੭. ਅਨੂਪਮਤ੍ਥੇਰਗਾਥਾਵਣ੍ਣਨਾ

ਨਨ੍ਦਮਾਨਾਗਤਂ ਚਿਤ੍ਤਾਤਿ ਆਯਸ੍ਮਤੋ ਅਨੂਪਮਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਉਪਚਿਨਨ੍ਤੋ ਇਤੋ ਏਕਤਿਂਸੇ ਕਪ੍ਪੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਪਦੁਮਂ ਨਾਮ ਪਚ੍ਚੇਕਬੁਦ੍ਧਂ ਪਿਣ੍ਡਾਯ ਚਰਨ੍ਤਂ ਰਥਿਯਂ ਦਿਸ੍ਵਾ ਪਸਨ੍ਨਮਾਨਸੋ ਅਙ੍ਕੋਲਪੁਪ੍ਫੇਹਿ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੋਸਲਰਟ੍ਠੇ ਇਬ੍ਭਕੁਲੇ ਨਿਬ੍ਬਤ੍ਤਿਤ੍ਵਾ ਰੂਪਸਮ੍ਪਤ੍ਤਿਯਾ ਅਨੂਪਮੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਉਪਨਿਸ੍ਸਯਸਮ੍ਪਨ੍ਨਤਾਯ ਕਾਮੇ ਪਹਾਯ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਅਰਞ੍ਞੇ ਵਿਹਰਤਿ. ਤਸ੍ਸ ਚਿਤ੍ਤਂ ਬਹਿਦ੍ਧਾ ਰੂਪਾਦਿਆਰਮ੍ਮਣੇਸੁ ਵਿਧਾਵਤਿ. ਕਮ੍ਮਟ੍ਠਾਨਂ ਪਰਿਵਟ੍ਟਤਿ. ਥੇਰੋ ਵਿਧਾਵਨ੍ਤਂ ਚਿਤ੍ਤਂ ਨਿਗ੍ਗਣ੍ਹਨ੍ਤੋ –

੨੧੩. ‘‘ਨਨ੍ਦਮਾਨਾਗਤਂ ਚਿਤ੍ਤਂ, ਸੂਲਮਾਰੋਪਮਾਨਕਂ;

ਤੇਨ ਤੇਨੇਵ ਵਜਸਿ, ਯੇਨ ਸੂਲਂ ਕਲਿਙ੍ਗਰਂ.

੨੧੪. ‘‘ਤਾਹਂ ਚਿਤ੍ਤਕਲਿਂ ਬ੍ਰੂਮਿ, ਤਂ ਬ੍ਰੂਮਿ ਚਿਤ੍ਤਦੁਬ੍ਭਕਂ;

ਸਤ੍ਥਾ ਤੇ ਦੁਲ੍ਲਭੋ ਲਦ੍ਧੋ, ਮਾਨਤ੍ਥੇ ਮਂ ਨਿਯੋਜਯੀ’’ਤਿ. –

ਇਮਾਹਿ ਦ੍ਵੀਹਿ ਗਾਥਾਹਿ ਓਵਦਿ.

ਤਤ੍ਥ ਨਨ੍ਦਮਾਨਾਗਤਂ ਚਿਤ੍ਤਾਤਿ ਨਨ੍ਦਮਾਨ ਅਭਿਨਨ੍ਦਮਾਨ ਚਿਤ੍ਤ ਅਭਿਨਨ੍ਦਮਾਨਂ ਆਗਤਂ ਉਪ੍ਪਨ੍ਨਂ. ਸੂਲਮਾਰੋਪਮਾਨਕਨ੍ਤਿ ਦੁਕ੍ਖੁਪ੍ਪਤ੍ਤਿਟ੍ਠਾਨਤਾਯ ਸੂਲਸਦਿਸਤ੍ਤਾ ਸੂਲਂ ਤਂ ਤਂ ਭਵਂ ਕਮ੍ਮਕਿਲੇਸੇਹਿ ਏਤ੍ਤਕਂ ਕਾਲਂ ਆਰੋਪਿਯਮਾਨਂ. ਤੇਨ ਤੇਨੇਵ ਵਜਸਿ, ਯੇਨ ਸੂਲਂ ਕਲਿਙ੍ਗਰਨ੍ਤਿ ਯਤ੍ਥ ਯਤ੍ਥ ਸੂਲਸਙ੍ਖਾਤਾ ਭਵਾ ਕਲਿਙ੍ਗਰਸਙ੍ਖਾਤਾ ਅਧਿਕੁਟ੍ਟਨਕਾ ਕਾਮਗੁਣਾ ਚ ਤੇਨ ਤੇਨੇਵ, ਪਾਪਚਿਤ੍ਤ, ਵਜਸਿ, ਤਂ ਤਦੇਵ ਠਾਨਂ ਉਪਗਚ੍ਛਸਿ, ਅਤ੍ਤਨੋ ਅਨਤ੍ਥਂ ਨ ਸਲ੍ਲਕ੍ਖੇਸਿ.

ਤਾਹਂ ਚਿਤ੍ਤਕਲਿਂ ਬ੍ਰੂਮੀਤਿ ਤਂ ਤਸ੍ਮਾ ਪਮਤ੍ਤਭਾਵਤੋ ਚਿਤ੍ਤਕਲਿਂ ਚਿਤ੍ਤਕਾਲਕਣ੍ਣਿਂ ਅਹਂ ਕਥਯਾਮਿ. ਪੁਨਪਿ ਤਂ ਬ੍ਰੂਮਿ ਕਥੇਮਿ ਚਿਤ੍ਤਦੁਬ੍ਭਕਂ ਚਿਤ੍ਤਸਙ੍ਖਾਤਸ੍ਸ ਅਤ੍ਤਨੋ ਬਹੂਪਕਾਰਸ੍ਸ ਸਨ੍ਤਾਨਸ੍ਸ ਅਨਤ੍ਥਾਵਹਨਤੋ ਚਿਤ੍ਤਦੁਬ੍ਭਿਂ. ‘‘ਚਿਤ੍ਤਦੁਬ੍ਭਗਾ’’ਤਿਪਿ ਪਠਨ੍ਤਿ. ਚਿਤ੍ਤਸਙ੍ਖਾਤਅਲਕ੍ਖਿਕਅਪ੍ਪਪੁਞ੍ਞਾਤਿ ਅਤ੍ਥੋ. ਕਿਨ੍ਤਿ ਬ੍ਰੂਹੀਤਿ ਚੇ? ਆਹ ‘‘ਸਤ੍ਥਾ ਤੇ ਦੁਲ੍ਲਭੋ ਲਦ੍ਧੋ, ਮਾਨਤ੍ਥੇ ਮਂ ਨਿਯੋਜਯੀ’’ਤਿ. ਕਪ੍ਪਾਨਂ ਅਸਙ੍ਖ੍ਯੇਯ੍ਯਮ੍ਪਿ ਨਾਮ ਬੁਦ੍ਧਸੁਞ੍ਞੋ ਲੋਕੋ ਹੋਤਿ, ਸਤ੍ਥਰਿ ਉਪ੍ਪਨ੍ਨੇਪਿ ਮਨੁਸ੍ਸਤ੍ਤਸਦ੍ਧਾਪਟਿਲਾਭਾਦਯੋ ਦੁਲ੍ਲਭਾ ਏਵ, ਲਦ੍ਧੇਸੁ ਚ ਤੇਸੁ ਸਤ੍ਥਾਪਿ ਦੁਲ੍ਲਭੋਯੇਵ ਹੋਤਿ. ਏਵਂ ਦੁਲ੍ਲਭੋ ਸਤ੍ਥਾ ਇਦਾਨਿ ਤਯਾ ਲਦ੍ਧੋ, ਤਸ੍ਮਿਂ ਲਦ੍ਧੇ ਸਮ੍ਪਤਿਪਿ ਅਨਤ੍ਥੇ ਅਹਿਤੇ ਆਯਤਿਞ੍ਚ ਅਨਤ੍ਥਾਵਹੇ ਦੁਕ੍ਖਾਵਹੇ ਅਕੁਸਲੇ ਮਂ ਮਾ ਨਿਯੋਜੇਸੀਤਿ. ਏਵਂ ਥੇਰੋ ਅਤ੍ਤਨੋ ਚਿਤ੍ਤਂ ਓਵਦਨ੍ਤੋ ਏਵ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੩੭.੧੬-੧੯) –

‘‘ਪਦੁਮੋ ਨਾਮ ਸਮ੍ਬੁਦ੍ਧੋ, ਚਿਤ੍ਤਕੂਟੇ ਵਸੀ ਤਦਾ;

ਦਿਸ੍ਵਾਨ ਤਂ ਅਹਂ ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ.

‘‘ਅਙ੍ਕੋਲਂ ਪੁਪ੍ਫਿਤਂ ਦਿਸ੍ਵਾ, ਓਚਿਨਿਤ੍ਵਾਨਹਂ ਤਦਾ;

ਉਪਗਨ੍ਤ੍ਵਾਨ ਸਮ੍ਬੁਦ੍ਧਂ, ਪੂਜਯਿਂ ਪਦੁਮਂ ਜਿਨਂ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਨੂਪਮਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.