੩. ਫਲਦਾਯਕਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਨ੍ਤਿ ਫਲਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਞ੍ਞੋ ਬਿਮ੍ਬਿਸਾਰਸ੍ਸ ਅਕਾਲੇ ਅਮ੍ਬਫਲਾਨਿ ਪਰਿਭੁਞ੍ਜਿਤੁਂ ਇਚ੍ਛਾ ਉਪ੍ਪਜ੍ਜਿ. ਸੋ ਆਰਾਮਪਾਲਂ ਆਹ – ‘‘ਮਯ੍ਹਂ ਖੋ, ਭਣੇ, ਅਮ੍ਬਫਲੇਸੁ ਇਚ੍ਛਾ ਉਪ੍ਪਨ੍ਨਾ, ਤਸ੍ਮਾ ਅਮ੍ਬਾਨਿ ਮੇ ਆਨੇਤ੍ਵਾ ਦੇਹੀ’’ਤਿ. ‘‘ਦੇਵ, ਨਤ੍ਥਿ ਅਮ੍ਬੇਸੁ ਅਮ੍ਬਫਲਂ, ਅਪਿਚਾਹਂ ਤਥਾ ਕਰੋਮਿ, ਸਚੇ ਦੇਵੋ ਕਿਞ੍ਚਿ ਕਾਲਂ ਆਗਮੇਤਿ, ਯਥਾ ਅਮ੍ਬਾ ਨ ਚਿਰਸ੍ਸੇਵ ਫਲਂ ਗਣ੍ਹਨ੍ਤੀ’’ਤਿ. ‘‘ਸਾਧੁ, ਭਣੇ, ਤਥਾ ਕਰੋਹੀ’’ਤਿ. ਆਰਾਮਪਾਲੋ ਆਰਾਮਂ ਗਨ੍ਤ੍ਵਾ ਅਮ੍ਬਰੁਕ੍ਖਮੂਲੇਸੁ ਪਂਸੁਂ ਅਪਨੇਤ੍ਵਾ ਤਾਦਿਸਂ ਪਂਸੁਂ ਆਕਿਰਿ, ਤਾਦਿਸਞ੍ਚ ਉਦਕਂ ਆਸਿਞ੍ਚਿ, ਯਥਾ ਨ ਚਿਰਸ੍ਸੇਵ ਅਮ੍ਬਰੁਕ੍ਖਾ ਸਚ੍ਛਿਨ੍ਨਪਤ੍ਤਾ ਅਹੇਸੁਂ. ਅਥ ਨਂ ਪਂਸੁਂ ਅਪਨੇਤ੍ਵਾ ਫਾਰੁਸਕਕਸਟਮਿਸ੍ਸਕਂ ਪਾਕਤਿਕਂ ਪਂਸੁਂ ਆਕਿਰਿਤ੍ਵਾ ਸਾਧੁਕਂ ਉਦਕਂ ਅਦਾਸਿ. ਤਦਾ ਅਮ੍ਬਰੁਕ੍ਖਾ ਨ ਚਿਰੇਨੇਵ ਕੋਰਕਿਤਾ ਪਲ੍ਲਵਿਤਾ ਕੁਟਮਲਕਜਾਤਾ ਹੁਤ੍ਵਾ ਪੁਪ੍ਫਿਂਸੁ, ਅਥ ਸਲਾਟੁਕਜਾਤਾ ਹੁਤ੍ਵਾ ਫਲਾਨਿ ਗਣ੍ਹਿਂਸੁ. ਤਤ੍ਥੇਕਸ੍ਮਿਂ ਅਮ੍ਬਰੁਕ੍ਖੇ ਪਠਮਤਰਂ ਚਤ੍ਤਾਰਿ ਫਲਾਨਿ ਮਨੋਸਿਲਾਚੁਣ੍ਣਪਿਞ੍ਜਰਵਣ੍ਣਾਨਿ ਸਮ੍ਪਨ੍ਨਗਨ੍ਧਰਸਾਨਿ ਪਰਿਣਤਾਨਿ ਅਹੇਸੁਂ.

ਸੋ ਤਾਨਿ ਗਹੇਤ੍ਵਾ ‘‘ਰਞ੍ਞੋ ਦਸ੍ਸਾਮੀ’’ਤਿ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਪਿਣ੍ਡਾਯ ਚਰਮਾਨਂ ਦਿਸ੍ਵਾ ਚਿਨ੍ਤੇਸਿ ‘‘ਇਮਾਨਿ ਅਮ੍ਬਾਨਿ ਅਗ੍ਗਫਲਭੂਤਾਨਿ ਇਮਸ੍ਸ ਅਯ੍ਯਸ੍ਸ ਦਸ੍ਸਾਮਿ, ਕਾਮਂ ਮਂ ਰਾਜਾ ਹਨਤੁ ਵਾ ਪਬ੍ਬਾਜੇਤੁ ਵਾ, ਰਞ੍ਞੋ ਹਿ ਦਿਨ੍ਨੇ ਦਿਟ੍ਠਧਮ੍ਮੇ ਪੂਜਾਮਤ੍ਤਂ ਅਪ੍ਪਮਤ੍ਤਕਂ ਫਲਂ, ਅਯ੍ਯਸ੍ਸ ਦਿਨ੍ਨੇ ਪਨ ਦਿਟ੍ਠਧਮ੍ਮਿਕਮ੍ਪਿ ਸਮ੍ਪਰਾਯਿਕਮ੍ਪਿ ਅਪਰਿਮਾਣਂ ਫਲਂ ਭਵਿਸ੍ਸਤੀ’’ਤਿ. ਏਵਂ ਪਨ ਚਿਨ੍ਤੇਤ੍ਵਾ ਤਾਨਿ ਫਲਾਨਿ ਥੇਰਸ੍ਸ ਦਤ੍ਵਾ ਰਾਜਾਨਂ ਉਪਸਙ੍ਕਮਿਤ੍ਵਾ ਰਞ੍ਞੋ ਤਮਤ੍ਥਂ ਆਰੋਚੇਸਿ. ਤਂ ਸੁਤ੍ਵਾ ਰਾਜਾ ਰਾਜਪੁਰਿਸੇ ਆਣਾਪੇਸਿ ‘‘ਵੀਮਂਸਥ ਤਾਵ, ਭਣੇ, ਯਥਾਯਂ ਆਹਾ’’ਤਿ. ਥੇਰੋ ਪਨ ਤਾਨਿ ਫਲਾਨਿ ਭਗਵਤੋ ਉਪਨਾਮੇਸਿ. ਭਗਵਾ ਤੇਸੁ ਏਕਂ ਸਾਰਿਪੁਤ੍ਤਤ੍ਥੇਰਸ੍ਸ, ਏਕਂ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ, ਏਕਂ ਮਹਾਕਸ੍ਸਪਤ੍ਥੇਰਸ੍ਸ ਦਤ੍ਵਾ ਏਕਂ ਅਤ੍ਤਨਾ ਪਰਿਭੁਞ੍ਜਿ. ਪੁਰਿਸਾ ਤਂ ਪਵਤ੍ਤਿਂ ਰਞ੍ਞੋ ਆਰੋਚੇਸੁਂ.

ਰਾਜਾ ਤਂ ਸੁਤ੍ਵਾ ‘‘ਧੀਰੋ ਵਤਾਯਂ ਪੁਰਿਸੋ, ਯੋ ਅਤ੍ਤਨੋ ਜੀਵਿਤਮ੍ਪਿ ਪਰਿਚ੍ਚਜਿਤ੍ਵਾ ਪੁਞ੍ਞਪਸੁਤੋ ਅਹੋਸਿ, ਅਤ੍ਤਨੋ ਪਰਿਸ੍ਸਮਞ੍ਚ ਠਾਨਗਤਮੇਵ ਅਕਾਸੀ’’ਤਿ ਤੁਟ੍ਠਚਿਤ੍ਤੋ ਤਸ੍ਸ ਏਕਂ ਗਾਮਵਰਂ ਵਤ੍ਥਾਲਙ੍ਕਾਰਾਦੀਨਿ ਚ ਦਤ੍ਵਾ ‘‘ਯਂ ਤਯਾ ਭਣੇ ਅਮ੍ਬਫਲਦਾਨੇਨ ਪੁਞ੍ਞਂ ਪਸੁਤਂ, ਤਤੋ ਮੇ ਪਤ੍ਤਿਂ ਦੇਹੀ’’ਤਿ ਆਹ. ਸੋ ‘‘ਦੇਮਿ, ਦੇਵ, ਯਥਾਸੁਖਂ ਪਤ੍ਤਿਂ ਗਣ੍ਹਾਹੀ’’ਤਿ ਅਵੋਚ. ਆਰਾਮਪਾਲੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ, ਤਸ੍ਸ ਸੋਲ਼ਸਯੋਜਨਿਕਂ ਕਨਕਵਿਮਾਨਂ ਨਿਬ੍ਬਤ੍ਤਿ ਸਤ੍ਤਸਤਕੂਟਾਗਾਰਪਟਿਮਣ੍ਡਿਤਂ. ਤਂ ਦਿਸ੍ਵਾ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪੁਚ੍ਛਿ –

੧੦੬੦. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਸੋਲ਼ਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੧੦੬੧. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਅਟ੍ਠਟ੍ਠਕਾ ਸਿਕ੍ਖਿਤਾ ਸਾਧੁਰੂਪਾ, ਦਿਬ੍ਬਾ ਚ ਕਞ੍ਞਾ ਤਿਦਸਚਰਾ ਉਲ਼ਾਰਾ;

ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ.

੧੦੬੨. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੦੬੩. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੦੬੪. ‘‘ਫਲਦਾਯੀ ਫਲਂ ਵਿਪੁਲਂ ਲਭਤਿ, ਦਦਮੁਜੁਗਤੇਸੁ ਪਸਨ੍ਨਮਾਨਸੋ;

ਸੋ ਹਿ ਪਮੋਦਤਿ ਸਗ੍ਗਗਤੋ ਤਿਦਿਵੇ, ਅਨੁਭੋਤਿ ਚ ਪੁਞ੍ਞਫਲਂ ਵਿਪੁਲਂ.

੧੦੬੫. ‘‘ਤਵੇਵਾਹਂ ਮਹਾਮੁਨਿ, ਅਦਾਸਿਂ ਚਤੁਰੋ ਫਲੇ.

੧੦੬੬. ‘‘ਤਸ੍ਮਾ ਹਿ ਫਲਂ ਅਲਮੇਵ ਦਾਤੁਂ, ਨਿਚ੍ਚਂ ਮਨੁਸ੍ਸੇਨ ਸੁਖਤ੍ਥਿਕੇਨ;

ਦਿਬ੍ਬਾਨਿ ਵਾ ਪਤ੍ਥਯਤਾ ਸੁਖਾਨਿ, ਮਨੁਸ੍ਸਸੋਭਗ੍ਗਤਮਿਚ੍ਛਤਾ ਵਾ.

੧੦੬੭. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. – ਸੋਪਿਸ੍ਸ ਬ੍ਯਾਕਾਸਿ;

੧੦੬੧. ਤਤ੍ਥ ਅਟ੍ਠਟ੍ਠਕਾਤਿ ਏਕੇਕਸ੍ਮਿਂ ਕੂਟਾਗਾਰੇ ਅਟ੍ਠਟ੍ਠਕਾ ਚਤੁਸਟ੍ਠਿਪਰਿਮਾਣਾ. ਸਾਧੁਰੂਪਾਤਿ ਰੂਪਸਮ੍ਪਤ੍ਤਿਯਾ ਚ ਸੀਲਾਚਾਰਸਮ੍ਪਤ੍ਤਿਯਾ ਚ ਸਿਕ੍ਖਾਸਮ੍ਪਤ੍ਤਿਯਾ ਚ ਸੁਨ੍ਦਰਸਭਾਵਾ. ਦਿਬ੍ਬਾ ਚ ਕਞ੍ਞਾਤਿ ਦੇਵਚ੍ਛਰਾਯੋ. ਤਿਦਸਚਰਾਤਿ ਤਿਦਸੇਸੁ ਸੁਖਾਚਾਰਾ ਸੁਖਵਿਹਾਰਿਨਿਯੋ. ਉਲ਼ਾਰਾਤਿ ਉਲ਼ਾਰਵਿਭਵਾ.

੧੦੬੪. ਫਲਦਾਯੀਤਿ ਅਤ੍ਤਨਾ ਅਮ੍ਬਫਲਸ੍ਸ ਦਿਨ੍ਨਤ੍ਤਾ ਅਤ੍ਤਾਨਂ ਸਨ੍ਧਾਯ ਵਦਤਿ. ਫਲਨ੍ਤਿ ਪੁਞ੍ਞਫਲਂ. ਵਿਪੁਲਨ੍ਤਿ ਮਹਨ੍ਤਂ ਲਭਤਿ ਮਨੁਸ੍ਸਲੋਕੇ ਪਤਿਟ੍ਠਿਤੋਤਿ ਅਧਿਪ੍ਪਾਯੋ. ਦਦਨ੍ਤਿ ਦਦਨ੍ਤੋ ਦਾਨਹੇਤੁ. ਉਜੁਗਤੇਸੂਤਿ ਉਜੁਪਟਿਪਨ੍ਨੇਸੁ. ਸਗ੍ਗਗਤੋਤਿ ਉਪ੍ਪਜ੍ਜਨਵਸੇਨ ਸਗ੍ਗਂ ਗਤੋ, ਤਤ੍ਥਾਪਿ ਤਿਦਿਵੇ ਤਾਵਤਿਂਸਭਵਨੇ ਅਨੁਭੋਤਿ ਚ ਪੁਞ੍ਞਫਲਂ ਵਿਪੁਲਂ ਯਥਾਹਂ, ਏਵਂ ਅਞ੍ਞੋਪੀਤਿ ਅਤ੍ਥੋ.

੧੦੬੬. ਤਸ੍ਮਾਤਿ ਯਸ੍ਮਾ ਚਤੁਨ੍ਨਂ ਫਲਾਨਂ ਦਾਨਮਤ੍ਤੇਨ ਈਦਿਸੀ ਸਮ੍ਪਤ੍ਤਿ ਅਧਿਗਤਾ, ਤਸ੍ਮਾ. ਅਲਮੇਵ ਯੁਤ੍ਤਮੇਵ. ਨਿਚ੍ਚਨ੍ਤਿ ਸਬ੍ਬਕਾਲਂ. ਦਿਬ੍ਬਾਨੀਤਿ ਦੇਵਲੋਕਪਰਿਯਾਪਨ੍ਨਾਨਿ. ਮਨੁਸ੍ਸਸੋਭਗ੍ਗਤਨ੍ਤਿ ਮਨੁਸ੍ਸੇਸੁ ਸੁਭਗਭਾਵਂ. ਸੇਸਂ ਵੁਤ੍ਤਨਯਮੇਵ.

ਫਲਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.