੬. ਨਿਤਕਤ੍ਥੇਰਗਾਥਾਵਣ੍ਣਨਾ

ਕਸ੍ਸ ਸੇਲੂਪਮਂ ਚਿਤ੍ਤਨ੍ਤਿ ਆਯਸ੍ਮਤੋ ਨਿਤਕਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬਨ੍ਧੁਮਤੀਨਗਰੇ ਆਰਾਮਗੋਪਕੋ ਹੁਤ੍ਵਾ ਜੀਵਨ੍ਤੋ ਏਕਦਿਵਸਂ ਭਗਵਨ੍ਤਂ ਆਕਾਸੇਨ ਗਚ੍ਛਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਨਾਲ਼ਿਕੇਰਫਲਂ ਦਾਤੁਕਾਮੋ ਅਹੋਸਿ. ਸਤ੍ਥਾ ਤਂ ਅਨੁਗ੍ਗਣ੍ਹਨ੍ਤੋ ਆਕਾਸੇਯੇਵ ਠਤ੍ਵਾ ਪਟਿਗ੍ਗਣ੍ਹਿ. ਸੋ ਤਂ ਦਤ੍ਵਾ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਸਂਵੇਦਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੋਸਲਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਨਿਤਕੋਤਿ ਲਦ੍ਧਨਾਮੋ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਅਰਞ੍ਞੇ ਵਿਹਰਨ੍ਤੋ ਘਟੇਨ੍ਤੋ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੧.੯੧-੯੯) –

‘‘ਨਗਰੇ ਬਨ੍ਧੁਮਤਿਯਾ, ਆਰਾਮਿਕੋ ਅਹਂ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਗਚ੍ਛਨ੍ਤਂ ਅਨਿਲਞ੍ਜਸੇ.

‘‘ਨਾਲ਼ਿਕੇਰਫਲਂ ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ;

ਆਕਾਸੇ ਠਿਤਕੋ ਸਨ੍ਤੋ, ਪਟਿਗ੍ਗਣ੍ਹਿ ਮਹਾਯਸੋ.

‘‘ਵਿਤ੍ਤਿਸਞ੍ਜਨਨੋ ਮਯ੍ਹਂ, ਦਿਟ੍ਠਧਮ੍ਮਸੁਖਾਵਹੋ;

ਫਲਂ ਬੁਦ੍ਧਸ੍ਸ ਦਤ੍ਵਾਨ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਅਧਿਗਚ੍ਛਿਂ ਤਦਾ ਪੀਤਿਂ, ਵਿਪੁਲਞ੍ਚ ਸੁਖੁਤ੍ਤਮਂ;

ਉਪ੍ਪਜ੍ਜਤੇਵ ਰਤਨਂ, ਨਿਬ੍ਬਤ੍ਤਸ੍ਸ ਤਹਿਂ ਤਹਿਂ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਦਿਬ੍ਬਚਕ੍ਖੁ ਵਿਸੁਦ੍ਧਂ ਮੇ, ਸਮਾਧਿਕੁਸਲੋ ਅਹਂ;

ਅਭਿਞ੍ਞਾਪਾਰਮਿਪ੍ਪਤ੍ਤੋ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਥੇਰੇ ਫਲਸੁਖੇਨ ਨਿਬ੍ਬਾਨਸੁਖੇਨ ਵਿਹਰਨ੍ਤੇ ਪਧਾਨਪਰਿਗ੍ਗਾਹਕੋ ਥੇਰੋ ਤਂ ਆਰਞ੍ਞਾਯਤਨਂ ਗਨ੍ਤ੍ਵਾ ਤਤ੍ਥ ਵਸਨ੍ਤਾਨਂ ਭਿਕ੍ਖੂਨਂ ਪਰਿਗ੍ਗਣ੍ਹਨਤ੍ਥਂ ‘‘ਕਸ੍ਸ ਸੇਲੂਪਮ’’ਨ੍ਤਿਆਦਿਨਾ ਪਠਮਂ ਗਾਥਮਾਹ.

੧੯੧. ਤਤ੍ਥ ਕਸ੍ਸ ਸੇਲੂਪਮਂ ਚਿਤ੍ਤਂ, ਠਿਤਂ ਨਾਨੁਪਕਮ੍ਪਤੀਤਿ ਇਮਸ੍ਮਿਂ ਅਰਞ੍ਞਾਯਤਨੇ ਵਸਨ੍ਤੇਸੁ ਕਸ੍ਸ ਭਿਕ੍ਖੁਨੋ ਚਿਤ੍ਤਂ ਅਗ੍ਗਫਲਾਧਿਗਮੇਨ ਏਕਘਨਸਿਲਾਮਯਪਬ੍ਬਤੂਪਮਂ ਸਬ੍ਬੇਸਂ ਇਞ੍ਜਨਾਨਂ ਅਭਾਵਤੋ ਵਸੀਭਾਵਪ੍ਪਤ੍ਤਿਯਾ ਚ ਠਿਤਂ ਸਬ੍ਬੇਹਿਪਿ ਲੋਕਧਮ੍ਮੇਹਿ ਨਾਨੁਕਮ੍ਪਤਿ ਨ ਵੇਧਤਿ. ਇਦਾਨਿਸ੍ਸ ਅਕਮ੍ਪਨਾਕਾਰਂ ਸਦ੍ਧਿਂ ਕਾਰਣੇਨ ਦਸ੍ਸੇਤੁਂ ‘‘ਵਿਰਤ੍ਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਵਿਰਤ੍ਤਂ ਰਜਨੀਯੇਸੂਤਿ ਵਿਰਾਗਸਙ੍ਖਾਤੇਨ ਅਰਿਯਮਗ੍ਗੇਨ ਰਜਨੀਯੇਸੁ ਰਾਗੁਪ੍ਪਤ੍ਤਿਹੇਤੁਭੂਤੇਸੁ ਤੇਭੂਮਕਧਮ੍ਮੇਸੁ ਵਿਰਤ੍ਤਂ, ਤਤ੍ਥ ਸਬ੍ਬਸੋ ਸਮੁਚ੍ਛਿਨ੍ਨਰਾਗਨ੍ਤਿ ਅਤ੍ਥੋ. ਕੁਪ੍ਪਨੀਯੇਤਿ ਪਟਿਘਟ੍ਠਾਨੀਯੇ, ਸਬ੍ਬਸ੍ਮਿਮ੍ਪਿ ਆਘਾਤਵਤ੍ਥੁਸ੍ਮਿਂ. ਨ ਕੁਪ੍ਪਤੀਤਿ ਨ ਦੁਸ੍ਸਤਿ ਨ ਵਿਕਾਰਂ ਆਪਜ੍ਜਤਿ. ਯਸ੍ਸੇਵਂ ਭਾਵਿਤਂ ਚਿਤ੍ਤਨ੍ਤਿ ਯਸ੍ਸ ਅਰਿਯਪੁਗ੍ਗਲਸ੍ਸ ਚਿਤ੍ਤਂ ਮਨੋ ਏਵਂ ਵੁਤ੍ਤਨਯੇਨ ਤਾਦਿਭਾਵੇਨ ਭਾਵਿਤਂ, ਕੁਤੋ ਤਂ ਦੁਕ੍ਖਮੇਸ੍ਸਤੀਤਿ ਤਂ ਪੁਗ੍ਗਲਂ ਕੁਤੋ ਸਤ੍ਤਤੋ ਸਙ੍ਖਾਰਤੋ ਵਾ ਦੁਕ੍ਖਂ ਉਪਗਮਿਸ੍ਸਤਿ, ਨ ਤਾਦਿਸਸ੍ਸ ਦੁਕ੍ਖਂ ਅਤ੍ਥੀਤਿ ਅਤ੍ਥੋ.

੧੯੨. ਏਵਂ ਅਨਿਯਮਵਸੇਨ ਪੁਚ੍ਛਿਤਮਤ੍ਥਂ ਨਿਤਕਤ੍ਥੇਰੋ ਅਤ੍ਤੂਪਨਾਯਿਕਂ ਕਤ੍ਵਾ ਵਿਸ੍ਸਜ੍ਜੇਨ੍ਤੋ ‘‘ਮਮ ਸੇਲੂਪਮਂ ਚਿਤ੍ਤ’’ਨ੍ਤਿਆਦਿਨਾ ਦੁਤਿਯਗਾਥਾਯ ਅਞ੍ਞਂ ਬ੍ਯਾਕਾਸਿ. ਤਂ ਵੁਤ੍ਤਤ੍ਥਮੇਵ.

ਨਿਤਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.