੯. ਭਾਰਦ੍ਵਾਜਤ੍ਥੇਰਗਾਥਾਵਣ੍ਣਨਾ

ਨਦਨ੍ਤਿ ਏਵਂ ਸਪ੍ਪਞ੍ਞਾਤਿ ਆਯਸ੍ਮਤੋ ਭਾਰਦ੍ਵਾਜਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਇਤੋ ਏਕਤਿਂਸੇ ਕਪ੍ਪੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸੁਮਨਂ ਨਾਮ ਪਚ੍ਚੇਕਬੁਦ੍ਧਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਪਰਿਪਕ੍ਕਂ ਵਲ੍ਲਿਕਾਰਫਲਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਗੋਤ੍ਤਨਾਮੇਨ ਭਾਰਦ੍ਵਾਜੋਤ੍ਵੇਵ ਪਞ੍ਞਾਯਿਤ੍ਥ. ਸੋ ਵਯਪ੍ਪਤ੍ਤੋ ਘਰਾਵਾਸਂ ਵਸਨ੍ਤੋ ਏਕਪੁਤ੍ਤਂ ਲਭਿ. ਤਸ੍ਸ ‘‘ਕਣ੍ਹਦਿਨ੍ਨੋ’’ਤਿ ਨਾਮਂ ਅਕਾਸਿ. ਤਸ੍ਸ ਵਿਞ੍ਞੁਤਂ ਪਤ੍ਤਕਾਲੇ ‘‘ਤਾਤ, ਅਸੁਕਸ੍ਸ ਨਾਮ ਆਚਰਿਯਸ੍ਸ ਸਨ੍ਤਿਕੇ ਸਿਪ੍ਪਂ ਸਿਕ੍ਖਿਤ੍ਵਾ ਏਹੀ’’ਤਿ ਤਂ ਤਕ੍ਕਸਿਲਂ ਪੇਸੇਸਿ. ਸੋ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਸਤ੍ਥੁ ਸਾਵਕਂ ਅਞ੍ਞਤਰਂ ਮਹਾਥੇਰਂ ਕਲ੍ਯਾਣਮਿਤ੍ਤਂ ਲਭਿਤ੍ਵਾ ਤਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਕਤਪੁਬ੍ਬਕਿਚ੍ਚੋ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੮.੬੬-੭੦) –

‘‘ਸੁਮਨੋ ਨਾਮ ਸਮ੍ਬੁਦ੍ਧੋ, ਤਕ੍ਕਰਾਯਂ ਵਸੀ ਤਦਾ;

ਵਲ੍ਲਿਕਾਰਫਲਂ ਗਯ੍ਹ, ਸਯਮ੍ਭੁਸ੍ਸ ਅਦਾਸਹਂ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਥਸ੍ਸ ਪਿਤਾ ਭਾਰਦ੍ਵਾਜੋ ਵੇਲ਼ੁਵਨੇ ਵਿਹਰਨ੍ਤਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਸਚ੍ਛਾਕਾਸਿ. ਅਥ ਪੁਤ੍ਤੋ ਸਤ੍ਥਾਰਂ ਵਨ੍ਦਿਤੁਂ ਰਾਜਗਹਂ ਆਗਤੋ ਸਤ੍ਥੁ ਸਨ੍ਤਿਕੇ ਨਿਸਿਨ੍ਨਂ ਪਿਤਰਂ ਦਿਸ੍ਵਾ ਤੁਟ੍ਠਚਿਤ੍ਤੋ ‘‘ਪਿਤਾਪਿ ਖੋ ਮੇ ਪਬ੍ਬਜਿਤੋ, ਕਿਂ ਨੁ ਖੋ ਤੇਨ ਪਬ੍ਬਜ੍ਜਾਕਿਚ੍ਚਂ ਮਤ੍ਥਕਂ ਪਾਪਿਤ’’ਨ੍ਤਿ ਵੀਮਂਸਨ੍ਤੋ ਖੀਣਾਸਵਭਾਵਂ ਞਤ੍ਵਾ ਤਂ ਸੀਹਨਾਦਂ ਨਦਾਪੇਤੁਕਾਮੋ, ‘‘ਸਾਧੁ, ਖੋ ਤੁਮ੍ਹੇਹਿ ਕਤਂ ਪਬ੍ਬਜਨ੍ਤੇਹਿ, ਪਬ੍ਬਜ੍ਜਾਕਿਚ੍ਚਂ ਪਨ ਮਤ੍ਥਕਂ ਪਾਪਿਤ’’ਨ੍ਤਿ ਪੁਚ੍ਛਿ. ਭਾਰਦ੍ਵਾਜੋ ਪੁਤ੍ਤਸ੍ਸ ਅਧਿਗਮਂ ਦੀਪੇਨ੍ਤੋ –

੧੭੭. ‘‘ਨਦਨ੍ਤਿ ਏਵਂ ਸਪ੍ਪਞ੍ਞਾ, ਸੀਹਾਵ ਗਿਰਿਗਬ੍ਭਰੇ;

ਵੀਰਾ ਵਿਜਿਤਸਙ੍ਗਾਮਾ, ਜੇਤ੍ਵਾ ਮਾਰਂ ਸਵਾਹਨਂ.

੧੭੮. ‘‘ਸਤ੍ਥਾ ਚ ਪਰਿਚਿਣ੍ਣੋ ਮੇ, ਧਮ੍ਮੋ ਸਙ੍ਘੋ ਚ ਪੂਜਿਤੋ;

ਅਹਞ੍ਚ ਵਿਤ੍ਤੋ ਸੁਮਨੋ, ਪੁਤ੍ਤਂ ਦਿਸ੍ਵਾ ਅਨਾਸਵ’’ਨ੍ਤਿ. – ਗਾਥਾਦ੍ਵਯਂ ਅਭਾਸਿ;

ਤਤ੍ਥ ਨਦਨ੍ਤੀਤਿ ਯਥਾਭੁਚ੍ਚਗੁਣਾਭਿਬ੍ਯਾਹਾਰਵਸੇਨ ਅਭੀਤਨਾਦਂ ਨਦਨ੍ਤਿ ਗਜ੍ਜਨ੍ਤਿ. ਏਵਨ੍ਤਿ ਇਦਾਨਿ ਵਤ੍ਤਬ੍ਬਾਕਾਰਦਸ੍ਸਨਂ. ਸਪ੍ਪਞ੍ਞਾਤਿ ਅਗ੍ਗਮਗ੍ਗਪਞ੍ਞਾਧਿਗਮੇਨ ਸਬ੍ਬਪਞ੍ਞਾਧਿਗਮੇਨ ਸਬ੍ਬਪਞ੍ਞਾਵੇਪੁਲ੍ਲਪ੍ਪਤ੍ਤਾ. ਵੀਰਾਤਿ ਚਤੁਬ੍ਬਿਧਸਮ੍ਮਪ੍ਪਧਾਨਵੀਰਿਯਸਮ੍ਪਨ੍ਨਤਾਯ ਵੀਰਾ, ਤਤੋ ਏਵ ਅਨਵਸੇਸਸਂਕਿਲੇਸਪਕ੍ਖਨਿਮ੍ਮਥਨੇਨ ਸਵਾਹਨਂ ਕਿਲੇਸਮਾਰਂ ਅਭਿਸਙ੍ਖਾਰਮਾਰਂ ਦੇਵਪੁਤ੍ਤਮਾਰਞ੍ਚ ਜੇਤ੍ਵਾ ਸਬ੍ਬਸੋ ਵਿਜਿਤਸਙ੍ਗਾਮਾ ਨਦਨ੍ਤਿ ਸਪ੍ਪਞ੍ਞਾਤਿ ਸਮ੍ਬਨ੍ਧੋ.

ਏਵਂ ਵਿਜੇਤਬ੍ਬਵਿਜਯੇਨ ਸੀਹਨਾਦਂ ਦਸ੍ਸੇਤ੍ਵਾ ਇਦਾਨਿ ਆਰਾਧੇਤਬ੍ਬਸਮਾਰਾਧਨੇਨ ਇਚ੍ਛਿਤਬ੍ਬਸਿਦ੍ਧਿਯਾ ਚ ਤਂ ਦਸ੍ਸੇਤੁਂ, ‘‘ਸਤ੍ਥਾ ਚ ਪਰਿਚਿਣ੍ਣੋ ਮੇ’’ਤਿ ਦੁਤਿਯਂ ਗਾਥਮਾਹ. ਤਤ੍ਥ ਸਤ੍ਥਾ ਚ ਪਰਿਚਿਣ੍ਣੋ ਮੇਤਿ ਮਮ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ ਯਥਾਨੁਸਿਟ੍ਠਂ ਓਵਾਦਾਨੁਸਾਸਨੀਕਰਣੇਨ ਮਯਾ ਪਰਿਚਿਣ੍ਣੋ ਉਪਾਸਿਤੋ, ਨ ਧਮ੍ਮਾਧਿਕਰਣਂ ਵਿਸੋਸਿਤੋਤਿ ਅਧਿਪ੍ਪਾਯੋ. ਧਮ੍ਮੋ ਸਙ੍ਘੋ ਚ ਪੂਜਿਤੋਤਿ ਨਵਵਿਧੋਪਿ ਲੋਕੁਤ੍ਤਰਧਮ੍ਮੋ, ਯਥਾਪਟਿਪਤ੍ਤਿਯਾਗਤਮਗ੍ਗਾਨੁਪ੍ਪਤ੍ਤਿਯਾ ਸੀਲਦਿਟ੍ਠਿਸਾਮਞ੍ਞਗਮਨੇਨ ਅਰਿਯਸਙ੍ਘੋ ਚ ਮਯਾ ਪੂਜਿਤੋ ਮਾਨਿਤੋ. ਅਹਞ੍ਚ ਵਿਤ੍ਤੋ ਸੁਮਨੋ, ਪੁਤ੍ਤਂ ਦਿਸ੍ਵਾ ਅਨਾਸਵਨ੍ਤਿ ਮਮ ਪੁਤ੍ਤਂ ਅਨਾਸਵਂ ਸਬ੍ਬਸੋ ਖੀਣਾਸਵਂ ਦਿਸ੍ਵਾ ਦਸ੍ਸਨਹੇਤੁ ਅਹਮ੍ਪਿ ਵਿਤ੍ਤੋ ਨਿਰਾਮਿਸਾਯ ਪੀਤਿਯਾ ਤੁਟ੍ਠੋ, ਤਤੋਯੇਵ ਨਿਰਾਮਿਸੇਨ ਸੋਮਨਸ੍ਸੇਨ ਸੁਮਨੋ ਜਾਤੋਤਿ ਅਤ੍ਥੋ.

ਭਾਰਦ੍ਵਾਜਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.