੭. ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ

੫੨੨-੪. ਪਗ੍ਗਾਹਿਕਸਾਲਂ ਵਾਤਿ ਦੁਸ੍ਸਪਸਾਰਂ ਵਾ. ਹਤ੍ਥੇਨ ਪਗ੍ਗਹੇਤ੍ਵਾ ਠਤ੍ਵਾ ਸਾਲਾਯਂ ਪਸਾਰੇਤਬ੍ਬਦੁਸ੍ਸਂ ਪਸਾਰੇਨ੍ਤੀਤਿ ਚੋਦਨਾ. ਤਿਚੀਵਰਿਕੇਨੇਵਾਤਿ ਵਿਨਯਤਿਚੀਵਰਿਕੇਨ. ਸੋ ਹਿ ਅਧਿਟ੍ਠਹਿਤ੍ਵਾ ਠਪਿਤਪਰਿਕ੍ਖਾਰਚੋਲ਼ਾਦੀਸੁ ਸਨ੍ਤੇਸੁਪਿ ਤਿਚੀਵਰੇ ਅਚ੍ਛਿਨ੍ਨੇ ਸਨ੍ਤਰੁਤ੍ਤਰਪਰਮਂ ਵਿਞ੍ਞਾਪੇਤ੍ਵਾ ਗਹੇਤੁਂ ਲਭਤਿ. ਅਞ੍ਞਥਾਪੀਤਿ ‘‘ਪਮਾਣਿਕਂ ਤਿਚੀਵਰਂ ਪਰਿਕ੍ਖਾਰਚੋਲ਼ਵਸੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਤੋ ਤਸ੍ਮਿਂ ਨਟ੍ਠੇ ਬਹੂਨਿਪਿ ਗਹੇਤੁਂ ਲਭਤਿ, ਨ ਸਨ੍ਤਰੁਤ੍ਤਰਪਰਮ’’ਨ੍ਤਿ ਚ, ਤਸ੍ਮਾ ਤਂ ਵਿਭਾਗਨ੍ਤਿ ‘‘ਤਿਚੀਵਰਿਕਸ੍ਸ ਤਂ ਵਿਭਾਗਨ੍ਤਿ ਅਤ੍ਥੋ, ਨ ਪਰਿਕ੍ਖਾਰਚੋਲ਼ਿਕਸ੍ਸਾ’’ਤਿ ਚ ਕੇਚਿ ਵਦਨ੍ਤਿ. ਆਚਰਿਯੋ ਪਨ ‘‘ਅਞ੍ਞੇਨਾਤਿ ਅਤਿਚੀਵਰਿਕੇਨ, ਅਞ੍ਞਥਾਤਿ ਇਤੋ ਵੁਤ੍ਤਗ੍ਗਹਣਪਰਿਚ੍ਛੇਦਤੋ ਅਞ੍ਞੇਨਾ’’ਤਿ ਏਤ੍ਤਕਮੇਵ ਵਦਤਿ. ਅਞ੍ਞਥਾਤਿ ਪਨ ਸਚੇ ਤੀਣਿਪਿ ਨਟ੍ਠਾਨਿ, ਸਨ੍ਤਰੁਤ੍ਤਰਪਰਮਂ ਗਣ੍ਹਿਤਬ੍ਬਂ, ਸਚੇ ਦ੍ਵੇ ਵਾ ਏਕਂ ਵਾ ਨਟ੍ਠਂ, ਤੇਨ ‘‘ਅਞ੍ਞਥਾਪੀ’’ਤਿ ਦਸ੍ਸਨਤ੍ਥਂ ਵੁਤ੍ਤਨ੍ਤਿ ਏਕੇ. ਗਣ੍ਠਿਪਦੇਸੁ ਵਿਚਾਰਣਾ ਏਵ ਨਤ੍ਥਿ, ਤਸ੍ਮਾ ਉਪਪਰਿਕ੍ਖਿਤ੍ਵਾ ਗਹੇਤਬ੍ਬਂ. ਪਕਤਿਯਾ ਸਨ੍ਤਰੁਤ੍ਤਰੇਨ ਚਰਤਿ, ਸਾਸਙ੍ਕਸਿਕ੍ਖਾਪਦਵਸੇਨ ਵਾ ਤਂਸਮ੍ਮੁਤਿਵਸੇਨ ਵਾ ਤਤਿਯਸ੍ਸ ਅਲਾਭੇਨ ਵਾ.

੫੨੬. ‘‘ਪਮਾਣਮੇਵ ਵਟ੍ਟਤੀ’’ਤਿ ਸਲ੍ਲੇਖਦਸ੍ਸਨਤ੍ਥਂ ਵੁਤ੍ਤਂ. ਤਂ ਮਿਚ੍ਛਾ ਗਹੇਤ੍ਵਾ ਞਾਤਕਾਦਿਟ੍ਠਾਨੇ ਤਦੁਤ੍ਤਰਿ ਗਣ੍ਹਨ੍ਤਸ੍ਸ ਆਪਤ੍ਤੀਤਿ ਚੇ? ਤਂ ਪਾਲ਼ਿਯਾ ਨ ਸਮੇਤਿ, ‘‘ਅਨਾਪਤ੍ਤਿ ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਹਿ ਪਾਲ਼ਿ. ਏਤ੍ਥ ਚ ਪਵਾਰਿਤਾ ਨਾਮ ਅਚ੍ਛਿਨ੍ਨਕਾਲਤੋ ਪੁਬ੍ਬੇ ਏਵ ਪਵਾਰਿਤਾ, ਨ ਅਚ੍ਛਿਨ੍ਨਕਾਲੇ. ‘‘ਅਭਿਹਟ੍ਠੁਂ ਪਵਾਰੇਯ੍ਯਾ’’ਤਿ ਹਿ ਵੁਤ੍ਤਂ, ਤਸ੍ਮਾ ਯੋ ਅਚ੍ਛਿਨ੍ਨਕਾਲਸ੍ਸਤ੍ਥਾਯ ਪਵਾਰੇਤਿ, ਉਭੋਪਿ ਅਪ੍ਪਵਾਰਿਤਾ ਏਵਾਤਿ ਵੇਦਿਤਬ੍ਬਾ. ਤੇ ਹਿ ਅਚ੍ਛਿਨ੍ਨਕਾਰਣਾ ਨਟ੍ਠਕਾਰਣਾਵ ਦੇਨ੍ਤਿ ਨਾਮ. ਅਪਿਚ ਯਥਾ ਪਿਟ੍ਠਿਸਮਯੇ ਸਤੁਪ੍ਪਾਦਂ ਕਤ੍ਵਾ ਞਾਤਕਪਵਾਰਿਤਟ੍ਠਾਨਤੋ ਵਸ੍ਸਿਕਸਾਟਿਕਂ ਨਿਪ੍ਫਾਦੇਨ੍ਤਸ੍ਸ ਤੇਨ ਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ, ਤਥਾ ਇਧਾਪਿ ਞਾਤਕਪਵਾਰਿਤਟ੍ਠਾਨੇਪਿ ਅਚ੍ਛਿਨ੍ਨਨਟ੍ਠਕਾਰਣਾ ਨ ਵਟ੍ਟਤਿ, ਤਸ੍ਮਾ ‘‘ਅਟ੍ਠਕਥਾਸੁ ਪਮਾਣਮੇਵ ਵਟ੍ਟਤੀ’ਤਿ ਵੁਤ੍ਤਵਚਨਮੇਵ ਪਮਾਣ’’ਨ੍ਤਿ ਧਮ੍ਮਸਿਰਿਤ੍ਥੇਰੋ ਆਹ, ਤਂ ਅਯੁਤ੍ਤਂ, ਕਸ੍ਮਾ? ਯਸ੍ਮਾ ਇਦਂ ਸਿਕ੍ਖਾਪਦਂ ਤਦੁਤ੍ਤਰਿ ਵਿਞ੍ਞਾਪੇਨ੍ਤਸ੍ਸ ਪਞ੍ਞਤ੍ਤਂ, ਤਸ੍ਮਿਞ੍ਚ ‘‘ਅਞ੍ਞਾਤਕੋ ਗਹਪਤਿ ਵਾ ਗਹਪਤਾਨੀ ਵਾ’’ਤਿ ਮਾਤਿਕਾਯ ਪਾਲ਼ਿ, ਵਿਭਙ੍ਗੇ ਚ ‘‘ਅਞ੍ਞਾਤਕੋ ਨਾਮ ਮਾਤਿਤੋ ਵਾ…ਪੇ… ਅਸਮ੍ਬਦ੍ਧੋ’’ਤਿ ਪਾਲ਼ਿ, ਅਨਾਪਤ੍ਤਿਵਾਰੇ ਚ ‘‘ਞਾਤਕਾਨਂ ਪਵਾਰਿਤਾਨ’’ਨ੍ਤਿ ਪਾਲ਼ਿ, ਤਸ੍ਮਾ ਤਿਵਿਧਾਯਪਿ ਪਾਲ਼ਿਯਾ ਨ ਸਮੇਤੀਤਿ ਅਯੁਤ੍ਤਮੇਵ, ਤਸ੍ਮਾ ਕੇਵਲਂ ਸਲ੍ਲੇਖਮੇਵ ਸਨ੍ਧਾਯ ਵੁਤ੍ਤਨ੍ਤਿ ਅਪਰੇ. ਉਪਰਿ ਕਾਣਮਾਤਾਸਿਕ੍ਖਾਪਦੇ ਅਟ੍ਠਕਥਾਸੁ ਪਨ ‘‘ਤੇਸਮ੍ਪਿ ਪਾਥੇਯ੍ਯਪਹੇਣਕਤ੍ਥਾਯ ਪਟਿਯਤ੍ਤਤੋ ਪਮਾਣਮੇਵ ਵਟ੍ਟਤੀ’’ਤਿ ਵੁਤ੍ਤਂ, ਨ ਪਨ ‘‘ਪਾਲ਼ਿਯਾ ਨ ਸਮੇਤੀ’’ਤਿ ਵੁਤ੍ਤਂ, ਨ ਤਤ੍ਥ ਚ ਇਧ ਚ ਨਾਨਾਕਰਣਂ ਪਞ੍ਞਾਯਤਿ, ਤਸ੍ਮਾ ਥੇਰਸ੍ਸ ਲਦ੍ਧਿ ਸੁਨ੍ਦਰਾ ਵਿਯ ਮਮ ਖਾਯਤਿ, ਵੀਮਂਸਿਤਬ੍ਬਂ. ਯਸ੍ਮਾ ਪਨਿਦਂ ਸਿਕ੍ਖਾਪਦਂ ਅਞ੍ਞਸ੍ਸਤ੍ਥਾਯ ਵਿਞ੍ਞਾਪਨਵਤ੍ਥੁਸ੍ਮਿਂਯੇਵ ਪਞ੍ਞਤ੍ਤਂ, ਤਸ੍ਮਾ ਇਧ ‘‘ਅਞ੍ਞਸ੍ਸਤ੍ਥਾਯਾ’’ਤਿ ਨ ਵੁਤ੍ਤਂ. ‘‘ਸੇਸਂ ਉਤ੍ਤਾਨਤ੍ਥਮੇਵਾ’’ਤਿ ਪਾਠੋ. ‘‘ਅਞ੍ਞਸ੍ਸਤ੍ਥਾਯਾ’’ਤਿ ਨਿਦਾਨਵਿਰੋਧਤੋ ਨ ਵੁਤ੍ਤਂ. ਤਥਾਪਿ ਅਨਨ੍ਤਰੇ ਵੁਤ੍ਤਨਯੇਨ ਲਬ੍ਭਤੀਤਿ ਆਚਰਿਯੋ. ਏਵਰੂਪੇਸੁ ਗਹਪਤਿਪਟਿਸਂਯੁਤ੍ਤਸਿਕ੍ਖਾਪਦੇਸੁ ਕਿਞ੍ਚਾਪਿ ‘‘ਗਹਪਤਿ ਨਾਮ ਯੋ ਕੋਚਿ ਅਗਾਰਂ ਅਜ੍ਝਾਵਸਤੀ’’ਤਿ ਵੁਤ੍ਤਂ, ਤਥਾਪਿ ਪਞ੍ਚ ਸਹਧਮ੍ਮਿਕੇ ਠਪੇਤ੍ਵਾ ਅਵਸੇਸਾ ਚ ਸਿਕ੍ਖਾਪਚ੍ਚਕ੍ਖਾਤਕੋ ਚ ਤਿਤ੍ਥਿਯੋ ਚ ਵੇਦਿਤਬ੍ਬੋ.

ਤਤੁਤ੍ਤਰਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.