੬. ਞਾਣਰਾਸਿਛਕ੍ਕਨਿਦ੍ਦੇਸਵਣ੍ਣਨਾ

੧੮੩. ਇਦਾਨਿ ਛਹਿ ਰਾਸੀਹਿ ਉਦ੍ਦਿਟ੍ਠਞਾਣੇਸੁ ਚਤੁਵੀਸਤਿਸਮਾਧਿਞਾਣਨਿਦ੍ਦੇਸੇ ਤਾਵ ਕਾਯਾਨੁਪਸ੍ਸਨਾਦੀਨਂ ਤਿਣ੍ਣਂ ਚਤੁਕ੍ਕਾਨਂ ਵਸੇਨ ਦ੍ਵਾਦਸਨ੍ਨਂ ਵਤ੍ਥੂਨਂ ਏਕੇਕਸ੍ਮਿਂ ਅਸ੍ਸਾਸਵਸੇਨ ਏਕੋ, ਪਸ੍ਸਾਸਵਸੇਨ ਏਕੋਤਿ ਦ੍ਵੇ ਦ੍ਵੇ ਸਮਾਧੀਤਿ ਦ੍ਵਾਦਸਸੁ ਵਤ੍ਥੂਸੁ ਚਤੁਵੀਸਤਿ ਸਮਾਧਯੋ ਹੋਨ੍ਤਿ. ਝਾਨਕ੍ਖਣੇ ਤੇਹਿ ਸਮ੍ਪਯੁਤ੍ਤਾਨਿ ਚਤੁਵੀਸਤਿਸਮਾਧਿਵਸੇਨ ਞਾਣਾਨਿ.

ਦ੍ਵਾਸਤ੍ਤਤਿਵਿਪਸ੍ਸਨਾਞਾਣਨਿਦ੍ਦੇਸੇ ਦੀਘਂ ਅਸ੍ਸਾਸਾਤਿ ‘‘ਦੀਘ’’ਨ੍ਤਿਵੁਤ੍ਤਅਸ੍ਸਾਸਤੋ. ਕਿਂ ਵੁਤ੍ਤਂ ਹੋਤਿ? ਦੀਘਂ ਅਸ੍ਸਾਸਹੇਤੁ ਝਾਨਂ ਪਟਿਲਭਿਤ੍ਵਾ ਸਮਾਹਿਤੇਨ ਚਿਤ੍ਤੇਨ ਵਿਪਸ੍ਸਨਾਕ੍ਖਣੇ ਅਨਿਚ੍ਚਤੋ ਅਨੁਪਸ੍ਸਨਟ੍ਠੇਨ ਵਿਪਸ੍ਸਨਾਤਿ ਵੁਤ੍ਤਂ ਹੋਤਿ. ਏਸ ਨਯੋ ਉਤ੍ਤਰਤ੍ਰਾਪਿ. ਤੇਸਂਯੇਵ ਦ੍ਵਾਦਸਨ੍ਨਂ ਵਤ੍ਥੂਨਂ ਏਕੇਕਸ੍ਮਿਂ ਅਸ੍ਸਾਸਵਸੇਨ ਤਿਸ੍ਸੋ, ਪਸ੍ਸਾਸਵਸੇਨ ਤਿਸ੍ਸੋਤਿ ਛ ਛ ਅਨੁਪਸ੍ਸਨਾਤਿ ਦ੍ਵਾਦਸਸੁ ਵਤ੍ਥੂਸੁ ਦ੍ਵਾਸਤ੍ਤਤਿ ਅਨੁਪਸ੍ਸਨਾ ਹੋਨ੍ਤਿ. ਤਾ ਏਵ ਦ੍ਵਾਸਤ੍ਤਤਿ ਅਨੁਪਸ੍ਸਨਾ ਦ੍ਵਾਸਤ੍ਤਤਿਵਿਪਸ੍ਸਨਾਵਸੇਨ ਞਾਣਾਨਿ.

ਨਿਬ੍ਬਿਦਾਞਾਣਨਿਦ੍ਦੇਸੇ ਅਨਿਚ੍ਚਾਨੁਪਸ੍ਸੀ ਅਸ੍ਸਸਨ੍ਤਿ ਅਨਿਚ੍ਚਾਨੁਪਸ੍ਸੀ ਹੁਤ੍ਵਾ ਅਸ੍ਸਸਨ੍ਤੋ, ਅਨਿਚ੍ਚਾਨੁਪਸ੍ਸੀ ਹੁਤ੍ਵਾ ਵਤ੍ਤੇਨ੍ਤੋਤਿ ਅਤ੍ਥੋ. ‘‘ਅਸ੍ਸਸ’’ਨ੍ਤਿ ਚ ਇਦਂ ਵਚਨਂ ਹੇਤੁਅਤ੍ਥੇ ਦਟ੍ਠਬ੍ਬਂ. ਯਥਾਭੂਤਂ ਜਾਨਾਤਿ ਪਸ੍ਸਤੀਤਿ ਨਿਬ੍ਬਿਦਾਞਾਣਨ੍ਤਿ ਕਲਾਪਸਮ੍ਮਸਨਤੋ ਪਟ੍ਠਾਯ ਯਾਵ ਭਙ੍ਗਾਨੁਪਸ੍ਸਨਾ ਪਵਤ੍ਤਵਿਪਸ੍ਸਨਾਞਾਣੇਨ ਸਙ੍ਖਾਰਾਨਂ ਯਥਾਸਭਾਵਂ ਜਾਨਾਤਿ, ਚਕ੍ਖੁਨਾ ਦਿਟ੍ਠਮਿਵ ਚ ਤੇਨੇਵ ਞਾਣਚਕ੍ਖੁਨਾ ਪਸ੍ਸਤਿ. ਤਸ੍ਮਾ ਨਿਬ੍ਬਿਦਾਞਾਣਂ ਨਾਮਾਤਿ ਅਤ੍ਥੋ, ਸਙ੍ਖਾਰੇਸੁ ਨਿਬ੍ਬਿਨ੍ਦਞਾਣਂ ਨਾਮਾਤਿ ਵੁਤ੍ਤਂ ਹੋਤਿ. ਉਪਰਿ ਭਯਤੂਪਟ੍ਠਾਨਾਦੀਨਂ ਮੁਞ੍ਚਿਤੁਕਮ੍ਯਤਾਦੀਨਞ੍ਚ ਞਾਣਾਨਂ ਵਿਸੁਂ ਆਗਤਤ੍ਤਾ ਇਧ ਯਥਾਵੁਤ੍ਤਾਨੇਵ ਵਿਪਸ੍ਸਨਾਞਾਣਾਨਿ ਨਿਬ੍ਬਿਦਾਞਾਣਾਨੀਤਿ ਵੇਦਿਤਬ੍ਬਾਨਿ.

ਨਿਬ੍ਬਿਦਾਨੁਲੋਮਞਾਣਨਿਦ੍ਦੇਸੇ ਅਨਿਚ੍ਚਾਨੁਪਸ੍ਸੀ ਅਸ੍ਸਸਨ੍ਤਿ ਅਨਿਚ੍ਚਾਨੁਪਸ੍ਸਿਨੋ ਅਸ੍ਸਸਨ੍ਤਸ੍ਸ. ਸਾਮਿਅਤ੍ਥੇ ਪਚ੍ਚਤ੍ਤਵਚਨਂ. ਭਯਤੁਪਟ੍ਠਾਨੇ ਪਞ੍ਞਾਤਿਵਚਨੇਨੇਵ ਭਯਤੁਪਟ੍ਠਾਨਆਦੀਨਵਾਨੁਪਸ੍ਸਨਾਨਿਬ੍ਬਿਦਾਨੁਪਸ੍ਸਨਾਞਾਣਾਨਿ ਵੁਤ੍ਤਾਨਿ ਹੋਨ੍ਤਿ ਤਿਣ੍ਣਂ ਏਕਲਕ੍ਖਣਤ੍ਤਾ. ਇਮਾਨਿ ਤੀਣਿ ਞਾਣਾਨਿ ਅਨਨ੍ਤਰਾ ਵੁਤ੍ਤਾਨਂ ਨਿਬ੍ਬਿਦਾਞਾਣਾਨਂ ਅਨੁਕੂਲਭਾਵੇਨ ਅਨੁਲੋਮਤੋ ਨਿਬ੍ਬਿਦਾਨੁਲੋਮਞਾਣਾਨੀਤਿ ਵੁਤ੍ਤਾਨਿ.

ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਨਿਦ੍ਦੇਸੇ ਅਨਿਚ੍ਚਾਨੁਪਸ੍ਸੀ ਅਸ੍ਸਸਨ੍ਤਿ ਅਨਨ੍ਤਰਸਦਿਸਮੇਵ. ਪਟਿਸਙ੍ਖਾ ਸਨ੍ਤਿਟ੍ਠਨਾ ਪਞ੍ਞਾਤਿਵਚਨੇਨੇਵ ਮੁਞ੍ਚਿਤੁਕਮ੍ਯਤਾਪਟਿਸਙ੍ਖਾਨੁਪਸ੍ਸਨਾਸਙ੍ਖਾਰੁਪੇਕ੍ਖਾਞਾਣਾਨਿ ਵੁਤ੍ਤਾਨਿ ਹੋਨ੍ਤਿ ਤਿਣ੍ਣਂ ਏਕਲਕ੍ਖਣਤ੍ਤਾ. ‘‘ਪਟਿਸਙ੍ਖਾ ਸਨ੍ਤਿਟ੍ਠਨਾ’’ਤਿਵਚਨੇਨੇਵ ਅਨੁਲੋਮਞਾਣਮਗ੍ਗਞਾਣਾਨਿਪਿ ਗਹਿਤਾਨਿ ਹੋਨ੍ਤਿ. ਸਙ੍ਖਾਰੁਪੇਕ੍ਖਾਞਾਣਅਨੁਲੋਮਞਾਣਾਨਿਪਿ ਹਿ ਨਿਬ੍ਬਿਦਾਯ ਸਿਖਾਪ੍ਪਤ੍ਤਤ੍ਤਾ ਨਿਬ੍ਬਿਦਾਜਨਨਬ੍ਯਾਪਾਰਪ੍ਪਹਾਨੇਨ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਾਨਿ ਨਾਮ ਹੋਨ੍ਤਿ. ਮਗ੍ਗਞਾਣਂ ਪਨ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਨ੍ਤੇ ਉਪ੍ਪਜ੍ਜਨਤੋ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਂ ਨਾਮ ਹੋਤੀਤਿ ਅਤਿਵਿਯ ਯੁਜ੍ਜਤੀਤਿ. ਨਿਬ੍ਬਿਦਾਨੁਲੋਮਞਾਣੇਸੁ ਵਿਯ ਆਦਿਭੂਤਂ ਮੁਞ੍ਚਿਤੁਕਮ੍ਯਤਾਞਾਣਂ ਅਗ੍ਗਹੇਤ੍ਵਾ ‘‘ਪਟਿਸਙ੍ਖਾ ਸਨ੍ਤਿਟ੍ਠਨਾ’’ਤਿ ਅਨ੍ਤੇ ਞਾਣਦ੍ਵਯਗ੍ਗਹਣਂ ਮਗ੍ਗਞਾਣਸਙ੍ਗਹਣਤ੍ਥਂ. ਮੁਞ੍ਚਿਤੁਕਮ੍ਯਤਾਤਿ ਹਿ ਵੁਤ੍ਤੇ ਅਨੁਲੋਮਞਾਣਂ ਸਙ੍ਗਯ੍ਹਤਿ, ਨ ਮਗ੍ਗਞਾਣਂ. ਮਗ੍ਗਞਾਣਞ੍ਹਿ ਮੁਞ੍ਚਿਤੁਕਮ੍ਯਤਾ ਨਾਮ ਨ ਹੋਤਿ, ਕਿਚ੍ਚਸਿਦ੍ਧਿਯਂ ਸਨ੍ਤਿਟ੍ਠਨਤੋ ਪਨ ਸਨ੍ਤਿਟ੍ਠਨਾ ਨਾਮ ਹੋਤਿ. ਅਟ੍ਠਕਥਾਯਮ੍ਪਿ ਚ ‘‘ਫੁਸਨਾਤਿ ਅਪ੍ਪਨਾ’’ਤਿ ਵੁਤ੍ਤਂ. ਇਦਞ੍ਚ ਮਗ੍ਗਞਾਣਂ ਨਿਬ੍ਬਾਨੇ ਅਪ੍ਪਨਾਤਿ ਕਤ੍ਵਾ ਸਨ੍ਤਿਟ੍ਠਨਾ ਨਾਮ ਹੋਤੀਤਿ ‘‘ਸਨ੍ਤਿਟ੍ਠਨਾ’’ਤਿਵਚਨੇਨ ਮਗ੍ਗਞਾਣਮ੍ਪਿ ਸਙ੍ਗਯ੍ਹਤਿ. ਨਿਬ੍ਬਿਦਾਨੁਲੋਮਞਾਣਾਨਿਪਿ ਅਤ੍ਥਤੋ ਨਿਬ੍ਬਿਦਾਞਾਣਾਨੇਵ ਹੋਨ੍ਤੀਤਿ ਤਾਨਿਪਿ ਨਿਬ੍ਬਿਦਾਞਾਣੇਹਿ ਸਙ੍ਗਹੇਤ੍ਵਾ ਨਿਬ੍ਬਿਦਾਪਟਿਪ੍ਪਸ੍ਸਦ੍ਧਿਞਾਣਾਨੀਤਿ ਨਿਬ੍ਬਿਦਾਗਹਣਮੇਵ ਕਤਂ, ਨ ਨਿਬ੍ਬਿਦਾਨੁਲੋਮਗ੍ਗਹਣਂ. ਤੀਸੁਪਿ ਚੇਤੇਸੁ ਞਾਣਟ੍ਠਕਨਿਦ੍ਦੇਸੇਸੁ ਚਤੁਤ੍ਥਸ੍ਸ ਧਮ੍ਮਾਨੁਪਸ੍ਸਨਾਚਤੁਕ੍ਕਸ੍ਸ ਵਸੇਨ ਵੁਤ੍ਤਾਨਂ ਚਤੁਨ੍ਨਂ ਵਤ੍ਥੂਨਂ ਏਕੇਕਸ੍ਮਿਂ ਅਸ੍ਸਾਸਵਸੇਨ ਏਕਂ, ਪਸ੍ਸਾਸਵਸੇਨ ਏਕਨ੍ਤਿ ਦ੍ਵੇ ਦ੍ਵੇ ਞਾਣਾਨੀਤਿ ਚਤੂਸੁ ਵਤ੍ਥੂਸੁ ਅਟ੍ਠ ਞਾਣਾਨਿ ਹੋਨ੍ਤਿ.

ਵਿਮੁਤ੍ਤਿਸੁਖਞਾਣਨਿਦ੍ਦੇਸੇ ਪਹੀਨਤ੍ਤਾਤਿ ਪਹਾਨਂ ਦਸ੍ਸੇਤ੍ਵਾ ਤਸ੍ਸ ਪਹਾਨਸ੍ਸ ਸਮੁਚ੍ਛੇਦਪ੍ਪਹਾਨਤ੍ਤਂ ਦਸ੍ਸੇਨ੍ਤੋ ਸਮੁਚ੍ਛਿਨ੍ਨਤ੍ਤਾਤਿ ਆਹ. ਵਿਮੁਤ੍ਤਿਸੁਖੇ ਞਾਣਨ੍ਤਿ ਫਲਵਿਮੁਤ੍ਤਿਸੁਖਸਮ੍ਪਯੁਤ੍ਤਞਾਣਞ੍ਚ ਫਲਵਿਮੁਤ੍ਤਿਸੁਖਾਰਮ੍ਮਣਪਚ੍ਚਵੇਕ੍ਖਣਞਾਣਞ੍ਚ. ਅਨੁਸਯਵਤ੍ਥੁਸ੍ਸ ਕਿਲੇਸਸ੍ਸ ਪਹਾਨੇਨ ਪਰਿਯੁਟ੍ਠਾਨਦੁਚ੍ਚਰਿਤਵਤ੍ਥੁਪ੍ਪਹਾਨਂ ਹੋਤੀਤਿ ਦਸ੍ਸਨਤ੍ਥਂ ਪੁਨ ਅਨੁਸਯਾਨਂ ਪਹਾਨਂ ਵੁਤ੍ਤਂ. ਏਕਵੀਸਤਿਫਲਞਾਣਂ ਸਨ੍ਧਾਯ ਪਹੀਨਕਿਲੇਸਗਣਨਾਯਪਿ ਞਾਣਗਣਨਾ ਕਤਾ ਹੋਤਿ, ਪਚ੍ਚਵੇਕ੍ਖਣਞਾਣਞ੍ਚ ਸਨ੍ਧਾਯ ਪਹੀਨਕਿਲੇਸਪਚ੍ਚਵੇਕ੍ਖਣਗਣਨਾਯ ਫਲਪਚ੍ਚਵੇਕ੍ਖਣਞਾਣਗਣਨਾ ਕਤਾ ਹੋਤੀਤਿ.

ਞਾਣਰਾਸਿਛਕ੍ਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਸਦ੍ਧਮ੍ਮਪ੍ਪਕਾਸਿਨਿਯਾ ਪਟਿਸਮ੍ਭਿਦਾਮਗ੍ਗਟ੍ਠਕਥਾਯ

ਆਨਾਪਾਨਸ੍ਸਤਿਕਥਾਵਣ੍ਣਨਾ ਨਿਟ੍ਠਿਤਾ.