੯. ਨਨ੍ਦਤ੍ਥੇਰਗਾਥਾਵਣ੍ਣਨਾ

ਅਯੋਨਿਸੋ ਮਨਸਿਕਾਰਾਤਿ ਆਯਸ੍ਮਤੋ ਨਨ੍ਦਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਪੂਜਾਸਕ੍ਕਾਰਬਹੁਲਂ ਮਹਾਦਾਨਂ ਪਵਤ੍ਤੇਤ੍ਵਾ, ‘‘ਅਹਮ੍ਪਿ ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਏਵਰੂਪੋ ਸਾਵਕੋ ਭਵੇਯ੍ਯ’’ਨ੍ਤਿ ਪਣਿਧਾਨਂ ਕਤ੍ਵਾ ਤਤੋ ਪਟ੍ਠਾਯ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਵਿਨਤਾਯ ਨਾਮ ਨਦਿਯਾ ਮਹਨ੍ਤੋ ਕਚ੍ਛਪੋ ਹੁਤ੍ਵਾ ਨਿਬ੍ਬਤ੍ਤੋ ਏਕਦਿਵਸਂ ਸਤ੍ਥਾਰਂ ਨਦਿਯਾ ਪਾਰਂ ਗਨ੍ਤੁਂ ਤੀਰੇ ਠਿਤਂ ਦਿਸ੍ਵਾ ਸਯਂ ਭਗਵਨ੍ਤਂ ਤਾਰੇਤੁਕਾਮੋ ਸਤ੍ਥੁ ਪਾਦਮੂਲੇ ਨਿਪਜ੍ਜਿ. ਸਤ੍ਥਾ ਤਸ੍ਸ ਅਜ੍ਝਾਸਯਂ ਓਲੋਕੇਤ੍ਵਾ ਪਿਟ੍ਠਿਂ ਅਭਿਰੁਹਿ. ਸੋ ਹਟ੍ਠਤੁਟ੍ਠੋ ਵੇਗੇਨ ਸੋਤਂ ਛਿਨ੍ਦਨ੍ਤੋ ਸੀਘਤਰਂ ਪਰਤੀਰਮੇਵ ਪਾਪੇਸਿ. ਭਗਵਾ ਤਸ੍ਸ ਅਨੁਮੋਦਨਂ ਵਦਨ੍ਤੋ ਭਾਵਿਨਿਂ ਸਮ੍ਪਤ੍ਤਿਂ ਕਥੇਤ੍ਵਾ ਪਕ੍ਕਾਮਿ.

ਸੋ ਤੇਨ ਪੁਞ੍ਞਕਮ੍ਮੇਨ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਸ੍ਮਿਂ ਸੁਦ੍ਧੋਦਨਮਹਾਰਾਜਸ੍ਸ ਪੁਤ੍ਤੋ ਹੁਤ੍ਵਾ ਮਹਾਪਜਾਪਤਿਯਾ ਗੋਤਮਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਤਸ੍ਸ ਨਾਮਗ੍ਗਹਣਦਿਵਸੇ ਞਾਤਿਸਙ੍ਘਂ ਨਨ੍ਦੇਨ੍ਤੋ ਜਾਤੋਤਿ ਨਨ੍ਦੋਤ੍ਵੇਵ ਨਾਮਂ ਅਕਂਸੁ. ਤਸ੍ਸ ਵਯਪ੍ਪਤ੍ਤਕਾਲੇ ਸਤ੍ਥਾ ਪਵਤ੍ਤਵਰਧਮ੍ਮਚਕ੍ਕੋ ਲੋਕਾਨੁਗ੍ਗਹਂ ਕਰੋਨ੍ਤੋ ਕਪਿਲਵਤ੍ਥੁਂ ਗਨ੍ਤ੍ਵਾ ਞਾਤਿਸਮਾਗਮੇ ਪੋਕ੍ਖਰਵਸ੍ਸਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਵੇਸ੍ਸਨ੍ਤਰਜਾਤਕਂ (ਜਾ. ੨.੨੨.੧੬੫੫ ਆਦਯੋ) ਕਥੇਤ੍ਵਾ ਦੁਤਿਯਦਿਵਸੇ ਪਿਣ੍ਡਾਯ ਪਵਿਟ੍ਠੋ ‘‘ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯਾ’’ਤਿ (ਧ. ਪ. ੧੬੮) ਗਾਥਾਯ ਪਿਤਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਨਿਵੇਸਨਂ ਗਨ੍ਤ੍ਵਾ ‘‘ਧਮ੍ਮਂ ਚਰੇ ਸੁਚਰਿਤ’’ਨ੍ਤਿ (ਧ. ਪ. ੧੬੯) ਗਾਥਾਯ ਮਹਾਪਜਾਪਤਿਂ ਸੋਤਾਪਤ੍ਤਿਫਲੇ ਰਾਜਾਨਂ ਸਕਦਾਗਾਮਿਫਲੇ ਪਤਿਟ੍ਠਾਪੇਤ੍ਵਾ ਤਤਿਯੇ ਦਿਵਸੇ ਨਨ੍ਦਕੁਮਾਰਸ੍ਸ ਅਭਿਸੇਕਨਿਵੇਸਨਪ੍ਪਵੇਸਨਵਿਵਾਹਮਙ੍ਗਲੇਸੁ ਵਤ੍ਤਮਾਨੇਸੁ ਪਿਣ੍ਡਾਯ ਪਵਿਸਿਤ੍ਵਾ ਨਨ੍ਦਕੁਮਾਰਸ੍ਸ ਹਤ੍ਥੇ ਪਤ੍ਤਂ ਦਤ੍ਵਾ ਮਙ੍ਗਲਂ ਵਤ੍ਵਾ ਤਸ੍ਸ ਹਤ੍ਥਤੋ ਪਤ੍ਤਂ ਅਗਹੇਤ੍ਵਾਵ ਵਿਹਾਰਂ ਗਤੋ ਤਂ ਪਤ੍ਤਹਤ੍ਥਂ ਵਿਹਾਰਂ ਆਗਤਂ ਅਨਿਚ੍ਛਮਾਨਂਯੇਵ ਪਬ੍ਬਾਜੇਤ੍ਵਾ ਤਥਾ ਪਬ੍ਬਜਿਤਤ੍ਤਾਯੇਵ ਅਨਭਿਰਤਿਯਾ ਪੀਲ਼ਿਤਂ ਞਤ੍ਵਾ ਉਪਾਯੇਨ ਤਸ੍ਸ ਤਂ ਅਨਭਿਰਤਿਂ ਵਿਨੋਦੇਸਿ. ਸੋ ਯੋਨਿਸੋ ਪਟਿਸਙ੍ਖਾਯ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੯.੧੪੮-੧੬੩) –

‘‘ਅਤ੍ਥਦਸ੍ਸੀ ਤੁ ਭਗਵਾ, ਸਯਮ੍ਭੂ ਲੋਕਨਾਯਕੋ;

ਵਿਨਤਾਨਦਿਯਾ ਤੀਰਂ, ਉਪਾਗਚ੍ਛਿ ਤਥਾਗਤੋ.

‘‘ਉਦਕਾ ਅਭਿਨਿਕ੍ਖਮ੍ਮ, ਕਚ੍ਛਪੋ ਵਾਰਿਗੋਚਰੋ;

ਬੁਦ੍ਧਂ ਤਾਰੇਤੁਕਾਮੋਹਂ, ਉਪੇਸਿਂ ਲੋਕਨਾਯਕਂ.

‘‘ਅਭਿਰੂਹਤੁ ਮਂ ਬੁਦ੍ਧੋ, ਅਤ੍ਥਦਸ੍ਸੀ ਮਹਾਮੁਨਿ;

ਅਹਂ ਤਂ ਤਾਰਯਿਸ੍ਸਾਮਿ, ਦੁਕ੍ਖਸ੍ਸਨ੍ਤਕਰੋ ਤੁਵਂ.

‘‘ਮਮ ਸਙ੍ਕਪ੍ਪਮਞ੍ਞਾਯ, ਅਤ੍ਥਦਸ੍ਸੀ ਮਹਾਯਸੋ;

ਅਭਿਰੂਹਿਤ੍ਵਾ ਮੇ ਪਿਟ੍ਠਿਂ, ਅਟ੍ਠਾਸਿ ਲੋਕਨਾਯਕੋ.

‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਂ;

ਸੁਖਂ ਮੇ ਤਾਦਿਸਂ ਨਤ੍ਥਿ, ਫੁਟ੍ਠੇ ਪਾਦਤਲੇ ਯਥਾ.

‘‘ਉਤ੍ਤਰਿਤ੍ਵਾਨ ਸਮ੍ਬੁਦ੍ਧੋ, ਅਤ੍ਥਦਸ੍ਸੀ ਮਹਾਯਸੋ;

ਨਦਿਤੀਰਮ੍ਹਿ ਠਤ੍ਵਾਨ, ਇਮਾ ਗਾਥਾ ਅਭਾਸਥ.

‘‘ਯਾਵਤਾ ਵਤ੍ਤਤੇ ਚਿਤ੍ਤਂ, ਗਙ੍ਗਾਸੋਤਂ ਤਰਾਮਹਂ;

ਅਯਞ੍ਚ ਕਚ੍ਛਪੋ ਰਾਜਾ, ਤਾਰੇਸਿ ਮਮ ਪਞ੍ਞਵਾ.

‘‘ਇਮਿਨਾ ਬੁਦ੍ਧਤਰਣੇਨ, ਮੇਤ੍ਤਚਿਤ੍ਤਵਤਾਯ ਚ;

ਅਟ੍ਠਾਰਸੇ ਕਪ੍ਪਸਤੇ, ਦੇਵਲੋਕੇ ਰਮਿਸ੍ਸਤਿ.

‘‘ਦੇਵਲੋਕਾ ਇਧਾਗਨ੍ਤ੍ਵਾ, ਸੁਕ੍ਕਮੂਲੇਨ ਚੋਦਿਤੋ;

ਏਕਾਸਨੇ ਨਿਸੀਦਿਤ੍ਵਾ, ਕਙ੍ਖਾਸੋਤਂ ਤਰਿਸ੍ਸਤਿ.

‘‘ਯਥਾਪਿ ਭਦ੍ਦਕੇ ਖੇਤ੍ਤੇ, ਬੀਜਂ ਅਪ੍ਪਮ੍ਪਿ ਰੋਪਿਤਂ;

ਸਮ੍ਮਾਧਾਰਂ ਪਵੇਚ੍ਛਨ੍ਤੇ, ਫਲਂ ਤੋਸੇਤਿ ਕਸ੍ਸਕਂ.

‘‘ਤਥੇਵਿਦਂ ਬੁਦ੍ਧਖੇਤ੍ਤਂ, ਸਮ੍ਮਾਸਮ੍ਬੁਦ੍ਧਦੇਸਿਤਂ;

ਸਮ੍ਮਾਧਾਰਂ ਪਵੇਚ੍ਛਨ੍ਤੇ, ਫਲਂ ਮਂ ਤੋਸਯਿਸ੍ਸਤਿ.

‘‘ਪਧਾਨਪਹਿਤਤ੍ਤੋਮ੍ਹਿ, ਉਪਸਨ੍ਤੋ ਨਿਰੂਪਧਿ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਰਣਾਯ ਇਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਵਿਮੁਤ੍ਤਿਸੁਖਂ ਅਨੁਭਵਨ੍ਤੋ ‘‘ਅਹੋ ਸਤ੍ਥੁ ਉਪਾਯਕੋਸਲ੍ਲਂ, ਯੇਨਾਹਂ ਭਵਪਙ੍ਕਤੋ ਉਦ੍ਧਰਿਤ੍ਵਾ ਨਿਬ੍ਬਾਨਥਲੇ ਪਤਿਟ੍ਠਾਪਿਤੋ’’ਤਿ ਅਤ੍ਤਨੋ ਪਹੀਨਸਂਕਿਲੇਸਂ ਪਟਿਲਦ੍ਧਞ੍ਚ ਸੁਖਂ ਪਚ੍ਚਵੇਕ੍ਖਿਤ੍ਵਾ ਸਞ੍ਜਾਤਸੋਮਨਸ੍ਸੋ ਉਦਾਨਵਸੇਨ –

੧੫੭. ‘‘ਅਯੋਨਿਸੋ ਮਨਸਿਕਾਰਾ, ਮਣ੍ਡਨਂ ਅਨੁਯੁਞ੍ਜਿਸਂ;

ਉਦ੍ਧਤੋ ਚਪਲੋ ਚਾਸਿਂ, ਕਾਮਰਾਗੇਨ ਅਟ੍ਟਿਤੋ.

੧੫੮. ‘‘ਉਪਾਯਕੁਸਲੇਨਾਹਂ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ;

ਯੋਨਿਸੋ ਪਟਿਪਜ੍ਜਿਤ੍ਵਾ, ਭਵੇ ਚਿਤ੍ਤਂ ਉਦਬ੍ਬਹਿ’’ਨ੍ਤਿ. – ਗਾਥਾਦ੍ਵਯਂ ਅਭਾਸਿ;

ਤਤ੍ਥ ਅਯੋਨਿਸੋ ਮਨਸਿਕਾਰਾਤਿ ਅਨੁਪਾਯਮਨਸਿਕਾਰਤੋ ਅਸੁਭਂ ਕਾਯਂ ਸੁਭਤੋ ਮਨਸਿ ਕਰਿਤ੍ਵਾ ਸੁਭਤੋ ਮਨਸਿਕਾਰਹੇਤੁ, ਅਸੁਭਂ ਕਾਯਂ ਸੁਭਸਞ੍ਞਾਯਾਤਿ ਅਤ੍ਥੋ. ਮਣ੍ਡਨਨ੍ਤਿ ਹਤ੍ਥੂਪਗਾਦਿਆਭਰਣੇਹਿ ਚੇਵ ਮਾਲਾਗਨ੍ਧਾਦੀਹਿ ਚ ਅਤ੍ਤਭਾਵਸ੍ਸ ਅਲਙ੍ਕਰਣਂ. ਅਨੁਯੁਞ੍ਜਿਸਨ੍ਤਿ ਅਨੁਯੁਞ੍ਜਿਂ, ਸਰੀਰਸ੍ਸ ਵਿਭੂਸਨਪ੍ਪਸੁਤੋ ਅਹੋਸਿਨ੍ਤਿ ਅਤ੍ਥੋ. ਉਦ੍ਧਤੋਤਿ ਜਾਤਿਗੋਤ੍ਤਰੂਪਯੋਬ੍ਬਨਮਦਾਦੀਹਿ ਉਦ੍ਧਤੋ ਅਵੂਪਸਨ੍ਤਚਿਤ੍ਤੋ. ਚਪਲੋਤਿ ਵਨਮਕ੍ਕਟੋ ਵਿਯ ਅਨਵਟ੍ਠਿਤਚਿਤ੍ਤਤਾਯ ਲੋਲੋ, ਕਾਯਮਣ੍ਡਨਵਤ੍ਥਮਣ੍ਡਨਾਦਿਚਾਪਲ੍ਯੇ ਯੁਤ੍ਤਤਾਯ ਵਾ ਚਪਲੋ ਚ. ਆਸਿਨ੍ਤਿ ਅਹੋਸਿਂ. ਕਾਮਰਾਗੇਨਾਤਿ ਵਤ੍ਥੁਕਾਮੇਸੁ ਛਨ੍ਦਰਾਗੇਨ ਅਟ੍ਟਿਤੋ ਪੀਲ਼ਿਤੋ ਵਿਬਾਧਿਤੋ ਆਸਿਨ੍ਤਿ ਯੋਜਨਾ.

ਉਪਾਯਕੁਸਲੇਨਾਤਿ ਵਿਨੇਯ੍ਯਾਨਂ ਦਮਨੂਪਾਯਚ੍ਛੇਕੇਨ ਕੋਵਿਦੇਨ ਬੁਦ੍ਧੇਨ ਭਗਵਤਾ ਹੇਤੁਭੂਤੇਨ. ਹੇਤੁਅਤ੍ਥੇ ਹਿ ਏਤਂ ਕਰਣਵਚਨਂ. ਪਲੁਟ੍ਠਮਕ੍ਕਟੀਦੇਵਚ੍ਛਰਾਦਸ੍ਸਨੇਨ ਹਿ ਉਪਕ੍ਕਿਤਵਾਦਚੋਦਨਾਯ ਅਤ੍ਤਨੋ ਕਾਮਰਾਗਾਪਨਯਨਂ ਸਨ੍ਧਾਯ ਵਦਤਿ. ਭਗਵਾ ਹਿ ਆਯਸ੍ਮਨ੍ਤਂ ਨਨ੍ਦਤ੍ਥੇਰਂ ਪਠਮਂ ਜਨਪਦਕਲ੍ਯਾਣਿਂ ਉਪਾਦਾਯ ‘‘ਯਥਾਯਂ ਮਕ੍ਕਟੀ, ਏਵਂ ਕਕੁਟਪਾਦਿਨਿਯੋ ਉਪਾਦਾਯ ਜਨਪਦਕਲ੍ਯਾਣੀ’’ਤਿ ਮਹਤਿਯਾ ਆਣਿਯਾ ਖੁਦ੍ਦਕਂ ਆਣਿਂ ਨੀਹਰਨ੍ਤੋ ਛਡ੍ਡਕੋ ਵਿਯ, ਸਿਨੇਹਪਾਨੇਨ ਸਰੀਰਂ ਕਿਲੇਦੇਤ੍ਵਾ ਵਮਨਵਿਰੇਚਨੇਹਿ ਦੋਸਂ ਨੀਹਰਨ੍ਤੋ ਭਿਸਕ੍ਕੋ ਵਿਯ ਚ ਕਕੁਟਪਾਦਿਨਿਦਸ੍ਸਨੇਨ ਜਨਪਦਕਲ੍ਯਾਣਿਯਂ ਵਿਰਤ੍ਤਚਿਤ੍ਤਂ ਕਾਰੇਤ੍ਵਾ ਪੁਨ ਉਪਕ੍ਕਿਤਵਾਦੇਨ ਕਕੁਟਪਾਦਿਨੀਸੁਪਿ ਚਿਤ੍ਤਂ ਵਿਰਾਜੇਤ੍ਵਾ ਸਮ੍ਮਦੇਵ ਸਮਥਵਿਪਸ੍ਸਨਾਨੁਯੋਗੇਨ ਅਰਿਯਮਗ੍ਗੇ ਪਤਿਟ੍ਠਾਪੇਸਿ. ਤੇਨ ਵੁਤ੍ਤਂ ‘‘ਯੋਨਿਸੋ ਪਟਿਪਜ੍ਜਿਤ੍ਵਾ, ਭਵੇ ਚਿਤ੍ਤਂ ਉਦਬ੍ਬਹਿ’’ਨ੍ਤਿ. ਉਪਾਯੇਨ ਞਾਯੇਨ ਸਮ੍ਮਦੇਵ ਸਮਥਵਿਪਸ੍ਸਨਾਯ ਵਿਸੁਦ੍ਧਿਪਟਿਪਦਂ ਪਟਿਪਜ੍ਜਿਤ੍ਵਾ ਭਵੇ ਸਂਸਾਰਪਙ੍ਕੇ ਨਿਮੁਗ੍ਗਞ੍ਚ ਮੇ ਚਿਤ੍ਤਂ ਅਰਿਯਮਗ੍ਗੇਨ ਹਤ੍ਥੇਨ ਉਤ੍ਤਾਰਿਂ, ਨਿਬ੍ਬਾਨਥਲੇ ਪਤਿਟ੍ਠਾਪੇਸਿਨ੍ਤਿ ਅਤ੍ਥੋ.

ਇਮਂ ਉਦਾਨਂ ਉਦਾਨੇਤ੍ਵਾ ਥੇਰੋ ਪੁਨਦਿਵਸੇ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਵਮਾਹ – ‘‘ਯਂ ਮੇ, ਭਨ੍ਤੇ, ਭਗਵਾ ਪਾਟਿਭੋਗੋ ਪਞ੍ਚਨ੍ਨਂ ਅਚ੍ਛਰਾਸਤਾਨਂ ਪਟਿਲਾਭਾਯ ਕਕੁਟਪਾਦਾਨਂ, ਮੁਞ੍ਚਾਮਹਂ, ਭਨ੍ਤੇ, ਭਗਵਨ੍ਤਂ ਏਤਸ੍ਮਾ ਪਟਿਸ੍ਸਵਾ’’ਤਿ (ਉਦਾ. ੨੨). ਭਗਵਾਪਿ, ‘‘ਯਦੇਵ ਖੋ ਤੇ, ਨਨ੍ਦ, ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ, ਅਥਾਹਂ ਮੁਤ੍ਤੋ ਏਤਸ੍ਮਾ ਪਟਿਸ੍ਸਵਾ’’ਤਿ (ਉਦਾ. ੨੨) ਆਹ. ਅਥਸ੍ਸ ਭਗਵਾ ਸਵਿਸੇਸਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਤਂ ਞਤ੍ਵਾ ਤਂ ਗੁਣਂ ਵਿਭਾਵੇਨ੍ਤੋ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਾਨਂ ਯਦਿਦਂ ਨਨ੍ਦੋ’’ਤਿ (ਅ. ਨਿ. ੧.੨੧੯, ੨੩੦) ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਭਾਵੇਨ ਅਗ੍ਗਟ੍ਠਾਨੇ ਠਪੇਸਿ. ਥੇਰੋ ਹਿ ‘‘ਯਮੇਵਾਹਂ ਇਨ੍ਦ੍ਰਿਯਾਨਂ ਅਸਂਵਰਂ ਨਿਸ੍ਸਾਯ ਇਮਂ ਵਿਪ੍ਪਕਾਰਂ ਪਤ੍ਤੋ, ਤਮੇਵਾਹਂ ਸੁਟ੍ਠੁ ਨਿਗ੍ਗਹੇਸ੍ਸਾਮੀ’’ਤਿ ਉਸ੍ਸਾਹਜਾਤੋ ਬਲਵਹਿਰੋਤ੍ਤਪ੍ਪੋ ਤਤ੍ਥ ਚ ਕਤਾਧਿਕਾਰਤ੍ਤਾ ਇਨ੍ਦ੍ਰਿਯਸਂਵਰੇ ਉਕ੍ਕਂਸਪਾਰਮਿਂ ਅਗਮਾਸੀਤਿ.

ਨਨ੍ਦਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.