੯. ਉਸਭਤ੍ਥੇਰਗਾਥਾਵਣ੍ਣਨਾ

ਅਮ੍ਬਪਲ੍ਲਵਸਙ੍ਕਾਸਨ੍ਤਿ ਆਯਸ੍ਮਤੋ ਉਸਭਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਕੋਸਮ੍ਬਫਲਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਸ੍ਮਿਂ ਸਾਕਿਯਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਉਸਭੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਸਤ੍ਥੁ ਞਾਤਿਸਮਾਗਮੇ ਬੁਦ੍ਧਾਨੁਭਾਵਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿ. ਸੋ ਪਬ੍ਬਜਿਤਕਾਲਤੋ ਪਟ੍ਠਾਯ ਸਮਣਧਮ੍ਮਂ ਅਕਤ੍ਵਾ ਦਿਵਾ ਸਙ੍ਗਣਿਕਾਰਾਮੋ ਸਕਲਰਤ੍ਤਿਂ ਨਿਦ੍ਦਾਯਮਾਨੋ ਵੀਤਿਨਾਮੇਤਿ. ਸੋ ਏਕਦਿਵਸਂ ਮੁਟ੍ਠਸ੍ਸਤਿ ਅਸਮ੍ਪਜਾਨੋ ਨਿਦ੍ਦਂ ਓਕ੍ਕਨ੍ਤੋ ਸੁਪਿਨੇ ਕੇਸਮਸ੍ਸੁਂ ਓਹਾਰੇਤ੍ਵਾ ਅਮ੍ਬਪਲ੍ਲਵਵਣ੍ਣਂ ਚੀਵਰਂ ਪਾਰੁਪਿਤ੍ਵਾ ਹਤ੍ਥਿਗੀਵਾਯਂ ਨਿਸੀਦਿਤ੍ਵਾ ਨਗਰਂ ਪਿਣ੍ਡਾਯ ਪਵਿਟ੍ਠਂ ਤਤ੍ਥੇਵ ਮਨੁਸ੍ਸੇ ਸਮ੍ਪਤ੍ਤੇ ਦਿਸ੍ਵਾ ਲਜ੍ਜਾਯ ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ ਅਤ੍ਤਾਨਂ ਦਿਸ੍ਵਾ ਪਟਿਬੁਦ੍ਧੋ, ‘‘ਈਦਿਸਂ ਨਾਮ ਸੁਪਿਨਂ ਮੁਟ੍ਠਸ੍ਸਤਿਨਾ ਅਸਮ੍ਪਜਾਨੇਨ ਨਿਦ੍ਦਾਯਮਾਨੇਨ ਮਯਾ ਦਿਟ੍ਠ’’ਨ੍ਤਿ ਉਪ੍ਪਨ੍ਨਸਂਵੇਗੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੨.੧੨-੧੬) –

‘‘ਕਕੁਧਂ ਵਿਲਸਨ੍ਤਂਵ, ਦੇਵਦੇਵਂ ਨਰਾਸਭਂ;

ਰਥਿਯਂ ਪਟਿਪਜ੍ਜਨ੍ਤਂ, ਕੋਸਮ੍ਬਂ ਅਦਦਿਂ ਤਦਾ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਥ ਥੇਰੋ ਯਥਾਦਿਟ੍ਠਂ ਸੁਪਿਨਂ ਅਙ੍ਕੁਸਂ ਕਤ੍ਵਾ ਅਰਹਤ੍ਤਸ੍ਸ ਅਧਿਗਤਤ੍ਤਾ ਤਸ੍ਸੇਵ ਸੁਪਿਨਸ੍ਸ ਕਿਤ੍ਤਨਵਸੇਨ ਅਞ੍ਞਂ ਬ੍ਯਾਕਰੋਨ੍ਤੋ –

੧੯੭. ‘‘ਅਮ੍ਬਪਲ੍ਲਵਸਙ੍ਕਾਸਂ, ਅਂਸੇ ਕਤ੍ਵਾਨ ਚੀਵਰਂ;

ਨਿਸਿਨ੍ਨੋ ਹਤ੍ਥਿਗੀਵਾਯਂ, ਗਾਮਂ ਪਿਣ੍ਡਾਯ ਪਾਵਿਸਿਂ.

੧੯੮. ‘‘ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ, ਸਂਵੇਗਂ ਅਲਭਿਂ ਤਦਾ;

ਸੋਹਂ ਦਿਤ੍ਤੋ ਤਦਾ ਸਨ੍ਤੋ, ਪਤ੍ਤੋ ਮੇ ਆਸਵਕ੍ਖਯੋ’’ਤਿ. – ਗਾਥਾਦ੍ਵਯਮਾਹ;

ਤਤ੍ਥ ਅਮ੍ਬਪਲ੍ਲਵਸਙ੍ਕਾਸਂ, ਅਂਸੇ ਕਤ੍ਵਾਨ ਚੀਵਰਨ੍ਤਿ ਅਮ੍ਬਪਲ੍ਲਵਾਕਾਰਂ ਪਵਾਲ਼ਵਣ੍ਣਂ ਚੀਵਰਂ ਖਨ੍ਧੇ ਕਰਿਤ੍ਵਾ ਉਤ੍ਤਰਾਸਙ੍ਗਂ ਕਰਿਤ੍ਵਾ. ਗਾਮਨ੍ਤਿ ਅਤ੍ਤਨੋ ਰਾਜਧਾਨਿਂ ਹਤ੍ਥਿਕ੍ਖਨ੍ਧੇ ਨਿਸਿਨ੍ਨੋ ਪਿਣ੍ਡਾਯ ਪਾਵਿਸਿਂ, ਪਵਿਟ੍ਠਮਤ੍ਤੋਵ ਮਹਾਜਨੇਨ ਓਲੋਕਿਯਮਾਨੋ ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ ਠਿਤੋ ਪਟਿਬੁਜ੍ਝਿਂ, ਪਬੁਦ੍ਧੋਵ ਸਂਵੇਗਂ ਅਲਭਿਂ ਤਦਾ ‘‘ਮੁਟ੍ਠਸ੍ਸਤਿ ਅਸਮ੍ਪਜਾਨੋ ਹੁਤ੍ਵਾ ਨਿਦ੍ਦਾਯੋਕ੍ਕਮਨੇਨ ਏਤਂ ਜਾਤ’’ਨ੍ਤਿ. ਅਪਰੇ ਪਨ ‘‘ਰਾਜਾਵ ਹੁਤ੍ਵਾ ਰਤ੍ਤਿਭਾਗੇ ਏਵਰੂਪਂ ਸੁਪਿਨਂ ਦਿਸ੍ਵਾ ਵਿਭਾਤਾਯ ਰਤ੍ਤਿਯਾ ਹਤ੍ਥਿਕ੍ਖਨ੍ਧਂ ਆਰੁਯ੍ਹ ਨਗਰਵੀਥਿਯਂ ਚਰਨ੍ਤੋ ਤਂ ਸੁਪਿਨਂ ਸਰਿਤ੍ਵਾ ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ ਸਂਵੇਗਂ ਲਭਿਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਵਾ ਉਦਾਨਂ ਉਦਾਨੇਨ੍ਤੋ ਇਮਾ ਗਾਥਾ ਅਭਾਸੀ’’ਤਿ ਵਦਨ੍ਤਿ. ਦਿਤ੍ਤੋਤਿ ਤਸ੍ਮਿਂ ਰਾਜਕਾਲੇ ਜਾਤਿਮਦਭੋਗਮਦਾਦਿਪਰਿਦਪ੍ਪਿਤੋ ਸਮਾਨੋ ਸਂਵੇਗਮਲਭਿਨ੍ਤਿ ਯੋਜਨਾ.

ਉਸਭਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.