੨. ਵੇਦਨਾਤ੍ਤਿਕਵਣ੍ਣਨਾ

੧. ਵੇਦਨਾਰੂਪਨਿਬ੍ਬਾਨਾਨਿ ਪਨ ਤਿਕਮੁਤ੍ਤਕਾਨਿ ਪਟਿਚ੍ਚਾਦਿਨਿਯਮਂ ਪਚ੍ਚਯੁਪ੍ਪਨ੍ਨਵਚਨਞ੍ਚ ਨ ਲਭਨ੍ਤਿ. ਪਟਿਚ੍ਚਵਾਰਾਦੀਸੁ ਪਨ ਛਸੁ ਯਤੋ ਹੇਤੁਪਚ੍ਚਯਾਦਿਤੋ ਤਿਕਧਮ੍ਮਾਨਂ ਉਪ੍ਪਤ੍ਤਿ ਵੁਤ੍ਤਾ, ਤਤ੍ਥ ਯਥਾਨੁਰੂਪਤੋ ਆਰਮ੍ਮਣਾਦਿਪਚ੍ਚਯਭਾਵੇਨ ਲਬ੍ਭਨ੍ਤੀਤਿ ਵੇਦਿਤਬ੍ਬਾਨੀਤਿ.

੧੦. ਸਬ੍ਬਅਰੂਪਧਮ੍ਮਪਰਿਗ੍ਗਾਹਕਾ ਪਨ ਸਹਜਾਤਾਦਯੋ ਪਚ੍ਚਯਾਤਿ ਇਮਿਨਾ ਕੁਸਲਤ੍ਤਿਕੇਪਿ ਪਰਿਹੀਨਂ ਸਹਜਾਤਂ ਰੂਪਾਰੂਪਧਮ੍ਮਪਰਿਗ੍ਗਾਹਕਤ੍ਤਾ ਆਦਿਮ੍ਹਿ ਠਪੇਤ੍ਵਾ ਆਦਿਸਦ੍ਦੇਨ ਸਬ੍ਬਾਰੂਪਧਮ੍ਮਪਰਿਗ੍ਗਾਹਕਵਚਨੇਨ ਚ ਪਚ੍ਚਯੁਪ੍ਪਨ੍ਨਵਸੇਨ ਸਬ੍ਬਅਰੂਪਧਮ੍ਮਪਰਿਗ੍ਗਾਹਕਾਨਂ ਆਰਮ੍ਮਣਾਦੀਨਂ ਪਰਿਹਾਨਿਂ ਦਸ੍ਸੇਤੀਤਿ ਦਟ੍ਠਬ੍ਬਂ. ਤੇਨ ਕੁਸਲਤ੍ਤਿਕਪਰਿਹੀਨਾਨਂ ਸਬ੍ਬਟ੍ਠਾਨਿਕਾਨਂ ਚਤੁਨ੍ਨਂ ਸਬ੍ਬਤਿਕਾਦੀਸੁ ਪਰਿਹਾਨਿ ਦਸ੍ਸਿਤਾ ਹੋਤਿ. ਪਚ੍ਛਾਜਾਤਪਚ੍ਚਯਞ੍ਚ ਵਿਨਾਵ ਉਪ੍ਪਤ੍ਤਿਤੋਤਿ ਏਤੇਨ ਪਨ ਪਚ੍ਛਾਜਾਤਪਚ੍ਚਯਸ੍ਸ ਅਨੁਲੋਮੇ ਪਰਿਹਾਨਿਂ, ਪਚ੍ਚਨੀਯੇ ਚ ਲਾਭਂ ਦਸ੍ਸੇਤਿ. ਸਹਜਾਤਾਦਯੋਤਿ ਵਾ ਸਹਜਾਤਮੂਲਕਾ ਸਹਜਾਤਨਿਬਨ੍ਧਨਾ ਪਟਿਚ੍ਚਾਦਿਂ ਫਰਨ੍ਤੇਹਿ ਸਹਜਾਤਧਮ੍ਮੇਹਿ ਵਿਨਾ ਪਚ੍ਚਯਾ ਅਹੋਨ੍ਤਾਤਿ ਵੁਤ੍ਤਂ ਹੋਤਿ. ਕਸ੍ਮਾ ਪਨ ਸਹਜਾਤਨਿਬਨ੍ਧਨਾ ਸਬ੍ਬਾਰੂਪਧਮ੍ਮਪਰਿਗ੍ਗਾਹਕਾ ਚ ਯੇ, ਤੇਵ ਪਰਿਹਾਯਨ੍ਤਿ, ਨ ਪਨ ਯੋ ਸਹਜਾਤਾਨਿਬਨ੍ਧਨੋ ਸਬ੍ਬਾਰੂਪਧਮ੍ਮਪਰਿਗ੍ਗਾਹਕੋ ਚ ਨ ਹੋਤਿ, ਸੋ ਪਚ੍ਛਾਜਾਤੋਤਿ ਤਤ੍ਥ ਕਾਰਣਂ ਵਦਨ੍ਤੋ ‘‘ਸਹਜਾਤਾਦੀਹਿ ਵਿਨਾ ਅਨੁਪ੍ਪਤ੍ਤਿਤੋ ਪਚ੍ਛਾਜਾਤਪਚ੍ਚਯਞ੍ਚ ਵਿਨਾਵ ਉਪ੍ਪਤ੍ਤਿਤੋ’’ਤਿ ਆਹ. ਤਤ੍ਥ ਸਹਜਾਤਾਦੀਹਿ ਵਿਨਾਤਿ ਸਹਜਾਤਨਿਬਨ੍ਧਨੇਹਿ ਸਬ੍ਬਾਰੂਪਧਮ੍ਮਪਰਿਗ੍ਗਾਹਕੇਹਿ ਚ ਵਿਨਾਤਿ ਅਤ੍ਥੋ. ਅਥ ਵਾ ਸਹਜਾਤਨਿਬਨ੍ਧਨਾਨਮੇਵ ਪਰਿਹਾਨਿ, ਨ ਪਚ੍ਛਾਜਾਤਸ੍ਸ ਸਹਜਾਤਾਨਿਬਨ੍ਧਨਸ੍ਸਾਤਿ ਏਤ੍ਥੇਵ ਕਾਰਣਂ ਵਦਨ੍ਤੋ ‘‘ਸਹਜਾਤਾਦੀਹਿ ਵਿਨਾ ਅਨੁਪ੍ਪਤ੍ਤਿਤੋ ਪਚ੍ਛਾਜਾਤਪਚ੍ਚਯਞ੍ਚ ਵਿਨਾਵ ਉਪ੍ਪਤ੍ਤਿਤੋ’’ਤਿ ਆਹ. ਸਹਜਾਤਨਿਬਨ੍ਧਨਾਪਿ ਪਨ ਸਬ੍ਬਅਰੂਪਧਮ੍ਮਪਰਿਗ੍ਗਾਹਕਾਯੇਵ ਪਰਿਹਾਯਨ੍ਤੀਤਿ ਦਸ੍ਸਿਤਮੇਤਨ੍ਤਿ.

੧੭. ਨਵਿਪਾਕੇਪਿ ਏਸੇਵ ਨਯੋਤਿ ਨਯਦਸ੍ਸਨਮੇਵ ਕਰੋਤਿ, ਨ ਚ ਪਚ੍ਚਯਪਚ੍ਚਯੁਪ੍ਪਨ੍ਨਸਾਮਞ੍ਞਦਸ੍ਸਨਂ. ਸੁਖਾਯ ਹਿ ਅਦੁਕ੍ਖਮਸੁਖਾਯ ਚ ਵੇਦਨਾਯ ਸਮ੍ਪਯੁਤ੍ਤੇ ਧਮ੍ਮੇ ਪਟਿਚ੍ਚ ਤਾਹਿ ਵੇਦਨਾਹਿ ਸਮ੍ਪਯੁਤ੍ਤਾ ਅਹੇਤੁਕਕਿਰਿਯਧਮ੍ਮਾ ਵਿਚਿਕਿਚ੍ਛੁਦ੍ਧਚ੍ਚਸਹਜਾਤਮੋਹੋ ਚਾਤਿ ਅਯਞ੍ਹੇਤ੍ਥ ਨਯੋਤਿ. ਨਵਿਪ੍ਪਯੁਤ੍ਤੇ ਏਕਨ੍ਤਿ ਆਰੁਪ੍ਪੇ ਆਵਜ੍ਜਨਵਸੇਨ ਵੁਤ੍ਤਨ੍ਤਿ ਇਦਂ ਆਵਜ੍ਜਨਾਹੇਤੁਕਮੋਹਾਨਂ ਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ.

੨੫-੩੭. ਅਨੁਲੋਮਪਚ੍ਚਨੀਯੇ ਯਥਾ ਕੁਸਲਤ੍ਤਿਕਂ, ਏਵਂ ਗਣੇਤਬ੍ਬਨ੍ਤਿ ਹੇਤੁਮੂਲਕਾਦੀਨਂ ਨਯਾਨਂ ਏਕਮੂਲਕਦ੍ਵਿਮੂਲਕਾਦਿਵਸੇਨ ਚ ਯੋਜੇਤ੍ਵਾ ਗਹੇਤਬ੍ਬਤਾਸਾਮਞ੍ਞਂ ਸਨ੍ਧਾਯ ਵੁਤ੍ਤਂ, ਨ ਗਣਨਸਾਮਞ੍ਞਂ. ਇਤੋ ਪਰੇਸੁਪਿ ਏਵਰੂਪੇਸੁ ਏਸੇਵ ਨਯੋ. ਅਹੇਤੁਕਸ੍ਸ ਪਨ ਚਿਤ੍ਤੁਪ੍ਪਾਦਸ੍ਸਾਤਿਆਦਿ ਨਹੇਤੁਮੂਲਕਂ ਸਨ੍ਧਾਯ ਵੁਤ੍ਤਂ, ‘‘ਅਹੇਤੁਕਸ੍ਸ ਪਨ ਚਿਤ੍ਤੁਪ੍ਪਾਦਸ੍ਸ ਮੋਹਸ੍ਸ ਚਾ’’ਤਿ ਪਨੇਤ੍ਥ ਵਤ੍ਤਬ੍ਬਂ. ਮੋਹਸ੍ਸ ਚਾਪਿ ਹਿ ਅਹੇਤੁਕਸ੍ਸ ਅਧਿਪਤਿਅਭਾਵਤੋ ਅਧਿਪਤਿਨੋ ਨਹੇਤੁਮੂਲਕੇ ਅਨੁਲੋਮਤੋ ਅਟ੍ਠਾਨਨ੍ਤਿ. ਪਰਿਵਤ੍ਤੇਤ੍ਵਾਪੀਤਿ ਨਹੇਤੁਪਚ੍ਚਯਾ ਨਅਧਿਪਤਿਪਚ੍ਚਯਾ ਆਰਮ੍ਮਣੇ ਤੀਣੀਤਿ ਏਵਂ ਪੁਰਤੋ ਠਿਤਮ੍ਪਿ ਆਰਮ੍ਮਣਾਦਿਂ ਪਚ੍ਛਤੋ ਯੋਜੇਤ੍ਵਾਤਿ ਅਤ੍ਥੋ.

੩੯. ਪਞ੍ਹਾਵਾਰੇ ਦੋਮਨਸ੍ਸਂ ਉਪ੍ਪਜ੍ਜਤੀਤਿ ਏਤੇਨ ਤਂਸਮ੍ਪਯੁਤ੍ਤੇ ਦਸ੍ਸੇਤਿ. ਉਪਨਿਸ੍ਸਯਵਿਭਙ੍ਗੇ ‘‘ਸਦ੍ਧਾਪਞ੍ਚਕੇਸੁ ਮਾਨਂ ਜਪ੍ਪੇਤਿ ਦਿਟ੍ਠਿਂ ਗਣ੍ਹਾਤੀਤਿ ਕਤ੍ਤਬ੍ਬਂ, ਅਵਸੇਸੇਸੁ ਨ ਕਤ੍ਤਬ੍ਬ’’ਨ੍ਤਿ ਇਦਂ ਪਾਠਗਤਿਦਸ੍ਸਨਤ੍ਥਂ ਵੁਤ੍ਤਂ, ਨ ਪਨ ਰਾਗਾਦੀਹਿ ਮਾਨਦਿਟ੍ਠੀਨਂ ਅਨੁਪ੍ਪਤ੍ਤਿਤੋ. ਕੁਸਲਤ੍ਤਿਕੇਪਿ ਹਿ ਰਾਗਾਦੀਸੁ ‘‘ਮਾਨਂ ਜਪ੍ਪੇਤਿ ਦਿਟ੍ਠਿਂ ਗਣ੍ਹਾਤੀ’’ਤਿ ਪਾਲ਼ਿ ਨ ਵੁਤ੍ਤਾ, ‘‘ਰਾਗੋ ਦੋਸੋ ਮੋਹੋ ਮਾਨੋ ਦਿਟ੍ਠਿ ਪਤ੍ਥਨਾ ਰਾਗਸ੍ਸ ਦੋਸਸ੍ਸ ਮੋਹਸ੍ਸ ਮਾਨਸ੍ਸ ਦਿਟ੍ਠਿਯਾ ਪਤ੍ਥਨਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੨.੫੩) ਪਨ ਰਾਗਾਦੀਨਂ ਮਾਨਦਿਟ੍ਠਿਉਪਨਿਸ੍ਸਯਭਾਵੋ ਵੁਤ੍ਤੋ. ਤਥਾ ਇਧਾਪਿ ਦਟ੍ਠਬ੍ਬਨ੍ਤਿ. ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੇਨ ਪਨ ਚਿਤ੍ਤੇਨ ਗਾਮਘਾਤਂ ਨਿਗਮਘਾਤਂ ਕਰੋਤੀ’’ਤਿ ਸੋਮਨਸ੍ਸਸਮ੍ਪਯੁਤ੍ਤਲੋਭਸਹਗਤਚਿਤ੍ਤੇਨ ਗਾਮਨਿਗਮਵਿਲੁਪ੍ਪਨਂ ਸਨ੍ਧਾਯ ਵੁਤ੍ਤਂ.

੬੨. ਸੁਦ੍ਧਾਨਨ੍ਤਿ ਪਚ੍ਚਯਪਚ੍ਚਯੁਪ੍ਪਨ੍ਨਪਦਾਨਂ ਅਨਞ੍ਞਤ੍ਤਂ ਦਸ੍ਸੇਤਿ. ਪੁਰੇਜਾਤਪਚ੍ਛਾਜਾਤਾ ਪਨੇਤ੍ਥ ਨ ਵਿਜ੍ਜਨ੍ਤਿ.ਨ ਹਿ ਪੁਰੇਜਾਤਾ ਪਚ੍ਛਾਜਾਤਾ ਵਾ ਅਰੂਪਧਮ੍ਮਾ ਅਰੂਪਧਮ੍ਮਾਨਂ ਪਚ੍ਚਯਾ ਹੋਨ੍ਤੀਤਿ ਏਤ੍ਥ ਪੁਰੇਜਾਤਾਤਿ ਇਮਸ੍ਮਿਂ ਤਿਕੇ ਵੁਚ੍ਚਮਾਨਾ ਅਧਿਕਾਰਪ੍ਪਤ੍ਤਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾਦਯੋਵ ਅਰੂਪਧਮ੍ਮਾਨਂ ਪੁਰੇਜਾਤਾ ਹੁਤ੍ਵਾ ਪਚ੍ਚਯਾ ਨ ਹੋਨ੍ਤਿ ਪੁਰੇਜਾਤਤ੍ਤਾਭਾਵਤੋਤਿ ਅਧਿਪ੍ਪਾਯੋ, ਤਥਾ ਪਚ੍ਛਾਜਾਤਤ੍ਤਾਭਾਵਤੋ ਪਚ੍ਛਾਜਾਤਾ ਵਾ ਹੁਤ੍ਵਾ ਨ ਹੋਨ੍ਤੀਤਿ.

੬੩-੬੪. ਸਾਧਿਪਤਿਅਮੋਹਵਸੇਨਾਤਿ ਅਧਿਪਤਿਭਾਵਸਹਿਤਾਮੋਹਵਸੇਨਾਤਿ ਅਤ੍ਥੋ.

੮੩-੮੭. ਨਹੇਤੁਪਚ੍ਚਯਾ…ਪੇ… ਨਉਪਨਿਸ੍ਸਯੇ ਅਟ੍ਠਾਤਿ ਨਹੇਤੁਪਚ੍ਚਯਾ ਨਾਰਮ੍ਮਣਪਚ੍ਚਯਾ ਨਉਪਨਿਸ੍ਸਯੇ ਅਟ੍ਠਾਤਿ ਏਵਂ ਸਙ੍ਖਿਪਿਤ੍ਵਾ ਉਦ੍ਧਰਤਿ. ਨਾਨਾਕ੍ਖਣਿਕਕਮ੍ਮਪਚ੍ਚਯਵਸੇਨ ਵੇਦਿਤਬ੍ਬਾਤਿ ਇਦਂ ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤੋ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਸ੍ਸਾ’’ਤਿ ਏਤਂ ਵਜ੍ਜੇਤ੍ਵਾ ਅਵਸੇਸੇਸੁ ਅਟ੍ਠਸੁਪਿ ਨਾਨਾਕ੍ਖਣਿਕਕਮ੍ਮਪਚ੍ਚਯਸਮ੍ਭਵਂ ਸਨ੍ਧਾਯ ਵੁਤ੍ਤਂ. ਨ ਹਿ ਸਹਜਾਤਪਚ੍ਚਯੋ ਅਟ੍ਠਸੁਪਿ ਲਬ੍ਭਤਿ, ਅਥ ਖੋ ਤੀਸ੍ਵੇਵਾਤਿ.

ਵੇਦਨਾਤ੍ਤਿਕਵਣ੍ਣਨਾ ਨਿਟ੍ਠਿਤਾ.