੯. ਸਨ੍ਧਿਤਤ੍ਥੇਰਗਾਥਾਵਣ੍ਣਨਾ

ਅਸ੍ਸਤ੍ਥੇ ਹਰਿਤੋਭਾਸੇਤਿ ਆਯਸ੍ਮਤੋ ਸਨ੍ਧਿਤਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਇਤੋ ਏਕਤਿਂਸੇ ਕਪ੍ਪੇ ਸਿਖਿਸ੍ਸ ਭਗਵਤੋ ਕਾਲੇ ਏਕੋ ਗੋਪਾਲਕੋ ਅਹੋਸਿ. ਸੋ ਸਤ੍ਥਰਿ ਪਰਿਨਿਬ੍ਬੁਤੇ ਅਞ੍ਞਤਰਂ ਥੇਰਂ ਉਪਸਙ੍ਕਮਿਤ੍ਵਾ ਤਸ੍ਸ ਸਨ੍ਤਿਕੇ ਬੁਦ੍ਧਗੁਣਪਟਿਸਂਯੁਤ੍ਤਂ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸੋ ‘‘ਕੁਹਿਂ ਭਗਵਾ’’ਤਿ ਪੁਚ੍ਛਿਤ੍ਵਾ ਪਰਿਨਿਬ੍ਬੁਤਭਾਵਂ ਸੁਤ੍ਵਾ ‘‘ਏਵਂ ਮਹਾਨੁਭਾਵਾ ਬੁਦ੍ਧਾਪਿ ਨਾਮ ਅਨਿਚ੍ਚਤਾਵਸਂ ਗਚ੍ਛਨ੍ਤਿ, ਅਹੋ ਸਙ੍ਖਾਰਾ ਅਦ੍ਧੁਵਾ’’ਤਿ ਅਨਿਚ੍ਚਸਞ੍ਞਂ ਪਟਿਲਭਿ. ਤਂ ਥੇਰੋ ਬੋਧਿਪੂਜਾਯ ਉਸ੍ਸਾਹੇਸਿ. ਸੋ ਕਾਲੇਨ ਕਾਲਂ ਬੋਧਿਰੁਕ੍ਖਸਮੀਪਂ ਗਨ੍ਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਬੁਦ੍ਧਗੁਣੇ ਅਨੁਸ੍ਸਰਨ੍ਤੋ ਬੋਧਿਂ ਵਨ੍ਦਤਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੋਸਲਰਟ੍ਠੇ ਇਬ੍ਭਕੁਲੇ ਨਿਬ੍ਬਤ੍ਤਿਤ੍ਵਾ ਸਨ੍ਧਿਤੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਅਨਿਚ੍ਚਤਾਪਟਿਸਂਯੁਤ੍ਤਂ ਧਮ੍ਮਕਥਂ ਸੁਤ੍ਵਾ ਸਂਵੇਗਜਾਤੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਹੋਸਿ. ਸੋ ਅਤ੍ਤਨੋ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਬੋਧਿਵਨ੍ਦਨਂ ਬੁਦ੍ਧਾਨੁਸ੍ਸਤਿਂ ਅਨਿਚ੍ਚਸਞ੍ਞਾਪਟਿਲਾਭਞ੍ਚ ਅਨੁਸ੍ਸਰਿਤ੍ਵਾ ਤਦੁਪਨਿਸ੍ਸਯੇਨ ਅਤ੍ਤਨੋ ਵਿਸੇਸਾਧਿਗਮਂ ਪਕਾਸੇਨ੍ਤੋ –

੨੧੭. ‘‘ਅਸ੍ਸਤ੍ਥੇ ਹਰਿਤੋਭਾਸੇ, ਸਂਵਿਰੂਲ਼੍ਹਮ੍ਹਿ ਪਾਦਪੇ;

ਏਕਂ ਬੁਦ੍ਧਗਤਂ ਸਞ੍ਞਂ, ਅਲਭਿਤ੍ਥਂ ਪਤਿਸ੍ਸਤੋ.

੨੧੮. ‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਤਸ੍ਸਾ ਸਞ੍ਞਾਯ ਵਾਹਸਾ, ਪਤ੍ਤੋ ਮੇ ਆਸਵਕ੍ਖਯੋ’’ਤਿ. –

ਦ੍ਵੇ ਗਾਥਾ ਅਭਾਸਿ.

ਤਤ੍ਥ ਅਸ੍ਸਤ੍ਥੇਤਿ ਅਸ੍ਸਤ੍ਥਟ੍ਠਾਨੀਯੇ, ਯ੍ਵਾਯਂ ਏਤਰਹਿ ਅਮ੍ਹਾਕਂ ਭਗਵਤੋ ਬੋਧਿਰੁਕ੍ਖੋ ਅਸ੍ਸਤ੍ਥੋ, ਏਤਸ੍ਸ ਠਾਨੇ ਤਦਾ ਸਿਖਿਸ੍ਸ ਭਗਵਤੋ ਬੋਧਿਰੁਕ੍ਖੋ ਪੁਣ੍ਡਰੀਕੋ ਠਿਤੋਤਿ ਸੋ ਅਸ੍ਸਤ੍ਥਟ੍ਠਾਨੀਯਤਾਯ ‘‘ਅਸ੍ਸਤ੍ਥੇ’’ਤਿ ਵੁਤ੍ਤਂ. ਸਤ੍ਤਾਨਂ ਅਸ੍ਸਾਸਜਨਨਤੋ ਵਾ. ਅਪਰੇ ਪਨ ‘‘ਅਸ੍ਸਤ੍ਥਰੁਕ੍ਖਮੂਲੇ ਨਿਸੀਦਿਤ੍ਵਾ ਤਦਾ ਬੁਦ੍ਧਾਨੁਸ੍ਸਤਿਯਾ ਭਾਵਿਤਤ੍ਤਾ ਥੇਰੋ ‘ਅਸ੍ਸਤ੍ਥੇ’ਤਿ ਅਵੋਚਾ’’ਤਿ ਵਦਨ੍ਤਿ. ਹਰਿਤੋਭਾਸੇਤਿ ਹਰਿਤੇਹਿ ਸਾਰਮਣਿਵਣ੍ਣੇਹਿ ਓਭਾਸਮਾਨੇ. ਸਂਵਿਰੂਲ਼੍ਹਮ੍ਹੀਤਿ ਸੁਟ੍ਠੁ ਵਿਰੂਲ਼੍ਹੇ ਸੁਪ੍ਪਤਿਟ੍ਠਿਤੇ, ਸੁਘਨਨਿਚਿਤਪਤ੍ਤਪਲਾਸਪਲ੍ਲਵੇਹਿ ਵਿਰੂਲ਼੍ਹਸਞ੍ਛਨ੍ਨੇਤਿ ਚ ਵਦਨ੍ਤਿ. ਪਾਦਪੇਤਿ ਰੁਕ੍ਖੇ. ਏਕਂ ਬੁਦ੍ਧਗਤਂ ਸਞ੍ਞਂ, ਅਲਭਿਤ੍ਥਂ ਪਤਿਸ੍ਸਤੋਤਿ ਬੁਦ੍ਧਾਰਮ੍ਮਣਂ ਆਰਮ੍ਮਣਸ੍ਸ ਏਕਜਾਤਿਯਤ੍ਤਾ ਏਕਂ ‘‘ਇਤਿਪਿ ਸੋ ਭਗਵਾ’’ਤਿਆਦਿਨਯਪ੍ਪਵਤ੍ਤਂ ਬੁਦ੍ਧਾਨੁਸ੍ਸਤਿਸਹਗਤਂ ਸਞ੍ਞਂ ਬੁਦ੍ਧਗੁਣਾਨਂ ਪਤਿਪਤਿਸਰਣਤੋ ਪਤਿਸ੍ਸਤੋ ਹੁਤ੍ਵਾ ਅਲਭਿਂ.

ਕਦਾ ਪਨ ਸਾ ਸਞ੍ਞਾ ਲਦ੍ਧਾ, ਕੀਵਤਾਯ ਸਿਦ੍ਧਾਤਿ ਆਹ ‘‘ਏਕਤਿਂਸੇ ਇਤੋ ਕਪ੍ਪੇ’’ਤਿਆਦਿ. ਇਤੋ ਭਦ੍ਦਕਪ੍ਪਤੋ ਉਦ੍ਧਂ ਆਰੋਹਨਵਸੇਨ ਏਕਤਿਂਸੇ ਕਪ੍ਪੇ. ਯਂ ਸਞ੍ਞਨ੍ਤਿ ਯਂ ਬੁਦ੍ਧਾਨੁਸ੍ਸਤਿਸਹਗਤਂ ਸਞ੍ਞਂ, ਯਂ ਵਾ ਬੁਦ੍ਧਾਨਂ ਅਨਿਚ੍ਚਤਂ ਦਿਸ੍ਵਾ ਤਦਨੁਸਾਰੇਨ ਸਬ੍ਬਾਸਙ੍ਖਾਰੇਸੁ ਤਦਾ ਅਨਿਚ੍ਚਸਞ੍ਞਂ ਅਲਭਿਂ. ਤਸ੍ਸਾ ਸਞ੍ਞਾਯ ਵਾਹਸਾਤਿ ਤਸ੍ਸਾ ਯਥਾਵੁਤ੍ਤਾਯ ਸਞ੍ਞਾਯ ਕਾਰਣਭਾਵੇਨ ਤਂ ਉਪਨਿਸ੍ਸਯਂ ਕਤ੍ਵਾ. ਪਤ੍ਤੋ ਮੇ ਆਸਵਕ੍ਖਯੋਤਿ ਇਦਾਨਿ ਮਯਾ ਆਸਵਾਨਂ ਖਯੋ ਨਿਰੋਧੋ ਅਧਿਗਤੋਤਿ ਇਮਾਯੇਵ ਚ ਇਮਸ੍ਸ ਥੇਰਸ੍ਸ ਅਪਦਾਨਗਾਥਾਪਿ. ਯਥਾਹ (ਅਪ. ਥੇਰ ੧.੨੨.੨੭-੩੦) –

‘‘ਅਸ੍ਸਤ੍ਥੇ ਹਰਿਤੋਭਾਸੇ…ਪੇ… ਪਤ੍ਤੋ ਮੇ ਆਸਵਕ੍ਖਯੋ.

‘‘ਇਤੋ ਤੇਰਸਕਪ੍ਪਮ੍ਹਿ, ਧਨਿਟ੍ਠੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਸਨ੍ਧਿਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਪਞ੍ਚਮਵਗ੍ਗਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਦੁਕਨਿਪਾਤਵਣ੍ਣਨਾ.