੩. ਵਸ੍ਸੂਪਨਾਯਿਕਕ੍ਖਨ੍ਧਕਵਣ੍ਣਨਾ

ਵਸ੍ਸੂਪਨਾਯਿਕਾਨੁਜਾਨਨਕਥਾਵਣ੍ਣਨਾ

੧੮੪. ਮਹਾਅਟ੍ਠਕਥਾਯਮ੍ਪਿ ‘‘ਸਙ੍ਕਾਸਯਿਸ੍ਸਨ੍ਤੀ’’ਤਿ ਪਾਠੋ, ਦੀਪਵਾਸਿਨੋ ‘‘ਸਙ੍ਕਾਪਯਿਸ੍ਸਨ੍ਤੀ’’ਤਿ ਪਠਨ੍ਤਿ ਕਿਰ. ‘‘ਕਤਿ ਨੁ ਖੋ ਵਸ੍ਸੂਪਨਾਯਿਕਾ’’ਤਿ ਚਿਨ੍ਤਾਯਂ ‘‘ਕਿਂ ਨਿਮਿਤ੍ਤ’’ਨ੍ਤਿ ਵੁਤ੍ਤੇ ‘‘ਅਨੁਜਾਨਾਮਿ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤੁ’’ਨ੍ਤਿ ਯਂ ਵਸ੍ਸੂਪਗਮਨਂ ਵੁਤ੍ਤਂ, ਤਂ ‘‘ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਵਤ੍ਵਾ ਉਪਗਨ੍ਤਬ੍ਬਂ. ਵਸ੍ਸਾਨਮਾਸਾ ਚ ਚਤ੍ਤਾਰੋ. ਤਤ੍ਥ ਪਠਮਂ ਤੇਮਾਸਂ, ਪਚ੍ਛਿਮਂ ਤੇਮਾਸਨ੍ਤਿ ਦੁਵਿਧਂ ਤੇਮਾਸਂ. ਤੇਨਾਯਂ ਤੇਸਂ ਭਿਕ੍ਖੂਨਂ ਚਿਨ੍ਤਾ ਅਹੋਸਿ.

ਵਸ੍ਸਾਨੇਚਾਰਿਕਾਪਟਿਕ੍ਖੇਪਾਦਿਕਥਾਵਣ੍ਣਨਾ

੧੮੫. ਅਨਪੇਕ੍ਖਗਮਨੇਨ ਵਾ ਅਞ੍ਞਤ੍ਥ ਅਰੁਣਂ ਉਟ੍ਠਾਪਨੇਨ ਵਾ ਆਪਤ੍ਤਿ ਵੇਦਿਤਬ੍ਬਾਤਿ ਏਤ੍ਥ ਪਠਮਂ ਤਾਵ ਸੋ ਸਤ੍ਤਾਹਂ ਅਨਾਗਤਾਯ ਪਵਾਰਣਾਯ ਸਕਰਣੀਯੋ ਪਕ੍ਕਮਤਿ. ‘‘ਆਗਚ੍ਛੇਯ੍ਯ ਵਾ ਸੋ, ਭਿਕ੍ਖਵੇ, ਭਿਕ੍ਖੁ ਤਂ ਆਵਾਸਂ ਨ ਵਾ ਆਗਚ੍ਛੇਯ੍ਯ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤੀ’’ਤਿ ਵਚਨਤੋ ਓਰਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਤਥਾ ਹਿ ‘‘ਸੋ ਤਦਹੇਵ ਅਕਰਣੀਯੋ ਪਕ੍ਕਮਤਿ, ਸਕਰਣੀਯੋ ਪਕ੍ਕਮਤਿ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੦੭) ਵੁਤ੍ਤਂ.

ਸਤ੍ਤਾਹਕਰਣੀਯਾਨੁਜਾਨਨਕਥਾਵਣ੍ਣਨਾ

੧੮੭-੮. ਦੁਤਿਯਂ ਪਨ ‘‘ਸੋ ਤਂ ਸਤ੍ਤਾਹਂ ਬਹਿਦ੍ਧਾ ਵੀਤਿਨਾਮੇਤਿ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵਚਨਤੋ ਸਤ੍ਤਾਹਤੋ ਪਰਂ ਵੇਦਿਤਬ੍ਬਂ. ਤਥਾ ਹਿ ‘‘ਸੋ ਤਂ ਸਤ੍ਤਾਹਂ ਅਨ੍ਤੋ ਸਨ੍ਨਿਵਤ੍ਤਂ ਕਰੋਤਿ, ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਪੁਰਿਮਿਕਾ ਚ ਪਞ੍ਞਾਯਤਿ, ਪਟਿਸ੍ਸਵੇ ਚ ਅਨਾਪਤ੍ਤੀ’’ਤਿ (ਮਹਾਵ. ੨੦੭) ਵੁਤ੍ਤਂ. ਸਤਿਪਿ ਕਾਰਣਦ੍ਵਯੇ ਵਸ੍ਸਚ੍ਛੇਦਕਾਰਣਾਭਾਵੇ ਆਪਤ੍ਤਿ ਵੇਦਿਤਬ੍ਬਾ, ਤਸ੍ਮਾ ਤੀਣਿਪਿ ਏਤਾਨਿ ਵਚਨਾਨਿ ਯਥਾਸਮ੍ਭਵਂ ਯੋਜਿਤਾਨਿ ਵਿਗ੍ਗਹਾਨਿ ਹੋਨ੍ਤਿ. ਤੀਣਿ ਪਰਿਹੀਨਾਨੀਤਿ ਤਾਸਂ ਨਤ੍ਥਿਤਾਯ.

ਪਹਿਤੇਯੇਵਅਨੁਜਾਨਨਕਥਾਵਣ੍ਣਨਾ

੧੯੯. ‘‘ਅਨੁਜਾਨਾਮਿ ਭਿਕ੍ਖਵੇ, ਸਙ੍ਘਕਰਣੀਯੇਨ ਗਨ੍ਤੁਂ, ਸਤ੍ਤਾਹਂ ਸਨ੍ਨਿਵਤ੍ਤੋ ਕਾਤਬ੍ਬੋ’’ਤਿ ਵਚਨਤੋ ਅਨ੍ਤੋਵਸ੍ਸੇ ਸਂਹਾਰਿਕਭਾਵੇਨ ਗਨ੍ਤੁਂ ਵਟ੍ਟਤਿ. ਤਤ੍ਥ ਧਮ੍ਮਛਨ੍ਦਵਸੇਨਪਿ ਆਗਤੇ ਸਙ੍ਘਸ੍ਸ ਆਯਮੁਖਂ ਵਿਨਸ੍ਸਤਿ. ਤਤੋ ‘‘ਸੇਨਾਸਨਾਨਿ ਕਤ੍ਵਾ’’ਤਿ ਚ ਵੁਤ੍ਤਂ. ਆਗਤਨ੍ਤਿ ਆਗਮਨਂ. ਭਾਵੇਤ੍ਥ ਤਪਚ੍ਚਯੋਯਂ. ਸਙ੍ਘਕਰਣੀਯੇਨ ਗਨ੍ਤੁਨ੍ਤਿ ਏਤ੍ਥ ‘‘ਸੇਨਾਸਨਪਟਿਸਂਯੁਤ੍ਤੇਸੁ ਏਵ ਸਙ੍ਘਕਰਣੀਯੇਸੁ, ਨ ਅਞ੍ਞੇਸੂ’’ਤਿ ਧਮ੍ਮਸਿਰਿਤ੍ਥੇਰੋ ਵਦਤਿ ਕਿਰ. ਅਟ੍ਠਕਥਾਯਮ੍ਪਿ ਤਂ ਪਦਂ ਉਦ੍ਧਰਿਤ੍ਵਾ ‘‘ਯਂ ਕਿਞ੍ਚਿ ਉਪੋਸਥਾਗਾਰਾਦੀਸੁ ਸੇਨਾਸਨੇਸੂ’’ਤਿਆਦਿਨਾ ਸੇਨਾਸਨਮੇਵ ਦਸ੍ਸਿਤਂ, ਤਸ੍ਮਾ ਉਪਪਰਿਕ੍ਖਿਤਬ੍ਬਂ.

ਅਨਿਮਨ੍ਤਿਤੇਨ ਗਨ੍ਤੁਂ ਨ ਵਟ੍ਟਤੀਤਿ ਤਸ੍ਸ ਰਤ੍ਤਿਚ੍ਛੇਦੋ ਚ ਦੁਕ੍ਕਟਾਪਤ੍ਤਿ ਚ ਹੋਤਿ, ਤਂ ‘‘ਵਸ੍ਸਚ੍ਛੇਦੋ’’ਤਿ ਚ ਵਦਨ੍ਤਿ. ਨਿਮਨ੍ਤਿਤੋਯੇਵ ਨਾਮ ਹੋਤੀਤਿ ਏਤ੍ਥ ਉਪਾਸਕੇਹਿ ‘‘ਇਮਸ੍ਮਿਂ ਨਾਮ ਦਿਵਸੇ ਦਾਨਾਦੀਨਿ ਕਰੋਮ, ਸਬ੍ਬੇ ਸਨ੍ਨਿਪਤਨ੍ਤੂ’’ਤਿ ਕਤਾਯਪਿ ਕਤਿਕਾਯ ਗਨ੍ਤੁਂ ਵਟ੍ਟਤਿ. ਪਵਾਰਣਾਯ ਨਵਮਿਤੋ ਪਟ੍ਠਾਯ ਪਂਸੁਕੂਲਿਕਚੀਵਰਂ ਪਰਿਯੇਸਿਤੁਂ ਕਾਵੀਰਪਟ੍ਟਨੇ ਵਿਯ ਸਬ੍ਬੇਸਂ ਗਨ੍ਤੁਂ ਵਟ੍ਟਤਿ ਅਨੁਸਂਵਚ੍ਛਰਂ ਨਿਯਮਤੋ ਉਪਾਸਕੇਹਿ ਸਜ੍ਜਿਤ੍ਵਾ ਠਪਨਤੋ. ਵੁਤ੍ਤਮ੍ਪਿ ਚੇਤਂ ਅਨ੍ਧਕਟ੍ਠਕਥਾਯਂ ‘‘ਭਿਕ੍ਖੁਸਙ੍ਘੇਨ ਵਾ ਕਤਿਕਾ ਕਤਾ ‘ਸਮਨ੍ਤਾ ਭਿਕ੍ਖੂ ਗਚ੍ਛਨ੍ਤੂ’ਤਿ, ਘੋਸਨਂ ਵਾ ਕਤਂ ਉਪਾਸਕੇਹਿ, ਤਤ੍ਥ ਗਚ੍ਛਨ੍ਤਸ੍ਸ ਰਤ੍ਤਿਚ੍ਛੇਦੋ ਨਤ੍ਥੀਤਿ ਤਥਾ ‘ਅਨੁਸਂਵਚ੍ਛਰਂ ਆਗਚ੍ਛਨ੍ਤੂ’ਤਿ ਸਕਿਂ ਨਿਮਨ੍ਤਿਤੇਪਿ ਵਟ੍ਟਤੀ’’ਤਿ ਚ ‘‘ਚੀਵਰਕਾਲਤੋ ਪਟ੍ਠਾਯ ਨਿਯਮਂ ਕਤ੍ਵਾ ਸਮਨ੍ਤਤੋ ਆਗਤਾਨਂ ਸਜ੍ਜੇਤ੍ਵਾ ਦਾਨਤੋ ਕਾਵੀਰਪਟ੍ਟਨੇ ਘੋਸੇਤ੍ਵਾ ਕਰਣਾਕਾਰੋ ਪਞ੍ਞਾਯਤੀਤਿ ਅਪਰੇ’’ਤਿ ਚ. ਆਚਰਿਯਾ ਪਨ ਏਵਂ ਨ ਵਦਨ੍ਤਿ.

ਅਨ੍ਤਰਾਯੇਅਨਾਪਤ੍ਤਿਵਸ੍ਸਚ੍ਛੇਦਕਥਾਵਣ੍ਣਨਾ

੨੦੧. ‘‘ਸਚੇ ਦੂਰਂ ਗਤੋ ਹੋਤਿ, ਸਤ੍ਤਾਹਵਾਰੇਨ ਅਰੁਣੋ ਉਟ੍ਠਾਪੇਤਬ੍ਬੋ’’ਤਿ ਵਚਨਤੋ ‘ਯਸ੍ਮਿਂ ਅਨ੍ਤਰਾਯੇ ਸਤਿ ਵਸ੍ਸਚ੍ਛੇਦਂ ਕਾਤੁਂ ਵਟ੍ਟਤਿ, ਤਸ੍ਮਿਂ ਅਨ੍ਤਰਾਯੇਵ ਵਸ੍ਸਚ੍ਛੇਦਮਕਤ੍ਵਾ ਸਤ੍ਤਾਹਕਰਣੀਯੇਨ ਵੀਤਿਨਾਮੇਤੁਂ ਵਟ੍ਟਤੀਤਿ ਦੀਪਿਤਨ੍ਤਿ ਅਪਰੇ’’ਤਿ ਵੁਤ੍ਤਂ. ਵਿਨਯਧਰਾ ਪਨ ਨ ਇਚ੍ਛਨ੍ਤਿ, ਤਸ੍ਮਾ ‘‘ਸਤ੍ਤਾਹਵਾਰੇਨ ਅਰੁਣੋ ਉਟ੍ਠਾਪੇਤਬ੍ਬੋ’’ਤਿ ਇਦਂ ਤਤ੍ਰੁਪ੍ਪਾਦਾਦਿਨਿਮਿਤ੍ਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਤਂ ਸਨ੍ਧਾਯ ‘‘ਆਚਰਿਯਾ ਪਨ ਏਵਂ ਨ ਵਦਨ੍ਤੀ’’ਤਿ ਵੁਤ੍ਤਂ. ਗਾਵੁਂ ਵਾਤਿ ਬਲਿਬਦ੍ਧਂ ਵਾ. ਬਹਿਸੀਮਾਯ ਠਿਤਾਨਨ੍ਤਿ ਤੇਹਿ ਖਣ੍ਡਸੀਮਾਯ ਠਿਤੇਹਿਪੀਤਿ ਉਪਤਿਸ੍ਸਤ੍ਥੇਰੋ. ਵਸ੍ਸਚ੍ਛੇਦੇ ਅਸ੍ਸ ਵਸ੍ਸਚ੍ਛੇਦਸ੍ਸ. ਵਿਹਾਰਾ ਅਞ੍ਞਤ੍ਥ ਵੁਟ੍ਠਾਪੇਨ੍ਤੇਹਿ ਤਤ੍ਥੇਵ ਸਨ੍ਨਿਪਤਿਤ੍ਵਾ ‘‘ਇਮਿਨਾ ਚ ਇਮਿਨਾ ਚ ਕਾਰਣੇਨ ਇਮਸ੍ਮਿਂ ਨਾਮ ਪਦੇਸੇ ਇਮਂ ਵਿਹਾਰਂ ਨੇਤ੍ਵਾ ਵੁਟ੍ਠਾਪੇਮਾ’’ਤਿ ਅਨੁਸ੍ਸਾਵੇਤ੍ਵਾਵ ਕਾਤਬ੍ਬਨ੍ਤਿ.

ਵਜਾਦੀਸੁਵਸ੍ਸੂਪਗਮਨਕਥਾਵਣ੍ਣਨਾ

੨੦੩. ਵਜੇਨ ਸਦ੍ਧਿਂ ਗਤਸ੍ਸ ਵਸ੍ਸਚ੍ਛੇਦੇ ਅਨਾਪਤ੍ਤੀਤਿ ਵਸ੍ਸਚ੍ਛੇਦੋ ਨ ਹੋਤੀਤਿ ਕਿਰ ਅਧਿਪ੍ਪਾਯੋ. ਸਤ੍ਥਸ੍ਸ ਅਵਿਹਾਰਤ੍ਤਾ ‘‘ਇਮਸ੍ਮਿਂ ਵਿਹਾਰੇ’’ਤਿ ਅਵਤ੍ਵਾ ‘‘ਇਧ ਵਸ੍ਸਂ ਉਪੇਮੀ’’ਤਿ ਏਤ੍ਤਕਂ ਵਤ੍ਤਬ੍ਬਂ. ‘‘ਸਤ੍ਥੇ ਪਨ ਵਸ੍ਸਂ ਉਪਗਨ੍ਤੁਂ ਨ ਵਟ੍ਟਤੀਤਿ ‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸ’ਨ੍ਤਿ ਵਾ ‘ਇਧ ਵਸ੍ਸਂ ਉਪੇਮੀ’ਤਿ ਵਾ ਨ ਵਟ੍ਟਤਿ, ਆਲਯਕਰਣਮਤ੍ਤੇਨੇਵ ਵਟ੍ਟਤੀਤਿ ਅਧਿਪ੍ਪਾਯੋ’’ਤਿ ਲਿਖਿਤਂ. ਤਂ ਪਨ ਅਟ੍ਠਕਥਾਯ ਵਿਰੁਜ੍ਝਤਿ. ‘‘ਇਧ ਵਸ੍ਸਂ ਉਪੇਮੀਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬ’’ਨ੍ਤਿ ਹਿ ਵੁਤ੍ਤਂ. ਅਟ੍ਠਕਥਾਵਚਨਮ੍ਪਿ ਪੁਬ੍ਬਾਪਰਂ ਵਿਰੁਜ੍ਝਤੀਤਿ ਚੇ? ਨ, ਅਧਿਪ੍ਪਾਯਾਜਾਨਨਤੋ. ਸਤ੍ਥੋ ਦੁਵਿਧੋ ਠਿਤੋ, ਸਞ੍ਚਾਰੋਤਿ. ਤਤ੍ਥ ਠਿਤੇ ਕੁਟਿਕਾਯ ‘‘ਇਧ ਵਸ੍ਸਂ ਉਪੇਮੀ’’ਤਿ ਵਤ੍ਵਾ ਵਸਿਤਬ੍ਬਂ. ਇਦਞ੍ਹਿ ਸਨ੍ਧਾਯ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਥੇ ਵਸ੍ਸਂ ਉਪਗਨ੍ਤੁ’’ਨ੍ਤਿ ਵੁਤ੍ਤਂ, ਸਞ੍ਚਾਰਿਮ੍ਹਿ ਪਨ ਸਤ੍ਥੇ ਕੁਟਿਕਾਯ ਅਭਾਵਤੋ ਵਸ੍ਸਂ ਉਪਗਨ੍ਤੁਂ ਨ ਵਟ੍ਟਤਿ. ਸਤਿ ਸਿਵਿਕਾਯ ਵਾ ਸਕਟਕੁਟਿਕਾਯ ਵਾ ਵਟ੍ਟਤਿ, ਤਥਾ ਵਜੇਪਿ. ਤੀਸੁ ਠਾਨੇਸੁ ਭਿਕ੍ਖੁਨੋ ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤਿ.

ਪਵਾਰੇਤੁਞ੍ਚ ਲਭਤੀਤਿ ਏਤ੍ਥਾਯਂ ਵਿਚਾਰਣਾ – ‘‘ਅਨੁਜਾਨਾਮਿ, ਭਿਕ੍ਖਵੇ, ਯੇਨ ਵਜੋ, ਤੇਨ ਗਨ੍ਤੁ’’ਨ੍ਤਿ ਇਦਂ ਕਿਂ ਵਸ੍ਸਰਕ੍ਖਣਤ੍ਥਂ ਵੁਤ੍ਤਂ, ਉਦਾਹੁ ਵਸ੍ਸਚ੍ਛੇਦਾਪਤ੍ਤਿਰਕ੍ਖਣਤ੍ਥਨ੍ਤਿ? ਕਿਞ੍ਚੇਤ੍ਥ ਯਦਿ ਵਸ੍ਸਰਕ੍ਖਣਤ੍ਥਂ, ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ ਇਦਂ ਵਿਰੁਜ੍ਝਤਿ. ਅਥ ਵਸ੍ਸਚ੍ਛੇਦਾਪਤ੍ਤਿਰਕ੍ਖਣਤ੍ਥਂ ਵੁਤ੍ਤਨ੍ਤਿ ਸਿਦ੍ਧਂ ਨ ਸੋ ਪਵਾਰੇਤੁਂ ਲਭਤੀਤਿ, ਕਾ ਪਨੇਤ੍ਥ ਯੁਤ੍ਤਿ? ਯਤੋ ਅਯਮੇਵ ਤਿਵਿਧੋ ਪਵਾਰੇਤੁਂ ਲਭਤਿ, ਨੇਤਰੋ. ਵਾਲ਼ੇਹਿ ਉਬ੍ਬਾਲ਼੍ਹਾਦਿਕੋ ਹਿ ਉਪਗਤਟ੍ਠਾਨਾਪਰਿਚ੍ਚਾਗਾ ਲਭਤਿ. ਪਰਿਚ੍ਚਾਗਾ ਨ ਲਭਤੀਤਿ ਅਯਮੇਤ੍ਥ ਯੁਤ੍ਤਿ. ਯੇਨ ਗਾਮੋ, ਤਤ੍ਥ ਗਤੋਪਿ ਪਵਾਰੇਤੁਂ ਲਭਤੀਤਿ ਏਕੇਨਾਤਿ ਆਚਰਿਯੋ. ਯੋ ਹਿ ਪੁਬ੍ਬੇ ‘‘ਇਧ ਵਸ੍ਸਂ ਉਪੇਮੀ’’ਤਿ ਨ ਉਪਗਤੋ, ‘‘ਇਮਸ੍ਮਿਂ ਵਿਹਾਰੇ’’ਤਿ ਉਪਗਤੋ, ਸੋ ਚ ਪਰਿਚ੍ਚਤ੍ਤੋ. ਅਞ੍ਞਥਾ ਵਿਨਾ ਵਿਹਾਰੇਨ ਕੇਵਲਂ ਗਾਮਂ ਸਨ੍ਧਾਯ ‘‘ਇਧ ਵਸ੍ਸਂ ਉਪੇਮੀ’’ਤਿ ਉਪਗਨ੍ਤੁਂ ਵਟ੍ਟਤੀਤਿ. ਆਪਜ੍ਜਤੂਤਿ ਚੇ? ਨ, ‘‘ਅਨੁਜਾਨਾਮਿ, ਭਿਕ੍ਖਵੇ, ਵਜੇ ਸਤ੍ਥੇ ਨਾਵਾਯ ਵਸ੍ਸਂ ਉਪਗਨ੍ਤੁ’’ਨ੍ਤਿ ਵਚਨਂ ਵਿਯ ‘‘ਗਾਮੇ ਉਪਗਨ੍ਤੁ’’ਨ੍ਤਿ ਵਚਨਾਭਾਵਤੋ. ਯਸ੍ਮਾ ‘‘ਤੀਸੁ ਠਾਨੇਸੁ ਭਿਕ੍ਖੁਨੋ ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤੀ’’ਤਿ ਵਚਨਂ ਤਤ੍ਥ ਵਸ੍ਸੂਪਗਮਨਂ ਅਤ੍ਥੀਤਿ ਦੀਪੇਤਿ ਤਦਭਾਵੇ ਛੇਦਾਭਾਵਾ, ਤਸ੍ਮਾ ‘‘ਸਤ੍ਥੇ ਪਨ ਵਸ੍ਸਂ ਉਪਗਨ੍ਤੁਂ ਨ ਵਟ੍ਟਤੀ’’ਤਿ ਕੁਟਿਯਾ ਅਭਾਵਕਾਲਂ ਸਨ੍ਧਾਯ ਵੁਤ੍ਤਨ੍ਤਿ ਸਿਦ੍ਧਂ. ਤੀਸੁ ਠਾਨੇਸੁ ਭਿਕ੍ਖੁਨੋ ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤੀਤਿ ‘‘ਤੇਹਿ ਸਦ੍ਧਿਂ ਗਚ੍ਛਨ੍ਤਸ੍ਸੇਵ ਨਤ੍ਥਿ, ਵਿਰੁਜ੍ਝਿਤ੍ਵਾ ਗਮਨੇ ਆਪਤ੍ਤਿ ਚ, ਪਵਾਰੇਤੁਞ੍ਚ ਨ ਲਭਤੀ’’ਤਿ ਲਿਖਿਤਂ, ਤਸ੍ਮਾ ਯਂ ਵੁਤ੍ਤਂ ਅਟ੍ਠਕਥਾਯਂ ‘‘ਅਥ ਸਤ੍ਥੋ ਅਨ੍ਤੋਵਸ੍ਸੇਯੇਵ ਭਿਕ੍ਖੁਨਾ ਪਤ੍ਥਿਤਟ੍ਠਾਨਂ ਪਤ੍ਵਾ ਅਤਿਕ੍ਕਮਤਿ…ਪੇ… ਅਨ੍ਤਰਾ ਏਕਸ੍ਮਿਂ ਗਾਮੇ ਤਿਟ੍ਠਤਿ ਵਾ ਵਿਪ੍ਪਕਿਰਤਿ ਵਾ’’ਤਿਆਦਿ, ਤਂ ਏਤ੍ਤਾਵਤਾ ਵਿਰੁਜ੍ਝਿਤ੍ਵਾ ਗਤਾਨਮ੍ਪਿ ਵਿਰੁਜ੍ਝਿਤ੍ਵਾ ਗਮਨਂ ਨ ਹੋਤਿ, ਤਸ੍ਮਾ ਪਵਾਰੇਤਬ੍ਬਨ੍ਤਿ ਦਸ੍ਸਨਤ੍ਥਨ੍ਤਿ ਵੇਦਿਤਬ੍ਬਂ.

ਤਤ੍ਥ ‘‘ਪਦਰਚ੍ਛਦਨਂ ਕੁਟਿਂ ਕਤ੍ਵਾ ਉਪਗਨ੍ਤਬ੍ਬ’’ਨ੍ਤਿ ਵਚਨਤੋ ਸੇਨਾਸਨਤ੍ਥਾਯ ਰੁਕ੍ਖਂ ਆਰੁਹਿਤੁਂ ਵਟ੍ਟਤੀਤਿ ਸਿਦ੍ਧਂ ਹੋਤਿ, ਨ ਪਾਲ਼ਿਵਿਰੋਧਤੋਤਿ ਚੇ? ਨ, ਤਪ੍ਪਟਿਕ੍ਖੇਪੇਨੇਵ ਸਿਦ੍ਧਤ੍ਤਾ, ਇਮਸ੍ਸ ਇਧ ਪੁਨਪਿ ਪਟਿਕ੍ਖੇਪਨਤੋ. ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ ਇਮਿਨਾ ਪਟਿਕ੍ਖੇਪੇਨ ਸਿਦ੍ਧੇ ‘‘ਨ, ਭਿਕ੍ਖਵੇ, ਅਜ੍ਝੋਕਾਸੇ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ ਪਟਿਕ੍ਖੇਪੋ ਵਿਯ ਸਿਯਾਤਿ ਚੇ? ਨ, ਅਜ੍ਝੋਕਾਸਸ੍ਸ ਅਸੇਨਾਸਨਭਾਵਾਨੁਮਤਿਪ੍ਪਸਙ੍ਗਤੋ. ਅਜ੍ਝੋਕਾਸੋ ਹਿ ‘‘ਅਜ੍ਝੋਕਾਸੇ ਪਲਾਲਪੁਞ੍ਜੇ’’ਤਿ ਵਚਨਤੋ ਸੇਨਾਸਨਨ੍ਤਿ ਸਿਦ੍ਧਂ. ਚਤੁਸਾਲਅਜ੍ਝੋਕਾਸੇ ਵਸਨ੍ਤੋਪਿ ‘‘ਚਤੁਸਾਲਾਯ ਵਸਤੀ’’ਤਿ ਵੁਚ੍ਚਤਿ, ਤਸ੍ਮਾ ਤਤ੍ਥ ਵਟ੍ਟਤੀਤਿ ਆਪਜ੍ਜਤਿ, ਤਸ੍ਮਾ ਇਧ ਅਸੇਨਾਸਨਿਕੋ ਨਾਮ ਅਤ੍ਤਨਾ ਵਾ ਪਰੇਨ ਵਾ ਅਤ੍ਤਨੋ ਨਿਬਦ੍ਧਵਾਸਤ੍ਥਂ ਅਪਾਪਿਤਸੇਨਾਸਨਿਕੋਤਿ ਵੇਦਿਤਬ੍ਬਂ. ਅਞ੍ਞਥਾ ਦ੍ਵਿਨ੍ਨਂ ਪਟਿਕ੍ਖੇਪਾਨਂ ਅਞ੍ਞਤਰਾਤਿਰੇਕਤਾ ਚ ਰੁਕ੍ਖਮੂਲੇਪਿ ਨਿਬ੍ਬਕੋਸੇਪਿ ਵਸ੍ਸਂ ਉਪਗਨ੍ਤੁਂ ਵਟ੍ਟਤੀਤਿ ਚ, ਅਪਾਪਿਤਸੇਨਾਸਨਿਕੇਨਾਪਿ ਗਬ੍ਭੇ ਵਸਿਤੁਂ ਵਟ੍ਟਤੀਤਿ ਚ ਆਪਜ੍ਜਤਿ, ਸਦ੍ਵਾਰਬਨ੍ਧਮੇਵ ਸੇਨਾਸਨਂ ਇਧ ਅਧਿਪ੍ਪੇਤਨ੍ਤਿ ਕਥਂ ਪਞ੍ਞਾਯਤੀਤਿ ਚੇ? ਨਿਦਾਨਤੋ. ਅਯਞ੍ਹਿ ਅਸੇਨਾਸਨਿਕਵਸ੍ਸੂਪਗਮਨਾਪਤ੍ਤਿ ‘‘ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਸੇਨਾਸਨਿਕਾ ਵਸ੍ਸਂ ਉਪਗਚ੍ਛਨ੍ਤਿ, ਸੀਤੇਨਪਿ ਉਣ੍ਹੇਨਪਿ ਕਿਲਮਨ੍ਤੀ’’ਤਿ ਇਮਸ੍ਮਿਂ ਨਿਦਾਨੇ ਪਞ੍ਞਤ੍ਤਾ, ਤਸ੍ਮਾ ਸੀਤਾਦਿਪਟਿਕ੍ਖੇਪਮੇਵ ਇਧ ਸੇਨਾਸਨਨ੍ਤਿ ਅਧਿਪ੍ਪੇਤਬ੍ਬਨ੍ਤਿ ਸਿਦ੍ਧਂ. ਏਵਂ ਸਨ੍ਤੇ ਸਿਦ੍ਧਂ ਪੁਬ੍ਬਪਕ੍ਖਨਿਦਸ੍ਸਨਨ੍ਤਿ ਚੇ? ਨ, ਪੁਬ੍ਬੇ ਅਪਰਤ੍ਥਪਵਤ੍ਤਿਸੂਚਨਤੋ. ਦੁਤਿਯਜ੍ਝਾਨਨਿਦ੍ਦੇਸੇ ‘‘ਵਿਤਕ੍ਕਵਿਚਾਰਾਨਂ ਵੂਪਸਮਾ ਅਵਿਤਕ੍ਕਂ ਅਵਿਚਾਰ’’ਨ੍ਤਿ (ਦੀ. ਨਿ. ੧.੨੨੮; ਮ. ਨਿ. ੧.੨੭੧) ਵਚਨਾਨਿ ਨਿਦਸ੍ਸਨਂ. ਅਜ੍ਝੋਕਾਸਪਟਿਕ੍ਖੇਪਨਿਦਾਨੇਨ ਬਹਿਅਜ੍ਝੋਕਾਸੋਵ ਪਟਿਕ੍ਖਿਤ੍ਤੋ, ਨ ਚਤੁਸਾਲਾਦਿਮਜ੍ਝਗਤੋ ਅਜ੍ਝੋਕਾਸੋਤਿ ਆਪਜ੍ਜਤਿ, ਤਸ੍ਮਾ ਨ ਨਿਦਾਨਂ ਪਮਾਣਨ੍ਤਿ ਚੇ? ਨ, ਨਿਯਮਤੋ. ਕਿਞ੍ਚਿ ਹਿ ਸਿਕ੍ਖਾਪਦਂ ਨਿਦਾਨਾਪੇਕ੍ਖਂ ਹੋਤੀਤਿ ਸਾਧਿਤਮੇਤਂ. ਇਦਂ ਸਾਪੇਕ੍ਖਂ, ਇਦਂ ਅਨਪੇਕ੍ਖਨ੍ਤਿ ਕਥਂ ਪਞ੍ਞਾਯਤਿ, ਨ ਹਿ ਏਤ੍ਥ ਉਭਤੋਵਿਭਙ੍ਗੇ ਵਿਯ ਸਿਕ੍ਖਾਪਦਾਨਂ ਪਦਭਾਜਨਂ, ਅਨਾਪਤ੍ਤਿਵਾਰੋ ਵਾ ਅਤ੍ਥੀਤਿ? ਇਧਾਪਿ ਦੇਸਨਾਵਿਧਾਨਤੋ ਪਞ੍ਞਾਯਤਿ. ‘‘ਦੇਵੇ ਵਸ੍ਸਨ੍ਤੇ ਰੁਕ੍ਖਮੂਲਮ੍ਪਿ ਨਿਬ੍ਬਕੋਸਮ੍ਪਿ ਉਪਧਾਵਨ੍ਤੀ’’ਤਿ ਹਿ ਇਮੇਹਿ ਦ੍ਵੀਹਿ ਨਿਦਾਨਵਚਨੇਹਿ ਬਹਿ ਵਾ ਅਨ੍ਤੋ ਵਾ ਸਬ੍ਬਂ ਓਵਸ੍ਸਕਟ੍ਠਾਨਂ ਇਧ ਅਜ੍ਝੋਕਾਸੋ ਨਾਮ. ਅਨੋਵਸ੍ਸਕਟ੍ਠਾਨਮ੍ਪਿ ਅਨਿਬ੍ਬਕੋਸਮੇਵ ਇਧ ਇਚ੍ਛਿਤਬ੍ਬਨ੍ਤਿ ਸਿਦ੍ਧਂ ਹੋਤਿ. ਤੇਨ ਨ ਉਪਗਨ੍ਤਬ੍ਬਨ੍ਤਿ ਨ ਆਲਯਕਰਣਪਟਿਕ੍ਖੇਪੋ, ‘‘ਇਧ ਵਸ੍ਸਂ ਉਪੇਮੀ’’ਤਿ ਵਚਨਪਟਿਕ੍ਖੇਪੋ. ਛਵਸਰੀਰਂ ਦਹਿਤ੍ਵਾ ਛਾਰਿਕਾਯ, ਅਟ੍ਠਿਕਾਨਞ੍ਚ ਅਤ੍ਥਾਯ ਕੁਟਿਕਾ ਕਰੀਯਤੀਤਿ ਅਨ੍ਧਕਟ੍ਠਕਥਾਵਚਨਂ. ‘‘ਟਙ੍ਕਿਤਮਞ੍ਚੋਤਿ ਕਸਿਕੁਟਿਕਾਪਾਸਾਣਘਰ’’ਨ੍ਤਿ ਲਿਖਿਤਂ. ‘‘ਅਕਵਾਟਬਦ੍ਧਸੇਨਾਸਨੇ ਅਤ੍ਤਨੋ ਪਾਪਿਤੇ ਸਭਾਗਟ੍ਠਾਨੇ ਸਕਵਾਟਬਦ੍ਧੇ ਵਸਤਿ ਚੇ, ਵਟ੍ਟਤੀ’’ਤਿ ਵੁਤ੍ਤਂ. ਪਯੋਗੋਪਿ ਅਤ੍ਥਿ, ‘‘ਅਸੇਨਾਸਨਿਕੇਨ ਵਸ੍ਸਂ ਨ ਉਪਗਨ੍ਤਬ੍ਬ’’ਨ੍ਤਿ ਪਾਲ਼ਿ ਚ ਅਟ੍ਠਕਥਾ ਚ, ਤਸ੍ਮਾ ਉਪਪਰਿਕ੍ਖਿਤਬ੍ਬਂ.

ਅਧਮ੍ਮਿਕਕਤਿਕਾਦਿਕਥਾਵਣ੍ਣਨਾ

੨੦੫. ਮਹਾਵਿਭਙ੍ਗੇ ਵੁਤ੍ਤਨ੍ਤਿ ਏਤ੍ਥ ਅਯਂ ਅਨ੍ਧਕਟ੍ਠਕਥਾਵਚਨਂ ਊਨਪਨ੍ਨਰਸਵਸ੍ਸੇਨ ਸਾਮਣੇਰੇਨ ਇਧ ਵਿਹਾਰੇ ਨ ਵਤ੍ਥਬ੍ਬਾ, ਨ ਪਂਸੁਕੂਲਂ ਆਹਿਣ੍ਡਿਤਬ੍ਬਂ, ਨ ਚੋਲ਼ਭਿਕ੍ਖਾ ਗਹੇਤਬ੍ਬਾ, ਨ ਅਞ੍ਞਵਿਹਾਰੇ ਭੁਞ੍ਜਿਤਬ੍ਬਂ, ਨ ਅਞ੍ਞਸ੍ਸ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਸਨ੍ਤਕਂ ਭੁਞ੍ਜਿਤਬ੍ਬਂ, ਅਞ੍ਞਮਞ੍ਞਂ ਨੇਵ ਆਲਪੇਯ੍ਯਾਮ ਨ ਸਲ੍ਲਪੇਯ੍ਯਾਮ, ਨ ਸਜ੍ਝਾਯਿਤਬ੍ਬਂ, ਮਤ੍ਤਿਕਾਪਤ੍ਤੇਨ ਵਟ੍ਟਤਿ, ਨ ਅਪਰਿਪੁਣ੍ਣਪਰਿਕ੍ਖਾਰਸ੍ਸ ਵਾਸੋਤਿ.

੨੦੬. ਮੁਸਾਵਾਦੋਤਿ ਵਿਸਂਵਾਦੋ ਅਧਿਪ੍ਪੇਤੋ. ਕੇਚਿ ‘‘ਵਿਸਂਵਾਦਨਵਸੇਨ ਪਟਿਸ੍ਸੁਣਿਤ੍ਵਾਤਿ ਵੁਤ੍ਤ’’ਨ੍ਤਿ ਚ, ‘‘ਰਞ੍ਞੋ ਵੁਤ੍ਤਵਚਨਾਨੁਰੂਪਤੋ ਮੁਸਾਵਾਦੋਤਿ ਗਹਟ੍ਠਾ ਗਣ੍ਹਨ੍ਤੀਤਿ ਵੁਤ੍ਤ’’ਨ੍ਤਿ ਚ ਵਦਨ੍ਤਿ.

੨੦੭. ‘‘ਪੁਰਿਮਿਕਾ ਚ ਨ ਪਞ੍ਞਾਯਤਿ. ਕਸ੍ਮਾ? ‘ਦੁਤਿਯੇ ਵਸਾਮੀ’ਤਿ ਚਿਤ੍ਤੇ ਉਪ੍ਪਨ੍ਨੇ ਪਠਮਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤਿ. ਪੁਨ ‘ਪਠਮੇ ਏਵ ਵਸਾਮੀ’ਤਿ ਚਿਤ੍ਤੇ ਉਪ੍ਪਨ੍ਨੇ ਦੁਤਿਯੋ ਪਟਿਪ੍ਪਸ੍ਸਮ੍ਭਤਿ. ਉਭਯਾਵਾਸੇ ਵਿਧਾਨਂ ਨਤ੍ਥੀ’’ਤਿ ਲਿਖਿਤਂ. ਪੋਰਾਣਗਣ੍ਠਿਪਦੇ ਪਨ ‘‘ਪਠਮਂ ਗਹਿਤਟ੍ਠਾਨੇ ਅਵਸਿਤ੍ਵਾ ਅਞ੍ਞਸ੍ਮਿਂ ਵਿਹਾਰੇ ਸੇਨਾਸਨਂ ਗਹੇਤ੍ਵਾ ਦ੍ਵੀਹਤੀਹਂ ਵਸਤਿ, ਤਤੋ ਪਠਮਗ੍ਗਾਹੋ ਪਟਿਪ੍ਪਸ੍ਸਮ੍ਭਤੀਤਿ ਪੁਰਿਮਿਕਾ ਚ ਨ ਪਞ੍ਞਾਯਤਿ. ਪਚ੍ਛਿਮਗ੍ਗਾਹੋ ਨ ਪਟਿਪ੍ਪਸ੍ਸਮ੍ਭਤਿ. ਇਦਞ੍ਹਿ ਦਿਵਸਵਸੇਨ ਪਟਿਪ੍ਪਸ੍ਸਮ੍ਭਨਂ ਨਾਮ ਹੋਤਿ. ਅਥ ਪਚ੍ਛਿਮਂ ਤੇਮਾਸਂ ਅਞ੍ਞਸ੍ਮਿਂ ਵਸਤਿ, ਪੁਰਿਮਿਕਾ ਚ ਨ ਪਞ੍ਞਾਯਤਿ, ਇਦਂ ਸੇਨਾਸਨਗ੍ਗਾਹਾਨਂ ਵਸੇਨ ਪਟਿਪ੍ਪਸ੍ਸਮ੍ਭਨਂ ਨਾਮਾ’’ਤਿ ਵੁਤ੍ਤਂ. ਉਭੋਪੇਤੇ ਅਤ੍ਥਵਿਕਪ੍ਪਾ ਇਧ ਨਾਧਿਪ੍ਪੇਤਾ. ਯਤ੍ਥਾਯਂ ਪਟਿਸ੍ਸੁਤੋ, ਤਤ੍ਥ ਪੁਰਿਮਿਕਾ ਚ ਨ ਪਞ੍ਞਾਯਤਿ, ਪਟਿਸ੍ਸਵੇ ਚ ਆਪਤ੍ਤਿ ਦੁਕ੍ਕਟਸ੍ਸ. ਕਤ੍ਥ ਪਨ ਪੁਰਿਮਿਕਾ ਪਞ੍ਞਾਯਤੀਤਿ? ਅਨ੍ਤਰਾਮਗ੍ਗੇ ਦ੍ਵੀਸੁ ਆਵਾਸੇਸੁ ਯਤ੍ਥ ਤਦਹੇਵ ਪਚ੍ਛਿਮਗ੍ਗਾਹੋ, ਤਤ੍ਥ ਪਠਮਂ ਗਹਿਤਟ੍ਠਾਨੇ ਸਤ੍ਤਾਹਕਰਣੀਯੇਨ ਗਚ੍ਛਤੋ ਨ ਵਸ੍ਸਚ੍ਛੇਦੋ, ਸੋ ਤਦਹੇਵ ਅਕਰਣੀਯੋ ਪਕ੍ਕਮਤੀਤਿਆਦਿਮ੍ਹਿ ‘‘ਕਰਣੀਯਂ ਨਾਮ ਸਤ੍ਤਾਹਕਰਣੀਯ’’ਨ੍ਤਿ ਲਿਖਿਤਂ.

ਪਾਲ਼ਿਮੁਤ੍ਤਕਰਤ੍ਤਿਚ੍ਛੇਦਵਿਨਿਚ੍ਛਯੇ ‘‘ਧਮ੍ਮਸ੍ਸਵਨਾਦੀ’’ਤਿ ਵੁਤ੍ਤਂ. ਆਦਿਮ੍ਹਿ ਚਤੂਸੁ ਵਾਰੇਸੁ ਨਿਰਪੇਕ੍ਖਪਕ੍ਕਮਨਸ੍ਸਾਧਿਪ੍ਪੇਤਤ੍ਤਾ ‘‘ਸਤ੍ਤਾਹਕਰਣੀਯੇਨਾ’’ਤਿ ਨ ਵੁਤ੍ਤਂ ਤਸ੍ਮਿਂ ਸਤਿ ਨਿਰਪੇਕ੍ਖਗਮਨਾਭਾਵਤੋ. ਤਤ੍ਥ ਪੁਰਿਮਾ ਦ੍ਵੇ ਵਾਰਾ ਵਸ੍ਸਂ ਅਨੁਪਗਤਸ੍ਸ ਵਸੇਨ ਵੁਤ੍ਤਾ, ਤਸ੍ਮਾ ਉਪਗਤਸ੍ਸ ਤਦਹੇਵ ਸਤ੍ਤਾਹਕਰਣੀਯੇਨ ਗਨ੍ਤ੍ਵਾ ਅਨ੍ਤੋਸਤ੍ਤਾਹਂ ਆਗਚ੍ਛਤੋ ਨ ਵਸ੍ਸਚ੍ਛੇਦੋਤਿ ਸਿਦ੍ਧਂ. ਪਚ੍ਛਿਮਾ ਦ੍ਵੇ ਵਾਰਾ ਉਪਗਤਸ੍ਸ ਨਿਰਪੇਕ੍ਖਗਮਨਵਸੇਨ ਵੁਤ੍ਤਾ, ‘‘ਸਤ੍ਤਾਹਂ ਅਨਾਗਤਾਯ ਪਵਾਰਣਾਯ ਸਕਰਣੀਯੋ ਪਕ੍ਕਮਤੀ’’ਤਿ ਤਤੋ ਬਹਿਦ੍ਧਾ ਸਤ੍ਤਾਹਂ ਵੀਤਿਨਾਮੇਨ੍ਤਸ੍ਸ ਵਸ੍ਸਚ੍ਛੇਦੋਤਿ ਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ‘‘ਅਕਰਣੀਯੋ ਪਕ੍ਕਮਤੀ’’ਤਿ ਵਚਨਾਭਾਵਾ ਵਿਨਾ ਰਤ੍ਤਿਚ੍ਛੇਦਕਾਰਣੇਨ ਗਨ੍ਤੁਂ ਨ ਵਟ੍ਟਤੀਤਿ ਸਿਦ੍ਧਂ. ਪਵਾਰੇਤ੍ਵਾ ਪਨ ਗਨ੍ਤੁਂ ਵਟ੍ਟਤਿ ਪਵਾਰਣਾਯ ਤਂਦਿਵਸਸਨ੍ਨਿਸ੍ਸਿਤਤ੍ਤਾ. ਤਤ੍ਥ ਨ ਵਾ ਆਗਚ੍ਛੇਯ੍ਯਾਤਿ ਅਨ੍ਤਰਾਯੇਨ. ਆਚਰਿਯੋ ਪਨ ‘‘ਨ ਪੁਨ ਇਧਾਗਚ੍ਛਾਮੀ’ਤਿ ਨਿਰਪੇਕ੍ਖੋਪਿ ਸਕਰਣੀਯੋਵ ਗਨ੍ਤੁਂ ਲਭਤੀਤਿ ਦਸ੍ਸਨਤ੍ਥਂ ਅਕਰਣੀਯੋ’ਤਿ ਨ ਵੁਤ੍ਤ’’ਨ੍ਤਿ ਵਦਤਿ. ‘‘ਸੀਹਲ਼ਦੀਪੇ ਕਿਰ ਚੂਲ਼ਪਵਾਰਣਾ ਨਾਮ ਅਤ੍ਥਿ, ਤਂ ਪਵਾਰਣਂ ਕਤ੍ਵਾ ਯਥਾਸੁਖਂ ਸਕਰਣੀਯਾ ਗਚ੍ਛਨ੍ਤਿ, ਪਯੋਗਞ੍ਚ ਦਸ੍ਸੇਨ੍ਤੀ’’ਤਿ ਵੁਤ੍ਤਂ. ‘‘ਤਤ੍ਥ ਛ ਅਰੁਣਾ ਅਨ੍ਤੋਵਸ੍ਸੇ ਹੋਨ੍ਤਿ, ਏਕੋ ਬਹਿ, ਤਸ੍ਮਾ ਸੋ ਤੇਮਾਸਂ ਵੁਤ੍ਥੋ ਹੋਤੀਤਿ ਅਪਰੇ’’ਤਿ ਚ, ‘‘ਆਚਰਿਯੋ ਏਵਂ ਨ ਵਦਤੀ’’ਤਿ ਚ ਵੁਤ੍ਤਂ. ਸਬ੍ਬਤ੍ਥ ਵਿਹਾਰਂ ਉਪੇਤੀਤਿ ਅਤ੍ਤਨੋ ਵਸ੍ਸਗ੍ਗੇਨ ਪਤ੍ਤਗਬ੍ਭਂ ਉਪੇਤੀਤਿ ਪੋਰਾਣਾ. ਅਸਤਿਯਾ ਪਨ ਵਸ੍ਸਂ ਨ ਉਪੇਤੀਤਿ ਏਤ੍ਥ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸ’’ਨ੍ਤਿ ਅਵਚਨੇਨ. ‘‘ਅਟ੍ਠਕਥਾਯਂ ਵੁਤ੍ਤਰਤ੍ਤਿਚ੍ਛੇਦਕਾਰਣਂ ਵਿਨਾ ਤਿਰੋਵਿਹਾਰੇ ਵਸਿਤ੍ਵਾ ਆਗਚ੍ਛਿਸ੍ਸਾਮੀਤਿ ਗਚ੍ਛਤੋਪਿ ਵਸ੍ਸਚ੍ਛੇਦ’’ਨ੍ਤਿ ਲਿਖਿਤਂ.

੨੦੮. ਪਟਿਸ੍ਸੁਤੋ ਹੋਤਿ ਪਚ੍ਛਿਮਿਕਾਯਾਤਿ ਅਨ੍ਤਰਾ ਪਬ੍ਬਜਿਤਭਿਕ੍ਖੁਨਾ, ਛਿਨ੍ਨਵਸ੍ਸੇਨ ਵਾ ਪਟਿਸ੍ਸੁਤੋ, ਅਞ੍ਞੇਨ ਪਨ ਪੁਰਿਮਂ ਅਨੁਪਗਨ੍ਤ੍ਵਾ ਪਚ੍ਛਿਮਿਕਾਯਂ ਪਟਿਸ੍ਸਵੋ ਨ ਕਾਤਬ੍ਬੋ. ਰਤ੍ਤਿਚ੍ਛੇਦੇ ਸਬ੍ਬਤ੍ਥ ਵਸ੍ਸਚ੍ਛੇਦੋਤਿ ਸਨ੍ਨਿਟ੍ਠਾਨਂ ਕਤ੍ਵਾ ਵਦਨ੍ਤਿ. ਕੇਚਿ ਪਨ ਨ ਇਚ੍ਛਨ੍ਤਿ. ਤਂ ਸਾਧੇਤੁਂ ਅਨੇਕਧਾ ਪਪਞ੍ਚੇਨ੍ਤਿ. ਕਿਂ ਤੇਨ.

ਵਸ੍ਸੂਪਨਾਯਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.