੪. ਪਵਾਰਣਾਕ੍ਖਨ੍ਧਕਵਣ੍ਣਨਾ

ਅਫਾਸੁਕਵਿਹਾਰਕਥਾਵਣ੍ਣਨਾ

੨੧੦. ‘‘ਸਙ੍ਘਂ ਆਵੁਸੋ ਪਵਾਰੇਮੀ’’ਤਿ ਵੁਤ੍ਤਤ੍ਤਾ ਪਚ੍ਛਾਪਿ ‘‘ਵਦਤੁ ਮਂ ਸਙ੍ਘੋ’’ਤਿ ਵਤ੍ਤਬ੍ਬਂ ਵਿਯ ਦਿਸ੍ਸਤਿ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਯਸ੍ਮਾ ਅਹਂ ਸਙ੍ਘਂ ਪਵਾਰੇਮਿ, ਤਸ੍ਮਾ ਤਤ੍ਥ ਪਰਿਯਾਪਨ੍ਨਾ ਥੇਰਾ, ਮਜ੍ਝਿਮਾ, ਨਵਾ ਵਾ ਅਵਿਸੇਸੇਨਾਯਸ੍ਮਨ੍ਤੋ ਸਬ੍ਬੇਪਿ ਮਂ ਵਦਨ੍ਤੂਤਿ.

ਪਵਾਰਣਾਭੇਦਵਣ੍ਣਨਾ

੨੧੨. ਦ੍ਵੇਮਾ, ਭਿਕ੍ਖਵੇ, ਪਵਾਰਣਾਤਿ ਏਤ੍ਥ ਤਾਦਿਸੇ ਕਿਚ੍ਚੇ ਸਤਿ ਯਤ੍ਥ ਕਤ੍ਥਚਿ ਪਵਾਰੇਤੁਂ ਵਟ੍ਟਤਿ. ਤੇਨੇਵ ਮਹਾਵਿਹਾਰੇ ਭਿਕ੍ਖੂ ਚਾਤੁਦ੍ਦਸਿਯਂ ਪਵਾਰੇਤ੍ਵਾ ਪਨ੍ਨਰਸਿਯਂ ਕਾਯਸਾਮਗ੍ਗਿਂ ਇਦਾਨਿਪਿ ਦੇਨ੍ਤਿ. ਚੇਤਿਯਗਿਰਿ ਮਹਾਦਸ੍ਸਨਤ੍ਥਮ੍ਪਿ ਅਟ੍ਠਮਿਯਂ ਗਚ੍ਛਨ੍ਤਿ, ਤਮ੍ਪਿ ਚਾਤੁਦ੍ਦਸਿਯਂ ਪਵਾਰੇਤੁਕਾਮਾਨਂਯੇਵ ਹੋਤਿ. ‘‘ਸਤ੍ਤਾਹਂ ਅਨਾਗਤਾਯ ਪਵਾਰਣਾਯ ਸਕਰਣੀਯੋ ਪਕ੍ਕਮਤਿ, ਅਨਾਪਤ੍ਤੀਤਿ ਵਚਨਤੋ ਇਦਂ ਆਚਿਣ੍ਣ’’ਨ੍ਤਿ ਲਿਖਿਤਂ. ‘‘ਨੋ ਚੇ ਅਧਿਟ੍ਠਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਏਕਸ੍ਸ ਵੁਤ੍ਤਦੁਕ੍ਕਟਂ, ਤਸ੍ਸੇਵ ਵੁਤ੍ਤਂ ਪੁਬ੍ਬਕਿਚ੍ਚਞ੍ਚ ਸਙ੍ਘਗਣਾਨਮ੍ਪਿ ਨੇਤਬ੍ਬਂ.

ਪਵਾਰਣਾਦਾਨਾਨੁਜਾਨਨਕਥਾਵਣ੍ਣਨਾ

੨੧੩. ਤੇਨ ਚ ਭਿਕ੍ਖੁਨਾਤਿ ਪਵਾਰਣਾਦਾਯਕੇਨ.

ਅਨਾਪਤ੍ਤਿਪਨ੍ਨਰਸਕਾਦਿਕਥਾਵਣ੍ਣਨਾ

‘‘ਤਸ੍ਸਾ ਚ ਪਵਾਰਣਾਯ ਆਰੋਚਿਤਾਯ ਸਙ੍ਘੇਨ ਚ ਪਵਾਰਿਤੇ ਸਬ੍ਬੇਸਂ ਸੁਪ੍ਪਵਾਰਿਤਂ ਹੋਤੀਤਿ ਵਚਨਤੋ ਕੇਵਲਂ ਪਵਾਰਣਾਯ ਪਵਾਰਣਾਦਾਯਕੋਪਿ ਪਵਾਰਿਤੋਵ ਹੋਤੀ’’ਤਿ ਵਦਨ੍ਤੀਤਿ.

੨੨੨. ਅਵੁਟ੍ਠਿਤਾਯ ਪਰਿਸਾਯਾਤਿ ਪਵਾਰੇਤ੍ਵਾ ਪਚ੍ਛਾ ਅਞ੍ਞਮਞ੍ਞਂ ਕਥੇਨ੍ਤਿਯਾ. ਏਕਚ੍ਚਾਯ ਵੁਟ੍ਠਿਤਾਯਾਤਿ ਏਕਚ੍ਚੇਸੁ ਯਥਾਨਿਸਿਨ੍ਨੇਸੁ ਏਕਚ੍ਚੇਸੁ ਸਕਸਕਟ੍ਠਾਨਂ ਗਤੇਸੁ. ਪੁਨ ਪਵਾਰੇਤਬ੍ਬਨ੍ਤਿ ਪੁਨਪਿ ਸਬ੍ਬੇਹਿ ਸਮਾਗਨ੍ਤ੍ਵਾ ਪਵਾਰੇਤਬ੍ਬਂ. ਆਗਚ੍ਛਨ੍ਤਿ ਸਮਸਮਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਨ੍ਤਿ ‘‘ਗਤੇ ਅਨਾਨੇਤ੍ਵਾ ਨਿਸਿਨ੍ਨਾਨਂਯੇਵ ਸਨ੍ਤਿਕੇ ਪਵਾਰੇਤਬ੍ਬਂ, ਉਪੋਸਥਕ੍ਖਨ੍ਧਕੇਪਿ ਏਸੇਵ ਨਯੋ’’ਤਿ ਲਿਖਿਤਂ. ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ ਆਗਚ੍ਛਨ੍ਤਿ ਸਮਸਮਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਨ੍ਤਿ ‘‘ਯਦਿ ਸਬ੍ਬੇ ਵੁਟ੍ਠਹਿਤ੍ਵਾ ਗਤਾ, ਸਨ੍ਨਿਪਾਤੇਤੁਞ੍ਚ ਨ ਸਕ੍ਕਾ, ਏਕਚ੍ਚੇ ਸਨ੍ਨਿਪਾਤਾਪੇਤ੍ਵਾ ਪਵਾਰੇਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਕਸ੍ਮਾ? ਞਤ੍ਤਿਂ ਠਪੇਤ੍ਵਾ ਕਤ੍ਤਬ੍ਬਸਙ੍ਘਕਮ੍ਮਾਭਾਵਾ ਵਗ੍ਗਂ ਨ ਹੋਤਿ ਕਿਰ. ਏਤ੍ਥ ਪਨ ਏਕਚ੍ਚੇਸੁ ਗਤੇਸੁਪਿ ਸਬ੍ਬੇਸੁ ਗਤੇਸੁਪਿ ਸਬ੍ਬੇ ਸਨ੍ਨਿਪਾਤਾਪੇਤ੍ਵਾ ਞਤ੍ਤਿਂ ਅਟ੍ਠਪੇਤ੍ਵਾ ਕੇਵਲਂ ਪਵਾਰੇਤਬ੍ਬਂ. ਏਕਚ੍ਚੇ ਸਨ੍ਨਿਪਾਤਾਪੇਤ੍ਵਾ ਪਵਾਰੇਤੁਂ ਨ ਵਟ੍ਟਤਿ ‘‘ਸਙ੍ਘਂ, ਭਨ੍ਤੇ, ਪਵਾਰੇਮੀ’’ਤਿ ਵਚਨਤੋ. ਸਬ੍ਬੇਪਿ ਹਿ ਸਨ੍ਨਿਪਤਿਤਾ ਪਚ੍ਛਾ ਦਿਟ੍ਠਂ ਵਾ ਸੁਤਂ ਵਾ ਪਰਿਸਙ੍ਕਿਤਂ ਵਾ ਵਤ੍ਤਾਰੋ ਹੋਨ੍ਤਿ. ਅਨਾਗਤਾਨਂ ਅਤ੍ਥਿਭਾਵਂ ਞਤ੍ਵਾਪਿ ਏਕਚ੍ਚਾਨਂ ਸਨ੍ਤਿਕੇ ਪਵਾਰਣਾਵਚਨਂ ਵਿਯ ਹੋਤਿ. ਸਮ੍ਮੁਖੀਭੂਤੇ ਚਤ੍ਤਾਰੋ ਸਨ੍ਨਿਪਾਤਾਪੇਤ੍ਵਾ ਨਿਸ੍ਸਗ੍ਗਿਯਂ ਆਪਨ੍ਨਚੀਵਰਾਦਿਨਿਸ੍ਸਜ੍ਜਨਂ ਵਿਯ ਪਵਾਰਣਾ ਨ ਹੋਤਿ ਸਬ੍ਬਾਯਤ੍ਤਤ੍ਤਾ. ‘‘ਸਮਗ੍ਗਾਨਂ ਪਵਾਰਣਾ ਪਞ੍ਞਤ੍ਤਾ’’ਤਿ ਵਚਨਞ੍ਚੇਤ੍ਥ ਸਾਧਕਂ. ‘‘ਇਤੋ ਅਞ੍ਞਥਾ ਨ ਵਟ੍ਟਤਿ ਅਟ੍ਠਕਥਾਯਂ ਅਨਨੁਞ੍ਞਾਤਤ੍ਤਾ’’ਤਿ ਉਪਤਿਸ੍ਸਤ੍ਥੇਰੋ ਵਦਤਿ. ‘‘ਥੋਕਤਰੇਹਿ ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ ਞਤ੍ਤਿਂ ਅਟ੍ਠਪੇਤ੍ਵਾਵਾ’’ਤਿ ਵੁਤ੍ਤਂ. ਆਗਨ੍ਤੁਕਾ ਨਾਮ ਨਵਮਿਤੋ ਪਟ੍ਠਾਯਾਗਤਾ ਵਾ ਵਜਸਤ੍ਥਨਾਵਾਸੁ ਵੁਤ੍ਥਵਸ੍ਸਾ ਵਾ ਹੋਨ੍ਤਿ.

੨੩੭. ‘‘ਦਸਵਤ੍ਥੁਕਾ ਮਿਚ੍ਛਾਦਿਟ੍ਠਿ ਹੋਤਿ ਤਥਾਗਤੋਤਿਆਦੀ’’ਤਿ ਲਿਖਿਤਂ. ‘‘ਨਤ੍ਥਿ ਦਿਨ੍ਨਨ੍ਤਿਆਦੀ’’ਤਿ ਵੁਤ੍ਤਂ.

੨੩੯. ‘‘ਉਪਪਰਿਕ੍ਖਿਤ੍ਵਾ ਜਾਨਿਸ੍ਸਾਮਾਤਿ ਤੇਨ ਸਹ ਪਵਾਰੇਤਬ੍ਬ’’ਨ੍ਤਿ ਲਿਖਿਤਂ.

ਪਵਾਰਣਾਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.