੪. ਵਲ੍ਲਿਯਤ੍ਥੇਰਗਾਥਾਵਣ੍ਣਨਾ

ਯਂ ਕਿਚ੍ਚਂ ਦਲ਼੍ਹਵੀਰਿਯੇਨਾਤਿਆਦਿਕਾ ਆਯਸ੍ਮਤੋ ਵਲ੍ਲਿਯਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਵਿਜ੍ਜਾਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ ਅਸੀਤਿਕੋਟਿਵਿਭਵਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਬ੍ਬਤਪਾਦੇ ਅਰਞ੍ਞਾਯਤਨੇ ਏਕਿਸ੍ਸਾ ਨਦਿਯਾ ਤੀਰੇ ਅਸ੍ਸਮਂ ਕਾਰੇਤ੍ਵਾ ਵਿਹਰਨ੍ਤੋ ਅਤ੍ਤਨੋ ਅਨੁਗ੍ਗਣ੍ਹਨਤ੍ਥਂ ਉਪਗਤਂ ਸਤ੍ਥਾਰਂ ਦਿਸ੍ਵਾ ਪਸਨ੍ਨਮਾਨਸੋ ਅਜਿਨਚਮ੍ਮਂ ਪਤ੍ਥਰਿਤ੍ਵਾ ਅਦਾਸਿ. ਤਤ੍ਥ ਨਿਸਿਨ੍ਨਂ ਭਗਵਨ੍ਤਂ ਪੁਪ੍ਫੇਹਿ ਚ ਚਨ੍ਦਨੇਨ ਚ ਪੂਜੇਤ੍ਵਾ ਅਮ੍ਬਫਲਾਨਿ ਦਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿ. ਤਸ੍ਸ ਭਗਵਾ ਨਿਸਿਨ੍ਨਾਸਨਸਮ੍ਪਤ੍ਤਿਂ ਪਕਾਸੇਨ੍ਤੋ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ‘‘ਕਣ੍ਹਮਿਤ੍ਤੋ’’ਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਸਤ੍ਥੁ ਵੇਸਾਲਿਗਮਨੇ ਬੁਦ੍ਧਾਨੁਭਾਵਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਮਹਾਕਚ੍ਚਾਨਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿ. ਸੋ ਮਨ੍ਦਪਞ੍ਞੋ ਦਨ੍ਧਪਰਕ੍ਕਮੋ ਚ ਹੁਤ੍ਵਾ ਚਿਰਂ ਕਾਲਂ ਵਿਞ੍ਞੁਂ ਸਬ੍ਰਹ੍ਮਚਾਰਿਂ ਨਿਸ੍ਸਾਯੇਵ ਵਸਤਿ. ਭਿਕ੍ਖੂ ‘‘ਯਥਾ ਨਾਮ ਵਲ੍ਲਿ ਰੁਕ੍ਖਾਦੀਸੁ ਕਿਞ੍ਚਿ ਅਨਿਸ੍ਸਾਯ ਵਡ੍ਢਿਤੁਂ ਨ ਸਕ੍ਕੋਤਿ, ਏਵਮਯਮ੍ਪਿ ਕਞ੍ਚਿ ਪਣ੍ਡਿਤਂ ਅਨਿਸ੍ਸਾਯ ਵਡ੍ਢਿਤੁਂ ਨ ਸਕ੍ਕੋਤੀ’’ਤਿ ਵਲ੍ਲਿਯੋਤ੍ਵੇਵ ਸਮੁਦਾਚਰਿਂਸੁ. ਅਪਰਭਾਗੇ ਪਨ ਵੇਣੁਦਤ੍ਤਤ੍ਥੇਰਂ ਉਪਸਙ੍ਕਮਿਤ੍ਵਾ ਤਸ੍ਸ ਓਵਾਦੇ ਠਤ੍ਵਾ ਸਤੋ ਸਮ੍ਪਜਾਨੋ ਹੁਤ੍ਵਾ ਵਿਹਰਨ੍ਤੋ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਪਟਿਪਤ੍ਤਿਕ੍ਕਮਂ ਥੇਰਂ ਪੁਚ੍ਛਨ੍ਤੋ –

੧੬੭. ‘‘ਯਂ ਕਿਚ੍ਚਂ ਦਲ਼੍ਹਵੀਰਿਯੇਨ, ਯਂ ਕਿਚ੍ਚਂ ਬੋਦ੍ਧੁਮਿਚ੍ਛਤਾ;

ਕਰਿਸ੍ਸਂ ਨਾਵਰਜ੍ਝਿਸ੍ਸਂ, ਪਸ੍ਸ ਵੀਰਿਯਂ ਪਰਕ੍ਕਮਂ.

੧੬੮. ‘‘ਤ੍ਵਞ੍ਚ ਮੇ ਮਗ੍ਗਮਕ੍ਖਾਹਿ, ਅਞ੍ਜਸਂ ਅਮਤੋਗਧਂ;

ਅਹਂ ਮੋਨੇਨ ਮੋਨਿਸ੍ਸਂ, ਗਙ੍ਗਾਸੋਤੋਵ ਸਾਗਰ’’ਨ੍ਤਿ. – ਗਾਥਾਦ੍ਵਯਂ ਅਭਾਸਿ;

ਤਤ੍ਥ ਯਂ ਕਿਚ੍ਚਂ ਦਲ਼੍ਹਵੀਰਿਯੇਨਾਤਿ ਦਲ਼੍ਹੇਨ ਵੀਰਿਯੇਨ ਥਿਰੇਨ ਪਰਕ੍ਕਮੇਨ, ਦਲ਼੍ਹਵੀਰਿਯੇਨ ਵਾ ਪੁਰਿਸਧੋਰਯ੍ਹੇਨ ਯਂ ਕਿਚ੍ਚਂ ਕਾਤਬ੍ਬਂ ਪਟਿਪਜ੍ਜਿਤਬ੍ਬਂ. ਯਂ ਕਿਚ੍ਚਂ ਬੋਦ੍ਧੁਮਿਚ੍ਛਤਾਤਿ ਚਤ੍ਤਾਰਿ ਅਰਿਯਸਚ੍ਚਾਨਿ ਨਿਬ੍ਬਾਨਮੇਵ ਵਾ ਬੋਦ੍ਧੁਂ ਬੁਜ੍ਝਿਤੁਂ ਇਚ੍ਛਨ੍ਤੇਨ ਪਟਿਵਿਜ੍ਝਿਤੁਕਾਮੇਨ ਯਂ ਕਿਚ੍ਚਂ ਕਰਣੀਯਂ. ਕਰਿਸ੍ਸਂ ਨਾਵਰਜ੍ਝਿਸ੍ਸਨ੍ਤਿ ਤਮਹਂ ਦਾਨਿ ਕਰਿਸ੍ਸਂ ਨ ਵਿਰਾਧੇਸ੍ਸਂ, ਯਥਾਨੁਸਿਟ੍ਠਂ ਪਟਿਪਜ੍ਜਿਸ੍ਸਾਮਿ. ਪਸ੍ਸ ਵੀਰਿਯਂ ਪਰਕ੍ਕਮਨ੍ਤਿ ਯਥਾ ਪਟਿਪਜ੍ਜਮਾਨੇ ਧਮ੍ਮੇ ਵਿਧਿਨਾ ਈਰਣਤੋ ‘‘ਵੀਰਿਯਂ’’, ਪਰਂ ਪਰਂ ਠਾਨਂ ਅਕ੍ਕਮਨਤੋ ‘‘ਪਰਕ੍ਕਮੋ’’ਤਿ ਚ ਲਦ੍ਧਨਾਮਂ ਸਮ੍ਮਾਵਾਯਾਮਂ ਪਸ੍ਸ ਨ ਸਦ੍ਧਮੇਵਾਤਿ ਅਤ੍ਤਨੋ ਕਤ੍ਤੁਕਾਮਤਂ ਦਸ੍ਸੇਤਿ.

ਤ੍ਵਞ੍ਚਾਤਿ ਕਮ੍ਮਟ੍ਠਾਨਦਾਯਕਂ ਕਲ੍ਯਾਣਮਿਤ੍ਤਂ ਆਲਪਤਿ. ਮੇਤਿ ਮਯ੍ਹਂ. ਮਗ੍ਗਮਕ੍ਖਾਹੀਤਿ ਅਰਿਯਮਗ੍ਗਂ ਕਥੇਹਿ, ਲੋਕੁਤ੍ਤਰਮਗ੍ਗਸਮ੍ਪਾਪਕਂ ਚਤੁਸਚ੍ਚਕਮ੍ਮਟ੍ਠਾਨਂ ਕਥੇਹੀਤਿ ਅਤ੍ਥੋ. ਅਞ੍ਜਸਨ੍ਤਿ ਉਜੁਕਂ ਮਜ੍ਝਿਮਪਟਿਪਦਾਭਾਵੇਨ ਅਨ੍ਤਦ੍ਵਯਸ੍ਸ ਅਨੁਪਗਮਨਤੋ. ਅਮਤੇ ਨਿਬ੍ਬਾਨੇ ਸਮ੍ਪਾਪਕਭਾਵੇਨ ਪਤਿਟ੍ਠਿਤਤ੍ਤਾ ਅਮਤੋਗਧਂ. ਮੋਨੇਨਾਤਿ ਞਾਣੇਨ ਮਗ੍ਗਪਞ੍ਞਾਯ. ਮੋਨਿਸ੍ਸਨ੍ਤਿ ਜਾਨਿਸ੍ਸਂ ਨਿਬ੍ਬਾਨਂ ਪਟਿਵਿਜ੍ਝਿਸ੍ਸਂ ਪਾਪੁਣਿਸ੍ਸਂ. ਗਙ੍ਗਾਸੋਤੋਵ ਸਾਗਰਨ੍ਤਿ ਯਥਾ ਗਙ੍ਗਾਯ ਸੋਤੋ ਸਾਗਰਂ ਸਮੁਦ੍ਦਂ ਅਵਿਰਜ੍ਝਨ੍ਤੋ ਏਕਂਸਤੋ ਓਗਾਹਤਿ, ਏਵਂ ‘‘ਅਹਂ ਕਮ੍ਮਟ੍ਠਾਨਂ ਅਨੁਯੁਞ੍ਜਨ੍ਤੋ ਮਗ੍ਗਞਾਣੇਨ ਨਿਬ੍ਬਾਨਂ ਅਧਿਗਮਿਸ੍ਸਾਮਿ, ਤਸ੍ਮਾ ਤਂ ਕਮ੍ਮਟ੍ਠਾਨਂ ਮੇ ਆਚਿਕ੍ਖਥਾ’’ਤਿ ਥੇਰਂ ਕਮ੍ਮਟ੍ਠਾਨਂ ਯਾਚਿ.

ਤਂ ਸੁਤ੍ਵਾ ਵੇਣੁਦਤ੍ਤਤ੍ਥੇਰੋ ਤਸ੍ਸ ਕਮ੍ਮਟ੍ਠਾਨਂ ਅਦਾਸਿ. ਸੋਪਿ ਕਮ੍ਮਟ੍ਠਾਨਂ ਅਨੁਯੁਞ੍ਜਨ੍ਤੋ ਨਚਿਰਸ੍ਸੇਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੯.੭੫-੧੦੫) –

‘‘ਪਞ੍ਚ ਕਾਮਗੁਣੇ ਹਿਤ੍ਵਾ, ਪਿਯਰੂਪੇ ਮਨੋਰਮੇ;

ਅਸੀਤਿ ਕੋਟਿਯੋ ਹਿਤ੍ਵਾ, ਪਬ੍ਬਜਿਂ ਅਨਗਾਰਿਯਂ.

‘‘ਪਬ੍ਬਜਿਤ੍ਵਾਨ ਕਾਯੇਨ, ਪਾਪਕਮ੍ਮਂ ਵਿਵਜ੍ਜਯਿਂ;

ਵਚੀਦੁਚ੍ਚਰਿਤਂ ਹਿਤ੍ਵਾ, ਨਦੀਕੂਲੇ ਵਸਾਮਹਂ.

‘‘ਏਕਕਂ ਮਂ ਵਿਹਰਨ੍ਤਂ, ਬੁਦ੍ਧਸੇਟ੍ਠੋ ਉਪਾਗਮਿ;

ਨਾਹਂ ਜਾਨਾਮਿ ਬੁਦ੍ਧੋਤਿ, ਅਕਾਸਿਂ ਪਟਿਸਨ੍ਥਾਰਂ.

‘‘ਕਰਿਤ੍ਵਾ ਪਟਿਸਨ੍ਥਾਰਂ, ਨਾਮਗੋਤ੍ਤਮਪੁਚ੍ਛਹਂ;

ਦੇਵਤਾਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ.

‘‘ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ, ਮਹਾਬ੍ਰਹ੍ਮਾ ਇਧਾਗਤੋ;

ਵਿਰੋਚੇਸਿ ਦਿਸਾ ਸਬ੍ਬਾ, ਉਦਯਂ ਸੂਰਿਯੋ ਯਥਾ.

‘‘ਸਹਸ੍ਸਾਰਾਨਿ ਚਕ੍ਕਾਨਿ, ਪਾਦੇ ਦਿਸ੍ਸਨ੍ਤਿ ਮਾਰਿਸ;

ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ, ਕਥਂ ਜਾਨੇਮੁ ਤਂ ਮਯਂ.

‘‘ਨਾਮਗੋਤ੍ਤਂ ਪਵੇਦੇਹਿ, ਸਂਸਯਂ ਅਪਨੇਹਿ ਮੇ;

ਨਮ੍ਹਿ ਦੇਵਾ ਨ ਗਨ੍ਧਬ੍ਬੋ, ਨਮ੍ਹਿ ਸਕ੍ਕੋ ਪੁਰਿਨ੍ਦਦੋ.

‘‘ਬ੍ਰਹ੍ਮਭਾਵੋ ਚ ਮੇ ਨਤ੍ਥਿ, ਏਤੇਸਂ ਉਤ੍ਤਮੋ ਅਹਂ;

ਅਤੀਤੋ ਵਿਸਯਂ ਤੇਸਂ, ਦਾਲਯਿਂ ਕਾਮਬਨ੍ਧਨਂ.

‘‘ਸਬ੍ਬੇ ਕਿਲੇਸੇ ਝਾਪੇਤ੍ਵਾ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ;

ਤਸ੍ਸ ਵਾਚਂ ਸੁਣਿਤ੍ਵਾਹਂ, ਇਦਂ ਵਚਨਮਬ੍ਰਵਿਂ.

‘‘ਯਦਿ ਬੁਦ੍ਧੋਸਿ ਸਬ੍ਬਞ੍ਞੂ, ਨਿਸੀਦ ਤ੍ਵਂ ਮਹਾਮੁਨੇ;

ਤਮਹਂ ਪੂਜਯਿਸ੍ਸਾਮਿ, ਦੁਕ੍ਖਸ੍ਸਨ੍ਤਕਰੋ ਤੁਵਂ.

‘‘ਪਤ੍ਥਰਿਤ੍ਵਾਜਿਨਚਮ੍ਮਂ, ਅਦਾਸਿ ਸਤ੍ਥੁਨੋ ਅਹਂ;

ਨਿਸੀਦਿ ਤਤ੍ਥ ਭਗਵਾ, ਸੀਹੋਵ ਗਿਰਿਗਬ੍ਭਰੇ.

‘‘ਖਿਪ੍ਪਂ ਪਬ੍ਬਤਮਾਰੁਯ੍ਹ, ਅਮ੍ਬਸ੍ਸ ਫਲਮਗ੍ਗਹਿਂ;

ਸਾਲਕਲ੍ਯਾਣਿਕਂ ਪੁਪ੍ਫਂ, ਚਨ੍ਦਨਞ੍ਚ ਮਹਾਰਹਂ.

‘‘ਖਿਪ੍ਪਂ ਪਗ੍ਗਯ੍ਹ ਤਂ ਸਬ੍ਬਂ, ਉਪੇਤ੍ਵਾ ਲੋਕਨਾਯਕਂ;

ਫਲਂ ਬੁਦ੍ਧਸ੍ਸ ਦਤ੍ਵਾਨ, ਸਾਲਪੁਪ੍ਫਮਪੂਜਯਿਂ.

‘‘ਚਨ੍ਦਨਂ ਅਨੁਲਿਮ੍ਪਿਤ੍ਵਾ, ਅਵਨ੍ਦਿਂ ਸਤ੍ਥੁਨੋ ਅਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਵਿਪੁਲਾਯ ਚ ਪੀਤਿਯਾ.

‘‘ਅਜਿਨਮ੍ਹਿ ਨਿਸੀਦਿਤ੍ਵਾ, ਸੁਮੇਧੋ ਲੋਕਨਾਯਕੋ;

ਮਮ ਕਮ੍ਮਂ ਪਕਿਤ੍ਤੇਸਿ, ਹਾਸਯਨ੍ਤੋ ਮਮਂ ਤਦਾ.

‘‘ਇਮਿਨਾ ਫਲਦਾਨੇਨ, ਗਨ੍ਧਮਾਲੇਹਿ ਚੂਭਯਂ;

ਪਞ੍ਚਵੀਸੇ ਕਪ੍ਪਸਤੇ, ਦੇਵਲੋਕੇ ਰਮਿਸ੍ਸਤਿ.

‘‘ਅਨੂਨਮਨਸਙ੍ਕਪ੍ਪੋ, ਵਸਵਤ੍ਤੀ ਭਵਿਸ੍ਸਤਿ;

ਛਬ੍ਬੀਸਤਿਕਪ੍ਪਸਤੇ, ਮਨੁਸ੍ਸਤ੍ਤਂ ਗਮਿਸ੍ਸਤਿ.

‘‘ਭਵਿਸ੍ਸਤਿ ਚਕ੍ਕਵਤ੍ਤੀ, ਚਾਤੁਰਨ੍ਤੋ ਮਹਿਦ੍ਧਿਕੋ;

ਵੇਭਾਰਂ ਨਾਮ ਨਗਰਂ, ਵਿਸ੍ਸਕਮ੍ਮੇਨ ਮਾਪਿਤਂ.

‘‘ਹੇਸ੍ਸਤਿ ਸਬ੍ਬਸੋਵਣ੍ਣਂ, ਨਾਨਾਰਤਨਭੂਸਿਤਂ;

ਏਤੇਨੇਵ ਉਪਾਯੇਨ, ਸਂਸਰਿਸ੍ਸਤਿ ਸੋ ਭਵੇ.

‘‘ਸਬ੍ਬਤ੍ਥ ਪੂਜਿਤੋ ਹੁਤ੍ਵਾ, ਦੇਵਤ੍ਤੇ ਅਥ ਮਾਨੁਸੇ;

ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਬ੍ਰਹ੍ਮਬਨ੍ਧੁ ਭਵਿਸ੍ਸਤਿ.

‘‘ਅਗਾਰਾ ਅਭਿਨਿਕ੍ਖਮ੍ਮ, ਅਨਗਾਰੀ ਭਵਿਸ੍ਸਤਿ;

ਅਭਿਞ੍ਞਾਪਾਰਗੂ ਹੁਤ੍ਵਾ, ਨਿਬ੍ਬਾਯਿਸ੍ਸਤਿਨਾਸਵੋ.

‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਸੁਮੇਧੋ ਲੋਕਨਾਯਕੋ;

ਮਮ ਨਿਜ੍ਝਾਯਮਾਨਸ੍ਸ, ਪਕ੍ਕਾਮਿ ਅਨਿਲਞ੍ਜਸੇ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਤੁਸਿਤਤੋ ਚਵਿਤ੍ਵਾਨ, ਨਿਬ੍ਬਤ੍ਤਿਂ ਮਾਤੁਕੁਚ੍ਛਿਯਂ;

ਭੋਗੇ ਮੇ ਊਨਤਾ ਨਤ੍ਥਿ, ਯਮ੍ਹਿ ਗਬ੍ਭੇ ਵਸਾਮਹਂ.

‘‘ਮਾਤੁਕੁਚ੍ਛਿਗਤੇ ਮਯਿ, ਅਨ੍ਨਪਾਨਞ੍ਚ ਭੋਜਨਂ;

ਮਾਤੁਯਾ ਮਮ ਛਨ੍ਦੇਨ, ਨਿਬ੍ਬਤ੍ਤਤਿ ਯਦਿਚ੍ਛਕਂ.

‘‘ਜਾਤਿਯਾ ਪਞ੍ਚਵਸ੍ਸੇਨ, ਪਬ੍ਬਜਿਂ ਅਨਗਾਰਿਯਂ;

ਓਰੋਪਿਤਮ੍ਹਿ ਕੇਸਮ੍ਹਿ, ਅਰਹਤ੍ਤਮਪਾਪੁਣਿਂ.

‘‘ਪੁਬ੍ਬਕਮ੍ਮਂ ਗਵੇਸਨ੍ਤੋ, ਓਰੇਨ ਨਾਦ੍ਦਸਂ ਅਹਂ;

ਤਿਂਸਕਪ੍ਪਸਹਸ੍ਸਮ੍ਹਿ, ਮਮ ਕਮ੍ਮਮਨੁਸ੍ਸਰਿਂ.

‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਤਵ ਸਾਸਨਮਾਗਮ੍ਮ, ਪਤ੍ਤੋਮ੍ਹਿ ਅਚਲਂ ਪਦਂ.

‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤੋ ਥੇਰੋ ਇਮਾਯੇਵ ਗਾਥਾ ਅਭਾਸੀਤਿ.

ਵਲ੍ਲਿਯਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.