੪. ਇਸਿਦਿਨ੍ਨਤ੍ਥੇਰਗਾਥਾਵਣ੍ਣਨਾ

ਦਿਟ੍ਠਾ ਮਯਾਤਿ ਆਯਸ੍ਮਤੋ ਇਸਿਦਿਨ੍ਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਬੀਜਨਿਂ ਗਹੇਤ੍ਵਾ ਬੋਧਿਯਾ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸੁਨਾਪਰਨ੍ਤਜਨਪਦੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿਤ੍ਵਾ ਇਸਿਦਿਨ੍ਨੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਸਤ੍ਥੁ ਚਨ੍ਦਨਮਾਲ਼ਪਟਿਗ੍ਗਹਣੇ ਪਾਟਿਹਾਰਿਯਂ ਦਿਸ੍ਵਾ ਪਸਨ੍ਨਮਾਨਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਸੋਤਾਪਨ੍ਨੋ ਹੁਤ੍ਵਾ ਅਗਾਰਂ ਅਜ੍ਝਾਵਸਤਿ. ਤਸ੍ਸ ਹਿਤਾਨੁਕਮ੍ਪਿਨੀ ਦੇਵਤਾ ਤਂ ਚੋਦੇਨ੍ਤੀ –

੧੮੭. ‘‘ਦਿਟ੍ਠਾ ਮਯਾ ਧਮ੍ਮਧਰਾ ਉਪਾਸਕਾ, ਕਾਮਾ ਅਨਿਚ੍ਚਾ ਇਤਿ ਭਾਸਮਾਨਾ;

ਸਾਰਤ੍ਤਰਤ੍ਤਾ ਮਣਿਕੁਣ੍ਡਲੇਸੁ, ਪੁਤ੍ਤੇਸੁ ਦਾਰੇਸੁ ਚ ਤੇ ਅਪੇਕ੍ਖਾ.

੧੮੮. ‘‘ਅਦ੍ਧਾ ਨ ਜਾਨਨ੍ਤਿ ਯਤੋਧ ਧਮ੍ਮਂ, ਕਾਮਾ ਅਨਿਚ੍ਚਾ ਇਤਿ ਚਾਪਿ ਆਹੁ;

ਰਾਗਞ੍ਚ ਤੇਸਂ ਨ ਬਲਤ੍ਥਿ ਛੇਤ੍ਤੁਂ, ਤਸ੍ਮਾ ਸਿਤਾ ਪੁਤ੍ਤਦਾਰਂ ਧਨਞ੍ਚਾ’’ਤਿ. –

ਗਾਥਾਦ੍ਵਯਮਭਾਸਿ.

ਤਤ੍ਥ ਦਿਟ੍ਠਾ ਮਯਾ ਧਮ੍ਮਧਰਾ ਉਪਾਸਕਾ, ਕਾਮਾ ਅਨਿਚ੍ਚਾ ਇਤਿ ਭਾਸਮਾਨਾਤਿ ਇਧੇਕਚ੍ਚੇ ਪਰਿਯਤ੍ਤਿਧਮ੍ਮਧਰਾ ਉਪਾਸਕਾ ਮਯਾ ਦਿਟ੍ਠਾ, ਪਰਿਯਤ੍ਤਿਧਮ੍ਮਧਰਤ੍ਤਾ ਏਵ ‘‘ਕਾਮਾ ਨਾਮੇਤੇ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾ’’ਤਿ ਕਾਮੇਸੁ ਆਦੀਨਵਪਟਿਸਂਯੁਤ੍ਤਂ ਧਮ੍ਮਂ ਭਾਸਮਾਨਾ, ਸਯਂ ਪਨ ਸਾਰਤ੍ਤਰਤ੍ਤਾ ਮਣਿਕੁਣ੍ਡਲੇਸੁ, ਪੁਤ੍ਤੇਸੁ ਦਾਰੇਸੁ ਚ ਤੇ ਅਪੇਕ੍ਖਾਤਿ ਸਾਰਤ੍ਤਾ ਹੁਤ੍ਵਾ ਬਹਲਰਾਗਰਤ੍ਤਾ ਮਣੀਸੁ ਕੁਣ੍ਡਲੇਸੁ ਚ, ਮਣਿਚਿਤੇਸੁ ਵਾ ਕੁਣ੍ਡਲੇਸੁ, ਪੁਤ੍ਤੇਸੁ ਪੁਤ੍ਤਧੀਤਾਸੁ ਦਾਰੇਸੁ ਚ ਅਧਿਗਤਸ੍ਨੇਹਾ, ਅਞ੍ਞਂ ਭਣਨ੍ਤਾ ਅਞ੍ਞਂ ਕਰੋਨ੍ਤਾ ਦਿਟ੍ਠਾ ਮਯਾਤਿ ਅਤ੍ਥੋ.

ਯਤੋਤਿ ਯਸ੍ਮਾ ਤੇ ਉਪਾਸਕਾ ਸਾਰਤ੍ਤਰਤ੍ਤਾ ਮਣਿਕੁਣ੍ਡਲੇਸੁ ਪੁਤ੍ਤੇਸੁ ਦਾਰੇਸੁ ਚ ਅਪੇਕ੍ਖਵਨ੍ਤੋ, ਤਸ੍ਮਾ ਇਧ ਇਮਸ੍ਮਿਂ ਬੁਦ੍ਧਸਾਸਨੇ ਧਮ੍ਮਂ ਯਾਥਾਵਤੋ ਅਦ੍ਧਾ ਏਕਂਸੇਨ ਨ ਜਾਨਨ੍ਤਿ. ਏਵਂ ਭੂਤਾ ਚ ‘‘ਕਾਮਾ ਅਨਿਚ੍ਚਾ’’ਇਤਿ ਚਾਪਿ ਆਹੁ ਅਹੋਸਿ, ਸਤ੍ਤਪਕਤਿ ਵਿਚਿਤ੍ਤਸਭਾਵਾਤਿ ਅਧਿਪ੍ਪਾਯੋ. ਰਾਗਞ੍ਚ ਤੇਸਂ ਨ ਬਲਤ੍ਥਿ ਛੇਤ੍ਤੁਨ੍ਤਿ ਤੇਸਂ ਉਪਾਸਕਾਨਂ ਯਸ੍ਮਾ ਰਾਗਂ ਛੇਤ੍ਤੁਂ ਸਮੁਚ੍ਛਿਨ੍ਦਿਤੁਂ ਤਾਦਿਸਂ ਞਾਣਬਲਂ ਨਤ੍ਥਿ, ਤਸ੍ਮਾ ਤੇਨ ਕਾਰਣੇਨ ਸਿਤਾ ਤਣ੍ਹਾਵਸੇਨ ਨਿਸ੍ਸਿਤਾ ਪੁਤ੍ਤਦਾਰਂ ਧਨਞ੍ਚ ਅਲ੍ਲੀਨਾ ਨ ਵਿਸ੍ਸਜ੍ਜੇਨ੍ਤੀਤਿ ਸਬ੍ਬਮੇਤਂ ਦੇਵਤਾ ਤਂਯੇਵ ਉਪਾਸਕਂ ਉਦ੍ਦਿਸ੍ਸ ਅਞ੍ਞਾਪਦੇਸੇਨ ਕਥੇਸਿ. ਤਂ ਸੁਤ੍ਵਾ ਉਪਾਸਕੋ ਸਂਵੇਗਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੮.੪੬-੫੦) –

‘‘ਵਿਪਸ੍ਸਿਨੋ ਭਗਵਤੋ, ਬੋਧਿਯਾ ਪਾਦਪੁਤ੍ਤਮੇ;

ਸੁਮਨੋ ਬੀਜਨਿਂ ਗਯ੍ਹ, ਅਬੀਜਿਂ ਬੋਧਿਮੁਤ੍ਤਮਂ.

‘‘ਏਕਨਵੁਤਿਤੋ ਕਪ੍ਪੇ, ਅਬੀਜਿਂ ਬੋਧਿਮੁਤ੍ਤਮਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੀਜਨਾਯ ਇਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤੋ ਇਮਾ ਏਵ ਗਾਥਾ ਅਭਾਸੀਤਿ.

ਇਸਿਦਿਨ੍ਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.