੭. ਨਨ੍ਦਕਤ੍ਥੇਰਗਾਥਾਵਣ੍ਣਨਾ

ਯਥਾਪਿ ਭਦ੍ਦੋ ਆਜਞ੍ਞੋਤਿ ਆਯਸ੍ਮਤੋ ਨਨ੍ਦਕਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਪਚ੍ਚਨ੍ਤਦੇਸੇ ਉਪ੍ਪਜ੍ਜਿਤ੍ਵਾ ਵਿਞ੍ਞੁਤਂ ਪਤ੍ਤੋ ਵਨਚਾਰਿਕੋ ਹੁਤ੍ਵਾ ਵਿਚਰਨ੍ਤੋ ਏਕਦਿਵਸਂ ਸਤ੍ਥੁ ਚਙ੍ਕਮਨਟ੍ਠਾਨਂ ਦਿਸ੍ਵਾ ਪਸਨ੍ਨਚਿਤ੍ਤੋ ਵਾਲੁਕਾ ਓਕਿਰਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਚਮ੍ਪਾਯਂ ਗਹਪਤਿਕੁਲੇ ਨਿਬ੍ਬਤ੍ਤਿ, ਤਸ੍ਸ ਨਨ੍ਦਕੋਤਿ ਨਾਮਂ ਅਕਂਸੁ. ਜੇਟ੍ਠਕਭਾਤਾ ਪਨਸ੍ਸ ਭਰਤੋ ਨਾਮ. ਤਸ੍ਸ ਪੁਬ੍ਬਯੋਗੋ ਅਨਨ੍ਤਰਵਤ੍ਥੁਸ੍ਮਿਂ ਆਵਿਭਵਿਸ੍ਸਤਿ. ਤੇ ਉਭੋਪਿ ਵਿਞ੍ਞੁਤਂ ਪਤ੍ਵਾ ਆਯਸ੍ਮਨ੍ਤਂ ਸੋਣਂ ਕੋਲ਼ਿਵਿਸਂ ਪਬ੍ਬਜਿਤਂ ਸੁਤ੍ਵਾ ‘‘ਸੋਣੋਪਿ ਨਾਮ ਤਥਾਸੁਖੁਮਾਲੋ ਪਬ੍ਬਜਿ, ਕਿਮਙ੍ਗਂ ਪਨ ਮਯ’’ਨ੍ਤਿ ਪਬ੍ਬਜਿਂਸੁ. ਤੇਸੁ ਭਰਤੋ ਨਚਿਰਸ੍ਸੇਵ ਵਿਪਸ੍ਸਨਂ ਵਡ੍ਢੇਤ੍ਵਾ ਛਲ਼ਭਿਞ੍ਞੋ ਅਹੋਸਿ. ਨਨ੍ਦਕੋ ਪਨ ਕਿਲੇਸਾਨਂ ਬਲਵਭਾਵੇਨ ਤਾਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤੁਂ ਨਾਸਕ੍ਖਿ, ਵਿਪਸ੍ਸਨਾਯ ਕਮ੍ਮਂ ਕਰੋਤਿ ਏਵ. ਅਥਸ੍ਸ ਭਰਤਤ੍ਥੇਰੋ ਆਸਯਂ ਞਤ੍ਵਾ ਅਵਸ੍ਸਯੋ ਭਵਿਤੁਕਾਮੋ ਤਂ ਪਚ੍ਛਾਸਮਣਂ ਕਤ੍ਵਾ ਵਿਹਾਰਤੋ ਨਿਕ੍ਖਮਿਤ੍ਵਾ ਮਗ੍ਗਸਮੀਪੇ ਨਿਸਿਨ੍ਨੋ ਵਿਪਸ੍ਸਨਾਕਥਂ ਕਥੇਸਿ.

ਤੇਨ ਚ ਸਮਯੇਨ ਸਕਟਸਤ੍ਥੇ ਗਚ੍ਛਨ੍ਤੇ ਏਕੋ ਸਕਟੇ ਯੁਤ੍ਤੋ ਗੋਣੋ ਚਿਕ੍ਖਲ੍ਲਟ੍ਠਾਨੇ ਸਕਟਂ ਉਦ੍ਧਰਿਤੁਂ ਅਸਕ੍ਕੋਨ੍ਤੋ ਪਰਿਪਤਿ. ਤਤੋ ਨਂ ਸਤ੍ਥਵਾਹੋ ਸਕਟਾ ਮੋਚੇਤ੍ਵਾ ਤਿਣਞ੍ਚ ਪਾਨੀਯਞ੍ਚ ਦਤ੍ਵਾ ਪਰਿਸ੍ਸਮਂ ਅਪਨੇਤ੍ਵਾ ਪੁਨ ਧੁਰੇ ਯੋਜੇਸਿ. ਤਤੋ ਗੋਣੋ ਵੂਪਸਨ੍ਤਪਰਿਸ੍ਸਮੋ ਲਦ੍ਧਬਲੋ ਤਂ ਸਕਟਂ ਚਿਕ੍ਖਲ੍ਲਟ੍ਠਾਨਤੋ ਉਦ੍ਧਰਿਤ੍ਵਾ ਥਲੇ ਪਤਿਟ੍ਠਾਪੇਸਿ. ਅਥ ਭਰਤਤ੍ਥੇਰੋ ਨਨ੍ਦਕਸ੍ਸ ‘‘ਪਸ੍ਸਸਿ ਨੋ ਤ੍ਵਂ, ਆਵੁਸੋ ਨਨ੍ਦਕ, ਇਮਸ੍ਸ ਕਮ੍ਮ’’ਨ੍ਤਿ ਤਂ ਨਿਦਸ੍ਸੇਤ੍ਵਾ ਤੇਨ ‘‘ਪਸ੍ਸਾਮੀ’’ਤਿ ਵੁਤ੍ਤੇ ‘‘ਇਮਮਤ੍ਥਂ ਸੁਟ੍ਠੁ ਉਪਧਾਰੇਹੀ’’ਤਿ ਆਹ. ਇਤਰੋ ‘‘ਯਥਾਯਂ ਗੋਣੋ ਵੂਪਸਨ੍ਤਪਰਿਸ੍ਸਮੋ ਪਙ੍ਕਟ੍ਠਾਨਤੋ ਭਾਰਂ ਉਬ੍ਬਹਤਿ, ਏਵਂ ਮਯਾਪਿ ਸਂਸਾਰਪਙ੍ਕਤੋ ਅਤ੍ਤਾ ਉਦ੍ਧਰਿਤਬ੍ਬੋ’’ਤਿ ਤਮੇਵਾਰਮ੍ਮਣਂ ਕਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੮.੯੦-੯੫) –

‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;

ਵਾਤਮਿਗਂ ਗਵੇਸਨ੍ਤੋ, ਚਙ੍ਕਮਂ ਅਦ੍ਦਸਂ ਅਹਂ.

‘‘ਉਚ੍ਛਙ੍ਗੇਨ ਪੁਲਿਨਂ ਗਯ੍ਹ, ਚਙ੍ਕਮੇ ਓਕਿਰਿਂ ਅਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਸੁਗਤਸ੍ਸ ਸਿਰੀਮਤੋ.

‘‘ਏਕਤਿਂਸੇ ਇਤੋ ਕਪ੍ਪੇ, ਪੁਲਿਨਂ ਓਕਿਰਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਲਿਨਸ੍ਸ ਇਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਜੇਟ੍ਠਭਾਤਿਕਸ੍ਸ ਭਰਤਤ੍ਥੇਰਸ੍ਸ ਸਨ੍ਤਿਕੇ ਅਞ੍ਞਂ ਬ੍ਯਾਕਰੋਨ੍ਤੋ –

੧੭੩. ‘‘ਯਥਾਪਿ ਭਦ੍ਦੋ ਆਜਞ੍ਞੋ, ਖਲਿਤ੍ਵਾ ਪਤਿਤਿਟ੍ਠਤਿ;

ਭਿਯ੍ਯੋ ਲਦ੍ਧਾਨ ਸਂਵੇਗਂ, ਅਦੀਨੋ ਵਹਤੇ ਧੁਰਂ.

੧੭੪. ‘‘ਏਵਂ ਦਸ੍ਸਨਸਮ੍ਪਨ੍ਨਂ, ਸਮ੍ਮਾਸਮ੍ਬੁਦ੍ਧਸਾਵਕਂ;

ਆਜਾਨੀਯਂ ਮਂ ਧਾਰੇਥ, ਪੁਤ੍ਤਂ ਬੁਦ੍ਧਸ੍ਸ ਓਰਸ’’ਨ੍ਤਿ. – ਗਾਥਾਦ੍ਵਯਂ ਅਭਾਸਿ;

ਤਤ੍ਥ ਭਿਯ੍ਯੋ ਲਦ੍ਧਾਨ ਸਂਵੇਗਂ, ਅਦੀਨੋ ਵਹਤੇ ਧੁਰਨ੍ਤਿ ‘‘ਮਯ੍ਹਂ ਜਾਤਿਬਲਵੀਰਿਯਾਨਂ ਅਨਨੁਚ੍ਛਵਿਕਮੇਤਂ ਯਦਿਦਂ ਆਗਤਸ੍ਸ ਭਾਰਸ੍ਸ ਅਵਹਨ’’ਨ੍ਤਿ ਸਂਵੇਗਂ ਲਭਿਤ੍ਵਾ ਅਦੀਨੋ ਅਦੀਨਮਾਨਸੋ ਅਲੀਨਚਿਤ੍ਤੋ. ‘‘ਅਲੀਨੋ’’ਤਿ ਵਾ ਪਾਠੋ, ਸੋ ਏਵ ਅਤ੍ਥੋ. ਭਿਯ੍ਯੋ ਪੁਨਪ੍ਪੁਨਂ ਭਿਯ੍ਯੋਸੋਮਤ੍ਤਾਯ ਅਤ੍ਤਨੋ ਧੁਰਂ ਭਾਰਂ ਵਹਤੇ ਉਬ੍ਬਹਤਿ. ਸੇਸਂ ਹੇਟ੍ਠਾ ਰਮਣੀਯਵਿਹਾਰਿਤ੍ਥੇਰਸ੍ਸ ਗਾਥਾਵਣ੍ਣਨਾਯਂ ਵੁਤ੍ਤਨਯਮੇਵ.

ਨਨ੍ਦਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.