੩. ਤਤਿਯਕਥਿਨਸਿਕ੍ਖਾਪਦਵਣ੍ਣਨਾ

੪੯੭. ਨਪ੍ਪਹੋਤੀਤਿ ਲਾਮਕਪਰਿਚ੍ਛੇਦਂ ਨ ਪਾਪੁਣਾਤਿ, ਤੇਨੇਵ ਤਿਚੀਵਰਸ੍ਸ ਮੁਟ੍ਠਿਪਞ੍ਚਕਾਦਿਲਾਮਕਪਰਿਚ੍ਛੇਦੋਵ ਤਾਵ ਵੁਤ੍ਤੋ. ਚੀਵਰੇ ਪਚ੍ਚਾਸਾ ਚੀਵਰਪਚ੍ਚਾਸਾ. ਤੇਨੇਤਂ ਦੀਪੇਤਿ – ਤਂ ਚੀਵਰਂ ਪਚ੍ਛਾ ਲਬ੍ਭਤੁ ਵਾ ਮਾ ਵਾ, ਯਾਵ ਸਾ ਪਚ੍ਚਾਸਾ ਛਿਜ੍ਜਤਿ, ਤਾਵ ਇਦਂ ਮੂਲਚੀਵਰਂ ਠਪੇਤੁਂ ਅਨੁਜਾਨਾਮੀਤਿ. ‘‘ਚੀਵਰਪਚ੍ਚਾਸਾ’’ਤਿ ਮਰਿਯਾਦਤ੍ਥੇ ਨਿਸ੍ਸਕ੍ਕਵਚਨਂ, ਭੁਮ੍ਮਤ੍ਥੇ ਵਾ ਪਚ੍ਚਤ੍ਤਵਚਨਂ ਕਤਂ.

੪੯੯-੫੦੦. ਨਿਟ੍ਠਿਤਚੀਵਰਸ੍ਮਿਂ …ਪੇ… ਚੀਵਰਾਸਾ ਵਾ ਉਪਚ੍ਛਿਨ੍ਨਾਤਿਆਦਿਮ੍ਹਿ ਤੀਸੁ ਚੀਵਰੇਸੁ ਅਞ੍ਞਤਰਂ ਕਤਂ ਹੋਤਿ, ਸੇਸਾ ਅਤ੍ਥਿ, ਰਕ੍ਖਤਿ. ਚੀਵਰਪਲਿਬੋਧਸ੍ਸ ਉਪਚ੍ਛੇਦੇ, ਉਬ੍ਭਤਸ੍ਮਿਞ੍ਚ ਕਥਿਨੇ ਸਮਯੇ ਵਾ ਹੇਮਨ੍ਤਸ੍ਸ ਸਮਯੇ ਵਾ ਅਕਾਲਚੀਵਰਂ ਉਪ੍ਪਜ੍ਜੇਯ੍ਯ, ਖਿਪ੍ਪਮੇਵ ਕਾਰੇਤਬ੍ਬਂ. ਸਤਿ ਪਾਰਿਪੂਰਿਯਾ ਪਚ੍ਚਾਸਾ ਨ ਰਕ੍ਖਤਿ, ਅਸਤਿ ਨਤ੍ਥਿ ਚੇ ਪਚ੍ਚਾਸਾ, ਨ ਰਕ੍ਖਤਿ. ‘‘ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨ’’ਨ੍ਤਿ ਵਚਨਤੋ ਅਪਰਕਤ੍ਤਿਕਾ ਅਤ੍ਥਤੇ ਵਾ ਅਨਤ੍ਥਤੇ ਵਾ ਸਮਯੋਵ. ਹੇਮਨ੍ਤੋ ਸਿਯਾ ਸਮਯੋ ਅਤ੍ਥਤੇ, ਸਿਯਾ ਅਸਮਯੋ ਅਨਤ੍ਥਤੇ. ਤਤੋ ਪਰਂ ਏਕਂਸਤੋ ਅਸਮਯੋ ਵਾਤਿ. ‘‘ਆਦਿਸ੍ਸ ਦਿਨ੍ਨ’’ਨ੍ਤਿ ਇਦਂ ਇਧ ਅਲਬ੍ਭਮਾਨਮ੍ਪਿ ਅਤ੍ਥੁਦ੍ਧਾਰਵਸੇਨ ਵੁਤ੍ਤਂ ਭਿਕ੍ਖੁਨੀਨਂ ਦੁਤਿਯਨਿਸ੍ਸਗ੍ਗਿਯੇ (ਪਾਚਿ. ੭੩੮ ਆਦਯੋ) ਸੇਸਂ ਅਕਾਲਚੀਵਰਂ ਵਿਯ. ਤਤ੍ਥ ਹਿ ਭਿਕ੍ਖੁਨਿਸਙ੍ਘਸ੍ਸ ‘‘ਸਮ੍ਪਤ੍ਤਾ ਭਾਜੇਨ੍ਤੂ’’ਤਿ ਏਵਂ ਆਦਿਸ੍ਸ ਦਿਨ੍ਨਮੇਵ ‘‘ਅਕਾਲਚੀਵਰਂ ਕਾਲਚੀਵਰ’’ਨ੍ਤਿ ਅਧਿਟ੍ਠਹਿਤ੍ਵਾ ਭਾਜੇਨ੍ਤਿਯਾ ਨਿਸ੍ਸਗ੍ਗਿਯਂ. ਤਥਾ ਹਿ ਤਤ੍ਥ ਯਥਾ ‘‘ਅਕਾਲਚੀਵਰਂ ਨਾਮ ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨਂ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ ਉਪ੍ਪਨ੍ਨ’’ਨ੍ਤਿ ਇਦਂ ਅਤ੍ਥੁਦ੍ਧਾਰਵਸੇਨ ਵੁਤ੍ਤਂ, ਏਵਂਸਮ੍ਪਦਮਿਦਂ. ਯਦਿ ਏਵਂ ‘‘ਏਕਪੁਗ੍ਗਲਸ੍ਸ ਇਦਂ ਤੁਯ੍ਹਂ ਦਮ੍ਹੀਤਿ ਦਿਨ੍ਨ’’ਨ੍ਤਿ ਇਦਂ ਕਿਮਤ੍ਥਂ ਵੁਤ੍ਤਂ, ਨ ਹਿ ਤਂ ਭਾਜਨੀਯਨ੍ਤਿ ਚੇ? ਅਭਾਜਨੀਯਸਾਮਞ੍ਞਤੋ ਵੁਤ੍ਤਂ ਹੋਤਿ. ਯਥਾ ਸਙ੍ਘਸ੍ਸ ਆਦਿਸ੍ਸ ਦਿਨ੍ਨਂ ਅਤ੍ਥਤਕਥਿਨੇਹਿ ਏਵ ਭਿਕ੍ਖੂਹਿ ਅਭਾਜਨੀਯਤ੍ਤਾ ਅਕਾਲਚੀਵਰਂ ਨਾਮ ਜਾਤਂ, ਏਵਂ ਪੁਗ੍ਗਲਿਕਮ੍ਪਿ ਇਤਰੇਹੀਤਿ ਅਤ੍ਥੋ. ਏਵਂ ਸਨ੍ਤੇਪਿ ਕਸ੍ਸਚਿ ਸਿਯਾ ‘‘ਆਦਿਸ੍ਸ ਦਿਨ੍ਨਮ੍ਪਿ ਦਸਾਹਮੇਵ ਪਰਿਹਾਰਂ ਲਭਤੀ’’ਤਿ. ਤਸ੍ਸੇਤਂ ਪਾਟਿਕਙ੍ਖਂ. ਪਠਮਕਥਿਨੇ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ’’ਤਿ ਇਦਞ੍ਹਿ ਨਿਰਤ੍ਥਕਨ੍ਤਿ. ਅਨੁਬ੍ਭਤਸ੍ਮਿਮ੍ਪਿ ਹਿ ਕਥਿਨੇ ਦਸਾਹਪਰਮਮੇਵ ਧਾਰੇਤਬ੍ਬਨ੍ਤਿ ਵਿਞ੍ਞਾਤਤ੍ਤਾ ਅਨਾਦਿਸ੍ਸ ਦਿਨ੍ਨਮੇਵ ਸਨ੍ਧਾਯੇਤਂ ਵੁਤ੍ਤਂ ਸਿਯਾਤਿ ਚੇ? ਏਵਂ ਸਨ੍ਤੇਪਿ ਅਨਾਦਿਸ੍ਸ ਦਿਨ੍ਨਮ੍ਪਿ ਅਨਤ੍ਥਤਕਥਿਨਾਨਂ ਅਪਰਕਤ੍ਤਿਕਾਯ ਦਸਾਹਮੇਵ ਪਰਿਹਾਰਂ ਲਭਤਿ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ’’ਤਿ ਵੁਤ੍ਤਤ੍ਤਾ. ਆਮਨ੍ਤਾਤਿ ਚੇ? ‘‘ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨ’’ਨ੍ਤਿ ਵਚਨੇਨ ਵਿਰੁਜ੍ਝਤਿ, ਤਸ੍ਮਾ ਯਥਾਵੁਤ੍ਤਨਯੇਨੇਵੇਤ੍ਥ ਸਨ੍ਨਿਟ੍ਠਾਨਂ ਗਨ੍ਤਬ੍ਬਂ.

ਅਨੁਗਣ੍ਠਿਪਦੇ ਵੁਤ੍ਤਂ ‘‘ਪਠਮਸਿਕ੍ਖਾਪਦੇ ਸਬ੍ਬਚੀਵਰਾਨਂ ਯਾਵਦਤ੍ਥਚੀਵਰਵਸੇਨ ਕਥਿਨਮਾਸਬ੍ਭਨ੍ਤਰੇ ਦਸਾਹਾਤਿਕ੍ਕਮੇਪਿ ਅਨਾਪਤ੍ਤਿ ਪਰਿਹਾਰਸ੍ਸ ਦਿਨ੍ਨਤ੍ਤਾ. ਯਥਾ ਕਥਿਨਮਾਸਬ੍ਭਨ੍ਤਰੇ ਆਦਿਸ੍ਸ ਦਿਨ੍ਨਮਕਾਲਚੀਵਰਂ ਕਾਲਚੀਵਰਪਰਿਹਾਰਮੇਵ ਲਭਤਿ, ਤਥਾ ਇਤਰਮਾਸੇਪਿ ਲਭਤੀਤਿ ਵੇਦਿਤਬ੍ਬਂ. ਤਸ੍ਮਾ ਏਵਂ ‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ ਭਿਕ੍ਖੁਨੋ ਪਨੇਵ ਚੀਵਰਂ ਉਪ੍ਪਜ੍ਜੇਯ੍ਯਾ’ਤਿਆਦਿਨਾ ਸਿਕ੍ਖਾਪਦੇ ਸਿਦ੍ਧੇਪਿ ਅਨਤ੍ਥਤਕਥਿਨਾਨਂ ਪਚ੍ਛਿਮਕਤ੍ਤਿਕਮਾਸਂ ਅਨੁਜਾਨਨ੍ਤੇਨ ‘ਅਕਾਲਚੀਵਰਂ ਉਪ੍ਪਜ੍ਜੇਯ੍ਯਾ’ਤਿ ਵੁਤ੍ਤਂ. ਏਵਞ੍ਹਿ ਅਵੁਤ੍ਤੇ ਅਕਾਲਚੀਵਰਂ ਨਾਮ ‘ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨ’ਨ੍ਤਿ ਨ ਸਕ੍ਕਾ ਵਤ੍ਤੁਂ. ਏਵਞ੍ਹਿ ਵਚਨਤੋ ਅਨਤ੍ਥਤਕਥਿਨਾਨਂ ਅਤ੍ਥਤਕਥਿਨਾਨਂ ਵਿਯ ਸਬ੍ਬਚੀਵਰਾਨਂ ਪਚ੍ਛਿਮਕਤ੍ਤਿਕਮਾਸੇ ਦਸਾਹਾਤਿਕ੍ਕਮੇ ਨਿਸ੍ਸਗ੍ਗਿਯਂ ਨ ਹੋਤੀ’’ਤਿਆਦਿ.

ਭਿਯ੍ਯੋਪਿ ਏਵਂ ਵੁਤ੍ਤਂ – ਯਂ ਪਨ ਮਯਾ ‘‘ਪਠਮਕਥਿਨੇ ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’’ਨ੍ਤਿ ਅਨੁਞ੍ਞਾਤਂ, ਤਮ੍ਪਿ ਕਥਿਨਮਾਸਤੋ ਬਹਿ ਉਪ੍ਪਨ੍ਨਮੇਵ, ਨ ਅਨ੍ਤੋਤਿ ਅਯਮਤ੍ਥੋ ਦੀਪਿਤੋ ਹੋਤਿ. ਕਥਂ? ਅਤਿਰੇਕਚੀਵਰਸ੍ਸ ਦਸਾਹਪਰਿਹਾਰਤੋ ਉਦ੍ਧਂ ਆਪਜ੍ਜਿਤਬ੍ਬਾਪਤ੍ਤਿਂ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ’’ਤਿ ਅਨੁਪਞ੍ਞਤ੍ਤਿਯਾ ਕਥਿਨਬ੍ਭਨ੍ਤਰੇ ਵਾਰੇਤ੍ਵਾ ਤਤੋ ਉਦ੍ਧਂ ਉਪ੍ਪਨ੍ਨੇਸੁ ਦਸਾਹਾਤਿਕ੍ਕਮੇ ਆਪਜ੍ਜਿਤਬ੍ਬਾਪਤ੍ਤਿਂ ਇਮਿਨਾ ਸਿਕ੍ਖਾਪਦੇਨ ਵਾਰੇਤੁਂ ‘‘ਅਕਾਲਚੀਵਰਂ ਉਪ੍ਪਜ੍ਜੇਯ੍ਯਾ’’ਤਿਆਦਿ ਵੁਤ੍ਤਂ. ਤੇਨ ‘‘ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀਵਰਂ ਨਾਮਾ’’ਤਿ ਵਚਨਤੋ ਕਥਿਨੁਬ੍ਭਾਰਤੋ ਉਦ੍ਧਂ ਦਸਾਹਪਰਿਹਾਰਂ ਨ ਲਭਤੀਤਿ ਦੀਪਿਤਂ ਹੋਤਿ, ਤੇਹਿ ਸਦ੍ਧਿਂ ਪੁਨ ਕਥਿਨੁਬ੍ਭਾਰਤੋ ਉਦ੍ਧਂ ਪਞ੍ਚ ਦਿਵਸਾਨਿ ਲਭਤੀਤਿ ਪਸਙ੍ਗੋਪਿ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ ਭਿਕ੍ਖੁਨੋ ਪਨੇਵ ਅਕਾਲਚੀਵਰਂ ਉਪ੍ਪਜ੍ਜੇਯ੍ਯ…ਪੇ… ਖਿਪ੍ਪਮੇਵ ਕਾਰੇਤਬ੍ਬ’’ਨ੍ਤਿ ਅਕਾਲਚੀਵਰਸ੍ਸ ਉਪ੍ਪਤ੍ਤਿਕਾਲਂ ਨਿਯਮੇਤ੍ਵਾ ਵੁਤ੍ਤਤ੍ਤਾ ਨਿਵਾਰਿਤੋ ਹੋਤਿ, ਤਦੁਭਯੇਨ ਕਥਿਨਬ੍ਭਨ੍ਤਰੇ ਉਪ੍ਪਨ੍ਨਚੀਵਰਂ ਕਥਿਨੁਬ੍ਭਾਰਤੋ ਉਦ੍ਧਂ ਏਕਦਿਵਸਮ੍ਪਿ ਪਰਿਹਾਰਂ ਨ ਲਭਤੀਤਿ ਸਿਦ੍ਧਂ ਹੋਤਿ. ਏਵਂ ਅਪਰੇ ਵਦਨ੍ਤੀਤਿ.

ਪੁਨਪਿ ਵੁਤ੍ਤਂ – ਆਚਰਿਯਾ ਪਨ ਏਵਂ ਵਦੇਯ੍ਯੁਂ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ ਭਿਕ੍ਖੁਨੋ ਪਨੇਵ ਅਕਾਲਚੀਵਰਂ ਉਪ੍ਪਜ੍ਜੇਯ੍ਯਾ’’ਤਿ ਏਤ੍ਥ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ’’ਤਿ ਵਦਨ੍ਤੋ ਏਵਂ ਵਿਞ੍ਞਾਪੇਤਿ ‘‘ਏਤ੍ਥਨ੍ਤਰੇ ਤਿਣ੍ਣਨ੍ਨਮ੍ਪਿ ਅਕਾਲਚੀਵਰਾਨਂ ਉਪ੍ਪਤ੍ਤਿ ਅਭਾਵ’’ਨ੍ਤਿ. ਕਸ੍ਮਾ ਪਨ ਪਦਭਾਜਨੇ ਵਿਤ੍ਥਾਰਿਤਾਨੀਤਿ? ਵੁਚ੍ਚਤੇ – ਇਦਂ ਸਿਕ੍ਖਾਪਦਂ ਅਧਿਟ੍ਠਾਨਂ ਸਨ੍ਧਾਯ ਵੁਤ੍ਤਂ, ਕਿਨ੍ਤੁ ਪਠਮੇ ਦਸਾਹਂ ਅਨੁਜਾਨਿਤ੍ਵਾ ਤਸ੍ਮਿਂ ਅਪ੍ਪਹੋਨ੍ਤੇ ਸਚੇ ਪਚ੍ਚਾਸਾ ਅਤ੍ਥਿ, ਤਮੇਵ ਵਡ੍ਢੇਤ੍ਵਾ ਮਾਸਂ ਅਨੁਜਾਨਨ੍ਤੋ ਇਮਮ੍ਪਿ ਅਤ੍ਥਵਿਸੇਸਂ ਦੀਪੇਤਿ ਅਕਾਲਚੀਵਰਂ ਨਾਮ ਸਮ੍ਮੁਖੀਭੂਤੇਨ ਭਾਜੇਤਬ੍ਬਨ੍ਤਿਪਿ ਦੀਪੇਤਿ. ਤਂ ਪਨ ‘‘ਆਕਙ੍ਖਮਾਨੇਨ ਭਿਕ੍ਖੁਨਾ ਪਟਿਗ੍ਗਹੇਤਬ੍ਬ’’ਨ੍ਤਿ ਇਮਿਨਾ ਸਿਕ੍ਖਾਪਦੇਨ ਵਡ੍ਢੇਤ੍ਵਾ ਵੁਤ੍ਤਨ੍ਤਿ, ਤਸ੍ਮਾ ਤੀਣਿਪਿ ਪਦਭਾਜਨੇ ਵਿਤ੍ਥਾਰਿਤਾਨੀਤਿ.

‘‘ਖਿਪ੍ਪਮੇਵ ਕਾਰੇਤਬ੍ਬਨ੍ਤਿ ਦਸਾਹਾ ਕਾਰੇਤਬ੍ਬ’’ਨ੍ਤਿ ਇਦਂ ਪਨ ਪਹੋਨਕਭਾਵੇ ਪੁਰਿਮਸਿਕ੍ਖਾਪਦਲਕ੍ਖਣੇਨਾਤਿ ਦੀਪੇਤੁਂ ਵੁਤ੍ਤਂ, ਤਸ੍ਮਾ ‘‘ਏਵਂ ਸੀਘਨ੍ਤਿ ਵਾ ਲਹੁਨ੍ਤਿ ਵਾ’’ਤਿਆਦਿਨਾ ਅਵਤ੍ਵਾ ‘‘ਦਸਾਹਾ’’ਤਿ ਵੁਤ੍ਤਂ. ਅਤ੍ਥਤਕਥਿਨਸ੍ਸ ਏਵਂ ਹੋਤੁ, ਅਨਤ੍ਥਤੇ ਪਨ ਕਥਿਨੇ ਕਥਨ੍ਤਿ ਵੁਤ੍ਤੇ ਅਨਤ੍ਥਤਸ੍ਸ ਪਟਿਕ੍ਖੇਪਤਂ ਦਸ੍ਸੇਤੀਤਿ ਵੁਤ੍ਤੋ ਅਪਸ੍ਸਨ੍ਤੋ ਵਿਘਾਤਂ ਆਪਜ੍ਜਤੀਤਿ. ਏਕਤਿਂਸੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਨ੍ਤਿ ਮਹਨ੍ਤੇਨਪਿ ਪਚ੍ਚਾਸਾਚੀਵਰੇਨ ਸਹ ਘਟਿਤਮ੍ਪਿ ਤਬ੍ਭਾਵਂ ਅਨੁਪਤਿਤ੍ਵਾ ਨਿਸ੍ਸਗ੍ਗਿਯਂ ਹੋਤਿ ਸਤਿ ਪਚ੍ਛਿਮਪ੍ਪਮਾਣਸਮ੍ਭਵੇ, ਅਸਤਿ ਨ ਹੋਤਿ, ਪੁਨ ਘਟਿਤੇ ਹੋਤਿ, ਅਞ੍ਞੇਨ ਘਟਿਤੇ ਨ ਹੋਤਿ. ਛਿਨ੍ਨਂ ਅਞ੍ਞਵਤ੍ਥੁ ਹੋਤਿ. ਪੁਬ੍ਬਪਰਿਚ੍ਛੇਦਂ ਅਤਿਕ੍ਕਨ੍ਤਂ ਘਟਿਤਂ ਪੁਨ ਅਞ੍ਞਪਰਿਚ੍ਛੇਦਂ ਲਭਤੀਤਿ ਏਕੇ, ਉਪਪਰਿਕ੍ਖਿਤ੍ਵਾ ਗਹੇਤਬ੍ਬਂ. ਅਞ੍ਞਤਰਸ੍ਮਿਂ ਗਣ੍ਠਿਪਦੇ ਪਨ ‘‘ਸਙ੍ਘਸ੍ਸ ਵਾ ਇਦਂ ਅਕਾਲਚੀਵਰਨ੍ਤਿ ਉਦ੍ਦਿਸ੍ਸ ਦਿਨ੍ਨ’ਨ੍ਤਿ ਏਤ੍ਥ ਸਙ੍ਘਸ੍ਸ ਦਿਨ੍ਨੇ ਆਪਤ੍ਤਿ ਨਾਮ ਨਤ੍ਥਿ, ‘ਸੋਤਸ੍ਸ ਰਹੋ’ਤਿਆਦੀਸੁ ਵਿਯ ਪਦੁਦ੍ਧਾਰੇਨ ਵੁਤ੍ਤਂ, ਤਸ੍ਸ ਲਾਭਂ ਸਨ੍ਧਾਯਾਤਿ ਚੇ? ਸਙ੍ਘਤੋ ਵਾ ਉਪ੍ਪਜ੍ਜੇਯ੍ਯਾਤਿ ਅਨੇਨ ਸਿਦ੍ਧਤ੍ਤਾ ਅਧਿਕਮੇਵਾ’’ਤਿ ਚ ‘‘ਸਙ੍ਘੋ ਚੀਵਰਾਨਿ ਲਭਿਸ੍ਸਤਿ ਗਣੋ ਵਾ’ਤਿਆਦਿਨਾਪਿ ਪਾਠੋ ਅਤ੍ਥੀ’’ਤਿ ਚ ਵੁਤ੍ਤਂ. ਗਣ੍ਠਿਪਦੇ ਕੋਸਲ੍ਲਤ੍ਥਂ ਪਨ ਮਯਾ ਸਬ੍ਬਂ ਲਿਖਿਤਂ, ਸੁਟ੍ਠੁ ਵਿਚਾਰੇਤ੍ਵਾ ਕਥੇਤਬ੍ਬਂ.

ਤਤਿਯਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.