਮਿ, ਭਿਕ੍ਖਵੇ, ਯਾਗੁਞ੍ਚਾ’’ਤਿ ਆਹ. ਦੁਰਵਗ੍ਗਾਹੋ ਹਿ ਭਗਵਤੋ ਅਧਿਪ੍ਪਾਯੋ. ਤਥਾ ਹਿ ਭਾਰਦ੍ਵਾਜਸ੍ਸ ਪਾਯਾਸਂ ਅਭੋਜਨੇਯ੍ਯਨ੍ਤਿ ਅਕਤਵਿਞ੍ਞਤ੍ਤਿਪ੍ਪਸਙ੍ਗਤੋ ਪਟਿਕ੍ਖਿਪਿ. ਆਨਨ੍ਦਤ੍ਥੇਰੇਨ ਵਿਞ੍ਞਾਪੇਤ੍ਵਾ ਸਜ੍ਜਿਤਂ ਤੇਕਟੁਲਯਾਗੁਂ ਪਨ ‘‘ਯਦਪਿ, ਆਨਨ੍ਦ, ਵਿਞ੍ਞਤ੍ਤਂ, ਤਦਪਿ ਅਕਪ੍ਪਿਯ’’ਨ੍ਤਿ ਅਵਤ੍ਵਾ ‘‘ਯਦਪਿ, ਆਨਨ੍ਦ, ਅਨ੍ਤੋਵੁਤ੍ਥ’’ਨ੍ਤਿਆਦਿਮੇਵਾਹ. ਤੇਨ ਨੋ ਚੇ ਤਂ ਅਨ੍ਤੋਵੁਤ੍ਥਂ ਕਪ੍ਪਤੀਤਿ ਅਧਿਪ੍ਪਾਯਦਸ੍ਸਨੇਨ ਪਣੀਤਭੋਜਨਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਾਨਿ ਉਪਤ੍ਥਮ੍ਭੇਤਿ ਭਗਵਤੋਪਿ ਕਪ੍ਪਤਿ, ਪਗੇਵ ਅਮ੍ਹਾਕਨ੍ਤਿ.
੨੮੪. ਗਿਲਾਨਸ੍ਸੇਵ ਭਗਵਤਾ ਗੁਲ਼ੋ ਅਨੁਞ੍ਞਾਤੋਤਿ ‘‘ਯਾਨਿ ਖੋ ਪਨ ਤਾਨਿ ਗਿਲਾਨਾਨਂ ਭਿਕ੍ਖੂਨਂ ਪਟਿਸਾਯਨੀਯਾਨੀ’’ਤਿ (ਪਾਰਾ. ੬੨੨) ਵਚਨਵਸੇਨ ਵੁਤ੍ਤਂ, ਤੇਨੇਵ ਤੇ ਇਧ ਪਟਿਗ੍ਗਹਣੇ ਕੁਕ੍ਕੁਚ੍ਚਾਯਿਂਸੁ. ਇਧ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਗੁਲ਼ੋਦਕ’’ਨ੍ਤਿ ਵਤ੍ਤਬ੍ਬੇ ਗੁਲ਼ਾਧਿਕਾਰਤ੍ਤਾ ਪੁਬ੍ਬੇ ਅਨੁਞ੍ਞਾਤਞ੍ਚ ਵਤ੍ਵਾ ਅਗਿਲਾਨਸ੍ਸ ਗੁਲ਼ੋਦਕਂ ਅਨੁਞ੍ਞਾਤਂ, ਤੇਨ ਗਿਲਾਨੇਨ ਸਤਿ ਪਚ੍ਚਯੇ ਗੁਲ਼ੋ ਪਰਿਭੁਞ੍ਜਿਤਬ੍ਬੋ, ਗੁਲ਼ੋਦਕਂ ਅਸਤਿ ਪਚ੍ਚਯੇਪਿ ਵਟ੍ਟਤੀਤਿ ਇਮਂ ਵਿਸੇਸਂ ਦੀਪੇਤਿ. ਤਤ੍ਥ ‘‘ਗੁਲ਼ੋਦਕਂ ਕਾਲਿਕੇਸੁ ਸਤ੍ਤਾਹਕਾਲਿਕਂ, ਭਗਵਤਾ ਓਦਿਸ੍ਸਾਨੁਞ੍ਞਾਤਤ੍ਤਾ ਸਤ੍ਤਾਹਾਤਿਕ੍ਕਮੇਨ ਦੁਕ੍ਕਟ’’ਨ੍ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ਉਦਕਸਮ੍ਭਿਨ੍ਨਤ੍ਤਾ ਸਤ੍ਤਾਹਕਾਲਿਕਭਾਵਂ ਜਹਤਿ. ‘‘ਯਥਾ ਅਮ੍ਬਾਦਿ ਉਦਕਸਮ੍ਭਿਨ੍ਨਂ ਯਾਮਕਾਲਿਕਂ ਜਾਤਂ, ਤਥਾ ਸਤ੍ਤਾਹਕਾਲਿਕਂ ਜਹਿਤ੍ਵਾ ਤਦਨਨ੍ਤਰੇ ਯਾਵਜੀਵਿਕੇ ਠਿਤ’’ਨ੍ਤਿ ਵਦਨ੍ਤਿ, ਤਂ ਯੁਤ੍ਤਂ, ਤਞ੍ਚ ਭਗਵਤਾ ਓਦਿਸ੍ਸਾਨੁਞ੍ਞਾਤਤ੍ਤਾ ਪਚ੍ਚਵੇਕ੍ਖਣਾਭਾਵੇ ਦੋਸੋ ਨਤ੍ਥਿ. ‘‘ਗੁਲ਼ੋਦਕ’ਨ੍ਤਿ ਵੁਤ੍ਤਤ੍ਤਾ ਉਦਕਗਤਿਕ’’ਨ੍ਤਿ ਵਦਨ੍ਤਿ. ਯਦਿ ਉਦਕਮਿਸ੍ਸਂ ਉਦਕਗਤਿਕਂ ਹੋਤਿ, ਮਧੁਪਿ ਸਿਯਾ ਤਂ ਤਥਾ ਅਨੁਞ੍ਞਾਤਤ੍ਤਾ. ਮਾ ਹੋਤੁ, ਅਪ੍ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤਬ੍ਬਂ ਸਿਯਾ ਉਦਕਗਤਿਕਤ੍ਤਾ, ਤਞ੍ਚ ਨ ਹੋਤਿ, ‘‘ਸਬ੍ਬਤ੍ਥਾਪਿ ਉਪਪਰਿਕ੍ਖਿਤ੍ਵਾ ਗਹੇਤਬ੍ਬ’’ਨ੍ਤਿ ਅਞ੍ਞਤਰਸ੍ਮਿਂ ਗਣ੍ਠਿਪਦੇ ਵੁਤ੍ਤਂ.
੨੮੫. ਸੁਞ੍ਞਾਗਾਰਨ੍ਤਿ ਚਤੁਤ੍ਥਜ੍ਝਾਨਂ.
ਕਪ੍ਪਿਯਭੂਮਿਅਨੁਜਾਨਨਕਥਾਵਣ੍ਣਨਾ
੨੯੫. ਓਰਵਸਦ੍ਦਨ੍ਤਿ ਮਹਾਸਦ੍ਦਂ. ਬਹੂਹਿ ਸਮ੍ਪਰਿਵਾਰੇਤ੍ਵਾਤਿ ਏਤ੍ਥ ਏਕੇਨਾਪਿ ਵਟ੍ਟਤਿ. ‘‘ਬਹੂਸੁ ਏਕਸ੍ਸਪਿ ਵਚਨੇਨ ਸਹ ਸਿਯਾਤਿ ਵੁਤ੍ਤ’’ਨ੍ਤਿ ਵਦਨ੍ਤਿ. ‘‘ਆਮਸਿਤ੍ਵਾ’’ਤਿ ਵੁਤ੍ਤਤ੍ਤਾ ਅਨਾਮਸਿਤੇ ਨ ਵਟ੍ਟਤਿ. ‘‘ਦੋਸੋ ਨਤ੍ਥੀ’’ਤਿ ਵਚਨੇਨ ਸੇਸਾਪਿ ਅਨੁਞ੍ਞਾਤਾ. ‘‘ਭਿਤ੍ਤਿਞ੍ਚੇ ਉਪਸਨ੍ਤੇ ਪਚ੍ਛਾ ਤਂ ਪੂਰੇਨ੍ਤਿ, ਤਤ੍ਥ ਕਾਤੁਂ ਨ ਵਟ੍ਟਤਿ, ਪਕਤਿਭੂਮਿਯਂਯੇਵ ਕਾਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਤਂ ਉਪਰਿ ਅਟ੍ਠਕਥਾਯਂ ‘‘ਇਟ੍ਠਕਾਦੀਹਿ ਕਤਾਚਯਸ੍ਸਾ’’ਤਿਆਦਿਨਾ ਵਿਰੁਜ੍ਝਤਿ ਵਿਯ. ਮਤ੍ਤਿਕਾਪਿਣ੍ਡਂ ਵਾਤਿ ਏਤ੍ਥ ‘‘ਅਸਤਿਯਾ ਅਨਧਿਟ੍ਠਿਤਾਯ ਸਰਿਤਟ੍ਠਾਨਤੋ ਪਟ੍ਠਾਯ ਚੇ ਉਪਰਿ ਅਧਿਟ੍ਠਿਤਾ, ਹੇਟ੍ਠਾ ਠਿਤਂ ਭਣ੍ਡਂ ਅਕਪ੍ਪਿਯਂ, ਉਪਰਿਟ੍ਠਿਤਮੇਵ ਕਪ੍ਪਿਯਂ, ਅਯਮੇਤ੍ਥ ਵਿਸੇਸੋ’’ਤਿ ਵੁਤ੍ਤਂ. ਏਤ੍ਥ ਕਪ੍ਪਿਯਕੁਟਿ ਲਦ੍ਧੁਂ ਵਟ੍ਟਤੀਤਿ ਏਵਂਵਿਧੇ ਪੁਨ ਕਾਤਬ੍ਬਾਤਿ ਅਤ੍ਥੋ. ਕਪ੍ਪਿਯਕੁਟਿਂ ਕਾਤੁਂ ਦੇਮਾਤਿ ਏਤ੍ਥ ਕਪ੍ਪਿਯਕੁਟਿਕਿਚ੍ਚਂ ਕਾਤੁਨ੍ਤਿ ਅਧਿਪ੍ਪਾਯੋ. ਭੋਜਨਸਾਲਾ ਪਨ ਸੇਨਾਸਨਮੇਵ, ਤਸ੍ਮਾ ਤਤ੍ਥ ਕਾਤਬ੍ਬਨ੍ਤਿ ਅਪਰੇ. ‘‘ਅਕਤੇਪਿ ਵਟ੍ਟਤੀ’’ਤਿ ਵੁਤ੍ਤਂ.
‘‘ਮੁਖਸਨ੍ਨਿਧਿ ਨਾਮ ਭੋਜਨਕਾਲੇ ਸਨ੍ਨਿਧੀ’’ਤਿ ਲਿਖਿਤਂ. ਮੁਖਸਨ੍ਨਿਧੀਤਿ ਤਸ੍ਸ ਨਾਮਂ. ‘‘ਯਦਿ ਸਨ੍ਨਿਧਿ ਹੋਤਿ, ਪਾਚਿਤ੍ਤਿਯਂ ਭਵੇਯ੍ਯ, ਮੁਖਸਨ੍ਨਿਧਿ ਪਨ ਦੁਕ੍ਕਟਂ, ਤਸ੍ਮਾ ਸਨ੍ਨਿਧਿ ਅਨਧਿਪ੍ਪੇਤਾ’’ਤਿ ਵੁਤ੍ਤਂ. ‘‘ਤਸ੍ਸ ਸਨ੍ਤਕਂ ਕਤ੍ਵਾ’’ਤਿ ਵੁਤ੍ਤਤ੍ਤਾ ਅਨਪੇਕ੍ਖਵਿਸ੍ਸਜ੍ਜਨਂ ਨਾਧਿਪ੍ਪੇਤਂ. ਚੀਵਰਵਿਕਪ੍ਪਨੇ ਵਿਯ ਕਪ੍ਪਿਯਮਤ੍ਤਂ ਞਾਤਬ੍ਬਨ੍ਤਿ ਕੇਚਿ.
ਕੇਣਿਯਜਟਿਲਵਤ੍ਥੁਕਥਾਵਣ੍ਣਨਾ
੩੦੦. ‘‘ਅਤ੍ਤਨਾ ਪਟਿਗ੍ਗਹਿਤਂ ਪੁਰੇਭਤ੍ਤਮੇਵ ਪਰਿਚ੍ਚਜਿਤ੍ਵਾ ਸਾਮਣੇਰਾਦੀਹਿ ਪਾਨਕਂ ਕਤ੍ਵਾ ਦਿਨ੍ਨੇ ਪੁਰੇਭਤ੍ਤਮੇਵ ਵਟ੍ਟਤਿ, ਨ ਪਚ੍ਛਾਭਤ੍ਤਂ ਸਵਤ੍ਥੁਕਪਟਿਗ੍ਗਹਿਤਤ੍ਤਾ’’ਤਿ ਵਦਨ੍ਤਿ, ਤਤ੍ਥ ਪੁਨ ਪਟਿਗ੍ਗਹਣੇ ਨਿਦ੍ਦੋਸਤ੍ਤਾ, ਪੁਰੇਭਤ੍ਤਮੇਵ ਪਟਿਗ੍ਗਹਣਸ੍ਸ ਨਿਸ੍ਸਟ੍ਠਤ੍ਤਾ, ਅਤ੍ਤਨਾ ਚ ਅਗ੍ਗਹਿਤਤ੍ਤਾ ਦੋਸੋ ਨ ਦਿਸ੍ਸਤਿ, ਉਪਪਰਿਕ੍ਖਿਤ੍ਵਾ ਗਹੇਤਬ੍ਬਂ. ਸਾਲੂਕਾ ਨਾਮ ਕਨ੍ਦਾ, ‘‘ਇਤੋ ਕਿਞ੍ਚਿਤਕ’’ਨ੍ਤਿ ਵੋਹਰਨ੍ਤਿ. ‘‘ਫਾਰੁਸਕਨ੍ਤਿ ਗੋਲ਼ਵਿਸਯੇ ਏਕੋ ਰੁਕ੍ਖੋ’’ਤਿ ਚ ਲਿਖਿਤਂ. ‘‘ਪਕ੍ਕਡਾਕਰਸ’’ਨ੍ਤਿ ਵਿਸੇਸਿਤਤ੍ਤਾ ‘‘ਅਪਕ੍ਕਂ ਵਟ੍ਟਤੀ’’ਤਿ ਵੁਤ੍ਤਂ. ਕੁਰੁਨ੍ਦਿਵਚਨੇਨਪਿ ਸਿਦ੍ਧਮੇਵ. ਤਣ੍ਡੁਲਧੋਵਨੋਦਕਮ੍ਪਿ ਧਞ੍ਞਰਸੋ ਏਵ. ‘‘ਨਿਕ੍ਕਸਟੋ ਉਚ੍ਛੁਰਸੋ ਸਤ੍ਤਾਹਕਾਲਿਕੋ’’ਤਿ ਲਿਖਿਤਂ. ਸਾਵਿਤ੍ਤੀਤਿ ਗਾਯਤ੍ਤਿ. ਛਨ੍ਦਸੋਤਿ ਵੇਦਸ੍ਸ. ‘‘ਨ, ਭਿਕ੍ਖਵੇ, ਪਬ੍ਬਜਿਤੇਨ ਅਕਪ੍ਪਿਯੇ ਸਮਾਦਪੇਤਬ੍ਬ’ਨ੍ਤਿ ਵੁਤ੍ਤਤ੍ਤਾ ਅਨੁਪਸਮ੍ਪਨ੍ਨਸ੍ਸਾਪਿ ਨ ਕੇਵਲਂ ਦਸਸੁ ਏਵ ਸਿਕ੍ਖਾਪਦੇਸੁ, ਅਥ ਖੋ ਯਂ ਭਿਕ੍ਖੁਸ੍ਸ ਨ ਕਪ੍ਪਤਿ, ਤਸ੍ਮਿਮ੍ਪੀਤਿ ਅਧਿਪ੍ਪਾਯੋ’’ਤਿ ਵੁਤ੍ਤਂ.
੩੦੫. ਦ੍ਵੇ ਪਟਾ ਦੇਸਨਾਮੇਨੇਵਾਤਿ ਚੀਨਪਟ੍ਟਸੋਮਾਰਪਟ੍ਟਾਨਿ. ਤੀਣੀਤਿ ਪਤ੍ਤੁਣ੍ਣੇਨ ਸਹ ਤੀਣਿ. ਇਦ੍ਧਿਮਯਿਕਂ ਏਹਿਭਿਕ੍ਖੂਨਂ ਨਿਬ੍ਬਤ੍ਤਂ. ਦੇਵਦਤ੍ਤਿਯਂ ਅਨੁਰੁਦ੍ਧਤ੍ਥੇਰੇਨ ਲਦ੍ਧਂ. ‘‘ਯਾਮਾਤਿਕ੍ਕਮੇ ਸਨ੍ਨਿਧਿਵਸੇਨ ਸਤ੍ਤਾਹਾਤਿਕ੍ਕਮੇ ਭੇਸਜ੍ਜਸਿਕ੍ਖਾਪਦਵਸੇਨਾ’’ਤਿ ਲਿਖਿਤਂ.
ਭੇਸਜ੍ਜਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.