੧. ਪਠਮਅਨਿਯਤਸਿਕ੍ਖਾਪਦਵਣ੍ਣਨਾ

੪੪੪-੫. ਉਦ੍ਦੇਸਨ੍ਤਿ ਉਦ੍ਦਿਸਨਂ, ਆਸਾਲ਼੍ਹਿਨਕ੍ਖਤ੍ਤਂ ਨਾਮ ਵਸ੍ਸੂਪਗਮਪੂਜਾ. ਸੋਤਸ੍ਸ ਰਹੋਤਿ ਏਤ੍ਥ ਰਹੋ-ਵਚਨਸਾਮਞ੍ਞਤੋ ਵੁਤ੍ਤਂ ਦੁਟ੍ਠੁਲ੍ਲਸਾਮਞ੍ਞਤੋ ਦੁਟ੍ਠੁਲ੍ਲਾਰੋਚਨਪ੍ਪਟਿਚ੍ਛਾਦਨਸਿਕ੍ਖਾਪਦੇਸੁ ਪਾਰਾਜਿਕਵਚਨਂ ਵਿਯ. ਤਸ੍ਮਾ ‘‘ਚਕ੍ਖੁਸ੍ਸ ਰਹੇਨੇਵ ਪਨ ਪਰਿਚ੍ਛੇਦੋ ਕਾਤਬ੍ਬੋ’’ਤਿ ਵੁਤ੍ਤਂ. ਕਥਂ ਪਞ੍ਞਾਯਤੀਤਿ ਚੇ? ‘‘ਮਾਤੁਗਾਮੋ ਨਾਮ ਤਦਹੁਜਾਤਾਪਿ ਦਾਰਿਕਾ’’ਤਿ ਵਚਨਤੋ, ‘‘ਅਲਂਕਮ੍ਮਨਿਯੇਤਿ ਸਕ੍ਕਾ ਹੋਤਿ ਮੇਥੁਨਂ ਧਮ੍ਮਂ ਪਟਿਸੇਵਿਤੁ’’ਨ੍ਤਿ ਵਚਨਤੋ ਚ ਰਹੋਨਿਸਜ੍ਜਸ੍ਸਾਦੋ ਚੇਤ੍ਥ ਮੇਥੁਨਸਨ੍ਨਿਸ੍ਸਿਤਕਿਲੇਸੋ, ਨ ਦੁਤਿਯੇ ਵਿਯ ਦੁਟ੍ਠੁਲ੍ਲਵਾਚਸ੍ਸਾਦਕਿਲੇਸੋ, ਤਸ੍ਮਾ ਚ ਪਞ੍ਞਾਯਤਿ ‘‘ਸੋਤਸ੍ਸ ਰਹੋ ਨਾਧਿਪ੍ਪੇਤੋ’’ਤਿ. ਕੇਚਿ ਪਨ ‘‘ਤਞ੍ਚ ਲਬ੍ਭਤੀਤਿ ਵਚਨਸ੍ਸ ਦਸ੍ਸਨਤ੍ਥਂ ਵੁਤ੍ਤਂ, ਤੇਨ ਦੁਤਿਯੇ ਵੁਤ੍ਤਾ ਵਿਞ੍ਞੂ ਪਟਿਬਲਾ ਗਹਿਤਾ ਹੋਤੀ’’ਤਿ ਵਦਨ੍ਤਿ. ਯੇਨ ਵਾ ਸਾਤਿ ਏਤ੍ਥ ਵਾ-ਸਦ੍ਦੋ ‘‘ਤੇਨ ਸੋ ਭਿਕ੍ਖੁ ਕਾਰੇਤਬ੍ਬੋ ਵਾ’’ਤਿ ਯੋਜੇਤਬ੍ਬੋ, ਸੋ ਚ ਵਿਕਪ੍ਪਤ੍ਥੋ, ਤਸ੍ਮਾ ਕਾਰੇਤਬ੍ਬੋ ਵਾ ਪਟਿਜਾਨਮਾਨੋ, ਨ ਵਾ ਕਾਰੇਤਬ੍ਬੋ ਅਪ੍ਪਟਿਜਾਨਮਾਨੋਤਿ ਅਤ੍ਥੋ. ਤੇਨ ਵੁਤ੍ਤਂ ਅਟ੍ਠਕਥਾਯਂ ‘‘ਪਟਿਜਾਨਮਾਨੋਵ ਤੇਨ ਸੋ ਭਿਕ੍ਖੁ ਕਾਰੇਤਬ੍ਬੋ…ਪੇ… ਨ ਕਾਰੇਤਬ੍ਬੋ’’ਤਿ. ਤਸ੍ਮਾ ਏਵ ਪਾਲ਼ਿਯਂ ਤਦਤ੍ਥਦ੍ਵਯਦਸ੍ਸਨਤ੍ਥਂ ‘‘ਸਾ ਚੇ ਏਵਂ ਵਦੇਯ੍ਯਾ’’ਤਿਆਦਿ ਵੁਤ੍ਤਂ. ‘‘ਸਦ੍ਧੇਯ੍ਯਵਚਸਾ’’ਤਿ ਇਮਿਨਾ ਸੋਤਾਪਨ੍ਨਾ ਅਤ੍ਥਭਞ੍ਜਨਕਂ ਨ ਭਣਨ੍ਤਿ, ਸੇਸਂ ਭਣਨ੍ਤੀਤਿ ਵਾਦੀਨਂ ਵਾਦੋ ਪਟਿਸੇਧਿਤੋ ਹੋਤਿ. ‘‘ਦਿਟ੍ਠ’’ਨ੍ਤਿ ਵੁਤ੍ਤਤ੍ਤਾ ‘‘ਓਲੋਕੇਸੀ’’ਤਿ ਸੁਨ੍ਦਰਂ. ਰਕ੍ਖੇਯ੍ਯਾਸੀਤਿ ਮਮ ਵਿਸੇਸਂ ਕਸ੍ਸਚਿ ਨਾਰੋਚੇਯ੍ਯਾਸੀਤਿ ਅਧਿਪ੍ਪਾਯੋ.

੪੪੬. ‘‘ਸਾ ਚੇ ਏਵਂ ਵਦੇਯ੍ਯ ‘ਅਯ੍ਯਸ੍ਸ ਮਯਾ ਸੁਤਂ ਨਿਸਿਨ੍ਨਸ੍ਸ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸੇਨ੍ਤਸ੍ਸਾ’’’ਤਿ, ਇਦਂ ਕਿਮਤ੍ਥਮੇਤ੍ਥ ਵੁਤ੍ਤਂ, ਨ ਅਧਿਪ੍ਪੇਤਞ੍ਹੇਤਂ ਇਧ ਸੋਤਸ੍ਸ ਰਹੋ ਨਾਧਿਪ੍ਪੇਤੋਤਿ ਕਤ੍ਵਾਤਿ ਚੇ? ਅਲਂਕਮ੍ਮਨਿਯਟ੍ਠਾਨੇ ਦੁਟ੍ਠੁਲ੍ਲਵਾਚਾਪਿ ਲਬ੍ਭਤਿ, ਨ ਪਨ ਨਾਲਂਕਮ੍ਮਨਿਯਟ੍ਠਾਨੇ ਮੇਥੁਨਨ੍ਤਿ ਦਸ੍ਸਨਤ੍ਥਂ ਵੁਤ੍ਤਨ੍ਤਿ ਵੇਦਿਤਬ੍ਬਨ੍ਤਿ. ਯਥਾ ਏਤਂ, ਤਥਾ ‘‘ਸਾ ਚੇ ਏਵਂ ਵਦੇਯ੍ਯ ‘ਅਯ੍ਯਸ੍ਸ ਮਯਾ ਸੁਤਂ ਮਾਤੁਗਾਮਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਨ੍ਤਸ੍ਸਾ’’’ਤਿ ਏਤਮ੍ਪਿ ਇਧ ਲਬ੍ਭਤਿ, ਨ ਦੁਤਿਯੇ ਨਾਲਂਕਮ੍ਮਨਿਯਟ੍ਠਾਨਤ੍ਤਾਤਿ ਏਕੇ. ਕਙ੍ਖਾਵਿਤਰਣਿਯਂ (ਕਙ੍ਖਾ. ਅਟ੍ਠ. ਦੁਤਿਯਾਨਿਯਤਸਿਕ੍ਖਾਪਦਵਣ੍ਣਨਾ) ਇਧਾਪਿ ਦੁਤਿਯਾਨਿਯਤਾਧਿਕਾਰੇ ਪਾਰਾਜਿਕਾਪਤ੍ਤਿਞ੍ਚ ਪਰਿਹਾਪੇਤ੍ਵਾ ਦੁਟ੍ਠੁਲ੍ਲਵਾਚਾਪਤ੍ਤਿਯਾ ਵੁਤ੍ਤਤ੍ਤਾ ਪਠਮਾਨਿਯਤੇ ਦੁਟ੍ਠੁਲ੍ਲਵਾਚਾਪਤ੍ਤਿ ਨ ਵੁਤ੍ਤਾਤਿ ਚੇ? ‘‘ਸਾ ਚੇ’’ਤਿ ਤਸ੍ਸਾ ਪਾਲ਼ਿਯਾ ਪੋਤ੍ਥਕਾ ਸੋਧੇਤਬ੍ਬਾ. ਗਣ੍ਠਿਪਦੇ ਚ ‘‘ਇਧ ਸਿਕ੍ਖਾਪਦੇ ਮੇਥੁਨਕਾਯਸਂਸਗ੍ਗਰਹੋਨਿਸਜ੍ਜਾਨਮੇਵਾਗਤਤ੍ਤਾ ਚਕ੍ਖੁਸ੍ਸਰਹੋਵ ਪਮਾਣ’’ਨ੍ਤਿ ਲਿਖਿਤਂ, ਦੁਤਿਯਾਨਿਯਤਾਧਿਕਾਰੇ ਚ ‘‘ਅਨਨ੍ਧੋ ਕਾਯਸਂਸਗ੍ਗਂ ਪਸ੍ਸਤਿ, ਅਬਧਿਰੋ ਦੁਟ੍ਠੁਲ੍ਲਂ ਸੁਣਾਤਿ, ਕਾਯਚਿਤ੍ਤਤੋ ਕਾਯਸਂਸਗ੍ਗੋ, ਵਾਚਾਚਿਤ੍ਤਤੋ ਦੁਟ੍ਠੁਲ੍ਲਂ, ਉਭਯੇਹਿ ਉਭਯ’’ਨ੍ਤਿ ਚ ਲਿਖਿਤਂ. ਅਟ੍ਠਕਥਾਯਂ ‘‘ਸਮੁਟ੍ਠਾਨਾਦੀਨਿ ਪਠਮਪਾਰਾਜਿਕਸਦਿਸਾਨੇਵਾ’’ਤਿ ਵੁਤ੍ਤਤ੍ਤਾਪਿ ਦੁਟ੍ਠੁਲ੍ਲਵਾਦੋ ਨ ਸੁਨ੍ਦਰੋ ‘‘ਤਦਹੁਜਾਤਾ’’ਤਿ ਵੁਤ੍ਤਤ੍ਤਾਤਿ.

ਪਠਮਅਨਿਯਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.