੨. ਕੋਸਿਯਵਗ੍ਗੋ
੧. ਕੋਸਿਯਸਿਕ੍ਖਾਪਦਵਣ੍ਣਨਾ
੫੪੨. ਕੋਸਿਯਕਾਰਕੋਤਿ ਏਤ੍ਥ ਕੋਸਂ ਕਰੋਨ੍ਤੀਤਿ ‘‘ਕੋਸਕਾਰਾ’’ਤਿ ਲਦ੍ਧਵੋਹਾਰਾਨਂ ਪਾਣਕਾਨਂ ਕੋਸਤੋ ਨਿਬ੍ਬਤ੍ਤਂ ਕੋਸਿਯਂ ਨਾਮ. ਅਤ੍ਤਨਾ ਕਤਂ ਚੇ? ਨਿਸ੍ਸਜ੍ਜਨਕਾਲੇ ‘‘ਸਯਂ ਕਤਂ ਨਿਸ੍ਸਗ੍ਗਿਯ’’ਨ੍ਤਿ ਵਤ੍ਤਬ੍ਬਂ. ਉਭੋਹਿ ਚੇ ਕਤਂ, ਯਥਾਪਾਠਮੇਵ ਵਤ੍ਤਬ੍ਬਂ. ਅਤ੍ਤਨਾ ਚ ਪਰੇਹਿ ਚ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤੀਤਿਆਦਿਚਤੁਕ੍ਕਮ੍ਪਿ ਸਮ੍ਭਵਨ੍ਤਂ ਨ ਦਸ੍ਸਿਤਂ. ਵਿਨਯਧਮ੍ਮਤਾ ਹੇਸਾ, ਯਦਿਦਂ ਏਕਸ੍ਮਿਂ ਤਿਕੇ ਵਾ ਚਤੁਕ੍ਕੇ ਵਾ ਦਸ੍ਸਿਤੇ ਇਤਰਂ ਸਮ੍ਭਵਨ੍ਤਮ੍ਪਿ ਨ ਵੁਚ੍ਚਤੀਤਿ.
ਕੋਸਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਸੁਦ੍ਧਕਾਲ਼ਕਸਿਕ੍ਖਾਪਦਵਣ੍ਣਨਾ
੫੪੭. ਸੁਦ੍ਧਕਾਲ਼ਕਾਨਨ੍ਤਿ ਏਤ੍ਥ ਯਥਾ ਪਠਮੇ ‘‘ਏਕੇਨਪਿ ਕੋਸਿਯਂਸੁਨਾ’’ਤਿ ਵੁਤ੍ਤਂ, ਤਥਾ ਇਧ ‘‘ਏਕੇਨਪਿ ਅਞ੍ਞੇਨ ਅਮਿਸ੍ਸੇਤ੍ਵਾ’’ਤਿ ਵਚਨਾਭਾਵਤੋ ਅਞ੍ਞੇਹਿ ਮਿਸ੍ਸਭਾਵੇ ਸਤਿਪਿ ਅਪਞ੍ਞਾਯਮਾਨਰੂਪਕਂ ‘‘ਸੁਦ੍ਧਕਾਲ਼ਕ’’ਮਿਚ੍ਚੇਵ ਵੁਚ੍ਚਤੀਤਿ ਵੇਦਿਤਬ੍ਬਂ.
ਸੁਦ੍ਧਕਾਲ਼ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ
੫੫੨. ‘‘ਧਾਰਯਿਤ੍ਵਾ ਦ੍ਵੇ ਤੁਲਾ ਆਦਾਤਬ੍ਬਾ’’ਤਿ ਵਚਨਤੋ ਯਥਾ ਤੁਲਾਧਾਰਣਾਯ ਕਾਲ਼ਕਾ ਅਧਿਕਾ ਨ ਹੋਨ੍ਤਿ, ਤਥਾ ਕਾਲ਼ਕਾਨਂ ਦ੍ਵੇ ਭਾਵਾ ਗਹੇਤਬ੍ਬਾ ਉਕ੍ਕਟ੍ਠਪਰਿਚ੍ਛੇਦੇਨ. ਕਥਂ ਪਞ੍ਞਾਯਤੀਤਿ? ਸੁਦ੍ਧਕਾਲ਼ਕਪਟਿਸੇਧਨਨਿਦਾਨੇਨ. ਤਤਿਯਂ ਓਦਾਤਾਨਂ ਚਤੁਤ੍ਥਂ ਗੋਚਰਿਯਾਨਨ੍ਤਿ ਹੇਟ੍ਠਿਮਪਰਿਚ੍ਛੇਦੋ. ਮਾਤਿਕਾਟ੍ਠਕਥਾਯਂ ਪਨ ‘‘ਏਕਸ੍ਸਪਿ ਕਾਲ਼ਕਲੋਮਸ੍ਸ ਅਤਿਰੇਕਭਾਵੇ ਨਿਸ੍ਸਗ੍ਗਿਯ’’ਨ੍ਤਿ (ਕਙ੍ਖਾ. ਅਟ੍ਠ. ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ, ਤਂ ਤੁਲਾਧਾਰਣਾਯ ਕਿਞ੍ਚਾਪਿ ਨ ਸਮੇਤਿ, ਅਚਿਤ੍ਤਕਤ੍ਤਾ ਪਨ ਸਿਕ੍ਖਾਪਦਸ੍ਸ ਪੁਬ੍ਬੇ ਤੁਲਾਯ ਧਾਰਯਿਤ੍ਵਾ ਠਪਿਤੇਸੁ ਏਕਮ੍ਪਿ ਲੋਮਂ ਤਤ੍ਥ ਪਤੇਯ੍ਯ ਨਿਸ੍ਸਗ੍ਗਿਯਨ੍ਤਿ ਅਧਿਪ੍ਪਾਯੋਤਿ ਨੋ ਤਕ੍ਕੋ. ਅਞ੍ਞਥਾ ਦ੍ਵੇ ਤੁਲਾ ਨਾਦਾਤਬ੍ਬਾ, ਊਨਕਤਰਾ ਆਦਾਤਬ੍ਬਾ ਸਿਯੁਂ. ਨ ਹਿ ਲੋਮਂ ਗਣੇਤ੍ਵਾ ਤੁਲਾਧਾਰਣਾ ਕਰੀਯਤਿ. ਅਥ ਗਣੇਤ੍ਵਾਵ ਕਾਤਬ੍ਬਂ. ਕਿਂ ਤੁਲਾਧਾਰਣਾਯ ਪਯੋਜਨਨ੍ਤਿ ਕੇਚਿ. ‘‘ਗੋਚਰਿਯਓਦਾਤੇਸੁ ਏਕਮੇਵ ਦਿਗੁਣਂ ਕਤ੍ਵਾ ਗਹੇਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਅਟ੍ਠਕਥਾਯਂ ਅਵਿਚਾਰਿਤਤ੍ਤਾ ਵੀਮਂਸਿਤਬ੍ਬਂ.
ਦ੍ਵੇਭਾਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ
੫੬੨. ਨਵਂ ਨਾਮ ਕਰਣਂ ਉਪਾਦਾਯਾਤਿ ਇਦਂ ਆਦਿਕਰਣਤੋ ਪਟ੍ਠਾਯ ਵਸ੍ਸਗਣਨਂ ਦੀਪੇਤਿ. ਕਰਿਤ੍ਵਾ ਵਾਤਿ ਵਚਨਂ ਨਿਟ੍ਠਾਨਦਿਵਸਤੋ ਪਟ੍ਠਾਯਾਤਿ ਦੀਪੇਤਿ. ਧਾਰੇਤਬ੍ਬਨ੍ਤਿ ਵਚਨਂ ਪਨ ਪਰਿਭੋਗਤੋ ਪਟ੍ਠਾਯਾਤਿ ਦੀਪੇਤਿ, ਯਸ੍ਮਾ ਲਦ੍ਧਸਮ੍ਮੁਤਿਕਸ੍ਸ ਗਤਗਤਟ੍ਠਾਨੇ ਛਨ੍ਨਂ ਛਨ੍ਨਂ ਵਸ੍ਸਾਨਂ ਓਰਤੋਵ ਕਤਾਨਿ ਬਹੂਨਿਪਿ ਹੋਨ੍ਤਿ, ਤਸ੍ਮਾ ਅਞ੍ਞਂ ਨਵਨ੍ਤਿ ਕਿਂ ਕਤਤੋ ਅਞ੍ਞਂ, ਉਦਾਹੁ ਧਾਰਿਤਤੋ ਅਞ੍ਞਨ੍ਤਿ? ਕਿਞ੍ਚੇਤ੍ਥ ਯਦਿ ਕਤਤੋ ਅਞ੍ਞਂ, ਤੇਸੁ ਅਞ੍ਞਤਰਂ ਦੁਕ੍ਕਤਂ ਵਾ ਪਰਿਭੋਗਜਿਣ੍ਣਂ ਵਾ ਪੁਨ ਕਾਤੁਂ ਵਟ੍ਟਤਿ, ਤਞ੍ਚ ਖੋ ਵਿਨਾਪਿ ਪੁਰਾਣਸਨ੍ਥਤਸ੍ਸ ਸੁਗਤਵਿਦਤ੍ਥਿਂ ਅਪ੍ਪਟਿਸਿਦ੍ਧਪਰਿਯਾਪਨ੍ਨਤ੍ਤਾ. ਕਤਤੋ ਹਿ ਅਞ੍ਞਂ ਪਟਿਸਿਦ੍ਧਂ, ਇਦਞ੍ਚ ਪੁਬ੍ਬਕਤਨ੍ਤਿ ਤਤੋ ਅਨਨ੍ਤਰਸਿਕ੍ਖਾਪਦਵਿਰੋਧੋ ਹੋਤਿ. ਅਥ ਧਾਰਿਤਤੋ ਅਞ੍ਞਂ ਨਾਮ, ਸਮ੍ਮੁਤਿ ਨਿਰਤ੍ਥਿਕਾ ਆਪਜ੍ਜਤਿ, ਪਠਮਕਤਂ ਚੇ ਅਪਰਿਭੁਤ੍ਤਂ, ਸਤਿਯਾਪਿ ਸਮ੍ਮੁਤਿਯਾ ਅਞ੍ਞਂ ਨਵਂ ਨ ਵਟ੍ਟਤੀਤਿ ਅਧਿਪ੍ਪਾਯੋ? ਤਤ੍ਰਿਦਂ ਸਨ੍ਨਿਟ੍ਠਾਨਨਿਦਸ੍ਸਨਂ – ਨਿਟ੍ਠਾਨਦਿਵਸਤੋ ਪਟ੍ਠਾਯ ਛਨ੍ਨਂ ਛਨ੍ਨਂ ਵਸ੍ਸਾਨਂ ਪਰਿਚ੍ਛੇਦੋ ਵੇਦਿਤਬ੍ਬੋ. ਤਤ੍ਥ ਚ ਸਤ੍ਤਮੇ ਵਸ੍ਸੇ ਸਮ੍ਪਤ੍ਤੇ ਛਬ੍ਬਸ੍ਸਾਨਿ ਪਰਿਪੁਣ੍ਣਾਨਿ ਹੋਨ੍ਤਿ. ਤਞ੍ਚ ਖੋ ਮਾਸਪਰਿਚ੍ਛੇਦਵਸੇਨ, ਨ ਵਸ੍ਸਪਰਿਚ੍ਛੇਦਵਸੇਨ. ਸਤ੍ਤਮੇ ਪਰਿਪੁਣ੍ਣਞ੍ਚ ਊਨਕਞ੍ਚ ਵਸ੍ਸਂ ਨਾਮ, ਤਸ੍ਮਾ ਵਿਪ੍ਪਕਤਸ੍ਸੇਵ ਸਚੇ ਛਬ੍ਬਸ੍ਸਾਨਿ ਪੂਰੇਨ੍ਤਿ, ਪੁਨ ਨਿਟ੍ਠਾਨਦਿਵਸਤੋ ਪਟ੍ਠਾਯ ਛਬ੍ਬਸ੍ਸਾਨਿ ਲਭਨ੍ਤਿ. ਤਞ੍ਚ ਖੋ ਪਰਿਭੁਤ੍ਤਂ ਵਾ ਹੋਤੁ ਅਪਰਿਭੁਤ੍ਤਂ ਵਾ, ਧਾਰਿਤਮੇਵ ਨਾਮ. ਯਸ੍ਮਾ ‘‘ਨਵਂ ਨਾਮ ਕਰਣਂ ਉਪਾਦਾਯ ਵੁਚ੍ਚਤੀ’’ਤਿ ਵੁਤ੍ਤਂ, ਤਸ੍ਮਾ ਛਨ੍ਨਂ ਵਸ੍ਸਾਨਂ ਪਰਤੋ ਤਮੇਵ ਪੁਬ੍ਬਕਤਂ ਦੁਕ੍ਕਤਭਾਵੇਨ, ਪਰਿਭੋਗਜਿਣ੍ਣਤਾਯ ਵਾ ਵਿਜਟੇਤ੍ਵਾ ਪੁਨ ਕਰੋਤਿ, ਨਿਟ੍ਠਾਨਦਿਵਸਤੋ ਪਟ੍ਠਾਯ ਛਬ੍ਬਸ੍ਸਪਰਮਤਾ ਧਾਰੇਤਬ੍ਬਂ, ਅਤਿਰੇਕਂ ਵਾ. ਅਨ੍ਤੋ ਚੇ ਕਰੋਤਿ, ਤਦੇਵ ਅਞ੍ਞਂ ਨਵਂ ਨਾਮ ਹੋਤਿ ਕਰਣਂ ਉਪਾਦਾਯ, ਤਸ੍ਮਾ ਨਿਸ੍ਸਗ੍ਗਿਯਂ. ਅਞ੍ਞਥਾ ‘‘ਨਵਂ ਨਾਮ ਕਰਣਂ ਉਪਾਦਾਯਾ’’ਤਿ ਇਮਿਨਾ ਨ ਕੋਚਿ ਵਿਸੇਸੋ ਅਤ੍ਥਿ. ਏਵਂ ਸਨ੍ਤੇ ਕਿਂ ਹੋਤਿ? ਅਟ੍ਠੁਪ੍ਪਤ੍ਤੀਤਿ. ‘‘ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਨ੍ਤੀ’’ਤਿ ਹਿ ਤਤ੍ਥ ਵੁਤ੍ਤਂ, ਤਞ੍ਚ ਅਞ੍ਞਸ੍ਸ ਕਰਣਂ ਦੀਪੇਤਿ. ਯਦਿ ਏਵਂ ਤਂ ਨਿਬ੍ਬਿਸੇਸਮੇਵ ਆਪਜ੍ਜਤੀਤਿ? ਨਾਪਜ੍ਜਤਿ. ਅਯਂ ਪਨਸ੍ਸ ਵਿਸੇਸੋ, ਯਸ੍ਮਾ ‘‘ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਅਨਾਪਤ੍ਤੀ’’ਤਿ ਵੁਤ੍ਤਤ੍ਥੋ ਵਿਸੇਸੋਤਿ. ਕਿਂ ਵੁਤ੍ਤਂ ਹੋਤਿ? ‘‘ਨਵਂ ਨਾਮ ਕਰਣਂ ਉਪਾਦਾਯ ਵੁਚ੍ਚਤੀ’’ਤਿ ਵੁਤ੍ਤੇ ਅਤਿਰੇਕਚੀਵਰਸ੍ਸ ਉਪ੍ਪਤ੍ਤਿ ਵਿਯ ਪਟਿਲਾਭੇਨਸ੍ਸ ਉਪ੍ਪਤ੍ਤਿ ਨਵਤਾ ਆਪਜ੍ਜਤਿ. ਤਤੋ ਪਟਿਲਦ੍ਧਦਿਵਸਤੋ ਪਟ੍ਠਾਯ ਛਬ੍ਬਸ੍ਸਪਰਮਤਾ ਧਾਰੇਤਬ੍ਬਂ. ਓਰੇਨ ਚੇ ਛਨ੍ਨਂ ਵਸ੍ਸਾਨਂ…ਪੇ… ਕਾਰਾਪੇਯ੍ਯ, ਨਿਸ੍ਸਗ੍ਗਿਯਨ੍ਤਿ ਆਪਜ੍ਜਤਿ, ਤਸ੍ਮਾ ਨਵਂ ਨਾਮ ਕਰਣਮੇਵ ਉਪਾਦਾਯ ਵੁਚ੍ਚਤਿ, ਨ ਪਟਿਲਾਭਂ. ਓਰੇਨ ਛਨ੍ਨਂ ਵਸ੍ਸਾਨਂ ਅਤ੍ਤਨੋ ਅਨੁਪ੍ਪਨ੍ਨਤ੍ਤਾ ‘‘ਨਵ’’ਨ੍ਤਿ ਸਙ੍ਖ੍ਯਂ ਗਤਂ, ਅਪ੍ਪਟਿਲਦ੍ਧਂ ਚੇ ਕਾਰਾਪੇਯ੍ਯ, ਯਥਾ ਲਾਭੋ, ਤਥਾ ਕਰੇਯ੍ਯ ਵਾ ਕਾਰਾਪੇਯ੍ਯ ਵਾਤਿ ਚ ਨ ਹੋਤਿ. ਕਸ੍ਮਾ? ਯਸ੍ਮਾ ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਅਨਾਪਤ੍ਤੀਤਿ ਵਿਸੇਸੋਤਿ.
ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ
੫੬੫. ਨਾਸ੍ਸੁਧ ਕੋਚੀਤਿ ਏਤ੍ਥ ਅਸ੍ਸੁਧ-ਇਤਿ ਅਵਧਾਰਣਤ੍ਥੇ ਨਿਪਾਤੋ. ਤਤ੍ਥ ਕਿਞ੍ਚਾਪਿ ‘‘ਏਵਂ ਭਨ੍ਤੇਤਿ ਖੋ ਤੇ ਭਿਕ੍ਖੂ’’ਤਿ ਬਹੁਵਚਨਂ ਵੁਤ੍ਤਂ, ਤਥਾਪਿ ਤੇ ਭਿਕ੍ਖੂ ਭਗਵਤੋ ਪਟਿਸ੍ਸੁਣਿਤ੍ਵਾ ਇਧ ਤੇਸੁ ਭਿਕ੍ਖੂਸੁ ਕੋਚਿ ਭਗਵਨ੍ਤਂ ਨਾਸ੍ਸੁਧ ਉਪਸਙ੍ਕਮਤਿ ਅਞ੍ਞਤ੍ਰ ਏਕੇਨਾਤਿ ਅਤ੍ਥੋ ਗਹੇਤਬ੍ਬੋ. ਤਂ ਸੁਗ੍ਗਾਹਂ ਏਕਾਹਂ ਭਨ੍ਤੇ ਭਗਵਨ੍ਤਂ ਵਰਨ੍ਤਿਆਦੀਸੁ (ਮਹਾਵ. ੩੩੭) ਵਿਯ, ਅਨੁਜਾਨਾਮਿ…ਪੇ… ਯਥਾਸੁਖਂ ਮਂ ਦਸ੍ਸਨਾਯ ਉਪਸਙ੍ਕਮਨ੍ਤੂਤਿ ਦਸ੍ਸਨਤ੍ਥਾਯ ਉਪਸਙ੍ਕਮਨ੍ਤੁ.
੫੬੬-੭. ‘‘ਮਯਂ ਆਯਸ੍ਮਨ੍ਤਂ ਉਪਸੇਨ’’ਨ੍ਤਿ ਤਸ੍ਸ ਗਣਪਾਮੋਕ੍ਖਤ੍ਤਾ ਵੁਤ੍ਤਂ. ਆਰਞ੍ਞਿਕਪਿਣ੍ਡਪਾਤਿਕਪਂਸੁਕੂਲਿਕਵਸੇਨ ਸਬ੍ਬਾਨਿ ਵੁਤ੍ਤਾਨਿ. ਤੇਨੇਵਾਹ ਅਟ੍ਠਕਥਾਯਂ ‘‘ਸਨ੍ਥਤੇ ਚਤੁਤ੍ਥਚੀਵਰਸਞ੍ਞਿਤਾਯਾ’’ਤਿ. ਕਿਂ ਸਬ੍ਬੇਪਿ ਤੇ ਚੀਵਰਂ ਨ ਬੁਜ੍ਝਨ੍ਤੀਤਿ ਚੇ? ਯਥਾ ਹੋਤੁ. ਕਤਮਂ ਚੀਵਰਂ ਨਾਮਾਤਿ? ਛਨ੍ਨਂ ਅਞ੍ਞਤਰਂ ਵਿਕਪ੍ਪਨੁਪਗਂ ਪਚ੍ਛਿਮਨ੍ਤਿ. ਕਿਞ੍ਚ ਵਾਯਿਮਂ ਅਵਾਯਿਮਨ੍ਤਿ? ਵਾਯਿਮਮੇਵਾਤਿ. ਕਤਰਸੁਤ੍ਤੇਨਾਤਿ? ਅਦ੍ਧਾ ਸੋ ਸੁਤ੍ਤਮੇਵ ਨ ਪਸ੍ਸਤਿ, ਸਿਵੇਯ੍ਯਕਂ ਦੁਸ੍ਸਯੁਗਂ, ਇਦ੍ਧਿਮਯਿਕਞ੍ਚ ਦੇਵਦਤ੍ਤਿਯਞ੍ਚ ਅਚੀਵਰਂ ਕਰੋਤਿ. ਯਦਿ ਏਵਂ ਅਵਾਯਿਮਮ੍ਪੀਤਿ ਵਦਾਮੀਤਿ. ਏਵਂ ਸਨ੍ਤੇ ਸਿਦ੍ਧਾ ਸਨ੍ਥਤੇ ਚੀਵਰਸਞ੍ਞਿਤਾ ਕਮ੍ਬਲਸੀਸੇਨ ਉਣ੍ਣਾਮਯਸਾਮਞ੍ਞਤੋ. ਕਿਂ ਪਨ ਤੇ ਸਨ੍ਥਤਂ ਅਧਿਟ੍ਠਹਿਂਸੂਤਿ? ਦੁਟ੍ਠੁ ਅਧਿਟ੍ਠਹਿਂਸੁ ਅਚੀਵਰਤ੍ਤਾ, ਨ ਅਧਿਟ੍ਠਾਨੁਪਗਤ੍ਤਾ ਚ ਸਨ੍ਥਤਸ੍ਸ. ਅਥ ਨਾਧਿਟ੍ਠਹਿਂਸੁ, ਪੁਬ੍ਬੇਵ ਤਤ੍ਥ ਅਚੀਵਰਸਞ੍ਞਿਨੋ ਏਤੇਤਿ ਕਤ੍ਵਾ ਤਤ੍ਥ ਚੀਵਰਸਞ੍ਞਿਤਾਯ ਤਦੁਭਯਂ ਨ ਯੁਜ੍ਜਤੀਤਿ. ਕਿਂ ਪਨੇਤਂ ਅਧਿਟ੍ਠਾਨੁਪਗਂ ਨਤ੍ਥੀਤਿ? ਤਤ੍ਥੇਵਾਗਤਂ, ਅਪਿਚੇਤਂ ਅਵਿਕਪ੍ਪਨੁਪਗਂ ਚੇ, ਚੀਵਰਂ ਨ ਹੋਤਿ, ਅਞ੍ਞਥਾ ‘‘ਚੀਵਰਂ ਨਾਮ ਛਨ੍ਨਂ ਚੀਵਰਾਨਂ ਅਞ੍ਞਤਰ’’ਨ੍ਤਿ ਏਤ੍ਤਾਵਤਾ ਸਿਦ੍ਧਂ ‘‘ਵਿਕਪ੍ਪਨੁਪਗਂ ਪਚ੍ਛਿਮ’’ਨ੍ਤਿ ਨ ਵਤ੍ਤਬ੍ਬਂ. ਅਥ ਨ ਵਿਕਪ੍ਪਨੁਪਗਮ੍ਪਿ ਚੀਵਰਮੇਵ ਸਿਦ੍ਧਂ, ਅਨਧਿਟ੍ਠਾਨੁਪਗਂ, ਅਵਿਕਪ੍ਪਨੁਪਗਞ੍ਚ ਏਕਜ੍ਝਂ ‘‘ਚੀਵਰ’’ਨ੍ਤਿ ਸਙ੍ਖ੍ਯਂ ਗਚ੍ਛਤਿ. ਤੇਨੇਵਾਹ ‘‘ਤੇਚੀਵਰਿਕਸ੍ਸ ਚਤੁਤ੍ਥਚੀਵਰਂ ਵਤ੍ਤਮਾਨਂ ਅਂਸਕਾਸਾਵਮੇਵ ਵਟ੍ਟਤੀ’’ਤਿ.
ਅਪਿਚ ਸਨ੍ਥਤੇ ਚੀਵਰਸਞ੍ਞਿਤਾ ਨ ਕੇਵਲਂ ਤੇਸਂਯੇਵ, ਅਞ੍ਞੇਸਮ੍ਪਿ ਅਨੁਬਨ੍ਧਤਿ ਏਵ ‘‘ਪੁਰਾਣਸਨ੍ਥਤਂ ਨਾਮ ਸਕਿਂ ਨਿਵਤ੍ਥਮ੍ਪਿ ਸਕਿਂ ਪਾਰੁਤਮ੍ਪੀ’’ਤਿ ਵਚਨਤੋ. ਅਟ੍ਠਕਥਾਚਰਿਯੋ ਪਨਸ੍ਸ ਅਚੀਵਰਤਂ ਸਨ੍ਧਾਯਭਾਸਿਤਤ੍ਥਦੀਪਨੇਨ ਦੀਪੇਤਿ. ਨਿਵਤ੍ਥਪਾਰੁਤਨ੍ਤਿ ਏਤੇਸਂ ਨਿਸਿਨ੍ਨਞ੍ਚੇਵ ਨਿਪਨ੍ਨਞ੍ਚਾਤਿ ਅਤ੍ਥੋ. ਅਪਿਚ ਏਵਂ ਸਨ੍ਤੇਪਿ ਸਨ੍ਥਤੇ ਚੀਵਰਸਞ੍ਞਿਤਾ ਅਨੁਬਨ੍ਧਤਿ ਏਵ. ਖਨ੍ਧਕੇ (ਮਹਾਵ. ੩੫੮) ਹਿ ‘‘ਨਿਸੀਦਨਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁ’’ਨ੍ਤਿ ਚ, ਪਰਿਵਾਰੇ (ਪਰਿ. ੩੨੯) ‘‘ਨਵ ਚੀਵਰਾਨਿ ਅਧਿਟ੍ਠਾਤਬ੍ਬਾਨੀ’’ਤਿ ਚ ਨਿਸੀਦਨਸਿਕ੍ਖਾਪਦੇ ‘‘ਦਸਾ ਵਿਦਤ੍ਥੀ’’ਤਿ ਚ ਇਧ ‘‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’’ਤਿ ਚ ਵੁਤ੍ਤਂ, ਅਟ੍ਠਕਥਾਯਞ੍ਚਸ੍ਸ ‘‘ਸਨ੍ਥਤਸਦਿਸਂ ਸਨ੍ਥਰਿਤ੍ਵਾ ਏਕਸ੍ਮਿਂ ਅਨ੍ਤੇ ਸੁਗਤਵਿਦਤ੍ਥਿਯਾ ਵਿਦਤ੍ਥਿਮਤ੍ਤਪਦੇਸੇ ਦ੍ਵੀਸੁ ਠਾਨੇਸੁ ਫਾਲੇਤ੍ਵਾ ਤਿਸ੍ਸੋ ਦਸਾ ਕਰੀਯਨ੍ਤਿ, ਤਾਹਿ ਦਸਾਹਿ ਸਦਸਂ ਨਾਮ ਵੁਚ੍ਚਤੀ’’ਤਿ ਚ ‘‘ਨਿਸੀਦਨਂ ਵੁਤ੍ਤਨਯੇਨ ਅਧਿਟ੍ਠਾਤਬ੍ਬਮੇਵ, ਤਞ੍ਚ ਖੋ ਪਮਾਣਯੁਤ੍ਤਂ ਏਕਮੇਵ, ਦ੍ਵੇ ਨ ਵਟ੍ਟਨ੍ਤੀ’’ਤਿ ਚ ਵੁਤ੍ਤਂ, ਤਸ੍ਮਾ ਨਿਸੀਦਨਂ ਨਾਮ ਨਵਨ੍ਨਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਅਧਿਟ੍ਠਾਤਬ੍ਬਂ, ਤਞ੍ਚ ਸਨ੍ਥਤਸਦਿਸਂ ਏਲ਼ਕਲੋਮਮਯਸਨ੍ਥਤਵਿਸੇਸਨ੍ਤਿ ਸਿਦ੍ਧਂ, ਤਥਾ ਨਿਸੀਦਨਮੇਵ ਨਿਸੀਦਨਸਨ੍ਥਤਞ੍ਚ ਸਿਦ੍ਧਂ. ਪੋਰਾਣਗਣ੍ਠਿਪਦੇ ਚ ‘‘ਏਕਮੇਵਾ’’ਤਿ ਵੁਤ੍ਤਂ. ਤਸ੍ਮਿਂ ਸਿਦ੍ਧੇ ਸਿਦ੍ਧਾ ਸਨ੍ਥਤੇ ਚੀਵਰਸਞ੍ਞਿਤਾਤਿ ਅਤ੍ਥੋ. ਕਸ੍ਮਾ? ਸਨ੍ਥਤਸਾਮਞ੍ਞਤੋ.
ਏਤ੍ਥਾਹ – ਕਥਂ ਅਦਸਮੇਵ ਸਨ੍ਥਤਂ ਚੀਵਰਸਙ੍ਖ੍ਯਂ ਨ ਗਚ੍ਛਤਿ. ਅਨੇਕਮ੍ਪਿ ਅਨਧਿਟ੍ਠਿਤਮ੍ਪਿ ਮਹਨ੍ਤਮ੍ਪਿ ਵਟ੍ਟਤਿ, ਯਤੋ ਸਦਸਮੇਵ ਸਨ੍ਥਤਂ ਚੀਵਰਸਙ੍ਖ੍ਯਂ ਗਚ੍ਛਤਿ, ਤਤੋ ਅਧਿਟ੍ਠਾਨਞ੍ਚ ਉਪਗਚ੍ਛਤੀਤਿ. ਅਸਨ੍ਥਤਪਰਿਯਾਪਨ੍ਨਤ੍ਤਾ ਓਰੇਨ ਚ ਛਨ੍ਨਂ ਵਸ੍ਸਾਨਂ ਵਿਨਾਪਿ ਸਮ੍ਮੁਤਿਂ, ਤਞ੍ਚ ਪੋਰਾਣਂ ਵਿਸ੍ਸਜ੍ਜੇਤ੍ਵਾ ਏਵ, ਨ ਅਵਿਸ੍ਸਜ੍ਜੇਤ੍ਵਾ ‘‘ਤਞ੍ਚ ਖੋ ਪਮਾਣਯੁਤ੍ਤਂ ਏਕਮੇਵ, ਦ੍ਵੇ ਨ ਵਟ੍ਟਨ੍ਤੀ’’ਤਿ (ਪਾਰਾ. ਅਟ੍ਠ. ੨.੪੬੯) ਵਚਨਤੋਤਿ. ਅਥਾਪਿ ਸਿਯਾ ਸਨ੍ਥਤਂ ਸਯਨਤ੍ਥਮੇਵ ਕਰੀਯਤਿ, ਨਿਸੀਦਨਂ ਅਸਨ੍ਥਤਮੇਵਾਤਿ. ਤਞ੍ਚ ਨ ਨਿਯਮਤੋ ‘‘ਪੁਰਾਣਸਨ੍ਥਤਂ ਨਾਮ ਸਕਿਂ ਨਿਵਤ੍ਥਂ ਸਕਿਂ ਪਾਰੁਤਮ੍ਪੀ’’ਤਿ ਵੁਤ੍ਤਤ੍ਤਾਤਿ. ਏਤ੍ਥ ਵੁਚ੍ਚਤਿ, ਨ ਏਤ੍ਥ ਕਾਰਣਂ ਪਰਿਯੇਸਿਤਬ੍ਬਂ ਵਿਨਯਪਞ੍ਞਤ੍ਤਿਯਾ ਅਨਞ੍ਞਵਿਸਯਤ੍ਤਾ.
ਸਨ੍ਥਤਸ੍ਸ ਪਨ ਅਚੀਵਰਭਾਵੇ ਅਯਂ ਯੁਤ੍ਤਿ – ਆਦਿਤੋ ‘‘ਤੀਣਿ ਸਨ੍ਥਤਾਨਿ ਪਨ ਵਿਨਯਕਮ੍ਮਂ ਕਤ੍ਵਾ ਪਟਿਲਭਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤੀ’’ਤਿ ਅਟ੍ਠਕਥਾਵਚਨਤੋ ਤਾਨਿ ਅਕਪ੍ਪਿਯਾਨੀਤਿ ਸਿਦ੍ਧਂ, ਭਗਵਤਾ ਚ ਖੋਮਾਦੀਨਿ ਛ ਅਨੁਞ੍ਞਾਤਾਨੀਤਿ ਕੋਸੇਯ੍ਯਂ ਕਪ੍ਪਿਯਨ੍ਤਿ ਸਿਦ੍ਧਂ. ਏਵਂ ਸਨ੍ਤੇ ਸੁਦ੍ਧਕੋਸੇਯ੍ਯਮ੍ਪਿ ਚੀਵਰਂ ਕਪ੍ਪਿਯਂ ਜਾਤਂ, ਪਗੇਵ ਕੋਸਿਯਮਿਸ੍ਸਕਸਨ੍ਥਤਚੀਵਰਨ੍ਤਿ ਆਪਜ੍ਜਤਿ. ਤਥਾ ਕਮ੍ਬਲਞ੍ਚ ਅਨੁਞ੍ਞਾਤਂ, ਤਞ੍ਚ ਸੁਦ੍ਧਿਕਮ੍ਪਿ ਹੋਤਿ ਜਾਤਿਕਾਲ਼ਕਭਾਵੇਨ, ਪਗੇਵ ਓਦਾਤਗੋਚਰਿਯਮਿਸ੍ਸਕਸਨ੍ਥਤਚੀਵਰਨ੍ਤਿ ਆਪਜ੍ਜਤਿ. ਤਤੋ ਚ ਅਞ੍ਞਮਞ੍ਞਵਿਰੋਧੋ, ਤਸ੍ਮਾ ਨ ਸਨ੍ਥਤਂ ਚੀਵਰਂ ਨਾਮ ਹੋਤਿ, ਨਿਸੀਦਨਂ ਪਨ ਹੋਤਿ ਤਸ੍ਸ ਪਮਾਣਸਣ੍ਠਾਨਪਰਿਚ੍ਛੇਦਸਮ੍ਭਵਤੋ. ਏਤ੍ਥਾਹੁ ਕੇਚਿ ਆਚਰਿਯਾ ‘‘ਦੁਵਿਧਂ ਨਿਸੀਦਨਂ ਸਨ੍ਥਤਂ, ਅਸਨ੍ਥਤਞ੍ਚ. ਤਤ੍ਥ ਸਨ੍ਥਤਂ ਸਨ੍ਥਤਮੇਵ. ਅਸਨ੍ਥਤਂ ਖੋਮਾਦਿਛਬ੍ਬਿਧਂ, ਤਦਨੁਲੋਮਂ ਵਾ ਹੋਤਿ, ਅਯਮੇਤੇਸਂ ਵਿਸੇਸੋ’’ਤਿ.
ਏਤ੍ਥਾਹ – ਕਸ੍ਮਾ ਪਨੇਤ੍ਥ ‘‘ਸਨ੍ਥਤਂ ਪਨ ਭਿਕ੍ਖੁਨਾ’’ਤਿ ਸਿਕ੍ਖਾਪਦਂ ਅਪਞ੍ਞਾਪੇਤ੍ਵਾ ‘‘ਨਿਸੀਦਨਸਨ੍ਥਤ’’ਨ੍ਤਿ ਪਞ੍ਞਤ੍ਤਨ੍ਤਿ? ਚੀਵਰਸਞ੍ਞਿਤਾਯ ਸਨ੍ਥਤਾਨਂ ਉਜ੍ਝਿਤਤ੍ਤਾ ਤੇਸਂ ਅਚੀਵਰਭਾਵਦਸ੍ਸਨਤ੍ਥਂ ਤਥਾ ਪਞ੍ਞਤ੍ਤਨ੍ਤਿ ਵੁਤ੍ਤਂ ਹੋਤਿ, ਤਸ੍ਮਾ ਤੇ ਭਿਕ੍ਖੂ ਧੁਤਙ੍ਗਭੇਦਭਯਾ ਤਾਨਿ ਉਜ੍ਝਿਤ੍ਵਾ ਤੇਰਸਾਪਿ ਧੁਤਙ੍ਗਾਨਿ ਸਮਾਦਿਯਿਂਸੁ, ਸੀਸਦਸ੍ਸਨਵਸੇਨ ਤੀਣੇਵ ਵੁਤ੍ਤਾਨਿ, ਭਗਵਾ ਚ ਤੇਸਂ ਸਨ੍ਥਤਂ ਅਨੁਜਾਨਿ, ਤਤੋ ਨੇਸਂ ਏਵਂ ਹੋਤਿ ‘‘ਨਿਸੀਦਨਚੀਵਰਸਣ੍ਠਾਨਮ੍ਪੇਤਂ ਨਿਸੀਦਨਸਨ੍ਥਤਂ ਨੋ ਅਨੁਞ੍ਞਾਤਂ, ਚਤੁਤ੍ਥਚੀਵਰਭਾਵੇਨ ਪਗੇਵ ਕਤਸਨ੍ਥਤਂ ਵਾ’’ਤਿ. ਤਤੋ ਸਨ੍ਥਤੇ ਨੇਸਂ ਚੀਵਰਸਞ੍ਞਿਤਾ ਨ ਭਵਿਸ੍ਸਤੀਤਿ ਤਦਤ੍ਥਂ ਭਗਵਤਾ ਨਿਸੀਦਨਸਨ੍ਥਤਨ੍ਤਿ ਪਞ੍ਞਤ੍ਤਨ੍ਤਿ ਅਧਿਪ੍ਪਾਯੋ. ‘‘ਪਚ੍ਛਿਮਾਨਿ ਦ੍ਵੇ ਵਟ੍ਟਨ੍ਤੀ’’ਤਿ ਕਥਂ ਪਞ੍ਞਾਯਤੀਤਿ ਚੇ? ‘‘ਅਨਾਪਤ੍ਤਿ ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤੀ’’ਤਿ ਵਚਨਤੋਤਿ.
ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ
੫੭੨-੩. ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸਾਤਿ ਇਮਿਨਾ ਪਕਤਿਯਾ ਦੀਘਮਗ੍ਗਪ੍ਪਟਿਪਨ੍ਨਸ੍ਸ ਉਪ੍ਪਨ੍ਨਾਨਿਪਿ ਤਿਯੋਜਨਪਰਮਮੇਵ ਹਰਿਤਬ੍ਬਾਨਿ, ਪਗੇਵ ਅਪ੍ਪਟਿਪਨ੍ਨਸ੍ਸਾਤਿ ਦਸ੍ਸੇਤਿ. ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸ ਨਿਸ੍ਸਗ੍ਗਿਯਨ੍ਤਿ ਵਾ ਸਮ੍ਬਨ੍ਧੋ. ਤੇਨੇਵ ਵਾਸਾਧਿਪ੍ਪਾਯਸ੍ਸ ਪਟਿਪ੍ਪਸ੍ਸਦ੍ਧਗਮਨੁਸ੍ਸਾਹਤ੍ਤਾ ‘‘ਅਪ੍ਪਟਿਪਨ੍ਨੋ’’ਤਿ ਸਙ੍ਖ੍ਯਂ ਗਤਸ੍ਸ ਅਨਾਪਤ੍ਤੀਤਿ ਸਿਦ੍ਧਾ. ਇਮਸ੍ਮਿਂ ਅਤ੍ਥਵਿਕਪ੍ਪੇ ਹਿ ਭਿਕ੍ਖੁਨੋ ਪਨੇਵ ਏਲ਼ਕਲੋਮਾਨਿ ਉਪ੍ਪਜ੍ਜੇਯ੍ਯੁਂ…ਪੇ… ਅਸਨ੍ਤੇਪਿ ਹਾਰਕੇ ਅਦ੍ਧਾਨਂ ਮਗ੍ਗਪ੍ਪਟਿਪਨ੍ਨਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਨ੍ਤਿ ਯੋਜਨਾ ਵੇਦਿਤਬ੍ਬਾ. ਆਕਙ੍ਖਮਾਨੇਨ ਭਿਕ੍ਖੁਨਾ ਪਟਿਗ੍ਗਹੇਤਬ੍ਬਾਨੀਤਿ ਅਤ੍ਤਨੋ ਸਨ੍ਤਕਾਨਂਯੇਵ ਤਿਯੋਜਨਾਤਿਕ੍ਕਮੇ ਆਪਤ੍ਤਿਂ ਦਸ੍ਸੇਤਿ. ਤੇਨ ਅਨਾਕਙ੍ਖਮਾਨੇਨ ਪਰਸਨ੍ਤਕਾਨਿ ਪਟਿਗ੍ਗਹਿਤਾਨਿ ਅਤਿਰੇਕਤਿਯੋਜਨਂ ਹਰਨ੍ਤਸ੍ਸ ਅਨਾਪਤ੍ਤਿ ਸਿਦ੍ਧਾ. ਅਯਮਤ੍ਥੋ ‘‘ਭਿਕ੍ਖੁਨੋ ਉਪ੍ਪਜ੍ਜੇਯ੍ਯੁ’’ਨ੍ਤਿ ਇਮਿਨਾ, ‘‘ਅਚ੍ਛਿਨ੍ਨਂ ਪਟਿਲਭਿਤ੍ਵਾ’’ਤਿ ਇਮਿਨਾ ਚ ਦੀਪਿਤੋਵ ਹੋਤੀਤਿ. ਪੋਰਾਣਗਣ੍ਠਿਪਦੇ ਚ ‘‘ਅਞ੍ਞਂ ਭਿਕ੍ਖੁਂ ਹਰਾਪੇਨ੍ਤੋ ਗਚ੍ਛਤਿ ਚੇ, ਦ੍ਵਿਨ੍ਨਂ ਅਨਾਪਤ੍ਤੀਤਿ ਵੁਤ੍ਤਂ, ਤਸ੍ਮਾ ਦ੍ਵੇ ਭਿਕ੍ਖੂ ਤਿਯੋਜਨਪਰਮਂ ਪਤ੍ਵਾ ਅਞ੍ਞਮਞ੍ਞਸ੍ਸ ਭਣ੍ਡਂ ਪਰਿਵਤ੍ਤੇਤ੍ਵਾ ਚੇ ਹਰਨ੍ਤਿ, ਅਨਾਪਤ੍ਤੀਤਿ ਸਿਦ੍ਧਂ, ਤੇਨੇਵ ਅਨਾਪਤ੍ਤਿਵਾਰੇ ‘‘ਅਞ੍ਞਂ ਹਰਾਪੇਤੀ’’ਤਿ ਵੁਤ੍ਤਂ. ਕਿਂ ਹਰਾਪੇਤਿ? ਜਾਨਨ੍ਤਂ ਅਜਾਨਨ੍ਤਂ. ਕਿਞ੍ਚੇਤ੍ਥ ਯਦਿ ਜਾਨਨ੍ਤਂ, ‘‘ਅਞ੍ਞੋ ਹਰਿਸ੍ਸਤੀਤਿ ਠਪੇਤਿ, ਤੇਨ ਹਰਿਤੇਪਿ ਆਪਤ੍ਤਿਯੇਵਾ’’ਤਿ ਏਕਂਸਤੋ ਨ ਵਤ੍ਤਬ੍ਬਂ. ਜਾਨਨ੍ਤੋਪਿ ਹਿ ਏਕਚ੍ਚੋ ਹਰਤੀਤਿ. ਤਤੋ ਅਟ੍ਠਕਥਾਯ ਵਿਰੁਜ੍ਝਤਿ. ਅਥ ਅਜਾਨਨ੍ਤਂ, ‘‘ਅਞ੍ਞਸ੍ਸ ਯਾਨੇ ਵਾ ਭਣ੍ਡੇ ਵਾ ਅਜਾਨਨ੍ਤਸ੍ਸ ਪਕ੍ਖਿਪਿਤ੍ਵਾ ਤਿਯੋਜਨਂ ਅਤਿਕ੍ਕਾਮੇਤਿ, ਨਿਸ੍ਸਗ੍ਗਿਯਾਨੀ’’ਤਿ ਪਾਲ਼ਿਯਾ ਵਿਰੁਜ੍ਝਤਿ, ਅਥ ਉਭੋਪਿ ਏਕਤੋ ਏਕਂ ਭਣ੍ਡਂ ਹਰਾਪੇਨ੍ਤਿ, ਤਮ੍ਪਿ ਨਿਸ੍ਸਗ੍ਗਿਯਂ ਸਿਯਾ. ਅਨਿਸ੍ਸਗ੍ਗਿਯਨ੍ਤਿ ਯੁਤ੍ਤਿਯਾ ਵਿਰੁਜ੍ਝਤਿ ‘‘ਤਿਯੋਜਨਪਰਮਂ ਸਹਤ੍ਥਾ ਹਰਿਤਬ੍ਬਾਨਿ ਅਸਨ੍ਤੇ ਹਾਰਕੇ’’ਤਿ ਅਵਿਸੇਸੇਨ ਚ ਪਾਲ਼ਿ ਵੁਤ੍ਤਾ. ਹਾਰਕੋਪਿ ਸਚੇਤਨੋ ਅਚੇਤਨੋਤਿ ਦੁਵਿਧੋ. ਸਚੇਤਨੋਪਿ ਏਲ਼ਕਲੋਮਭਾਵਂ ਵਾ ‘‘ਅਹਮਿਦਂ ਹਰਾਮੀ’’ਤਿ ਵਾ ‘‘ਮਂ ਏਸ ਇਦਂ ਹਰਾਪੇਤੀ’’ਤਿ ਵਾ ਜਾਨਨਾਜਾਨਨਵਸੇਨ ਦੁਵਿਧੋ ਹੋਤਿ. ਤਤ੍ਥ ਅਚੇਤਨੋ ਨਾਮ ਹਾਰਕੋ ਨਦੀਸੋਤੋ ਵਾ ਨਾਵਾ ਵਾ ਅਸ੍ਸਾਮਿਕਯਾਨਂ ਵਾ ਹੋਤਿ. ਸਚੇਤਨੋ ਪਾਕਟੋਵ. ਤਤ੍ਥ ‘‘ਮਂ ਏਸ ਇਦਂ ਹਰਾਪੇਤੀ’’ਤਿ ਏਤ੍ਤਕਂ ਜਾਨਨ੍ਤਂ ਮਨੁਸ੍ਸਂ ਵਾ ਤਿਰਚ੍ਛਾਨਗਤਂ ਵਾ ਅਞ੍ਞਂ ਹਰਾਪੇਤਿ, ਅਨਾਪਤ੍ਤੀਤਿ ਅਨੁਗਣ੍ਠਿਪਦਨਯੋ. ਅਯਂ ਪਾਲ਼ਿਯਾ, ਅਟ੍ਠਕਥਾਯ ਚ ਏਕਰਸੋ ਵਿਨਿਚ੍ਛਯੋ, ‘‘ਅਸਨ੍ਤੇ ਹਾਰਕੇ’’ਤਿ ਕਿਞ੍ਚਾਪਿ ਇਦਂ ਅਵਿਸੇਸਤੋ ਵੁਤ੍ਤਂ, ‘‘ਅਞ੍ਞਸ੍ਸ ਯਾਨੇ ਵਾ ਭਣ੍ਡੇ ਵਾ ਅਜਾਨਨ੍ਤਸ੍ਸਾ’’ਤਿ ਵਚਨਤੋ ਪਨ ਸਚੇਤਨੋਵ ਹਾਰਕੋ ਤਤ੍ਥ ਅਧਿਪ੍ਪੇਤੋਤਿ ਪਞ੍ਞਾਯਤਿ, ਸੋ ਚ ਏਲ਼ਕਲੋਮਭਾਵਞ੍ਚ ‘‘ਇਦਂ ਹਰਾਮੀ’’ਤਿ ਚ ਜਾਨਨ੍ਤੋ ਨਾਧਿਪ੍ਪੇਤੋ. ਤੇਨ ਵੁਤ੍ਤਂ ‘‘ਅਞ੍ਞੋ ਹਰਿਸ੍ਸਤੀਤਿ ਠਪੇਤਿ, ਤੇਨ ਹਰਿਤੇਪਿ ਆਪਤ੍ਤਿਯੇਵਾ’’ਤਿਆਦਿ. ਤਤ੍ਥ ਹੇਤੁਕਤ੍ਤੁਨੋ ਅਭਾਵਤੋਵ. ਪਾਲ਼ਿਯਞ੍ਹਿ ‘‘ਅਞ੍ਞਂ ਹਰਾਪੇਤੀ’’ਤਿ ਹੇਤੁਕਤ੍ਤੁਵਸੇਨ ਵੁਤ੍ਤਾ. ਇਤਰੇ ਦ੍ਵੇ ਜਾਨਨ੍ਤਾ ਇਧ ਸਮ੍ਭਵਨ੍ਤਿ. ‘‘ਅਜਾਨਨ੍ਤਸ੍ਸ ਪਕ੍ਖਿਪਿਤ੍ਵਾ’’ਤਿ ਪਾਲ਼ਿਯਂ ‘‘ਏਸ ਹਰਾਪੇਤੀ’’ਤਿ ਵਾ ‘‘ਇਦਂ ਠਾਨਂ ਅਤਿਕ੍ਕਮਾਪੇਤੀ’’ਤਿ ਵਾ ਜਾਨਨ੍ਤਸ੍ਸ ਯਾਨੇ ਵਾ ਭਣ੍ਡੇ ਵਾ ਪਕ੍ਖਿਪਿਤ੍ਵਾ ਤਿਯੋਜਨਂ ਅਤਿਕ੍ਕਮਾਪੇਤਿ, ਨ ਨਿਸ੍ਸਗ੍ਗਿਯਾ ਹੋਨ੍ਤੀਤਿ ਦੀਪੇਤਿ.
‘‘ਹਰਾਪੇਤੀ’’ਤਿ ਇਦਂ ਹੇਤੁਕਤ੍ਤੁਵਚਨਤਂ ਸਾਧੇਤਿ, ਤਸ੍ਮਾ ਅਟ੍ਠਕਥਾਯਂ ‘‘ਸਾਮਿਕਸ੍ਸ ਅਜਾਨਨ੍ਤਸ੍ਸੇਵਾ’’ਤਿ ਇਦਂ ‘‘ਮਂ ਏਸ ਹਰਾਪੇਤੀ’’ਤਿ ਏਵਂ ਅਜਾਨਨ੍ਤਂ ਸਨ੍ਧਾਯ ਵੁਤ੍ਤਂ. ‘‘ਸਾਰੇਤਿ ਚੋਦੇਤਿ ਅਨੁਬਨ੍ਧਾਪੇਤੀ’’ਤਿ ਇਦਂ ‘‘ਮਂ ਏਸ ਇਦਂ ਠਾਨਂ ਅਤਿਕ੍ਕਮਾਪੇਤੀ’’ਤਿ ਏਵਂ ਜਾਨਨ੍ਤਂ ਸਨ੍ਧਾਯ ਵੁਤ੍ਤਂ. ਅਜਾਨਨ੍ਤੋਪਿ ਸਾਰਣਾਦੀਹਿ ਠਿਤਟ੍ਠਾਨਂ ਨਾਤਿਕ੍ਕਮਤਿ, ਨ ਵਾ ਅਨੁਬਨ੍ਧਤਿ. ਅਥ ਸਾਰਣਾਦੀਹਿ ਅਨਤਿਕ੍ਕਮਿਤ੍ਵਾ ਅਤ੍ਤਨੋ ਰੁਚਿਯਾ ਅਤਿਕ੍ਕਮਤਿ ਆਪਤ੍ਤਿ ਏਵ ਭਿਕ੍ਖੁਨੋ ਹੇਤੁਕਤ੍ਤੁਭਾਵਾਸਮ੍ਭਵਤੋ.
ਇਦਾਨਿ ਯਥਾਠਿਤਟ੍ਠਾਨਤੋ ਪਟ੍ਠਾਯ ਵਕ੍ਖਾਮ, ‘‘ਅਸਨ੍ਤੇਪਿ ਹਾਰਕੇ’’ਤਿ ਹਾਰਕਾਲਾਭਪਚ੍ਚਯਾਪਿ ਸਯਂ ਹਰਣਤੋ ਨਿਸ੍ਸਗ੍ਗਿਯਮੇਵ, ਪਗੇਵ ਸਤਿ ਹਾਰਕੇਤਿ ਅਯਮੇਕੋ ਅਤ੍ਥੋ. ਅਵਧਾਰਣਤ੍ਥਂ ਅਪਿ-ਸਦ੍ਦਂ ਗਹੇਤ੍ਵਾ ਅਸਨ੍ਤੇ ਏਵ ਹਾਰਕੇ ਨਿਸ੍ਸਗ੍ਗਿਯਂ, ਸਤਿ ਪਨ ਹਾਰਕੇ ਨ ਤੇਨ ਹਰਾਪੇਨ੍ਤਸ੍ਸ ਨਿਸ੍ਸਗ੍ਗਿਯਨ੍ਤਿ ਅਯਂ ਦੁਤਿਯੋ ਅਤ੍ਥੋ. ‘‘ਸਙ੍ਘਤੋ ਵਾ…ਪੇ… ਅਤ੍ਤਨੋ ਵਾ ਧਨੇਨਾ’’ਤਿ ਇਮਿਨਾ ਕਿਞ੍ਚਾਪਿ ਅਚਿਤ੍ਤਕਮਿਦਂ ਸਿਕ੍ਖਾਪਦਂ, ਸਙ੍ਘਾਦਿਤੋ ਪਨ ਅਤ੍ਤਨਾ ਆਕਙ੍ਖਮਾਨੇਨ ਪਟਿਗ੍ਗਹਿਤਸ੍ਸੇਵ ਏਲ਼ਕਲੋਮਸ੍ਸ ਤਿਯੋਜਨਾਤਿਕ੍ਕਮੇ ਆਪਤ੍ਤਿ, ਨ ਅਜਾਨਤੋ ਅਪ੍ਪਟਿਗ੍ਗਹਿਤਸ੍ਸ ਚੀਵਰਾਦੀਸੁ ਕੁਤੋਚਿ ਲਗ੍ਗਸ੍ਸ ਅਤਿਕ੍ਕਮਨੇਤਿ ਦੀਪੇਤਿ. ਅਨੁਗਣ੍ਠਿਪਦੇ ਪਨ ‘‘ਕਮ੍ਬਲਸ੍ਸ ਉਪਰਿ ਨਿਪਜ੍ਜਿਤ੍ਵਾ ਗਚ੍ਛਨ੍ਤਸ੍ਸ ਸਚੇ ਏਕਮ੍ਪਿ ਲੋਮਂ ਚੀਵਰੇ ਲਗ੍ਗਂ ਹੋਤਿ, ਆਪਤ੍ਤਿ ਏਵ ਕਮ੍ਬਲਤੋ ਵਿਜਟਿਤਤ੍ਤਾ’’ਤਿ ਵੁਤ੍ਤਂ, ਤਂ ਕਮ੍ਬਲਸ੍ਸ ਪਟਿਗ੍ਗਹਿਤਤ੍ਤਾ ਅਤ੍ਤਨੋ ਇਚ੍ਛਾਯ ਪਟਿਗ੍ਗਹਿਤਮੇਵ ਹੋਤੀਤਿ ਯੁਤ੍ਤਂ. ਯਸ੍ਮਾ ‘‘ਅਨਾਪਤ੍ਤਿ ਕਤਭਣ੍ਡੇ’’ਤਿ ਵੁਤ੍ਤਂ, ਤਸ੍ਮਾ ਤਂ ਅਨੇਕਮ੍ਪਿ ਕਤਭਣ੍ਡਟ੍ਠਾਨਿਯਮੇਵ ਹੋਤਿ. ਤਞ੍ਹਿ ਅਨੇਨ ਪਟਿਗ੍ਗਹਿਤਂ, ਨ ਲੋਮਂ. ਅਥ ਲੋਮਮ੍ਪਿ ਅਗ੍ਗਹਿਤਮੇਵ ਹੋਤਿ, ਕਤਭਣ੍ਡਂ ਦੁਪ੍ਪਰਿਹਾਰਿਯਲੋਮਵਿਨਿਬ੍ਭੋਗਕਤਭਣ੍ਡੋ ਨਿਯਮੋ. ਏਵਂ ਸਨ੍ਤੇ ਅਕਤਭਣ੍ਡੇ ਤਿਕਪਾਚਿਤ੍ਤਿਯਂ, ਕਤਭਣ੍ਡੇ ਤਿਕਦੁਕ੍ਕਟਞ੍ਚ ਨਯਤੋ ਦਸ੍ਸੇਤਬ੍ਬਂ ਭਵੇਯ੍ਯ, ਅਞ੍ਞਥਾ ਤਿਕਸ੍ਸ ਦਸ੍ਸਿਤਤ੍ਤਾ. ਸਉਸ੍ਸਾਹਤ੍ਤਾਤਿ ਅਪ੍ਪਟਿਪ੍ਪਸ੍ਸਦ੍ਧਗਮਨਤ੍ਤਾ. ਅਚਿਤ੍ਤਕਤ੍ਤਾ ਚਾਤਿ ਭਿਕ੍ਖੁਨੋ ਉਸ੍ਸਾਹਾਨੁਰੂਪਂ ਲੋਮਾਨਂ ਤਿਯੋਜਨਾਤਿਕ੍ਕਮਨਤੋ ਵਿਨਾਪਿ ਪਯੋਗਚਿਤ੍ਤੇਨ ਹਰਣਚਿਤ੍ਤੇਨ ਆਪਜ੍ਜਤਿ ਏਵਾਤਿ ਅਧਿਪ੍ਪਾਯੋ. ਸਾ ਅਨਾਪਤ੍ਤਿ ਪਾਲ਼ਿਯਾ ਨ ਸਮੇਤੀਤਿ ਅਨ੍ਤੋ ਪਨ ਪਯੋਗੇਨ ਤਿਯੋਜਨਪਰਮਂ ਅਤਿਕ੍ਕਮਿਤਤ੍ਤਾ ਅਨਾਪਤ੍ਤਿ. ‘‘ਤਿਯੋਜਨਂ ਹਰਤੀ’’ਤਿ ਇਮਿਨਾ ਤਿਯੋਜਨਂ ਪਦਸਾ ਨੇਤੁਕਾਮੋਪਿ ਅਨ੍ਤੋਤਿਯੋਜਨੇ ਪਦੇ ਪਦੇ ਦੁਕ੍ਕਟਂ ਨਾਪਜ੍ਜਤੀਤਿ ਦਸ੍ਸੇਤਿ, ਤਂ ਯੁਤ੍ਤਂ ‘‘ਤਿਯੋਜਨਂ ਵਾਸਾਧਿਪ੍ਪਾਯੋ ਗਨ੍ਤ੍ਵਾ ਤਤੋ ਪਰਂ ਹਰਤੀ’ਤਿ ਵਚਨਸ੍ਸਤ੍ਥਿਤਾਯਾ’’ਤਿ ਵੁਤ੍ਤਂ. ਪੁਨਪਿ ਵੁਤ੍ਤਂ ‘‘ਅਞ੍ਞਂ ਹਰਾਪੇਤੀਤਿ ‘ਇਦਂ ਹਰਿਸ੍ਸਾਮੀ’ਤਿ ਸਉਸ੍ਸਾਹਮੇਵ ਅਞ੍ਞਂ ਹਰਾਪੇਤੀਤਿ ਅਤ੍ਥੋ. ਇਤਰਥਾ ਗਚ੍ਛਨ੍ਤਸ੍ਸ ਸੀਸੇ ਠਪੇਸਿ, ਤਸ੍ਮਿਂ ਅਜਾਨਨ੍ਤੇਪਿ ਅਨਾਪਤ੍ਤਿ ਸਿਯਾ’’ਤਿ. ਸਚੇ ਪਨ ‘‘ਅਗਚ੍ਛਨ੍ਤੇ ਯਾਨੇ ਵਾ’’ਤਿਆਦਿਨਾ ਨਯੇਨ ਵੁਤ੍ਤਤ੍ਤਾ ਹਰਣਾਦੀਹਿ ਜਨਿਤਉਸ੍ਸਾਹਾਨਂ ਹਤ੍ਥਿਆਦੀਨਂ ‘ਇਦਂ ਕਰਿਸ੍ਸਾਮਾ’ਤਿ ਵਾ ‘ਹਰਿਸ੍ਸਾਮਾ’ਤਿ ਵਾ ਆਭੋਗੇ ਜਨਿਤੇ ਏਵ ਅਨਾਪਤ੍ਤਿ, ਨ ਅਜਨਿਤੇਤਿ ਉਪਤਿਸ੍ਸਤ੍ਥੇਰੋ ਆਹਾ’’ਤਿ ਚ ਵੁਤ੍ਤਂ. ਪਰਿਵਤ੍ਤੇਤ੍ਵਾ ਠਪਿਤੇਤਿ ਦ੍ਵਿਨ੍ਨਮ੍ਪਿ ਬਹਿ ਨਿਕ੍ਖਿਪਿਤਤ੍ਤਾਤਿ ਉਪਤਿਸ੍ਸਤ੍ਥੇਰੋ. ਬਹਿਸੀਮਾਯ ਠਪਿਤਂ ਭਣ੍ਡਿਕਂ ਅਨ੍ਤੋ ਅਨ੍ਤੋਸੀਮਾਯਂ ਠਪਿਤਂ ਬਹਿ ਕਰੋਤੋ ਅਨਾਪਤ੍ਤੀਤਿ ਕੇਚਿ, ਨ ਸੁਨ੍ਦਰਂ ਵਿਯ.
੫੭੫. ਪਟਿਲਭਿਤ੍ਵਾ ਹਰਤੀਤਿ ਪਠਮਤਿਯੋਜਨਤੋ ਪਰਂ ਹਰਤਿ, ਨ ਦੁਤਿਯਾਦਿਤੋਤਿ ਅਤ੍ਥੋ. ਕਤਭਣ੍ਡੇ ਉਪ੍ਪਨ੍ਨੋਕਾਸਾਭਾਵਾ ਅਨਾਪਤ੍ਤਿ.
ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ
੫੮੧. ਕਿਞ੍ਚਾਪਿ ਪੁਰਾਣਚੀਵਰਧੋਵਨਸਿਕ੍ਖਾਪਦੇ ਚੀਵਰਂ ਠਪੇਤ੍ਵਾ ‘‘ਅਞ੍ਞਂ ਪਰਿਕ੍ਖਾਰਂ ਧੋਵਾਪੇਤੀ’’ਤਿ (ਪਾਰਾ. ੫੦੭) ਅਨਾਪਤ੍ਤਿਵਾਰੇ ਵੁਤ੍ਤਂ. ਇਮਸ੍ਸ ਪਨ ਸਿਕ੍ਖਾਪਦਸ੍ਸ ਉਪ੍ਪਨ੍ਨਕਾਲਤੋ ਪਟ੍ਠਾਯ ਏਲ਼ਕਲੋਮਧੋਵਾਪਨਾਦਿਨਾ ਆਪਤ੍ਤੀਤਿ ਏਕੇ. ਸਾ ਵਾ ਅਨਾਪਤ੍ਤਿ ਮੂਲਾਪਤ੍ਤਿਤੋ ਏਵ, ਨ ਇਮਮ੍ਹਾਤਿ ਏਕੇ. ਏਲ਼ਕਲੋਮਾਨਂ ਅਪਰਿਕ੍ਖਾਰਤ੍ਤਾ ਭਟ੍ਠਂ ਅਗ੍ਗਹਣਮੇਵਾਤਿ ਏਕੇ. ਇਮਸ੍ਸ ਅਨ੍ਤਿਮਨਯਸ੍ਸ ਅਤ੍ਥਪ੍ਪਕਾਸਨਤ੍ਥਂ ਇਦਂ ਪਞ੍ਹਾਕਮ੍ਮਂ – ‘‘ਧੋਵਾਪੇਤੀ’’ਤਿ ਇਦਂ ਰਜਾਪਨਵਿਜਟਾਪਨਗ੍ਗਹਣੇਨ ਨਿਪ੍ਪਦੇਸਵਾਚਿਪਦਂ, ਉਦਾਹੁ ਅਗ੍ਗਹਣੇਨ ਸਪ੍ਪਦੇਸਵਾਚਿਪਦਂ. ਕਿਞ੍ਚੇਤ੍ਥ ਯਦਿ ਨਿਪ੍ਪਦੇਸਵਾਚਿਪਦਂ, ਸਬ੍ਬਤ੍ਥ ਇਦਮੇਵ ਵਤ੍ਤਬ੍ਬਂ, ਨ ਇਤਰਾਨਿ. ਅਥ ਸਪ੍ਪਦੇਸਵਾਚਿਪਦਂ, ‘‘ਅਵੁਤ੍ਤਾ ਧੋਵਤਿ, ਅਪਰਿਭੁਤ੍ਤਂ ਧੋਵਾਪੇਤੀ’’ਤਿ ਏਤ੍ਥ ਵਿਰੋਧੋ. ‘‘ਅਵੁਤ੍ਤਾ ਰਜਤਿ ਵਿਜਟੇਤਿ, ਨਿਸ੍ਸਗ੍ਗਿਯ’’ਨ੍ਤਿ ਅਨਿਟ੍ਠਪ੍ਪਸਙ੍ਗਤੋਤਿ? ਦੇਸਨਾਵਿਲਾਸਮਤ੍ਤਂ ਭਗਵਤੋ ਵਚਨਂ, ਕਤ੍ਥਚਿ ਤਿਕਪਦਵਚਨਂ, ਕਤ੍ਥਚਿ ਏਕਪਦਵਚਨਂ, ਨਿਪ੍ਪਦੇਸਪਦਮੇਵ ਤੇ ਵਦਨ੍ਤੀਤਿ. ਸਚੇ ‘‘ਕਤਭਣ੍ਡਂ ਧੋਵਾਪੇਤੀ’’ਤਿ ਏਤ੍ਥ ਪਟਿਵਿਰੋਧੋ, ‘‘ਕਤਭਣ੍ਡਂ ਵਿਜਟਾਪੇਤਿ, ਅਨਾਪਤ੍ਤੀ’’ਤਿ ਅਨਿਟ੍ਠਪ੍ਪਸਙ੍ਗਤੋ ਅਨਾਪਤ੍ਤਿ ਏਵਾਤਿ ਚੇ? ਨ, ਅਕਤਭਣ੍ਡਸ੍ਸ ਸੁਦ੍ਧਲੋਮਸ੍ਸ ਵਿਜਟਾਪਨਂ ਇਤੋ ਵਾ ਦਾਤਬ੍ਬਂ. ਉਦਕਾਦਿਧੋਵਨਵਸੇਨ ਪਿਣ੍ਡੇਤ੍ਵਾ ਠਿਤਾਨਂ ਵਿਜਟਾਪਨਂ ਲਬ੍ਭਤੀਤਿ ਚੇ? ਪੁਰਾਣਸਨ੍ਥਤਸ੍ਸ ਵਿਜਟਾਪਨੇ ਅਨਾਪਤ੍ਤਿਯਾ ਭਵਿਤਬ੍ਬਂ, ਨ ਚ ਤਂ ਯੁਤ੍ਤਂ ‘‘ਅਪਰਿਭੁਤ੍ਤਂ ਧੋਵਾਪੇਤੀ’’ਤਿ ਵਚਨਤੋ. ਤੇਨ ਪਰਿਭੁਤ੍ਤਂ ਧੋਵਾਪੇਤਿ ਰਜਾਪੇਤਿ ਵਿਜਟਾਪੇਤਿ, ਨਿਸ੍ਸਗ੍ਗਿਯਮੇਵਾਤਿ ਸਿਦ੍ਧਂ ਹੋਤਿ, ਤਞ੍ਚ ਪਰਿਭੁਤ੍ਤਂ ਨਾਮ ਕਤਭਣ੍ਡਮੇਵ ਹੋਤਿ. ਨ ਹਿ ਸਕ੍ਕਾ ਏਲ਼ਕਲੋਮਾਨਿ ਪਰਿਭੁਞ੍ਜਿਤੁਂ, ਅਞ੍ਞਥਾ ‘‘ਪਰਿਭੁਤ੍ਤਂ ਧੋਵਾਪੇਤੀ’’ਤਿ ਵਚਨਂ ਨਿਰਤ੍ਥਕਂ ਹੋਤਿ. ਨ ਹਿ ਏਤ੍ਥ ‘‘ਪੁਰਾਣਾਨਿ ਏਲ਼ਕਲੋਮਾਨਿ ਧੋਵਾਪੇਯ੍ਯ ਵਾ’’ਤਿ ਵਚਨਂ ਅਤ੍ਥਿ ਪੁਰਾਣਚੀਵਰਸਿਕ੍ਖਾਪਦੇ ਵਿਯ. ਤਤ੍ਥ ਆਦਿਨ੍ਨਕਪ੍ਪਵਸੇਨ, ਇਧ ਤਂ ਲਿਖਿਤਂ. ਲੇਖਦੋਸੋਤਿ ਚੇ? ਨ, ਵਿਸੇਸਹੇਤੁਨੋ ਅਭਾਵਾ, ਪੁਰਾਣਚੀਵਰਸਿਕ੍ਖਾਪਦੇ ਅਪਰਿਭੁਤ੍ਤਂ ਕਤਭਣ੍ਡਂ ਨਾਮ, ‘‘ਕਮ੍ਬਲਕੋਜਵਸਨ੍ਥਤਾਦਿ’’ਨ੍ਤਿ ਵਚਨਤੋ ਚ. ਕਿਞ੍ਚਾਪਿ ਇਮਿਨਾ ਸਦ੍ਦੇਨ ਅਯਮਤ੍ਥੋ ਸਿਦ੍ਧੋ, ‘‘ਧੋਵਾਪੇਤੀ’’ਤਿ ਇਦਂ ਪਨ ਸਿਯਾ ਨਿਪ੍ਪਦੇਸਂ. ਸਿਯਾ ਸਪ੍ਪਦੇਸਂ. ਤਞ੍ਹਿ ‘‘ਅਵੁਤ੍ਤਾ ਧੋਵਤੀ’’ਤਿਆਦੀਸੁ ਨਿਪ੍ਪਦੇਸਂ. ‘‘ਕਤਭਣ੍ਡਂ ਧੋਵਾਪੇਤੀ’’ਤਿ ਏਤ੍ਥ ਸਪ੍ਪਦੇਸਂ. ‘‘ਅਕਤਭਣ੍ਡਂ ਧੋਵਾਪੇਤਿ ਰਜਾਪੇਤਿ, ਅਨਾਪਤ੍ਤੀ’’ਤਿ ‘‘ਵਿਜਟਾਪੇਤਿ, ਅਨਾਪਤ੍ਤੀ’’ਤਿ ਵਚਨਪ੍ਪਮਾਣਤੋ ਅਨਾਪਤ੍ਤਿ ਏਵਾਤਿ ਚੇ? ਨ, ਵਚਨਪ੍ਪਮਾਣਤੋ ਏਵ ਆਪਤ੍ਤੀਤਿ ਆਪਜ੍ਜਨਤੋ. ‘‘ਅਪਰਿਭੁਤ੍ਤਂ ਧੋਵਾਪੇਤੀ’’ਤਿ ਵਚਨਮੇਵ ਹਿ ਤਂ ਅਪਰਿਭੁਤ੍ਤਂ ਸਨ੍ਥਤਂ ਵਿਜਟਾਪੇਨ੍ਤਸ੍ਸ ਅਨਾਪਤ੍ਤੀਤਿ ਦੀਪੇਤਿ ਚੇ? ਸਿਦ੍ਧਂ ਪਰਿਭੁਤ੍ਤਂ ਵਿਜਟਾਪੇਨ੍ਤਸ੍ਸ ਆਪਤ੍ਤਿ ਏਵਾਤਿ.
ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਰੂਪਿਯਸਿਕ੍ਖਾਪਦਵਣ੍ਣਨਾ
੫੮੩-੪. ਸਬ੍ਬਮ੍ਪੀਤਿ ਤਿਵਿਧਮ੍ਪਿ. ‘‘ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ’ਤਿਆਦਿ ਪਨ ਕਿਞ੍ਚਾਪਿ ਰਾਜਸਿਕ੍ਖਾਪਦੇ ‘ਨ ਵਟ੍ਟਤੀ’ਤਿ ਪਸਙ੍ਗਤੋ ਵੁਤ੍ਤਂ, ਸਰੂਪਤੋ ਪਨ ਆਪਤ੍ਤਿਦਸ੍ਸਨਵਸੇਨ ਸਕਟ੍ਠਾਨੇਪਿ ਵਤ੍ਤੁਮਾਰਦ੍ਧ’’ਨ੍ਤਿ ਵੁਤ੍ਤਂ. ਕਥਮੇਤਂ? ਮੁਤ੍ਤਾਦੀਨਂ ਸਕਟ੍ਠਾਨਂ ਜਾਤਂ, ਨ ਹਿ ਤਾਨਿ ਇਧ ਪਾਲ਼ਿਯਂ ਦਿਸ੍ਸਨ੍ਤੀਤਿ ਇਮਸ੍ਸ ਅਟ੍ਠਕਥਾਯਂ ਵੁਤ੍ਤਾਨਿ, ਰਾਜਸਿਕ੍ਖਾਪਦਸ੍ਸਪਿ ਅਟ੍ਠਕਥਾਯਂ ਵੁਤ੍ਤਾਨੀਤਿ. ਨ ਕੇਵਲਂ ਹਿਰਞ੍ਞਸੁਵਣ੍ਣਮੇਵ, ਅਞ੍ਞਮ੍ਪਿ ਖੇਤ੍ਤਵਤ੍ਥਾਦਿਕਂ ‘‘ਅਕਪ੍ਪਿਯਂ ਨ ਸਮ੍ਪਟਿਚ੍ਛਿਤਬ੍ਬ’’ਨ੍ਤਿ ਸਾਮਞ੍ਞੇਨ, ਨ ਸਰੂਪਤੋ. ਪਾਲ਼ਿਯਂ ਪਨ ਸਰੂਪਤੋ ‘‘ਚੀਵਰਚੇਤਾਪਨ੍ਨਂ ਨਾਮ ਹਿਰਞ੍ਞਂ ਵਾ ਸੁਵਣ੍ਣਂ ਵਾ ਮੁਤ੍ਤਾ ਵਾ ਮਣਿ ਵਾ’’ਤਿ ਏਤ੍ਤਕਮੇਵ ਵੁਤ੍ਤਂ, ਤਸ੍ਮਾ ਰਾਜਸਿਕ੍ਖਾਪਦਮੇਵਸ੍ਸ ਸਕਟ੍ਠਾਨਂ. ਮੁਤ੍ਤਾਮਣਿਗ੍ਗਹਣੇਨ ਚੇਤ੍ਥ ਤਜ੍ਜਾਤਿਯਗ੍ਗਹਣਂ ਸਿਦ੍ਧਮੇਵਾਤਿ ਨਾਗਤੋ ਇਮਸ੍ਸ ਪਠਮਮੇਵ ਪਞ੍ਞਤ੍ਤਤ੍ਤਾ. ਯਦਿ ਏਵਂ ਇਧ ਅਨਾਗਤਤ੍ਤਾ ਕਤਰਂ ਨੇਸਂ ਸਕਟ੍ਠਾਨਨ੍ਤਿ? ਇਦਮੇਵ ਅਤ੍ਥਤੋ, ਨੋ ਸਰੂਪਤੋ.
ਕਥਂ? ਏਤਾਨਿ ਹਿ ਰਤਨਸਿਕ੍ਖਾਪਦੇ ਨਿਸ੍ਸਗ੍ਗਿਯਵਤ੍ਥੂਨਿ, ਦੁਕ੍ਕਟਵਤ੍ਥੂਨਿ ਚ ਏਕਤੋ ‘‘ਰਤਨ’’ਨ੍ਤਿ ਆਗਤਾਨਿ, ‘‘ਰਤਨਸਮ੍ਮਤ’’ਨ੍ਤਿ ਕਪ੍ਪਿਯਵਤ੍ਥੁ ਆਗਤਂ. ਤੇਸੁ ਚ ਦਸਸੁ ਰਤਨੇਸੁ ਰਜਤਜਾਤਰੂਪਦ੍ਵਯਂ ਇਧ ਨਿਸ੍ਸਗ੍ਗਿਯਵਤ੍ਥੁ, ਅਵਸੇਸਂ ਦੁਕ੍ਕਟਵਤ੍ਥੂਤਿ ਸਿਦ੍ਧਂ. ਇਧ ਚ ਸਿਦ੍ਧਤ੍ਤਾ ਏਵ ਰਤਨਸਿਕ੍ਖਾਪਦਸ੍ਸ ਅਨਾਪਤ੍ਤਿਵਾਰੇ ‘‘ਰਤਨਸਮ੍ਮਤਂ ਵਿਸ੍ਸਾਸਂ ਗਣ੍ਹਾਤਿ, ਤਾਵਕਾਲਿਕਂ ਗਣ੍ਹਾਤਿ, ਪਂਸੁਕੂਲਸਞ੍ਞਿਸ੍ਸਾ’’ਤਿ ਵੁਤ੍ਤਂ, ਨ ਰਤਨਂ ਵੁਤ੍ਤਂ. ਸਤ੍ਤਵਿਧਧਞ੍ਞਦਾਸਿਦਾਸਖੇਤ੍ਤਾਦਿ ਪਨ ਬ੍ਰਹ੍ਮਜਾਲਾਦਿਸੁਤ੍ਤਵਸੇਨ (ਦੀ. ਨਿ. ੧.੧ ਆਦਯੋ) ਅਕਪ੍ਪਿਯਨ੍ਤਿ ਸਿਦ੍ਧਂ, ਤਸ੍ਮਾ ਇਧ ਦੁਕ੍ਕਟਵਤ੍ਥੂਤਿ ਸਿਦ੍ਧਂ, ਤੇਨੇਵ ਅਨੁਯੋਗਵਤ੍ਤੇ ‘‘ਧਮ੍ਮਂ ਜਾਨਾਤਿ, ਧਮ੍ਮਾਨੁਲੋਮਂ, ਵਿਨਯਂ, ਵਿਨਯਾਨੁਲੋਮਂ ਜਾਨਾਤੀ’’ਤਿ (ਪਰਿ. ੪੪੨) ਵੁਤ੍ਤਂ. ਤਥਾ ਆਮਕਮਂਸਮ੍ਪਿ ਦੁਕ੍ਕਟਵਤ੍ਥੁਂ ਆਪਜ੍ਜਤੀਤਿ? ਨ, ਇਧ ਵਿਨਯੇ ਅਨੁਞ੍ਞਾਤਤ੍ਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਅਮਨੁਸ੍ਸਿਕਾਬਾਧੇ ਆਮਕਮਂਸ’’ਨ੍ਤਿਆਦਿਨਾ (ਮਹਾਵ. ੨੬੪), ਤਸ੍ਮਾ ਨ ਆਮਕਮਂਸਂ ਸੁਤ੍ਤੇ ਆਗਤਮ੍ਪਿ ਦੁਕ੍ਕਟਵਤ੍ਥੁ ਹੋਤਿ, ਤਥਾਪਿ ਅਤ੍ਤਨੋ ਪਰਿਭੋਗਤ੍ਥਾਯ ਪਟਿਗ੍ਗਹਣੇ ਦੁਕ੍ਕਟਮੇਵਾਤਿ ਨੋ ਤਕ੍ਕੋਤਿ ਆਚਰਿਯੋ. ‘‘ਇਧ ਨਿਕ੍ਖਿਪਾਹੀ’ਤਿ ਵੁਤ੍ਤੇ ਉਪਨਿਕ੍ਖਿਤ੍ਤਸਾਦਿਯਨਮੇਵ ਹੋਤੀ’’ਤਿ ਵਦਨ੍ਤਿ. ‘‘ਅਕਪ੍ਪਿਯਵਿਚਾਰਣਾ ਏਵ ਨ ਵਟ੍ਟਤੀਤਿ ਚੇ? ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਨਿਸ੍ਸਾਯ ਠਿਤਨ੍ਤਿ ਏਤ੍ਥ ਤਂ ਸਯਂ ਅਪਰਿਭੋਗਾਰਹਂ ਹੁਤ੍ਵਾ ਤਦਗ੍ਘਨਕਂ ਕਪ੍ਪਿਯਭਣ੍ਡਂ ਪਰਿਭੋਗਾਰਹਂ ਹੁਤ੍ਵਾ ਠਿਤਨ੍ਤਿ ਅਤ੍ਥੋ’’ਤਿ ਲਿਖਿਤਂ, ‘‘ਪਂਸੁਕੂਲਭਾਵੇਨ ਠਿਤਤ੍ਤਾ, ਗੁਤ੍ਤਟ੍ਠਾਨਾਚਿਕ੍ਖਨਸ੍ਸ ਕਪ੍ਪਿਯਤ੍ਤਾ ਚ ਕਪ੍ਪਿਯਂ ਨਿਸ੍ਸਾਯ ਠਿਤਂ. ‘ਇਦਂ ਗਣ੍ਹਾ’ਤਿਆਦਿਨਾ ਵਦਨ੍ਤਸ੍ਸ ਅਕਪ੍ਪਿਯਤ੍ਤਾ ਅਕਪ੍ਪਿਯਂ ਨਿਸ੍ਸਾਯ ਠਿਤ’’ਨ੍ਤਿ ਚ. ਏਵਮ੍ਪਿ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚਾਤਿ ‘‘ਇਮਸ੍ਮਿਂ ਓਕਾਸੇ ਠਪਿਤਂ, ਕਿਂ ਨ ਪਸ੍ਸਸੀਤਿ ਛੇਕਤਰੇ ਇਮੇਵ ਕਹਾਪਣੇ’’ਤਿਆਦਿਵਚਨਸ੍ਸ ਕਪ੍ਪਿਯਤ੍ਤਾ ਕਪ੍ਪਿਯਂ ਨਿਸ੍ਸਾਯ ਠਿਤਂ. ‘‘ਇਦਂ ਗਣ੍ਹਾ’’ਤਿ ਵੁਤ੍ਤੇ ਦੁਬ੍ਬਿਚਾਰਿਤਤ੍ਤਾ ਅਤ੍ਤਨੋ ਅਕਪ੍ਪਿਯਤ੍ਤਾ ਤਤੋ ਆਗਤਂ ਅਕਪ੍ਪਿਯਂ ਨਿਸ੍ਸਾਯ ਠਿਤਮੇਵ ਹੋਤਿ. ‘‘ਇਦਂ ਗਣ੍ਹਾ’ਤਿ ਵੁਤ੍ਤੇ ਤੇਨ ਗਹਿਤੇ ‘ਉਗ੍ਗਣ੍ਹਾਪੇਯ੍ਯ ਵਾ’ਤਿ ਵੁਤ੍ਤਵਿਧਿਂ ਨ ਪਾਪੁਣਾਤਿ, ਕੇਵਲਂ ਦੁਬ੍ਬਿਚਾਰਿਤਤ੍ਤਾ ਤਸ੍ਸੇਵ ਤਂ ਅਕਪ੍ਪਿਯਂ ਹੋਤਿ, ਮੂਲਪਟਿਗ੍ਗਹਣਸ੍ਸ ਸੁਦ੍ਧਤ੍ਤਾ ਪਰਤੋ ਪਤ੍ਤਚਤੁਕ੍ਕੇ ਤਤਿਯਪਤ੍ਤੋ ਵਿਯਾਤਿ ਚ ਏਵਂ ਉਪਤਿਸ੍ਸਤ੍ਥੇਰੋ ਵਦਤੀ’’ਤਿ ਅਨੁਗਣ੍ਠਿਪਦੇ ਵੁਤ੍ਤਂ. ਕਿਂ ਬਹੁਨਾ, ਵਿਸੁਦ੍ਧਾਗਮਤ੍ਤਾ ਕਪ੍ਪਿਯਂ. ਦੁਬ੍ਬਿਚਾਰਣਾਯ ਸਤਿ ਅਕਪ੍ਪਿਯਂ ਨਿਸ੍ਸਾਯ ਠਿਤਂ ਹੋਤੀਤਿ ਨੋ ਤਕ੍ਕੋਤਿ ਆਚਰਿਯੋ. ‘‘ਏਵਂ ਸਙ੍ਘਗਣਾਦੀਨਮ੍ਪਿ ਅਤ੍ਥਾਯ ਪਰਿਚ੍ਚਤ੍ਤੇਪਿ ਤੇਨ ਸਮਾਨਗਤਿਕਤ੍ਤਾ ਠਪੇਤ੍ਵਾ ਆਪਤ੍ਤਿਵਿਸੇਸ’’ਨ੍ਤਿ ਵੁਤ੍ਤਂ.
ਨ ਕਿਞ੍ਚਿ ਕਪ੍ਪਿਯਭਣ੍ਡਂ ਚੇਤਾਪਿਤਨ੍ਤਿ ਚੇਤਾਪਿਤਞ੍ਚੇ, ਉਪਾਯਾਭਾਵਂ ਦਸ੍ਸੇਤਿ. ‘‘ਉਪਨਿਕ੍ਖੇਪਂ ਠਪੇਤ੍ਵਾਤਿ ਸਚੇ ਸੋ ਉਪਾਸਕੋ ‘ਅਤਿਬਹੁਂ ਏਤਂ ਹਿਰਞ੍ਞਂ, ਇਦਂ ਭਨ੍ਤੇ ਅਜ੍ਜੇਵ ਨ ਵਿਨਾਸੇਤਬ੍ਬ’ਨ੍ਤਿ ਵਤ੍ਵਾ ਸਯਂ ਉਪਨਿਕ੍ਖੇਪਦੇਸੇ ਠਪੇਤਿ, ਅਞ੍ਞੇਨ ਵਾ ਠਪਾਪੇਤਿ, ਏਤਂ ਉਪਨਿਕ੍ਖੇਪਂ ਠਪੇਤ੍ਵਾ ਤਤੋ ਲਦ੍ਧਂ ਉਦਯਂ ਪਰਿਭੁਞ੍ਜਨ੍ਤੋ ਸਙ੍ਘੋ ਪਚ੍ਚਯੇ ਪਰਿਭੁਞ੍ਜਤਿ ਨਾਮਾ’’ਤਿ ਵੁਤ੍ਤਂ.
੫੮੫. ਅਯਂ ਕਿਰ ਇਤ੍ਥਂਲਕ੍ਖਣਸਮ੍ਪਨ੍ਨੋ ਉਕ੍ਕਂਸਤੋ. ਏਵਂ ਅਙ੍ਗਸਮ੍ਪਨ੍ਨੋਪਿ ਅਪਰਭਾਗੇ ਲੋਭਵਸੇਨ ਵਾ ਅਞ੍ਞੇਨ ਵਾ ਕਾਰਣੇਨ ਸਚੇ ਨਿਮਿਤ੍ਤਂ ਕਤ੍ਵਾ ਪਾਤੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸੇਨਾਸਨਮ੍ਪਿ ਪਰਿਭੋਗੇ ਪਰਿਭੋਗੇਤਿ ਪਵੇਸੇ ਪਵੇਸੇ. ਸੋ ਹਿ ਕਾਰਣਨ੍ਤਰੇਨ ਰੁਕ੍ਖਮੂਲਿਕਸ੍ਸ, ਅਬ੍ਭੋਕਾਸਿਕਸ੍ਸਪਿ ਵਟ੍ਟਤਿ ਏਵ, ਠਾਨਨਿਸਜ੍ਜਾਦਿਵਸੇਨ ਨਿਵਾਸਾਧਿਪ੍ਪਾਯੇ ਸਤਿ ਪਰਿਭੋਗੇ ਪਰਿਭੋਗੇ ਪਚ੍ਚਵੇਕ੍ਖਿਤਬ੍ਬਂ. ਭੇਸਜ੍ਜਸ੍ਸ ਸਤਿਪਚ੍ਚਯਤਾ ਸਬ੍ਬਕਾਲਮ੍ਪੀਤਿ ਏਕੇ. ਅਸਨ੍ਨਿਹਿਤਸ੍ਸ ਪਚ੍ਛਾਭਤ੍ਤਮੇਵ, ਸਨ੍ਨਿਹਿਤਸ੍ਸ ਪੁਰੇਭਤ੍ਤਮ੍ਪੀਤਿ ਨੋ ਤਕ੍ਕੋਤਿ ਆਚਰਿਯੋ. ‘‘ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਆਹਾਰਤ੍ਥਾਯ…ਪੇ… ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਜ੍ਝੋਹਾਰੇ ਅਜ੍ਝੋਹਾਰੇ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੨੪੪) ਹਿ ਵੁਤ੍ਤਂ. ਦੁਕ੍ਕਟਞ੍ਹਿ ਵਿਕਾਲਭੋਜਨਸਿਕ੍ਖਾਪਦੇ ਆਗਤਂ ਵਿਕਾਲੇ ਆਪਜ੍ਜਤਿ, ਨੋ ਕਾਲੇ ਆਹਾਰਕਾਲਤ੍ਤਾ, ਸਨ੍ਨਿਧਿਸਿਕ੍ਖਾਪਦੇ ਆਗਤਂ ਪਨ ਕਾਲੇਪਿ ਸਨ੍ਨਿਧਿਜਾਤਤ੍ਤਾ, ਤੇਨੇਵ ਤਤ੍ਥ ਸਤ੍ਤਾਹਕਾਲਿਕਯਾਵਜੀਵਿਕਦ੍ਵਯਮੇਵ ਵੁਤ੍ਤਨ੍ਤਿ. ‘‘ਸਤਿ ਪਚ੍ਚਯੇ’’ਤਿ ਵਚਨਤੋ ਨਾਯਂ ਵਿਸੇਸੋ ਲਬ੍ਭਤੀਤਿ ਚੇ? ਨ, ਅਨਿਟ੍ਠਪ੍ਪਸਙ੍ਗਤੋ, ਵਚਨਾਨਿਯਮਤੋ ਚ. ਸਨ੍ਨਿਧਿਸਿਕ੍ਖਾਪਦੇ ਹਿ ‘‘ਅਨਾਪਤ੍ਤਿ ਯਾਵਕਾਲਿਕਂ ਯਾਵਕਾਲਂ ਨਿਦਹਿਤ੍ਵਾ ਭੁਞ੍ਜਤਿ. ਯਾਮਕਾਲਿਕਂ ਯਾਮੇ ਨਿਦਹਿਤ੍ਵਾ ਭੁਞ੍ਜਤੀ’’ਤਿ (ਪਾਚਿ. ੨੫੬) ਏਤ੍ਥ ਵਚਨਪ੍ਪਮਾਣਤੋ ਯਾਮਕਾਲਿਕਂ ਨ ਪੁਰੇਭਤ੍ਤੇ, ਨ ਪਚ੍ਛਾਭਤ੍ਤੇ, ਨ ਦਿਵਸੇ, ਨ ਰਤ੍ਤਿਯਂ ਯਾਮਮੇਵ ਨਿਦਹਿਤ੍ਵਾ ਭੁਞ੍ਜਨ੍ਤਸ੍ਸ ਅਨਾਪਤ੍ਤੀਤਿ ਅਨਿਟ੍ਠਪ੍ਪਸਙ੍ਗੋ. ਤਥਾ ਤਤ੍ਥੇਵ ‘‘ਯਾਮਕਾਲਿਕਂ ਯਾਮਂ ਨਿਦਹਿਤ੍ਵਾ ਭੁਞ੍ਜਤਿ, ਸਤ੍ਤਾਹਕਾਲਿਕਂ ਸਤ੍ਤਾਹਂ ਨਿਦਹਿਤ੍ਵਾ ਭੁਞ੍ਜਤੀ’’ਤਿ ਏਤ੍ਤਕਮੇਵ ਵੁਤ੍ਤਂ, ਨ ਵੁਤ੍ਤਂ ‘‘ਸਤਿ ਪਚ੍ਚਯੇ’’ਤਿ, ਤਸ੍ਮਾ ਸਤਿਪਚ੍ਚਯ-ਵਚਨਂ ਕਤ੍ਥਚਿ ਹੋਤਿ, ਕਤ੍ਥਚਿ ਨ ਹੋਤੀਤਿ ਵਚਨਾਨਿਯਮਤੋ ਆਪਤ੍ਤਿਯਾਪਿ ਅਨਿਯਮੋ ਸਿਯਾ. ਏਵਂ ਸਨ੍ਤੇਪਿ ਯਥਾਵੁਤ੍ਤਦੁਕ੍ਕਟਂ ਆਪਜ੍ਜਤਿ ਏਵ. ਨ ਅਨਾਹਾਰਪ੍ਪਯੋਜਨਤ੍ਤਾ ਯਾਮਕਾਲਿਕਾਦੀਨਨ੍ਤਿ ਚੇ? ਨ, ਸਪ੍ਪਿਆਦਿਮਿਸ੍ਸਭੋਜਨਸ੍ਸ ਪਣੀਤਭੋਜਨਭਾਵਪ੍ਪਤ੍ਤਿਤੋ. ਅਪਿਚ ਸਬ੍ਬਕਾਲਿਕੇਸੁ ਯਾਵਕਾਲਿਕਂ ਓਲ਼ਾਰਿਕਂ, ਤਂ ਆਹਾਰਤ੍ਥਾਯ ਪਟਿਗ੍ਗਣ੍ਹਨ੍ਤਸ੍ਸ ਕਾਲੇ ਅਨਾਪਤ੍ਤਿ, ਪਗੇਵ ਅਨੋਲ਼ਾਰਿਕਂ ਯਾਮਕਾਲਿਕਾਦਿਂ, ਆਹਾਰਤ੍ਥਾਯ ਏਵ ਅਨੁਞ੍ਞਾਤਤ੍ਤਾ. ਯਾਵਕਾਲਿਕੇ ਏਵ ਅਨਾਪਤ੍ਤੀਤਿ ਚੇ? ਨ, ਅਨਾਹਾਰਤ੍ਥਾਯ ਗਣ੍ਹਨ੍ਤਸ੍ਸ ਆਪਤ੍ਤਿਸਮ੍ਭਵਤੋ ਇਤਰਂ ਆਹਾਰਤ੍ਥਾਯ ਗਣ੍ਹਨ੍ਤਸ੍ਸ ਵਿਯ, ਤਸ੍ਮਾ ਯਥਾਵੁਤ੍ਤਮੇਵੇਤ੍ਥ ਸਨ੍ਨਿਟ੍ਠਾਨਂ ਪਾਲ਼ਿਂ, ਯੁਤ੍ਤਿਞ੍ਚ ਅਨੁਲੋਮੇਤੀਤਿ.
ਦੇਸਨਾਸੁਦ੍ਧੀਤਿ ਏਤ੍ਥ ਦੇਸਨਾ ਨਾਮ ਵਿਨਯਕਮ੍ਮਂ, ਤੇਨ ਵੁਟ੍ਠਾਨਮ੍ਪਿ ਦੇਸਨਾ ਏਵ ਨਾਮ ਹੋਤੀਤਿ. ‘‘ਪਟਿਗ੍ਗਣ੍ਹਾਤੀ’’ਤਿ ਅਵਤ੍ਵਾ ‘‘ਪਟਿਸੇਵਤੀ’’ਤਿ ਵੁਤ੍ਤਤ੍ਤਾ ਪਟਿਗ੍ਗਹਣੇ ਪਨ ਸਤਿਂ ਅਕਤ੍ਵਾ ਪਰਿਭੋਗੇ ਕਰੋਨ੍ਤਸ੍ਸ ਅਨਾਪਤ੍ਤਿ. ਖੀਣਾਸਵਾ ਕਤਕਿਚ੍ਚਤ੍ਤਾ ਵਿਭਤ੍ਤਦਾਯਾਦਾ ਵਿਯ ਹੋਨ੍ਤਿ, ਤੇਨ ਤੇਸਂ ਸਾਮਿਪਰਿਭੋਗਾ ਹੋਨ੍ਤਿ. ਅਞ੍ਞਥਾ ਯਾਵਕਾਲਿਕਭਾਵਂ ਅਨਤਿਕ੍ਕਨ੍ਤਤ੍ਤਾ ਵਿਰੁਜ੍ਝਤਿ. ਇਣਪਰਿਭੋਗੋ ਨ ਵਟ੍ਟਤਿ, ਭੇਸਜ੍ਜੇ ਆਪਤ੍ਤਿਤੋ, ਇਤਰਸ੍ਮਿਂ ਅਯੁਤ੍ਤਪਰਿਭੋਗਤੋ, ਇਣਂ ਵਿਯ ਅਨਨੁਞ੍ਞਾਤਭੁਤ੍ਤਤ੍ਤਾ ਚ. ‘‘ਆਦਿਤੋ ਪਟ੍ਠਾਯ ਹਿ ਅਲਜ੍ਜੀ ਨਾਮ ਨਤ੍ਥਿ, ਤਸ੍ਮਾ ਨ ਕੋਚਿ ਸਙ੍ਕਿਤਬ੍ਬੋ’’ਤਿ ਲਿਖਿਤਂ. ਭਾਰਭੂਤਾ ਸਦ੍ਧਿਵਿਹਾਰਿਕਾਦਯੋ. ਯਥਾਦਾਨਮੇਵ ਗਹਿਤਤ੍ਤਾਤਿ ਏਤ੍ਥ ‘‘ਅਤ੍ਤਨੋ ਹਤ੍ਥੇਨ ਚੇ ਦੇਤਿ, ਨ ਵਟ੍ਟਤੀ’’ਤਿ ਵੁਤ੍ਤਂ, ‘‘ਅਤਿਰੇਕਭਾਗਂ ਗਹੇਤ੍ਵਾ ਪੁਨਦਿਵਸੇ ਅਤ੍ਤਨੋ ਅਤ੍ਥਾਯ ਉਦ੍ਧਟਭਾਗਂ ਤਤ੍ਥੇਵ ਦਾਪੇਤਿ, ਵਟ੍ਟਤੀ’’ਤਿ ਚ. ਪਰਿਵਤ੍ਤਕਂ ਦੇਤਿ, ਧਮ੍ਮਿਯਞ੍ਚੇ, ਵਟ੍ਟਤਿ. ਨੋ ਅਧਮ੍ਮਿਯਂ. ‘‘ਤਂ ਧਮ੍ਮਾਨੁਗ੍ਗਹੇਨ ਉਗ੍ਗਣ੍ਹਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਕੇਨ ਲੇਸੇਨਾਤਿ ਚੇ? ‘‘ਅਲਬ੍ਭਮਾਨਾਯ ਸਾਮਗ੍ਗਿਯਾ ਅਨਾਪਤ੍ਤਿ ਸਮ੍ਭੋਗੇ ਸਂਵਾਸੇ’’ਤਿ (ਮਹਾਵ. ੧੩੦) ਇਮਿਨਾ ਉਪਸਮ੍ਪਦਕ੍ਖਨ੍ਧਕਵਚਨਲੇਸੇਨ.
੫੮੬. ਅਸ੍ਸਤਿਯਾ ਦਿਨ੍ਨਨ੍ਤਿ ਏਤ੍ਥ ‘‘ਅਸ੍ਸਤਿਯਾ ਦਿਨ੍ਨਂ ਨਾਮ ਅਪਰਿਚ੍ਚਤ੍ਤਂ ਹੋਤਿ, ਤਸ੍ਮਾ ਦੁਸ੍ਸਨ੍ਤੇ ਬਦ੍ਧਕਹਾਪਣਾਦੀਨਿ ਸਤਿਂ ਪਟਿਲਭਿਤ੍ਵਾ ਦਾਯਕਾ ਚੇ ਪੁਨ ਗਣ੍ਹਨ੍ਤਿ, ਨਿਸ੍ਸਗ੍ਗਿਯਮੇਵ ਦੇਸੇਤਬ੍ਬਂ. ਤੇਨ ਅਕਪ੍ਪਿਯਭਣ੍ਡੇਨ ਤੇ ਚੇ ਦਾਯਕਾ ਸਪ੍ਪਿਆਦੀਨਿ ਕਿਣਿਤ੍ਵਾ ਸਙ੍ਘਸ੍ਸ ਦੇਨ੍ਤਿ, ਤਸ੍ਸਪਿ ਭਿਕ੍ਖੁਨੋ ਕਪ੍ਪਤਿ ਦਾਯਕਾਨਂਯੇਵ ਸਨ੍ਤਕਤ੍ਤਾ. ਭਿਕ੍ਖੁਨਾ ਹਿ ‘ਵਤ੍ਥਂ ਗਣ੍ਹਾਮੀ’ਤਿ ਵਤ੍ਥਸਞ੍ਞਾਯ ਏਵ ਗਹਿਤਂ, ਨ ਰੂਪਿਯਸਞ੍ਞਾਯ. ਇਦਞ੍ਚ ਸਿਕ੍ਖਾਪਦਂ ਅਤ੍ਤਨੋ ਅਤ੍ਥਾਯ ਉਗ੍ਗਹਣਂ ਸਨ੍ਧਾਯ ਵੁਤ੍ਤਂ, ਨ ਚ ਤੇਨ ਤਂ ਅਤ੍ਤਨੋ ਅਤ੍ਥਾਯ ਪਰੇਸਂ ਵਾ ਅਤ੍ਥਾਯ ਗਹਿਤਂ. ਅਥ ਤੇ ਦਾਯਕਾ ਨੋ ਚੇ ਆਗਨ੍ਤ੍ਵਾ ਗਣ੍ਹਨ੍ਤਿ, ਦਾਯਕੇ ਪੁਚ੍ਛਿਤ੍ਵਾ ਅਤ੍ਤਨੋ ਅਤ੍ਥਾਯ ਚੇ ਪਰਿਚ੍ਚਤ੍ਤਂ, ਸਙ੍ਘੇ ਨਿਸ੍ਸਜ੍ਜਿਤ੍ਵਾ ਆਪਤ੍ਤਿ ਦੇਸੇਤਬ੍ਬਾ. ਨੋ ਚੇ, ਆਪਤ੍ਤਿ ਏਵ ਦੇਸੇਤਬ੍ਬਾ’’ਤਿ ਵੁਤ੍ਤਂ, ਤਂ ਪੁਬ੍ਬਾਪਰਵਿਰੁਦ੍ਧਂ. ਆਪਤ੍ਤਿਦੇਸਨਾਯ ਹਿ ਸਤਿ ਰੂਪਿਯਂ ਪਟਿਗ੍ਗਹਿਤਨ੍ਤਿ ਸਿਦ੍ਧਂ, ਤਸ੍ਮਿਂ ਸਿਦ੍ਧੇ ‘‘ਤਤੋ ਉਪ੍ਪਨ੍ਨਂ ਤਸ੍ਸਪਿ ਕਪ੍ਪਤੀ’’ਤਿ ਇਦਂ ਨ ਯੁਜ੍ਜਤੀਤਿ. ਕਪ੍ਪਤਿ ਏਵਾਤਿ ਚੇ? ਨ, ਵਤ੍ਥੁਂ ਅਨਿਸ੍ਸਜ੍ਜਿਤ੍ਵਾ ਆਪਤ੍ਤਿ ਦੇਸੇਤਬ੍ਬਾਤਿ ਨ ਯੁਜ੍ਜਤਿ. ਅਚਿਤ੍ਤਕਤ੍ਤਾ ਸਿਕ੍ਖਾਪਦਸ੍ਸ ਯੁਜ੍ਜਤੀਤਿ ਚੇ? ਨ, ਸਬ੍ਬਤ੍ਥ ‘‘ਰੂਪਿਯਂ ਪਟਿਗ੍ਗਣ੍ਹਾਤੀ’’ਤਿ ਵਚਨਤੋ. ‘‘ਰੂਪਿਯਂ ਪਟਿਗ੍ਗਣ੍ਹਾਤੀ’’ਤਿ ਹਿ ਵੁਤ੍ਤਂ, ਅਞ੍ਞਥਾ ਸਬ੍ਬਤ੍ਥ ‘‘ਰੂਪਿਯ’’ਨ੍ਤਿ ਪਦਂ ਨਿਰਤ੍ਥਕਂ ਹੋਤਿ ਵਿਨਾਪਿ ਤੇਨ ਤਦਤ੍ਥਸਿਦ੍ਧਿਤੋ. ਅਨੇਨ ਚ ਵਤ੍ਥਂ ਪਟਿਗ੍ਗਹਿਤਂ, ਦਾਯਕੇਨ ਚ ਵਤ੍ਥਮੇਵ ਦਿਨ੍ਨਂ, ਵਤ੍ਥਗਤਮ੍ਪਿ ਰੂਪਿਯਂ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋ ਪਦਵਾਰੇਨ ਕਾਰੇਤਬ੍ਬੋ. ਅਟ੍ਠਕਥਾਯਞ੍ਚ ‘‘ਰੂਪਿਯੇ ਅਰੂਪਿਯਸਞ੍ਞੀਤਿ ਸੁਵਣ੍ਣਾਦੀਸੁ ਖਰਪਤ੍ਤਾਦਿਸਞ੍ਞੀ’’ਤਿ ਵੁਤ੍ਤਂ ‘‘ਰੂਪਿਯਂ ਪਟਿਗ੍ਗਣ੍ਹਾਤੀ’’ਤਿ ਵਚਨਵਸੇਨ.
‘‘ਅਪਿਚ ਪੁਞ੍ਞਕਾਮਾ’’ਤਿਆਦਿ ਪਨ ਵਿਧਾਨਨ੍ਤਰਦਸ੍ਸਨਤ੍ਥਂ ਵੁਤ੍ਤਂ, ਤੇਨੇਵ ਹਿ ‘‘ਇਮਸ੍ਮਿਂ ਗੇਹੇ ਇਦਂ ਲਦ੍ਧਨ੍ਤਿ ਸਲ੍ਲਕ੍ਖੇਤਬ੍ਬ’’ਨ੍ਤਿ ਵੁਤ੍ਤਂ. ਅਞ੍ਞਥਾ ਸਲ੍ਲਕ੍ਖਣੇ ਵਿਮਤਿਵਸੇਨ, ਵਿਮਤਿਯਾ ਚ ਸਤਿ ਨਿਸ੍ਸਗ੍ਗਿਯਮੇਵ ‘‘ਰੂਪਿਯੇ ਵੇਮਤਿਕੋ’’ਤਿਆਦਿ ਵਚਨਤੋਤਿ. ਇਦਂ ਵਿਧਾਨਂ ਨਿਰਤ੍ਥਕਮੇਵ ਆਪਜ੍ਜਤਿ, ਨ ਚ ਨਿਰਤ੍ਥਕਂ. ਕਸ੍ਮਾ? ਦੁਸ੍ਸਨ੍ਤੇ ਬਦ੍ਧਕਹਾਪਣਾਦਿ ਅਸ੍ਸਤਿਯਾ ਦਿਨ੍ਨਂ ਵਤ੍ਥਸਞ੍ਞਾਯ ਪਟਿਗ੍ਗਹਿਤਞ੍ਚ, ਤਤੋ ਨ ਰੂਪਿਯਂ ਦਿਨ੍ਨਞ੍ਚ ਹੋਤਿ ਪਟਿਗ੍ਗਹਿਤਞ੍ਚਾਤਿ. ਏਤ੍ਥ ਆਪਤ੍ਤਿਦੇਸਨਾਕਿਚ੍ਚਂ ਨਤ੍ਥਿ, ਤਂ ਪਨ ਦਾਯਕਾਨਮੇਵ ਪਟਿਦਾਤਬ੍ਬਂ. ਤਤੋ ਉਪ੍ਪਨ੍ਨਂ ਕਪ੍ਪਿਯਭਣ੍ਡਞ੍ਚ ਸਬ੍ਬੇਸਂ ਕਪ੍ਪਤੀਤਿ ਇਮਸ੍ਸ ਵਿਧਾਨਨ੍ਤਰਦਸ੍ਸਨਤ੍ਥਂ ‘‘ਅਪਿਚ ਪੁਞ੍ਞਕਾਮਾ’’ਤਿਆਦੀਤਿ ਨੋ ਤਕ੍ਕੋਤਿ ਆਚਰਿਯੋ.
ਰੂਪਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ
੫੮੭. ‘‘ਜਾਤਰੂਪਰਜਤਪਰਿਵਤ੍ਤਨ’’ਨ੍ਤਿ ਉਕ੍ਕਟ੍ਠਪਰਿਚ੍ਛੇਦੇਨ ਵੁਤ੍ਤਂ, ਤਥਾ ‘‘ਰੂਪਿਯਂ ਨਾਮ ਸਤ੍ਥੁਵਣ੍ਣੋ ਕਹਾਪਣੋ’’ਤਿਆਦਿ ਪਾਲ਼ਿਵਚਨਞ੍ਚ. ‘‘ਅਰੂਪਿਯੇ ਰੂਪਿਯਸਞ੍ਞੀ ਰੂਪਿਯਂ ਚੇਤਾਪੇਤੀ’’ਤਿਆਦਿ ਤਿਕਵਚਨਤੋ, ‘‘ਦੁਕ੍ਕਟਵਤ੍ਥੁਨਾ ਪਨ ਨਿਸ੍ਸਗ੍ਗਿਯਵਤ੍ਥੁਂ ਚੇਤਾਪੇਨ੍ਤਸ੍ਸ…ਪੇ… ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਗਰੁਕਸ੍ਸ ਚੇਤਾਪਿਤਤ੍ਤਾ’’ਤਿ ਅਟ੍ਠਕਥਾਵਚਨਤੋ ਚ ਪਨ ਅਨੁਕ੍ਕਟ੍ਠਪਰਿਚ੍ਛੇਦੋਪੇਤ੍ਥ ਲਬ੍ਭਤੀਤਿ ਸਿਦ੍ਧਂ. ਸਤ੍ਥੁਵਣ੍ਣੋ ਚ ਕਹਾਪਣੋ ਚ ਤਤੋ ਯੇ ਚਞ੍ਞੇ ਵੋਹਾਰਂ ਗਚ੍ਛਨ੍ਤੀਤਿ ਏਵਮੇਤ੍ਥ ਸਮੁਚ੍ਚਯੋ ਵੇਦਿਤਬ੍ਬੋ. ਇਮਸ੍ਮਿਂ ਪਨ ਸਿਕ੍ਖਾਪਦੇ ‘‘ਨਾਨਪ੍ਪਕਾਰਕਂ ਨਾਮ ਕਤਮ੍ਪਿ ਅਕਤਮ੍ਪਿ ਕਤਾਕਤਮ੍ਪੀ’’ਤਿ ਏਤ੍ਥ ਵਿਭਤ੍ਤਾਨਂ ਤਿਣ੍ਣਂ ਰੂਪਿਯਾਰੂਪਿਯਾਨਞ੍ਚ ਦ੍ਵਿਨ੍ਨਂ ਵਸੇਨ ਪਞ੍ਚ ਤਿਕਾ ਵੁਤ੍ਤਾ, ਅਟ੍ਠਕਥਾਚਰਿਯੇਹਿ ਤਦਨੁਲੋਮਤੋ ਏਕੋ ਤਿਕੋ ਦਸ੍ਸਿਤੋਤਿ ਸਬ੍ਬੇ ਛ ਹੋਨ੍ਤਿ.
ਏਤ੍ਥਾਹ – ਅਞ੍ਞਸ੍ਮਿਂ ਸਿਕ੍ਖਾਪਦੇ ਏਕਸ੍ਮਿਂ ਤਿਕਚ੍ਛੇਦੇ ਦਸ੍ਸਿਤੇ ਸਤਿਪਿ ਸਮ੍ਭਵੇ ਇਤਰੇ ਨ ਦਸ੍ਸੀਯਨ੍ਤਿ, ਇਧੇਵ ਕਸ੍ਮਾ ਦਸ੍ਸਿਤੋਤਿ? ‘‘ਨਾਨਪ੍ਪਕਾਰਕ’’ਨ੍ਤਿ ਮਾਤਿਕਾਯਂ ਵੁਤ੍ਤਤ੍ਤਾ ਇਧੇਵ ਨਾਨਪ੍ਪਕਾਰਭਾਵਦਸ੍ਸਨਤ੍ਥਨ੍ਤਿ. ਨ ਕਯਵਿਕ੍ਕਯਸਿਕ੍ਖਾਪਦੇਪਿ ਵਤ੍ਤਬ੍ਬਪ੍ਪਸਙ੍ਗਤੋਤਿ ਚੇ? ਨ, ਇਧ ਦਸ੍ਸਿਤਨਯਤ੍ਤਾ. ਅਥ ਚ ਰੂਪਿਯਸ੍ਸ ਵਿਭਙ੍ਗੇ ‘‘ਯੇ ਵੋਹਾਰਂ ਗਚ੍ਛਨ੍ਤੀ’’ਤਿ ਅਨ੍ਤੇ ਵੁਤ੍ਤਤ੍ਤਾ ਸਤ੍ਥੁਵਣ੍ਣਾਦਯੋ ਵਲ਼ਞ੍ਜਨੁਪਗਾ ਏਵਾਤਿ ਸਿਦ੍ਧਂ. ਤਤੋ ਅਵਲ਼ਞ੍ਜਨੁਪਗੇਹਿ ਜਾਤਰੂਪਰਜਤੇਹਿ ਵੋਹਾਰੇਨ ਨ ਨਿਸ੍ਸਗ੍ਗਿਯਨ੍ਤਿ ਆਪਜ੍ਜਤਿ, ਤਸ੍ਮਾ ਤਂ ਆਪਜ੍ਜਨਤ੍ਥਨ੍ਤਿ ਦਸ੍ਸੇਨ੍ਤੇਨ ‘‘ਕਤੇਨ ਕਤਂ ਚੇਤਾਪੇਤੀ’’ਤਿਆਦਯੋ ਤਿਕਾ ਵੁਤ੍ਤਾਤਿ, ਏਵਂ ਸਨ੍ਤੇ ਰੂਪਿਯਵਿਭਙ੍ਗੇ ‘‘ਯੇ ਚ ਵੋਹਾਰਂ ਗਚ੍ਛਨ੍ਤੀ’’ਤਿ ਨ ਵਤ੍ਤਬ੍ਬਂ, ਤਸ੍ਮਿਂ ਪਦੇ ਅਵੁਤ੍ਤੇ ਅਵਲ਼ਞ੍ਜਨੁਪਗਾਪਿ ਸਙ੍ਗਹਂ ਗਤਾਵ ਹੋਨ੍ਤੀਤਿ ਕਤਾਦੀਹਿ ਤਿਕਤ੍ਤਯਸ੍ਸ ਵਤ੍ਤਬ੍ਬਪਯੋਜਨਂ ਨ ਭਵਿਸ੍ਸਤੀਤਿ ਚੇ? ਨ, ਕਪ੍ਪਿਯਭਣ੍ਡੇਨ ਕਪ੍ਪਿਯਭਣ੍ਡਪਅਵਤ੍ਤਨਸ੍ਸਾਪਿ ਰੂਪਿਯਸਂਵੋਹਾਰਭਾਵਪ੍ਪਸਙ੍ਗਤੋ. ‘‘ਯੇ ਵੋਹਾਰਂ ਗਚ੍ਛਨ੍ਤੀ’’ਤਿ ਵਚਨੇਨਪਿ ਕਮੁਕ ਕਥਲ ਕਂਸਭਾਜਨ ਸਾਟਕਾਦਿਪਰਿਵਤ੍ਤਨਸ੍ਸਪਿ ਰੂਪਿਯਸਂਵੋਹਾਰਭਾਵਪ੍ਪਸਙ੍ਗੋ ਏਵਾਤਿ ਚੇ? ਨ, ਕਤਾਦਿਵਚਨੇਨ ਜਾਤਰੂਪਾਦਿਅਕਪ੍ਪਿਯਵਤ੍ਥੂਨਞ੍ਞੇਵ ਅਧਿਪ੍ਪੇਤਭਾਵਦੀਪਨਤੋ, ਤਸ੍ਮਾ ਉਭਯੇਨਪਿ ਯਦੇਤਂ ਕਤਾਕਤਾਦਿਭੇਦਂ ਪਾਕਤਿਕਰੂਪਿਯਂ ਯਞ੍ਚ ਕਹਾਪਣਮਾਸਕਸਙ੍ਖੇਪਂ, ਯਞ੍ਚ ਕਹਾਪਣਾਦਿਵੋਹਾਰੂਪਗਂ, ਉਭਯਮ੍ਪੇਤਂ ਇਧ ਚ ਅਨਨ੍ਤਰਾਤੀਤਸਿਕ੍ਖਾਪਦੇ ਚ ਰੂਪਿਯਂ ਨਾਮਾਤਿ ਅਧਿਪ੍ਪੇਤਤ੍ਥਸਿਦ੍ਧਿ ਹੋਤਿ, ਨ ਤਣ੍ਡੁਲਾਦੀਨਿ, ਤਤ੍ਥ ਕਤਾਦਿਵੋਹਾਰਾਸਮ੍ਭਵਤੋ. ਏਤ੍ਤਾਵਤਾ ਕਤਾਦਿਤਿਕਤ੍ਤਯਪ੍ਪਯੋਜਨਂ ਵੁਤ੍ਤਂ.
ਇਦਾਨਿ ਸੇਸਤ੍ਤਿਕਾਨਿ ਵੁਚ੍ਚਤਿ – ਏਤ੍ਥ ਹਿ ਯਥਾਵੁਤ੍ਤਪ੍ਪਭੇਦਂ ਨਿਸ੍ਸਗ੍ਗਿਯਵਤ੍ਥੁ ਰੂਪਿਯਂ ਨਾਮ, ਸੇਸਂ ਦੁਕ੍ਕਟਵਤ੍ਥੁਪਿ ਕਪ੍ਪਿਯਵਤ੍ਥੁਪਿ ਨ ਰੂਪਿਯਨ੍ਤਿ ਅਰੂਪਿਯਂ ਨਾਮ ਹੋਤੀਤਿ ਕਤ੍ਵਾ ‘‘ਅਰੂਪਿਯੇ ਅਰੂਪਿਯਸਞ੍ਞੀ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਨਾਪਤ੍ਤੀ’’ਤਿ ਇਦਂ ਨ ਏਕਂਸਿਕਂ ਆਪਜ੍ਜਤਿ ਦੁਕ੍ਕਟਵਤ੍ਥੁਮ੍ਹਿ ਦੁਕ੍ਕਟਾਪਜ੍ਜਨਤੋ. ਇਧ ਵਚਨਪ੍ਪਮਾਣਤੋ ਨਿਸ੍ਸਗ੍ਗਿਯਵਤ੍ਥੁਤੋ ਅਞ੍ਞਂ ਅਨ੍ਤਮਸੋ ਮੁਤ੍ਤਾਦਿਪਿ ਅਰੂਪਿਯਮੇਵ ਨਾਮ. ਤਤ੍ਥ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਨਾਪਤ੍ਤੀਤਿ ਚੇ? ਨ, ਰਾਜਸਿਕ੍ਖਾਪਦਵਿਰੋਧਤੋ. ਤਤ੍ਥ ਹਿ ‘‘ਮੁਤ੍ਤਾ ਵਾ ਮਣਿ ਵਾ’’ਤਿ ਵੁਤ੍ਤਂ, ਤਸ੍ਮਾ ਮੁਤ੍ਤਾਦਿ ਅਕਪ੍ਪਿਯਂ ਦੁਕ੍ਕਟਵਤ੍ਥੂਤਿ ਚ ਸਿਦ੍ਧਂ ਨਿਸ੍ਸਗ੍ਗਿਯਵਤ੍ਥੂਸੁ ਅਭਾਵਾ. ਏਵਂ ਸਨ੍ਤੇ ‘‘ਅਰੂਪਿਯੇ ਅਰੂਪਿਯਸਞ੍ਞੀ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਨਾਪਤ੍ਤੀ’’ਤਿ ਸੁਦ੍ਧਕਪ੍ਪਿਯਭਣ੍ਡਂ ਸਨ੍ਧਾਯ ਵੁਤ੍ਤਂ, ਨ ਸਬ੍ਬਂ ਅਰੂਪਿਯਂ. ਤਤੋ ਅਞ੍ਞਤ੍ਥ ਪਨ ‘‘ਅਰੂਪਿਯੇ ਰੂਪਿਯਸਞ੍ਞੀ’’ਤਿਆਦਿਤਿਕਦੁਕ੍ਕਟੇ ਚ ਅਟ੍ਠਕਥਾਯਂ ਦਸ੍ਸਿਤਤਿਕੇ ਚ ਸਬ੍ਬਂ ਅਰੂਪਿਯਂ ਨਾਮਾਤਿ ਵੇਦਿਤਬ੍ਬਂ, ਤਸ੍ਮਾ ਅਰੂਪਿਯਭਾਵਦੀਪਨਤ੍ਥਂ ਦੁਤਿਯੋ ਤਿਕੋ ਵੁਤ੍ਤੋ. ਤਦਤ੍ਥਮੇਵ ਅਟ੍ਠਕਥਾਯਂ ਦਸ੍ਸਿਤੋ ਏਕੋ ਤਿਕੋ. ਕਸ੍ਮਾ ਨ ਪਾਲ਼ਿਯਂ ਸੋ ਵੁਤ੍ਤੋਤਿ ਚੇ? ਤਤ੍ਥ ਚੇਤਾਪਿਤਅਰੂਪਿਯੇ ਰੂਪਿਯਛਡ੍ਡਨਕਸਮ੍ਮੁਤਿਕਿਚ੍ਚਾਭਾਵਤੋ. ਤਸ੍ਮਿਞ੍ਹਿ ਤਿਕੇ ਵੁਤ੍ਤੇ ਕਪ੍ਪਿਯਵਤ੍ਥੁਨੋਪਿ ਅਰੂਪਿਯਛਡ੍ਡਨਕਸਮ੍ਮੁਤਿ ਦਾਤਬ੍ਬਾਤਿ ਆਪਜ੍ਜਤਿ, ਤਸ੍ਸ ਵਸੇਨ ਰੂਪਿਯਛਡ੍ਡਨਕਸਮ੍ਮੁਤਿ ਏਵ ਨ ਵਤ੍ਤਬ੍ਬਾਤਿ? ਨ, ਰੂਪਿਯਸ੍ਸਪਿ ਸਮ੍ਮੁਤਿਕਿਚ੍ਚਾਭਾਵਪ੍ਪਸਙ੍ਗਤੋ, ਤਸ੍ਮਾ ਰੂਪਿਯੇ ਰੂਪਿਯਸਞ੍ਞੀ ਕਪ੍ਪਿਯਵਤ੍ਥੁਂ ਚੇਤਾਪੇਤਿ ਪਤ੍ਤਚਤੁਕ੍ਕੇ ਤਤਿਯਪਤ੍ਤਂ ਵਿਯ, ਤਂ ਸਙ੍ਘਾਦੀਨਂ ਨਿਸ੍ਸਜ੍ਜਿਤਬ੍ਬਂ, ਨਿਸ੍ਸਟ੍ਠਂ ਪਨ ਅਞ੍ਞੇਸਂ ਕਪ੍ਪਤਿ ਤਤਿਯਪਤ੍ਤੋ ਵਿਯ. ਅਥ ਸਮ੍ਪਟਿਚ੍ਛਿਤਰੂਪਿਯੇਨ ਚੇਤਾਪਿਤਂ ਹੋਤਿ ਦੁਤਿਯਪਤ੍ਤੋ ਵਿਯ, ਤਂ ਵਿਨਾਪਿ ਸਮ੍ਮੁਤਿਯਾ ਯੋ ਕੋਚਿ ਭਿਕ੍ਖੁ ਛਡ੍ਡੇਤਿ, ਵਟ੍ਟਤਿ. ਤਤੋ ਪਰਂ ‘‘ਸਚੇ ਤਤ੍ਥ ਆਗਚ੍ਛਤਿ ਆਰਾਮਿਕੋ ਵਾ’’ਤਿਆਦਿਨਾ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ. ਤਤ੍ਥ ‘‘ਰੂਪਿਯੇ’’ਤਿ ਵਾ ‘‘ਅਰੂਪਿਯੇ’’ਤਿ ਵਾ ਸਬ੍ਬਤ੍ਥ ਭੁਮ੍ਮਪ੍ਪਤ੍ਤੇ ਅਤ੍ਤਨੋ ਸਨ੍ਤਕਂ, ਉਪਯੋਗਪ੍ਪਤ੍ਤੇ ਪਰਸਨ੍ਤਕਨ੍ਤਿ ਵੇਦਿਤਬ੍ਬਂ. ਏਤ੍ਥਾਹ – ਉਪਤਿਸ੍ਸਤ੍ਥੇਰੋ ਪੁਰਿਮਸਿਕ੍ਖਾਪਦੇਨ ਰੂਪਿਯਪਟਿਗ੍ਗਹਣਂ ਵਾਰਿਤਂ, ਇਮਿਨਾ ਸੁਦ੍ਧਾਗਮੇਨ ਕਪ੍ਪਿਯਕਾਰਕਸ੍ਸ ਹਤ੍ਥੇ ਕਪ੍ਪਿਯਂ ਨਿਸ੍ਸਾਯ ਠਿਤੇਨ ਸਂਵੋਹਾਰੋ ਵਾਰਿਤੋਤਿ.
੫੮੯. ਨਿਸ੍ਸਗ੍ਗਿਯਵਤ੍ਥੁਨਾ ਨਿਸ੍ਸਗ੍ਗਿਯਵਤ੍ਥੁਂ…ਪੇ… ਅਪਰਾਪਰਪਰਿਵਤ੍ਤਨੇ ਇਮਿਨਾਤਿ ਏਤ੍ਥ ਏਕਸ੍ਮਿਂ ਏਵ ਵਤ੍ਥੁਸ੍ਮਿਂ ਦ੍ਵਿਨ੍ਨਂ ਸਿਕ੍ਖਾਪਦਾਨਂ ਵਸੇਨ ਏਕਤੋ ਆਪਤ੍ਤਿ ਵੁਤ੍ਤਾ, ਤਂ ਪਨ ਪਚ੍ਛਿਮਸ੍ਸ ਵਸੇਨ ਨਿਸ੍ਸਜ੍ਜਿਤਬ੍ਬਂ. ਏਤੇਨ ਨਿਸ੍ਸਗ੍ਗਿਯਂ ਆਪਨ੍ਨਮ੍ਪਿ ਆਪਜ੍ਜਤੀਤਿ ਏਕੇ. ਪਰਸ੍ਸ ਰੂਪਿਯਗ੍ਗਹਣਂ ਪਰਿਵਤ੍ਤਨਨ੍ਤਿ ਰੂਪਿਯੇ ਅਗ੍ਗਹਿਤੇ ਤਸ੍ਸ ਅਭਾਵਤੋ ਇਮਿਨਾਵ ਆਪਤ੍ਤਿ, ਨ ਪੁਰਿਮੇਨ ਓਮਸਵਾਦੋ ਵਿਯ. ਮੁਸਾਵਾਦੇਨ ਮੁਸਾ ਵਦਨ੍ਤਸ੍ਸਾਪਿ ਹਿ ਓਮਸਵਾਦੇਨੇਵ ਆਪਤ੍ਤਿ. ਨਿਸ੍ਸਗ੍ਗਿਯਵਤ੍ਥੁਨਾ ਦੁਕ੍ਕਟ…ਪੇ… ਏਸੇਵ ਨਯੋਤਿ ਏਤਸ੍ਸ ਯੁਤ੍ਤਿਂ ਦਸ੍ਸੇਨ੍ਤੋ ‘‘ਯੋ ਹਿ ਅਯ’’ਨ੍ਤਿ ਆਹ.
ਵਡ੍ਢਿਂ ਪਯੋਜੇਨ੍ਤਸ੍ਸਾਤਿ ਏਤ੍ਥ ਇਦਂ ਗਹੇਤ੍ਵਾ ਸਤਿ ਮਾਸੇ, ਸਤਿ ਸਂਵਚ੍ਛਰੇ ‘‘ਏਤ੍ਤਕਂ ਦੇਹੀ’’ਤਿ ਚੇ ਵਦਤਿ. ਰੂਪਿਯਸਂਵੋਹਾਰੋ ਹੋਤਿ. ਵਿਨਾ ਕਪ੍ਪਿਯਕਾਰਕੇਨ ‘‘ਏਤ੍ਤਕਾ ਵੁਡ੍ਢਿ ਹੋਤੁ, ਏਤ੍ਤਕਂ ਗਣ੍ਹਾ’’ਤਿ ਵਦਤੋ ਦੁਕ੍ਕਟਂ ਕਯਵਿਕ੍ਕਯਲਕ੍ਖਣਾਭਾਵਤੋ. ‘‘ਮੂਲੇ ਮੂਲਸਾਮਿਕਾਨ’’ਨ੍ਤਿਆਦਿ ਕਪ੍ਪਿਯਕਰਣੂਪਾਯਦਸ੍ਸਨਤ੍ਥਂ ਵੁਤ੍ਤਂ, ਨ ਕੇਵਲਂ ਨਿਸ੍ਸਟ੍ਠਂ ਅਪਰਿਭੋਗਂ ਹੋਤਿ, ਪੁਨ ਏਵਂ ਕਤੇ ਪਰਿਭੁਞ੍ਜਿਤੁਂ ਵਟ੍ਟਤਿ. ਤਸ੍ਸਪਿ ਪਰਿਭੋਗੇ ਮੂਲਸ੍ਸ ਕਪ੍ਪਿਯਕਰਣੂਪਾਯੋ ਚੇ ਨ ਹੋਤਿ, ਕਪ੍ਪਿਯਂ ਆਚਿਕ੍ਖਿਤਬ੍ਬਨ੍ਤਿ ਯਥਾ ਪਾਲ਼ਿਯਾ ਚੇਤ੍ਥ ਕਪ੍ਪਿਯਕਰਣੂਪਾਯੋ, ਸੋ ਚ ਤਤਿਯਪਤ੍ਤੇਪਿ, ‘‘ਯਥਾ ਚ ਅਤ੍ਤਨੋ ਅਤ੍ਥਾਯ ਗਹਿਤੇ ਏਵਰੂਪੁਪਾਯੋ, ਤਥਾ ਸਙ੍ਘਾਦਿਅਤ੍ਥਾਯ ਗਹਿਤੇਪਿ ਏਸੋ ਵਾ’’ਤਿ ਵੁਤ੍ਤਂ. ਇਮੇ ਕਿਰ ਪਠਮਦੁਤਿਯਪਤ੍ਤੇ ਯਾਵ ਗਹਟ੍ਠੇਨ ਪਰਿਵਤ੍ਤੇਤਿ, ਤਾਵ ਨ ਕਪ੍ਪਿਯਕਰਣੂਪਾਯੋ, ਅਨੇਕਪੁਰਿਸਯੁਗਮ੍ਪਿ ‘‘ਅਕਪ੍ਪਿਯਾ ਏਵਾ’’ਤਿ ਅਟ੍ਠਕਥਾਯਂ ਵੁਤ੍ਤਂ. ਅਨੁਗਣ੍ਠਿਪਦੇ ਪਨ ‘‘ਸਙ੍ਘਸਨ੍ਤਕਂ ਕਪ੍ਪਿਯਭਣ੍ਡਂ ਵਿਕ੍ਕਿਣਿਤ੍ਵਾ ਆਗਤਕਹਾਪਣਾਨਿਪਿ ਪਟਿਗ੍ਗਹਣਂ ਮੋਚੇਤ੍ਵਾਵ ਸਮ੍ਪਟਿਚ੍ਛਿਤਬ੍ਬਾਨਿ, ਤਸ੍ਮਾ ਕਪ੍ਪਿਯਕਾਰਕੋ ਚੇ ਇਮਾਨਿ ਤਾਨਿ ਕਹਾਪਣਾਨੀਤਿ ਵਦਤਿ, ਨ ਵਟ੍ਟਤਿਯੇਵ, ਪਟਿਕ੍ਖਿਪਿਤਬ੍ਬਂ, ਨ ਵਿਚਾਰੇਤਬ੍ਬਂ, ਵਿਚਾਰੇਤਿ ਚੇ? ਸਬ੍ਬੇਸਂ ਨ ਕਪ੍ਪਤਿ. ਪਟਿਗ੍ਗਹਣਂ ਮੋਚੇਤ੍ਵਾ ਸਮ੍ਪਟਿਚ੍ਛਿਤਾਨਿ ਚੇ ਵਿਚਾਰੇਤਿ, ਤਸ੍ਸੇਵ ਨ ਵਟ੍ਟਤੀ’’ਤਿ ਅਭਿਕ੍ਖਣਂ ਵੁਤ੍ਤਂ.
ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ
੫੯੩. ਪਟਪਿਲੋਤਿਕਾਨਨ੍ਤਿ ਪਟਪਿਲੋਤਿਕੇਹਿ. ‘‘ਅਜ੍ਝਾਚਰਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਦਂ ਪੁਰਿਮਸਿਕ੍ਖਾਪਦੇਪਿ ਵੇਦਿਤਬ੍ਬਂ. ‘‘ਕਯਿਤਞ੍ਚ ਹੋਤਿ ਵਿਕ੍ਕਯਿਤਞ੍ਚਾ’’ਤਿ ਏਤੇਸਂ ਪਦਾਨਂ ਵਿਪਰੀਤਤੋ ‘‘ਅਤ੍ਤਨੋ ਭਣ੍ਡ’’ਨ੍ਤਿਆਦਿ ਵੁਤ੍ਤਂ. ਕਸ੍ਮਾ? ‘‘ਇਮਿਨਾ ਇਮ’’ਨ੍ਤਿ ਵਚਨਾਨੁਰੂਪਤੋ. ਸਦ੍ਧਾਦੇਯ੍ਯਵਿਨਿਪਾਤਨਂ ਪਨੇਤ੍ਥ ਅਟ੍ਠਾਨਪਦਾਨਂ ਵਸੇਨ ਵੇਦਿਤਬ੍ਬਂ.
ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਕੋਸਿਯਵਗ੍ਗੋ ਦੁਤਿਯੋ.