੫. ਚਮ੍ਮਕ੍ਖਨ੍ਧਕਵਣ੍ਣਨਾ

ਸੋਣਕੋਲ਼ਿਵਿਸਵਤ੍ਥੁਕਥਾਵਣ੍ਣਨਾ

੨੪੨. ਅਸੀਤਿਯਾ …ਪੇ… ਕਾਰੇਤੀਤਿ ‘‘ਅਸੀਤਿ ਗਾਮਿਕਸਹਸ੍ਸਾਨਿ ਸਨ੍ਨਿਪਾਤਾਪੇਤ੍ਵਾ’’ਤਿ ਇਮਸ੍ਸ ਕਾਰਣਵਚਨਂ. ਤਤ੍ਥ ‘‘ਗਾਮਾਨਂ ਅਸੀਤਿਯਾ ਸਹਸ੍ਸੇਸੂ’’ਤਿ ਵਤ੍ਤਬ੍ਬੇ ‘‘ਅਸੀਤਿਯਾ ਗਾਮਸਹਸ੍ਸੇਸੂ’’ਤਿ ਵੁਤ੍ਤਂ. ਗਾਮਪ੍ਪਮੁਖਾ ਗਾਮਿਕਾ, ਤੇਸਂ ਸਹਸ੍ਸਾਨਿ. ‘‘ਕਮ੍ਮਚਿਤ੍ਤੀਕਤਾਨੀ’’ਤਿ ਉਪਚਾਰੇਨ ਵੁਤ੍ਤਂ. ਕਮ੍ਮਪਚ੍ਚਯਉਤੁਸਮੁਟ੍ਠਾਨੇ ਹਿ ਤੇਸਂ ਅਞ੍ਜਨਵਣ੍ਣਭਾਵੋ. ‘‘ਕੇਨਚਿਦੇਵ ਕਰਣੀਯੇਨਾ’’ਤਿ ਵਤ੍ਤਬ੍ਬੇ ‘‘ਕੇਨਚਿਦੇਵਾ’’ਤਿ ਵੁਤ੍ਤਂ. ਏਤ੍ਥ ਏਵਂ-ਸਦ੍ਦੋ ਓਪਮ੍ਮੇ ਪਵਤ੍ਤਤਿ. ਏਵਮੁਪਮਾਨੋਪਦੇਸਪੁਚ੍ਛਾਵਧਾਰਣਪਟਿਞ੍ਞਾਤਓਪਮ੍ਮੇ. ਪੁਰਤੋ ਪੇਕ੍ਖਮਾਨਾਨਨ੍ਤਿ ਅਨਾਦਰਤ੍ਥੇ ਸਾਮਿਵਚਨਂ. ਤਤੋ ਪਨ ਭਗਵਤੋ ਗਨ੍ਧਕੁਟਿਯਾ ਕਵਾਟਂ ਸੁਬਦ੍ਧਂ ਪਸ੍ਸਿਤ੍ਵਾ ਇਚ੍ਛਿਤਾਕਾਰਕੁਸਲਤਾਯ ਇਦ੍ਧਿਯਾ ਗਨ੍ਤ੍ਵਾ ਕੁਟਿਂ ਪਵਿਸਿਤ੍ਵਾ ਆਰੋਚੇਸਿ. ਵਿਹਾਰਪਚ੍ਛਾਯਾਯਨ੍ਤਿ ਵਿਹਾਰਸ੍ਸ ਵਡ੍ਢਮਾਨਚ੍ਛਾਯਾਯਂ. ‘‘ਅਹੋ ਨੂਨਾਤਿ ਅਹੋ ਮਹਨ੍ਤੋ’’ਤਿ ਲਿਖਿਤਂ. ਭਗਵਤੋ ਸਮ੍ਬਹੁਲੇਹਿ ਸਦ੍ਧਿਂ ਆਹਿਣ੍ਡਨਂ ਆਯਸ੍ਮਤੋ ਸੋਣਸ੍ਸ ਵੀਰਿਯਾਰਮ੍ਭਨਿਦਸ੍ਸਨੇਨ ਅਨਾਰਦ੍ਧਵੀਰਿਯਾਨਂ ਉਤ੍ਤੇਜਨਤ੍ਥਂ, ਏਵਂ ਸੁਖੁਮਾਲਾਨਂ ਪਾਦਰਕ੍ਖਣਤ੍ਥਂ ਉਪਾਹਨਾ ਅਨੁਞ੍ਞਾਤਾਤਿ ਦਸ੍ਸਨਤ੍ਥਞ੍ਚ.

ਸੋਣਸ੍ਸਪਬ੍ਬਜ੍ਜਾਕਥਾਵਣ੍ਣਨਾ

੨੪੩. ਤਤ੍ਥ ਚ ਨਿਮਿਤ੍ਤਂ ਗਣ੍ਹਾਹੀਤਿ ਤੇਸਂ ਇਨ੍ਦ੍ਰਿਯਾਨਂ ਆਕਾਰਂ ਉਪਲਕ੍ਖੇਹਿ.

੨੪੪. ਅਧਿਮੁਤ੍ਤੋ ਹੋਤੀਤਿ ਪਟਿਵਿਜ੍ਝਿਤ੍ਵਾ ਪਚ੍ਚਕ੍ਖਂ ਕਤ੍ਵਾ ਠਿਤੋ ਹੋਤਿ. ਨੇਕ੍ਖਮ੍ਮਾਧਿਮੁਤ੍ਤੋਤਿਆਦੀਹਿ ਨਿਬ੍ਬਾਨਂ, ਅਰਹਤ੍ਤਞ੍ਚ ਵੁਤ੍ਤਂ. ‘‘ਤਞ੍ਹਿ ਸਬ੍ਬਕਿਲੇਸੇਹਿ ਨਿਕ੍ਖਨ੍ਤਤ੍ਤਾ ‘ਨੇਕ੍ਖਮ੍ਮ’ਨ੍ਤਿ ਚ ਗੇਹਤੋ ਪਵਿਵਿਤ੍ਤਤ੍ਤਾ ‘ਪਵਿਵੇਕੋ’ਤਿ ਚ ਬ੍ਯਾਪਜ੍ਜਾਭਾਵਤੋ ‘ਅਬ੍ਯਾਪਜ੍ਜ’ਨ੍ਤਿ ਚ ਅਰਹਤ੍ਤਂ ਉਪਾਦਾਨਸ੍ਸ ਖਯਨ੍ਤੇ ਉਪ੍ਪਨ੍ਨਤ੍ਤਾ ‘ਉਪਾਦਾਨਕ੍ਖਯੋ’ਤਿ ਚ ਤਣ੍ਹਾਯ ਖਯਨ੍ਤੇ ਉਪ੍ਪਨ੍ਨਤ੍ਤਾ ‘ਤਣ੍ਹਕ੍ਖਯੋ’ਤਿ ਚ ਸਮ੍ਮੋਹਾਭਾਵਤੋ ‘ਅਸਮ੍ਮੋਹੋ’ਤਿ ਚ ਵੁਚ੍ਚਤੀ’’ਤਿ ਵੁਤ੍ਤਂ. ਸਬ੍ਬੇਹਿ ਅਰਹਤ੍ਤਂ ਵੁਤ੍ਤਨ੍ਤਿ ਕੇਚਿ. ਸਿਯਾ ਖੋ ਏਵਮਸ੍ਸਾਤਿ ਕਦਾਚਿ ਏਵਮਸ੍ਸ, ਅਸ੍ਸ ਵਾ ਆਯਸ੍ਮਤੋ ਏਵਂ ਸਿਯਾ. ਪਚ੍ਚਾਗਚ੍ਛਨ੍ਤੋ ਜਾਨਨ੍ਤੋ. ਕਰਣੀਯਮਤ੍ਤਾਨਨ੍ਤਿ ਅਤ੍ਤਨੋ. ਸੋ ਏਵ ਵਾ ਪਾਠੋ. ਨੇਕ੍ਖਮ੍ਮਾਧਿਮੁਤ੍ਤੋਤਿ ਇਮਸ੍ਮਿਂਯੇਵ ਅਰਹਤ੍ਤਂ ਕਥਿਤਂ. ਸੇਸੇਸੁ ਨਿਬ੍ਬਾਨਨ੍ਤਿ ਕੇਚਿ. ਅਸਮ੍ਮੋਹਾਧਿਮੁਤ੍ਤੋਤਿ ਏਤ੍ਥੇਵ ਨਿਬ੍ਬਾਨਂ. ਸੇਸੇਸੁ ਅਰਹਤ੍ਤਨ੍ਤਿ ਕੇਚਿ. ‘‘ਸਬ੍ਬੇਸ੍ਵੇਵੇਤੇਸੁ ਉਭਯਮ੍ਪੀ’’ਤਿ ਵਦਨ੍ਤਿ. ਪਵਿਵੇਕਞ੍ਚ ਚੇਤਸੋ, ਅਧਿਮੁਤ੍ਤਸ੍ਸ, ਉਪਾਦਾਨਕ੍ਖਯਸ੍ਸ ਚਾਤਿ ਉਪਯੋਗਤ੍ਥੇ ਸਾਮਿਵਚਨਂ. ਆਯਤਨਾਨਂ ਉਪ੍ਪਾਦਞ੍ਚ ਵਯਞ੍ਚ ਦਿਸ੍ਵਾ.

ਸਬ੍ਬਨੀਲਿਕਾਦਿਪਟਿਕ੍ਖੇਪਕਥਾਵਣ੍ਣਨਾ

੨੪੬. ‘‘ਰਞ੍ਜਨਚੋਲ਼ਕੇਨ ਪੁਞ੍ਛਿਤ੍ਵਾ’’ਤਿ ਪਾਠੋ. ‘‘ਖਲ੍ਲਕਾਦੀਨਿ ਅਪਨੇਤ੍ਵਾ’ਤਿ ਵੁਤ੍ਤਤ੍ਤਾ ਦ੍ਵੇ ਤੀਣਿ ਛਿਦ੍ਦਾਨਿ ਕਤ੍ਵਾ ਵਲ਼ਞ੍ਜੇਤੁਂ ਵਟ੍ਟਤੀ’’ਤਿ ਵਦਨ੍ਤਾਨਂ ਵਾਦੋ ਨ ਗਹੇਤਬ੍ਬੋ.

ਯਾਨਾਦਿਪਟਿਕ੍ਖੇਪਕਥਾਵਣ੍ਣਨਾ

੨੫੪. ‘‘ਚਤੁਰਙ੍ਗੁਲਾਧਿਕਾਨੀ’’ਤਿ ਵੁਤ੍ਤਤ੍ਤਾ ਚਤੁਰਙ੍ਗੁਲਤੋ ਹੇਟ੍ਠਾ ਵਟ੍ਟਤੀਤਿ ਏਕੇ. ਉਭਤੋਲੋਹਿਤਕੂਪਧਾਨਨ੍ਤਿ ਏਤ੍ਥ ‘‘ਕਾਸਾਵਂ ਪਨ ਵਟ੍ਟਤਿ, ਕੁਸੁਮ੍ਭਾਦਿਰਤ੍ਤਮੇਵ ਨ ਵਟ੍ਟਤੀ’’ਤਿ ਲਿਖਿਤਂ.

ਸਬ੍ਬਚਮ੍ਮਪਟਿਕ੍ਖੇਪਾਦਿਕਥਾਵਣ੍ਣਨਾ

੨੫੫. ਕਿਸ੍ਸ ਤ੍ਯਾਯਨ੍ਤਿ ਕਿਸ੍ਸ ਤੇ ਅਯਂ.

੨੫੬. ਗਿਹਿਵਿਕਤਨ੍ਤਿ ਗਿਹੀਨਂ ਅਤ੍ਥਾਯ ਕਤਂ. ‘‘ਯਤ੍ਥ ਕਤ੍ਥਚਿ ਨਿਸੀਦਿਤੁਂ ਅਨੁਜਾਨਾਮੀਤਿ ਅਤ੍ਥੋ’’ਤਿ ਲਿਖਿਤਂ. ਕਿਞ੍ਚਾਪਿ ਦੀਘਨਿਕਾਯਟ੍ਠਕਥਾਯਂ ‘‘ਠਪੇਤ੍ਵਾ ਤੂਲਿਕਂ ਸਬ੍ਬਾਨੇਵ ਗੋਨਕਾਦੀਨਿ ਰਤਨਪਰਿਸਿਬ੍ਬਿਤਾਨਿ ਵਟ੍ਟਨ੍ਤੀ’’ਤਿ ਵੁਤ੍ਤਂ, ਅਥ ਖੋ ਵਿਨਯਪਰਿਯਾਯਂ ਪਤ੍ਵਾ ਗਰੁਕੇ ਠਾਤਬ੍ਬਤੋ ਇਧ ਵੁਤ੍ਤਨਯੇਨੇਵੇਤ੍ਥ ਅਤ੍ਥੋ ਗਹੇਤਬ੍ਬੋ. ‘‘ਤਤ੍ਥ ਪਨ ਸੁਤ੍ਤਨ੍ਤਿਕਦੇਸਨਾਯ ਗਹਟ੍ਠਾਦੀਨਮ੍ਪਿ ਵਸੇਨ ਵੁਤ੍ਤਤ੍ਤਾ ਤੇਸਂ ਸਙ੍ਗਣ੍ਹਨਤ੍ਥਂ ਠਪੇਤ੍ਵਾ ‘ਤੂਲਿਕਂ…ਪੇ… ਵਟ੍ਟਨ੍ਤੀ’ਤਿ ਵੁਤ੍ਤਂ ਵਿਯ ਖਾਯਤੀਤਿ ਅਪਰੇ’’ਤਿ ਵੁਤ੍ਤਂ.

੨੫੯. ਮਿਗਮਾਤੁਕੋਤਿ ਤਸ੍ਸ ਨਾਮਂ. ਵਾਤਮਿਗੋਤਿ ਚ ਤਸ੍ਸ ਨਾਮਂ. ‘‘ਕਾਲ਼ਸੀਹੋ ਕਾਲ਼ਮੁਖੋ ਕਪੀ’’ਤਿ ਲਿਖਿਤਂ. ਚਮ੍ਮਂ ਨ ਵਟ੍ਟਤੀਤਿ ਯੇਨ ਪਰਿਯਾਯੇਨ ਚਮ੍ਮਂ ਵਟ੍ਟਿਸ੍ਸਤਿ, ਸੋ ਪਰਤੋ ਆਵਿ ਭਵਿਸ੍ਸਤਿ. ‘‘ਅਤ੍ਤਨੋ ਪੁਗ੍ਗਲਿਕਵਸੇਨ ਪਰਿਹਾਰੋ ਪਟਿਕ੍ਖਿਤ੍ਤੋ’’ਤਿ ਵੁਤ੍ਤਂ. ‘‘ਨ, ਭਿਕ੍ਖਵੇ, ਕਿਞ੍ਚਿ ਚਮ੍ਮਂ ਧਾਰੇਤਬ੍ਬ’’ਨ੍ਤਿ ਏਤ੍ਤਾਵਤਾ ਸਿਦ੍ਧੇ ‘‘ਨ, ਭਿਕ੍ਖਵੇ, ਗੋਚਮ੍ਮ’’ਨ੍ਤਿ ਇਦਂ ਪਰਤੋ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਚਮ੍ਮਾਨਿ ਅਤ੍ਥਰਣਾਨੀ’’ਤਿ ਏਤ੍ਥ ਅਨੁਮਤਿਪ੍ਪਸਙ੍ਗਭਯਾ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਚਮ੍ਮਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.