੧੦. ਕੋਸਮ੍ਬਕਕ੍ਖਨ੍ਧਕਵਣ੍ਣਨਾ

ਕੋਸਮ੍ਬਕਵਿਵਾਦਕਥਾਵਣ੍ਣਨਾ

੪੫੧. ਸੁਤ੍ਤਨ੍ਤਿਕੋਤਿ ਏਤ੍ਥ ਕਿਞ੍ਚਾਪਿ ‘‘ਵਿਨਯਧਰੋ ਮਾਤਿਕਾਧਰੋ’’ਤਿ ਵੁਤ੍ਤਂ, ਉਭਤੋਵਿਭਙ੍ਗਂ ਪਨ ਸਨ੍ਧਾਯ ਵੁਤ੍ਤਂ, ਨ ਖਨ੍ਧਕਭਾਣਕੋ ਹੋਤਿ. ਆਵੁਸੋ ਏਤ੍ਥ ਆਪਤ੍ਤੀਤਿ ਵਚਨਂ ਉਪਾਦਾਯ ‘‘ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ ਹੋਤੀ’’ਤਿ ਵੁਚ੍ਚਤਿ. ਪਚ੍ਛਾ ਵਿਨਯਧਰੋ ‘‘ਵਤ੍ਥੁਮ੍ਹਿ ਸਤਿ ਪਮਾਣਂ, ਨ ਪਞ੍ਞਤ੍ਤਿਯ’’ਨ੍ਤਿ ਸਤਿਂ ਪਟਿਲਭਿਤ੍ਵਾ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ ਅਹੋਸਿ, ਤੇਨ ਵੁਤ੍ਤਂ ਅਨ੍ਤੇ ‘‘ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤੀ’’ਤਿ.

੪੫੫. ‘‘ਯਥਾ ਮਯਾ ਞਤ੍ਤੀ’’ਤਿ ਲਿਖਨ੍ਤਿ ‘‘ਪਞ੍ਞਤ੍ਤਾ’’ਤਿ ਏਕਵਚਨਤ੍ਤਾ.

ਦੀਘਾਵੁਵਤ੍ਥੁਕਥਾਵਣ੍ਣਨਾ

੪੫੮. ‘‘ਭੂਤਪੁਬ੍ਬਂ, ਭਿਕ੍ਖਵੇ, ਬਾਰਾਣਸਿਯਂ ਬ੍ਰਹ੍ਮਦਤ੍ਤੋ’’ਤਿ ਲਿਖਨ੍ਤਿ. ਪੁਰਾਣਪੋਤ੍ਥਕੇਸੁ ‘‘ਬਾਰਾਣਸਿਯ’’ਨ੍ਤਿ ਨਤ੍ਥਿ, ‘‘ਨਤ੍ਥਿਭਾਵੋਵ ਸੁਨ੍ਦਰੋ’’ਤਿ ਵਦਨ੍ਤਿ.

ਪਾਲਿਲੇਯ੍ਯਕਗਮਨਕਥਾਵਣ੍ਣਨਾ

੪੬੭. ਰਕ੍ਖਿਤਵਨਸਣ੍ਡੇਤਿ ਸਙ੍ਗੀਤਿਤ੍ਥੇਰੇਹਿ ਸੁਵਿਞ੍ਞੇਯ੍ਯਂ ਕਤ੍ਵਾ ਵੁਤ੍ਤਂ. ‘‘ਪਾਲਿਲੇਯ੍ਯੋਤਿ ਗਾਮੋ, ਤਸ੍ਸ ਵਸੇਨਾ’’ਤਿਪਿ ਵਦਨ੍ਤਿ, ਤਂ ਧਮ੍ਮਪਦਟ੍ਠਕਥਾਯ ਨ ਵਿਰੁਜ੍ਝਤਿ.

ਅਟ੍ਠਾਰਸਵਤ੍ਥੁਕਥਾਵਣ੍ਣਨਾ

੪੭੩. ਨ ਤ੍ਵੇਵ…ਪੇ… ਪਟਿਬਾਹਿਤਬ੍ਬਨ੍ਤਿ ਵਦਾਮੀਤਿ ਏਤ੍ਥ ਸੇਨਾਸਨਾਰਹਸ੍ਸ ਯੋ ਸੇਨਾਸਨਂ ਪਟਿਬਾਹਤਿ, ਤਸ੍ਸੇਵ ਆਪਤ੍ਤਿ ਦੁਕ੍ਕਟਸ੍ਸ. ‘‘ਕਲਹਕਾਰਕਾਦੀਨਮੇਤ੍ਥ ਓਕਾਸੋ ਨਤ੍ਥੀਤਿਆਦਿਕਂ ਸਙ੍ਘਸ੍ਸ ਕਤਿਕਂ ਵਤ੍ਵਾ ਤਂ ਨ ਪਞ੍ਞਾਪੇਨ੍ਤਸ੍ਸ ਵਾ ‘ਅਹਂ ਬੁਦ੍ਧੋ’ਤਿ ਪਸਯ੍ਹ ਅਤ੍ਤਨਾ ਅਤ੍ਤਨੋ ਪਞ੍ਞਾਪੇਤ੍ਵਾ ਗਣ੍ਹਨ੍ਤਂ ‘ਯੁਤ੍ਤਿਯਾ ਗਣ੍ਹਥਾ’ਤਿ ਵਤ੍ਵਾ ਵਾਰੇਨ੍ਤਸ੍ਸ ਵਾ ਦੋਸੋ ਨਤ੍ਥਿ. ਇਧ ਕਲਹਵੂਪਸਮਨਤ੍ਥਂ ਆਗਤਾਨਂ ਕੋਸਮ੍ਬਿਕਾਨਮ੍ਪਿ ‘ਯਥਾਵੁਡ੍ਢ’ਨ੍ਤਿ ਅਵਤ੍ਵਾ ‘ਵਿਵਿਤ੍ਤੇ ਅਸਤਿ ਵਿਵਿਤ੍ਤਂ ਕਤ੍ਵਾਪਿ ਦਾਤਬ੍ਬ’ਨ੍ਤਿ ਵੁਤ੍ਤਤ੍ਤਾ ਵਿਵਿਤ੍ਤਂ ਕਤ੍ਵਾ ਦੇਨ੍ਤਂ ਪਟਿਬਾਹੇਨ੍ਤਸ੍ਸੇਵ ਆਪਤ੍ਤੀਤਿ ਕਿਰ ਅਯਮਤ੍ਥੋ ਪਾਰਿਵਾਸਿਕਾਦੀਨਂ ਵਿਹਾਰਪਰਿਯਨ੍ਤਦਾਪਨੇਨ ਸਾਧਿਤਬ੍ਬੋ’’ਤਿ ਲਿਖਿਤਂ.

ਸਙ੍ਘਸਾਮਗ੍ਗੀਕਥਾਵਣ੍ਣਨਾ

੪੭੫. ‘‘ਅਥ ਖੋ ਤੇ ਉਕ੍ਖਿਤ੍ਤਾਨੁਵਤ੍ਤਕਾ ਭਿਕ੍ਖੂ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਓਸਾਰੇਤ੍ਵਾ ਯੇਨ ਉਕ੍ਖੇਪਕਾ ਭਿਕ੍ਖੂ…ਪੇ… ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਮਾ’’ਤਿ ਵਚਨਂ ਦੁਵਿਞ੍ਞੇਯ੍ਯਵਿਨਿਚ੍ਛਯਂ ਵਿਨਯਲਕ੍ਖਣਕੁਸਲਸ੍ਸ. ਵਿਜ੍ਜਮਾਨੇ ਹਿ ਕਾਰਕਸਙ੍ਘੇ ਇਤਰੋ ਸਙ੍ਘੋ ਓਸਾਰਿਤੁਂ ਨ ਲਭਤਿ. ਓਸਾਰੇਨ੍ਤੋ ਚੇ, ਤੇ ਭਿਕ੍ਖੂ ਕਾਰਕਸਙ੍ਘੇਨ ਸਮਾਨਲਦ੍ਧਿਕਭਾਵਂ ਪਤ੍ਤਤ੍ਤਾ ਤੇਨ ਸਮਾਨਸਂਵਾਸਕਾ ਹੋਨ੍ਤਿ, ਤਤੋ ਉਕ੍ਖੇਪਕਾਨਂ ਛਨ੍ਦਂ ਅਗ੍ਗਹੇਤ੍ਵਾ ਓਸਾਰੇਨ੍ਤਾਨਂ ਕਮ੍ਮਂ ਕੁਪ੍ਪਤਿ, ਤਸ੍ਮਾ ‘‘ਤੇਨ ਹਿ, ਭਿਕ੍ਖਵੇ, ਤਂ ਭਿਕ੍ਖੁਂ ਓਸਾਰੇਥਾ’’ਤਿ (ਮਹਾਵ. ੪੭੪) ਭਗਵਤੋ ਵਚਨੇਨ ਉਕ੍ਖਿਤ੍ਤਾਨੁਵਤ੍ਤਕਾ ਓਸਾਰੇਸੁਂ, ਉਦਾਹੁ ਨਿਸ੍ਸੀਮਂ ਗਨ੍ਤ੍ਵਾ, ਉਦਾਹੁ ਇਤਰੇਸਂ ਛਨ੍ਦਂ ਗਹੇਤ੍ਵਾ ਓਸਾਰੇਸੁਂ, ਨਨੁ ਏਤੇਸਮਞ੍ਞਤਰੇਨੇਤ੍ਥ ਭਵਿਤਬ੍ਬਂ, ਨ ਚ ਪਨੇਤਂ ਸਬ੍ਬਗਣ੍ਠਿਪਦੇਸੁ ਵਿਚਾਰਿਤਂ. ਅਯਂ ਪਨੇਤ੍ਥ ਤਕ੍ਕੋ –

‘‘ਯਸ੍ਮਿਂ ਵਤ੍ਥੁਸ੍ਮਿਂ ਸਙ੍ਘੇਨ, ਕਤਕਮ੍ਮਸ੍ਸ ਭਿਕ੍ਖੁਨੋ;

ਸਤਿ ਤਸ੍ਮਿਂ ਨ ਅਞ੍ਞਸ੍ਸ, ਪਟਿਪ੍ਪਸ੍ਸਮ੍ਭਨਂ ਖਮਂ.

‘‘ਵਿਰਮਨ੍ਤੇ ਤਤੋ ਦੋਸੋ, ਅਪਿ ਸਙ੍ਘੋ ਅਕਾਰਕੋ;

ਓਸਾਰੇਤੁਂ ਅਲਂ ਯਸ੍ਮਾ, ਕਾਰਕੋ ਅਨੁਲੋਮਿਕੋ’’ਤਿ.

੪੭੭. ‘‘ਅਟ੍ਠ ਦੂਤਙ੍ਗਾਨਿ ਨਾਮ ਸੋਤਾ ਚ ਹੋਤਿ, ਸਾਵੇਤਾ ਚ ਉਗ੍ਗਹੇਤਾ ਚ ਧਾਰੇਤਾ ਚ ਵਿਞ੍ਞਾਤਾ ਚ ਵਿਞ੍ਞਾਪੇਤਾ ਚ ਕੁਸਲੋ ਚ ਸਹਿਤਾਸਹਿਤਦਸ੍ਸਨੋ ਚ ਅਕਲਹਕਾਰਕੋ ਚਾਤਿ ਏਤਾਨੀ’’ਤਿ ਵੁਤ੍ਤਂ.

ਕੋਸਮ੍ਬਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.

ਮਹਾਵਗ੍ਗਸ੍ਸ ਲੀਨਤ੍ਥਪਕਾਸਨਾ ਨਿਟ੍ਠਿਤਾ.

ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ