੪. ਪਠਮਉਪਸ੍ਸਯਦਾਯਕਵਿਮਾਨਵਣ੍ਣਨਾ

ਚਨ੍ਦੋ ਯਥਾ ਵਿਗਤਵਲਾਹਕੇ ਨਭੇਤਿ ਉਪਸ੍ਸਯਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਾਮਕਾਵਾਸੇ ਵਸ੍ਸਂ ਵਸਿਤ੍ਵਾ ਵੁਤ੍ਥਵਸ੍ਸੋ ਪਵਾਰੇਤ੍ਵਾ ਭਗਵਨ੍ਤਂ ਵਨ੍ਦਿਤੁਂ ਰਾਜਗਹਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਸਾਯਂ ਅਞ੍ਞਤਰਂ ਗਾਮਂ ਪਵਿਸਿਤ੍ਵਾ ਵਸਨਟ੍ਠਾਨਂ ਪਰਿਯੇਸਨ੍ਤੋ ਅਞ੍ਞਤਰਂ ਉਪਾਸਕਂ ਦਿਸ੍ਵਾ ਪੁਚ੍ਛਿ – ‘‘ਉਪਾਸਕ, ਇਮਸ੍ਮਿਂ ਗਾਮੇ ਅਤ੍ਥਿ ਕਿਞ੍ਚਿ ਪਬ੍ਬਜਿਤਾਨਂ ਵਸਨਯੋਗ੍ਗਟ੍ਠਾਨ’’ਨ੍ਤਿ. ਉਪਾਸਕੋ ਪਸਨ੍ਨਚਿਤ੍ਤੋ ਗੇਹਂ ਗਨ੍ਤ੍ਵਾ ਭਰਿਯਾਯ ਸਦ੍ਧਿਂ ਮਨ੍ਤੇਤ੍ਵਾ ਥੇਰਸ੍ਸ ਵਸਨਯੋਗ੍ਗਂ ਠਾਨਂ ਪਰਿਚ੍ਛਿਨ੍ਦਿਤ੍ਵਾ ਤਤ੍ਥ ਆਸਨਂ ਪਞ੍ਞਾਪੇਤ੍ਵਾ ਪਾਦੋਦਕਂ ਪਾਦਪੀਠਂ ਉਪਟ੍ਠਪੇਤ੍ਵਾ ਥੇਰਂ ਪਵੇਸੇਤ੍ਵਾ ਤਸ੍ਮਿਂ ਪਾਦੇ ਧੋਵਨ੍ਤੇ ਪਦੀਪਂ ਉਜ੍ਜਾਲੇਤ੍ਵਾ ਮਞ੍ਚੇ ਪਚ੍ਚਤ੍ਥਰਣਾਨਿ ਪਞ੍ਞਾਪੇਤ੍ਵਾ ਅਦਾਸਿ. ਸ੍ਵਾਤਨਾਯ ਚ ਨਿਮਨ੍ਤੇਤ੍ਵਾ ਥੇਰਸ੍ਸ ਦੁਤਿਯਦਿਵਸੇ ਭੋਜੇਤ੍ਵਾ ਪਾਨਕਤ੍ਥਾਯ ਗੁਲ਼ਪਿਣ੍ਡਞ੍ਚ ਦਤ੍ਵਾ ਥੇਰਂ ਗਚ੍ਛਨ੍ਤਂ ਅਨੁਗਨ੍ਤ੍ਵਾ ਨਿਵਤ੍ਤਿ. ਸੋ ਅਪਰੇਨ ਸਮਯੇਨ ਸਹ ਭਰਿਯਾਯ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦ੍ਵੀਹਿ ਗਾਥਾਹਿ ਪਟਿਪੁਚ੍ਛਿ –

੧੦੬੯. ‘‘ਚਨ੍ਦੋ ਯਥਾ ਵਿਗਤਵਲਾਹਕੇ ਨਭੇ, ਓਭਾਸਯਂ ਗਚ੍ਛਤਿ ਅਨ੍ਤਲਿਕ੍ਖੇ;

ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.

੧੦੭੦. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋ ਦੇਵਪੁਤ੍ਤੋ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੧੦੭੧. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੦੭੨. ‘‘ਅਹਞ੍ਚ ਭਰਿਯਾ ਚ ਮਨੁਸ੍ਸਲੋਕੇ, ਉਪਸ੍ਸਯਂ ਅਰਹਤੋ ਅਦਮ੍ਹ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਮ੍ਹ.

੧੦੭੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਤਤ੍ਥ ਗਾਥਾਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਨਯਮੇਵ;

ਪਠਮਉਪਸ੍ਸਯਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.