੬. ਪਾਯਾਸਿਵਗ੍ਗੋ
੧. ਪਠਮਅਗਾਰਿਯਵਿਮਾਨਵਣ੍ਣਨਾ
ਯਥਾ ਵਨਂ ਚਿਤ੍ਤਲਤਂ ਪਭਾਸਤੀਤਿ ਅਗਾਰਿਯਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਾਜਗਹੇ ਏਕਂ ਕੁਲਂ ਉਭਤੋਪਸਨ੍ਨਂ ਹੋਤਿ ਸੀਲਾਚਾਰਸਮ੍ਪਨ੍ਨਂ ਓਪਾਨਭੂਤਂ ਭਿਕ੍ਖੂਨਂ ਭਿਕ੍ਖੁਨੀਨਂ. ਤੇ ਦ੍ਵੇ ਜਯਮ੍ਪਤਿਕਾ ਰਤਨਤ੍ਤਯਂ ਉਦ੍ਦਿਸ੍ਸ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤਾ ਤਾਵਤਿਂਸੇਸੁ ਨਿਬ੍ਬਤ੍ਤਿਂਸੁ, ਤੇਸਂ ਦ੍ਵਾਦਸਯੋਜਨਿਕਂ ਕਨਕਵਿਮਾਨਂ ਨਿਬ੍ਬਤ੍ਤਿ. ਤੇ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋਤਿਆਦਿ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
੧੦੪੮. ‘‘ਯਥਾ ਵਨਂ ਚਿਤ੍ਤਲਤਂ ਪਭਾਸਤਿ, ਉਯ੍ਯਾਨਸੇਟ੍ਠਂ ਤਿਦਸਾਨਮੁਤ੍ਤਮਂ;
ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.
੧੦੪੯. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;
ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –
ਥੇਰੋ ਪੁਚ੍ਛਿ.
੧੦੫੦. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;
ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੦੫੧. ‘‘ਅਹਞ੍ਚ ਭਰਿਯਾ ਚ ਮਨੁਸ੍ਸਲੋਕੇ, ਓਪਾਨਭੂਤਾ ਘਰਮਾਵਸਿਮ੍ਹ;
ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਮ੍ਹ.
੧੦੫੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –
ਅਤ੍ਤਨੋ ਸਮ੍ਪਤ੍ਤਿਂ ਬ੍ਯਾਕਾਸਿ. ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ.
ਪਠਮਅਗਾਰਿਯਵਿਮਾਨਵਣ੍ਣਨਾ ਨਿਟ੍ਠਿਤਾ.
੨. ਦੁਤਿਯਅਗਾਰਿਯਵਿਮਾਨਵਣ੍ਣਨਾ
ਯਥਾ ਵਨਂ ਚਿਤ੍ਤਲਤਨ੍ਤਿ ਦੁਤਿਯਅਗਾਰਿਯਵਿਮਾਨਂ. ਏਤ੍ਥਾਪਿ ਅਟ੍ਠੁਪ੍ਪਤ੍ਤਿ ਅਨਨ੍ਤਰਸਦਿਸਾਵ.
੧੦੫੪. ‘‘ਯਥਾ ਵਨਂ ਚਿਤ੍ਤਲਤਂ ਪਭਾਸਤਿ, ਉਯ੍ਯਾਨਸੇਟ੍ਠਂ ਤਿਦਸਾਨਮੁਤ੍ਤਮਂ;
ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.
੧੦੫੫. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ,
ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;
ਕੇਨਾਸਿ ਏਵਂ ਜਲਿਤਾਨੁਭਾਵੋ,
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;
੧੦੫੬. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੦੫੭. ‘‘ਅਹਞ੍ਚ ਭਰਿਯਾ ਚ ਮਨੁਸ੍ਸਲੋਕੇ, ਓਪਾਨਭੂਤਾ ਘਰਮਾਵਸਿਮ੍ਹ;
ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਮ੍ਹ.
੧੦੫੮. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –
ਅਤ੍ਤਨੋ ਸਮ੍ਪਤ੍ਤਿਂ ਬ੍ਯਾਕਾਸਿ. ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ.
ਦੁਤਿਯਅਗਾਰਿਯਵਿਮਾਨਵਣ੍ਣਨਾ ਨਿਟ੍ਠਿਤਾ.
੩. ਫਲਦਾਯਕਵਿਮਾਨਵਣ੍ਣਨਾ
ਉਚ੍ਚਮਿਦਂ ਮਣਿਥੂਣਨ੍ਤਿ ਫਲਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਞ੍ਞੋ ਬਿਮ੍ਬਿਸਾਰਸ੍ਸ ਅਕਾਲੇ ਅਮ੍ਬਫਲਾਨਿ ਪਰਿਭੁਞ੍ਜਿਤੁਂ ਇਚ੍ਛਾ ਉਪ੍ਪਜ੍ਜਿ. ਸੋ ਆਰਾਮਪਾਲਂ ਆਹ – ‘‘ਮਯ੍ਹਂ ਖੋ, ਭਣੇ, ਅਮ੍ਬਫਲੇਸੁ ਇਚ੍ਛਾ ਉਪ੍ਪਨ੍ਨਾ, ਤਸ੍ਮਾ ਅਮ੍ਬਾਨਿ ਮੇ ਆਨੇਤ੍ਵਾ ਦੇਹੀ’’ਤਿ. ‘‘ਦੇਵ, ਨਤ੍ਥਿ ਅਮ੍ਬੇਸੁ ਅਮ੍ਬਫਲਂ, ਅਪਿਚਾਹਂ ਤਥਾ ਕਰੋਮਿ, ਸਚੇ ਦੇਵੋ ਕਿਞ੍ਚਿ ਕਾਲਂ ਆਗਮੇਤਿ, ਯਥਾ ਅਮ੍ਬਾ ਨ ਚਿਰਸ੍ਸੇਵ ਫਲਂ ਗਣ੍ਹਨ੍ਤੀ’’ਤਿ. ‘‘ਸਾਧੁ, ਭਣੇ, ਤਥਾ ਕਰੋਹੀ’’ਤਿ. ਆਰਾਮਪਾਲੋ ਆਰਾਮਂ ਗਨ੍ਤ੍ਵਾ ਅਮ੍ਬਰੁਕ੍ਖਮੂਲੇਸੁ ਪਂਸੁਂ ਅਪਨੇਤ੍ਵਾ ਤਾਦਿਸਂ ਪਂਸੁਂ ਆਕਿਰਿ, ਤਾਦਿਸਞ੍ਚ ਉਦਕਂ ਆਸਿਞ੍ਚਿ, ਯਥਾ ਨ ਚਿਰਸ੍ਸੇਵ ਅਮ੍ਬਰੁਕ੍ਖਾ ਸਚ੍ਛਿਨ੍ਨਪਤ੍ਤਾ ਅਹੇਸੁਂ. ਅਥ ਨਂ ਪਂਸੁਂ ਅਪਨੇਤ੍ਵਾ ਫਾਰੁਸਕਕਸਟਮਿਸ੍ਸਕਂ ਪਾਕਤਿਕਂ ਪਂਸੁਂ ਆਕਿਰਿਤ੍ਵਾ ਸਾਧੁਕਂ ਉਦਕਂ ਅਦਾਸਿ. ਤਦਾ ਅਮ੍ਬਰੁਕ੍ਖਾ ਨ ਚਿਰੇਨੇਵ ਕੋਰਕਿਤਾ ਪਲ੍ਲਵਿਤਾ ਕੁਟਮਲਕਜਾਤਾ ਹੁਤ੍ਵਾ ਪੁਪ੍ਫਿਂਸੁ, ਅਥ ਸਲਾਟੁਕਜਾਤਾ ਹੁਤ੍ਵਾ ਫਲਾਨਿ ਗਣ੍ਹਿਂਸੁ. ਤਤ੍ਥੇਕਸ੍ਮਿਂ ਅਮ੍ਬਰੁਕ੍ਖੇ ਪਠਮਤਰਂ ਚਤ੍ਤਾਰਿ ਫਲਾਨਿ ਮਨੋਸਿਲਾਚੁਣ੍ਣਪਿਞ੍ਜਰਵਣ੍ਣਾਨਿ ਸਮ੍ਪਨ੍ਨਗਨ੍ਧਰਸਾਨਿ ਪਰਿਣਤਾਨਿ ਅਹੇਸੁਂ.
ਸੋ ਤਾਨਿ ਗਹੇਤ੍ਵਾ ‘‘ਰਞ੍ਞੋ ਦਸ੍ਸਾਮੀ’’ਤਿ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਪਿਣ੍ਡਾਯ ਚਰਮਾਨਂ ਦਿਸ੍ਵਾ ਚਿਨ੍ਤੇਸਿ ‘‘ਇਮਾਨਿ ਅਮ੍ਬਾਨਿ ਅਗ੍ਗਫਲਭੂਤਾਨਿ ਇਮਸ੍ਸ ਅਯ੍ਯਸ੍ਸ ਦਸ੍ਸਾਮਿ, ਕਾਮਂ ਮਂ ਰਾਜਾ ਹਨਤੁ ਵਾ ਪਬ੍ਬਾਜੇਤੁ ਵਾ, ਰਞ੍ਞੋ ਹਿ ਦਿਨ੍ਨੇ ਦਿਟ੍ਠਧਮ੍ਮੇ ਪੂਜਾਮਤ੍ਤਂ ਅਪ੍ਪਮਤ੍ਤਕਂ ਫਲਂ, ਅਯ੍ਯਸ੍ਸ ਦਿਨ੍ਨੇ ਪਨ ਦਿਟ੍ਠਧਮ੍ਮਿਕਮ੍ਪਿ ਸਮ੍ਪਰਾਯਿਕਮ੍ਪਿ ਅਪਰਿਮਾਣਂ ਫਲਂ ਭਵਿਸ੍ਸਤੀ’’ਤਿ. ਏਵਂ ਪਨ ਚਿਨ੍ਤੇਤ੍ਵਾ ਤਾਨਿ ਫਲਾਨਿ ਥੇਰਸ੍ਸ ਦਤ੍ਵਾ ਰਾਜਾਨਂ ਉਪਸਙ੍ਕਮਿਤ੍ਵਾ ਰਞ੍ਞੋ ਤਮਤ੍ਥਂ ਆਰੋਚੇਸਿ. ਤਂ ਸੁਤ੍ਵਾ ਰਾਜਾ ਰਾਜਪੁਰਿਸੇ ਆਣਾਪੇਸਿ ‘‘ਵੀਮਂਸਥ ਤਾਵ, ਭਣੇ, ਯਥਾਯਂ ਆਹਾ’’ਤਿ. ਥੇਰੋ ਪਨ ਤਾਨਿ ਫਲਾਨਿ ਭਗਵਤੋ ਉਪਨਾਮੇਸਿ. ਭਗਵਾ ਤੇਸੁ ਏਕਂ ਸਾਰਿਪੁਤ੍ਤਤ੍ਥੇਰਸ੍ਸ, ਏਕਂ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ, ਏਕਂ ਮਹਾਕਸ੍ਸਪਤ੍ਥੇਰਸ੍ਸ ਦਤ੍ਵਾ ਏਕਂ ਅਤ੍ਤਨਾ ਪਰਿਭੁਞ੍ਜਿ. ਪੁਰਿਸਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ.
ਰਾਜਾ ਤਂ ਸੁਤ੍ਵਾ ‘‘ਧੀਰੋ ਵਤਾਯਂ ਪੁਰਿਸੋ, ਯੋ ਅਤ੍ਤਨੋ ਜੀਵਿਤਮ੍ਪਿ ਪਰਿਚ੍ਚਜਿਤ੍ਵਾ ਪੁਞ੍ਞਪਸੁਤੋ ਅਹੋਸਿ, ਅਤ੍ਤਨੋ ਪਰਿਸ੍ਸਮਞ੍ਚ ਠਾਨਗਤਮੇਵ ਅਕਾਸੀ’’ਤਿ ਤੁਟ੍ਠਚਿਤ੍ਤੋ ਤਸ੍ਸ ਏਕਂ ਗਾਮਵਰਂ ਵਤ੍ਥਾਲਙ੍ਕਾਰਾਦੀਨਿ ਚ ਦਤ੍ਵਾ ‘‘ਯਂ ਤਯਾ ਭਣੇ ਅਮ੍ਬਫਲਦਾਨੇਨ ਪੁਞ੍ਞਂ ਪਸੁਤਂ, ਤਤੋ ਮੇ ਪਤ੍ਤਿਂ ਦੇਹੀ’’ਤਿ ਆਹ. ਸੋ ‘‘ਦੇਮਿ, ਦੇਵ, ਯਥਾਸੁਖਂ ਪਤ੍ਤਿਂ ਗਣ੍ਹਾਹੀ’’ਤਿ ਅਵੋਚ. ਆਰਾਮਪਾਲੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ, ਤਸ੍ਸ ਸੋਲ਼ਸਯੋਜਨਿਕਂ ਕਨਕਵਿਮਾਨਂ ਨਿਬ੍ਬਤ੍ਤਿ ਸਤ੍ਤਸਤਕੂਟਾਗਾਰਪਟਿਮਣ੍ਡਿਤਂ. ਤਂ ਦਿਸ੍ਵਾ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪੁਚ੍ਛਿ –
੧੦੬੦. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਸੋਲ਼ਸ ਯੋਜਨਾਨਿ;
ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.
੧੦੬੧. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;
ਅਟ੍ਠਟ੍ਠਕਾ ਸਿਕ੍ਖਿਤਾ ਸਾਧੁਰੂਪਾ, ਦਿਬ੍ਬਾ ਚ ਕਞ੍ਞਾ ਤਿਦਸਚਰਾ ਉਲ਼ਾਰਾ;
ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.
੧੦੬੨. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.
੧੦੬੩. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੦੬੪. ‘‘ਫਲਦਾਯੀ ਫਲਂ ਵਿਪੁਲਂ ਲਭਤਿ, ਦਦਮੁਜੁਗਤੇਸੁ ਪਸਨ੍ਨਮਾਨਸੋ;
ਸੋ ਹਿ ਪਮੋਦਤਿ ਸਗ੍ਗਗਤੋ ਤਿਦਿਵੇ, ਅਨੁਭੋਤਿ ਚ ਪੁਞ੍ਞਫਲਂ ਵਿਪੁਲਂ.
੧੦੬੫. ‘‘ਤਵੇਵਾਹਂ ਮਹਾਮੁਨਿ, ਅਦਾਸਿਂ ਚਤੁਰੋ ਫਲੇ.
੧੦੬੬. ‘‘ਤਸ੍ਮਾ ਹਿ ਫਲਂ ਅਲਮੇਵ ਦਾਤੁਂ, ਨਿਚ੍ਚਂ ਮਨੁਸ੍ਸੇਨ ਸੁਖਤ੍ਥਿਕੇਨ;
ਦਿਬ੍ਬਾਨਿ ਵਾ ਪਤ੍ਥਯਤਾ ਸੁਖਾਨਿ, ਮਨੁਸ੍ਸਸੋਭਗ੍ਗਤਮਿਚ੍ਛਤਾ ਵਾ.
੧੦੬੭. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. – ਸੋਪਿਸ੍ਸ ਬ੍ਯਾਕਾਸਿ;
੧੦੬੧. ਤਤ੍ਥ ਅਟ੍ਠਟ੍ਠਕਾਤਿ ਏਕੇਕਸ੍ਮਿਂ ਕੂਟਾਗਾਰੇ ਅਟ੍ਠਟ੍ਠਕਾ ਚਤੁਸਟ੍ਠਿਪਰਿਮਾਣਾ. ਸਾਧੁਰੂਪਾਤਿ ਰੂਪਸਮ੍ਪਤ੍ਤਿਯਾ ਚ ਸੀਲਾਚਾਰਸਮ੍ਪਤ੍ਤਿਯਾ ਚ ਸਿਕ੍ਖਾਸਮ੍ਪਤ੍ਤਿਯਾ ਚ ਸੁਨ੍ਦਰਸਭਾਵਾ. ਦਿਬ੍ਬਾ ਚ ਕਞ੍ਞਾਤਿ ਦੇਵਚ੍ਛਰਾਯੋ. ਤਿਦਸਚਰਾਤਿ ਤਿਦਸੇਸੁ ਸੁਖਾਚਾਰਾ ਸੁਖਵਿਹਾਰਿਨਿਯੋ. ਉਲ਼ਾਰਾਤਿ ਉਲ਼ਾਰਵਿਭਵਾ.
੧੦੬੪. ਫਲਦਾਯੀਤਿ ਅਤ੍ਤਨਾ ਅਮ੍ਬਫਲਸ੍ਸ ਦਿਨ੍ਨਤ੍ਤਾ ਅਤ੍ਤਾਨਂ ਸਨ੍ਧਾਯ ਵਦਤਿ. ਫਲਨ੍ਤਿ ਪੁਞ੍ਞਫਲਂ. ਵਿਪੁਲਨ੍ਤਿ ਮਹਨ੍ਤਂ ਲਭਤਿ ਮਨੁਸ੍ਸਲੋਕੇ ਪਤਿਟ੍ਠਿਤੋਤਿ ਅਧਿਪ੍ਪਾਯੋ. ਦਦਨ੍ਤਿ ਦਦਨ੍ਤੋ ਦਾਨਹੇਤੁ. ਉਜੁਗਤੇਸੂਤਿ ਉਜੁਪਟਿਪਨ੍ਨੇਸੁ. ਸਗ੍ਗਗਤੋਤਿ ਉਪ੍ਪਜ੍ਜਨਵਸੇਨ ਸਗ੍ਗਂ ਗਤੋ, ਤਤ੍ਥਾਪਿ ਤਿਦਿਵੇ ਤਾਵਤਿਂਸਭਵਨੇ ਅਨੁਭੋਤਿ ਚ ਪੁਞ੍ਞਫਲਂ ਵਿਪੁਲਂ ਯਥਾਹਂ, ਏਵਂ ਅਞ੍ਞੋਪੀਤਿ ਅਤ੍ਥੋ.
੧੦੬੬. ਤਸ੍ਮਾਤਿ ਯਸ੍ਮਾ ਚਤੁਨ੍ਨਂ ਫਲਾਨਂ ਦਾਨਮਤ੍ਤੇਨ ਈਦਿਸੀ ਸਮ੍ਪਤ੍ਤਿ ਅਧਿਗਤਾ, ਤਸ੍ਮਾ. ਅਲਮੇਵ ਯੁਤ੍ਤਮੇਵ. ਨਿਚ੍ਚਨ੍ਤਿ ਸਬ੍ਬਕਾਲਂ. ਦਿਬ੍ਬਾਨੀਤਿ ਦੇਵਲੋਕਪਰਿਯਾਪਨ੍ਨਾਨਿ. ਮਨੁਸ੍ਸਸੋਭਗ੍ਗਤਨ੍ਤਿ ਮਨੁਸ੍ਸੇਸੁ ਸੁਭਗਭਾਵਂ. ਸੇਸਂ ਵੁਤ੍ਤਨਯਮੇਵ.
ਫਲਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.
੪. ਪਠਮਉਪਸ੍ਸਯਦਾਯਕਵਿਮਾਨਵਣ੍ਣਨਾ
ਚਨ੍ਦੋ ਯਥਾ ਵਿਗਤਵਲਾਹਕੇ ਨਭੇਤਿ ਉਪਸ੍ਸਯਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਾਮਕਾਵਾਸੇ ਵਸ੍ਸਂ ਵਸਿਤ੍ਵਾ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਭਗਵਨ੍ਤਂ ਵਨ੍ਦਿਤੁਂ ਰਾਜਗਹਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਸਾਯਂ ਅਞ੍ਞਤਰਂ ਗਾਮਂ ਪਵਿਸਿਤ੍ਵਾ ਵਸਨਟ੍ਠਾਨਂ ਪਰਿਯੇਸਨ੍ਤੋ ਅਞ੍ਞਤਰਂ ਉਪਾਸਕਂ ਦਿਸ੍ਵਾ ਪੁਚ੍ਛਿ – ‘‘ਉਪਾਸਕ, ਇਮਸ੍ਮਿਂ ਗਾਮੇ ਅਤ੍ਥਿ ਕਿਞ੍ਚਿ ਪਬ੍ਬਜਿਤਾਨਂ ਵਸਨਯੋਗ੍ਗਟ੍ਠਾਨ’’ਨ੍ਤਿ. ਉਪਾਸਕੋ ਪਸਨ੍ਨਚਿਤ੍ਤੋ ਗੇਹਂ ਗਨ੍ਤ੍ਵਾ ਭਰਿਯਾਯ ਸਦ੍ਧਿਂ ਮਨ੍ਤੇਤ੍ਵਾ ਥੇਰਸ੍ਸ ਵਸਨਯੋਗ੍ਗਂ ਠਾਨਂ ਪਰਿਚ੍ਛਿਨ੍ਦਿਤ੍ਵਾ ਤਤ੍ਥ ਆਸਨਂ ਪਞ੍ਞਾਪੇਤ੍ਵਾ ਪਾਦੋਦਕਂ ਪਾਦਪੀਠਂ ਉਪਟ੍ਠਪੇਤ੍ਵਾ ਥੇਰਂ ਪਵੇਸੇਤ੍ਵਾ ਤਸ੍ਮਿਂ ਪਾਦੇ ਧੋਵਨ੍ਤੇ ਪਦੀਪਂ ਉਜ੍ਜਾਲੇਤ੍ਵਾ ਮਞ੍ਚੇ ਪਚ੍ਚਤ੍ਥਰਣਾਨਿ ਪਞ੍ਞਾਪੇਤ੍ਵਾ ਅਦਾਸਿ. ਸ੍ਵਾਤਨਾਯ ਚ ਨਿਮਨ੍ਤੇਤ੍ਵਾ ਥੇਰਸ੍ਸ ਦੁਤਿਯਦਿਵਸੇ ਭੋਜੇਤ੍ਵਾ ਪਾਨਕਤ੍ਥਾਯ ਗੁਲ਼ਪਿਣ੍ਡਞ੍ਚ ਦਤ੍ਵਾ ਥੇਰਂ ਗਚ੍ਛਨ੍ਤਂ ਅਨੁਗਨ੍ਤ੍ਵਾ ਨਿਵਤ੍ਤਿ. ਸੋ ਅਪਰੇਨ ਸਮਯੇਨ ਸਹ ਭਰਿਯਾਯ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦ੍ਵੀਹਿ ਗਾਥਾਹਿ ਪਟਿਪੁਚ੍ਛਿ –
੧੦੬੯. ‘‘ਚਨ੍ਦੋ ਯਥਾ ਵਿਗਤਵਲਾਹਕੇ ਨਭੇ, ਓਭਾਸਯਂ ਗਚ੍ਛਤਿ ਅਨ੍ਤਲਿਕ੍ਖੇ;
ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.
੧੦੭੦. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;
ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.
ਸੋ ਦੇਵਪੁਤ੍ਤੋ ਇਮਾਹਿ ਗਾਥਾਹਿ ਬ੍ਯਾਕਾਸਿ –
੧੦੭੧. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੦੭੨. ‘‘ਅਹਞ੍ਚ ਭਰਿਯਾ ਚ ਮਨੁਸ੍ਸਲੋਕੇ, ਉਪਸ੍ਸਯਂ ਅਰਹਤੋ ਅਦਮ੍ਹ;
ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਮ੍ਹ.
੧੦੭੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.
ਤਤ੍ਥ ਗਾਥਾਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਨਯਮੇਵ;
ਪਠਮਉਪਸ੍ਸਯਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.
੫. ਦੁਤਿਯਉਪਸ੍ਸਯਦਾਯਕਵਿਮਾਨਵਣ੍ਣਨਾ
ਸੂਰਿਯੋ ਯਥਾ ਵਿਗਤਵਲਾਹਕੇ ਨਭੇਤਿ ਦੁਤਿਯਉਪਸ੍ਸਯਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਗਾਮਕਾਵਾਸੇ ਵਸ੍ਸਂ ਵਸਿਤ੍ਵਾ ਭਗਵਨ੍ਤਂ ਦਸ੍ਸਨਾਯ ਰਾਜਗਹਂ ਉਦ੍ਦਿਸ੍ਸ ਗਚ੍ਛਨ੍ਤਾ ਸਾਯਂ ਅਞ੍ਞਤਰਂ ਗਾਮਂ ਸਮ੍ਪਾਪੁਣਿਂਸੁ. ਸੇਸਂ ਅਨਨ੍ਤਰਵਿਮਾਨਸਦਿਸਮੇਵ.
੧੦੭੫. ‘‘ਸੂਰਿਯੋ ਯਥਾ ਵਿਗਤਵਲਾਹਕੇ ਨਭੇ…ਪੇ….
(ਯਥਾ ਪੁਰਿਮਵਿਮਾਨਂ, ਤਥਾ ਵਿਤ੍ਥਾਰੇਤਬ੍ਬਂ;)
੧੦੭੯. ‘‘ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.
ਤਤ੍ਥ ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ;
ਦੁਤਿਯਉਪਸ੍ਸਯਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.
੬. ਭਿਕ੍ਖਾਦਾਯਕਵਿਮਾਨਵਣ੍ਣਨਾ
ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਭਿਕ੍ਖਾਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਦ੍ਧਾਨਮਗ੍ਗਪਟਿਪਨ੍ਨੋ ਅਞ੍ਞਤਰਂ ਗਾਮਂ ਪਿਣ੍ਡਾਯ ਪਵਿਟ੍ਠੋ ਏਕਸ੍ਸ ਘਰਦ੍ਧਾਰੇ ਅਟ੍ਠਾਸਿ. ਤਤ੍ਥ ਅਞ੍ਞਤਰੋ ਪੁਰਿਸੋ ਧੋਤਹਤ੍ਥਪਾਦੋ ‘‘ਭੁਞ੍ਜਿਸ੍ਸਾਮੀ’’ਤਿ ਨਿਸਿਨ੍ਨੋ ਭੋਜਨਂ ਉਪਨੇਤ੍ਵਾ ਪਾਤਿਯਾ ਪਕ੍ਖਿਤ੍ਤੇ ਤਂ ਭਿਕ੍ਖੁਂ ਦਿਸ੍ਵਾ ਪਾਤਿਯਾ ਭਤ੍ਤਂ ਤਸ੍ਸ ਭਿਕ੍ਖੁਨੋ ਪਤ੍ਤੇ ਆਕਿਰਨ੍ਤੋ ਤੇਨ ‘‘ਏਕਦੇਸਮੇਵ ਦੇਹੀ’’ਤਿ ਵੁਤ੍ਤੋਪਿ ਸਬ੍ਬਮੇਵ ਆਕਿਰਿ. ਸੋ ਭਿਕ੍ਖੁ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋ ਪੁਰਿਸੋ ‘‘ਛਾਤਜ੍ਝਤ੍ਤਸ੍ਸ ਭਿਕ੍ਖੁਨੋ ਮਯਾ ਅਭੁਞ੍ਜਿਤ੍ਵਾ ਭਤ੍ਤਂ ਦਿਨ੍ਨ’’ਨ੍ਤਿ ਅਨੁਸ੍ਸਰਨ੍ਤੋ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਲਭਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਦੇਵਚਾਰਿਕਂ ਚਰਨ੍ਤੋ ਮਹਤਿਯਾ ਦੇਵਿਦ੍ਧਿਯਾ ਵਿਰੋਚਮਾਨਂ ਦਿਸ੍ਵਾ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –
੧੦੮੧. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;
ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.
੧੦੮੨. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.
ਸੋਪਿ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –
੧੦੮੩. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੦੮੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਿਸ੍ਵਾਨ ਭਿਕ੍ਖੁਂ ਤਸਿਤਂ ਕਿਲਨ੍ਤਂ;
ਏਕਾਹਂ ਭਿਕ੍ਖਂ ਪਟਿਪਾਦਯਿਸ੍ਸਂ, ਸਮਙ੍ਗਿ ਭਤ੍ਤੇਨ ਤਦਾ ਅਕਾਸਿਂ.
੧੦੮੫. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.
੧੦੮੪. ਤਤ੍ਥ ਏਕਾਹਂ ਭਿਕ੍ਖਨ੍ਤਿ ਏਕਂ ਅਹਂ ਭਿਕ੍ਖਾਮਤ੍ਤਂ, ਏਕਂ ਭਤ੍ਤਵਡ੍ਢਿਤਕਨ੍ਤਿ ਅਤ੍ਥੋ. ਪਟਿਪਾਦਯਿਸ੍ਸਨ੍ਤਿ ਪਟਿਪਾਦੇਸਿਂ ਅਦਾਸਿਂ. ਸਮਙ੍ਗਿ ਭਤ੍ਤੇਨਾਤਿ ਭਤ੍ਤੇਨ ਸਮਙ੍ਗੀਭੂਤਂ, ਲਦ੍ਧਭਿਕ੍ਖਨ੍ਤਿ ਅਤ੍ਥੋ. ਏਵਂ ਮਹਾਥੇਰੋ ਤੇਨ ਦੇਵਪੁਤ੍ਤੇਨ ਅਤ੍ਤਨੋ ਸੁਚਰਿਤਕਮ੍ਮੇ ਪਕਾਸਿਤੇ ਸਪਰਿਵਾਰਸ੍ਸ ਤਸ੍ਸ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਲੋਕਮਾਗਤੋ, ਤਂ ਪਵਤ੍ਤਿਂ ਸਮ੍ਮਾਸਮ੍ਬੁਦ੍ਧਸ੍ਸ ਕਥੇਸਿ. ਸਤ੍ਥਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਮਹਾਜਨਸ੍ਸ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.
ਭਿਕ੍ਖਾਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.
੭. ਯਵਪਾਲਕਵਿਮਾਨਵਣ੍ਣਨਾ
ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਯਵਪਾਲਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਾਜਗਹੇ ਅਞ੍ਞਤਰੋ ਦੁਗ੍ਗਤਦਾਰਕੋ ਯਵਖੇਤ੍ਤਂ ਰਕ੍ਖਤਿ. ਸੋ ਏਕਦਿਵਸਂ ਪਾਤਰਾਸਤ੍ਥਾਯ ਕੁਮ੍ਮਾਸਂ ਲਭਿਤ੍ਵਾ ‘‘ਖੇਤ੍ਤਂ ਗਨ੍ਤ੍ਵਾ ਭੁਞ੍ਜਿਸ੍ਸਾਮੀ’’ਤਿ ਤਂ ਕੁਮ੍ਮਾਸਂ ਗਹੇਤ੍ਵਾ ਯਵਖੇਤ੍ਤਂ ਗਨ੍ਤ੍ਵਾ ਰੁਕ੍ਖਮੂਲੇ ਨਿਸੀਦਿ. ਤਸ੍ਮਿਂ ਖਣੇ ਅਞ੍ਞਤਰੋ ਖੀਣਾਸਵਤ੍ਥੇਰੋ ਮਗ੍ਗਪ੍ਪਟਿਪਨ੍ਨੋ ਉਪਕਟ੍ਠੇ ਕਾਲੇ ਤਂ ਠਾਨਂ ਪਤ੍ਵਾ ਯਵਪਾਲਕੇਨ ਨਿਸਿਨ੍ਨਂ ਰੁਕ੍ਖਮੂਲਂ ਉਪਸਙ੍ਕਮਿ. ਯਵਪਾਲਕੋ ਵੇਲਂ ਓਲੋਕੇਤ੍ਵਾ ‘‘ਕਚ੍ਚਿ, ਭਨ੍ਤੇ, ਆਹਾਰੋ ਲਦ੍ਧੋ’’ਤਿ ਆਹ. ਥੇਰੋ ਤੁਣ੍ਹੀ ਅਹੋਸਿ. ਸੋ ਅਲਦ੍ਧਭਾਵਂ ਞਤ੍ਵਾ ‘‘ਭਨ੍ਤੇ, ਉਪਕਟ੍ਠਾ ਵੇਲਾ, ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਤੁਂ ਨ ਸਕ੍ਕਾ, ਮਯ੍ਹਂ ਅਨੁਕਮ੍ਪਾਯ ਇਮਂ ਕੁਮ੍ਮਾਸਂ ਪਰਿਭੁਞ੍ਜਥਾ’’ਤਿ ਵਤ੍ਵਾ ਥੇਰਸ੍ਸ ਤਂ ਕੁਮ੍ਮਾਸਂ ਅਦਾਸਿ. ਥੇਰੋ ਤਂ ਅਨੁਕਮ੍ਪਨ੍ਤੋ ਤਸ੍ਸ ਪਸ੍ਸਨ੍ਤਸ੍ਸੇਵ ਤਂ ਪਰਿਭੁਞ੍ਜਿਤ੍ਵਾ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋਪਿ ਦਾਰਕੋ ‘‘ਸੁਦਿਨ੍ਨਂ ਵਤ ਮਯਾ ਈਦਿਸਸ੍ਸ ਕੁਮ੍ਮਾਸਦਾਨਂ ਦਦਨ੍ਤੇਨਾ’’ਤਿ ਚਿਤ੍ਤਂ ਪਸਾਦੇਤ੍ਵਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਵੁਤ੍ਤਨਯੇਨੇਵ ਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –
੧੦੮੭. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ…ਪੇ…
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.
ਸੋਪਿ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –
੧੦੮੯. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੦੯੦. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਅਹੋਸਿਂ ਯਵਪਾਲਕੋ;
ਅਦ੍ਦਸਂ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ.
੧੦੯੧. ‘‘ਤਸ੍ਸ ਅਦਾਸਹਂ ਭਾਗਂ, ਪਸਨ੍ਨੋ ਸੇਹਿ ਪਾਣਿਭਿ;
ਕੁਮ੍ਮਾਸਪਿਣ੍ਡਂ ਦਤ੍ਵਾਨ, ਮੋਦਾਮਿ ਨਨ੍ਦਨੇ ਵਨੇ.
੧੦੯੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.
ਤਤ੍ਥ ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ.
ਯਵਪਾਲਕਵਿਮਾਨਵਣ੍ਣਨਾ ਨਿਟ੍ਠਿਤਾ.
੮. ਪਠਮਕੁਣ੍ਡਲੀਵਿਮਾਨਵਣ੍ਣਨਾ
ਅਲਙ੍ਕਤੋ ਮਲ੍ਯਧਰੋ ਸੁਵਤ੍ਥੋਤਿ ਕੁਣ੍ਡਲੀਵਿਮਾਨਂ. ਤਸ੍ਸ ਕਾ ਉਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਦ੍ਵੇ ਅਗ੍ਗਸਾਵਕਾ ਸਪਰਿਵਾਰਾ ਕਾਸੀਸੁ ਚਾਰਿਕਂ ਚਰਨ੍ਤਾ ਸੂਰਿਯਤ੍ਥਙ੍ਗਮਨਵੇਲਾਯਂ ਅਞ੍ਞਤਰਂ ਵਿਹਾਰਂ ਪਾਪੁਣਿਂਸੁ. ਤਂ ਪਵਤ੍ਤਿਂ ਸੁਤ੍ਵਾ ਤਸ੍ਸ ਵਿਹਾਰਸ੍ਸ ਗੋਚਰਗਾਮੇ ਅਞ੍ਞਤਰੋ ਉਪਾਸਕੋ ਥੇਰੇ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪਾਦਧੋਵਨਂ ਪਾਦਬ੍ਭਞ੍ਜਨਤੇਲਂ ਮਞ੍ਚਪੀਠਂ ਪਚ੍ਚਤ੍ਥਰਣਂ ਪਦੀਪਿਯਞ੍ਚ ਉਪਨੇਤ੍ਵਾ ਸ੍ਵਾਤਨਾਯ ਚ ਨਿਮਨ੍ਤੇਤ੍ਵਾ ਦੁਤਿਯਦਿਵਸੇ ਮਹਾਦਾਨਂ ਪਵਤ੍ਤੇਸਿ, ਥੇਰਾ ਤਸ੍ਸ ਅਨੁਮੋਦਨਂ ਵਤ੍ਵਾ ਪਕ੍ਕਮਿਂਸੁ. ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –
੧੦੯੪. ‘‘ਅਲਙ੍ਕਤੋ ਮਲ੍ਯਧਰੋ ਸੁਵਤ੍ਥੋ, ਸੁਕੁਣ੍ਡਲੀ ਕਪ੍ਪਿਤਕੇਸਮਸ੍ਸੁ;
ਆਮੁਤ੍ਤਹਤ੍ਥਾਭਰਣੋ ਯਸਸ੍ਸੀ, ਦਿਬ੍ਬੇ ਵਿਮਾਨਮ੍ਹਿ ਯਥਾਪਿ ਚਨ੍ਦਿਮਾ.
੧੦੯੫. ‘‘ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ, ਅਟ੍ਠਟ੍ਠਕਾ ਸਿਕ੍ਖਿਤਾ ਸਾਧੁਰੂਪਾ;
ਦਿਬ੍ਬਾ ਚ ਕਞ੍ਞਾ ਤਿਦਸਚਰਾ ਉਲ਼ਾਰਾ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.
੧੦੯੬. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.
ਸੋਪਿ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –
੧੦੯੭. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੦੯੮. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਿਸ੍ਵਾਨ ਸਮਣੇ ਸੀਲਵਨ੍ਤੇ;
ਸਮ੍ਪਨ੍ਨਵਿਜ੍ਜਾਚਰਣੇ ਯਸਸ੍ਸੀ, ਬਹੁਸ੍ਸੁਤੇ ਤਣ੍ਹਕ੍ਖਯੂਪਪਨ੍ਨੇ;
ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.
੧੦੯੯. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.
੧੦੯੪. ਤਤ੍ਥ ਸੁਕੁਣ੍ਡਲੀਤਿ ਸੁਨ੍ਦਰੇਹਿ ਕੁਣ੍ਡਲੇਹਿ ਅਲਙ੍ਕਤਕਣ੍ਣੋ. ‘‘ਸਕੁਣ੍ਡਲੀ’’ਤਿਪਿ ਪਾਠੋ, ਸਦਿਸਂ ਕੁਣ੍ਡਲਂ ਸਕੁਣ੍ਡਲਂ, ਤਂ ਅਸ੍ਸ ਅਤ੍ਥੀਤਿ ਸਕੁਣ੍ਡਲੀ, ਯੁਤ੍ਤਕੁਣ੍ਡਲੀ ਅਞ੍ਞਮਞ੍ਞਞ੍ਚ ਤੁਯ੍ਹਞ੍ਚ ਅਨੁਚ੍ਛਵਿਕਕੁਣ੍ਡਲੀਤਿ ਅਤ੍ਥੋ. ਕਪ੍ਪਿਤਕੇਸਮਸ੍ਸੂਤਿ ਸਮ੍ਮਾਕਪ੍ਪਿਤਕੇਸਮਸ੍ਸੁ. ਆਮੁਤ੍ਤਹਤ੍ਥਾਭਰਣੋਤਿ ਪਟਿਮੁਕ੍ਕਅਙ੍ਗੁਲਿਯਾਦਿਹਤ੍ਥਾਭਰਣੋ.
੧੦੯੮. ਤਣ੍ਹਕ੍ਖਯੂਪਪਨ੍ਨੇਤਿ ਤਣ੍ਹਕ੍ਖਯਂ ਅਰਹਤ੍ਤਂ, ਨਿਬ੍ਬਾਨਮੇਵ ਵਾ ਉਪਗਤੇ, ਅਧਿਗਤਵਨ੍ਤੇਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.
ਪਠਮਕੁਣ੍ਡਲੀਵਿਮਾਨਵਣ੍ਣਨਾ ਨਿਟ੍ਠਿਤਾ.
੯. ਦੁਤਿਯਕੁਣ੍ਡਲੀਵਿਮਾਨਵਣ੍ਣਨਾ
ਅਲਙ੍ਕਤੋ ਮਲ੍ਯਧਰੋ ਸੁਵਤ੍ਥੋਤਿ ਦੁਤਿਯਕੁਣ੍ਡਲੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਦ੍ਵੇ ਅਗ੍ਗਸਾਵਕਾ ਕਾਸੀਸੁ ਜਨਪਦਚਾਰਿਕਂ ਚਰਨ੍ਤਾਤਿਆਦਿ ਸਬ੍ਬਂ ਅਨਨ੍ਤਰਸਦਿਸਮੇਵ.
੧੧੦੧. ‘‘ਅਲਙ੍ਕਤੋ ਮਲ੍ਯਧਰੋ ਸੁਵਤ੍ਥੋ, ਸੁਕੁਣ੍ਡਲੀ ਕਪ੍ਪਿਤਕੇਸਮਸ੍ਸੁ;
ਆਮੁਤ੍ਤਹਤ੍ਥਾਭਰਣੋ ਯਸਸ੍ਸੀ, ਦਿਬ੍ਬੇ ਵਿਮਾਨਮ੍ਹਿ ਯਥਾਪਿ ਚਨ੍ਦਿਮਾ.
੧੧੦੨. ‘‘ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;
ਅਟ੍ਠਟ੍ਠਕਾ ਸਿਕ੍ਖਿਤਾ ਸਾਧੁਰੂਪਾ;
ਦਿਬ੍ਬਾ ਚ ਕਞ੍ਞਾ ਤਿਦਸਚਰਾ ਉਲ਼ਾਰਾ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.
੧੧੦੩. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;
੧੧੦੪. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੧੦੫. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਿਸ੍ਵਾਨ ਸਮਣੇ ਸਾਧੁਰੂਪੇ;
ਸਮ੍ਪਨ੍ਨਵਿਜ੍ਜਾਚਰਣੇ ਯਸਸ੍ਸੀ, ਬਹੁਸ੍ਸੁਤੇ ਸੀਲਵਨ੍ਤੇ ਪਸਨ੍ਨੇ;
ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.
੧੧੦੬. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.
ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ.
ਦੁਤਿਯਕੁਣ੍ਡਲੀਵਿਮਾਨਵਣ੍ਣਨਾ ਨਿਟ੍ਠਿਤਾ.
੧੦. (ਉਤ੍ਤਰ) ਪਾਯਾਸਿਵਿਮਾਨਵਣ੍ਣਨਾ
ਯਾ ਦੇਵਰਾਜਸ੍ਸ ਸਭਾ ਸੁਧਮ੍ਮਾਤਿ ਉਤ੍ਤਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਪਰਿਨਿਬ੍ਬੁਤੇ ਧਾਤੁਵਿਭਾਗੇ ਚ ਕਤੇ ਤਤ੍ਥ ਤਤ੍ਥ ਥੂਪੇਸੁ ਪਤਿਟ੍ਠਾਪਿਯਮਾਨੇਸੁ ਧਮ੍ਮਵਿਨਯਂ ਸਙ੍ਗਾਯਿਤੁਂ ਉਚ੍ਚਿਨਿਤ੍ਵਾ ਗਹਿਤੇਸੁ ਮਹਾਕਸ੍ਸਪਪ੍ਪਮੁਖੇਸੁ ਮਹਾਥੇਰੇਸੁ ਯਾਵ ਵਸ੍ਸੂਪਗਮਨਾ ਅਞ੍ਞੇਸੁ ਚ ਥੇਰੇਸੁ ਅਤ੍ਤਨੋ ਅਤ੍ਤਨੋ ਪਰਿਸਾਯ ਸਦ੍ਧਿਂ ਤਤ੍ਥ ਤਤ੍ਥ ਵਸਨ੍ਤੇਸੁ ਆਯਸ੍ਮਾ ਕੁਮਾਰਕਸ੍ਸਪੋ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸੇਤਬ੍ਯਨਗਰਂ ਗਨ੍ਤ੍ਵਾ ਸਿਂਸਪਾਵਨੇ ਵਸਿ. ਅਥ ਪਾਯਾਸਿ ਰਾਜਞ੍ਞੋ ਥੇਰਸ੍ਸ ਤਤ੍ਥ ਵਸਨਭਾਵਂ ਸੁਤ੍ਵਾ ਮਹਤਾ ਜਨਕਾਯੇਨ ਪਰਿਵੁਤੋ ਤਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਨਿਸਿਨ੍ਨੋ ਅਤ੍ਤਨੋ ਦਿਟ੍ਠਿਗਤਂ ਪਵੇਦੇਸਿ. ਅਥ ਨਂ ਥੇਰੋ ਚਨ੍ਦਿਮਸੂਰਿਯੂਦਾਹਰਣਾਦੀਹਿ ਪਰਲੋਕਸ੍ਸ ਅਤ੍ਥਿਭਾਵਂ ਪਕਾਸੇਨ੍ਤੋ ਅਨੇਕਵਿਹਿਤਹੇਤੂਪਮਾਲਙ੍ਕਤਂ ਦਿਟ੍ਠਿਗਣ੍ਠਿਵਿਨਿਵੇਠਨਂ ਨਾਨਾਨਯਵਿਚਿਤ੍ਤਂ ਪਾਯਾਸਿਸੁਤ੍ਤਂ (ਦੀ. ਨਿ. ੨.੪੦੬ ਆਦਯੋ) ਦੇਸੇਤ੍ਵਾ ਤਂ ਦਿਟ੍ਠਿਸਮ੍ਪਦਾਯਂ ਪਤਿਟ੍ਠਾਪੇਸਿ.
ਸੋ ਵਿਸੁਦ੍ਧਦਿਟ੍ਠਿਕੋ ਹੁਤ੍ਵਾ ਸਮਣਬ੍ਰਾਹ੍ਮਣਕਪਣਦ੍ਧਿਕਾਦੀਨਂ ਦਾਨਂ ਦੇਨ੍ਤੋ ਅਨੁਲ਼ਾਰਜ੍ਝਾਸਯਤਾਯ ਲੂਖਂ ਅਦਾਸਿ ਘਾਸਚ੍ਛਾਦਨਮਤ੍ਤਂ ਕਣਾਜਕਂ ਬਿਲਙ੍ਗਦੁਤਿਯਂ ਸਾਣਾਨਿ ਚ ਵਤ੍ਥਾਨਿ. ਏਵਂ ਪਨ ਅਸਕ੍ਕਚ੍ਚਦਾਨਂ ਦਤ੍ਵਾ ਕਾਯਸ੍ਸ ਭੇਦਾ ਹੀਨਕਾਯਂ ਉਪਪਜ੍ਜਿ ਚਾਤੁਮਹਾਰਾਜਿਕਾਨਂ ਸਹਬ੍ਯਤਂ. ਤਸ੍ਸ ਪਨ ਕਿਚ੍ਚਾਕਿਚ੍ਚੇਸੁ ਯੁਤ੍ਤਪ੍ਪਯੁਤ੍ਤੋ ਉਤ੍ਤਰੋ ਨਾਮ ਮਾਣਵੋ ਅਹੋਸਿ ਦਾਨੇ ਬ੍ਯਾਵਟੋ. ਸੋ ਸਕ੍ਕਚ੍ਚਦਾਨਂ ਦਤ੍ਵਾ ਤਾਵਤਿਂਸਕਾਯਂ ਉਪਪਨ੍ਨੋ, ਤਸ੍ਸ ਦ੍ਵਾਦਸਯੋਜਨਿਕਂ ਵਿਮਾਨਂ ਨਿਬ੍ਬਤ੍ਤਿ. ਸੋ ਕਤਞ੍ਞੁਤਂ ਵਿਭਾਵੇਨ੍ਤੋ ਸਹ ਵਿਮਾਨੇਨ ਕੁਮਾਰਕਸ੍ਸਪਤ੍ਥੇਰਂ ਉਪਸਙ੍ਕਮਿਤ੍ਵਾ ਵਿਮਾਨਤੋ ਓਰੁਯ੍ਹ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਤਂ ਥੇਰੋ –
੧੧੦੮. ‘‘ਯਾ ਦੇਵਰਾਜਸ੍ਸ ਸਭਾ ਸੁਧਮ੍ਮਾ, ਯਤ੍ਥਚ੍ਛਤਿ ਦੇਵਸਙ੍ਘੋ ਸਮਗ੍ਗੋ;
ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.
੧੧੦੯. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਗਾਥਾਹਿ ਪਟਿਪੁਚ੍ਛਿ;
੧੧੧੦. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੧੧੧. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਰਞ੍ਞੋ ਪਾਯਾਸਿਸ੍ਸ ਅਹੋਸਿਂ ਮਾਣਵੋ;
ਲਦ੍ਧਾ ਧਨਂ ਸਂਵਿਭਾਗਂ ਅਕਾਸਿਂ, ਪਿਯਾ ਚ ਮੇ ਸੀਲਵਨ੍ਤੋ ਅਹੇਸੁਂ;
ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.
੧੧੧੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –
ਸੋ ਦੇਵਪੁਤ੍ਤੋ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ.