੮. ਪਠਮਕੁਣ੍ਡਲੀਵਿਮਾਨਵਣ੍ਣਨਾ

ਅਲਙ੍ਕਤੋ ਮਲ੍ਯਧਰੋ ਸੁਵਤ੍ਥੋਤਿ ਕੁਣ੍ਡਲੀਵਿਮਾਨਂ. ਤਸ੍ਸ ਕਾ ਉਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਦ੍ਵੇ ਅਗ੍ਗਸਾਵਕਾ ਸਪਰਿਵਾਰਾ ਕਾਸੀਸੁ ਚਾਰਿਕਂ ਚਰਨ੍ਤਾ ਸੂਰਿਯਤ੍ਥਙ੍ਗਮਨਵੇਲਾਯਂ ਅਞ੍ਞਤਰਂ ਵਿਹਾਰਂ ਪਾਪੁਣਿਂਸੁ. ਤਂ ਪਵਤ੍ਤਿਂ ਸੁਤ੍ਵਾ ਤਸ੍ਸ ਵਿਹਾਰਸ੍ਸ ਗੋਚਰਗਾਮੇ ਅਞ੍ਞਤਰੋ ਉਪਾਸਕੋ ਥੇਰੇ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪਾਦਧੋਵਨਂ ਪਾਦਬ੍ਭਞ੍ਜਨਤੇਲਂ ਮਞ੍ਚਪੀਠਂ ਪਚ੍ਚਤ੍ਥਰਣਂ ਪਦੀਪਿਯਞ੍ਚ ਉਪਨੇਤ੍ਵਾ ਸ੍ਵਾਤਨਾਯ ਚ ਨਿਮਨ੍ਤੇਤ੍ਵਾ ਦੁਤਿਯਦਿਵਸੇ ਮਹਾਦਾਨਂ ਪਵਤ੍ਤੇਸਿ, ਥੇਰਾ ਤਸ੍ਸ ਅਨੁਮੋਦਨਂ ਵਤ੍ਵਾ ਪਕ੍ਕਮਿਂਸੁ. ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੧੦੯੪. ‘‘ਅਲਙ੍ਕਤੋ ਮਲ੍ਯਧਰੋ ਸੁਵਤ੍ਥੋ, ਸੁਕੁਣ੍ਡਲੀ ਕਪ੍ਪਿਤਕੇਸਮਸ੍ਸੁ;

ਆਮੁਤ੍ਤਹਤ੍ਥਾਭਰਣੋ ਯਸਸ੍ਸੀ, ਦਿਬ੍ਬੇ ਵਿਮਾਨਮ੍ਹਿ ਯਥਾਪਿ ਚਨ੍ਦਿਮਾ.

੧੦੯੫. ‘‘ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ, ਅਟ੍ਠਟ੍ਠਕਾ ਸਿਕ੍ਖਿਤਾ ਸਾਧੁਰੂਪਾ;

ਦਿਬ੍ਬਾ ਚ ਕਞ੍ਞਾ ਤਿਦਸਚਰਾ ਉਲ਼ਾਰਾ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.

੧੦੯੬. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੧੦੯੭. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੦੯੮. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਿਸ੍ਵਾਨ ਸਮਣੇ ਸੀਲਵਨ੍ਤੇ;

ਸਮ੍ਪਨ੍ਨਵਿਜ੍ਜਾਚਰਣੇ ਯਸਸ੍ਸੀ, ਬਹੁਸ੍ਸੁਤੇ ਤਣ੍ਹਕ੍ਖਯੂਪਪਨ੍ਨੇ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੧੦੯੯. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੦੯੪. ਤਤ੍ਥ ਸੁਕੁਣ੍ਡਲੀਤਿ ਸੁਨ੍ਦਰੇਹਿ ਕੁਣ੍ਡਲੇਹਿ ਅਲਙ੍ਕਤਕਣ੍ਣੋ. ‘‘ਸਕੁਣ੍ਡਲੀ’’ਤਿਪਿ ਪਾਠੋ, ਸਦਿਸਂ ਕੁਣ੍ਡਲਂ ਸਕੁਣ੍ਡਲਂ, ਤਂ ਅਸ੍ਸ ਅਤ੍ਥੀਤਿ ਸਕੁਣ੍ਡਲੀ, ਯੁਤ੍ਤਕੁਣ੍ਡਲੀ ਅਞ੍ਞਮਞ੍ਞਞ੍ਚ ਤੁਯ੍ਹਞ੍ਚ ਅਨੁਚ੍ਛਵਿਕਕੁਣ੍ਡਲੀਤਿ ਅਤ੍ਥੋ. ਕਪ੍ਪਿਤਕੇਸਮਸ੍ਸੂਤਿ ਸਮ੍ਮਾਕਪ੍ਪਿਤਕੇਸਮਸ੍ਸੁ. ਆਮੁਤ੍ਤਹਤ੍ਥਾਭਰਣੋਤਿ ਪਟਿਮੁਕ੍ਕਅਙ੍ਗੁਲਿਯਾਦਿਹਤ੍ਥਾਭਰਣੋ.

੧੦੯੮. ਤਣ੍ਹਕ੍ਖਯੂਪਪਨ੍ਨੇਤਿ ਤਣ੍ਹਕ੍ਖਯਂ ਅਰਹਤ੍ਤਂ, ਨਿਬ੍ਬਾਨਮੇਵ ਵਾ ਉਪਗਤੇ, ਅਧਿਗਤਵਨ੍ਤੇਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਪਠਮਕੁਣ੍ਡਲੀਵਿਮਾਨਵਣ੍ਣਨਾ ਨਿਟ੍ਠਿਤਾ.