੩. ਪਤ੍ਤਵਗ੍ਗੋ

੧. ਪਤ੍ਤਸਿਕ੍ਖਾਪਦਵਣ੍ਣਨਾ

੫੯੮. ਬਹੂ ਪਤ੍ਤੇ ਸਨ੍ਨਿਚਯਨ੍ਤਿ ਏਤ੍ਥ ਸਨ੍ਨਿਚਯਨ੍ਤਿ ਭਾਵਨਪੁਂਸਕਂ, ਬਹੂ ਪਤ੍ਤੇ ਵਾ ਗਹੇਤ੍ਵਾ ਸਨ੍ਨਿਚਯਂ ਕਰਿਸ੍ਸਨ੍ਤੀਤਿ ਅਤ੍ਥੋ. ‘‘ਅਡ੍ਢਤੇਰਸਪਲਮਾਸਾਨਂ ਗਾਹਿਕਾ’’ਤਿ ਲਿਖਿਤਂ. ਏਤ੍ਥ –

‘‘ਕੁਡੁਵੋ ਚਤੁਪਲੇਯ੍ਯੋ, ਕੁਡੁਵਾਨਂ ਚਤੁਗ੍ਗੁਣਂ;

ਪਤ੍ਥਂ ਚਤੁਗ੍ਗੁਣੋ ਮਾਸਾ-ਤਿ ਕਮਾਹੁ ਚਤੁਗ੍ਗੁਣ’’ਨ੍ਤਿ. –

ਆਦਿਂ ਲੋਕਵੋਹਾਰਂ ਦਸ੍ਸੇਤ੍ਵਾਵ ਕੇਚਿ ਪਪਞ੍ਚੇਨ੍ਤਿ.

੬੦੨. ਖਾਦਨਨ੍ਤਿ ਖਾਦਨੀਯਂ ਸੂਪਾਦਿ. ‘‘ਬ੍ਯਞ੍ਜਨਸ੍ਸ ਮਤ੍ਤਾ ਨਾਮ ਓਦਨਤੋ ਚਤੁਤ੍ਥੋ ਭਾਗੋ’’ਤਿ (ਮ. ਨਿ. ਅਟ੍ਠ. ੨.੩੮੭) ਬ੍ਰਹ੍ਮਾਯੁਸੁਤ੍ਤਟ੍ਠਕਥਾਯਂ ਵੁਤ੍ਤਤ੍ਤਾ ਆਲੋਪਸ੍ਸ ਚਤੁਤ੍ਥਭਾਗਂ ਬ੍ਯਞ੍ਜਨਂ ਅਨੁਰੂਪਨ੍ਤਿ ਗਹੇਤਬ੍ਬਂ. ‘‘ਭਿਕ੍ਖੁਨਿਯਾ ਪਤ੍ਤਸਨ੍ਨਿਚਯਸ੍ਸ ਵਾਰਿਤਤ੍ਤਾ ਤਦਨੁਲੋਮਤੋ ਭਿਕ੍ਖੂਨਮ੍ਪਿ ਦੁਤਿਯੋ ਵਾਰਿਤੋ’’ਤਿ ਵੁਤ੍ਤਂ, ਤਂ ਨ ਯੁਤ੍ਤਂ, ਪਾਲ਼ਿਯਞ੍ਹਿ ‘‘ਸਨ੍ਨਿਚਯਂ ਕਰੇਯ੍ਯਾਤਿ ਅਨਧਿਟ੍ਠਿਤੋ ਅਵਿਕਪ੍ਪਿਤੋ’’ਤਿ (ਪਾਚਿ. ੭੩੫) ਵੁਤ੍ਤਂ. ਸੋ ਹਿ ਕਥਿਨਕ੍ਖਨ੍ਧਕੇ (ਮਹਾਵ. ੩੦੬ ਆਦਯੋ) ਨਿਚਯਸਨ੍ਨਿਧਿ ਵਿਯ ਏਕੋਪਿ ਪੁਨਦਿਵਸੇ ‘‘ਸਨ੍ਨਿਚਯੋ’’ਤਿ ਵੁਚ੍ਚਤਿ. ਅਨਨ੍ਤਰਸਿਕ੍ਖਾਪਦੇ ਪਨ ‘‘ਦੁਤਿਯੋ ਵਾਰਿਤੋਤਿ ਅਧਿਟ੍ਠਾਨਂ ਨਿਯਤਂ, ਤਸ੍ਮਾ ਦ੍ਵੇ ਪਤ੍ਤੇ ਅਧਿਟ੍ਠਾਤੁਂ ਨ ਲਭਤਿ. ਸਚੇ ਏਕਤੋ ਅਧਿਟ੍ਠਾਤਿ, ਦ੍ਵੇਪਿ ਨ ਅਧਿਟ੍ਠਿਤਾ ਹੋਨ੍ਤਿ. ਵਿਸੁਂ ਵਿਸੁਂ ਅਧਿਟ੍ਠਾਤਿ, ਦੁਤਿਯੋ ਅਨਧਿਟ੍ਠਿਤੋ’’ਤਿ ਵਦਨ੍ਤਿ. ਵਿਕਪ੍ਪੇਤੁਂ ਪਨ ਬਹੂਪਿ ਲਭਤਿ. ਇਦਾਨਿ ਵਤ੍ਤਬ੍ਬਂ ਸਨ੍ਧਾਯ ‘‘ਨਾਮਮਤ੍ਤੇ ਵਿਸੇਸੋ’’ਤਿ ਵੁਤ੍ਤਂ. ਤਤ੍ਥ ਨਾਮਨ੍ਤਿ ਮਜ੍ਝਿਮੋ ਮਜ੍ਝਿਮੋਮਕੋ ਮਜ੍ਝਿਮੁਕ੍ਕਟ੍ਠੋਤਿਆਦਿ.

੬੦੮. ‘‘ਪਾਕਸ੍ਸ ਹਿ ਊਨਤ੍ਤਾ ਪਤ੍ਤਸਙ੍ਖ੍ਯਂ ਨ ਗਚ੍ਛਤੀ’’ਤਿ ਵਚਨਤੋ ਅਧਿਟ੍ਠਿਤਪਤ੍ਤੋਪਿ ਖਰਪਾਕੇਨ ਸੇਤਤ੍ਤਾ ਅਧਿਟ੍ਠਾਨਂ ਵਿਜਹਤੀਤਿ ਚੇ? ਨ, ਅਧਿਟ੍ਠਾਨਵਿਜਹਨੇਸੁ ਨਵਸੁ ਅਨਾਗਤਤ੍ਤਾ, ਤਸ੍ਮਾ ਪਠਮਪਾਕਾਨਂ ਏਵ ਊਨਤ੍ਤਾ ਪਤ੍ਤਸਙ੍ਖ੍ਯਂ ਨ ਗਚ੍ਛਤਿ, ਤਸ੍ਮਿਂ ਸਤਿ ਅਞ੍ਞਂ ਵਿਞ੍ਞਾਪੇਤੁਂ ਨ ਵਟ੍ਟਤਿ. ‘‘ਊਨਪਞ੍ਚਬਨ੍ਧਨੇਨਾ’’ਤਿ ਹਿ ਵੁਤ੍ਤਂ. ਛਿਦ੍ਦੇ, ਰਾਜਿਯਾ ਵਾ ਹਿ ਸਤਿ ਤੇਹਿ ਅਧਿਟ੍ਠਾਨਂ ਵਿਜਹਤੀਤਿ ਵਿਜਹਿਤੇ ਨਾਯਂ ਪਟਿਸੇਧੋ, ਤਸ੍ਮਾ ਪਚ੍ਚੁਦ੍ਧਰਿਤ੍ਵਾ, ਵਿਕਪ੍ਪੇਤ੍ਵਾਪਿ ਅਞ੍ਞਂ ਵਿਞ੍ਞਾਪੇਤੁਂ ਨ ਲਭਤਿ.

ਏਵਂ ਪਤ੍ਤਕਾਰਕੋ ਮੂਲਂ ਲਭਿਤ੍ਵਾਤਿ ਏਤ੍ਥ ਪਚਿਤ੍ਵਾ ਠਪਿਤਦਿਵਸਤੋ ਪਟ੍ਠਾਯ. ਦਾਤੁਕਾਮੋ ਹੁਤ੍ਵਾਤਿ ਏਤ੍ਥ ਦਿਨ੍ਨਦਿਵਸਤੋ, ਸੁਤਦਿਵਸਤੋ ਵਾ ਪਟ੍ਠਾਯ ਦਸਾਹਂ ਵੇਦਿਤਬ੍ਬਂ. ਲਿਙ੍ਗਪਰਿਵਤ੍ਤੇਨ ਪਨ ਦਸਾਹਾਤਿਕ੍ਕਮੇ ਪਤ੍ਤਸਾਮਿਕਸ੍ਸ ਭਿਕ੍ਖੁਸ੍ਸ, ਭਿਕ੍ਖੁਨਿਯਾ ਪਨ ਰਤ੍ਤਾਤਿਕ੍ਕਮੇ ਨਿਸ੍ਸਗ੍ਗਿਯਂ.

ਪਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ

੬੧੨-੩. ਬਹੂ ਪਤ੍ਤੇ ਵਿਞ੍ਞਾਪੇਨ੍ਤੀਤਿ ਏਕਮੇਕਂ ਵਿਞ੍ਞਾਪੇਨ੍ਤਾ ਬਹੂ ਭਿਕ੍ਖੂ ਬਹੂ ਪਤ੍ਤੇ ਵਿਞ੍ਞਾਪੇਨ੍ਤਿ, ਬਹੂ ਵਾ ਭਿਕ੍ਖੂ ਪਤ੍ਤੇ ਵਿਞ੍ਞਾਪੇਨ੍ਤੀਤਿ ਅਤ੍ਥੋ. ‘‘ਨ, ਭਿਕ੍ਖਵੇ, ਪਤ੍ਤੋ ਵਿਞ੍ਞਾਪੇਤਬ੍ਬੋ, ਯੋ ਵਿਞ੍ਞਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਦਂ ਸਿਕ੍ਖਾਪਦਂ ਊਨਪਞ੍ਚਬਨ੍ਧਨੇਨ ਸਮੂਹਤਂ ਹੋਤਿ ਨ ਹੋਤੀਤਿ? ਨ ਹੋਤਿ ਤਮੇਵ ਗਹੇਤ੍ਵਾ ‘‘ਵਿਞ੍ਞਾਪੇਤਿ, ਪਯੋਗੇ ਦੁਕ੍ਕਟ’’ਨ੍ਤਿ ਵੁਤ੍ਤਤ੍ਤਾਤਿ ਏਕੇ. ਪਟਿਲਾਭਮ੍ਪਿ ਪਰਿਯਾਦਿਯਿਤ੍ਵਾ ਤਂ ਦੁਕ੍ਕਟਂ ਵੁਤ੍ਤਂ, ਤਸ੍ਮਾ ਤਂ ‘‘ਪਟਿਲਾਭੇਨ ਨਿਸ੍ਸਗ੍ਗਿਯੋ ਹੋਤੀ’’ਤਿ ਇਮਿਨਾ ਸਮੂਹਤਂ ਹੋਤਿ. ਅਞ੍ਞਥਾ ਸਦੁਕ੍ਕਟਂ ਨਿਸ੍ਸਗ੍ਗਿਯਂ ਆਪਜ੍ਜਤਿ ਅਨਾਪਤ੍ਤਿਵਾਰਵਿਰੋਧੋ ਚ. ਯਾ ਕਾਚਿ ਪਨ ਅਕਤਵਿਞ੍ਞਤ੍ਤਿ ਅਨਨੁਞ੍ਞਾਤਕਾਲੇ ਦੁਕ੍ਕਟਮੇਵ. ਭਿਨ੍ਨੇਨਾਤਿ ਇਤ੍ਥਮ੍ਭੂਤਲਕ੍ਖਣੇ, ਭੇਦੇਨਾਤਿ ਵਾ ਅਤ੍ਥੋ, ਹੇਤ੍ਵਤ੍ਥੇ ਕਰਣਵਚਨਂ.

ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਭੇਸਜ੍ਜਸਿਕ੍ਖਾਪਦਵਣ੍ਣਨਾ

੬੨੦. ‘‘ਸਾ ਅਹੋਸਿ ਸੁਵਣ੍ਣਮਾਲਾ’’ਤਿ ਵਚਨਤੋ ਠਪੇਤ੍ਵਾ ਸਹਧਮ੍ਮਿਕੇ ਅਞ੍ਞੇਸਂ ਯਥਾਸੁਖਂ ਰੂਪਿਯਂ ਦਾਤੁਂ ਵਟ੍ਟਤਿ ਉਗ੍ਗਣ੍ਹਾਪੇਤੁਂ, ਸਬ੍ਯੋਹਾਰਾਪੇਭੁਞ੍ਚਾਤਿ ਆਚਰਿਯੋ, ਵੀਮਂਸਿਤਬ੍ਬਂ ਇਦ੍ਧਿਮਸ੍ਸ ਇਦ੍ਧਿਵਿਸਯਤ੍ਤਾ.

੬੨੨. ‘‘ਯੇਸਂ ਮਂਸਂ ਕਪ੍ਪਤੀ’’ਤਿ ਵਚਨੇਨ ਯੇਸਂ ਮਂਸਂ ਨ ਕਪ੍ਪਤਿ, ਤੇਸਂ ਸਪ੍ਪਿਆਦਿ ਕਿਞ੍ਚਾਪਿ ਨ ਕਪ੍ਪਤਿ, ਨ ਪਨ ਨਿਸ੍ਸਗ੍ਗਿਯਵਤ੍ਥੂਤਿ ਵੇਦਿਤਬ੍ਬਂ. ਤਥਾ ਨ ਪਣੀਤਭੋਜਨਵਤ੍ਥੂਤਿ. ਉਗ੍ਗਹਿਤਕਂ ਕਤ੍ਵਾ ਨਿਕ੍ਖਿਤ੍ਤਨ੍ਤਿ ਅਜ੍ਝੋਹਰਣਤ੍ਥਂ ਨਿਕ੍ਖਿਤ੍ਤਂ. ਇਤਰਞ੍ਹਿ ਪਟਿਗ੍ਗਹੇਤ੍ਵਾ ਅਜ੍ਝੋਹਰਿਤੁਂ ਵਟ੍ਟਤਿ. ਉਭਯੇਸਮ੍ਪੀਤਿ ਪਚ੍ਛਾਭਤ੍ਤਂ ਪਟਿਗ੍ਗਹਿਤੇਹਿ, ਪੁਰੇਭਤ੍ਤਂ ਪਟਿਗ੍ਗਹਿਤੇਹਿ ਚ ਕਤਾਨਂ. ‘‘ਮਂਸਸ੍ਸ ਅਕਪ੍ਪਿਯਤ੍ਤਾ’’ਤਿ ਕਾਰਣਪਤਿਰੂਪਕਂ ਵਤ੍ਵਾ. ਖਾਦਿਂਸੂਤਿ ‘‘ਵਿਕਾਲੇ ਕੇਵਲਂ ਨਵਨੀਤਮੇਵ ਖਾਦਿਤੁਕਾਮੇਨ ਦਧਿਤਕ੍ਕਗਤਾਨਿ ਅਪਨੇਤਬ੍ਬਾਨਿ, ਪਚਿਤੁਕਾਮਸ੍ਸ ਸਾਮਂਪਾਕਂ ਨ ਹੋਤੀਤਿ ਥੇਰਸ੍ਸ ਅਧਿਪ੍ਪਾਯੋ’’ਤਿ ਵੁਤ੍ਤਂ. ‘‘ਖਯਂ ਗਮਿਸ੍ਸਤੀ’’ਤਿ ਵਚਨਤੋ ਖੀਰਂ ਪਕ੍ਖਿਪਿਤ੍ਵਾ ਪਕ੍ਕਸਪ੍ਪਿ ਵਿਕਾਲੇ ਕਪ੍ਪਤੀਤਿ ਸਿਦ੍ਧਂ. ਭੇਸਜ੍ਜੇਹੀਤਿ ਯਾਵਜੀਵਿਕਭੇਸਜ੍ਜੇਹਿ. ਕਤਤੇਲਂ ਪੁਰੇਭਤ੍ਤਨ੍ਤਿ ਅਪਚਿਤ੍ਵਾ ਕਤਂ ਏਵ. ਉਣ੍ਹੋਦਕੇਨਾਤਿ ਤਾਪਨਭਾਵਂ ਦੀਪੇਤੀਤਿ ਕੇਚਿ, ਤਂ ਨ ਸੁਨ੍ਦਰਂ. ਨਿਬ੍ਬਟ੍ਟਿਤਤ੍ਤਾਤਿ ਪਿਞ੍ਞਾਕਾਦਿਤੋ. ‘‘ਤੇਲਤ੍ਥਾਯ ਪਟਿਗ੍ਗਹਿਤ…ਪੇ… ਦੁਕ੍ਕਟਮੇਵਾ’’ਤਿ ਵਚਨਤੋ ਅਤੇਲਤ੍ਥਾਯ ਪਟਿਗ੍ਗਹਿਤੇਹਿ, ਸਤ੍ਤਾਹਾਤਿਕ੍ਕਨ੍ਤੇਹਿਪਿ ਕਤਤੇਲਂ ਕਤਦਿਵਸਤੋ ਪਟ੍ਠਾਯ ਸਤ੍ਤਾਹਂ ਵਟ੍ਟਤੀਤਿ ਛਾਯਾ ਦਿਸ੍ਸਤਿ, ਕਰਮਨ੍ਦਂ ਰੁਕ੍ਖਸਾਰੋਤਿ ਕੇਚਿ.

੬੨੩. ਅਵਸਕਸਟੇ ਯਸ੍ਮਾ ਖੀਰਾਦੀਨਿ ਪਕ੍ਖਿਪਿਤ੍ਵਾ ਤੇਲਂ ਪਚਨ੍ਤਿ, ਤਸ੍ਮਾ ਕਸਟਂ ਨ ਵਟ੍ਟਤਿ, ਤੇਲਮੇਵ ਵਟ੍ਟਤਿ, ਤੇਨ ਵੁਤ੍ਤਂ ‘‘ਪਕ੍ਕਤੇਲਕਸਟੇ ਵਿਯ ਕੁਕ੍ਕੁਚ੍ਚਾਯਤੀ’’ਤਿ. ਵਸਾਯ ਸਦ੍ਧਿਂ ਪਕ੍ਕਤ੍ਤਾ ਨ ਵਟ੍ਟਤੀਤਿ ਚੇ? ਵਦਥ, ਭਨ੍ਤੇ, ਨਵਨੀਤੇ ਦਧਿਗੁਲ਼ਿਕਾਤਿਆਦਿਸਮ੍ਬਨ੍ਧੋ. ਮਧੁਮ੍ਹਿ ਚਤ੍ਤਾਰੋ ਕਾਲਿਕਾ ਯਥਾਸਮ੍ਭਵਂ ਯੋਜੇਤਬ੍ਬਾ, ਉਚ੍ਛੁਮ੍ਹਿ ਚ, ਕਥਂ? ਸਮਕ੍ਖਿਕਂ ਸੇਲ਼ਕਂ ਮਧੁ ਯਾਵਕਾਲਿਕਂ. ਅਨੇਲਕਂ ਉਦਕਸਮ੍ਭਿਨ੍ਨਂ ਯਾਮਕਾਲਿਕਂ, ਅਸਮ੍ਭਿਨ੍ਨਂ ਸਤ੍ਤਾਹਕਾਲਿਕਂ, ਮਧੁਸਿਟ੍ਠਂ ਪਰਿਸੁਦ੍ਧਂ ਯਾਵਜੀਵਿਕਂ. ਤਥਾ ਉਚ੍ਛੁ ਵਾ ਰਸੋ ਵਾ ਸਕਸਟੋ ਯਾਵਕਾਲਿਕੋ, ਨਿਕ੍ਕਸਟੋ ਉਦਕਸਮ੍ਭਿਨ੍ਨੋ ਯਾਮਕਾਲਿਕੋ, ਅਸਮ੍ਭਿਨ੍ਨੋ ਸਤ੍ਤਾਹਕਾਲਿਕੋ, ਸੁਕ੍ਖਕਸਟਂ ਯਾਵਜੀਵਿਕਨ੍ਤਿ ਵੇਦਿਤਬ੍ਬਂ. ਕਸ੍ਮਾ? ਉਦਕਸਮ੍ਭੇਦਵਿਸੇਸਤੋ.

ਕਿਂ ਵੁਤ੍ਤਂ ਹੋਤਿ? ਚਤੂਸੁ ਕਾਲਿਕੇਸੁ ਪੁਬ੍ਬਂ ਪੁਬ੍ਬਂ ਗਰੁਕਂ, ਅਪਰਂ ਅਪਰਂ ਲਹੁਕਂ. ਤੇਸੁ ਚਾਯਂ ਉਦਕਸਮ੍ਭੇਦੋ ਗਰੁਕਂ ਲਹੁਕਂ ਕਰੋਤਿ, ਲਹੁਕਞ੍ਚ ਗਰੁਕਂ. ਅਮ੍ਬਰਸਾਦੀਨਿ ਹਿ ਯਾਵਕਾਲਿਕਤ੍ਤਾ ਗਰੁਕਾਨਿ, ਉਦਕਸਮ੍ਭੇਦੋ ਪਨ ਤਾਨਿ ਅਮ੍ਬਪਾਨਾਦਿਸਮਞ੍ਞਂ ਦਤ੍ਵਾ ਲਹੁਕਾਨਿ ਯਾਮਕਾਲਿਕਾਨਿ ਕਰੋਤਿ. ‘‘ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਨ੍ਤਿ ਉਚ੍ਛੁਰਸਂ ਉਪਾਦਾਯਾ’’ਤਿ ਅਟ੍ਠਕਥਾਵਚਨਤੋ ਉਚ੍ਛੁਰਸੋ ਸਤ੍ਤਾਹਕਾਲਿਕੋਤਿ ਸਿਦ੍ਧਂ. ਤਤ੍ਥ ‘‘ਉਦਕਸਮ੍ਭੇਦੋ ਤਂ ਯਾਮਕਾਲਿਕਂ ਕਰੋਤੀ’’ਤਿਆਦਿਂ ਬਹੁਂ ਵਤ੍ਵਾ ਯੋਜਿਤਾ.

ਅਪਿਚੇਤ੍ਥ ਉਚ੍ਛੁਰਸੋ ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਛੁਰਸ’’ਨ੍ਤਿ (ਮਹਾਵ. ੩੦੦) ਅਨੁਞ੍ਞਾਤਤ੍ਤਾ ਗੁਲ਼ੋਦਕਂ ਵਿਯ ਉਚ੍ਛੁਰਸਸਾਮਞ੍ਞਤੋ ਉਦਕੇਨ ਅਸਮ੍ਭਿਨ੍ਨੋਪਿ ਅਗਿਲਾਨਸ੍ਸ ਵਟ੍ਟਤਿ, ਤੇਨੇਵਾਹ ਅਟ੍ਠਕਥਾਯਂ ‘‘ਉਚ੍ਛੁਰਸੋ ਨਿਕਸਟੋ ਪਚ੍ਛਾਭਤ੍ਤਂ ਵਟ੍ਟਤੀ’’ਤਿ (ਮਹਾ. ਅਟ੍ਠ. ੩੦੦). ਅਯਂ ਸਬ੍ਬੋ ਨੋ ਤਕ੍ਕੋਤਿ ਆਚਰਿਯੋ. ਕੇਚਿ ਪਨਾਹੁ ‘‘ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤ’ਨ੍ਤਿ ਵਚਨਤੋ, ‘ਉਚ੍ਛੁਰਸਂ ਉਪਾਦਾਯਾ’ਤਿ ਅਟ੍ਠਕਥਾਵਚਨਤੋ ਚ ਉਚ੍ਛੁਰਸੋ ਫਾਣਿਤਮੇਵ, ਤਸ੍ਮਾ ਗੁਲ਼ੇ ਵਿਯ ਪਟਿਪਜ੍ਜਿਤਬ੍ਬ’’ਨ੍ਤਿ. ਕੇਚਿ ‘‘ਵੁਤ੍ਤਨਯੇਨ ਸਤ੍ਤਾਹਕਾਲਿਕੋਵ ਸਮਾਨੋ ‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਛੁਰਸ’ਨ੍ਤਿ ਵਿਸੁਂ ਅਨੁਞ੍ਞਾਤਤ੍ਤਾ ਅਸਮ੍ਭਿਨ੍ਨੋਪਿ ਅਗਿਲਾਨਸ੍ਸ ਵਟ੍ਟਤੀ’’ਤਿ ਵਦਨ੍ਤਿ. ਕੇਚਿ ‘‘ਵੁਤ੍ਤਨਯੇਨ ਵਿਸੁਂ ਅਨੁਞ੍ਞਾਤਤ੍ਤਾ ਏਵ ਸਮ੍ਭਿਨ੍ਨੋ ਵਾ ਅਸਮ੍ਭਿਨ੍ਨੋ ਵਾ ਯਾਮਕਾਲਿਕੋਵ, ਗੁਲ਼ੋਦਕਂ ਪਨ ਸਤ੍ਤਾਹਕਾਲਿਕਮੇਵਾ’’ਤਿ ਵਦਨ੍ਤਿ. ਕੇਚਿ ‘‘ਗੁਲ਼ੋਦਕਂ ਵਿਯ ਸੋ ਦੁਵਿਧੋਪਿ ਸਤ੍ਤਾਹਕਾਲਿਕੋਯੇਵਾ’’ਤਿ ਵਦਨ੍ਤਿ.

ਤਤ੍ਥਾਯਂ ਪਠਮਾਚਰਿਯਵਾਦੇ ਵਿਚਾਰਣਾ – ਫਾਣਿਤਾਨੁਮਤਿਯਾਯੇਵ ਉਚ੍ਛੁਰਸਾਨੁਮਤਿਯਾ ਸਿਦ੍ਧਿਤੋ ਵਿਸੁਂ ‘‘ਉਚ੍ਛੁਰਸ’’ਨ੍ਤਿ ਉਦ੍ਧਰਿਤ੍ਵਾ ਅਨੁਮਤਿ ਨਿਰਤ੍ਥਿਕਾਤਿ ਆਪਜ੍ਜਤਿ, ਤਥਾ ‘‘ਉਚ੍ਛੁਰਸੋ ਨਿਕਸਟੋ ਪਚ੍ਛਾਭਤ੍ਤਂ ਵਟ੍ਟਤੀ’’ਤਿ ਅਟ੍ਠਕਥਾਪਿ ਨਿਰਤ੍ਥਿਕਾ. ‘‘ਸਤ੍ਤਾਹਂ ਵਟ੍ਟਤੀ’’ਤਿ ਵਤ੍ਤਬ੍ਬਂ ਸਿਯਾਤਿ, ਨ ਚ ਤਥਾ ਸਕ੍ਕਾ ਵਤ੍ਤੁਂ. ਪਚ੍ਛਾਭਤ੍ਤਂ ਵਟ੍ਟਨਕਰਸਾਧਿਕਾਰਤ੍ਤਾਤਿ ਚੇ? ਨ, ਤਸ੍ਮਿਂ ਅਧਿਕਾਰੇ ਸਤ੍ਤਾਹਕਾਲਿਕਸ੍ਸ ਅਵਤ੍ਤਬ੍ਬਪ੍ਪਸਙ੍ਗਤੋ. ਕਾਲਭੇਦਂ ਅਨਪੇਕ੍ਖਿਤ੍ਵਾ ਰਸਾਧਿਕਾਰੇ ਓਤਿਣ੍ਣਤ੍ਤਾ ਵੁਤ੍ਤੋਤਿ ਚੇ? ਨ ਸਕ੍ਕਾ ‘‘ਨਿਕਸਟੋ ਸਤ੍ਤਾਹਂ ਵਟ੍ਟਤੀ’’ਤਿ ਵਤ੍ਤੁਂ. ਪਚ੍ਛਾਭਤ੍ਤਂ ਵਟ੍ਟਨਕਰਸਾਧਿਕਾਰਤ੍ਤਾ ਨ ਵਤ੍ਤਬ੍ਬਨ੍ਤਿ ਚੇ? ਨ, ਏਵਞ੍ਹਿ ਵੁਤ੍ਤੇ ਤਦਞ੍ਞਰਸੋ ਵਿਯ ਅਯਮ੍ਪਿ ਪਚ੍ਛਾਭਤ੍ਤਮੇਵ ਵਟ੍ਟਤਿ, ਨ ਤਤੋ ਪਰਨ੍ਤਿ ਆਪਜ੍ਜਤਿ. ਤਤੋ ਪਰਂ ਅਪਰਿਭੋਗਤ੍ਤਾ ‘‘ਪਚ੍ਛਾਭਤ੍ਤਂ ਵਟ੍ਟਤੀ’’ਤਿ ਵੁਤ੍ਤਨ੍ਤਿ ਚੇ? ਨ, ਯਾਵਕਾਲਿਕਭਾਵਪ੍ਪਸਙ੍ਗਤੋ. ਨ ਸੋ ਪਸਙ੍ਗੋ ਆਭਿਦੋਸਿਕਸ੍ਸਾਪਿ ਉਚ੍ਛੁਰਸਸ੍ਸ ਪਾਕੇਨ ਫਾਣਿਤਾਦਿਭਾਵਪ੍ਪਸਙ੍ਗਤੋ. ਅਯਮੇਵ ਤਤਿਯਚਤੁਤ੍ਥਾਚਰਿਯਵਾਦੇਸੁ ਵਿਚਾਰਣਾ. ਦੁਤਿਯਵਾਦੇ ਵਿਚਾਰਣਾ ਵੁਤ੍ਤਾ, ਵਿਮਦ੍ਦੋ ਪਨੇਤ੍ਥ ਭੇਸਜ੍ਜਕ੍ਖਨ੍ਧਕੇ (ਮਹਾਵ. ੩੦੦) ਆਵਿ ਭਵਿਸ੍ਸਤਿ. ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਨ੍ਤਿ ਮਧੁਕਤਾਲਨਾਲ਼ਿਕੇਰਫਾਣਿਤਾਦਿਤੋ ਉਕ੍ਕਟਵਤ੍ਥੁਤੋ ਨਿਸ੍ਸਗ੍ਗਿਯਵਤ੍ਥੁਫਾਣਿਤਸ੍ਸ ਵਿਸੇਸਵਚਨਂ, ਤੇਨੇਤਂ ਪਞ੍ਞਾਯਤਿ ‘‘ਨਿਸ੍ਸਗ੍ਗਿਯਵਤ੍ਥੁਭੂਤਂ ਇਧ ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਮੇਵ, ਨ ਮਧੁਕਾਦਿਤੋ ਨਿਬ੍ਬਤ੍ਤ’’ਨ੍ਤਿ. ਏਤ੍ਤਾਵਤਾ ਯਂਕਿਞ੍ਚਿ ਉਚ੍ਛੁਮ੍ਹਾ ਨਿਬ੍ਬਤ੍ਤਂ, ਨ ਤਂ ਸਬ੍ਬਂ ਫਾਣਿਤਮੇਵ ਨਾਮਾਤਿ ਸਾਧਿਤਂ ਹੋਤਿ. ਤੇਨੇਵ ਖਨ੍ਧਕੇ ਫਾਣਿਤਂ ਪਠਮਂ ਅਨੁਜਾਨਿਤ੍ਵਾਵ ਪਚ੍ਛਾ ਉਚ੍ਛੁਰਸੋ ਅਨੁਞ੍ਞਾਤੋ, ਤਥਾ ਤਤ੍ਥੇਵ ਗੁਲ਼ਂ, ਗੁਲ਼ੋਦਕਞ੍ਚ.

ਉਚ੍ਛੁਰਸਂ ਉਪਾਦਾਯ ਅਪਕ੍ਕਾ ਵਾਤਿਆਦਿਮ੍ਹਿ ਪਨ ਯੇਸਂ ਲਦ੍ਧਿ ‘‘ਉਚ੍ਛੁਰਸੋ ਯਾਮਕਾਲਿਕੋ’’ਤਿ. ‘‘ਤੇ ਅਪਕ੍ਕਾ ਵਾਤਿ ਸਾਮਂ ਭਿਕ੍ਖੁਨਾ ਅਪਕ੍ਕਾ ਵਾ. ਅਵਤ੍ਥੁਕਪਕ੍ਕਾ ਵਾਤਿ ਵਿਨਾ ਵਤ੍ਥੁਨਾ ਪਕ੍ਕਾ ਵਾ’’ਤਿ ਅਤ੍ਥਂ ਵਣ੍ਣਯਨ੍ਤਿ, ਤਂ ਨ ਯੁਤ੍ਤਂ ‘‘ਉਚ੍ਛੁਰਸਂ ਉਪਾਦਾਯਾ’’ਤਿ ਇਮਸ੍ਸ ਵਚਨਸ੍ਸ ਪਯੋਜਨਾਭਾਵਪ੍ਪਸਙ੍ਗਤੋ, ਭਿਕ੍ਖੁਨੋ ਪਚਨਾਧਿਕਾਰਾਭਾਵਾ. ਸਾਮਪਾਕੋ ਇਧਾਧਿਪ੍ਪੇਤੋਤਿ ਚੇ? ਸਾਮਂ ਅਪਕ੍ਕਸ੍ਸ ਉਚ੍ਛੁਰਸਸ੍ਸ ਤੇਸਂ ਅਤ੍ਤਨੋਮਤਿਯਾ ਫਾਣਿਤਭਾਵਸਿਦ੍ਧਿਤੋ ਚ ਪਰਤੋ ‘‘ਪੁਰੇਭਤ੍ਤਂ ਪਟਿਗ੍ਗਹਿਤੇਨ ਅਪਰਿਸ੍ਸਾਵਿਤਉਚ੍ਛੁਰਸੇਨ ਕਤਫਾਣਿਤ’’ਨ੍ਤਿਆਦਿਨਯਦਸ੍ਸਨਤੋ ਚ ਤਂ ਅਯੁਤ੍ਤਂ, ਤਤ੍ਥ ‘‘ਅਪਰਿਸ੍ਸਾਵਿਤਉਚ੍ਛੁਰਸੇਨ ਸਯਂਕਤਂ ਨਿਰਾਮਿਸਮੇਵ ਵਟ੍ਟਤੀ’’ਤਿ ਵਚਨਂ ਯਂ ਤਤ੍ਥ ਕਸਟਂ ਸਾਮਪਾਕਂ ਨ ਜਨੇਤਿ, ਸਵਤ੍ਥੁਕਪਟਿਗ੍ਗਹਿਤਕਤਂਯੇਵ ਤਂ ਕਰੋਤੀਤਿ ਦੀਪੇਤਿ, ਤਸ੍ਮਾ ਪਟਿਗ੍ਗਹੇਤੁਂ ਨ ਵਟ੍ਟਤਿ ਵਿਕਾਲੇਤਿ ਪੋਰਾਣਾ. ‘‘ਕੋਟ੍ਟਿਤਉਚ੍ਛੁਫਾਣਿਤਂ ‘ਰਜਨਪਾਕਂ ਵਿਯ ਓਲ਼ਾਰਿਕਂ ਸਵਤ੍ਥੁਕਪਕ੍ਕਂ ਨਾਮ ਹੋਤੀ’ਤਿ ਸਞ੍ਞਾਯ ਪੁਰੇਭਤ੍ਤਮੇਵ ਵਟ੍ਟਤੀ’’ਤਿ ਵੁਤ੍ਤਂ. ਮਹਾਅਟ੍ਠਕਥਾਚਰਿਯਾ ‘‘ਏਵਂ ਫਾਣਿਤਗ੍ਗਹਣਂ ਅਮਧੁਰਂ, ਤਸ੍ਮਾ ਪਚ੍ਛਾਭਤ੍ਤਂ ਨ ਵਟ੍ਟਤੀ’’ਤਿ ਵਦਿਂਸੁ. ਕਿਂ ਮਧੁਰਤਾਯ, ਅਮਧੁਰਤਾਯ ਵਾਤਿ? ਅਤ੍ਥਮੇਵ ਦਸ੍ਸੇਤੁਂ ਮਹਾਪਚ੍ਚਰਿਯਂ ਤਥਾ ਵੁਤ੍ਤਨ੍ਤਿ ਉਪਤਿਸ੍ਸਤ੍ਥੇਰੋ ਆਹ ਕਿਰ. ਤਂ ਯੁਤ੍ਤਨ੍ਤਿ ਉਚ੍ਛੁਤੋ ਨਿਬ੍ਬਤ੍ਤਤ੍ਤਾ ਵੁਤ੍ਤਂ, ਤੇਨੇਵਾਹ ‘‘ਖਣ੍ਡਸਕ੍ਖਰਂ ਪਨ…ਪੇ… ਵਟ੍ਟਤੀ’’ਤਿ. ‘‘ਤਂ ਖੀਰਘਟੇ ਪਕ੍ਖਿਪਿਤ੍ਵਾ ਪਚਨ੍ਤੀ’’ਤਿ ਲਿਖਿਤਂ. ਜਲ੍ਲਿਕਾ ਨਾਮ ਫੇਣਾਦਿ.

ਭੇਸਜ੍ਜੋਦਿਸਂ ਵਦਨ੍ਤੇਨ ਇਤਰੇ ਅਤ੍ਥੁਦ੍ਧਾਰਵਸੇਨ ਵੁਤ੍ਤਾ. ‘‘ਆਹਾਰਤ੍ਥਂ ਫਰਿਤੁਂ ਸਮਤ੍ਥਾਨੀ’’ਤਿ ਖਨ੍ਧਕੇ (ਮਹਾਵ. ੨੬੦) ‘‘ਯਂ ਭੇਸਜ੍ਜਞ੍ਚੇਵ ਅਸ੍ਸ ਭੇਸਜ੍ਜਸਮ੍ਮਤਞ੍ਚ ਲੋਕਸ੍ਸ, ਆਹਾਰਤ੍ਥਞ੍ਚ ਫਰੇਯ੍ਯਾ’’ਤਿ ਵੁਤ੍ਤਤ੍ਤਾ ਵੁਤ੍ਤਂ. ਏਤ੍ਥ ਵਿਚਾਰਣਾ ਭੇਸਜ੍ਜਕ੍ਖਨ੍ਧਕੇ ਆਵਿ ਭਵਿਸ੍ਸਤਿ.

੬੨੪. ਦ੍ਵਾਰਵਾਤਪਾਨਕਵਾਟਾਨੀਤਿ ਦ੍ਵਾਰਸ੍ਸ ਚ ਵਾਤਪਾਨਾਨਞ੍ਚ ਕਵਾਟਾਨਿ. ਕਸਾਵਪਕ੍ਖੇਪਮਤ੍ਤੇਨ ਹਿ ਤਾਨਿ ਅਤ੍ਤਨੋ ਸਭਾਵਂ ਪਰਿਚ੍ਚਜਿਤਾਨਿ ਹੋਨ੍ਤਿ, ਤਸ੍ਮਾ ‘‘ਮਕ੍ਖੇਤਬ੍ਬਾਨੀ’’ਤਿ ਵੁਤ੍ਤਂ. ‘‘ਕਸਾਵੋ ਨਾਮ ਕਨਕਲਮ੍ਬਾਦੀਨਿਪੀ’’ਤਿ ਵਦਨ੍ਤਿ. ਅਧਿਟ੍ਠੇਤੀਤਿ ‘‘ਇਦਾਨਿ ਅਜ੍ਝੋਹਰਣੀਯਂ ਨ ਭਵਿਸ੍ਸਤਿ, ਬਾਹਿਰਪਰਿਭੋਗੋ ਭਵਿਸ੍ਸਤੀ’’ਤਿ ਚਿਤ੍ਤਂ ਉਪ੍ਪਾਦੇਤਿ. ਇਧ ‘‘ਵਿਕਪ੍ਪੇਤੀ’’ਤਿ ਪਦਂ ਨਤ੍ਥਿ. ਅਧਿਟ੍ਠਾਨਮ੍ਪਿ ਮੁਖਾਰੁਲ਼੍ਹਿਯਾ ਵੁਤ੍ਤਂ ‘‘ਇਮਂ ਨਵਨੀਤਂ ਅਧਿਟ੍ਠਾਮੀ’’ਤਿ ਅਵਤ੍ਤਬ੍ਬਤੋ.

੬੨੫. ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤੀਤਿ ਵਿਸ੍ਸਾਸਾਭਾਵਂ ਸਨ੍ਧਾਯ ਵੁਤ੍ਤਂ. ਸਚੇ ਸਵਿਸ੍ਸਾਸੋ, ਵਟ੍ਟਤੀਤਿ ‘‘ਪਰਿਭੁਞ੍ਜ ਤ੍ਵ’’ਨ੍ਤਿ ਏਤ੍ਤਾਵਤਾ ਵਿਸ੍ਸਜ੍ਜਿਤਂ ਹੋਤਿ, ਤਸ੍ਮਾ ਉਭਿਨ੍ਨਂ ਅਨਾਪਤ੍ਤੀਤਿ ਸਮ੍ਬਨ੍ਧੋ. ਸਚੇ ਨ ਵਿਸ੍ਸਜ੍ਜਿਤਂ, ਆਪਤ੍ਤਿ ਹੋਤੀਤਿ ਸਿਦ੍ਧਂ. ਤਸ੍ਮਾ ਉਭਿਨ੍ਨਂ ਸਨ੍ਤਕਂ ਚੀਵਰਂ ਅਞ੍ਞਤਰੇਨ ਸਮ੍ਮੁਖੀਭੂਤੇਨ ਅਧਿਟ੍ਠਾਤਬ੍ਬਂ. ਨੋ ਚੇ ਅਧਿਟ੍ਠਾਤਿ, ਨਿਸ੍ਸਗ੍ਗਿਯਂ ਹੋਤੀਤਿਪਿ ਯੁਜ੍ਜਤਿ. ਕਾਕਨਿਕਮਤ੍ਤਞ੍ਚੇ ਮੂਲਂ ਅਦਿਨ੍ਨਂ, ‘‘ਨ ਅਧਿਟ੍ਠਾਨੁਪਗਂ…ਪੇ… ਸਕਭਾਵਂ ਨ ਉਪੇਤੀ’’ਤਿ ਇਮਿਨਾ ਏਤਂ ਸਦਿਸਂ ਨ ਹੋਤਿ, ਆਭਿਧਮ੍ਮਿਕਗਣਾਨਂ ਦਿਨ੍ਨਂ ਵਿਯ ਚ ਨ ਹੋਤਿ. ਕਸ੍ਮਾ? ਆਭਿਧਮ੍ਮਿਕਾ ਹਿ ਅਨੁਪਸਮ੍ਪਨ੍ਨਾਪਿ ਹੋਨ੍ਤਿ, ਪਚ੍ਛਾ ਆਭਿਧਮ੍ਮਿਕਭੂਤਾਨਮ੍ਪਿ ਤਂ ਸਾਧਾਰਣਂ ਹੋਤੀਤਿ. ਏਤ੍ਥ ਦ੍ਵੇਪਿ ਉਪਸਮ੍ਪਨ੍ਨਾ ਏਵ, ਦ੍ਵਿਨ੍ਨਮ੍ਪਿ ਤਤ੍ਥ ਯਥਾਕਾਮਕਰਣੀਯਤਾ ਅਤ੍ਥਿ ਮਮਤ੍ਤਞ੍ਚ, ਨ ਏਵਂ ਤਦਞ੍ਞੇਸਂ ਸਾਧਾਰਣਂ, ਨ ਚ ਦ੍ਵੇ ਤਯੋ ਭਿਕ੍ਖੂ ‘‘ਏਕਤੋ ਵਸ੍ਸਿਸ੍ਸਾਮਾ’’ਤਿ ਕਰੋਨ੍ਤਿ, ਰਕ੍ਖਤਿ ਤਾਵ. ‘‘ਅਵਿਭਤ੍ਤਤ੍ਤਾ ਅਨਾਪਤ੍ਤੀ’’ਤਿ ਇਮਿਨਾ ਚ ਇਦਂ ਸਦਿਸਂ, ਯੇਨ ਮੂਲੇਨ ਪਟਿਗ੍ਗਹਿਤਂ, ਤਸ੍ਸ ਸਚੇ ਇਤਰੋ ਦੇਤਿ, ਸੋ ਵਾ ਤਂ ਇਤਰਸ੍ਸ ਦੇਤਿ, ਸਤਿ ਪਟਿਗ੍ਗਹਣੇ ਸਤ੍ਤਾਹਾਤਿਕ੍ਕਮੇ ਨਿਸ੍ਸਗ੍ਗਿਯਤ੍ਤਾ, ਤਸ੍ਮਾ ਤਂ ਚੀਵਰਂ ਦ੍ਵੀਸੁ ਸਮ੍ਮੁਖੀਭੂਤੇਨ ਏਕੇਨ ਅਧਿਟ੍ਠਾਤਬ੍ਬਂ. ਕਿਞ੍ਚਾਪਿ ਏਤ੍ਥ ਪਯੋਗੋ ਨ ਦਿਸ੍ਸਤਿ ਸਮਾਨਪਰਿਕ੍ਖਾਰਾਨਂ ਦ੍ਵਿਨ੍ਨਂ ਅਧਿਟ੍ਠਾਨਪਯੋਗਾਭਾਵਤੋ, ਤਥਾਪਿ ਸਮਾਨਸਬ੍ਬਭਣ੍ਡਕਾਨਂ ਦ੍ਵਿਨ੍ਨਂ ਤੇਲਾਦਿ ਯੇਨ ਪਟਿਗ੍ਗਹਿਤਂ, ਤਸ੍ਸ ਕਾਲਾਤਿਕ੍ਕਮੇ ਆਪਤ੍ਤਿਸਮ੍ਭਵਤੋ, ਅਨਧਿਟ੍ਠਾਨੇ ਦੁਲ੍ਲਭਵਿਸੇਸਹੇਤੁਤ੍ਤਾ ਚ ‘‘ਅਧਿਟ੍ਠਾਤਬ੍ਬ’’ਨ੍ਤਿ ਵੁਤ੍ਤਂ. ਤਂ ਅਯੁਤ੍ਤਂ ਪਤ੍ਤਚੀਵਰਸਤ੍ਤਾਹਕਾਲਿਕਾਨਂ ਅਸਦਿਸਵਿਧਾਨਤ੍ਤਾ. ਏਤ੍ਥ ਪਤ੍ਤਚੀਵਰਞ੍ਹਿ ਅਤ੍ਤਨੋ ਸਨ੍ਤਕਭਾਵਂ ਉਪਗਤਮੇਵ ਅਨਧਿਟ੍ਠਹਨ੍ਤਸ੍ਸ ਕਾਲਾਤਿਕ੍ਕਮੇ ਆਪਤ੍ਤਿ, ਸਤ੍ਤਾਹਕਾਲਿਕਂ ਪਨ ਪਰਸਨ੍ਤਕਸਾਧਾਰਣਮ੍ਪਿ ਪਟਿਗ੍ਗਹਿਤਂ ਪਟਿਗ੍ਗਾਹਕਸ੍ਸ ਕਾਲਾਤਿਕ੍ਕਮੇ ਆਪਤ੍ਤਿਕਰਂ. ਪਟਿਗ੍ਗਹਣਞ੍ਚੇਤ੍ਥ ਪਮਾਣਂ, ਨ ਤਤ੍ਥ ਸਕਸਨ੍ਤਕਤਾ, ਸਤ੍ਤਾਹਕਾਲਿਕਞ੍ਚ ਨਿਸ੍ਸਗ੍ਗਿਯਂ, ਸਬ੍ਬੇਸਮ੍ਪਿ ਅਨਜ੍ਝੋਹਰਣੀਯਂ. ਪਤ੍ਤਚੀਵਰਂ ਅਞ੍ਞਸ੍ਸ ਪਰਿਭੁਞ੍ਜਤੋ ਅਨਾਪਤ੍ਤਿ. ਇਦਞ੍ਚ ਕਾਲਾਤਿਕ੍ਕਨ੍ਤਮ੍ਪਿ ਨਿਸ੍ਸਜ੍ਜਿਤ੍ਵਾ ਪਚ੍ਛਾ ਲਦ੍ਧਂ ਕਪ੍ਪਤਿ. ਪਤ੍ਤਚੀਵਰਂ ਪਨ ਤਂ ਤਸ੍ਸ ਵਿਨਯਕਮ੍ਮਨ੍ਤਿ ਕਪ੍ਪਤੀਤਿ. ਅਵਿਭਤ੍ਤਸ੍ਸਪਿ ਇਮਸ੍ਸ ਦਾਨਂ ਰੁਹਤਿ, ਨ ਪਤ੍ਤਚੀਵਰਸ੍ਸ. ਵੁਤ੍ਤਞ੍ਹੇਤਂ ਅਟ੍ਠਕਥਾਯਂ ‘‘ਦ੍ਵਿਨ੍ਨਂ ਸਨ੍ਤਕਂ ਹੋਤਿ…ਪੇ… ਸਚੇਪਿ ਅਵਿਭਜਿਤ੍ਵਾ ਸਦ੍ਧਿਵਿਹਾਰਿਕਾਦੀਨਂ ਦੇਨ੍ਤਿ, ਅਦਿਨ੍ਨਮੇਵ ਹੋਤੀ’’ਤਿ. ਯਸ੍ਸ ਦਾਨਮੇਵ ਨ ਰੁਹਤਿ, ਤਸ੍ਸ ਕੁਤੋ ਅਧਿਟ੍ਠਾਨਂ. ਏਕੋ ਚੇ ਪਤ੍ਤਚੀਵਰਂ ਦਸਮੇ ਦਿਵਸੇ ਇਤਰਸ੍ਸ ਦੇਤਿ. ਤਤੋ ਪਟ੍ਠਾਯ ਸੋ ਦਸ ਦਿਵਸੇ ਪਰਿਹਰਿਤੁਂ ਲਭਤਿ, ਨ ਤਥਾ ਸਤ੍ਤਾਹਕਾਲਿਕਨ੍ਤਿ ਸਬ੍ਬਥਾ ਉਪਪਰਿਕ੍ਖਿਯਮਾਨਂ ਸਰਿਕ੍ਖਂ ਨਕ੍ਖਮਤੀਤਿ ਨ ਤਂ ਸਾਰਤੋ ਦਟ੍ਠਬ੍ਬਨ੍ਤਿ ਆਚਰਿਯਸ੍ਸ ਤਕ੍ਕੋ. ‘‘ਵਿਨਯਕਮ੍ਮਵਸੇਨ ਪਨ ਅਨਿਸ੍ਸਜ੍ਜਿਤ੍ਵਾ ਸਹਸਾ ਵਿਰੁਜ੍ਝਿਤ੍ਵਾ ਕਸ੍ਸਚਿ ਪਰਿਚ੍ਚਤ੍ਤਮ੍ਪਿ ਪੁਨ ਪਟਿਲਭਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤੀ’’ਤਿ ਵੁਤ੍ਤਂ, ਸਚੇ ਦੇਸਨ੍ਤਰਿਤਂ, ਸਮੁਦ੍ਦਨ੍ਤਰਿਤਂ ਵਾ ਚੀਵਰਂ ਨਿਸ੍ਸਗ੍ਗਿਯਂ ਜਾਤਂ, ਤਂ ਇਧ ਠਿਤੇਨ ਭਿਕ੍ਖੁਨਾ ਏਕਸ੍ਸ ਵਨ੍ਤੇਨ ਚਿਤ੍ਤੇਨ ਚਤ੍ਤਂ ਕਤ੍ਵਾ ਅਨਪੇਕ੍ਖਿਤ੍ਵਾ ਆਪਤ੍ਤਿਂ ਦੇਸੇਤ੍ਵਾ ਤਸ੍ਸ ਵਿਸ੍ਸਾਸੇਨ ਪੁਨ ਗਹੇਤ੍ਵਾ ਅਧਿਟ੍ਠਾਤਬ੍ਬਂ, ‘‘ਪਤ੍ਤਾਦੀਸੁ ਚ ਅਯਮੇਵ ਨਯੋ’’ਤਿ ਚ ਵੁਤ੍ਤਂ, ‘‘ਤਾਲਨਾਲ਼ਿਕੇਰਫਾਣਿਤਮ੍ਪਿ ਸਤ੍ਤਾਹਕਾਲਿਕਂ ਏਵਾ’’ਤਿ ਚ. ‘‘ਦ੍ਵਿਨ੍ਨਂ ਸਨ੍ਤਕਂ ਏਕੇਨ ਪਟਿਗ੍ਗਹਿਤਂ ਸਤ੍ਤਾਹਕਾਲਿਕਂ ਸਤ੍ਤਾਹਾਤਿਕ੍ਕਮੇ ਆਪਤ੍ਤਿਂ ਨ ਕਰੋਤਿ, ਪਰਿਭੁਞ੍ਜਿਤੁਂ ਪਨ ਦ੍ਵਿਨ੍ਨਮ੍ਪਿ ਨ ਵਟ੍ਟਤੀ’’ਤਿ ਚ ‘‘ਪਰਸਨ੍ਤਕਂ ਪਟਿਗ੍ਗਹੇਤ੍ਵਾ ਠਪਿਤੇਪਿ ਏਸੇਵ ਨਯੋ’’ਤਿ ਚ ਕੇਚਿ ਵਦਨ੍ਤਿ. ਦੁਕ੍ਕਟਵਤ੍ਥੁਭੂਤਂ ਸਪ੍ਪਿਆਦਿ ਨਿਸ੍ਸਜ੍ਜਿਤਬ੍ਬਂ ਪੁਨ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਵਿਧਾਨਂ ਨ ਦਿਸ੍ਸਤੀਤਿ.

ਭੇਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ

੬੨੭. ‘‘ਏਕਮੇਵ ਕਤ੍ਵਾ’’ਤਿ ਵਚਨੇਨ ਵਸ੍ਸਿਕਸਾਟਿਕਲਕ੍ਖਣੇਨ ਞਾਤਕਾਨਮ੍ਪਿ ਸਤੁਪ੍ਪਾਦਂ ਕਰੋਨ੍ਤੇਨ ਏਕਮੇਵ ਗਹੇਤਬ੍ਬਨ੍ਤਿ ਧਮ੍ਮਸਿਰਿਤ੍ਥੇਰੋ. ਚਤੁਬ੍ਬਿਧਂ ਖੇਤ੍ਤਨ੍ਤਿ ਏਤ੍ਥ ਕਿਞ੍ਚਾਪਿ ਤਿਵਿਧਂ ਦਿਸ੍ਸਤਿ, ਤਂ ਪਨ ਏਵਂ ਗਹੇਤਬ੍ਬਂ, ਯਸ੍ਮਿਂ ਖੇਤ੍ਤੇ ਪਰਿਯੇਸਿਤੁਂ ਲਭਤਿ, ਤਂ ਪਰਿਯੇਸਨਖੇਤ੍ਤਂ ਨਾਮ, ‘‘ਏਵਂ ਕਰਣਨਿਵਾਸਨਾਧਿਟ੍ਠਾਨਖੇਤ੍ਤਾਨਿਪੀ’’ਤਿ ਵੁਤ੍ਤਂ. ਏਤ੍ਥ ਪਚ੍ਛਿਮੇਨ ਪੁਰਿਮਗ੍ਗਾਹੋ ਵੇਦਿਤਬ੍ਬੋ, ਨ ਪੁਰਿਮੇਨ ਪਚ੍ਛਿਮਗ੍ਗਾਹੋ, ਯਥਾਲਾਭਨ੍ਤਿ ਆਚਰਿਯੋ. ਤਸ੍ਸਤ੍ਥੋ – ਅਧਿਟ੍ਠਾਨਖੇਤ੍ਤੇਨ ਪਚ੍ਛਿਮੇਨ ਪੁਰਿਮਾਨਂ ਤਿਣ੍ਣਂ ਗਾਹੋ ਹੋਤਿ, ਤਥਾ ਨਿਵਾਸਨਖੇਤ੍ਤੇਨ ਦ੍ਵਿਨ੍ਨਂ ਪੁਰਿਮਾਨਂ. ਕਰਣਖੇਤ੍ਤੇਨ ਪਨ ਏਕਸ੍ਸੇਵ ਪੁਰਿਮਸ੍ਸ ਗਾਹੋ ਹੋਤੀਤਿ. ਏਤ੍ਥ ਪਨ ਕਿਞ੍ਚਾਪਿ ਕਰਣਖੇਤ੍ਤਨਿਵਾਸਨਖੇਤ੍ਤਾਨਂ ਕਾਲਤੋ ਨਾਨਤ੍ਤਂ ਨਤ੍ਥਿ, ਕਿਰਿਯਤੋ ਪਨ ‘‘ਅਟ੍ਠਿਂ ਕਤ੍ਵਾ ਨਿਵਾਸੇਤਬ੍ਬ’’ਨ੍ਤਿ ਪਾਲ਼ਿਵਚਨਤੋ, ਤਸ੍ਮਾ ਦ੍ਵਿਧਾ ਕਤ੍ਵਾ ਵੁਤ੍ਤਂ ਅਞ੍ਞਤਰਾਭਾਵੇਨ, ਤਦਤ੍ਥਸਿਦ੍ਧਿਤੋ ਚ, ਕਥਂ ਪਨੇਤ੍ਥ ਨਾਨਤ੍ਤਂ ਨਤ੍ਥੀਤਿ ਪਞ੍ਞਾਯਤੀਤਿ ਚੇ? ਪਾਲ਼ਿਤੋ, ‘‘ਅਡ੍ਢਮਾਸੋ ਸੇਸੋ ਗਿਮ੍ਹਾਨਨ੍ਤਿ ਕਤ੍ਵਾ ਨਿਵਾਸੇਤਬ੍ਬ’’ਨ੍ਤਿ ਹਿ ਪਾਲ਼ਿ, ਤਥਾ ਮਾਤਿਕਾਟ੍ਠਕਥਾਤੋ (ਕਙ੍ਖਾ. ਅਟ੍ਠ. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ) ਚ.

ਤਥਾਹ ‘‘ਪਚ੍ਛਿਮੋ ਅਡ੍ਢਮਾਸੋ ਕਰਣਨਿਵਾਸਨਖੇਤ੍ਤਮ੍ਪੀ’’ਤਿ, ਇਮਿਨਾ ਨਯੇਨ ਤਿਵਿਧਮੇਵ ਖੇਤ੍ਤਨ੍ਤਿਪਿ ਸਿਦ੍ਧਂ. ਸਮਨ੍ਤਪਾਸਾਦਿਕਾਯਂ ਪਨ ਕਤ੍ਥਚਿ ਪੋਤ੍ਥਕੇ ‘‘ਜੇਟ੍ਠਮੂਲਪੁਣ੍ਣਮਾਸਿਯਾ ਪਚ੍ਛਿਮਪਾਟਿਪਦਦਿਵਸਤੋ ਪਟ੍ਠਾਯ ਯਾਵ ਕਾਲ਼ਪਕ੍ਖੁਪੋਸਥੋ, ਅਯਮੇਕੋ ਅਦ੍ਧਮਾਸੋ ਪਰਿਯੇਸਨਖੇਤ੍ਤਞ੍ਚੇਵ ਕਰਣਖੇਤ੍ਤਞ੍ਚ. ਏਤਸ੍ਮਿਞ੍ਹਿ ਅਨ੍ਤਰੇ ਵਸ੍ਸਿਕਸਾਟਿਕਂ ਅਲਦ੍ਧਂ ਪਰਿਯੇਸਿਤੁਂ, ਲਦ੍ਧਂ ਕਾਤੁਞ੍ਚ ਵਟ੍ਟਤਿ, ਨਿਵਾਸੇਤੁਂ, ਅਧਿਟ੍ਠਾਤੁਞ੍ਚ ਨ ਵਟ੍ਟਤੀ’’ਤਿ ਪਾਠੋ ਦਿਸ੍ਸਤਿ, ਸੋ ਅਪਾਠੋ ਯਥਾਵੁਤ੍ਤਪਾਲ਼ਿਮਾਤਿਕਾਟ੍ਠਕਥਾਵਿਰੋਧਤੋ, ਤਸ੍ਮਾ ਤਤ੍ਥ ‘‘ਅਲਦ੍ਧਂ ਪਰਿਯੇਸਿਤੁਂ ਵਟ੍ਟਤਿ, ਕਾਤੁਂ, ਨਿਵਾਸੇਤੁਂ, ਅਧਿਟ੍ਠਾਤੁਞ੍ਚ ਨ ਵਟ੍ਟਤੀ’’ਤਿ ਪਾਠੋ ਵੇਦਿਤਬ੍ਬੋ. ਏਵਂ ਤਾਵ ਪਚ੍ਛਿਮੇਨ ਪੁਰਿਮਗ੍ਗਾਹਸਿਦ੍ਧਿ ਵੇਦਿਤਬ੍ਬਾ, ਨ ਪੁਰਿਮੇਨ ਕਰਣਖੇਤ੍ਤਾਦੀਨਂ ਗਾਹੋ ਸਮ੍ਭਵਤਿ. ‘‘ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਵਸ੍ਸਿਕਸਾਟਿਕਚੀਵਰਂ ਪਰਿਯੇਸਿਤਬ੍ਬ’’ਨ੍ਤਿ ਏਤ੍ਤਕਮੇਵ ਹਿ ਵੁਤ੍ਤਂ, ਨ, ਅਟ੍ਠਕਥਾਯਂ ‘‘ਅਯਮੇਕੋ ਅਦ੍ਧਮਾਸੋ ਪਰਿਯੇਸਨਖੇਤ੍ਤਞ੍ਚੇਵ ਕਰਣਖੇਤ੍ਤਞ੍ਚਾ’’ਤਿ ਵੁਤ੍ਤਤ੍ਤਾਤਿ ਚੇ? ਨ, ਤਸ੍ਸ ਲੇਖਨਦੋਸਤ੍ਤਾ, ਤਥਾ ਸਾਧਿਤਂ. ਕਰਣਖੇਤ੍ਤੇਨ ਪਨ ਨਿਵਾਸਨਖੇਤ੍ਤਗ੍ਗਾਹੋ ਅਤ੍ਥਿ ਕਾਲਨਾਨਤ੍ਤਾਭਾਵਤੋ, ਤੇਨੇਵ ਪੁਬ੍ਬੇ ਯਥਾਲਾਭਗ੍ਗਹਣਂ ਕਤਂ, ਤਥਾ ਚ ਸਾਧਿਤਮੇਵ, ਨ ਭੇਦੋ ਪਨਤ੍ਥਿ, ਪਯੋਜਨਂ ਵੁਤ੍ਤਮੇਵ. ਨਿਵਾਸਨਕ੍ਖੇਤ੍ਤੇਨ ਅਧਿਟ੍ਠਾਨਕ੍ਖੇਤ੍ਤਗ੍ਗਾਹੋ ਨਤ੍ਥਿ ਏਵ, ਨ ਹਿ ਪੁਰਿਮੇਨ ਪਚ੍ਛਿਮਗ੍ਗਾਹੋ ਵੇਦਿਤਬ੍ਬੋ. ਨ ਪਾਲ਼ਿਵਿਰੋਧਤੋਤਿ ਚੇ? ਨ, ਤਦਤ੍ਥਾਜਾਨਨਤੋ. ‘‘ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਅਦ੍ਧਮਾਸੋ ਸੇਸੋ ਗਿਮ੍ਹਾਨ’’ਨ੍ਤਿ ਏਤ੍ਥ ਇਤਿ-ਸਦ੍ਦਸ੍ਸ ਹਿ ਇਤੋ ਪਟ੍ਠਾਯਾਤਿ ਅਤ੍ਥੋ. ਪਰਤੋ ਆਪਤ੍ਤਿਖੇਤ੍ਤਦਸ੍ਸਨਤੋ ਇਤਰਸ੍ਸ ਅਨਾਪਤ੍ਤਿਖੇਤ੍ਤਭਾਵੋ ਦਸ੍ਸਿਤੋਵ ਹੋਤਿ. ਦਿਨ੍ਨਪੁਬ੍ਬਤੋਪਿ ਞਾਤਕਪਵਾਰਿਤਟ੍ਠਾਨਤੋ ਨਿਪ੍ਫਾਦੇਨ੍ਤਸ੍ਸ ਨਿਸ੍ਸਗ੍ਗਿਯਂ ਪਿਟ੍ਠਿਸਮਯਤ੍ਤਾ, ਪਕਤਿਯਾ ਵਸ੍ਸਿਕਸਾਟਿਕਦਾਯਕਾ ਨਾਮ ਸਙ੍ਘਸ੍ਸ ਵਾ ਪੁਗ੍ਗਲਸ੍ਸ ਵਾ ਅਪਵਾਰੇਤ੍ਵਾ ਅਨੁਸਂਵਚ੍ਛਰਂ ਦੇਨ੍ਤਾ, ਤਤ੍ਥ ਸਤੁਪ੍ਪਾਦੋਵ ਵਟ੍ਟਤਿ. ਵਤ੍ਤਭੇਦੇ ਦੁਕ੍ਕਟਨ੍ਤਿ ਤਦਞ੍ਞੇਸੁ.

‘‘ਸਚੇ ਕਤ…ਪੇ… ਵਸ੍ਸੂਪਨਾਯਿਕਦਿਵਸੇ ਅਧਿਟ੍ਠਾਤਬ੍ਬਾ…ਪੇ… ਛ ਮਾਸੇ ਪਰਿਹਾਰਂ ਲਭਤੀ’’ਤਿ ਵਚਨਤੋ ਅਨ੍ਤੋਵਸ੍ਸੇਪਿ ਯਾਵ ਵਸ੍ਸਾਨਸ੍ਸ ਪਚ੍ਛਿਮਦਿਵਸਾ ਅਕਤਾ ਪਰਿਹਾਰਂ ਲਭਤੀਤਿ ਦੀਪਿਤਂ ਹੋਤਿ. ਕਸ੍ਮਾ ਨ ਵਿਚਾਰਿਤਨ੍ਤਿ ਚੇ? ਅਤ੍ਥਾਪਤ੍ਤਿਸਿਦ੍ਧਤ੍ਤਾ. ‘‘ਛ ਮਾਸੇ ਪਰਿਹਾਰਂ ਲਭਤੀ’’ਤਿ ਵਚਨੇਨ ਅਕਤਾ ਲਭਤੀਤਿ ਸਿਦ੍ਧਮੇਵ, ਤਂ ਕਿਞ੍ਚਾਪਿ ਸਿਦ੍ਧਂ, ਸਰੂਪੇਨ ਪਨ ਅਨਾਗਤਤ੍ਤਾ ਸਰੂਪੇਨ ਦਸ੍ਸੇਤੁਂ, ਦੁਸ੍ਸਦ੍ਧਾਪਯਤ੍ਤਾ ਉਪਪਤ੍ਤਿਤੋ ਦਸ੍ਸੇਤੁਞ੍ਚ ਇਦਮਾਰਦ੍ਧਂ ਆਚਰਿਯੇਨ, ‘‘ਯਥਾ ਚੇਤ੍ਥ, ਏਵਂ ਕਥਿਨਬ੍ਭਨ੍ਤਰੇ ਉਪ੍ਪਨ੍ਨਚੀਵਰਮ੍ਪਿ ਹੇਟ੍ਠਾ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬ’’ਨ੍ਤਿ ਅਨੁਗਣ੍ਠਿਪਦੇ ਵੁਤ੍ਤਂ, ਤਂ ਦੁਵੁਤ੍ਤਂ ਤਤ੍ਥੇਵ ਪੁਬ੍ਬਾਪਰਵਿਰੋਧਤੋ. ਯਞ੍ਚੇਤ੍ਥ ਅਟ੍ਠਕਥਾਵਚਨਂ ਸਾਧਕਤ੍ਤੇਨ ਵੁਤ੍ਤਂ, ਤਂ ਤਮਤ੍ਥਂ ਨ ਸਾਧੇਤਿ. ‘‘ਯਦਿ ਨਪ੍ਪਹੋਤਿ ਯਾਵ ਕਤ੍ਤਿਕਪੁਣ੍ਣਮਾ ਪਰਿਹਾਰਂ ਲਭਤੀ’’ਤਿ ਵਚਨਂ ਅਪ੍ਪਹੋਨ੍ਤਸ੍ਸ ਯਾਵ ਕਤ੍ਤਿਕਪੁਣ੍ਣਮਾ ਤਾਵ ਪਰਿਹਾਰਖੇਤ੍ਤਂ, ਤਤੋ ਪਰਂ ਏਕਦਿਵਸੋਪਿ ਨ ਹੋਤੀਤਿ ਦੀਪੇਤਿ, ਤਸ੍ਮਾ ਅਪ੍ਪਹੋਨਕਭਾਵੇਨ ਅਕਤਾਵ ਯਾਵ ਕਤ੍ਤਿਕਪੁਣ੍ਣਮਾ ਪਰਿਹਾਰਂ ਲਭਤਿ, ਤਤੋ ਪਰਂ ਨ ਲਭਤੀਤਿ ਸਿਦ੍ਧਂ. ਤਥਾ ਤਦੇਵ ਵਚਨਂ ਕਤਪਰਿਹਾਰਂ ਨ ਲਭਤੀਤਿ ਦੀਪੇਤਿ, ਤਸ੍ਮਾ ਕਤ੍ਤਿਕਪੁਣ੍ਣਮਦਿਵਸੇਯੇਵ ਅਧਿਟ੍ਠਾਤਬ੍ਬਾ. ‘‘ਅਪ੍ਪਹੋਨ੍ਤੇ ਦਸਾਹੇ ਅਨ੍ਤੋਵਸ੍ਸੇ ਕਰਣਪਰਿਯੋਸਾਨਂਯੇਵ ਪਮਾਣ’’ਨ੍ਤਿ ਲਿਖਿਤਂ.

ਏਤ੍ਥਾਹ – ‘‘ਏਕਾਹਦ੍ਵੀਹਾਦਿਵਸੇਨਾ’’ਤਿਆਦਿ ਨ ਵਤ੍ਤਬ੍ਬਂ. ਕਸ੍ਮਾ? ਗਿਮ੍ਹਦਿਵਸਾਨਂ ਅਨਧਿਟ੍ਠਾਨਕਾਲਤ੍ਤਾ, ਤਸ੍ਮਾ ਏਵ ‘‘ਅਨ੍ਤੋਦਸਾਹੇ ਵਾ ਤਦਹੇਯੇਵ ਵਾ ਅਧਿਟ੍ਠਾਤਬ੍ਬਾ’ਤਿ ਚ ਸਾਮਞ੍ਞਤੋ ਨ ਵਤ੍ਤਬ੍ਬਂ ਗਿਮ੍ਹਦਿਵਸਾਨਂ ਅਧਿਟ੍ਠਾਨਖੇਤ੍ਤਭਾਵਪ੍ਪਸਙ੍ਗਤੋ’’ਤਿ. ਏਤ੍ਥ ਵੁਚ੍ਚਤਿ – ਨ, ਤਦਤ੍ਥਾਜਾਨਨਤੋ. ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਗਿਮ੍ਹਦਿਵਸਾ ਦਸਾਹਾ ਹੋਨ੍ਤਿ, ਪਠਮਦਿਵਸੇ ਚ ਲਦ੍ਧਾ ਨਿਟ੍ਠਿਤਾ ਵਸ੍ਸਿਕਸਾਟਿਕਾ ਦਸਾਹਾਤਿਕ੍ਕਨ੍ਤਾਪਿ ਵਸ੍ਸੂਪਨਾਯਿਕਦਿਵਸਂ ਅਧਿਟ੍ਠਾਨਖੇਤ੍ਤਂ ਅਪ੍ਪਤ੍ਤਤ੍ਤਾ ਨ ਚ ਤਾਵ ਨਿਸ੍ਸਗ੍ਗਿਯਂ ਹੋਤਿ, ਵੁਤ੍ਤਞ੍ਚੇਤਂ ‘‘ਵਸ੍ਸੂਪਨਾਯਿਕਤੋ ਪੁਬ੍ਬੇ ਦਸਾਹਾਤਿਕ੍ਕਮੇਪਿ ਅਨਾਪਤ੍ਤੀ’’ਤਿ.

ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬਾਤਿ ਇਦਂ ਨ ਅਵਿਸੇਸੇਨ ਏਤਸ੍ਮਿਂ ਅਨ੍ਤਰੇ ਗਿਮ੍ਹਦਿਵਸੇਪਿ ਅਧਿਟ੍ਠਾਤਬ੍ਬਨ੍ਤਿ ਇਮਮਤ੍ਥਂ ਦੀਪੇਤੁਂ ਵੁਤ੍ਤਂ, ਕਿਨ੍ਤੁ ਗਿਮ੍ਹਦਿਵਸੇ ਚੇ ਉਪ੍ਪਨ੍ਨਾ, ਅਧਿਟ੍ਠਾਨਖੇਤ੍ਤੇ ਚ ਅਨ੍ਤੋਦਸਾਹਂ ਹੋਤਿ, ਅਨ੍ਤੋਦਸਾਹੇ ਖੇਤ੍ਤੇਯੇਵ ਅਧਿਟ੍ਠਾਤਬ੍ਬਾ, ਨ ਖੇਤ੍ਤਨ੍ਤਿ ਕਤ੍ਵਾ ਦਸਾਹਂ ਅਤਿਕ੍ਕਮਿਤਬ੍ਬਨ੍ਤਿ ਦੀਪੇਤੁਂ ਵੁਤ੍ਤਂ. ਕਸ੍ਮਾ? ਗਿਮ੍ਹਦਿਵਸਾਨਮ੍ਪਿ ਗਣਨੂਪਗਤ੍ਤਾ, ਤਸ੍ਮਾ ਅਖੇਤ੍ਤਦਿਵਸੇਪਿ ਗਣੇਤ੍ਵਾ ਖੇਤ੍ਤੇ ਏਵ ‘‘ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬਾ’’ਤਿ ਵੁਤ੍ਤਂ ਹੋਤੀਤਿ.

ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ

੬੩੨. ਸਾਮਨ੍ਤਿ ਸਕਸਞ੍ਞਿਤਾਨਿਯਮਨਤ੍ਥਂ ਵੁਤ੍ਤਂ. ਸਕਸਞ੍ਞਿਤਾਯੇਵ ਹਿ ਅਚ੍ਛਿਨ੍ਦਾਪਨਅਚ੍ਛਿਨ੍ਦਨੇਸੁ ਨਿਸ੍ਸਗ੍ਗਿਯਂ, ਤਸ੍ਮਾ ਨਿਸ੍ਸਗ੍ਗਿਯਮੂਲਙ੍ਗਨਿਦਸ੍ਸਨਮੇਤਂ. ‘‘ਚੀਵਰ’’ਨ੍ਤਿ ਵੁਤ੍ਤਤ੍ਤਾ ‘‘ਅਚੀਵਰਂ ਅਚ੍ਛਿਨ੍ਦਨ੍ਤਸ੍ਸ ਨ ਨਿਸ੍ਸਗ੍ਗਿਯ’’ਨ੍ਤਿ ਵੁਤ੍ਤਮੇਵ ਹੋਤਿ. ‘‘ਦਤ੍ਵਾਤਿ ਦਤ੍ਵਾ ਵਾ ਦਾਪੇਤ੍ਵਾ ਵਾ’’ਤਿ ਕਿਞ੍ਚਾਪਿ ਪਦਭਾਜਨਂ ਯੁਜ੍ਜਤਿ, ਅਞ੍ਞਸ੍ਸ ਪਨ ਸਨ੍ਤਕਂ ਅਞ੍ਞਸ੍ਸ ਭਿਕ੍ਖੁਨੋ ਦਾਪੇਤ੍ਵਾ ਤਂ ਸਯਂ ਵਾ ਅਚ੍ਛਿਨ੍ਦੇਯ੍ਯ, ਤੇਨੇਵ ਵਾ ਅਚ੍ਛਿਨ੍ਦਾਪੇਯ੍ਯਾਤਿ ਅਨਿਟ੍ਠਪ੍ਪਸਙ੍ਗਭਯਾ ਨ ਵੁਤ੍ਤਂ, ਅਤ੍ਥਤੋ ਪਨ ਅਤ੍ਤਨੋ ਸਨ੍ਤਕਂ ਅਞ੍ਞੇਨ ਸਦ੍ਧਿਵਿਹਾਰਿਕਾਦਿਨਾ ਦਾਪੇਤ੍ਵਾ, ਅਞ੍ਞਸ੍ਸ ਸਨ੍ਤਕਂ ਵਾ ਤਸ੍ਸ ਵਿਸ੍ਸਾਸਾ ਦਾਪੇਤ੍ਵਾ ਤਂ ਅਚ੍ਛਿਨ੍ਦੇਯ੍ਯ ਵਾ ਅਚ੍ਛਿਨ੍ਦਾਪੇਯ੍ਯ ਵਾ ਨਿਸ੍ਸਗ੍ਗਿਯਨ੍ਤਿ ਵੇਦਿਤਬ੍ਬਂ, ਤਞ੍ਚ ਖੋ ਅਨਪੇਕ੍ਖੋ ਦਤ੍ਵਾ. ਯਦਿ ਏਵਂ ‘‘ਚਜਿਤ੍ਵਾ ਦਿਨ੍ਨਂ ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ’’ਤਿ ਇਦਂ ਕਿਨ੍ਤਿ ਚੇ? ਸਕਸਞ੍ਞਾਯ ਅਗ੍ਗਹੇਤ੍ਵਾ ਅਞ੍ਞਾਯ ਥੇਯ੍ਯਾਯ ਗਣ੍ਹਨ੍ਤਂ ਸਨ੍ਧਾਯ ਵੁਤ੍ਤਂ, ਤੇਨੇਵ ਵੁਤ੍ਤਂ ‘‘ਸਕਸਞ੍ਞਾਯ ਗਹਿਤਤ੍ਤਾ ਪਨਸ੍ਸ ਪਾਰਾਜਿਕਂ ਨਤ੍ਥੀ’’ਤਿ, ਅਪਿਚ ‘‘ਅਨਾਪਤ੍ਤਿ ਸੋ ਵਾ ਦੇਤਿ, ਤਸ੍ਸ ਵਾ ਵਿਸ੍ਸਸਨ੍ਤੋ ਗਣ੍ਹਾਤੀ’’ਤਿ ਵਚਨਤੋਪਿ ਤਂ ਸਿਦ੍ਧਮੇਵ. ਏਤ੍ਤਾਵਤਾ ਤਾਵਕਾਲਿਕਂ ਕਤ੍ਵਾ ਦਿਨ੍ਨਂ ਅਚ੍ਛਿਨ੍ਦਨ੍ਤਸ੍ਸ ਅਨਾਪਤ੍ਤਿ ਸਾਧਿਤਾ ਹੋਤਿ. ‘‘ਅਮ੍ਹਾਕਂ ਸਨ੍ਤਿਕੇ ਉਪਜ੍ਝਂ ਗਣ੍ਹਿਸ੍ਸਤੀ’’ਤਿਆਦਿਵਚਨਂ ਸਾਮਣੇਰਸ੍ਸ ਦਾਨਂ ਦੀਪੇਤਿ, ਤਞ੍ਚ ਇਧ ਨਾਧਿਪ੍ਪੇਤਂ. ਪਾਲ਼ਿਯਂ (ਪਾਰਾ. ੬੩੩-੬੩੪) ਉਪਸਮ੍ਪਨ੍ਨੇ ਤਿਕਪਾਚਿਤ੍ਤਿਯਂ ਵਿਯ ਅਨੁਪਸਮ੍ਪਨ੍ਨੇ ਤਿਕਦੁਕ੍ਕਟਮ੍ਪਿ ਆਗਤਨ੍ਤਿ ਚੇ? ਨ, ਤਦਧਿਪ੍ਪਾਯਾਜਾਨਨਤੋ. ਅਨੁਪਸਮ੍ਪਨ੍ਨਕਾਲੇ ਏਵਂ ਦਤ੍ਵਾ ਅਞ੍ਞਸ੍ਸ ਸਨ੍ਤਿਕੇ ਉਪਸਮ੍ਪਨ੍ਨਂ ਦਿਸ੍ਵਾ ਕੁਪਿਤੋ ਚੇ ਅਚ੍ਛਿਨ੍ਦਤਿ, ਉਪਸਮ੍ਪਨ੍ਨਸ੍ਸੇਵ ਵਾ ‘‘ਸਿਕ੍ਖਂ ਪਚ੍ਚਕ੍ਖਾਯ ਤੁਮ੍ਹਾਕਂ ਸਨ੍ਤਿਕੇ ਉਪਸਮ੍ਪਜ੍ਜਿਸ੍ਸਾਮੀ’’ਤਿ ਵਦਨ੍ਤਸ੍ਸ ਦਤ੍ਵਾ ਪੁਨ ਅਚ੍ਛਿਨ੍ਦਤਿ ਚੇ, ਨਿਸ੍ਸਗ੍ਗਿਯਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ.

੬੩੩. ਸਕਿਂ ਆਣਤ੍ਤੋ ਬਹੁਕਮ੍ਪਿ ਅਚ੍ਛਿਨ੍ਦਤਿ, ਨਿਸ੍ਸਗ੍ਗਿਯਨ੍ਤਿ ਏਕਬਦ੍ਧਤ੍ਤਾ ਏਕਂ ਪਾਚਿਤ੍ਤਿਯਂ, ਤਂ ਸਨ੍ਧਾਯੇਤਂ ਵੁਤ੍ਤਂ ‘‘ਆਣਤ੍ਤੋ ਬਹੂਨਿ ਗਣ੍ਹਾਤਿ, ਏਕਂ ਪਾਚਿਤ੍ਤਿਯ’’ਨ੍ਤਿ. ਮਾਤਿਕਾਟ੍ਠਕਥਾਯਂ ਪਨ ‘‘ਵਤ੍ਥੁਗਣਨਾਯ ਆਪਤ੍ਤਿਯੋ’’ਤਿ ਵੁਤ੍ਤਂ, ਤਂ ਆਣਤ੍ਤਿਯਾ ਬਹੁਤ੍ਤਾ ‘‘ਸਬ੍ਬਾਨਿ ਗਣ੍ਹਾ’’ਤਿ ਵਦਨ੍ਤਸ੍ਸ ਗਾਹਂ ਸਨ੍ਧਾਯ ਵੁਤ੍ਤਂ, ਤੇਨੇਵ ਤਤ੍ਥ ਵੁਤ੍ਤਂ ‘‘ਏਕਵਾਚਾਯ ਸਮ੍ਬਹੁਲਾ ਆਪਤ੍ਤਿਯੋ’’ਤਿ. ਏਵਂ ਸਨ੍ਤੇ ਪਾਲ਼ਿਵਚਨਂ, ਅਟ੍ਠਕਥਾਵਚਨਦ੍ਵਯਞ੍ਚ ਅਞ੍ਞਮਞ੍ਞਂ ਸਮੇਤਿ, ਪਰਸਨ੍ਤਕਮ੍ਪਿ ਨਿਸ੍ਸਗ੍ਗਿਯਂ ਹੋਤਿ ਪਂਸੁਕੂਲਞ੍ਚ, ਤੇਨ ‘‘ਦੁਸ੍ਸਨ੍ਤੇ ਬਦ੍ਧਰੂਪਿਯਂ ਵਿਯਾ’’ਤਿ ਵੁਤ੍ਤਂ, ਤਂ ਤਦਤ੍ਥਨਿਯਮਦਸ੍ਸਨਤ੍ਥਂ ਵੁਤ੍ਤਂ, ਯਥਾਵਛਾਦਿਤਂ ਅਚ੍ਛਿਨ੍ਦਨਚਿਤ੍ਤੇਨ ਸਚਿਤ੍ਤਕਂ, ਵਚੀਕਮ੍ਮਂ ਪਨ ਕੇਵਲਂ ਅਚ੍ਛਿਨ੍ਦਾਪੇਨ੍ਤਸ੍ਸੇਵ ‘‘ਦੇਹੀ’’ਤਿ ਬਲਕ੍ਕਾਰੇਨ ਗਣ੍ਹਤੋਪਿ ਵੇਦਿਤਬ੍ਬਂ, ਤਂ ਨ ਯੁਤ੍ਤਂ ‘‘ਅਨਾਪਤ੍ਤਿ ਸੋ ਵਾ ਦੇਤੀ’’ਤਿ ਵਚਨਤੋ. ‘‘ਤੁਟ੍ਠੋ ਵਾ ਦੁਟ੍ਠੋ ਵਾ ਦੇਤਿ, ਅਨਾਪਤ੍ਤਿਯੇਵਾ’’ਤਿ ਮਾਤਿਕਾਟ੍ਠਕਥਾਵਚਨਤੋ ਵਾਤਿ ਚੇ? ਨ, ਉਭਯਤ੍ਥ ਅਤ੍ਤਨੋ ਰੁਚਿਯਾ ਦਾਨਂ ਸਨ੍ਧਾਯ ਵੁਤ੍ਤਤ੍ਤਾ, ਪਸਯ੍ਹਾਵਹਾਰੇ ਅਨਾਪਤ੍ਤਿਪ੍ਪਸਙ੍ਗਤੋ ਚ. ‘‘ਭਿਕ੍ਖੁਸ੍ਸ ਸਾਮਂ ਚੀਵਰਂ ਦਤ੍ਵਾ’ਤਿ ਪਾਲ਼ਿਵਚਨਤੋ ਚ ਮਾਤਿਕਾਟ੍ਠਕਥਾਯ ਅਙ੍ਗਵਵਤ੍ਥਾਨੇ ‘ਉਪਸਮ੍ਪਨ੍ਨਤਾ’ਤਿ ਵੁਤ੍ਤਤ੍ਤਾ ਚ ਉਭਯਤ੍ਥ ਦਾਨਹਰਣੇਸੁ ਭਿਕ੍ਖੁਭਾਵੋ ਇਚ੍ਛਿਤਬ੍ਬੋਤਿ ਦੀਪੇਤੀ’’ਤਿ ਵਦਨ੍ਤਿ, ਇਦਮਯੁਤ੍ਤਨ੍ਤਿ ਨੋ ਤਕ੍ਕੋਤਿ ਆਚਰਿਯੋ. ਕਸ੍ਮਾ? ਅਨੁਪਸਮ੍ਪਨ੍ਨਸ੍ਸ ਚੀਵਰਂ ਦਤ੍ਵਾ ਤਂ ਉਪਸਮ੍ਪਨ੍ਨਕਾਲੇ ਅਚ੍ਛਿਨ੍ਦਨ੍ਤਸ੍ਸ ਅਨਾਪਤ੍ਤਿਪ੍ਪਸਙ੍ਗਤੋ. ‘‘ਅਨੁਪਸਮ੍ਪਨ੍ਨਸ੍ਸ ਚੀਵਰਂ ਵਾ ਅਞ੍ਞਂ ਵਾ ਪਰਿਕ੍ਖਾਰਂ ਦਤ੍ਵਾ…ਪੇ… ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵਚਨਤੋ ਦੁਕ੍ਕਟਂ ਤਤ੍ਥ ਹੋਤੀਤਿ ਚੇ? ਨਾਸਿਦ੍ਧਤ੍ਤਾ, ਦਾਨਕਾਲੇ ਏਵ ਉਪਸਮ੍ਪਨ੍ਨਤਾ ਪਮਾਣਨ੍ਤਿ ਅਸਿਦ੍ਧਮੇਤਂ ਅਟ੍ਠਕਥਾਯ ਵਾ ਪਾਲ਼ਿਯਾ ਵਾ ਯੁਤ੍ਤਿਤੋ ਵਾ, ਤਸ੍ਮਾ ਤਂ ਨ ਯੁਤ੍ਤਨ੍ਤਿ ਅਤ੍ਥੋ. ਅਨੁਪਸਮ੍ਪਨ੍ਨਸ੍ਸ ਚੀਵਰਂ ਦਤ੍ਵਾ ਤਸ੍ਸੇਵ ਅਨੁਪਸਮ੍ਪਨ੍ਨਕਾਲੇਯੇਵ ਚੀਵਰਂ ਅਚ੍ਛਿਨ੍ਦਨ੍ਤਸ੍ਸ ਦੁਕ੍ਕਟਂ, ਉਪਸਮ੍ਪਨ੍ਨਕਾਲੇ ਵਾ ਦਤ੍ਵਾ ਅਨੁਪਸਮ੍ਪਨ੍ਨਕਾਲੇ ਅਚ੍ਛਿਨ੍ਦਨ੍ਤਸ੍ਸ ਦੁਕ੍ਕਟਨ੍ਤਿ ਤਸ੍ਸ ਵਚਨਸ੍ਸ ਇਦਂ ਵਿਕਪ੍ਪਨ੍ਤਰਞ੍ਚ ਸਮ੍ਭਵਤਿ, ਤਸ੍ਮਾ (ਪਾਰਾ. ੬੩੧ ਆਦਯੋ) ਵਿਕਪ੍ਪਨ੍ਤਰਸ੍ਸ ਸਮ੍ਭਵਤੋ ਚ ਨ ਯੁਤ੍ਤਂ, ਯਸ੍ਮਾ ਅਨੁਪਸਮ੍ਪਨ੍ਨਕਾਲੇ ਦਤ੍ਵਾ ਉਪਸਮ੍ਪਨ੍ਨਕਾਲੇ ਅਚ੍ਛਿਨ੍ਦਨ੍ਤਸ੍ਸ ਵਿਸੁਂ ਦੁਕ੍ਕਟਂ ਨ ਪਞ੍ਞਤ੍ਤਂ, ਤਸ੍ਮਾ ਪੁਰਾਣਚੀਵਰਧੋਵਾਪਨਾਦਿਸਿਕ੍ਖਾਪਦੇਸੁ ਵਿਯ ਅਪਰਭਾਗੇ ਉਪਸਮ੍ਪਨ੍ਨਤਾ ਚੇਤ੍ਥ ਪਮਾਣਂ, ਤਸ੍ਮਾ ‘‘ਉਪਸਮ੍ਪਨ੍ਨਤਾ’’ਤਿ ਅਙ੍ਗੇਸੁ ਵੁਤ੍ਤਤ੍ਤਾ ਚ ਤਂ ਨ ਯੁਤ੍ਤਨ੍ਤਿ ਅਤ੍ਥੋ. ਏਤ੍ਥ ‘‘ਪਚ੍ਚਾਸੀਸਨ੍ਤਸ੍ਸੇਵ ਦਾਨਮਧਿਪ੍ਪੇਤਂ, ਨ ਨਿਸ੍ਸਟ੍ਠਦਾਨ’’ਨ੍ਤਿ ਧਮ੍ਮਸਿਰਿਤ੍ਥੇਰੋ ਵਦਤਿ ਕਿਰ, ਵੀਮਂਸਿਤਬ੍ਬਂ.

ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ

੬੩੭. ਛਟ੍ਠੇ ਕਿਞ੍ਚਾਪਿ ‘‘ਸਾਮਂ ਸੁਤ੍ਤਂ ਵਿਞ੍ਞਾਪੇਤ੍ਵਾ’’ਤਿ ਵੁਤ੍ਤਂ, ਮਾਤਿਕਾਟ੍ਠਕਥਾਯਂ ਪਨ ‘‘ਚੀਵਰਤ੍ਥਾਯ ਸਾਮਂ ਵਿਞ੍ਞਤ੍ਤਂ ਸੁਤ੍ਤ’’ਨ੍ਤਿ ਅਵਤ੍ਵਾ ਕੇਵਲਂ ‘‘ਚੀਵਰਤ੍ਥਾਯ ਵਿਞ੍ਞਾਪਿਤਸੁਤ੍ਤ’’ਨ੍ਤਿ ਅਙ੍ਗੇਸੁ ਵੁਤ੍ਤਤ੍ਤਾ ਅਞ੍ਞੇਨ ਚੀਵਰਤ੍ਥਾਯ ਵਿਞ੍ਞਤ੍ਤਂ ਸੁਤ੍ਤਮ੍ਪਿ ਸਙ੍ਗਹਂ ਗਚ੍ਛਤੀਤਿ ਵੇਦਿਤਬ੍ਬਂ. ਸਾਮਨ੍ਤਿ ਚੇਤ੍ਥ ਕਸ੍ਸਚਿ ਨਿਯਮਨਂ. ‘‘ਸਾਮਂ ਵਿਞ੍ਞਾਪੇਤ੍ਵਾ’’ਤਿ ਕਿਞ੍ਚਾਪਿ ਵੁਤ੍ਤਂ, ਤਥਾਪਿ ‘‘ਸਾਮਂ ਵਾਯਾਪੇਯ੍ਯਾ’’ਤਿ ਅਤ੍ਤਨੋ ਅਤ੍ਥਾਯ ਵਾਯਾਪੇਯ੍ਯਾਤਿ ਏਵਂ ਸਮ੍ਬਨ੍ਧੋ, ਅਤ੍ਥੋ ਚ ਵੇਦਿਤਬ੍ਬੋ, ਪਾਲ਼ਿਯਂ ਪਨ ਆਸਨ੍ਨਪਦੇਨ ਯੋਜਨਾ ਕਤਾ, ਤਸ੍ਮਾ ਸਾਮਂ ਵਿਞ੍ਞਤ੍ਤਂ ਸੁਤ੍ਤਨ੍ਤਿ ਅਞ੍ਞਵਿਞ੍ਞਤ੍ਤਂ ਕਪ੍ਪਿਯਂ ਆਪਜ੍ਜਤਿ, ਹਤ੍ਥਕਮ੍ਮਯਾਚਨਵਸੇਨ ਲਦ੍ਧਤਨ੍ਤਵਾਯੋਪਿ ਕਪ੍ਪਿਯੋ. ਵਿਕਪ੍ਪਨੁਪਗਪਚ੍ਛਿਮਪ੍ਪਮਾਣਂ ਚੇ, ਤਨ੍ਤੇ ਵੀਤਂਯੇਵ ਸਕਿਂ ਅਧਿਟ੍ਠਾਤਬ੍ਬਂ, ਪੁਨ ਅਧਿਟ੍ਠਾਨਕਿਚ੍ਚਂ ਨਤ੍ਥਿ ਅਧਿਟ੍ਠਿਤੇਨ ਏਕੀਭਾਵੂਪਗਮਨਤੋ. ‘‘ਸਚੇ ਪਨ ਪਰਿਚ੍ਛੇਦਂ ਦਸ੍ਸੇਤ੍ਵਾਵ ਚਿਨਸਾਟਕਂ ਵਿਯ, ਅਨ੍ਤਰਨ੍ਤਰਾ ਅਧਿਟ੍ਠਿਤਂ ਹੋਤਿ, ਪੁਨ ਅਧਿਟ੍ਠਾਤਬ੍ਬ’’ਨ੍ਤਿ ਵੁਤ੍ਤਂ. ‘‘ਪਟਿਲਾਭੇਨਾਤਿ ਵਚਨੇਨ ਵਾਯਾਪੇਤ੍ਵਾ ਠਪੇਸ੍ਸਾਮੀਤਿਆਦਿ ਏਕਸ੍ਮਿਂ ਅਨ੍ਤੋਗਧਂ ਹੋਤੀ’’ਤਿ ਵਦਨ੍ਤਿ.

ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ

੬੪੨. ਵਿਸਿਟ੍ਠਂ ਕਪ੍ਪਞ੍ਚ ਤਸ੍ਸ ਵਚਨੇਨ ਵਿਸਿਟ੍ਠਂ ਕਤਞ੍ਚ ਪਮਾਣਂ, ਨ ਆਮਿਸਦਾਨਂ. ਕੇਸੁਚਿ ਪੋਤ੍ਥਕੇਸੁ ‘‘ਚੀਵਰ’’ਨ੍ਤਿ ਉਦ੍ਧਰਿਤ੍ਵਾ ਵਿਭਾਗੋ ਵੁਤ੍ਤੋ, ਤਂ ਨ ਸਮੇਤੀਤਿ.

ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ

੬੪੬. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਚ੍ਚੇਕਚੀਵਰਂ ਪਟਿਗ੍ਗਹੇਤ੍ਵਾ ਨਿਕ੍ਖਿਪਿਤੁ’’ਨ੍ਤਿ, ‘‘ਯਾਵ ਪਵਾਰਣਾ ਪਵਾਰਿਤਾ’’ਤਿ ਚ ਯਂ ਵੁਤ੍ਤਂ, ਤੇ ਪਨ ਭਿਕ੍ਖੂ ਤਸ੍ਸ ਵਚਨਸ੍ਸ ਅਤ੍ਥਂ ਮਿਚ੍ਛਾ ਗਹੇਤ੍ਵਾ ਅਚ੍ਚੇਕਚੀਵਰਂ ਨਿਕ੍ਖਿਪਨ੍ਤਾ ਚੀਵਰਕਾਲਸਮਯਂ ਅਤਿਕ੍ਕਾਮੇਸੁਂ. ਕਿਮਿਦਂ ਵਿਭਤ੍ਤਂ, ਉਦਾਹੁ ਅਵਿਭਤ੍ਤਨ੍ਤਿ? ਵਿਭਤ੍ਤਂ, ਪੁਗ੍ਗਲਿਕਂ ਵਾ. ਤੇਨੇਵ ਪਰਤੋ ‘‘ਅਮ੍ਹਾਕਂ, ਆਵੁਸੋ, ਅਚ੍ਚੇਕਚੀਵਰਾਨੀ’’ਤਿ ਵੁਤ੍ਤਂ, ਅਵਿਭਤ੍ਤਂ ਪਨ ਸਙ੍ਘਿਕਤ੍ਤਾ ਨ ਕਸ੍ਸਚਿ ਨਿਸ੍ਸਗ੍ਗਿਯਂ ਕਰੋਤਿ.

ਅਪਿਚ ‘‘ਅਚ੍ਚੇਕਚੀਵਰਂ ਪਟਿਗ੍ਗਹੇਤ੍ਵਾ ਨਿਕ੍ਖਿਪਿਤੁ’’ਨ੍ਤਿ ਇਮਿਨਾ ਸਾਮਞ੍ਞਵਚਨੇਨ ਵਸ੍ਸੂਪਨਾਯਿਕਦਿਵਸਤੋ ਪਟ੍ਠਾਯ, ਪਿਟ੍ਠਿਸਮਯਤੋ ਪਟ੍ਠਾਯ ਵਾ ਯਾਵ ਪਵਾਰਣਾ ਨਿਕ੍ਖਿਪਿਤੁਂ ਵਟ੍ਟਤਿ ਏਵ ਸਙ੍ਘਿਕਤ੍ਤਾ, ਪੁਗ੍ਗਲਿਕਮ੍ਪਿ ‘‘ਵਸ੍ਸਂਵੁਤ੍ਥਕਾਲੇ ਗਣ੍ਹਥਾ’’ਤਿ ਦਿਨ੍ਨਤ੍ਤਾ. ਤਾਦਿਸਞ੍ਹਿ ਯਾਵ ਵਸ੍ਸਂਵੁਤ੍ਥੋ ਹੋਤਿ, ਤਾਵ ਨ ਤਸ੍ਸੇਵ, ਦਾਯਕਸ੍ਸ ਸਨ੍ਤਕਂ ਹੋਤਿ, ਤਥਾ ਇਤੋ ਤਤਿਯਵਸ੍ਸੇ, ਚਤੁਤ੍ਥਵਸ੍ਸੇ ਵਾ ‘‘ਪਵਾਰਣਾਯ ਗਣ੍ਹਥਾ’’ਤਿਆਦਿਨਾ ਦਿਨ੍ਨਮ੍ਪਿ ਨਿਕ੍ਖਿਪਿਤ੍ਵਾ ਯਥਾਦਾਨਮੇਵ ਗਹੇਤਬ੍ਬਂ. ਅਯਮਤ੍ਥੋ ਅਟ੍ਠਕਥਾਯਂ (ਪਾਰਾ. ਅਟ੍ਠ. ੨.੬੪੬-੯ ਆਦਯੋ) ਪਾਕਟੋ. ਤਾਨਿ ਚੀਵਰਕਾਲਸਮਯਾਤਿਕ੍ਕਮੇ ਨ ਨਿਸ੍ਸਗ੍ਗਿਯਾਨੀਤਿ ਚੇ? ਨ, ਉਦ੍ਦਿਸ੍ਸ ਦਿਨ੍ਨਤ੍ਤਾ. ਯਸ੍ਮਾ ਅਯਂ ਸਮਯੋ ‘‘ਕਾਲੇਪਿ ਆਦਿਸ੍ਸ ਦਿਨ੍ਨ’’ਨ੍ਤਿ ਏਤ੍ਥ ‘‘ਕਾਲੋ’’ਤਿ ਆਗਤੋ, ਗਣਭੋਜਨਸਿਕ੍ਖਾਪਦਾਦੀਸੁ ‘‘ਸਮਯੋ’’ਤ੍ਵੇਵ ਆਗਤੋ, ਤਸ੍ਮਾ ਇਧ ਤੇਸਂ ਏਕਤ੍ਥਤਾਦਸ੍ਸਨਤ੍ਥਂ ਏਕਤੋ ‘‘ਚੀਵਰਕਾਲਸਮਯੋ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਮਾਤਿਕਾਯਂ ਪਨੇਤ੍ਥ ਤਾਦਿਸਂ ਚੀਵਰਂ ਅਤ੍ਤਨੋ ਸਨ੍ਤਕਭਾਵਂ ਉਪਗਤਂ ਪੁਗ੍ਗਲਿਕਂ ਸਨ੍ਧਾਯ ਵੁਤ੍ਤਂ, ਤੇਨੇਵਾਹ ‘‘ਭਿਕ੍ਖੁਨੋ ਪਨੇਵ ਅਚ੍ਚੇਕਚੀਵਰਂ ਉਪ੍ਪਜ੍ਜੇਯ੍ਯਾ’’ਤਿ. ਅਤ੍ਤਨੋ ਕੁਟਿਯਾ ਵਸ੍ਸਂਵੁਤ੍ਥਸ੍ਸ ਭਿਕ੍ਖੁਨੋ ਹਿ ਦਾਤੁਂ ਅਲਭਨ੍ਤੋ ਅਨ੍ਤੋਵਸ੍ਸੇ ਏਵ ਦਾਨਕਿਚ੍ਚਂ ਪਰਿਨਿਟ੍ਠਾਪੇਤ੍ਵਾ ਗਚ੍ਛਤਿ, ਤਥਾ ਸਙ੍ਘਸ੍ਸ. ਤਸ੍ਮਾ ਇਦਂ ਅਚ੍ਚੇਕਚੀਵਰਂ ਅਤ੍ਥਿ ਉਪ੍ਪਨ੍ਨਕਾਲਤੋ ਪਟ੍ਠਾਯ ਸਙ੍ਘਸ੍ਸ ਵਾ ਪੁਗ੍ਗਲਸ੍ਸ ਵਾ ਸਨ੍ਤਕਭਾਵਂ ਉਪਗਚ੍ਛਨ੍ਤਂ, ਯਂ ਨ ਵਸ੍ਸਾਵਾਸਿਕਭਾਵੇਨ ਦਿਨ੍ਨਂ, ਅਤ੍ਥਿ ਉਪ੍ਪਨ੍ਨਕਾਲਤੋ ਪਟ੍ਠਾਯ ਅਨੁਪਗਨ੍ਤ੍ਵਾ ਵਸ੍ਸਂਵੁਤ੍ਥਕਾਲੇਯੇਵ ਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਉਪਗਚ੍ਛਨ੍ਤਂ, ਯਂ ਵਸ੍ਸਾਵਾਸਿਕਭਾਵੇਨ ਉਪ੍ਪਜ੍ਜਿਤ੍ਵਾ ਸਮਯੇ ਦਿਨ੍ਨਂ, ਅਤ੍ਥਿ ਸਮਯੇ ਦਿਨ੍ਨਮ੍ਪਿ ਪੁਗ੍ਗਲਸ੍ਸ ਸਨ੍ਤਕਭਾਵਂ ਅਨੁਪਗਚ੍ਛਨ੍ਤਂ, ਸਙ੍ਘਸਨ੍ਤਕਭਾਵਂ ਵਾ ਦਾਯਕਸਨ੍ਤਕਭਾਵਂ ਵਾ ਉਪਗਚ੍ਛਨ੍ਤਂ, ਈਦਿਸਂ ਸਨ੍ਧਾਯ ‘‘ਸਞ੍ਞਾਣਂ ਕਤ੍ਵਾ ਨਿਕ੍ਖਿਪਿਤਬ੍ਬ’’ਨ੍ਤਿ ਵੁਤ੍ਤਂ. ਇਦਂ ਅਤਿਰੇਕਸਂਵਚ੍ਛਰਮ੍ਪਿ ਨਿਕ੍ਖਿਪਿਤੁਂ ਲਭਤਿ ਅਤ੍ਤਨੋ ਸਨ੍ਤਕਭਾਵਂ ਅਨੁਪਗਤਤ੍ਤਾ, ਤਸ੍ਮਾ ‘‘ਦਸਾਹਾਨਾਗਤ’’ਨ੍ਤਿ ਇਤੋ ਅਞ੍ਞਂ ਸਨ੍ਧਾਯ ਵੁਤ੍ਤਨ੍ਤਿ ਸਿਦ੍ਧਮੇਤਨ੍ਤਿ. ਦਸਾਹਤੋ ਪੁਰੇਤਰਂ ਲਭਿਤ੍ਵਾ ਯਾਵ ਪਵਾਰਣਾ ਨਿਕ੍ਖਿਪਿਤੁਂ ਨ ਲਭਤਿ, ਤਸ੍ਮਾ ਸਕਭਾਵੂਪਗਤਮੇਵ ਅਧਿਟ੍ਠਾਤਬ੍ਬਂ, ਤਂਯੇਵ ਸਨ੍ਧਾਯ ‘‘ਦਸਾਹਾਨਾਗਤ’’ਨ੍ਤਿ ਵੁਤ੍ਤਂ, ਯਤੋ ‘‘ਅਨ੍ਤੋਸਮਯੇ ਅਧਿਟ੍ਠੇਤਿ, ਵਿਕਪ੍ਪੇਤੀ’’ਤਿ ਅਨਾਪਤ੍ਤਿਵਾਰੇ ਵੁਤ੍ਤਂ. ਸਞ੍ਞਾਣਂ ਕਤ੍ਵਾ ਨਿਕ੍ਖਿਪਿਤਬ੍ਬਕਂ ਪਨ ਪਰਸ੍ਸ ਦਾਤਬ੍ਬਤਾਯ ਸਕਭਾਵਂ ਅਨੁਪਗਤਂ, ਨ ਹਿ ਤਂ ਸਨ੍ਧਾਯ ‘‘ਅਧਿਟ੍ਠੇਤਿ, ਵਿਕਪ੍ਪੇਤੀ’’ਤਿ ਸਕ੍ਕਾ ਵਤ੍ਤੁਂ, ਨ ਚ ਤਂ ਇਮਸ੍ਮਿਂ ਅਤ੍ਥੇ ਨਿਸ੍ਸਗ੍ਗਿਯਂ ਹੋਤਿ ਸਙ੍ਘਸ੍ਸ ਨਿਸ੍ਸਗ੍ਗਿਯਾਭਾਵਤੋ, ਅਟ੍ਠਕਥਾਯਮ੍ਪਿ ਅਯਮਤ੍ਥੋ ਸੁਟ੍ਠੁ ਪਾਕਟੋਵ. ਕਤਮਂ ਸਞ੍ਞਾਣਂ ਕਤ੍ਵਾ ਨਿਕ੍ਖਿਪਿਤਬ੍ਬਨ੍ਤਿ ਚੇ? ਪਰਸਨ੍ਤਕਂ ਚੀਵਰਂ ਸਙ੍ਘਿਕਮੇਵ ਹੋਤਿ, ਤਤੋ ‘‘ਸਲ੍ਲਕ੍ਖੇਤ੍ਵਾ ਸੁਖਂ ਦਾਤੁਂ ਭਵਿਸ੍ਸਤੀ’’ਤਿ ਇਮਿਨਾ ਹਿ ਪਰਸ੍ਸ ਸਨ੍ਤਕਭਾਵੋ ਦਸ੍ਸਿਤੋ.

‘‘ਤਤੋ ਪਰਂ ਏਕਦਿਵਸਮ੍ਪਿ ਪਰਿਹਾਰੋ ਨਤ੍ਥੀਤਿ ਦਸਾਹਪਰਮਤੋ ਉਦ੍ਧਂ ਅਨੁਪਗਤਤ੍ਤਾ’’ਤਿ ਲਿਖਿਤਂ, ਇਤੋ ਸਮਯਤੋ ਉਦ੍ਧਮੇਵ ਦਸਾਹਸ੍ਸ ਅਨੁਪਗਤਤ੍ਤਾ ਸਮਯਤੋ ਪਰਂ ਦਸਾਹਂ ਨ ਲਭਤੀਤਿ ਕਿਰਸ੍ਸ ਅਧਿਪ੍ਪਾਯੋ. ‘‘ਏਤਂ ਪਰਿਹਾਰਂ ਲਭਤਿਯੇਵਾ’’ਤਿ ਏਤ੍ਥ ‘‘ਏਕਾਦਸਮਂ ਅਰੁਣਂ ਚੀਵਰਮਾਸੇ ਉਟ੍ਠੇਤੀ’’ਤਿ ਕਾਰਣਂ ਲਿਖਿਤਂ. ਅਨੁਗਣ੍ਠਿਪਦੇ ਪਨ ‘‘ਅਨਧਿਟ੍ਠਹਿਤ੍ਵਾ ਏਕਾਦਸਦਿਵਸੇ ਨਿਕ੍ਖਿਪਿਤੁਂ ਲਭਤੀ’ਤਿ ਵਦਨ੍ਤੋ ਭਗਵਾ ਇਤਰਮ੍ਪਿ ਅਨਚ੍ਚੇਕਚੀਵਰਾਦਿਂ ਅਨੁਜਾਨਾਤਿ, ਅਚ੍ਚੇਕਚੀਵਰਮੁਖੇਨਾਤਿ ਅਪਰੇ’’ਤਿ ਵੁਤ੍ਤਂ. ਏਤ੍ਥ ਕਤਰਂ ਸੁਭਾਸਿਤਂ? ਉਭਯਮ੍ਪੀਤਿ ਏਕੇ. ਕਥਂ? ਪਠਮਂ ‘‘ਅਚ੍ਚੇਕਚੀਵਰਸ੍ਸ ਅਨਤ੍ਥਤੇ ਕਥਿਨੇ ਦਸਦਿਵਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਦਸਦਿਵਸਾਧਿਕਾ ਪਞ੍ਚਮਾਸਾ’’ਤਿ ਇਮਿਨਾ ਸਮੇਤਿ, ਅਨੁਗਣ੍ਠਿਪਦਲਦ੍ਧਿਯਾ ਹਿ ਏਤ੍ਥ ‘‘ਏਕਾਦਸਦਿਵਸਾਧਿਕੋ’’ਤਿ ਵਤ੍ਤਬ੍ਬਤਂ ਆਪਜ੍ਜਤਿ, ਦੁਤਿਯਂ ‘‘ਦਸਾਹਾਨਾਗਤਨ੍ਤਿ…ਪੇ… ਦਸਾਹੇਨ ਅਸਮ੍ਪਤ੍ਤਾਤਿ ਅਤ੍ਥੋ’’ਤਿ ਇਮਿਨਾ ਸਮੇਤਿ. ਇਮਸ੍ਸ ਨਯਸ੍ਸ ਵਸੇਨ ‘‘ਪਞ੍ਚਮਿਤੋ ਪਟ੍ਠਾਯ ਉਪ੍ਪਨ੍ਨਸ੍ਸ ਚੀਵਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤੀ’’ਤਿ ਪਾਠੋ ਯੁਜ੍ਜਤਿ. ਤਥਾ ਗਣ੍ਠਿਪਦਲਦ੍ਧਿਯਾ ‘‘ਨਵਾਹਾਨਾਗਤਂ ਕਤ੍ਤਿਕਤੇਮਾਸਿਕਪੁਣ੍ਣਮ’’ਨ੍ਤਿ ਵਤ੍ਤਬ੍ਬਤਂ ਆਪਜ੍ਜਤਿ, ਤਸ੍ਸ ਵਸੇਨ ‘‘ਕਾਮਞ੍ਚੇਸ ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬਨ੍ਤਿ ਇਮਿਨਾਵ ਸਿਦ੍ਧੋ, ਅਟ੍ਠੁਪ੍ਪਤ੍ਤਿਵਸੇਨ ਪਨ ਅਪੁਬ੍ਬਂ ਵਿਯ ਅਤ੍ਥਂ ਦਸ੍ਸੇਤ੍ਵਾ ਸਿਕ੍ਖਾਪਦਂ ਠਪਿਤ’’ਨ੍ਤਿ ਅਯਂ ਪਾਠੋ ਯੁਜ੍ਜਤਿ. ਕੋ ਪਨੇਤ੍ਥ ਸਾਰੋਤਿ? ਯੋ ਪਚ੍ਛਾ ਵੁਤ੍ਤੋ, ਸੋਵ ਸਾਰੋ. ਤੇਨੇਵ ਅਟ੍ਠਕਥਾਚਰਿਯੇਨ ‘‘ਪਞ੍ਚਮਿਤੋ ਪਟ੍ਠਾਯਾ’’ਤਿ ਵੁਤ੍ਤਂ. ਪੋਰਾਣਗਣ੍ਠਿਪਦੇਹਿ ਅਟ੍ਠਕਥਾਯ ਚ ਸਦ੍ਧਿਂ ਸਂਸਨ੍ਦਨਤੋ, ‘‘ਦਸਾਹਾਨਾਗਤ’’ਨ੍ਤਿ ਪਾਲ਼ਿਯਾ ਸਂਸਨ੍ਦਨਤੋ ਚ ਏਤ੍ਥ ਗਣ੍ਠਿਪਦਲਦ੍ਧਿਪਿ ਪਾਲ਼ਿਯਾ ਸਮੇਤਿ.

ਕਥਂ? ਯਸ੍ਮਾ ਪਵਾਰਣਾਦਿਵਸੇ ਅਰੁਣੁਗ੍ਗਮਨੇ ਭਿਕ੍ਖੁ ਵਸ੍ਸਂਵੁਤ੍ਥੋ ਹੋਤਿ, ਤਸ੍ਮਾ ਇਮਿਨਾ ਦਸਮੇਨ ਅਹੇਨ ਸਦ੍ਧਿਂ ਛਟ੍ਠਿਤੋ ਪਟ੍ਠਾਯ ਨਵਦਿਵਸਾ ਦਸ ਅਹਾਨੀਤਿ ਦਸਾਹਂ, ਤੇਨ ਦਸਾਹੇਨ, ਸਹਯੋਗਤ੍ਥੇ ਕਰਣਵਚਨਂ. ਕਤ੍ਤਿਕਤੇਮਾਸਿਕਪੁਣ੍ਣਮਾ ਚੀਵਰਸਮਯਂ ਅਸਮ੍ਪਤ੍ਤਾਤਿ ਕਤ੍ਵਾ ‘‘ਅਨਾਗਤਾ’’ਤਿ ਵੁਚ੍ਚਤਿ. ਯਥਾ ਅਪਰਕਤ੍ਤਿਕਪੁਣ੍ਣਮਾਯ ਵਸ੍ਸਿਕਸਾਟਿਕਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਨ੍ਤੋ ‘‘ਚਾਤੁਮਾਸਂ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਵੁਚ੍ਚਤਿ, ਏਵਂਸਮ੍ਪਦਮਿਦਨ੍ਤਿ. ਏਤ੍ਥ ਵੁਚ੍ਚਤੀਤਿ ਚੇ? ਨ, ਇਮਸ੍ਸ ਨਿਪ੍ਪਯੋਜਨਭਾਵਪ੍ਪਸਙ੍ਗਤੋ. ਅਚ੍ਚੇਕਚੀਵਰਪਟਿਗ੍ਗਹਣਕਾਲਂ ਨਿਯਮਿਤਨ੍ਤਿ ਚੇ? ਨ, ‘‘ਛਟ੍ਠਿਤੋ ਪਟ੍ਠਾਯ ਉਪ੍ਪਨ੍ਨਚੀਵਰਂ ਅਚ੍ਚੇਕਮੇਵ ਨ ਹੋਤਿ. ਪਠਮਕਥਿਨੇਨ ਸਿਦ੍ਧਤ੍ਤਾ’’ਤਿ ਪੋਰਾਣਟ੍ਠਕਥਾਗਣ੍ਠਿਪਦੇਸੁ ਵੁਤ੍ਤਤ੍ਤਾ ਤਤੋ ਉਪਰਿ ‘‘ਅਚ੍ਚੇਕਚੀਵਰ’’ਨ੍ਤਿ ਵੁਚ੍ਚਤਿ, ਪਟਿਗ੍ਗਣ੍ਹਨ੍ਤਸ੍ਸ ਆਪਤ੍ਤਿਸਙ੍ਗਹੋ ਚ. ਨ ਚ ਸਾ ਆਪਤ੍ਤਿ ਪਾਲ਼ਿਯਾ, ਅਟ੍ਠਕਥਾਯ, ਯੁਤ੍ਤਿਤੋ ਵਾ ਸਮ੍ਭਵਤਿ. ਅਟ੍ਠੁਪ੍ਪਤ੍ਤਿਮਤ੍ਤਵਸੇਨ ਵੁਤ੍ਤਨ੍ਤਿ ਚੇ? ਨ, ਦਸਾਹਾਧਿਚ੍ਚਕਾਰਿਕਾ ਅਟ੍ਠੁਪ੍ਪਤ੍ਤਿਪਾਯਂ ਨ ਦਿਸ੍ਸਤਿ. ‘‘ਭਿਕ੍ਖੂ ਅਚ੍ਚੇਕਚੀਵਰਂ ਪਟਿਗ੍ਗਹੇਤ੍ਵਾ ਚੀਵਰਕਾਲਸਮਯਂ ਅਤਿਕ੍ਕਾਮੇਨ੍ਤੀ’’ਤਿ ਏਤ੍ਥ ਏਤ੍ਤਿਕਾ ਏਵ ਹਿ ਅਟ੍ਠੁਪ੍ਪਤ੍ਤਿ. ਤਥਾ ਹਿ ਪਰਿਵਾਰੇ (ਪਰਿ. ੪੭-੫੩) ‘‘ਕਿਸ੍ਮਿਂ ਵਤ੍ਥੁਸ੍ਮਿ’’ਨ੍ਤਿ ਆਰਭਿਤ੍ਵਾ ਏਤ੍ਤਕਮੇਵ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਚ੍ਚੇਕਚੀਵਰਂ ਚੀਵਰਕਾਲਂ ਨਾਤਿਕ੍ਕਾਮੇਤਬ੍ਬਂ, ਇਤਰਂ ਅਤਿਕ੍ਕਾਮੇਤਬ੍ਬਨ੍ਤਿ ਦਸ੍ਸਨਤ੍ਥਂ ਇਦਂ ਪਞ੍ਞਤ੍ਤਨ੍ਤਿ ਚੇ? ਨ, ਅਚ੍ਚੇਕਚੀਵਰਸ੍ਸੇਵ ਅਪਰਾਧਦਸ੍ਸਨਤੋ, ਵਿਸੇਸਕਾਰਣਾਭਾਵਾ, ‘‘ਕਾਮਞ੍ਚੇਸ ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬਨ੍ਤਿ ਇਮਿਨਾਵ ਸਿਦ੍ਧੋ’’ਤਿਆਦਿਵਚਨਵਿਰੋਧਤੋ ਚ ਯਥਾਵੁਤ੍ਤਵਚਨਾਸਮ੍ਭਵਤੋ ਚ.

ਕਥਂ? ਦਸਾਹੇਨ ਸਹ ਕਤ੍ਤਿਕਪੁਣ੍ਣਮਾ ‘‘ਅਨਾਗਤਾ’’ਤਿ ਹਿ ਵੁਤ੍ਤੇ ਦਸਾਹਤੋ ਅਞ੍ਞਾ ਸਾ ਪੁਣ੍ਣਮਾਤਿ ਆਪਜ੍ਜਤਿ. ਅਨਞ੍ਞਾ ਚੇ, ਸਹ-ਸਦ੍ਦੋ ਨ ਸਮ੍ਭਵਤਿ, ਨ ਹਿ ਅਤ੍ਤਨਾਵ ਅਤ੍ਤਨੋ ਯੋਗੋ ਸਮ੍ਭਵਤਿ, ਅਨਾਗਤ-ਸਦ੍ਦੋ ਚ ਨ ਸਮ੍ਭਵਤਿ. ਆਗਤਾ ਸਮ੍ਪਤ੍ਤਾ ਏਵ ਹਿ ਸਾ ਪੁਣ੍ਣਮਾ. ਚੀਵਰਸਮਯਸ੍ਸ ਅਨਨ੍ਤਰਤ੍ਤਾ ਏਕੀਭਾਵਂ ਅਨਾਗਤਤ੍ਤਾ ਅਨਾਗਤਾਯੇਵਾਤਿ ਚੇ? ਨ, ਤਥਾਪਿ ਅਨਾਗਤ-ਸਦ੍ਦਸ੍ਸ ਸਮ੍ਭਵਤੋ, ਆਗਮਨਸਮ੍ਭਵੇ ਸਤਿਯੇਵ ਹਿ ਅਨਾਗਤ-ਸਦ੍ਦੋ ਸਮ੍ਭਵਤਿ, ਨ ਹਿ ਨਿਬ੍ਬਾਨਂ, ਪਞ੍ਞਤ੍ਤਿ ਵਾ ‘‘ਅਨਾਗਤਾ’’ਤਿ ਵੁਚ੍ਚਤਿ. ਨਿਬ੍ਬਾਨਂ ਵਿਯ ਖਣਤ੍ਤਯਂ, ਸਾ ਚ ਪੁਣ੍ਣਮਾ ਨ ਕਦਾਚਿ ਸਮਯਭਾਵਂ ਪਾਪੁਣਾਤੀਤਿ ਅਯੁਤ੍ਤਮੇਵ. ‘‘ਤਤੋ ਪਰਂ ਵਿਕਪ੍ਪੇਤੁ’’ਨ੍ਤਿ ਪਨ ਵਚਨਂ ਪਿਟ੍ਠਿਸਮਯਂ ਗਹੇਤ੍ਵਾ ਠਿਤਤ੍ਤਾ ਸਮ੍ਭਵਤਿ. ਅਪਿਚ ਪਵਾਰਣਾਯਂ ਅਰੁਣੇ ਚ ਉਟ੍ਠਿਤੇ ਸਾ ਪੁਣ੍ਣਮਾ ਚੀਵਰਸਮਯਂ ਏਕਾਹਾਨਾਗਤਾ ਏਵਾਪਜ੍ਜਤਿ ਪੁਬ੍ਬੇ ਸਹਯੋਗਪਤ੍ਤਤ੍ਤਾ. ਏਵਂ ਸਨ੍ਤੇ ਏਕੀਭਾਵਗਤਾਪਿ ਸਾ ਚੀਵਰਸਮਯਂ ਅਨਾਗਤਾ ਏਵ ਜਾਤਾਤਿ ਸਬ੍ਬਦਾ ਨ ਤਥਾਵਿਗ੍ਗਹਕਰਣਵਚਨਤ੍ਥਂ ਕੋਚਿਦੇਵ ਵਚਨਤੋ ਦੀਪੇਤੀਤਿ ਵੇਦਿਤਬ੍ਬਂ.

ਕਿਮਤ੍ਥਂ ਪਨੇਤ੍ਥ ‘‘ਦਸਦਿਵਸਾਧਿਕੋ ਮਾਸੋ’’ਤਿਆਦਿ ਵੁਤ੍ਤਨ੍ਤਿ? ਤਂ ਪਾਰਿਪੂਰਿਸਮ੍ਭਵਤੋ. ਪਞ੍ਚਮਿਯਞ੍ਹਿ ਪੁਰੇ ਅਰੁਣਂ ਉਪ੍ਪਨ੍ਨਅਚ੍ਚੇਕਚੀਵਰਸ੍ਸ ਦਸਦਿਵਸਾਧਿਕੋ ਮਾਸੋਯੇਵ ਪਰਿਪੂਰੋਤਿ ਕਤ੍ਵਾ ਤਥਾ ਵੁਤ੍ਤਂ. ਅਪਿਚ ਤਸ੍ਸਾ ਪਞ੍ਚਮਿਯਾ ਦਿਵਸਭਾਗੋਪਿ ਸਮ੍ਪਤ੍ਤਾਯ ਰਤ੍ਤਿਯਾ ‘‘ਹਿਯ੍ਯੋ’’ਤਿ ਵੁਚ੍ਚਤਿ, ਪਗੇਵ ਪੁਰੇ ਅਰੁਣਂ, ਤੇਨੇਵਾਹ ‘‘ਹਿਯ੍ਯੋ ਖੋ, ਆਵੁਸੋ, ਅਮ੍ਹਾਕ’’ਨ੍ਤਿਆਦਿ. ‘‘ਏਵਂ ਸਨ੍ਤੇ ‘ਛਟ੍ਠਿਤੋ ਪਟ੍ਠਾਯਾ’ਤਿ ਵੁਤ੍ਤਪਠਮਪਾਠਸ੍ਸ ਵਸੇਨ ‘ਅਨਚ੍ਚੇਕਚੀਵਰਮ੍ਪਿ ਪਚ੍ਚੁਦ੍ਧਰਿਤ੍ਵਾ ਠਪਿਤਂ ਤਿਚੀਵਰਮ੍ਪਿ ਏਤਂ ਪਰਿਹਾਰਂ ਲਭਤਿਯੇਵਾ’’’ਤਿ ਚ ‘‘ਦਸਦਿਵਸਾਧਿਕੋ ਮਾਸੋ’’ਤਿਆਦਿ ਚ ਯਂ ਲਿਖਿਤਂ. ਤਂ ਨ, ‘‘ਪਞ੍ਚਮਿਤੋ ਪਟ੍ਠਾਯਾ’’ਤਿ ਪਾਠੇ ਸਜ੍ਜਿਤੇਵ ਏਤੇਨ ਪਰਿਯਾਯੇਨ ਯਥਾਵੁਤ੍ਤਅਤ੍ਥਸਮ੍ਭਵਤੋ, ਨ ਤਾਨਿ ਠਾਨਾਨਿ ਪੁਨ ਸਜ੍ਜਿਤਾਨਿ. ਯਥਾਠਿਤਵਸੇਨੇਵ ਅਜ੍ਝੁਪੇਕ੍ਖਿਤਬ੍ਬਾਨੀਤਿ ਨੋ ਤਕ੍ਕੋਤਿ ਆਚਰਿਯੋ. ਇਦਂ ਸਿਕ੍ਖਾਪਦਂ ਪੁਣ੍ਣਮਾਯਂ ਅਨਿਸ੍ਸਗ੍ਗਿਯਤ੍ਥਮੇਵਾਤਿ ਉਪਤਿਸ੍ਸਤ੍ਥੇਰੋ. ‘‘ਪਵਾਰਣਾਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯਾ’’ਤਿ ਪਾਠੇ ਸਜ੍ਜਿਤੇ ਏਤੇਨ ਪਰਿਯਾਯੇਨ ਯਥਾਵੁਤ੍ਤੋ ਉਪ੍ਪਨ੍ਨਸ੍ਸ ਚੀਵਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤਿ, ‘‘ਅਚ੍ਚੇਕਚੀਵਰਨ੍ਤਿ ਅਚ੍ਚਾਯਿਕਚੀਵਰਂ ਵੁਚ੍ਚਤੀ’’ਤਿਆਦਿ ਪਾਠੋ. ‘‘ਛਟ੍ਠਿਤੋ ਪਟ੍ਠਾਯਾ’’ਤਿ ਚ ‘‘ਕਾਮਞ੍ਚੇਸ ਦਸਾਹਪਰਮ’’ਨ੍ਤਿਆਦਿ ਚ ਯਂ ਲਿਖਿਤਂ, ਤਂ ਨ ਪਾਠੋ, ਤਸ੍ਮਾ ਏਕਾਦਸਦਿਵਸਂ ਪਰਿਹਾਰਂ ਲਭਤੀਤਿ ਕਤ੍ਵਾ ਆਚਰਿਯੇਨ ‘‘ਪਞ੍ਚਮਿਤੋ ਪਟ੍ਠਾਯਾ’’ਤਿ ਲਿਖਾਪਿਤੋ ਕਿਰ. ‘‘ਪਵਾਰਣਾਮਾਸਸ੍ਸ ਜੁਣ੍ਹਪਕ੍ਖਛਟ੍ਠਿਤੋ ਪਟ੍ਠਾਯ ਪਨ ਉਪ੍ਪਨ੍ਨਂ ਅਨਚ੍ਚੇਕਚੀਵਰਮ੍ਪਿ ਪਚ੍ਚੁਦ੍ਧਰਿਤ੍ਵਾ ਠਪਿਤਂ ਤਿਚੀਵਰਮ੍ਪਿ ਏਤਂ ਪਰਿਹਾਰਂ ਲਭਤਿਯੇਵਾਤਿ ਪਾਠੋ’’ਤਿ ਚ ‘‘ਅਚ੍ਚੇਕਚੀਵਰਸ੍ਸ ਅਨਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕਾ ਪਞ੍ਚਮਾਸਾਤਿ ਪਾਠੋ’’ਤਿ ਚ ਏਤ੍ਥ ਪਪਞ੍ਚੇਨ੍ਤਿ, ਤਸ੍ਮਾ ਸੁਟ੍ਠੁ ਸਲ੍ਲਕ੍ਖੇਤ੍ਵਾ ਕਥੇਤਬ੍ਬਂ, ਤੁਣ੍ਹੀਭੂਤੇਨ ਵਾ ਭਵਿਤਬ੍ਬਂ.

ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਸਾਸਙ੍ਕਸਿਕ੍ਖਾਪਦਵਣ੍ਣਨਾ

੬੫੨. ‘‘ਤਿਣ੍ਣਂ ਚੀਵਰਾਨਂ ਅਞ੍ਞਤਰਂ ਚੀਵਰਨ੍ਤਿ ਇਦਂ ਤਿਚੀਵਰੇ ਏਵ ਅਯਂ ਵਿਧਿ, ਇਤਰਸ੍ਮਿਂ ਯਥਾਸੁਖਨ੍ਤਿ ਦਸ੍ਸਨਤ੍ਥਂ ਵੁਤ੍ਤ’’ਨ੍ਤਿ ਵਦਨ੍ਤਿ. ‘‘ਅਤਿਰੇਕਛਾਰਤ੍ਤਂ ਵਿਪ੍ਪਵਸਨ੍ਤੀ’’ਤਿ ਤਸ੍ਮਿਂਯੇਵ ਸੇਨਾਸਨੇ ਵਾਸੋ ਨ ਵਿਪ੍ਪਵਾਸੋਤਿ ਕਤ੍ਵਾ ਵੁਤ੍ਤਂ. ਕਸ੍ਮਾ? ਚੀਵਰਪ੍ਪਵਤ੍ਤਿਜਾਨਨਤੋ. ਏਤ੍ਥ ਕਿਞ੍ਚਾਪਿ ‘‘ਆਰਞ੍ਞਕਂ ਨਾਮ ਸੇਨਾਸਨਂ ਪਞ੍ਚਧਨੁਸਤਿਕਂ ਪਚ੍ਛਿਮ’’ਨ੍ਤਿ ਵਚਨਤੋ ਅਤਿਰੇਕਤੋਪਿ ਵੁਤ੍ਤਂ, ਆਰਞ੍ਞਕਮੇਵ ਪਨ ਸੇਨਾਸਨਂ ਹੋਤਿ, ਧੁਤਙ੍ਗਂ ਰਕ੍ਖਤਿ ਚੀਵਰਪ੍ਪਵਤ੍ਤਿਜਾਨਨਪਲਿਬੋਧਸਮ੍ਭਵਤੋ.

੬੫੩. ‘‘ਗਾਵੁਤਤੋ ਅਤਿਰੇਕਪ੍ਪਮਾਣੇਨ ਲਭਤੀ’’ਤਿ ਯਂ ਵੁਤ੍ਤਂ, ਤਂ ਕਥਂ ਪਞ੍ਞਾਯਤੀਤਿ ਚੇ? ‘‘ਸਿਯਾ ਚ ਤਸ੍ਸ ਭਿਕ੍ਖੁਨੋ ਕੋਚਿਦੇਵ ਪਚ੍ਚਯੋ ਤੇਨ ਚੀਵਰੇਨ ਵਿਪ੍ਪਵਾਸਾਯਾ’’ਤਿ ਵਚਨਤੋ. ਯੋਜਨਪ੍ਪਮਾਣੇਪਿ ਸਿਯਾਤਿ ਚੇ? ਨ, ‘‘ਪੁਨ ਗਾਮਸੀਮਂ ਓਕ੍ਕਮਿਤ੍ਵਾ ਵਸਿਤ੍ਵਾ ਪਕ੍ਕਮਤੀ’’ਤਿ ਅਨਾਪਤ੍ਤਿਵਾਰੇ ਅਨੁਞ੍ਞਾਤਤ੍ਤਾ. ਯਦਿ ਏਵਂ ‘‘ਯੋਜਨਪ੍ਪਮਾਣੇ ਨ ਲਭਤੀ’’ਤਿ ਇਦਂ ਕਿਨ੍ਤਿ? ਇਦਂ ਨਿਬਦ੍ਧਾਵਾਸਵਸੇਨੇਵ ਵੁਤ੍ਤਂ. ਤਤ੍ਥ ਧੁਤਙ੍ਗਂ ਭਿਜ੍ਜਤੀਤਿ? ਨ ਭਿਜ੍ਜਤਿ, ਕਿਨ੍ਤੁ ਨ ਇਧ ਧੁਤਙ੍ਗਾਧਿਕਾਰੋ ਅਤ੍ਥੀਤਿ. ਅਥ ਕਸ੍ਮਾ ‘‘ਅਯਂ ਧੁਤਙ੍ਗਚੋਰੋਤਿ ਵੇਦਿਤਬ੍ਬੋ’’ਤਿ ਵੁਤ੍ਤਨ੍ਤਿ? ਅਸਮ੍ਭਵਤੋ. ਕਥਂ ਪਞ੍ਞਾਯਤੀਤਿ? ਅਙ੍ਗੇਸੁ ਅਭਾਵਤੋ. ਧੁਤਙ੍ਗਧਰਸ੍ਸ ਪਤਿਰੂਪਸੇਨਾਸਨਦੀਪਨਤੋ ਧੁਤਙ੍ਗਧਰਤਾ ਤਸ੍ਸ ਸਿਦ੍ਧਾ. ਵਚਨਪ੍ਪਮਾਣਤੋਤਿ ਚੇ? ਨ, ਵਚਨਪ੍ਪਮਾਣਤੋ ਚ ਪਾਲ਼ਿਯੇਵ ਪਮਾਣਂ. ‘‘ਅਨਾਪਤ੍ਤਿ ਪੁਨ ਗਾਮਸੀਮਂ ਓਕ੍ਕਮਿਤ੍ਵਾ ਵਸਿਤ੍ਵਾ ਪਕ੍ਕਮਤੀ’’ਤਿ ਹਿ ਵੁਤ੍ਤਂ. ਗਾਮਸੀਮਾ ਨਿਕ੍ਖਮਿਤ੍ਵਾ ਕਿਤ੍ਤਕਂ ਕਾਲਂ ਵਸਿਤ੍ਵਾ ਪਕ੍ਕਮਿਤਬ੍ਬਨ੍ਤਿ ਚੇ? ਪੁਨਦਿਵਸੇਯੇਵ, ਤਸ੍ਮਾ ਅਟ੍ਠਮੋ ਅਰੁਣੋ ਨਿਬਦ੍ਧਾਵਾਸੇ ਵਾ ਗਨ੍ਤਬ੍ਬਟ੍ਠਾਨੇ ਵਾ ਉਟ੍ਠੇਤਬ੍ਬੋਤਿ ਏਕੇ. ਅਨ੍ਤੋਛਾਰਤ੍ਤਨ੍ਤਿ ਏਕੇ. ਯਾਵ ਨਿਬਦ੍ਧਾਵਾਸਂ ਨ ਕਪ੍ਪੇਤੀਤਿ ਏਕੇ. ਯਾਵ ਮਗ੍ਗਪਰਿਸ੍ਸਮਵਿਨੋਦਨਾਤਿ ਏਕੇ. ਸਤਿ ਅਨ੍ਤਰਾਯੇ ਅਨ੍ਤੋਛਾਰਤ੍ਤਂ ਵਸਤਿ, ਅਨਾਪਤ੍ਤਿ. ਨਿਬਦ੍ਧਾਵਾਸਕਪ੍ਪਨੇ ਸਤਿ ਅਰੁਣੁਗ੍ਗਮਨੇ ਆਪਤ੍ਤਿ. ਸਚੇ ਤਂਸਤ੍ਤਮੋ ਦਿਵਸੋ, ਤਦਹੇਵ ਨਿਕ੍ਖਿਤ੍ਤਚੀਵਰਂ ਗਹੇਤਬ੍ਬਂ, ਪਚ੍ਚੁਦ੍ਧਰਿਤਬ੍ਬਂ ਵਾਤਿ ਏਕੇ. ਸਚੇ ਅਨ੍ਤਰਾ ਨਵਮਗ੍ਗਪਾਤੁਭਾਵੇਨ ਵਾ ਨਵਗਾਮਸਨ੍ਨਿਵੇਸੇਨ ਵਾ, ਤਂ ਸੇਨਾਸਨਂ ਅਙ੍ਗਸਮ੍ਪਤ੍ਤਿਤੋ ਪਰਿਹਾਯਤਿ. ਤਦਹੇਵ ਚੀਵਰਂ ਗਹੇਤਬ੍ਬਂ ਵਾ ਪਚ੍ਚੁਦ੍ਧਰਿਤਬ੍ਬਂ ਵਾ. ਛਾਰਤ੍ਤਂ ਵਿਪ੍ਪਵਸਨ੍ਤਸ੍ਸ ਚੇ ਪਰਿਹਾਯਤਿ, ਅਨਾਪਤ੍ਤਿ ਅਨੁਞ੍ਞਾਤਦਿਵਸਤ੍ਤਾਤਿ ਏਕੇ. ਆਪਤ੍ਤਿ ਏਵ ਅਨਙ੍ਗਸਮ੍ਪਤ੍ਤਿਤੋਤਿ ਏਕੇ. ਯੁਤ੍ਤਤਰਂ ਪਨੇਤ੍ਥ ਵਿਚਾਰੇਤ੍ਵਾ ਗਹੇਤਬ੍ਬਂ. ਸਚੇ ਧੁਤਙ੍ਗਧਰੋ ਹੋਤਿ, ਗਾਮਸੀਮਾਯਂ ਅਵਸਿਤ੍ਵਾ ਪਚ੍ਛਿਮਪ੍ਪਮਾਣਯੁਤ੍ਤੇ ਠਾਨੇ ਵਸਿਤ੍ਵਾ ਪਕ੍ਕਮਿਤਬ੍ਬਂ. ਪਠਮਂ ਬਦ੍ਧਅਵਿਪ੍ਪਵਾਸਸੀਮੋ ਚੇ ਗਾਮੋ ਹੋਤਿ, ਅਞ੍ਞਸ੍ਮਿਮ੍ਪਿ ਮਾਸੇ ਅਨ੍ਤੋਸੀਮਾਯ ਵਸਤੋ ਅਨਾਪਤ੍ਤਿ. ਪੋਰਾਣਗਣ੍ਠਿਪਦੇ ‘‘ਯਥਾਵੁਤ੍ਤਸੇਨਾਸਨੇ ਵਸਨ੍ਤੇਨਾਪਿ ਛਾਰਤ੍ਤਮੇਵ ਚੀਵਰਂ ਗਾਮੇ ਨਿਕ੍ਖਿਪਿਤਬ੍ਬਨ੍ਤਿ ਅਧਿਪ੍ਪਾਯੇਨ ਅਞ੍ਞਂ ਅਨ੍ਤੋਛਾਰਤ੍ਤਮ੍ਪਿ ਅਞ੍ਞਮ੍ਪਿ ਵਸਤੋ ਆਪਤ੍ਤਿਯੇਵਾ’’ਤਿ ਵੁਤ੍ਤਂ.

ਸਾਸਙ੍ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਪਰਿਣਤਸਿਕ੍ਖਾਪਦਵਣ੍ਣਨਾ

੬੫੭. ਦੇਥਾਵੁਸੋ ਅਮ੍ਹਾਕਨ੍ਤਿ ਏਤ੍ਥ ਅਕਤਵਿਞ੍ਞਤ੍ਤਿ ਹੋਤਿ ਨ ਹੋਤੀਤਿ? ਹੋਤਿ, ਯਦਿ ਏਵਂ ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਸ੍ਸ ਚ ਇਮਸ੍ਸ ਚ ਕਿਂ ਨਾਨਾਕਰਣਨ੍ਤਿ? ਤਂ ਅਞ੍ਞਾਤਕਅਪ੍ਪਵਾਰਿਤੇਯੇਵ ਵਿਞ੍ਞਾਪੇਨ੍ਤਸ੍ਸ, ਇਦਂ ਞਾਤਕਪਵਾਰਿਤੇਪਿ, ਤਂ ਅਨਚ੍ਛਿਨ੍ਨਚੀਵਰਸ੍ਸੇਵ, ਇਦਂ ਤਸ੍ਸਪਿ, ਤਂ ਚੀਵਰਂਯੇਵ ਵਿਞ੍ਞਾਪੇਨ੍ਤਸ੍ਸ, ਇਦਂ ਅਚੀਵਰਮ੍ਪਿ. ਏਵਂ ਸਨ੍ਤੇ ਇਦਂ ਤਂ ਅਨ੍ਤੋਕਤ੍ਵਾ ਠਿਤਂ ਹੋਤਿ, ਤਸ੍ਮਾ ਦ੍ਵਿਨ੍ਨਮ੍ਪਿ ਅਙ੍ਗਸਮ੍ਪਤ੍ਤਿਯਾ ਸਤਿ ਕੇਨ ਭਵਿਤਬ੍ਬਨ੍ਤਿ? ਇਮਿਨਾ ਭਵਿਤਬ੍ਬਂ ਇਮਸ੍ਸ ਨਿਪ੍ਪਦੇਸਤੋਤਿ ਏਕੇ. ਦ੍ਵੀਹਿਪਿ ਭਵਿਤਬ੍ਬਂ ਉਭਿਨ੍ਨਮ੍ਪਿ ਅਙ੍ਗਸਿਦ੍ਧਿਤੋਤਿ ਏਕੇ. ਇਮਾਨਿ ਤਸ੍ਸ ਅਙ੍ਗਾਨਿ ਵਿਕਪ੍ਪਨੁਪਗਚੀਵਰਤਾ, ਸਮਯਾਭਾਵੋ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਚਤ੍ਤਾਰਿ. ਇਮਸ੍ਸ ਪਨ ਸਙ੍ਘੇ ਪਰਿਣਤਭਾਵੋ, ਞਤ੍ਵਾ ਅਤ੍ਤਨੋ ਪਰਿਣਾਮਨਂ, ਪਟਿਲਾਭੋਤਿ ਤੀਣਿ. ਏਤ੍ਥ ਪਠਮੋ ਵਾਦੋ ਅਯੁਤ੍ਤੋ ਕਤ੍ਵਾਪਿ ਓਕਾਸਂ ਅਟ੍ਠਕਥਾਯਂ, ਪਰਿਵਾਰੇ ਚ ਅਵਿਚਾਰਿਤਤ੍ਤਾ. ਯਦਿ ਏਵਂ ਤਤ੍ਥ ਅਙ੍ਗੇਸੁ ‘‘ਅਨਞ੍ਞਪਰਿਣਤਤਾ’’ਤਿ ਵਤ੍ਤਬ੍ਬਨ੍ਤਿ ਚੇ? ਨ ਵਤ੍ਤਬ੍ਬਂ, ਅਤ੍ਥਤੋ ਸਿਦ੍ਧਤ੍ਤਾ. ਪਰਿਣਤਸਿਕ੍ਖਾਪਦਦ੍ਵਯਸਿਦ੍ਧਿਤੋ, ਪਰਿਣਤਸਞ੍ਞਿਤੋ, ਆਪਤ੍ਤਿਸਮ੍ਭਵਤੋ ਚ ‘‘ਮਯ੍ਹਮ੍ਪਿ ਦੇਥਾ’’ਤਿ ਵਦਤਿ, ‘‘ਵਟ੍ਟਤੀ’’ਤਿ ਅਨੁਦ੍ਦਿਟ੍ਠਂ, ‘‘ਅਮ੍ਹਾਕਮ੍ਪਿ ਅਤ੍ਥੀ’’ਤਿ ਵੁਤ੍ਤਤ੍ਤਾ ਵਟ੍ਟਤਿ. ‘‘ਸਙ੍ਘਸ੍ਸ ਪਰਿਣਤਂ…ਪੇ… ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਏਤ੍ਥ ‘‘ਪੁਗ੍ਗਲਸ੍ਸਾ’’ਤਿ ਨ ਵੁਤ੍ਤਂ, ਯਤੋ ਸੁਦ੍ਧਪਾਚਿਤ੍ਤਿਯਵਸੇਨ ਆਗਤਤ੍ਤਾ. ‘‘ਅਞ੍ਞਚੇਤਿਯਸ੍ਸਾ’’ਤਿ ਨ ਵੁਤ੍ਤਂ ਸਙ੍ਘਸ੍ਸ ਅਚੇਤਿਯਤ੍ਤਾ, ਤਸ੍ਮਾਯੇਵ ‘‘ਚੇਤਿਯਸ੍ਸ ਪਰਿਣਤਂ…ਪੇ… ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਏਤ੍ਥਾਪਿ ‘‘ਅਞ੍ਞਸਙ੍ਘਸ੍ਸ ਅਞ੍ਞਪੁਗ੍ਗਲਸ੍ਸਾ’’ਤਿ ਨ ਵੁਤ੍ਤਂ. ‘‘ਯਤੋ ਤਥਾ ਇਧ ਚ ‘ਪੁਗ੍ਗਲਸ੍ਸ ਪਰਿਣਤਂ…ਪੇ… ਆਪਤ੍ਤਿ ਦੁਕ੍ਕਟਸ੍ਸਾ’ਤਿ ਏਤ੍ਥ ਚ ‘ਅਤ੍ਤਨੋਪੀ’ਤਿ ਕਿਞ੍ਚਾਪਿ ਨ ਵੁਤ੍ਤਂ, ਤਥਾਪਿ ਸਮ੍ਭਵਤੀ’’ਤਿ ਵਦਨ੍ਤਿ. ਤਂ ਪਨ ਇਧ ਅਤ੍ਤਨੋ ਪਰਿਣਾਮਨਾਧਿਕਾਰਤ੍ਤਾ ਇਮਸ੍ਸ ਸਿਕ੍ਖਾਪਦਸ੍ਸ ਨ ਵੁਤ੍ਤਨ੍ਤਿ ਏਕੇ. ਤਤੁਤ੍ਤਰਿਸਿਕ੍ਖਾਪਦੇ ‘‘ਅਞ੍ਞਸ੍ਸਤ੍ਥਾਯਾ’’ਤਿ (ਪਾਰਾ. ਅਟ੍ਠ. ੨.੫੨੬) ਪਦਂ ਵਿਯਾਤਿ ਏਕੇ. ਤਂ ਨ, ਏਤ੍ਥ ਪੁਗ੍ਗਲਪਰਿਣਾਮਨਸਿਕ੍ਖਾਪਦੇ ਅਵੁਤ੍ਤਤ੍ਤਾ. ਧਮ੍ਮਸਿਰਿਤ੍ਥੇਰੋ ਪਨਾਹ –

‘‘ਅਤ੍ਤਨੋ ਅਞ੍ਞਤੋ ਲਾਭਂ, ਸਙ੍ਘਸ੍ਸਞ੍ਞਸ੍ਸ ਵਾ ਨਤਂ;

ਪਰਿਣਾਮੇਯ੍ਯ ਨਿਸ੍ਸਗ੍ਗਿ, ਪਾਚਿਤ੍ਤਿਯਮ੍ਪਿ ਦੁਕ੍ਕਟ’’ਨ੍ਤਿ.

ਤਸ੍ਸਤ੍ਥੋ – ਸਙ੍ਘਸ੍ਸ ਪਰਿਣਤਂ ਅਤ੍ਤਨੋ ਪਰਿਣਾਮੇਯ੍ਯ ਨਿਸ੍ਸਗ੍ਗਿਯਂ. ਤਦੇਵ ਅਞ੍ਞਤੋ ਪਰਿਣਾਮੇਯ੍ਯ ਪਾਚਿਤ੍ਤਿਯਂ. ਅਞ੍ਞਸ੍ਸ ਪਰਿਣਤਂ ਅਤ੍ਤਨੋ ਵਾ ਪਰਸ੍ਸ ਵਾ ਪਰਿਣਾਮੇਯ੍ਯ ਦੁਕ੍ਕਟਨ੍ਤਿ, ਤਸ੍ਮਾ ਅਞ੍ਞਾਤਕਵਿਞ੍ਞਤ੍ਤਿਆਦੀਸੁ ਵੁਤ੍ਤਾਪਤ੍ਤਿਸਮ੍ਭਵਤੋ ਇਧ ਪਰਿਣਤਦ੍ਵਯੇ ‘‘ਅਤ੍ਤਨੋ’’ਤਿ ਪਦਂ ਨ ਵੁਤ੍ਤਂ. ਤਸ੍ਮਿਞ੍ਹਿ ਵੁਤ੍ਤੇ ਦੁਕ੍ਕਟਮਤ੍ਤਪ੍ਪਸਙ੍ਗੋ ਸਿਯਾ, ਅਵੁਤ੍ਤੇ ਪਨੇਤੇਸੁ ਵੁਤ੍ਤਾਪਤ੍ਤੀਨਂ ਯਥਾਗਮਮਞ੍ਞਤਰਾ ਚ ਇਧ ਅਵੁਤ੍ਤਸਿਦ੍ਧਿ ਦੁਕ੍ਕਟਞ੍ਚਾਤਿ ਦ੍ਵੇ ਆਪਤ੍ਤਿਯੋ ਏਕਤੋ ਹੋਨ੍ਤੀਤਿ ਵਿਨਯਧਰਾਨਂ ਅਨਵਸੇਸਞਾਣਸ੍ਸ ਓਕਾਸੋ ਕਤੋ ਹੋਤੀਤਿ.

ਇਤਿ ਤਿਂਸਕਕਣ੍ਡਂ ਸਾਰਮਣ੍ਡਂ,

ਅਲਮੇਤਂ ਵਿਨਯਸ੍ਸ ਸਾਰਮਣ੍ਡੇ;

ਇਧ ਨਿਟ੍ਠਿਤਸਬ੍ਬਸਾਰਮਣ੍ਡਂ,

ਵਿਨਯਵਸੇਨ ਪੁਨਾਤਿ ਸਾਰਮਣ੍ਡਨ੍ਤਿ.

ਪਰਿਣਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਪਤ੍ਤਵਗ੍ਗੋ ਤਤਿਯੋ.

ਨਿਸ੍ਸਗ੍ਗਿਯਵਣ੍ਣਨਾ ਨਿਟ੍ਠਿਤਾ.