੫. ਸਮ੍ਬੁਲਕਚ੍ਚਾਨਤ੍ਥੇਰਗਾਥਾਵਣ੍ਣਨਾ

ਦੇਵੋ ਚਾਤਿ ਆਯਸ੍ਮਤੋ ਸਮ੍ਬੁਲਕਚ੍ਚਾਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਇਤੋ ਚਤੁਨਵੁਤਿਕਪ੍ਪਮਤ੍ਥਕੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤਰਂਸਿਂ ਨਾਮ ਪਚ੍ਚੇਕਬੁਦ੍ਧਂ ਨਿਰੋਧਾ ਵੁਟ੍ਠਹਿਤ੍ਵਾ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਤਾਲਫਲਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਗਹਪਤਿਕੁਲੇ ਨਿਬ੍ਬਤ੍ਤਿਤ੍ਵਾ ‘‘ਸਮ੍ਬੁਲੋ’’ਤਿ ਲਦ੍ਧਨਾਮੋ ਕਚ੍ਚਾਨਗੋਤ੍ਤਤਾਯ ਸਮ੍ਬੁਲਕਚ੍ਚਾਨੋਤਿ ਪਞ੍ਞਾਯਿਤ੍ਥ.

ਸੋ ਵਯਪ੍ਪਤ੍ਤੋ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਹਿਮਵਨ੍ਤਸਮੀਪੇ ਭੇਰਵਾਯ ਨਾਮ ਪਬ੍ਬਤਗੁਹਾਯਂ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਵਿਹਰਤਿ. ਅਥੇਕਦਿਵਸਂ ਮਹਾ ਅਕਾਲਮੇਘੋ ਸਤਪਟਲਸਹਸ੍ਸਪਟਲੋ ਥਨੇਨ੍ਤੋ ਗਜ੍ਜਨ੍ਤੋ ਵਿਜ੍ਜੁਲ੍ਲਤਾ ਨਿਚ੍ਛਾਰੇਨ੍ਤੋ ਗਲ਼ਗਲ਼ਾਯਨ੍ਤੋ ਉਟ੍ਠਹਿਤ੍ਵਾ ਵਸ੍ਸਿਤੁਂ ਆਰਭਿ, ਅਸਨਿਯੋ ਫਲਿਂਸੁ. ਤਂ ਸਦ੍ਦਂ ਸੁਤ੍ਵਾ ਅਚ੍ਛਤਰਚ੍ਛੁਵਨਮਹਿਂਸਹਤ੍ਥਿਆਦਯੋ ਭੀਤਤਸਿਤਾ ਭੀਤਰਵਂ ਵਿਰਵਿਂਸੁ. ਥੇਰੋ ਪਨ ਆਰਦ੍ਧਵਿਪਸ੍ਸਨਤ੍ਤਾ ਕਾਯੇ ਜੀਵਿਤੇ ਚ ਨਿਰਪੇਕ੍ਖੋ ਵਿਗਤਲੋਮਹਂਸੋ ਤਂ ਅਚਿਨ੍ਤੇਨ੍ਤੋ ਵਿਪਸ੍ਸਨਾਯਮੇਵ ਕਮ੍ਮਂ ਕਰੋਨ੍ਤੋ ਘਮ੍ਮਾਪਗਮੇਨ ਉਤੁਸਪ੍ਪਾਯਲਾਭੇਨ ਸਮਾਹਿਤਚਿਤ੍ਤੋ ਤਾਵਦੇਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਸਹ ਅਭਿਞ੍ਞਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੧.੮੫-੯੦) –

‘‘ਸਤਰਂਸੀ ਨਾਮ ਭਗਵਾ, ਸਯਮ੍ਭੂ ਅਪਰਾਜਿਤੋ;

ਵਿਵੇਕਾ ਵੁਟ੍ਠਹਿਤ੍ਵਾਨ, ਗੋਚਰਾਯਾਭਿਨਿਕ੍ਖਮਿ.

‘‘ਫਲਹਤ੍ਥੋ ਅਹਂ ਦਿਸ੍ਵਾ, ਉਪਗਚ੍ਛਿਂ ਨਰਾਸਭਂ;

ਪਸਨ੍ਨਚਿਤ੍ਤੋ ਸੁਮਨੋ, ਤਾਲਫਲਂ ਅਦਾਸਹਂ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਸੋਮਨਸ੍ਸਜਾਤੋ ਉਦਾਨਵਸੇਨ ਅਞ੍ਞਂ ਬ੍ਯਾਕਰੋਨ੍ਤੋ –

੧੮੯. ‘‘ਦੇਵੋ ਚ ਵਸ੍ਸਤਿ, ਦੇਵੋ ਚ ਗਲ਼ਗਲ਼ਾਯਤਿ,

ਏਕਕੋ ਚਾਹਂ ਭੇਰਵੇ ਬਿਲੇ ਵਿਹਰਾਮਿ;

ਤਸ੍ਸ ਮਯ੍ਹਂ ਏਕਕਸ੍ਸ ਭੇਰਵੇ ਬਿਲੇ ਵਿਹਰਤੋ,

ਨਤ੍ਥਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ.

੧੯੦. ‘‘ਧਮ੍ਮਤਾ ਮਮੇਸਾ ਯਸ੍ਸ ਮੇ, ਏਕਕਸ੍ਸ ਭੇਰਵੇ ਬਿਲੇ;

ਵਿਹਰਤੋ ਨਤ੍ਥਿ ਭਯਂ ਵਾ, ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ’’ਤਿ. –

ਗਾਥਾਦ੍ਵਯਂ ਅਭਾਸਿ.

ਤਤ੍ਥ ਦੇਵੋ ਚ ਵਸ੍ਸਤਿ, ਦੇਵੋ ਚ ਗਲ਼ਗਲ਼ਾਯਤੀਤਿ ਦੇਵੋ ਮੇਘੋ ਵਸ੍ਸਤਿ ਚ, ‘‘ਗਲ਼ਗਲ਼ਾ’’ਤਿ ਚ ਕਰੋਨ੍ਤੋ ਗਜ੍ਜਤੀਤਿ ਅਤ੍ਥੋ. ਗਜ੍ਜਨ੍ਤਸ੍ਸ ਹਿ ਅਨੁਕਰਣਮੇਤਂ. ਏਕਕੋ ਚਾਹਂ ਭੇਰਵੇ ਬਿਲੇ ਵਿਹਰਾਮੀਤਿ ਅਹਞ੍ਚ ਏਕਕੋ ਅਸਹਾਯੋ ਸਪ੍ਪਟਿਭਯਾਯਂ ਪਬ੍ਬਤਗੁਹਾਯਂ ਵਸਾਮਿ, ਤਸ੍ਸ ਮਯ੍ਹਂ ਏਵਂਭੂਤਸ੍ਸ ਮੇ ਸਤੋ ਨਤ੍ਥਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾਤਿ ਚਿਤ੍ਤੁਤ੍ਰਾਸਸਞ੍ਞਿਤਂ ਭਯਂ ਵਾ ਤਂਨਿਮਿਤ੍ਤਕਂ ਸਰੀਰਸ੍ਸ ਛਮ੍ਭਿਤਤ੍ਤਂ ਵਾ ਲੋਮਹਂਸਨਮਤ੍ਤਂ ਵਾ ਨਤ੍ਥਿ.

ਕਸ੍ਮਾਤਿ ਤਤ੍ਥ ਕਾਰਣਮਾਹ ‘‘ਧਮ੍ਮਤਾ ਮਮੇਸਾ’’ਤਿ. ਅਪਰਿਞ੍ਞਾਤਵਤ੍ਥੁਕਸ੍ਸ ਹਿ ਤਤ੍ਥ ਅਪ੍ਪਹੀਨਚ੍ਛਨ੍ਦਰਾਗਤਾਯ ਭਯਾਦਿਨਾ ਭਵਿਤਬ੍ਬਂ, ਮਯਾ ਪਨ ਸਬ੍ਬਸੋ ਤਤ੍ਥ ਪਰਿਞ੍ਞਾਤਂ, ਤਤ੍ਥ ਚ ਛਨ੍ਦਰਾਗੋ ਸਮੁਚ੍ਛਿਨ੍ਨੋ, ਤਸ੍ਮਾ ਭਯਾਦੀਨਂ ਅਭਾਵੋ ਧਮ੍ਮਤਾ ਮਮੇਸਾ ਮਮ ਧਮ੍ਮਸਭਾਵੋ ਏਸੋਤਿ ਅਞ੍ਞਂ ਬ੍ਯਾਕਾਸਿ.

ਸਮ੍ਬੁਲਕਚ੍ਚਾਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.