੫. ਚੀਵਰਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ

੫੦੮-੫੧੦. ਅਪਞ੍ਞਤ੍ਤੇ ਸਿਕ੍ਖਾਪਦੇਤਿ ਏਤ੍ਥ ‘‘ਗਣਮ੍ਹਾ ਓਹੀਯਨਸਿਕ੍ਖਾਪਦੇ’’ਤਿ ਲਿਖਿਤਂ. ਅਰਞ੍ਞਵਾਸੀਨਿਸੇਧਨਸਿਕ੍ਖਾਪਦੇ ਅਪਞ੍ਞਤ੍ਤੇਤਿ ਏਕੇ, ‘‘ਤਂ ਨ ਸੁਨ੍ਦਰ’’ਨ੍ਤਿ ਵਦਨ੍ਤਿ. ਵਿਹਤ੍ਥਤਾਯਾਤਿ ਆਯਾਸੇਨ.

੫੧੨. ਉਪਚਾਰੋਤਿ ਦ੍ਵਾਦਸਹਤ੍ਥੋ. ਮਹਾਪਚ੍ਚਰਿਯਂ, ਕੁਰੁਨ੍ਦਿਯਞ੍ਚ ਵੁਤ੍ਤਨ੍ਤਿ ਏਤ੍ਥ ਰਤ੍ਤਿਭਾਗੇ ਧਮ੍ਮਕਥਿਕਸ੍ਸ ਭਿਕ੍ਖੁਨੋ ਬਹੂਸੁ ਚੀਵਰੇਸੁ ਮਹਾਜਨੇਨ ਪਸਾਦਦਾਨਵਸੇਨ ਪਟਿਕ੍ਖਿਤ੍ਤੇਸੁ ਪੁਨਦਿਵਸੇ ‘‘ਉਪਾਸਕਾਨਂ ਪਸਾਦਦਾਨਾਨਿ ਏਤਾਨੀ’’ਤਿ ਸੁਦ੍ਧਚਿਤ੍ਤੇਨ ਗਣ੍ਹਨ੍ਤਸ੍ਸ ਦੋਸੋ ਨਤ੍ਥਿ, ‘‘ਭਿਕ੍ਖੁਨੀਹਿਪਿ ਦਿਨ੍ਨਾਨਿ ਇਧ ਸਨ੍ਤੀ’’ਤਿ ਞਤ੍ਵਾ ਗਣ੍ਹਤੋ ਦੋਸੋ. ਤਂ ਅਚਿਤ੍ਤਕਭਾਵੇਨਾਤਿ ਭਿਕ੍ਖੁਨੀਹਿ ਦਿਨ੍ਨਭਾਵਂ ਞਤ੍ਵਾ ਬਹੂਸੁ ਤਸ੍ਸਾ ਚੀਵਰਸ੍ਸ ਅਜਾਨਨੇਨਾਤਿ ਅਤ੍ਥੋ. ਪਂਸੁਕੂਲਂ ਅਧਿਟ੍ਠਹਿਤ੍ਵਾਤਿ ‘‘ਭਿਕ੍ਖੁਨੀਹਿ ਨੁ ਖੋ ਦਿਨ੍ਨਂ ਸਿਯਾ’’ਤਿ ਅਵਿਕਪ੍ਪੇਤ੍ਵਾ ‘‘ਪਂਸੁਕੂਲਂ ਗਣ੍ਹਾਮੀ’’ਤਿ ਗਣ੍ਹਨ੍ਤਸ੍ਸ ਵਟ੍ਟਤਿ. ਕੁਰੁਨ੍ਦਿਆਦੀਸੁ ਵੁਤ੍ਤੋਪਿ ਅਤ੍ਥੋ ਅਯਮੇਵ, ਏਕਂ, ‘‘ਅਚਿਤ੍ਤਕਭਾਵੇਨਾ’’ਤਿ ਵਚਨੇਨ ‘‘ਯਥਾ ਤਥਾ ਗਣ੍ਹਿਤੁਂ ਵਟ੍ਟਤੀ’’ਤਿ ਉਪ੍ਪਥੋਵ ਪਟਿਸੇਧਿਤੋਤਿ ਅਪਰੇ. ਏਵਂ ਧਮ੍ਮਸਿਰਿਤ੍ਥੇਰੋ ਨ ਵਦਤਿ, ਉਜੁਕਮੇਵ ਵਦਤੀਤਿ ਪਪਞ੍ਚਿਤਂ. ਤਸ੍ਸੇਵ ਵਿਸਯੋ, ਤਸ੍ਸਾਯਂ ਅਧਿਪ੍ਪਾਯੋ – ਯਥਾ ‘‘ਪਂਸੁਕੂਲਂ ਗਣ੍ਹਿਸ੍ਸਤੀਤਿ ਠਪਿਤਂ ਕਾਮਂ ਭਿਕ੍ਖੁਨਿਸਨ੍ਤਕਮ੍ਪਿ ਅਵਿਕਪ੍ਪੇਤ੍ਵਾ ਪਂਸੁਕੂਲਂ ਅਧਿਟ੍ਠਹਿਤ੍ਵਾ ਗਹੇਤੁਂ ਵਟ੍ਟਤੀ’’ਤਿ ਵੁਤ੍ਤਂ, ਤਥਾ ਧਮ੍ਮਕਥਿਕਸ੍ਸ ਭਿਕ੍ਖੁਨਿਯਾ ਦਿਨ੍ਨਮ੍ਪਿ ਅਪਞ੍ਞਾਯਮਾਨਂ ਵਟ੍ਟਤੀਤਿ, ਤਸ੍ਮਾ ਤਂ ਵੁਤ੍ਤਂ ਮਹਾਪਚ੍ਚਰਿਯਂ, ਕੁਰੁਨ੍ਦਿਯਞ੍ਚ ਅਚਿਤ੍ਤਕਭਾਵੇਨ ਨ ਸਮੇਤੀਤਿ. ਪਟਿਕ੍ਖੇਪੋ ਪਨ ਵਿਕਪ੍ਪਗ੍ਗਹਣੇ ਏਵ ਰੁਹਤਿ. ਅਞ੍ਞਥਾ ਪੁਬ੍ਬਾਪਰਂ ਵਿਰੁਜ੍ਝਤੀਤਿ. ਤਂ ਨ ਯੁਤ੍ਤਂ ਪਂਸੁਕੂਲੇਨ ਅਸਮਾਨਤ੍ਤਾ. ਪਂਸੁਕੂਲਭਾਵੇਨ ਸਙ੍ਕਾਰਕੂਟਾਦੀਸੁ ਠਪਿਤਂ ਭਿਕ੍ਖੁਨੀਹਿ, ਨ ਤਂ ਤਸ੍ਸਾ ਸਨ੍ਤਕਂ ਹੁਤ੍ਵਾ ਠਿਤਂ ਹੋਤਿ. ਅਸ੍ਸਾਮਿਕਞ੍ਹਿ ਪਂਸੁਕੂਲਂ ਸਬ੍ਬਸਾਧਾਰਣਞ੍ਚ, ਅਞ੍ਞੋਪਿ ਗਹੇਤੁਂ ਲਭਤਿ. ਇਦਂ ਪੁਬ੍ਬੇਵ ‘‘ਭਿਕ੍ਖੁਨੀਨਂ ਚੀਵਰ’’ਨ੍ਤਿ ਜਾਨਿਤ੍ਵਾਪਿ ਪਂਸੁਕੂਲਿਕੋ ਗਹੇਤੁਂ ਲਭਤਿ ਤਦਾ ਤਸ੍ਸਾ ਅਸਨ੍ਤਕਤ੍ਤਾ. ‘‘ਪਂਸੁਕੂਲਂ ਅਧਿਟ੍ਠਹਿਤ੍ਵਾ’’ਤਿ ਸਲ੍ਲੇਖਕ੍ਕਮਨਿਦਸ੍ਸਨਤ੍ਥਂ ਵੁਤ੍ਤਂ. ਮਂਸਂ ਦਦਨ੍ਤੇਨ ਤਥਾਗਤੇਨ ਸਲ੍ਲੇਖਤੋ ਕਪ੍ਪਿਯਮ੍ਪਿ ਭੁਤ੍ਤਂ ਨਿਸ੍ਸਗ੍ਗਿਯਂ ਚੀਵਰਮਾਹ ਯੋ ਮਂਸਂ ਕਥਨ੍ਤਿ ਸਯਮਾਦਿਸੇਯ੍ਯਾਤਿ.

ਅਚਿਤ੍ਤਕਤ੍ਤਾ ਕਥਂ ਪਂਸੁਕੂਲਂ ਵਟ੍ਟਤੀਤਿ ਚੇ? ਤਾਯ ਤਸ੍ਸ ਅਦਿਨ੍ਨਤ੍ਤਾ, ਭਿਕ੍ਖੁਨਾਪਿ ਤਤੋ ਭਿਕ੍ਖੁਨਿਤੋ ਅਗ੍ਗਹਿਤਤ੍ਤਾ ਚ. ਅਸ੍ਸਾਮਿਕਮ੍ਪਿ ਹਿ ਪਂਸੁਕੂਲਂ ਅਞ੍ਞਿਸ੍ਸਾ ਹਤ੍ਥਤੋ ਗਣ੍ਹਾਤਿ, ਨ ਵਟ੍ਟਤਿ ‘‘ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਪਟਿਗ੍ਗਣ੍ਹੇਯ੍ਯਾ’’ਤਿ ਵੁਤ੍ਤਲਕ੍ਖਣਸਮ੍ਭਵਤੋ. ਅਞ੍ਞਾਤਿਕਾਯ ਸਨ੍ਤਕਂ ਞਾਤਿਕਾਯ ਹਤ੍ਥਤੋ ਗਣ੍ਹਾਤਿ, ਵਟ੍ਟਤੀਤਿ ਏਕੇ. ਯਥਾ ਸਿਕ੍ਖਮਾਨਸਾਮਣੇਰਾਦੀਨਂ ਹਤ੍ਥਤੋ ਪਟਿਗ੍ਗਣ੍ਹਨ੍ਤਸ੍ਸ ਅਨਾਪਤ੍ਤਿ, ਤਥਾ ਕਙ੍ਖਾਵਿਤਰਣਿਯਞ੍ਚ ‘‘ਅਞ੍ਞਾਤਿਕਾਯ ਹਤ੍ਥਤੋ ਗਹਣ’’ਨ੍ਤਿ (ਕਙਖਾ. ਅਟ੍ਠ. ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ) ਅਙ੍ਗਂ ਵੁਤ੍ਤਂ. ਤਥਾ ਞਾਤਿਕਾਯ ਸਨ੍ਤਕਂ ਸਿਕ੍ਖਮਾਨਾਯ, ਸਾਮਣੇਰਿਯਾ, ਉਪਾਸਕਸ੍ਸ, ਉਪਾਸਿਕਾਯ, ਭਿਕ੍ਖੁਸ੍ਸ, ਸਾਮਣੇਰਸ੍ਸ ਸਨ੍ਤਕਂ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਹਤ੍ਥਤੋ ਗਣ੍ਹਨ੍ਤਸ੍ਸ ਚ ਅਨਾਪਤ੍ਤਿ ਏਵਂ ਯਥਾਵੁਤ੍ਤਲਕ੍ਖਣਾਸਮ੍ਭਵਤੋਤਿ ਏਕੇ, ਤੇਨੇਵ ‘‘ਏਕਤੋਉਪਸਮ੍ਪਨ੍ਨਾਯ ਚੀਵਰਂ ਪਟਿਗ੍ਗਣ੍ਹਾਤੀ’ਤਿ ਅਵਤ੍ਵਾ ‘ਹਤ੍ਥਤੋ ਪਟਿਗ੍ਗਣ੍ਹਾਤਿ ਅਞ੍ਞਤ੍ਰ ਪਾਰਿਵਤ੍ਤਕਾ, ਆਪਤ੍ਤਿ ਦੁਕ੍ਕਟਸ੍ਸਾ’ਤਿ (ਪਾਰਾ. ੫੧੩) ਵੁਤ੍ਤਂ, ਤਸ੍ਮਾ ਅਞ੍ਞਾਤਿਕਾਯ ਸਨ੍ਤਕਮ੍ਪਿ ਏਕਤੋਉਪਸਮ੍ਪਨ੍ਨਾਯ ਹਤ੍ਥਤੋ ਪਟਿਗ੍ਗਣ੍ਹਨ੍ਤਸ੍ਸ ਦੁਕ੍ਕਟ’’ਨ੍ਤਿ ਵਦਨ੍ਤਿ, ਉਭੋਪੇਤੇ ਨ ਸਾਰਤੋ ਦਟ੍ਠਬ੍ਬਾ, ਕਾਰਣਂ ਪਰਿਯੇਸਿਤਬ੍ਬਂ.

੫੧੪. ਕੋ ਪਨ ਵਾਦੋ ਪਤ੍ਤਤ੍ਥਵਿਕਾਦੀਸੂਤਿ ਅਨਧਿਟ੍ਠਾਤਬ੍ਬੇਸੁ ਬਹੂਸੁ ਪਟਲੇਸੁ. ਤੇਨੇਵਾਹ ਮਾਤਿਕਾਟ੍ਠਕਥਾਯਂ ‘‘ਪਤ੍ਤਤ੍ਥਵਿਕਾਦਿਮ੍ਹਿ ਅਨਧਿਟ੍ਠਾਤਬ੍ਬਪਰਿਕ੍ਖਾਰੇ’’ਤਿ. ਅਧਿਟ੍ਠਾਨੁਪਗੇਸੁ ਵਾ ਤੇਸਂ ਪਰਿਕ੍ਖਾਰਤ੍ਤਾ ਭਿਸਿਛਵਿਯਾ ਵਿਯ ਅਨਾਪਤ੍ਤਿ. ਕਿਂ ਪਟਪਰਿਸ੍ਸਾਵਨਂ ਪਰਿਕ੍ਖਾਰਂ ਨ ਹੋਤੀਤਿ? ਹੋਤਿ, ਕਿਨ੍ਤੁ ਤਂ ਕਿਰ ਨਿਵਾਸਨਾਦਿਚੀਵਰਸਣ੍ਠਾਨਤ੍ਤਾ ਨ ਵਟ੍ਟਤਿ. ਤਸ੍ਮਾ ਇਧ ਨਿਵਾਸਨਾਦਿਚੀਵਰਸਾਧਨਂ ਵਿਕਪ੍ਪਨੁਪਗਪਚ੍ਛਿਮਂ ਚੀਵਰਂ ਨਾਮ. ਅਨਨ੍ਤਰਾਤੀਤੇ ਨਿਵਾਸਨਪਾਰੁਪਨੁਪਗਮੇਵਾਤਿ ਸਨ੍ਨਿਟ੍ਠਾਨਂ. ਏਵਂ ਸਨ੍ਤੇ ਕਙ੍ਖਾਵਿਤਰਣਿਯਂ (ਕਙ੍ਖਾ. ਅਟ੍ਠ. ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ) ਕਪ੍ਪਨੁਪਗਪਚ੍ਛਿਮਤਾ, ਪਾਰਿਵਤ੍ਤਕਾਭਾਵੋ, ਅਞ੍ਞਾਤਿਕਾਯ ਹਤ੍ਥਤੋ ਗਹਣਨ੍ਤਿ ਤੀਣੇਵ ਅਙ੍ਗਾਨਿ ਅਵਤ੍ਵਾ ਅਪਰਿਕ੍ਖਾਰਤਾਤਿ ਚਤੁਤ੍ਥਮਙ੍ਗਂ ਵਤ੍ਤਬ੍ਬਨ੍ਤਿ ਚੇ? ਨ ਵਤ੍ਤਬ੍ਬਂ, ਇਮਸ੍ਮਿਂ ਸਿਕ੍ਖਾਪਦੇ ਪਤ੍ਤਤ੍ਥਵਿਕਾਦਿਪਰਿਕ੍ਖਾਰਸ੍ਸ ਅਚੀਵਰਸਙ੍ਖ੍ਯਤ੍ਤਾ. ਪਠਮਕਥਿਨਾਦੀਸੁ ਵਿਕਪ੍ਪਨੁਪਗਤਾ ਪਮਾਣਂ, ਇਧ ਕਾਯਪਰਿਭੋਗੁਪਗਤਾਤਿ. ‘‘ਅਞ੍ਞਂ ਪਰਿਕ੍ਖਾਰ’’ਨ੍ਤਿ ਉਦ੍ਧਰਿਤ੍ਵਾ ‘‘ਪਤ੍ਤਤ੍ਥਵਿਕਾਦਿਂ ਯਂਕਿਞ੍ਚੀ’’ਤਿ ਵੁਤ੍ਤਤ੍ਤਾ ਵਿਕਪ੍ਪਨੁਪਗਮ੍ਪਿ ਪਤ੍ਤਤ੍ਥਵਿਕਾਦਿਂ ਗਣ੍ਹਿਤੁਂ ਵਟ੍ਟਤਿ, ‘‘ਪਟਪਰਿਸ੍ਸਾਵਨਮ੍ਪੀ’’ਤਿ ਵੁਤ੍ਤਟ੍ਠਾਨੇ ਚ ‘‘ਚੀਵਰਂ ਨਾਮ ਵਿਕਪ੍ਪਨੁਪਗਪਚ੍ਛਿਮ’’ਨ੍ਤਿ ਵਚਨਤੋ ਪਟਪਰਿਸ੍ਸਾਵਨਂ ਚੀਵਰਮੇਵ, ਨ ਪਰਿਕ੍ਖਾਰਂ. ‘‘ਕੋ ਪਨ ਵਾਦੋਤਿ ਨਿਗਮਨਵਚਨਮ੍ਪਿ ਸਾਧਕ’’ਨ੍ਤਿ ਕੇਚਿ ਵਦਨ੍ਤਿ, ਪਣ੍ਣਤ੍ਤਿਂ ਅਜਾਨਨਤੋ ਅਚਿਤ੍ਤਕਂ, ਨ ਵਤ੍ਥੁਂ, ‘‘ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਸਨ੍ਤਕਭਾਵਾਜਾਨਨਤੋ, ਚੀਵਰਭਾਵਾਜਾਨਨਤੋ ਚ ਅਚਿਤ੍ਤਕ’’ਨ੍ਤਿ ਅਨੁਗਣ੍ਠਿਪਦੇ ਵੁਤ੍ਤਂ.

ਚੀਵਰਪਟਿਗ੍ਗਹਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.