੭. ਯਵਪਾਲਕਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਯਵਪਾਲਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਾਜਗਹੇ ਅਞ੍ਞਤਰੋ ਦੁਗ੍ਗਤਦਾਰਕੋ ਯਵਖੇਤ੍ਤਂ ਰਕ੍ਖਤਿ. ਸੋ ਏਕਦਿਵਸਂ ਪਾਤਰਾਸਤ੍ਥਾਯ ਕੁਮ੍ਮਾਸਂ ਲਭਿਤ੍ਵਾ ‘‘ਖੇਤ੍ਤਂ ਗਨ੍ਤ੍ਵਾ ਭੁਞ੍ਜਿਸ੍ਸਾਮੀ’’ਤਿ ਤਂ ਕੁਮ੍ਮਾਸਂ ਗਹੇਤ੍ਵਾ ਯਵਖੇਤ੍ਤਂ ਗਨ੍ਤ੍ਵਾ ਰੁਕ੍ਖਮੂਲੇ ਨਿਸੀਦਿ. ਤਸ੍ਮਿਂ ਖਣੇ ਅਞ੍ਞਤਰੋ ਖੀਣਾਸਵਤ੍ਥੇਰੋ ਮਗ੍ਗਪ੍ਪਟਿਪਨ੍ਨੋ ਉਪਕਟ੍ਠੇ ਕਾਲੇ ਤਂ ਠਾਨਂ ਪਤ੍ਵਾ ਯਵਪਾਲਕੇਨ ਨਿਸਿਨ੍ਨਂ ਰੁਕ੍ਖਮੂਲਂ ਉਪਸਙ੍ਕਮਿ. ਯਵਪਾਲਕੋ ਵੇਲਂ ਓਲੋਕੇਤ੍ਵਾ ‘‘ਕਚ੍ਚਿ, ਭਨ੍ਤੇ, ਆਹਾਰੋ ਲਦ੍ਧੋ’’ਤਿ ਆਹ. ਥੇਰੋ ਤੁਣ੍ਹੀ ਅਹੋਸਿ. ਸੋ ਅਲਦ੍ਧਭਾਵਂ ਞਤ੍ਵਾ ‘‘ਭਨ੍ਤੇ, ਉਪਕਟ੍ਠਾ ਵੇਲਾ, ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਤੁਂ ਨ ਸਕ੍ਕਾ, ਮਯ੍ਹਂ ਅਨੁਕਮ੍ਪਾਯ ਇਮਂ ਕੁਮ੍ਮਾਸਂ ਪਰਿਭੁਞ੍ਜਥਾ’’ਤਿ ਵਤ੍ਵਾ ਥੇਰਸ੍ਸ ਤਂ ਕੁਮ੍ਮਾਸਂ ਅਦਾਸਿ. ਥੇਰੋ ਤਂ ਅਨੁਕਮ੍ਪਨ੍ਤੋ ਤਸ੍ਸ ਪਸ੍ਸਨ੍ਤਸ੍ਸੇਵ ਤਂ ਪਰਿਭੁਞ੍ਜਿਤ੍ਵਾ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋਪਿ ਦਾਰਕੋ ‘‘ਸੁਦਿਨ੍ਨਂ ਵਤ ਮਯਾ ਈਦਿਸਸ੍ਸ ਕੁਮ੍ਮਾਸਦਾਨਂ ਦਦਨ੍ਤੇਨਾ’’ਤਿ ਚਿਤ੍ਤਂ ਪਸਾਦੇਤ੍ਵਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਵੁਤ੍ਤਨਯੇਨੇਵ ਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੧੦੮੭. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੧੦੮੯. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੦੯੦. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਅਹੋਸਿਂ ਯਵਪਾਲਕੋ;

ਅਦ੍ਦਸਂ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ.

੧੦੯੧. ‘‘ਤਸ੍ਸ ਅਦਾਸਹਂ ਭਾਗਂ, ਪਸਨ੍ਨੋ ਸੇਹਿ ਪਾਣਿਭਿ;

ਕੁਮ੍ਮਾਸਪਿਣ੍ਡਂ ਦਤ੍ਵਾਨ, ਮੋਦਾਮਿ ਨਨ੍ਦਨੇ ਵਨੇ.

੧੦੯੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਤਤ੍ਥ ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ.

ਯਵਪਾਲਕਵਿਮਾਨਵਣ੍ਣਨਾ ਨਿਟ੍ਠਿਤਾ.