੮. ਨਿਸਭਤ੍ਥੇਰਗਾਥਾਵਣ੍ਣਨਾ

ਪਞ੍ਚ ਕਾਮਗੁਣੇ ਹਿਤ੍ਵਾਤਿ ਆਯਸ੍ਮਤੋ ਨਿਸਭਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਕਪਿਤ੍ਥਫਲਮਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੋਲਿਯਜਨਪਦੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਨਿਸਭੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਸਾਕਿਯਕੋਲਿਯਾਨਂ ਸਙ੍ਗਾਮੇ ਬੁਦ੍ਧਾਨੁਭਾਵਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਤਦਹੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੨.੭-੧੧) –

‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਰਥਿਯਂ ਪਟਿਪਜ੍ਜਨ੍ਤਂ, ਕਪਿਤ੍ਥਂ ਅਦਦਿਂ ਫਲਂ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਸੋ ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਸਹਾਯਭਿਕ੍ਖੂ ਪਮਾਦਵਿਹਾਰੇਨ ਕਾਲਂ ਵੀਤਿਨਾਮੇਨ੍ਤੇ ਦਿਸ੍ਵਾ ਤੇ ਓਵਦਨ੍ਤੋ –

੧੯੫. ‘‘ਪਞ੍ਚ ਕਾਮਗੁਣੇ ਹਿਤ੍ਵਾ, ਪਿਯਰੂਪੇ ਮਨੋਰਮੇ;

ਸਦ੍ਧਾਯ ਘਰਾ ਨਿਕ੍ਖਮ੍ਮ, ਦੁਕ੍ਖਸ੍ਸਨ੍ਤਕਰੋ ਭਵੇ’’ਤਿ. –

ਪਠਮਂ ਗਾਥਂ ਅਭਾਸਿ.

ਤਸ੍ਸਤ੍ਥੋ – ਬਾਲਪੁਥੁਜ੍ਜਨਸ੍ਸ ਪਿਯਾਯਿਤਬ੍ਬਸਭਾਵਤਾਯ ਪਿਯਰੂਪੇ ਮਨੁਞ੍ਞਸਭਾਵਤਾਯ ਮਨੋਰਮੇ ਰੂਪਾਦਿਕੇ ਪਞ੍ਚ ਕਾਮਗੁਣੇ ਕਾਮਕੋਟ੍ਠਾਸੇ ਹਿਤ੍ਵਾ ਪਹਾਯ ਪਰਿਚ੍ਚਜਿਤ੍ਵਾ ਕਮ੍ਮਫਲਸਦ੍ਧਾਯ ਰਤਨਤ੍ਤਯਸਦ੍ਧਾਯ ਚ ਵਸੇਨ ਘਰਾ ਘਰਬਨ੍ਧਨਤੋ ਨਿਕ੍ਖਮ੍ਮ ਨਿਕ੍ਖਮਿਤ੍ਵਾ ਪਬ੍ਬਜ੍ਜਂ ਉਪਗਤੋ ਵਿਞ੍ਞੁਜਾਤਿਕੋ ਪਬ੍ਬਜਿਤਕਾਲਤੋ ਪਟ੍ਠਾਯ ਘਟੇਨ੍ਤੋ ਵਾਯਮਨ੍ਤੋ ਵਟ੍ਟਦੁਕ੍ਖਸ੍ਸ ਅਨ੍ਤਕਰੋ ਭਵੇ ਭਵੇਯ੍ਯਾਤਿ. ਏਵਂ ਤੇ ਭਿਕ੍ਖੂ ਓਵਦਿਤ੍ਵਾ ‘‘ਅਯਂ ਪਰੇ ਏਵ ਸਞ੍ਞਾਪੇਨ੍ਤੋ ਵਿਹਰਤਿ, ‘‘ਸਯਂ ਪਨ ਅਕਾਰਕੋ’ਤਿ ਮਾ ਚਿਨ੍ਤਯਿਤ੍ਥਾ’’ਤਿ ਤੇਸਂ ਅਤ੍ਤਨੋ ਪਟਿਪਨ੍ਨਭਾਵਂ ਪਕਾਸੇਨ੍ਤੋ –

੧੯੬. ‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਸਮ੍ਪਜਾਨੋ ਪਤਿਸ੍ਸਤੋ’’ਤਿ. –

ਦੁਤਿਯਗਾਥਾਯ ਅਞ੍ਞਂ ਬ੍ਯਾਕਾਸਿ. ਤਤ੍ਥ ਨਾਭਿਨਨ੍ਦਾਮਿ ਮਰਣਨ੍ਤਿ ਮਰਣਂ ਨ ਅਭਿਕਙ੍ਖਾਮਿ. ਨਾਭਿਨਨ੍ਦਾਮਿ ਜੀਵਿਤਨ੍ਤਿ ਇਦਂ ਪਨ ਤਸ੍ਸ ਕਾਰਣਵਚਨਂ, ਯਸ੍ਮਾ ਨਾਭਿਨਨ੍ਦਾਮਿ ਜੀਵਿਤਂ, ਤਸ੍ਮਾ ਨਾਭਿਨਨ੍ਦਾਮਿ ਮਰਣਨ੍ਤਿ. ਯੋ ਹਿ ਆਯਤਿਂ ਜਾਤਿਜਰਾਮਰਣਾਯ ਕਿਲੇਸਾਭਿਸਙ੍ਖਾਰੇ ਆਚਿਨੋਤਿ ਉਪਚਿਨੋਤਿ, ਸੋ ਪੁਨਬ੍ਭਵਾਭਿਨਿਬ੍ਬਤ੍ਤਿਂ ਅਭਿਨਨ੍ਦਨ੍ਤੋ ਨਾਨ੍ਤਰਿਯਕਤਾਯ ਅਤ੍ਤਨੋ ਮਰਣਮ੍ਪਿ ਅਭਿਨਨ੍ਦਤਿ ਨਾਮ ਕਾਰਣਸ੍ਸ ਅਪ੍ਪਹੀਨਤ੍ਤਾ, ਖੀਣਾਸਵੋ ਪਨ ਸਬ੍ਬਸੋ ਆਚਯਗਾਮਿਧਮ੍ਮੇ ਪਹਾਯ ਅਪਚਯਗਾਮਿਧਮ੍ਮੇ ਪਤਿਟ੍ਠਿਤੋ ਪਰਿਞ੍ਞਾਤਵਤ੍ਥੁਕੋ ਸਬ੍ਬਸੋ ਜੀਵਿਤਂ ਅਨਭਿਨਨ੍ਦਨ੍ਤੋ ਮਰਣਮ੍ਪਿ ਅਨਭਿਨਨ੍ਦਤਿ ਨਾਮ ਕਾਰਣਸ੍ਸ ਏਵ ਸੁਪ੍ਪਹੀਨਤ੍ਤਾ. ਤੇਨਾਹ – ‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤ’’ਨ੍ਤਿ. ਯਦਿ ਏਵਂ ਖੀਣਾਸਵਸ੍ਸ ਪਰਿਨਿਬ੍ਬਾਨਾਭਿਕਙ੍ਖਾ, ਯਾਵ ਪਰਿਨਿਬ੍ਬਾਨਾ ਅਵਟ੍ਠਾਨਞ੍ਚ ਕਥਨ੍ਤਿ ਆਹ ‘‘ਕਾਲਞ੍ਚ ਪਟਿਕਙ੍ਖਾਮਿ, ਸਮ੍ਪਜਾਨੋ ਪਤਿਸ੍ਸਤੋ’’ਤਿ, ਕਿਲੇਸਪਰਿਨਿਬ੍ਬਾਨੇ ਸਿਦ੍ਧੇ ਸਤਿਪਞ੍ਞਾਵੇਪੁਲ੍ਲਪ੍ਪਤ੍ਤਿਯਾ ਸਤੋ ਸਮ੍ਪਜਾਨੋ ਕੇਵਲਂ ਖਨ੍ਧਪਰਿਨਿਬ੍ਬਾਨਕਾਲਂ ਪਟਿਕਙ੍ਖਾਮਿ, ਤਂ ਉਦਿਕ੍ਖਮਾਨੋ ਆਗਮਯਮਾਨੋ ਵਿਹਰਾਮਿ, ਨ ਪਨ ਮੇ ਮਰਣੇ ਜੀਵਿਤੇ ਵਾ ਅਭਿਨਨ੍ਦਨਾ ਅਤ੍ਥਿ ਅਰਹਤ੍ਤਮਗ੍ਗੇਨੇਵ ਤਸ੍ਸ ਸਮੁਗ੍ਘਾਟਿਤਤ੍ਤਾਤਿ.

ਨਿਸਭਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.