੬. ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

੫੧੫. ਪਰਿਕ੍ਖਾਰਾਨਨ੍ਤਿ ਉਪਯੋਗਤ੍ਥੇ ਸਾਮਿਵਚਨਂ. ਏਕਸਾਟਕਨ੍ਤਿ ਭਾਵਨਪੁਂਸਕਂ, ‘‘ਅਞ੍ਞਾਤਕੋ ਮੋਘਪੁਰਿਸਾ’’ਤਿ ਵਚਨੇਨ ਪਵਾਰਿਤੋਪਿ ਅਦਾਤੁਕਾਮੋ ਅਞ੍ਞਾਤਕੋ ਅਪ੍ਪਵਾਰਿਤਟ੍ਠਾਨੇ ਤਿਟ੍ਠਤੀਤਿ ਦੀਪਿਤਂ ਹੋਤਿ. ਅਞ੍ਞਥਾ ‘‘ਅਨਾਪਤ੍ਤਿ ਪਵਾਰਿਤਾਨ’’ਨ੍ਤਿ ਇਮਿਨਾ ਵਿਰੁਜ੍ਝਤਿ.

੫੧੭. ਨੇਵ ਤਾਵ ਵਿਞ੍ਞਾਪੇਤਬ੍ਬਂ, ਨ ਭਞ੍ਜਿਤਬ੍ਬਨ੍ਤਿ ਅਨਚ੍ਛਿਨ੍ਨਾਨਂ ਚੀਵਰਾਨਂ ਅਤ੍ਤਨੋ ਸਨ੍ਤਕਾਨਂ ਅਤ੍ਥਿਤਾਯ, ਤਤ੍ਥ ਪਚ੍ਚਾਸਾਸਬ੍ਭਾਵਤੋ ਚ. ਪਚ੍ਚਾਸਾ ਕਿਤ੍ਤਕਂ ਕਾਲਂ ਰਕ੍ਖਤੀਤਿ? ਯਾਵ ਗਾਮਨ੍ਤਰਾ, ਯਾਵ ਅਦ੍ਧਯੋਜਨਾਤਿ ਏਕੇ. ਯਾਵ ਦਸ੍ਸਨਸਵਨੂਪਚਾਰਾਤਿ ਏਕੇ. ਯਾਵ ਅਞ੍ਞੇ ਨ ਪਸ੍ਸਨ੍ਤੀਤਿ ਏਕੇ. ਯਾਵ ਪਚ੍ਚਾਸਾ ਛਿਜ੍ਜਤੀਤਿ ਏਕੇ. ਯਾਵ ਸਾਖਾਪਲਾਸਪਰਿਯੇਸਨਭਞ੍ਜਨਸਜ੍ਜਨਕਾਲਪਰਿਚ੍ਛੇਦਾਤਿ ਏਕੇ. ਇਦਂ ਸਬ੍ਬਂ ਯਥਾਸਮ੍ਭਵਂ ਯੁਜ੍ਜਤਿ. ਕਥਂ ਪਞ੍ਞਾਯਤੀਤਿ ਚੇ? ‘‘ਸਚੇ ਪਨ ਏਤੇਸਂ ਵੁਤ੍ਤਪ੍ਪਕਾਰਾਨਂ ਗਿਹਿਵਤ੍ਥਾਦੀਨਂ ਭਿਸਿਛਵਿਪਰਿਯਨ੍ਤਾਨਂ ਕਿਞ੍ਚਿ ਨ ਲਬ੍ਭਤਿ, ਤੇਨ ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਆਗਨ੍ਤਬ੍ਬ’’ਨ੍ਤਿ ਅਟ੍ਠਕਥਾਵਚਨਤੋ.

ਨ ਤਾਵ ਥੇਰਾਨਂ ਦਾਤਬ੍ਬਾਨੀਤਿ ਨ ਤਾਵ ਅਤ੍ਤਨੋ ਰੁਚਿਯਾ ਦਾਤਬ੍ਬਾਨਿ, ਯਦਾ ਥੇਰਾ ‘‘ਦੇਥਾਵੁਸੋ’’ਤਿ ਵਦਨ੍ਤਿ, ਤਦਾ ਦਾਤਬ੍ਬਾਨਿ. ‘‘ਏਵਂ ਸਤਿ ਦਹਰਾਪਿ ਅਚ੍ਛਿਨ੍ਨਚੀਵਰਟ੍ਠਾਨੇ ਤਿਟ੍ਠਨ੍ਤਿ, ਸਾਖਾਪਲਾਸਂ ਭਞ੍ਜਿਤੁਂ ਵਟ੍ਟਤਿ, ਨ ਅਞ੍ਞਥਾ. ‘ਯੇਹਿ ਕੇਹਿਚਿ ਵਾ ਅਚ੍ਛਿਨ੍ਨਂ ਹੋਤੀ’ਤਿ ਹਿ ਵੁਤ੍ਤ’’ਨ੍ਤਿ ਵੁਤ੍ਤਂ. ਆਚਰਿਯੋ ਪਨ ਏਵਂ ਵਦਤਿ ‘‘ਅਤ੍ਤਨੋ ਰੁਚਿਯਾਪਿ ਦਾਤੁਂ ਲਭਨ੍ਤੀ’’ਤਿ. ਤਥਾ ਹਿ ਅਟ੍ਠਕਥਾਯਂ ‘‘ਪਰਿਭੋਗਜਿਣ੍ਣਂ ਵਾ’ਤਿ ਏਤ੍ਥ ਚ ‘ਅਚ੍ਛਿਨ੍ਨਚੀਵਰਾਨਂ ਆਚਰਿਯੁਪਜ੍ਝਾਯਾਦੀਨਂ ਅਤ੍ਤਨਾ ਤਿਣਪਣ੍ਣੇਹਿ ਪਟਿਚ੍ਛਾਦੇਤ੍ਵਾ ਦਿਨ੍ਨਚੀਵਰਮ੍ਪਿ ਸਙ੍ਗਹਂ ਗਚ੍ਛਤੀ’ਤਿ ਵਤ੍ਤੁਂ ਯੁਜ੍ਜਤੀ’’ਤਿ ਵੁਤ੍ਤਂ. ਅਥਾਪਿ ਸਿਯਾ ਆਚਰਿਯਾਦੀਹਿ ‘‘ਆਹਰਾਵੁਸੋ’’ਤਿ ਵੁਤ੍ਤੇਯੇਵ, ਨਾਵੁਤ੍ਤੇਤਿ, ਨ, ‘‘ਕੇਹਿਚਿ ਵਾ ਅਚ੍ਛਿਨ੍ਨ’’ਨ੍ਤਿ ਏਤ੍ਥ ਵੁਤ੍ਤਲੇਸਤੋ ਦੁਤਿਯਲੇਸਸ੍ਸ ਅਵਿਸੇਸਭਾਵਪ੍ਪਸਙ੍ਗਤੋਤਿ. ਅਥ ਕਿਮਤ੍ਥਂ ‘‘ਨ ਤਾਵ ਥੇਰਾਨਂ ਦਾਤਬ੍ਬਾਨੀ’’ਤਿ ਵੁਤ੍ਤਨ੍ਤਿ ਚੇ? ਯਾਵ ਥੇਰਾਨਂ ਅਤ੍ਥਾਯ ਸਾਖਾਪਲਾਸਾਨਿ ਭਞ੍ਜਤਿ, ਤਾਵ ਨ ਦਾਤਬ੍ਬਾਨਿ, ਤਤੋ ਤਾਨਿ ਥੇਰੁਦ੍ਦਿਸ੍ਸਕਾਨਿ ਸਾਖਾਪਲਾਸਾਨਿ ਸਯਂ ਪਰਿਦਹਿਤ੍ਵਾ ਵਿਨਾਪਿ ਥੇਰਾਣਤ੍ਤਿਯਾ ਅਤ੍ਤਨੋ ਰੁਚਿਯਾ ਦਾਤਬ੍ਬਾਨਿ, ਭੂਤਗਾਮਪਾਤਬ੍ਯਤਾਯ ਪਾਚਿਤ੍ਤਿਯਂ ਨ ਹੋਤਿ ਸਤ੍ਥੁਨਾਪਿ ਅਨੁਞ੍ਞਾਤਤ੍ਤਾ. ‘‘ਤਿਣੇਨ ਵਾ ਪਣ੍ਣੇਨ ਵਾ’’ਤਿ ਹਿ ਵੁਤ੍ਤਂ, ਤਂ ਕਪ੍ਪਿਯਮੇਵ ਸਨ੍ਧਾਯ ਵੁਤ੍ਤਨ੍ਤਿ ਚੇ? ਨ, ‘‘ਤਦਲਾਭੇ ਨ ਤ੍ਵੇਵ…ਪੇ… ਦੁਕ੍ਕਟਸ੍ਸਾ’’ਤਿ ਵਚਨਵਿਰੋਧਤੋ. ਏਤ੍ਥਾਹ – ਦੁਕ੍ਕਟਭਯਾ ਪਾਚਿਤ੍ਤਿਯਵਤ੍ਥੁ ਚੇ ਅਤਿਕ੍ਕਮਿਤਬ੍ਬਂ, ਤਦਲਾਭੇ ਥੁਲ੍ਲਚ੍ਚਯਵਤ੍ਥੁ ਸਙ੍ਘਿਕਂ, ਤਦਲਾਭੇ ਪਾਰਾਜਿਕਵਤ੍ਥੁਪਿ ਅਤਿਕ੍ਕਮਿਤਬ੍ਬਂ ਸਿਯਾਤਿ? ਨ, ਪਾਰਾਜਿਕਸ੍ਸ ਲੋਕਵਜ੍ਜਤ੍ਤਾ. ਅਪਿਚ ਨ ਸਬ੍ਬਂ ਭੂਤਗਾਮਂ ਪਾਚਿਤ੍ਤਿਯਵਤ੍ਥੁਮੇਵ, ਤਤੋ ਦੁਕ੍ਕਟਾਦਿਵਤ੍ਥੁਪਿ ਅਤ੍ਥਿ, ਅਨਾਪਤ੍ਤਿਵਤ੍ਥੁਪਿ ਕਾਲੋਦਿਸਕਂ, ਤਸ੍ਮਾ ਇਦਂ ਤਦਾ ਅਨਾਪਤ੍ਤਿਵਤ੍ਥੁਕਨ੍ਤਿ ਵੇਦਿਤਬ੍ਬਂ. ਕਿਤ੍ਤਾਵਤਾ ਭਿਕ੍ਖੁ ਅਚ੍ਛਿਨ੍ਨਚੀਵਰੋ ਨਟ੍ਠਚੀਵਰੋ ਹੋਤੀਤਿ? ਏਤ੍ਤਾਵਤਾ ਨਗ੍ਗੋ ਹੋਤੀਤਿ ਏਕੇ. ਵਿਕਪ੍ਪਨੁਪਗਪਚ੍ਛਿਮਭਾਵੇਨ, ਵਿਕਪ੍ਪਨੁਪਗਪਚ੍ਛਿਮਮਾਦਿਂ ਕਤ੍ਵਾ ਵਿਞ੍ਞਾਪੇਨ੍ਤਸ੍ਸ ਆਪਤ੍ਤੀਤਿ ਏਕੇ. ਨਿਵਾਸਨਪਾਰੁਪਨੁਪਗਾਭਾਵੇਨਾਤਿ ਏਕੇ. ਤਿਚੀਵਰਾਭਾਵੇਨਾਤਿ ਏਕੇ. ਸਨ੍ਤਰੁਤ੍ਤਰਪਰਮਾਭਾਵੇਨਾਤਿ ਏਕੇ. ਅਯਂ ਏਕੇਵਾਦੋ ਯੁਤ੍ਤੋ ‘‘ਸਨ੍ਤਰੁਤ੍ਤਰਪਰਮਂ ਤਤੋ ਚੀਵਰਂ ਸਾਦਿਤਬ੍ਬ’’ਨ੍ਤਿ ਹਿ ਵਚਨਤੋ, ਤਸ੍ਮਾ ਸਨ੍ਤਰੁਤ੍ਤਰੇ ਸਤਿ ਵਿਕਪ੍ਪਨੁਪਗਪਚ੍ਛਿਮਂ ਵਿਞ੍ਞਾਪੇਨ੍ਤਸ੍ਸ ਪਟਿਲਾਭੇਨ ਨਿਸ੍ਸਗ੍ਗਿਯਂ. ਯਦਿ ਏਵਂ ‘‘ਵਿਞ੍ਞਾਪੇਤ੍ਵਾ ਪਟਿਲਭੇਯ੍ਯ ਨਿਸ੍ਸਗ੍ਗਿਯ’’ਨ੍ਤਿ ਸਿਕ੍ਖਾਪਦੇਨ ਭਵਿਤਬ੍ਬਨ੍ਤਿ ਚੇ? ਤਨ੍ਨ, ਤਦਤ੍ਥਸਿਦ੍ਧਿਤੋ ਨਾਨਤ੍ਥਤ੍ਤਾ ਧਾਤੂਨਂ. ਕਿਂ ਵੁਤ੍ਤਂ ਹੋਤਿ? ਯਥਾ ਹਿ ‘‘ਤਿਕ੍ਖਤ੍ਤੁਂ ਮੇਥੁਨਂ ਧਮ੍ਮਂ ਅਭਿਵਿਞ੍ਞਾਪੇਸੀ’’ਤਿ (ਪਾਰਾ. ੩੬) ਵੁਤ੍ਤੇ ਪਵਤ੍ਤੇਸੀਤਿ ਅਤ੍ਥੋ, ਤਥਾ ਇਧਾਪਿ ‘‘ਚੀਵਰਂ ਵਿਞ੍ਞਾਪੇਯ੍ਯਾ’’ਤਿ ਵਿਞ੍ਞਤ੍ਤਿਯਾ ਪਵਤ੍ਤੇਯ੍ਯ ਉਪ੍ਪਾਦੇਯ੍ਯਾਤਿ ਅਤ੍ਥੋ.

ਤੇਨ ਨਿਵਤ੍ਥੋਤਿ ਤਂਨਿਵਤ੍ਥੋ. ਅਞ੍ਞਸ੍ਸ ਅਲਾਭੇਨ ਤਮੇਵ ਪਰਿਭੁਞ੍ਜਤੋ ਜਿਰਤਿ, ਨ ਲੇਸੇਨ. ਅਤ੍ਤਨਾਤਿ ਸਯਮੇਵ ਵਤ੍ਤੁਂ ਯੁਜ੍ਜਤਿ, ਤਸ੍ਮਾ ਅਯੁਤ੍ਤਪਰਿਭੋਗੇਨ ਅਪਰਿਭੁਞ੍ਜਿਤ੍ਵਾ ਯੁਤ੍ਤਪਰਿਭੋਗਵਸੇਨ ਪਰਿਭੁਞ੍ਜਤੋ ਜਿਣ੍ਣਂ ਪਰਿਭੋਗਜਿਣ੍ਣਂ ਨਾਮ. ਤਸ੍ਸ ਸਭਾਗਾਨਂ ਅਚ੍ਛਿਨ੍ਨਕਾਲੇ ਦਾਨਮ੍ਪਿ ਯੁਤ੍ਤਪਰਿਭੋਗੇ ਏਵ ਸਙ੍ਗਹਂ ਗਚ੍ਛਤੀਤਿ ਅਧਿਪ੍ਪਾਯੋ. ‘‘ਇਮੇ ਕਿਰ ਦ੍ਵੇ ਲੇਸਾ ਅਟ੍ਠਕਥਾਯੋ, ਵਾਚੇਨ੍ਤਾਨਂ ਆਚਰਿਯਾਨਂ ਮਤਨ੍ਤਿ ਧਮ੍ਮਸਿਰਿਤ੍ਥੇਰੋ ਆਹਾ’’ਤਿ ਵੁਤ੍ਤਂ.

੫੨੧. ਨਿਸੀਦਿਤੁਂ ਵਾ ਨਿਪਜ੍ਜਿਤੁਂ ਵਾ ਨ ਲਭਤੀਤਿ ਯਥਾਸੁਖਂ ਨ ਲਭਤੀਤਿ ਅਧਿਪ੍ਪਾਯੋ. ‘‘ਅਞ੍ਞਸ੍ਸਤ੍ਥਾਯਾ’’ਤਿ ਏਤ੍ਥਾਪਿ ‘‘ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਅਨੁਵਤ੍ਤਤਿ ਏਵ. ਅਤ੍ਥਾਯ ਕਸ੍ਸ? ਤਸ੍ਸੇਵ ਅਞ੍ਞਸ੍ਸ. ਯਥਾ ਅਞ੍ਞਾਤਕੇ ਤਿਕਪਾਚਿਤ੍ਤਿਯਂ, ਤਥਾ ਅਪ੍ਪਵਾਰਿਤੇਪੀਤਿ ਦਸ੍ਸਨਤ੍ਥਂ ‘‘ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਵੁਤ੍ਤਂ. ਅਞ੍ਞਥਾ ‘‘ਞਾਤਕੇ ਞਾਤਕਸਞ੍ਞੀ’’ਤਿ ਇਮਿਨਾ ਸਿਦ੍ਧਤ੍ਤਾ ਨ ਨਿਚ੍ਚਂ ਸੇਸਂ ਆਪਜ੍ਜਤਿ. ਅਪਿਚੇਤ੍ਥ ਅਞ੍ਞਾਤਕਗ੍ਗਹਣੇਨ ਅਪ੍ਪਵਾਰਿਤਗ੍ਗਹਣਂ ਹੋਤਿ, ਅਪ੍ਪਵਾਰਿਤਗ੍ਗਹਣੇਨ ਅਞ੍ਞਾਤਕਗ੍ਗਹਣਂ, ਅਞ੍ਞਾਤਕਾ ਹਿ ਅਪ੍ਪਵਾਰਿਤਾ ਹੋਨ੍ਤਿ. ਤਥਾ ਞਾਤਕਗ੍ਗਹਣੇਨ ਪਵਾਰਿਤਗ੍ਗਹਣਂ ਹੋਤਿ, ਕਤ੍ਥਚਿ ਨ ਹੋਤਿ. ਨ ਪਵਾਰਿਤਗ੍ਗਹਣੇਨ ਞਾਤਕਗ੍ਗਹਣਂ ਹੋਤੀਤਿ ਇਮਸ੍ਸ ਅਤ੍ਥਵਿਸੇਸਸ੍ਸ ਦਸ੍ਸਨਤ੍ਥਂ ‘‘ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਵੁਤ੍ਤਂ. ਤਥਾ ਹਿ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਅਪ੍ਪਵਾਰਿਤਾਯ ਚ ਚੀਵਰਂ ਅਞ੍ਞਤ੍ਰ ਪਾਰਿਵਤ੍ਤਕਾ ਪਟਿਗ੍ਗਣ੍ਹਨ੍ਤਸ੍ਸ ਆਪਤ੍ਤਿ. ਞਾਤਿਕਾਯ ਪਨ ਪਵਾਰਿਤਾਯ ਚ ਵਿਸ੍ਸਾਸਂ ਗਣ੍ਹਾਤਿ, ਅਨਾਪਤ੍ਤਿ. ਤਥਾ ਪੁਰਾਣਚੀਵਰਂ ਞਾਤਿਕਾਯ ਅਨਾਪਤ੍ਤਿ, ਪਵਾਰਿਤਾਯ ਪਨ ਤਿਕਪਾਚਿਤ੍ਤਿਯਮੇਵ. ਞਾਤਕਾਨਞ੍ਚ ਏਕਚ੍ਚਾਨਂ ਪੁਰਾਣਚੀਵਰਂ ਨਾਮ ਦਾਤੁਂ ਵਟ੍ਟਤਿ, ਨ ਪਵਾਰਿਤਾਨਂ. ਤਿਕਚ੍ਛੇਦੋ ਚ ਮਾਤਿਕਾਪਦੇਨੇਵ ਹੋਤਿ, ਨ ਅਞ੍ਞੇਨ. ਤਤ੍ਥਾਪਿ ਏਕੇਨੇਵ, ਨ ਦੁਤਿਯਾਦੀਹੀਤਿ ਅਯਂ ਵਿਨਯੇ ਧਮ੍ਮਤਾ ਵੇਦਿਤਬ੍ਬਾ.

ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.