੧੦. ਕਣ੍ਹਦਿਨ੍ਨਤ੍ਥੇਰਗਾਥਾਵਣ੍ਣਨਾ

ਉਪਾਸਿਤਾ ਸਪ੍ਪੁਰਿਸਾਤਿ ਆਯਸ੍ਮਤੋ ਕਣ੍ਹਦਿਨ੍ਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਇਤੋ ਚਤੁਨਵੁਤੇ ਕਪ੍ਪੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸੋਭਿਤਂ ਨਾਮ ਪਚ੍ਚੇਕਬੁਦ੍ਧਂ ਦਿਸ੍ਵਾ ਪਸਨ੍ਨਚਿਤ੍ਤੋ ਪੁਨ੍ਨਾਗਪੁਪ੍ਫੇਹਿ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਕਣ੍ਹਦਿਨ੍ਨੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਉਪਨਿਸ੍ਸਯਸਮ੍ਪਤ੍ਤਿਯਾ ਚੋਦਿਯਮਾਨੋ ਧਮ੍ਮਸੇਨਾਪਤਿਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੮.੬੧-੬੫) –

‘‘ਸੋਭਿਤੋ ਨਾਮ ਸਮ੍ਬੁਦ੍ਧੋ, ਚਿਤ੍ਤਕੂਟੇ ਵਸੀ ਤਦਾ;

ਗਹੇਤ੍ਵਾ ਗਿਰਿਪੁਨ੍ਨਾਗਂ, ਸਯਮ੍ਭੁਂ ਅਭਿਪੂਜਯਿਂ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤੋ –

੧੭੯. ‘‘ਉਪਾਸਿਤਾ ਸਪ੍ਪੁਰਿਸਾ, ਸੁਤਾ ਧਮ੍ਮਾ ਅਭਿਣ੍ਹਸੋ;

ਸੁਤ੍ਵਾਨ ਪਟਿਪਜ੍ਜਿਸ੍ਸਂ, ਅਞ੍ਜਸਂ ਅਮਤੋਗਧਂ.

੧੮੦. ‘‘ਭਵਰਾਗਹਤਸ੍ਸ ਮੇ ਸਤੋ, ਭਵਰਾਗੋ ਪੁਨ ਮੇ ਨ ਵਿਜ੍ਜਤਿ;

ਨ ਚਾਹੁ ਨ ਚ ਮੇ ਭਵਿਸ੍ਸਤਿ, ਨ ਚ ਮੇ ਏਤਰਹਿ ਵਿਜ੍ਜਤੀ’’ਤਿ. –

ਗਾਥਾਦ੍ਵਯਂ ਅਭਾਸਿ.

ਤਤ੍ਥ ਉਪਾਸਿਤਾਤਿ ਪਰਿਚਰਿਤਾ ਪਟਿਪਤ੍ਤਿਪਯਿਰੁਪਾਸਨਾਯ ਪਯਿਰੁਪਾਸਿਤਾ. ਸਪ੍ਪੁਰਿਸਾਤਿ ਸਨ੍ਤੇਹਿ ਸੀਲਾਦਿਗੁਣੇਹਿ ਸਮਨ੍ਨਾਗਤਾ ਪੁਰਿਸਾ, ਅਰਿਯਪੁਗ੍ਗਲਾ ਸਾਰਿਪੁਤ੍ਤਤ੍ਥੇਰਾਦਯੋ. ਏਤੇਨ ਪੁਰਿਮਚਕ੍ਕਦ੍ਵਯਸਮ੍ਪਤ੍ਤਿਮਤ੍ਤਨੋ ਦਸ੍ਸੇਤਿ. ਨ ਹਿ ਪਤਿਰੂਪਦੇਸਵਾਸੇਨ ਵਿਨਾ ਸਪ੍ਪੁਰਿਸੂਪਨਿਸ੍ਸਯੋ ਸਮ੍ਭਵਤਿ. ਸੁਤਾ ਧਮ੍ਮਾਤਿ ਸਚ੍ਚਪਟਿਚ੍ਚਸਮੁਪ੍ਪਾਦਾਦਿਪਟਿਸਂਯੁਤ੍ਤਧਮ੍ਮਾ ਸੋਤਦ੍ਵਾਰਾਨੁਸਾਰੇਨ ਉਪਧਾਰਿਤਾ. ਏਤੇਨ ਅਤ੍ਤਨੋ ਬਾਹੁਸਚ੍ਚਂ ਦਸ੍ਸੇਨ੍ਤੋ ਪਚ੍ਛਿਮਚਕ੍ਕਦ੍ਵਯਸਮ੍ਪਤ੍ਤਿਂ ਦਸ੍ਸੇਤਿ. ਅਭਿਣ੍ਹਸੋਤਿ ਬਹੁਸੋ ਨ ਕਾਲੇਨ ਕਾਲਂ. ਇਦਞ੍ਚ ਪਦਂ ‘‘ਉਪਾਸਿਤਾ ਸਪ੍ਪੁਰਿਸਾ’’ਤਿ ਏਤ੍ਥਾਪਿ ਯੋਜੇਤਬ੍ਬਂ. ਸੁਤ੍ਵਾਨ ਪਟਿਪਜ੍ਜਿਸ੍ਸਂ, ਅਞ੍ਜਸਂ ਅਮਤੋਗਧਨ੍ਤਿ ਤੇ ਧਮ੍ਮੇ ਸੁਤ੍ਵਾ ਤਤ੍ਥ ਵੁਤ੍ਤਰੂਪਾਰੂਪਧਮ੍ਮੇ ਸਲਕ੍ਖਣਾਦਿਤੋ ਪਰਿਗ੍ਗਹੇਤ੍ਵਾ ਅਨੁਕ੍ਕਮੇਨ ਵਿਪਸ੍ਸਨਂ ਵਡ੍ਢੇਤ੍ਵਾ ਅਮਤੋਗਧਂ ਨਿਬ੍ਬਾਨਪਤਿਟ੍ਠਂ ਤਂਸਮ੍ਪਾਪਕਂ ਅਞ੍ਜਸਂ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਪਟਿਪਜ੍ਜਿਂ ਪਾਪੁਣਿਂ.

ਭਵਰਾਗਹਤਸ੍ਸ ਮੇ ਸਤੋਤਿ ਭਵਰਾਗੇਨ ਭਵਤਣ੍ਹਾਯ ਅਨਾਦਿਮਤਿ ਸਂਸਾਰੇ ਹਤਸ੍ਸ ਉਪਦ੍ਦੁਤਸ੍ਸ ਮਮ ਸਤੋ ਸਮਾਨਸ੍ਸ, ਅਗ੍ਗਮਗ੍ਗੇਨ ਵਾ ਹਤਭਵਰਾਗਸ੍ਸ. ਭਵਰਾਗੋ ਪੁਨ ਮੇ ਨ ਵਿਜ੍ਜਤੀਤਿ ਤਤੋ ਏਵ ਪੁਨ ਇਦਾਨਿ ਭਵਰਾਗੋ ਮੇ ਨਤ੍ਥਿ. ਨ ਚਾਹੁ ਨ ਮੇ ਭਵਿਸ੍ਸਤਿ, ਨ ਚ ਮੇ ਏਤਰਹਿ ਵਿਜ੍ਜਤੀਤਿ ਯਦਿਪਿ ਪੁਬ੍ਬੇ ਪੁਥੁਜ੍ਜਨਕਾਲੇ ਸੇਕ੍ਖਕਾਲੇ ਚ ਮੇ ਭਵਰਾਗੋ ਅਹੋਸਿ, ਅਗ੍ਗਮਗ੍ਗਪ੍ਪਤ੍ਤਿਤੋ ਪਨ ਪਟ੍ਠਾਯ ਨ ਚਾਹੁ ਨ ਚ ਅਹੋਸਿ, ਆਯਤਿਮ੍ਪਿ ਨ ਮੇ ਭਵਿਸ੍ਸਤਿ, ਏਤਰਹਿ ਅਧੁਨਾਪਿ ਨ ਚ ਮੇ ਵਿਜ੍ਜਤਿ ਨ ਚ ਉਪਲਬ੍ਭਤਿ, ਪਹੀਨੋਤਿ ਅਤ੍ਥੋ. ਭਵਰਾਗਵਚਨੇਨੇਵ ਚੇਤ੍ਥ ਤਦੇਕਟ੍ਠਤਾਯ ਮਾਨਾਦੀਨਮ੍ਪਿ ਅਭਾਵੋ ਵੁਤ੍ਤੋਤਿ ਸਬ੍ਬਸੋ ਪਰਿਕ੍ਖੀਣਭਵਸਂਯੋਜਨਤਂ ਦਸ੍ਸੇਤਿ.

ਕਣ੍ਹਦਿਨ੍ਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.