੪. ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ

੫੦੩-੫੦੫. ਭਤ੍ਤਵਿਸ੍ਸਗ੍ਗਨ੍ਤਿ ਭਤ੍ਤਕਿਚ੍ਚਾਧਿਟ੍ਠਾਨਂ. ਭਤ੍ਤਕਿਚ੍ਚਾਧਿਟ੍ਠਾਨਵਿਭਾਗਨ੍ਤਿ ਪੋਰਾਣਾ. ਤਤ੍ਥ ਨਾਮ ਤ੍ਵਨ੍ਤਿ ਤਤ੍ਥ ਤਯਾ ਕਤਕਮ੍ਮੇ ਏਵਂ ਅਕਤ੍ਤਬ੍ਬੇ ਸਤਿ ਧੋਵਾਪਿਸ੍ਸਸਿ ਨਾਮ. ਅਥ ਵਾ ਸੋ ਨਾਮ ਤ੍ਵਨ੍ਤਿ ਅਤ੍ਥੋ. ਉਭਤੋਸਙ੍ਘੇ ਉਪਸਮ੍ਪਨ੍ਨਾਤਿ ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਦਾਯ ਪਟਿਕ੍ਖਿਤ੍ਤਤ੍ਤਾ ਤਦਨੁਪਸਙ੍ਗਭਯਾ ਏਵਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ‘‘ਪੁਰਾਣਚੀਵਰ’’ਨ੍ਤਿ ਏਤ੍ਥ ਪੁਰਾਣਭਾਵਦੀਪਨਤ੍ਥਮੇਵ ‘‘ਸਕਿਂ ਨਿਵਤ੍ਥਮ੍ਪਿ ਸਕਿਂ ਪਾਰੁਤਮ੍ਪੀ’’ਤਿ ਵੁਤ੍ਤਂ, ਤਸ੍ਮਾ ‘‘ਚੀਵਰਂ ਨਾਮ ਛਨ੍ਨਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਵਿਕਪ੍ਪਨੁਪਗਂ ਪਚ੍ਛਿਮ’’ਨ੍ਤਿ ਵਚਨਸ੍ਸ ਓਕਾਸੋ ਨ ਜਾਤੋਤਿ ਏਕੇ. ਯਸ੍ਮਾ ਵਿਕਪ੍ਪਨੁਪਗਪਚ੍ਛਿਮਂ ਇਧ ਨਾਧਿਪ੍ਪੇਤਂ, ਨਿਵਾਸਨਪਾਰੁਪਨੁਪਗਮੇਵਾਧਿਪ੍ਪੇਤਂ, ਤੇਨੇਵ ਨਿਸੀਦਨਪਚ੍ਚਤ੍ਥਰਣੇ ਦੁਕ੍ਕਟਂ ਵੁਤ੍ਤਂ, ਤਸ੍ਮਾ ਨ ਵੁਤ੍ਤਨ੍ਤਿ ਏਕੇ. ਜਾਤਿਪ੍ਪਮਾਣਾਵਚਨਤੋ ਯਂ ਕਿਞ੍ਚਿ ਪੁਰਾਣਵਤ੍ਥਂ ਧੋਵਾਪੇਨ੍ਤਸ੍ਸ ਨਿਸ੍ਸਗ੍ਗਿਯਮੇਵ, ਤੇਨੇਵ ‘‘ਅਨਾਪਤ੍ਤਿ ਚੀਵਰਂ ਠਪੇਤ੍ਵਾ ਅਞ੍ਞਂ ਪਰਿਕ੍ਖਾਰਂ ਧੋਵਾਪੇਤੀ’’ਤਿ ਵੁਤ੍ਤਂ. ਥਵਿਕਮ੍ਪਿ ਹਿ ਅਸੁਚਿਮਕ੍ਖਿਤਂ ਪਰਿਭੁਤ੍ਤਂ ਧੋਵਾਪੇਤਿ, ਨਿਸ੍ਸਗ੍ਗਿਯਮੇਵ ਓਲ਼ਾਰਿਕਤ੍ਤਾ, ਅਪ੍ਪਤਿਰੂਪਤ੍ਤਾ ਚ. ਤੇਨੇਵ ਕਙ੍ਖਾਵਿਤਰਣਿਯਂ ਇਮਸ੍ਮਿਂ ਠਾਨੇ ਚੀਵਰਪਰਿਚ੍ਛੇਦੋ ਨ ਵੁਤ੍ਤੋਤਿ ਏਕੇ, ਵਿਚਾਰੇਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ. ‘‘ਰਜਿਤ੍ਵਾ ਕਪ੍ਪਂ ਕਤ੍ਵਾਤਿ ਕਪ੍ਪਿਯਂ ਕਤਮੇਵ ਨਿਵਾਸੇਤੁਂ, ਪਾਰੁਪਿਤੁਂ ਵਾ ਵਟ੍ਟਤਿ, ਨੇਤਰ’’ਨ੍ਤਿ ਵੁਤ੍ਤਂ. ਇਮਿਨਾ ਚ ਮਜ੍ਝਿਮਤ੍ਥੇਰਵਾਦੋ ਉਪਤ੍ਥਮ੍ਭਿਤੋ ਹੋਤਿ, ਨੋਪਤ੍ਥਮ੍ਭਿਤੋ. ਰਜਿਤ੍ਵਾਤਿਆਦਿ ਪਨ ਵਿਨਯਵਿਧਿਦਸ੍ਸਨਤ੍ਥਂ ਵੁਤ੍ਤਨ੍ਤਿ ਮਮ ਤਕ੍ਕੋ. ਯਥਾ ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀਵਾਰੇ ਤੀਣਿ ਚਤੁਕ੍ਕਾਨਿ, ਏਵਂ ਵੇਮਤਿਕਞਾਤਿਕਵਾਰੇਸੁ ਚਾਤਿ ਨਵ ਚਤੁਕ੍ਕਾਨਿ ਹੋਨ੍ਤਿ. ਏਤ੍ਥਾਹ – ਏਕਵਾਰਂ ਧੋਵਿਤ੍ਵਾ ਧੋਵਨੇਸੁ ਧੁਰਂ ਨਿਕ੍ਖਿਪਿਤ੍ਵਾ ਪੁਨ ‘‘ਦੁਦ੍ਧੋਤ’’ਨ੍ਤਿ ਮਞ੍ਞਮਾਨਾ ਧੋਵਤਿ, ਅਨਾਪਤ੍ਤਿਯਾ ਭਵਿਤਬ੍ਬਂ, ਦੁਤਿਯਵਾਰਂ ਅਵੁਤ੍ਤਾ ਧੋਵਤਿ ਨਾਮ ਹੋਤੀਤਿ? ਵੁਚ੍ਚਤੇ – ਸਚੇ ਭਿਕ੍ਖੁ ‘‘ਅਲਂ ਏਤ੍ਤਾਵਤਾ ਧੋਤੇਨਾ’’ਤਿ ਪਟਿਕ੍ਖਿਪਤਿ, ਪੁਨ ਧੋਵਨ੍ਤੀ ਅਵੁਤ੍ਤਾ ਧੋਵਤਿ ਨਾਮਾਤਿ ਯੁਜ੍ਜਤਿ. ਨੋ ਚੇ, ਵੁਤ੍ਤਾਵ ਹੋਤੀਤਿ ਵੇਦਿਤਬ੍ਬਂ. ਭਿਕ੍ਖੁਸ੍ਸ ਲਿਙ੍ਗਪਰਿਵਤ੍ਤਨੇ ਏਕਤੋਉਪਸਮ੍ਪਨ੍ਨਾਯ ਵਸੇਨ ਆਪਤ੍ਤਿ ਸਾਕਿਯਾਨੀਨਂ ਵਿਯ.

੫੦੬. ਏਕੇਨ ਵਤ੍ਥੁਨਾਤਿ ਯੇਨ ਕੇਨਚਿ ਪਠਮੇਨ. ‘‘ਤਿਣ੍ਣਂ ਚਤੁਕ੍ਕਾਨਂ ਵਸੇਨਾ’’ਤਿ ਪਾਠੋ. ਭਿਕ੍ਖੂਨਂ ਸਨ੍ਤਿਕੇ ਅਟ੍ਠਵਾਚਿਕਾਯ ਉਪਸਮ੍ਪਨ੍ਨਾਯ ਪਾਕਟਤ੍ਤਾ ਤਂ ਅਵਤ੍ਵਾ ਸਾਕਿਯਾਨਿਯੋਵ ਵੁਤ੍ਤਾ ਅਪਾਕਟਤ੍ਤਾ.

ਪੁਰਾਣਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.