੧੦. ਰਾਜਸਿਕ੍ਖਾਪਦਵਣ੍ਣਨਾ

੫੩੭. ‘‘ਨ ਖੋ ਮਯਂ, ਆਵੁਸੋ, ਚੀਵਰਚੇਤਾਪਨ੍ਨਂ ਪਟਿਗ੍ਗਣ੍ਹਾਮ…ਪੇ… ਕਾਲੇਨ ਕਪ੍ਪਿਯ’’ਨ੍ਤਿ ਇਤੋ ਪੁਬ੍ਬੇ ਏਵ ਰੂਪਿਯਪਟਿਗ੍ਗਹਣਸਿਕ੍ਖਾਪਦਸ੍ਸ ਪਞ੍ਞਤ੍ਤਤ੍ਤਾ ਵੁਤ੍ਤਂ. ਅਞ੍ਞਥਾ ਆਯਸ੍ਮਾ ਉਪਨਨ੍ਦੋ ਮਂਸਸ੍ਸ ਚੇਤਾਪਨ੍ਨਂ ਏਕਮ੍ਪਿ ਕਹਾਪਣਂ ਹਤ੍ਥੇਨ ਪਟਿਗ੍ਗਣ੍ਹਨ੍ਤੋ ਤਤੋ ਮਹਨ੍ਤਤਰਂ ਚੀਵਰਚੇਤਾਪਨ੍ਨਂ ਕਥਂ ਨ ਪਟਿਗ੍ਗਣ੍ਹਿਸ੍ਸਤਿ, ਏਵਂ ਸਨ੍ਤੇਪਿ ਚੀਵਰਪਟਿਸਂਯੁਤ੍ਤਤ੍ਤਾ ਚੀਵਰਵਗ੍ਗੇ ਸਙ੍ਗਾਯਿਂਸੂਤਿ.

੫੩੮-੯. ‘‘ਆਗਤਕਾਰਣਂ ਭਞ੍ਜਤੀ’’ਤਿ ਵੁਤ੍ਤਤ੍ਤਾ ਨਨੁ ਪੁਨ ਚੋਦੇਤੁਂ ਨ ਲਭਤੀਤਿ ਏਕੇ. ਆਗਮਨਸ੍ਸ ਸਾਤ੍ਥਕਂ ਨ ਹੋਤਿ, ਚੀਵਰਂ ਨ ਲਭਿਸ੍ਸਤਿ ਪਟਿਸਨ੍ਥਾਰਸ੍ਸ ਕਤਤ੍ਤਾਤਿ ਏਕੇ. ਚੋਦਨਾਲਕ੍ਖਣਂ ਨ ਹੋਤੀਤਿ ਕਤ੍ਵਾ ਵੁਤ੍ਤਨ੍ਤਿ ਏਕੇ. ‘‘ਠਤ੍ਵਾ ਚੋਦੇਮੀ’’ਤਿ ਆਗਤੋ ਤਂ ਠਾਨਂ ਭਞ੍ਜਤਿ, ਕਰੋਤਿ ਚੇਕਂ, ਤੀਣਿਪਿ ਚੇ ਕਰੋਤਿ, ਏਕਮੇਵ, ਏਕਵਚਨਤ੍ਤਾਤਿ ਏਕੇ. ਤੀਣਿ ਠਾਨਾਨਿ ਭਞ੍ਜਤੀਤਿ ਏਕੇ. ਉਪਤਿਸ੍ਸਤ੍ਥੇਰੋ ‘‘ਨ ਚੋਦਨਾਦਿਂ ਭਞ੍ਜਤਿ, ਚੋਦੇਤੁਕਾਮੋ ਅਕਤ੍ਤਬ੍ਬਂ ਅਕਾਸਿ, ਤੇਨ ਵਤ੍ਤਭੇਦੇ ਦੁਕ੍ਕਟ’’ਨ੍ਤਿ ਵਦਤਿ. ਧਮ੍ਮਸਿਰਿਤ੍ਥੇਰੋ ਪਨ ‘‘ਆਸਨੇ ਚੇ ਨਿਸੀਦਤਿ, ਏਕਾਯ ਨਿਸਜ੍ਜਾਯ ਦ੍ਵੇ ਠਾਨਾਨਿ ਭਞ੍ਜਤਿ. ਆਮਿਸਂ ਚੇ ਪਟਿਗ੍ਗਣ੍ਹਾਤਿ, ਏਕੇਨ ਪਟਿਗ੍ਗਹੇਨ ਦ੍ਵੇ ਠਾਨਾਨਿ ਭਞ੍ਜਤਿ. ਧਮ੍ਮਂ ਚੇ ਭਾਸਤਿ, ਧਮ੍ਮਦੇਸਨਸਿਕ੍ਖਾਪਦੇ ਵੁਤ੍ਤਪਰਿਚ੍ਛੇਦਾਯ ਏਕਾਯ ਵਾਚਾਯ ਦ੍ਵੇ ਠਾਨਾਨਿ ਭਞ੍ਜਤਿ, ਤਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵਦਤਿ. ‘‘ਯਤ੍ਥਾ’’ਤਿ ਵੁਤ੍ਤੇ ਅਤ੍ਤਨੋ ਏਵ ਸਨ੍ਤਿਕਂ ਗਨ੍ਤਬ੍ਬਨ੍ਤਿ ਵੁਤ੍ਤਂ ਵਿਯ ਹੋਤਿ. ਤੇਨ ਵੁਤ੍ਤਂ ‘‘ਬ੍ਯਞ੍ਜਨਂ ਪਨ ਨ ਸਮੇਤੀ’’ਤਿ. ਉਪਾਸਕੇਹਿ ਆਣਤ੍ਤਾ ਤਂ. ਮੂਲਂ ਅਸਾਦਿਯਨ੍ਤੇਨਾਤਿ ਮੂਲਸ੍ਸ ਅਕਪ੍ਪਿਯਭਾਵੇ ਸਤਿ ਅਸਾਦਿਯਨ੍ਤੇਨ. ਤਞ੍ਚ ਖੋ ਚਿਤ੍ਤੇਨ, ਨ ਮੁਖੇਨ. ਸਚੇ ਏਵਂ ਵੁਤ੍ਤੇ ਅਕਪ੍ਪਿਯਂ ਦਸ੍ਸੇਤੀਤਿ ਕਤ੍ਵਾ ਚਿਤ੍ਤੇਨ ਅਕਪ੍ਪਿਯਂ ਇਚ੍ਛਨ੍ਤੋਵ ਮੁਖੇਨ ਕਪ੍ਪਿਯਂ ਨਿਦ੍ਦਿਸਤਿ ‘‘ਚੀਵਰਂ ਮੇ ਦੇਥਾ’’ਤਿ, ਨ ਵਟ੍ਟਤਿ. ਪਟਿਲਾਭੇ ਰੂਪਿਯਪਟਿਗ੍ਗਹਣਸਿਕ੍ਖਾਪਦੇਨ ਆਪਤ੍ਤਿ.

ਤਤ੍ਰਾਯਂ ਵਿਚਾਰਣਾ – ਚਿਤ੍ਤੇਨ ਸਾਦਿਯਨ੍ਤੋਪਿ ਮੁਖੇਨ ਕਪ੍ਪਿਯਵੋਹਾਰੇਨ ਚੇ ਵੋਹਰਤਿ ‘‘ਕਹਾਪਣਾਰਹੇਨ, ਪਾਦਾਰਹੇਨ ਵਾ ਕਪ੍ਪਿਯਭਣ੍ਡੇਨ ਇਦਞ੍ਚਿਦਞ੍ਚ ਆਹਰਾ’’ਤਿ. ਕਿਞ੍ਚਾਪਿ ਰੂਪਿਯਂ ਸਨ੍ਧਾਯ ਵਦਤਿ, ਵਟ੍ਟਤਿ ਏਵ. ਕਸ੍ਮਾ? ਕਞ੍ਚਿ ਸਸ੍ਸੁਟ੍ਠਾਨਕਂ ਭੂਮਿਪਦੇਸਂ ਸਨ੍ਧਾਯ ‘‘ਸੀਮਂ ਦੇਮਾਤਿ ਵਦਨ੍ਤਿ, ਵਟ੍ਟਤੀ’’ਤਿ ਵਚਨਤੋ, ‘‘ਵਿਹਾਰਸ੍ਸ ਦੇਮਾ’’ਤਿ ਵੁਤ੍ਤੇ ‘‘ਪਟਿਕ੍ਖਿਪਿਤੁਂ ਨ ਵਟ੍ਟਤੀ’’ਤਿ ਵਚਨਤੋ ਚ. ਅਨੁਗਣ੍ਠਿਪਦੇ ਪਨ ਵੁਤ੍ਤਂ ‘‘ਸਙ੍ਘਂ ਸਨ੍ਧਾਯ ‘ਵਿਹਾਰਸ੍ਸ ਦੇਮਾ’ਤਿ ਦਿਨ੍ਨਂ ਗਰੁਭਣ੍ਡਂ ਨ ਹੋਤਿ, ਦਕ੍ਖਿਣੋਦਕਂ ਸਮ੍ਪਟਿਚ੍ਛਿਤੁਂ, ‘ਸਾਧੂ’ਤਿ ਚ ਵਤ੍ਤੁਂ, ਅਨੁਮੋਦੇਤੁਞ੍ਚ ਵਟ੍ਟਤਿ. ਕਸ੍ਮਾ? ਸਙ੍ਘਸ੍ਸ ‘ਵਿਹਾਰੋ’ਤਿ ਨਾਮਾਭਾਵਤੋ, ਖੇਤ੍ਤਸ੍ਸੇਵ ‘ਸੀਮਾ’ਤਿ ਨਾਮਭਾਵਤੋ ਚ, ਚਿਤ੍ਤੇਨ ਆਰਮ੍ਮਣਂ ਕਤਂ ਅਪ੍ਪਮਾਣਂ, ਕਪ੍ਪਿਯਵੋਹਾਰੋਵ ਪਮਾਣਂ. ਕਪ੍ਪਿਯਮੇਵਾਚਿਕ੍ਖਿਤਤ੍ਤਾ ‘ਨ ਤ੍ਵੇਵਾਹਂ, ਭਿਕ੍ਖਵੇ, ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬਂ ਪਰਿਯੇਸਿਤਬ੍ਬਨ੍ਤਿ ਵਦਾਮੀ’ਤਿ (ਮਹਾਵ. ੨੯੯) ਵਚਨੇਨਪਿ ਨ ਵਿਰੁਜ੍ਝਤਿ. ਕਪ੍ਪਿਯਵਚਨਪਚ੍ਚਯਾ ਦਾਯਕੋ ਸਯਮੇਵ ਕਤ੍ਤਬ੍ਬਯੁਤ੍ਤਕਂ ਜਾਨਿਸ੍ਸਤੀਤਿ ਅਧਿਪ੍ਪਾਯਤੋ ਦਾਯਕੇਨ ਏਤਸ੍ਸ ਅਧਿਪ੍ਪਾਯਂ ਞਤ੍ਵਾ ਕਪ੍ਪਿਯਕਾਰਕਸ੍ਸ ਹਤ੍ਥੇ ਠਪਿਤਂ ਭਿਕ੍ਖੁਸ੍ਸ ਸਨ੍ਤਕਮੇਵ ਹੋਤੀ’’ਤਿ. ਇਦਂ ਸਬ੍ਬਮਯੁਤ੍ਤਂ, ਕਸ੍ਮਾ? ਸੀਮਾਵਿਹਾਰਵਚਨਸ੍ਸ ਦਾਯਕਵਚਨਤ੍ਤਾ. ਇਧ ਚ ਭਿਕ੍ਖੁਨੋ ਵਚਨਂ ਪਮਾਣਂ. ਤੇਨੇਵਾਹ ‘‘ਅਥਾਪਿ ‘ਮਮ ਤਲ਼ਾਕਂ ਵਾ ਪੋਕ੍ਖਰਣਿਂ ਵਾ ਸਙ੍ਘਸ੍ਸ ਦਮ੍ਮੀ’ਤਿ ਵੁਤ੍ਤੇ ‘ਸਾਧੁ, ਉਪਾਸਕ, ਸਙ੍ਘੋ ਪਾਨੀਯਂ ਪਿਵਿਸ੍ਸਤੀ’ਤਿਆਦੀਨਿ ਵਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ ਏਵਾ’’ਤਿ. ਅਞ੍ਞਥਾ ਖੇਤ੍ਤਂ ਸਨ੍ਧਾਯ ਭਿਕ੍ਖੁਨੋ ਖੇਤ੍ਤਪਟਿਬਦ੍ਧਵਚਨਾਨਿ ਸੀਮਾਵਚਨੇਨ ਕਪ੍ਪਨ੍ਤੀਤਿ ਆਪਜ੍ਜਤਿ. ਅਵਿਹਾਰਸ੍ਸ ਚ ਭਿਕ੍ਖੁਸ੍ਸ ਰੂਪਿਯਂ ਦਸ੍ਸੇਤ੍ਵਾ ‘‘ਇਦਂ ਵਿਹਾਰਸ੍ਸ ਦਮ੍ਮੀ’’ਤਿ ਵੁਤ੍ਤੇ ਅਤ੍ਤਨੋ ਅਤ੍ਥਾਯ ਦਿਯ੍ਯਮਾਨਂ ਜਾਨਨ੍ਤੇਨਾਪਿ ਤਂ ਅਪ੍ਪਟਿਕ੍ਖਿਪਿਤਬ੍ਬਂ. ਤਥਾ ਕਹਾਪਣਾਰਹਾਦਿਨੋ ਅਕਪ੍ਪਿਯਭਣ੍ਡਭਾਵਂ, ਕਹਾਪਣਾਦਿਭਾਵਮੇਵ ਵਾ ਜਾਨਨ੍ਤਮੇਵ ਸਨ੍ਧਾਯ ਤਥਾਵੋਹਰਨ੍ਤਸ੍ਸ ਚ ਅਨਾਪਤ੍ਤੀਤਿ ਆਪਜ੍ਜਤਿ. ‘‘ਨ ਤ੍ਵੇਵਾਹਂ, ਭਿਕ੍ਖਵੇ, ਕੇਨਚਿ ਪਰਿਯਾਯੇਨਾ’’ਤਿ ਨਿਪ੍ਪਦੇਸਤੋ ਵੁਤ੍ਤਤ੍ਤਾ ਨ ਸਕ੍ਕਾ ਲੇਸਂ ਓਡ੍ਡੇਤੁਨ੍ਤਿ ਨੋ ਤਕ੍ਕੋ, ਵਿਚਾਰੇਤ੍ਵਾ ਪਨ ਗਹੇਤਬ੍ਬਂ. ‘‘ਨੋ ਚੇ ਇਚ੍ਛਤਿ, ਨ ਕਥੇਤਬ੍ਬ’’ਨ੍ਤਿ ਵਚਨਤੋ ਯਥਾਵੁਤ੍ਤਸਾਮਿਚਿਯਾ ਅਕਰਣੇ ਅਨਾਪਤ੍ਤਿ ਦੁਕ੍ਕਟਸ੍ਸਾਤਿ ਦਸ੍ਸੇਤਿ.

‘‘ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬ’’ਨ੍ਤਿ ਵਚਨਤੋ ਯਥਾਵੁਤ੍ਤਸਾਮਿਚਿਮ੍ਪਿ ਨ ਕਤ੍ਵਾ ਚੇ ਨਿਪ੍ਫਾਦੇਤਿ, ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦੇਨ ਕਾਰੇਤਬ੍ਬੋਤਿ ਦਸ੍ਸੇਤਿ. ਕਪ੍ਪਿਯਕਾਰਕਾ ਸਯਮੇਵ ਚੋਦੇਤ੍ਵਾ ਦੇਨ੍ਤਿ, ਵਟ੍ਟਤਿ. ‘‘ਸਯਂ ਕਰਣਮੇਵ ਪਟਿਕ੍ਖਿਤ੍ਤ’’ਨ੍ਤਿ ਚ ਵਦਨ੍ਤਿ. ਪਿਣ੍ਡਪਾਤਾਦੀਨਂ …ਪੇ… ਏਸੇਵ ਨਯੋਤਿ ਏਤ੍ਥ ‘‘ਦੁਕ੍ਕਟ’’ਨ੍ਤਿ ਵਦਨ੍ਤਿ, ਤਂ ਨ ਸੁਨ੍ਦਰਂ, ਦਦਨ੍ਤੇਸੁਪੀਤਿ ਅਪਿ-ਸਦ੍ਦੇਨ ਸਙ੍ਗਹਿਤਤ੍ਤਾ ਨਿਸ੍ਸਗ੍ਗਿਯਪਾਚਿਤ੍ਤਿਯਮੇਵ. ਜਾਤਰੂਪਰਜਤਂ ‘‘ਸਙ੍ਘੇ ਸਾਦਿਤੇ ਦੁਕ੍ਕਟ’’ਨ੍ਤਿ ਚ ਵਿਕਪ੍ਪੇਨ੍ਤਿ. ਤਂ ਵਿਸੇਸੇਤ੍ਵਾ ਨਵੁਤ੍ਤਤ੍ਤਾ ਪਾਚਿਤ੍ਤਿਯਮੇਵਾਤਿ ਦਸ੍ਸੇਤਿ. ‘‘ਨਿਸ੍ਸਗ੍ਗਿਯਮੇਵਾਤਿ ਯੇਵਾਪਨਕਸਿਕ੍ਖਾਪਦੇਸੁ ਸਿਯਾ’’ਤਿ ਵਦਨ੍ਤਿ, ਉਪਪਰਿਕ੍ਖਿਤਬ੍ਬਂ. ‘‘ਯਸ੍ਸ ਕਸ੍ਸਚਿ ਹਿ ਅਞ੍ਞਸ੍ਸ…ਪੇ… ਮਹਾਪਚ੍ਚਰਿਯਂ ਵੁਤ੍ਤ’’ਨ੍ਤਿ ਵਚਨਤੋ ਅਪਬ੍ਬਜਿਤਾਨਂ ਅਨ੍ਤਮਸੋ ਮਾਤਾਪਿਤੂਨਮ੍ਪਿ ਅਤ੍ਥਾਯ ਸਮ੍ਪਟਿਚ੍ਛਨ੍ਤਸ੍ਸ ਦੁਕ੍ਕਟਮੇਵਾਤਿ ਦਸ੍ਸੇਤਿ.

ਸਬ੍ਬਤ੍ਥ ਸਮ੍ਪਟਿਚ੍ਛਨਂ ਨਾਮ ‘‘ਉਗ੍ਗਣ੍ਹੇਯ੍ਯ ਵਾ ਉਗ੍ਗਣ੍ਹਾਪੇਯ੍ਯਵਾ ਉਪਨਿਕ੍ਖਿਤ੍ਤਂ ਵਾ ਸਾਦਿਯੇਯ੍ਯਾ’’ਤਿ ਏਵਂ ਵੁਤ੍ਤਲਕ੍ਖਣਮੇਵ. ਏਵਂ ਸਨ੍ਤੇਪਿ ਕਤ੍ਥਚਿ ਪਟਿਕ੍ਖਿਪਿਤਬ੍ਬਂ, ਕਤ੍ਥਚਿ ਨ ਪਟਿਕ੍ਖਿਪਿਤਬ੍ਬਂ, ਕਤ੍ਥਚਿ ਪਟਿਕ੍ਖਿਤ੍ਤਂ ਸਾਦਿਤੁਂ ਵਟ੍ਟਤਿ, ਏਵਂ ਅਪ੍ਪਟਿਕ੍ਖਿਤ੍ਤਂ ਕਿਞ੍ਚਿ ਵਟ੍ਟਤਿ, ਇਦਂ ਸਬ੍ਬਮ੍ਪਿ ਦਸ੍ਸੇਤੁਂ ‘‘ਸਚੇ ਪਨਾ’’ਤਿ ਵਿਤ੍ਥਾਰੋ ਆਰਦ੍ਧੋ. ਤਤ੍ਥ ‘‘ਚੇਤਿਯਸ੍ਸ…ਪੇ… ਨ ਵਟ੍ਟਤੀ’’ਤਿ ਵਚਨਤੋ ਅਪ੍ਪਟਿਕ੍ਖਿਤ੍ਤਂ ਵਿਹਾਰਸ੍ਸ ਦਿਨ੍ਨਂ ਸਾਦਿਤੁਂ ਵਟ੍ਟਤੀਤਿ ਸਿਦ੍ਧਂ. ਤਥਾ ਥੇਰਸ੍ਸ ‘‘ਮਾਤੁਯਾ ਦੇਮਾ’’ਤਿਆਦਿਨਾ ਵੁਤ੍ਤੇਪਿ ਪਟਿਗ੍ਗਹਣੇ ਆਪਤ੍ਤਿ ਪਾਚਿਤ੍ਤਿਯਮੇਵ. ਸਾਪਤ੍ਤਿਕੋ ਹੋਤੀਤਿ ਏਤ੍ਥ ਕਾਯ ਆਪਤ੍ਤਿਯਾ ਸਾਪਤ੍ਤਿਕੋ ਹੋਤੀਤਿ? ਦੁਕ੍ਕਟਾਪਤ੍ਤਿਯਾਤਿ ਏਕੇ. ਨ ਯਾਯ ਕਾਯਚਿ, ਕੇਵਲਂ ਅਟ੍ਠਾਨੇ ਚੋਦੇਤੀਤਿ ਕਤ੍ਵਾ ‘‘ਸਾਪਤ੍ਤਿਕੋ’’ਤਿ ਵੁਤ੍ਤਂ. ਯਥਾ ਕਥਨ੍ਤਿ? ‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਸਦ੍ਧਿਵਿਹਾਰਿਕੋ ਪਣਾਮੇਤਬ੍ਬੋ…ਪੇ… ਪਣਾਮੇਨ੍ਤੋ ਅਨਤਿਸਾਰੋ’’ਤਿ (ਮਹਾਵ. ੬੮) ਏਤ੍ਥ ਨ ਸਮ੍ਮਾਵਤ੍ਤਨ੍ਤਂਯੇਵ ਅਪਣਾਮੇਨ੍ਤਸ੍ਸ ਦੁਕ੍ਕਟਂ ਵੁਤ੍ਤਂ. ਯਥਾਹ – ‘‘ਨ ਚ, ਭਿਕ੍ਖਵੇ, ਅਸਮ੍ਮਾਵਤ੍ਤਨ੍ਤੋ ਨ ਪਣਾਮੇਤਬ੍ਬੋ, ਯੋ ਨ ਪਣਾਮੇਯ੍ਯ, ਆਪਤ੍ਤਿਦੁਕ੍ਕਟਸ੍ਸਾ’’ਤਿ (ਮਹਾਵ. ੬੮), ਤਸ੍ਮਾ ਅਧਿਮਤ੍ਤਪੇਮਾਦਿਅਭਾਵੇਪਿ ਅਪਣਾਮੇਨ੍ਤਸ੍ਸ ਅਨਾਪਤ੍ਤਿ ਦਿਸ੍ਸਤਿ. ਅਪਿਚ ‘‘ਸਾਤਿਸਾਰੋ ਹੋਤੀ’’ਤਿ ਵੁਤ੍ਤਂ. ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ. ਅਟ੍ਠਕਥਾਯ ‘‘ਸਾਤਿਸਾਰੋ ਹੋਤੀਤਿ ਸਦੋਸੋ ਹੋਤਿ, ਆਪਤ੍ਤਿਂ ਆਪਜ੍ਜਤੀ’’ਤਿ (ਮਹਾਵ. ਅਟ੍ਠ. ੬੮) ਵੁਤ੍ਤਤ੍ਤਾ ਨ ਯੁਤ੍ਤਨ੍ਤਿ ਚੇ? ਨ, ਤਦਨਨ੍ਤਰਮੇਵ ਤਂਮਿਚ੍ਛਾਗਾਹਨਿਵਤ੍ਤਨਤ੍ਥਂ, ਤਸ੍ਮਾ ‘‘ਨ ਸਮ੍ਮਾਵਤ੍ਤਨ੍ਤੋ ਪਣਾਮੇਤਬ੍ਬੋ’’ਤਿ ਵੁਤ੍ਤਤ੍ਤਾ ਅਨਾਪਤ੍ਤਿਕਾ ਕਤਾਤਿ. ਦੁਕ੍ਕਟਾਪਤ੍ਤਿ ਹੋਤੀਤਿ ਆਚਰਿਯੋ, ਵੀਮਂਸਿਤਬ੍ਬਂ. ‘‘ਕਪ੍ਪਿਯਭਣ੍ਡਮ੍ਪਿ ਅਕਪ੍ਪਿਯਮੇਵਾਤਿ ਤਲ਼ਾਕਤੋ ਨਿਪ੍ਫਨ੍ਨਧਞ੍ਞੇਨ ਪਰਿਵਤ੍ਤੇਤ੍ਵਾ ਲਦ੍ਧਂ ਗੋਰਸਮ੍ਪਿ ਨ ਵਟ੍ਟਤੀ’’ਤਿ ਵੁਤ੍ਤਂ.

ਕਪ੍ਪਿਯਵੋਹਾਰੇਪਿ ਵਿਧਾਨਂ ਵਕ੍ਖਾਮ, ਸੇਯ੍ਯਥਿਦਂ – ‘‘ਉਦਕਵਸੇਨਾ’’ਤਿਆਦਿ. ਦੁਬ੍ਬਿਨਿਬ੍ਭੋਗਂ ਹੋਤੀਤਿ ਇਦਂ ਪਰਤੋ ‘‘ਤਸ੍ਸੇਵ ਅਕਪ੍ਪਿਯਂ. ਕਸ੍ਮਾ? ਧਞ੍ਞਸ੍ਸ ਵਿਚਾਰਿਤਤ੍ਤਾ’’ਤਿ ਇਮਿਨਾ ਅਸਦਿਸਂ, ਤਸ੍ਮਾ ਸੁਵੁਤ੍ਤਂ. ਇਦਞ੍ਹਿ ਭਿਕ੍ਖੁਸ੍ਸ ਪਯੋਗਵਸੇਨ ਆਦਿਤੋ ਪਟ੍ਠਾਯ ਉਪ੍ਪਨ੍ਨੇਨ ਮਿਸ੍ਸਨ੍ਤਿ. ਅਕਤਪੁਬ੍ਬਂ ਨਵਸਸ੍ਸਂ ਨਾਮ. ਖਲੇ ਵਾ ਠਤ੍ਵਾ ਰਕ੍ਖਤੀਤਿ ‘‘ਇਦਂ ਵਾ ਏਤ੍ਤਕਂ ਵਾ ਮਾ ਗਣ੍ਹ, ਇਦਂ ਗਹੇਤੁਂ ਲਬ੍ਭਤੀ’’ਤਿ ਵਾ ‘‘ਇਤੋ ਅਪਨੇਹਿ, ਇਧ ਪੁਞ੍ਜਂ ਕਰੋਹੀ’’ਤਿ ਏਵਮਾਦਿਨਾ ਵਾ ਪਯੋਗੇਨ ਚੇ ਰਕ੍ਖਤਿ, ਤਂ ਅਕਪ੍ਪਿਯਂ. ‘‘ਸਚੇ ‘ਮਯਿਠਿਤੇ ਰਕ੍ਖਿਤਂ ਹੋਤੀ’ਤਿ ਰਕ੍ਖਤਿ, ਗਣ੍ਹਨ੍ਤੇ ਵਾ ਪਸ੍ਸਿਤ੍ਵਾ ‘ਕਿਂ ਕਰੋਥਾ’ਤਿ, ਭਣਤਿ ਵਟ੍ਟਤੀ’’ਤਿ ਵੁਤ੍ਤਂ, ਤਂ ਯੁਤ੍ਤਂ. ਰੂਪਿਯਪਟਿਗ੍ਗਹਣਸਿਕ੍ਖਾਪਦੇ ‘‘ਦ੍ਵਾਰਂ ਪਿਦਹਿਤ੍ਵਾ ਰਕ੍ਖਨ੍ਤੇਨ ਵਸਿਤਬ੍ਬ’’ਨ੍ਤਿ ਹਿ ਵੁਤ੍ਤਂ. ਤਸ੍ਸੇਵ ਤਂ ਅਕਪ੍ਪਿਯਂ. ਕਸ੍ਮਾ? ਅਪੁਬ੍ਬਸ੍ਸ ਅਨੁਪ੍ਪਾਦਿਤਤ੍ਤਾ. ਹੇਟ੍ਠਾ ‘‘ਸਸ੍ਸਂ ਕਤ੍ਵਾ ਆਹਰਥਾ’’ਤਿ ਵਤ੍ਤੁਂ ਪਨ ਨ ਵਟ੍ਟਤੀਤਿ. ਪਣ੍ਣੇਪਿ ਏਸੇਵ ਨਯੋ. ‘‘ਪਕਤਿਯਾ ਸਯਮੇਵ ਕਰੋਨ੍ਤਾਨਂ ਉਸ੍ਸਾਹਜਨਨਤੋ’’ਤਿ ਵੁਤ੍ਤਂ. ਕਸ੍ਮਾ? ‘‘ਕਹਾਪਣਾਨਂ ਵਿਚਾਰਿਤਤ੍ਤਾ’’ਤਿ ਵਚਨਤੋ, ਪਗੇਵ ਉਟ੍ਠਾਪਿਤਤ੍ਤਾਤਿ ਸਿਦ੍ਧਂ ਹੋਤਿ. ਸਚੇ ਦਾਯਕਾ ਵਾ ਸਙ੍ਘਸ੍ਸ ਗਾਮਖੇਤ੍ਤਾਰਾਮਾਦਿਂ ਕੇਣਿਯਾ ਗਹਿਤਮਨੁਸ੍ਸਾ ਵਾ ਤਤ੍ਥ ਕੁਟੁਮ੍ਬਿਨੋ ‘‘ਇਮੇ ਸਙ੍ਘਸ੍ਸ ਕਹਾਪਣਾ ਆਹਟਾ’’ਤਿ ਵਦਨ੍ਤਿ, ‘‘ਨ ਕਪ੍ਪਤੀ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ. ਕਪ੍ਪਿਯਕਾਰਕਾਵ ਚੇ ਵਦਨ੍ਤਿ, ‘‘ਸਙ੍ਘਸ੍ਸ ਕਹਾਪਣਾ ਨ ਕਪ੍ਪਨ੍ਤਿ, ਸਪ੍ਪਿਆਦੀਨਿ ਵਟ੍ਟਨ੍ਤੀ’’ਤਿ ਵਤ੍ਤਬ੍ਬਂ, ਤਸ੍ਮਾ ‘‘ਸਙ੍ਘਸ੍ਸ ਕਪ੍ਪਿਯਕਾਰਕੇ ਵਾ ਗੁਤ੍ਤਟ੍ਠਾਨਂ ਵਾ ਆਚਿਕ੍ਖਥਾ’’ਤਿ ਵਤ੍ਵਾ ਤੇਹਿ ਸਮ੍ਪਾਦਿਤਂ ਕੇਨਚਿ ਅਕਤ੍ਤਬ੍ਬਤਾਯ ‘‘ਇਮਿਨਾ ਸਪ੍ਪਿਂ ਆਹਰਾਹੀ’’ਤਿ ਵਿਚਾਰੇਤਿ ਨਿਟ੍ਠਾਪੇਤ੍ਵਾ ਇਤਰੇਸਂ ਕਪ੍ਪਿਯਂ ਪਰਤੋ ਪਤ੍ਤਚਤੁਕ੍ਕੇ ਚਤੁਤ੍ਥਪਤ੍ਤੋ ਵਿਯ. ਵੁਤ੍ਤਞ੍ਹਿ ਤਤ੍ਥ ‘‘ਇਮੇ ਕਹਾਪਣੇ ਗਹੇਤ੍ਵਾ ਇਮਂ ਦੇਹੀ’ਤਿ ਕਹਾਪਣੇ ਦਾਪੇਤ੍ਵਾ ਗਹਿਤੋ, ਅਯਂ ਪਤ੍ਤੋ ਏਤਸ੍ਸੇਵ ਭਿਕ੍ਖੁਨੋ ਨ ਵਟ੍ਟਤਿ, ਦੁਬ੍ਬਿਚਾਰਿਤਤ੍ਤਾ, ਅਞ੍ਞੇਸਂ ਪਨ ਵਟ੍ਟਤਿ, ਮੂਲਸ੍ਸ ਅਸਮ੍ਪਟਿਚ੍ਛਿਤਤ੍ਤਾ’’ਤਿਆਦਿ. ਯਦਿ ਏਵਂ ਸਬ੍ਬੇਸਂ ਅਕਪ੍ਪਿਯਂ. ਕਸ੍ਮਾ? ਕਹਾਪਣਾਨਂ ਵਿਚਾਰਿਤਤ੍ਤਾਤਿ. ਇਦਂ ਦੁਵੁਤ੍ਤਨ੍ਤਿ ਚੇ? ਨ, ਮੂਲਸ੍ਸ ਸਮ੍ਪਟਿਚ੍ਛਿਤਟ੍ਠਾਨਂ ਸਨ੍ਧਾਯ ਇਮਸ੍ਸ ਵੁਤ੍ਤਤ੍ਤਾ ਪਤ੍ਤਚਤੁਕ੍ਕੇ ਦੁਤਿਯਤਤਿਯਪਤ੍ਤਾ ਵਿਯ, ਤੇਨੇਵ ਵੁਤ੍ਤਂ ਸਯਂਕਾਰਿਵਾਰੇ ‘‘ਨ ਕਪ੍ਪਤੀ’’ਤਿ ਏਤ੍ਤਕਮੇਵ ਵਤ੍ਤਬ੍ਬ’ਨ੍ਤਿ. ਤਤੋ ਪਰਂ ਮੂਲਂ ਸਮ੍ਪਟਿਚ੍ਛਤਿ ਨਾਮ.

ਮਹਾਵਿਸਯਸਿਕ੍ਖਤ੍ਤਾ, ਰਾਜਸਿਕ੍ਖਾਪਦਂ ਇਦਂ;

ਰਞ੍ਞੋ ਵਿਯ ਦੁਵਿਞ੍ਞੇਯ੍ਯਂ, ਚਿਤ੍ਤਾਧਿਪ੍ਪਾਯਤੋਪਿ ਵਾ.

ਰਾਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਚੀਵਰਵਗ੍ਗੋ ਪਠਮੋ.