੬. ਭਿਕ੍ਖਾਦਾਯਕਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਭਿਕ੍ਖਾਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਦ੍ਧਾਨਮਗ੍ਗਪਟਿਪਨ੍ਨੋ ਅਞ੍ਞਤਰਂ ਗਾਮਂ ਪਿਣ੍ਡਾਯ ਪਵਿਟ੍ਠੋ ਏਕਸ੍ਸ ਘਰਦ੍ਧਾਰੇ ਅਟ੍ਠਾਸਿ. ਤਤ੍ਥ ਅਞ੍ਞਤਰੋ ਪੁਰਿਸੋ ਧੋਤਹਤ੍ਥਪਾਦੋ ‘‘ਭੁਞ੍ਜਿਸ੍ਸਾਮੀ’’ਤਿ ਨਿਸਿਨ੍ਨੋ ਭੋਜਨਂ ਉਪਨੇਤ੍ਵਾ ਪਾਤਿਯਾ ਪਕ੍ਖਿਤ੍ਤੇ ਤਂ ਭਿਕ੍ਖੁਂ ਦਿਸ੍ਵਾ ਪਾਤਿਯਾ ਭਤ੍ਤਂ ਤਸ੍ਸ ਭਿਕ੍ਖੁਨੋ ਪਤ੍ਤੇ ਆਕਿਰਨ੍ਤੋ ਤੇਨ ‘‘ਏਕਦੇਸਮੇਵ ਦੇਹੀ’’ਤਿ ਵੁਤ੍ਤੋਪਿ ਸਬ੍ਬਮੇਵ ਆਕਿਰਿ. ਸੋ ਭਿਕ੍ਖੁ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋ ਪੁਰਿਸੋ ‘‘ਛਾਤਜ੍ਝਤ੍ਤਸ੍ਸ ਭਿਕ੍ਖੁਨੋ ਮਯਾ ਅਭੁਞ੍ਜਿਤ੍ਵਾ ਭਤ੍ਤਂ ਦਿਨ੍ਨ’’ਨ੍ਤਿ ਅਨੁਸ੍ਸਰਨ੍ਤੋ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਲਭਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਦੇਵਚਾਰਿਕਂ ਚਰਨ੍ਤੋ ਮਹਤਿਯਾ ਦੇਵਿਦ੍ਧਿਯਾ ਵਿਰੋਚਮਾਨਂ ਦਿਸ੍ਵਾ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੧੦੮੧. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੦੮੨. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੧੦੮੩. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੦੮੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਿਸ੍ਵਾਨ ਭਿਕ੍ਖੁਂ ਤਸਿਤਂ ਕਿਲਨ੍ਤਂ;

ਏਕਾਹਂ ਭਿਕ੍ਖਂ ਪਟਿਪਾਦਯਿਸ੍ਸਂ, ਸਮਙ੍ਗਿ ਭਤ੍ਤੇਨ ਤਦਾ ਅਕਾਸਿਂ.

੧੦੮੫. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੦੮੪. ਤਤ੍ਥ ਏਕਾਹਂ ਭਿਕ੍ਖਨ੍ਤਿ ਏਕਂ ਅਹਂ ਭਿਕ੍ਖਾਮਤ੍ਤਂ, ਏਕਂ ਭਤ੍ਤਵਡ੍ਢਿਤਕਨ੍ਤਿ ਅਤ੍ਥੋ. ਪਟਿਪਾਦਯਿਸ੍ਸਨ੍ਤਿ ਪਟਿਪਾਦੇਸਿਂ ਅਦਾਸਿਂ. ਸਮਙ੍ਗਿ ਭਤ੍ਤੇਨਾਤਿ ਭਤ੍ਤੇਨ ਸਮਙ੍ਗੀਭੂਤਂ, ਲਦ੍ਧਭਿਕ੍ਖਨ੍ਤਿ ਅਤ੍ਥੋ. ਏਵਂ ਮਹਾਥੇਰੋ ਤੇਨ ਦੇਵਪੁਤ੍ਤੇਨ ਅਤ੍ਤਨੋ ਸੁਚਰਿਤਕਮ੍ਮੇ ਪਕਾਸਿਤੇ ਸਪਰਿਵਾਰਸ੍ਸ ਤਸ੍ਸ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਲੋਕਮਾਗਤੋ, ਤਂ ਪਵਤ੍ਤਿਂ ਸਮ੍ਮਾਸਮ੍ਬੁਦ੍ਧਸ੍ਸ ਕਥੇਸਿ. ਸਤ੍ਥਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਮਹਾਜਨਸ੍ਸ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਭਿਕ੍ਖਾਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.