੪. ਇਨ੍ਦ੍ਰਿਯਕਥਾ

੧. ਪਠਮਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ

੧੮੪. ਇਦਾਨਿ ਆਨਾਪਾਨਸ੍ਸਤਿਕਥਾਨਨ੍ਤਰਂ ਕਥਿਤਾਯ ਇਨ੍ਦ੍ਰਿਯਕਥਾਯ ਅਪੁਬ੍ਬਤ੍ਥਾਨੁਵਣ੍ਣਨਾ ਅਨੁਪ੍ਪਤ੍ਤਾ. ਅਯਞ੍ਹਿ ਇਨ੍ਦ੍ਰਿਯਕਥਾ ਆਨਾਪਾਨਸ੍ਸਤਿਭਾਵਨਾਯ ਉਪਕਾਰਕਾਨਂ ਇਨ੍ਦ੍ਰਿਯਾਨਂ ਅਭਾਵੇ ਆਨਾਪਾਨਸ੍ਸਤਿਭਾਵਨਾਯ ਅਭਾਵਤੋ ਤਦੁਪਕਾਰਕਾਨਂ ਇਨ੍ਦ੍ਰਿਯਾਨਂ ਵਿਸੋਧਨਾਦਿਵਿਧਿਦਸ੍ਸਨਤ੍ਥਂ ਆਨਾਪਾਨਸ੍ਸਤਿਕਥਾਨਨ੍ਤਰਂ ਕਥਿਤਾਤਿ ਤਞ੍ਚ ਕਥੇਤਬ੍ਬਂ ਇਨ੍ਦ੍ਰਿਯਕਥਂ ਅਤ੍ਤਨਾ ਭਗਵਤੋ ਸਮ੍ਮੁਖਾ ਸੁਤਂ ਵਿਞ੍ਞਾਤਾਧਿਪ੍ਪਾਯਸੁਤ੍ਤਨ੍ਤਿਕਦੇਸਨਂ ਪੁਬ੍ਬਙ੍ਗਮਂ ਕਤ੍ਵਾ ਤਦਤ੍ਥਪ੍ਪਕਾਸਨਵਸੇਨ ਕਥੇਤੁਕਾਮੋ ਪਠਮਂ ਤਾਵ ਏਵਂ ਮੇ ਸੁਤਨ੍ਤਿਆਦਿਮਾਹ.

ਤਤ੍ਥ ਏਵਨ੍ਤਿ ਨਿਪਾਤਪਦਂ. ਮੇਤਿਆਦੀਨਿ ਨਾਮਪਦਾਨਿ. ਵਿਹਰਤੀਤਿ ਏਤ੍ਥ ਵਿ-ਇਤਿ ਉਪਸਗ੍ਗਪਦਂ, ਹਰਤੀਤਿ ਆਖ੍ਯਾਤਪਦਨ੍ਤਿ ਇਮਿਨਾ ਤਾਵ ਨਯੇਨ ਪਦਵਿਭਾਗੋ ਵੇਦਿਤਬ੍ਬੋ.

ਅਤ੍ਥਤੋ ਪਨ ਉਪਮੂਪਦੇਸਗਰਹਪਸਂਸਨਾਕਾਰਵਚਨਗ੍ਗਹਣੇਸੁ ਏਵਂ-ਸਦ੍ਦੋ ਦਿਸ੍ਸਤਿ ਨਿਦਸ੍ਸਨਤ੍ਥੇ ਚ ਅਵਧਾਰਣਤ੍ਥੇ ਚ. ਇਧ ਪਨ ਏਵਂਸਦ੍ਦੋ ਆਕਾਰਤ੍ਥੇ ਨਿਦਸ੍ਸਨਤ੍ਥੇ ਚ ਵਿਞ੍ਞੁਜਨੇਨ ਪਵੁਤ੍ਤੋ, ਤਥੇਵ ਅਵਧਾਰਣਤ੍ਥੇ ਚ.

ਤਤ੍ਥ ਆਕਾਰਤ੍ਥੇਨ ਏਵਂਸਦ੍ਦੇਨ ਏਤਮਤ੍ਥਂ ਦੀਪੇਤਿ – ਨਾਨਾਨਯਨਿਪੁਣਮਨੇਕਜ੍ਝਾਸਯਸਮੁਟ੍ਠਾਨਂ ਅਤ੍ਥਬ੍ਯਞ੍ਜਨਸਮ੍ਪਨ੍ਨਂ ਵਿਵਿਧਪਾਟਿਹਾਰਿਯਂ ਧਮ੍ਮਤ੍ਥਦੇਸਨਾਪਟਿਵੇਧਗਮ੍ਭੀਰਂ ਸਬ੍ਬਸਤ੍ਤਾਨਂ ਸਕਸਕਭਾਸਾਨੁਰੂਪਤੋ ਸੋਤਪਥਮਾਗਚ੍ਛਨ੍ਤਂ ਤਸ੍ਸ ਭਗਵਤੋ ਵਚਨਂ ਸਬ੍ਬਪ੍ਪਕਾਰੇਨ ਕੋ ਸਮਤ੍ਥੋ ਵਿਞ੍ਞਾਤੁਂ, ਸਬ੍ਬਥਾਮੇਨ ਪਨ ਸੋਤੁਕਾਮਤਂ ਜਨੇਤ੍ਵਾਪਿ ਏਵਂ ਮੇ ਸੁਤਂ, ਮਯਾਪਿ ਏਕੇਨਾਕਾਰੇਨ ਸੁਤਨ੍ਤਿ.

ਨਿਦਸ੍ਸਨਤ੍ਥੇਨ ‘‘ਨਾਹਂ ਸਯਮ੍ਭੂ, ਨ ਮਯਾ ਇਦਂ ਸਚ੍ਛਿਕਤ’’ਨ੍ਤਿ ਅਤ੍ਤਾਨਂ ਪਰਿਮੋਚੇਨ੍ਤੋ ‘‘ਏਵਂ ਮੇ ਸੁਤਂ, ਮਯਾਪਿ ਏਵਂ ਸੁਤ’’ਨ੍ਤਿ ਇਦਾਨਿ ਵਤ੍ਤਬ੍ਬਂ ਸਕਲਂ ਸੁਤ੍ਤਂ ਨਿਦਸ੍ਸੇਤਿ.

ਅਵਧਾਰਣਤ੍ਥੇਨ ਥੇਰੋ ਸਾਰਿਪੁਤ੍ਤੋ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਮਹਾਪਞ੍ਞਾਨਂ ਯਦਿਦਂ ਸਾਰਿਪੁਤ੍ਤੋ’’ਤਿ (ਅ. ਨਿ. ੧.੧੮੮-੧੮੯), ‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਪੁਗ੍ਗਲਮ੍ਪਿ ਸਮਨੁਪਸ੍ਸਾਮਿ, ਯੋ ਏਵਂ ਤਥਾਗਤੇਨ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ ਸਮ੍ਮਦੇਵ ਅਨੁਪ੍ਪਵਤ੍ਤੇਤਿ ਯਥਯਿਦਂ, ਭਿਕ੍ਖਵੇ, ਸਾਰਿਪੁਤ੍ਤੋ. ਸਾਰਿਪੁਤ੍ਤੋ, ਭਿਕ੍ਖਵੇ, ਤਥਾਗਤੇਨ ਅਨੁਤ੍ਤਰਂ ਧਮ੍ਮਚਕ੍ਕਂ ਪਵਤ੍ਤਿਤਂ ਸਮ੍ਮਦੇਵ ਅਨੁਪ੍ਪਵਤ੍ਤੇਤੀ’’ਤਿਏਵਮਾਦਿਨਾ (ਅ. ਨਿ. ੧.੧੮੭) ਨਯੇਨ ਭਗਵਤਾ ਪਸਤ੍ਥਭਾਵਾਨੁਰੂਪਂ ਅਤ੍ਤਨੋ ਧਾਰਣਬਲਂ ਦਸ੍ਸੇਨ੍ਤੋ ਸਤ੍ਤਾਨਂ ਸੋਤੁਕਾਮਤਂ ਜਨੇਤਿ ‘‘ਏਵਂ ਮੇ ਸੁਤਂ, ਤਞ੍ਚ ਖੋ ਅਤ੍ਥਤੋ ਵਾ ਬ੍ਯਞ੍ਜਨਤੋ ਵਾ ਅਨੂਨਮਨਧਿਕਂ, ਏਵਮੇਵ, ਨ ਅਞ੍ਞਥਾ ਦਟ੍ਠਬ੍ਬ’’ਨ੍ਤਿ.

ਮੇਸਦ੍ਦੋ ਕਰਣਸਮ੍ਪਦਾਨਸਾਮਿਅਤ੍ਥੇਸੁ ਦਿਸ੍ਸਤਿ. ਇਧ ਪਨ ‘‘ਮਯਾ ਸੁਤਂ, ਮਮ ਸੁਤ’’ਨ੍ਤਿ ਚ ਅਤ੍ਥਦ੍ਵਯੇ ਯੁਜ੍ਜਤਿ.

ਸੁਤਨ੍ਤਿ ਅਯਂਸਦ੍ਦੋ ਸਉਪਸਗ੍ਗੋ ਅਨੁਪਸਗ੍ਗੋ ਚ ਵਿਸ੍ਸੁਤਗਮਨਕਿਲਿਨ੍ਨਉਪਚਿਤਅਨੁਯੋਗਸੋਤਵਿਞ੍ਞੇਯ੍ਯੇਸੁ ਦਿਸ੍ਸਤਿ ਵਿਞ੍ਞਾਤੇਪਿ ਚ ਸੋਤਦ੍ਵਾਰਾਨੁਸਾਰੇਨ. ਇਧ ਪਨਸ੍ਸ ਸੋਤਦ੍ਵਾਰਾਨੁਸਾਰੇਨ ਉਪਧਾਰਿਤਨ੍ਤਿ ਵਾ ਉਪਧਾਰਣਨ੍ਤਿ ਵਾ ਅਤ੍ਥੋ. ਮੇ-ਸਦ੍ਦਸ੍ਸ ਹਿ ਮਯਾਤਿਅਤ੍ਥੇ ਸਤਿ ‘‘ਏਵਂ ਮਯਾ ਸੁਤਂ ਸੋਤਦ੍ਵਾਰਾਨੁਸਾਰੇਨ ਉਪਧਾਰਿਤ’’ਨ੍ਤਿ ਯੁਜ੍ਜਤਿ, ਮਮਾਤਿਅਤ੍ਥੇ ਸਤਿ ‘‘ਏਵਂ ਮਮ ਸੁਤਂ ਸੋਤਦ੍ਵਾਰਾਨੁਸਾਰੇਨ ਉਪਧਾਰਣ’’ਨ੍ਤਿ ਯੁਜ੍ਜਤਿ.

ਅਪਿਚ ‘‘ਏਵਂ ਮੇ ਸੁਤ’’ਨ੍ਤਿ ਅਤ੍ਤਨਾ ਉਪ੍ਪਾਦਿਤਭਾਵਂ ਅਪ੍ਪਟਿਜਾਨਨ੍ਤੋ ਪੁਰਿਮਸਵਨਂ ਵਿਵਰਨ੍ਤੋ ‘‘ਸਮ੍ਮੁਖਾ ਪਟਿਗ੍ਗਹਿਤਮਿਦਂ ਮਯਾ ਤਸ੍ਸ ਭਗਵਤੋ ਚਤੁਵੇਸਾਰਜ੍ਜਵਿਸਾਰਦਸ੍ਸ ਦਸਬਲਧਰਸ੍ਸ ਆਸਭਟ੍ਠਾਨਟ੍ਠਾਯਿਨੋ ਸੀਹਨਾਦਨਾਦਿਨੋ ਸਬ੍ਬਸਤ੍ਤੁਤ੍ਤਮਸ੍ਸ ਧਮ੍ਮਿਸ੍ਸਰਸ੍ਸ ਧਮ੍ਮਰਾਜਸ੍ਸ ਧਮ੍ਮਾਧਿਪਤਿਨੋ ਧਮ੍ਮਦੀਪਸ੍ਸ ਧਮ੍ਮਸਰਣਸ੍ਸ ਸਦ੍ਧਮ੍ਮਵਰਚਕ੍ਕਵਤ੍ਤਿਨੋ ਸਮ੍ਮਾਸਮ੍ਬੁਦ੍ਧਸ੍ਸ ਵਚਨਂ, ਨ ਏਤ੍ਥ ਅਤ੍ਥੇ ਵਾ ਧਮ੍ਮੇ ਵਾ ਪਦੇ ਵਾ ਬ੍ਯਞ੍ਜਨੇ ਵਾ ਕਙ੍ਖਾ ਵਾ ਵਿਮਤਿ ਵਾ ਕਾਤਬ੍ਬਾ’’ਤਿ ਇਮਸ੍ਮਿਂ ਧਮ੍ਮੇ ਅਸ੍ਸਦ੍ਧਿਯਂ ਵਿਨਾਸੇਤਿ, ਸਦ੍ਧਾਸਮ੍ਪਦਂ ਉਪ੍ਪਾਦੇਤੀਤਿ. ਤੇਨੇਤਂ ਵੁਚ੍ਚਤਿ –

‘‘ਵਿਨਾਸਯਤਿ ਅਸ੍ਸਦ੍ਧਂ, ਸਦ੍ਧਂ ਵਡ੍ਢੇਤਿ ਸਾਸਨੇ;

ਏਵਂ ਮੇ ਸੁਤਮਿਚ੍ਚੇਵਂ, ਵਦਂ ਗੋਤਮਸਾਵਕੋ’’ਤਿ.

ਏਕਨ੍ਤਿ ਗਣਨਪਰਿਚ੍ਛੇਦਨਿਦ੍ਦੇਸੋ. ਸਮਯਨ੍ਤਿ ਪਰਿਚ੍ਛਿਨ੍ਨਨਿਦ੍ਦੇਸੋ. ਏਕਂ ਸਮਯਨ੍ਤਿ ਅਨਿਯਮਿਤਪਰਿਦੀਪਨਂ. ਤਤ੍ਥ ਸਮਯਸਦ੍ਦੋ –

ਸਮਵਾਯੇ ਖਣੇ ਕਾਲੇ, ਸਮੂਹੇ ਹੇਤੁਦਿਟ੍ਠਿਸੁ;

ਪਟਿਲਾਭੇ ਪਹਾਨੇ ਚ, ਪਟਿਵੇਧੇ ਚ ਦਿਸ੍ਸਤਿ.

ਇਧ ਪਨਸ੍ਸ ਕਾਲੋ ਅਤ੍ਥੋ. ਤੇਨ ਸਂਵਚ੍ਛਰਉਤੁਮਾਸਦ੍ਧਮਾਸਰਤ੍ਤਿਨ੍ਦਿਵਪੁਬ੍ਬਣ੍ਹਮਜ੍ਝਨ੍ਹਿਕਸਾਯਨ੍ਹਪਠਮ- ਮਜ੍ਝਿਮਪਚ੍ਛਿਮਯਾਮਮੁਹੁਤ੍ਤਾਦੀਸੁ ਕਾਲਪ੍ਪਭੇਦਭੂਤੇਸੁ ਸਮਯੇਸੁ ਏਕਂ ਸਮਯਨ੍ਤਿ ਦੀਪੇਤਿ.

ਤਤ੍ਥ ਕਿਞ੍ਚਾਪਿ ਏਤੇਸੁ ਸਂਵਚ੍ਛਰਾਦੀਸੁ ਸਮਯੇਸੁ ਯਂ ਯਂ ਸੁਤ੍ਤਂ ਯਮ੍ਹਿ ਯਮ੍ਹਿ ਸਂਵਚ੍ਛਰੇ ਉਤੁਮ੍ਹਿ ਮਾਸੇ ਪਕ੍ਖੇ ਰਤ੍ਤਿਭਾਗੇ ਦਿਵਸਭਾਗੇ ਵਾ ਵੁਤ੍ਤਂ, ਸਬ੍ਬਂ ਤਂ ਥੇਰਸ੍ਸ ਸੁਵਿਦਿਤਂ ਸੁਵਵਤ੍ਥਾਪਿਤਂ ਪਞ੍ਞਾਯ. ਯਸ੍ਮਾ ਪਨ ‘‘ਏਵਂ ਮੇ ਸੁਤਂ ਅਸੁਕਸਂਵਚ੍ਛਰੇ ਅਸੁਕਉਤੁਮ੍ਹਿ ਅਸੁਕਮਾਸੇ ਅਸੁਕਪਕ੍ਖੇ ਅਸੁਕਰਤ੍ਤਿਭਾਗੇ ਅਸੁਕਦਿਵਸਭਾਗੇ ਵਾ’’ਤਿ ਏਵਂ ਵੁਤ੍ਤੇ ਨ ਸਕ੍ਕਾ ਸੁਖੇਨ ਧਾਰੇਤੁਂ ਵਾ ਉਦ੍ਦਿਸਿਤੁਂ ਵਾ ਉਦ੍ਦਿਸਾਪੇਤੁਂ ਵਾ, ਬਹੁ ਚ ਵਤ੍ਤਬ੍ਬਂ ਹੋਤਿ, ਤਸ੍ਮਾ ਏਕੇਨੇਵ ਪਦੇਨ ਤਮਤ੍ਥਂ ਸਮੋਧਾਨੇਤ੍ਵਾ ‘‘ਏਕਂ ਸਮਯ’’ਨ੍ਤਿ ਆਹ.

ਯੇ ਵਾ ਇਮੇ ਗਬ੍ਭੋਕ੍ਕਨ੍ਤਿਸਮਯੋ ਜਾਤਿਸਮਯੋ ਸਂਵੇਗਸਮਯੋ ਅਭਿਨਿਕ੍ਖਮਨਸਮਯੋ ਦੁਕ੍ਕਰਕਾਰਿਕਸਮਯੋ ਮਾਰਵਿਜਯਸਮਯੋ ਅਭਿਸਮ੍ਬੋਧਿਸਮਯੋ ਦਿਟ੍ਠਧਮ੍ਮਸੁਖਵਿਹਾਰਸਮਯੋ ਦੇਸਨਾਸਮਯੋ ਪਰਿਨਿਬ੍ਬਾਨਸਮਯੋਤਿਏਵਮਾਦਯੋ ਭਗਵਤੋ ਦੇਵਮਨੁਸ੍ਸੇਸੁ ਅਤਿਵਿਯ ਪਕਾਸਾ ਅਨੇਕਕਾਲਪ੍ਪਭੇਦਾ ਏਵ ਸਮਯਾ, ਤੇਸੁ ਸਮਯੇਸੁ ਦੇਸਨਾਸਮਯਸਙ੍ਖਾਤਂ ਏਕਂ ਸਮਯਨ੍ਤਿ ਦੀਪੇਤਿ. ਯੋ ਚਾਯਂ ਞਾਣਕਰੁਣਾਕਿਚ੍ਚਸਮਯੇਸੁ ਕਰੁਣਾਕਿਚ੍ਚਸਮਯੋ, ਅਤ੍ਤਹਿਤਪਰਹਿਤਪਟਿਪਤ੍ਤਿਸਮਯੇਸੁ ਪਰਹਿਤਪਟਿਪਤ੍ਤਿਸਮਯੋ, ਸਨ੍ਨਿਪਤਿਤਾਨਂ ਕਰਣੀਯਦ੍ਵਯਸਮਯੇਸੁ ਧਮ੍ਮਿਕਥਾਸਮਯੋ, ਦੇਸਨਾਪਟਿਪਤ੍ਤਿਸਮਯੇਸੁ ਦੇਸਨਾਸਮਯੋ, ਤੇਸੁਪਿ ਸਮਯੇਸੁ ਅਞ੍ਞਤਰਂ ਸਮਯਂ ਸਨ੍ਧਾਯ ‘‘ਏਕਂ ਸਮਯ’’ਨ੍ਤਿ ਆਹ.

ਯਸ੍ਮਾ ਪਨ ‘‘ਏਕਂ ਸਮਯ’’ਨ੍ਤਿ ਅਚ੍ਚਨ੍ਤਸਂਯੋਗਤ੍ਥੋ ਸਮ੍ਭਵਤਿ. ਯਞ੍ਹਿ ਸਮਯਂ ਭਗਵਾ ਇਮਂ ਅਞ੍ਞਂ ਵਾ ਸੁਤ੍ਤਨ੍ਤਂ ਦੇਸੇਸਿ, ਅਚ੍ਚਨ੍ਤਮੇਵ ਤਂ ਸਮਯਂ ਕਰੁਣਾਵਿਹਾਰੇਨ ਵਿਹਾਸਿ, ਤਸ੍ਮਾ ਤਦਤ੍ਥਜੋਤਨਤ੍ਥਂ ਇਧ ਉਪਯੋਗਵਚਨਨਿਦ੍ਦੇਸੋ ਕਤੋਤਿ.

ਤੇਨੇਤਂ ਵੁਚ੍ਚਤਿ –

‘‘ਤਂ ਤਂ ਅਤ੍ਥਮਪੇਕ੍ਖਿਤ੍ਵਾ, ਭੁਮ੍ਮੇਨ ਕਰਣੇਨ ਚ;

ਅਞ੍ਞਤ੍ਰ ਸਮਯੋ ਵੁਤ੍ਤੋ, ਉਪਯੋਗੇਨ ਸੋ ਇਧਾ’’ਤਿ.

ਪੋਰਾਣਾ ਪਨ ਵਣ੍ਣਯਨ੍ਤਿ – ‘‘ਤਸ੍ਮਿਂ ਸਮਯੇ’’ਤਿ ਵਾ ‘‘ਤੇਨ ਸਮਯੇਨਾ’’ਤਿ ਵਾ ‘‘ਤਂ ਸਮਯ’’ਨ੍ਤਿ ਵਾ ਅਭਿਲਾਪਮਤ੍ਤਭੇਦੋ ਏਸ, ਸਬ੍ਬਤ੍ਥ ਭੁਮ੍ਮਮੇਵਤ੍ਥੋਤਿ. ਤਸ੍ਮਾ ‘‘ਏਕਂ ਸਮਯ’’ਨ੍ਤਿ ਵੁਤ੍ਤੇਪਿ ‘‘ਏਕਸ੍ਮਿਂ ਸਮਯੇ’’ਤਿ ਅਤ੍ਥੋ ਵੇਦਿਤਬ੍ਬੋ.

ਭਗਵਾਤਿ ਗਰੁ. ਗਰੁਞ੍ਹਿ ਲੋਕੇ ‘‘ਭਗਵਾ’’ਤਿ ਵਦਨ੍ਤਿ. ਅਯਞ੍ਚ ਸਬ੍ਬਗੁਣਵਿਸਿਟ੍ਠਤਾਯ ਸਬ੍ਬਸਤ੍ਤਾਨਂ ਗਰੁ, ਤਸ੍ਮਾ ‘‘ਭਗਵਾ’’ਤਿ ਵੇਦਿਤਬ੍ਬੋ. ਪੋਰਾਣੇਹਿਪਿ ਵੁਤ੍ਤਂ –

‘‘ਭਗਵਾਤਿ ਵਚਨਂ ਸੇਟ੍ਠਂ, ਭਗਵਾਤਿ ਵਚਨਮੁਤ੍ਤਮਂ;

ਗਰੁ ਗਾਰਵਯੁਤ੍ਤੋ ਸੋ, ਭਗਵਾ ਤੇਨ ਵੁਚ੍ਚਤੀ’’ਤਿ.

ਅਪਿਚ –

‘‘ਭਾਗ੍ਯਵਾ ਭਗ੍ਗਵਾ ਯੁਤ੍ਤੋ, ਭਗੇਹਿ ਚ ਵਿਭਤ੍ਤਵਾ;

ਭਤ੍ਤਵਾ ਵਨ੍ਤਗਮਨੋ, ਭਵੇਸੁ ਭਗਵਾ ਤਤੋ’’ਤਿ. –

ਇਮਿਸ੍ਸਾਪਿ ਗਾਥਾਯ ਵਸੇਨ ਅਸ੍ਸ ਪਦਸ੍ਸ ਵਿਤ੍ਥਾਰਤੋ ਅਤ੍ਥੋ ਵੇਦਿਤਬ੍ਬੋ. ਸੋ ਚ ਵਿਸੁਦ੍ਧਿਮਗ੍ਗੇ ਬੁਦ੍ਧਾਨੁਸ੍ਸਤਿਨਿਦ੍ਦੇਸੇ (ਵਿਸੁਦ੍ਧਿ. ੧.੧੨੩ ਆਦਯੋ) ਵੁਤ੍ਤੋਯੇਵ.

ਏਤ੍ਤਾਵਤਾ ਚੇਤ੍ਥ ਏਵਨ੍ਤਿ ਵਚਨੇਨ ਦੇਸਨਾਸਮ੍ਪਤ੍ਤਿਂ ਨਿਦ੍ਦਿਸਤਿ, ਮੇ ਸੁਤਨ੍ਤਿ ਸਾਵਕਸਮ੍ਪਤ੍ਤਿਂ, ਏਕਂ ਸਮਯਨ੍ਤਿ ਕਾਲਸਮ੍ਪਤ੍ਤਿਂ, ਭਗਵਾਤਿ ਦੇਸਕਸਮ੍ਪਤ੍ਤਿਂ.

ਸਾਵਤ੍ਥਿਯਨ੍ਤਿ ਏਤ੍ਥ ਚ ਸਵਤ੍ਥਸ੍ਸ ਇਸਿਨੋ ਨਿਵਾਸਟ੍ਠਾਨਭੂਤਾ ਨਗਰੀ ਸਾਵਤ੍ਥੀ, ਯਥਾ ਕਾਕਨ੍ਦੀ ਮਾਕਨ੍ਦੀਤਿ ਏਵਂ ਤਾਵ ਅਕ੍ਖਰਚਿਨ੍ਤਕਾ. ਅਟ੍ਠਕਥਾਚਰਿਯਾ ਪਨ ਭਣਨ੍ਤਿ – ਯਂ ਕਿਞ੍ਚਿ ਮਨੁਸ੍ਸਾਨਂ ਉਪਭੋਗਪਰਿਭੋਗਂ ਸਬ੍ਬਮੇਤ੍ਥ ਅਤ੍ਥੀਤਿ ਸਾਵਤ੍ਥੀ, ਸਤ੍ਥਸਮਾਯੋਗੇ ਚ ਕਿਂ ਭਣ੍ਡਮਤ੍ਥੀਤਿ ਪੁਚ੍ਛਿਤੇ ਸਬ੍ਬਮਤ੍ਥੀਤਿਪਿ ਵਚਨਮੁਪਾਦਾਯ ਸਾਵਤ੍ਥੀ.

‘‘ਸਬ੍ਬਦਾ ਸਬ੍ਬੂਪਕਰਣਂ, ਸਾਵਤ੍ਥਿਯਂ ਸਮੋਹਿਤਂ;

ਤਸ੍ਮਾ ਸਬ੍ਬਮੁਪਾਦਾਯ, ਸਾਵਤ੍ਥੀਤਿ ਪਵੁਚ੍ਚਤੀ’’ਤਿ. –

ਤਸ੍ਸਂ ਸਾਵਤ੍ਥਿਯਂ. ਸਮੀਪਤ੍ਥੇ ਭੁਮ੍ਮਵਚਨਂ. ਵਿਹਰਤੀਤਿ ਅਵਿਸੇਸੇਨ ਇਰਿਯਾਪਥਦਿਬ੍ਬਬ੍ਰਹ੍ਮਅਰਿਯਵਿਹਾਰੇਸੁ ਅਞ੍ਞਤਰਵਿਹਾਰਸਮਙ੍ਗਿਪਰਿਦੀਪਨਮੇਤਂ, ਇਧ ਪਨ ਠਾਨਗਮਨਾਸਨਸਯਨਪ੍ਪਭੇਦੇਸੁ ਇਰਿਯਾਪਥੇਸੁ ਅਞ੍ਞਤਰਇਰਿਯਾਪਥਸਮਾਯੋਗਪਰਿਦੀਪਨਂ. ਤੇਨ ਠਿਤੋਪਿ ਗਚ੍ਛਨ੍ਤੋਪਿ ਨਿਸਿਨ੍ਨੋਪਿ ਸਯਾਨੋਪਿ ਭਗਵਾ ‘‘ਵਿਹਰਤਿ’’ਚ੍ਚੇਵ ਵੇਦਿਤਬ੍ਬੋ. ਸੋ ਹਿ ਭਗਵਾ ਏਕਂ ਇਰਿਯਾਪਥਬਾਧਨਂ ਅਞ੍ਞੇਨ ਇਰਿਯਾਪਥੇਨ ਵਿਚ੍ਛਿਨ੍ਦਿਤ੍ਵਾ ਅਪਰਿਪਤਨ੍ਤਮਤ੍ਤਭਾਵਂ ਹਰਤਿ ਪਵਤ੍ਤੇਤਿ, ਤਸ੍ਮਾ ‘‘ਵਿਹਰਤੀ’’ਤਿ ਵੁਚ੍ਚਤਿ.

ਜੇਤਵਨੇਤਿ ਏਤ੍ਥ ਅਤ੍ਤਨੋ ਪਚ੍ਚਤ੍ਥਿਕਜਨਂ ਜਿਨਾਤੀਤਿ ਜੇਤੋ, ਰਞ੍ਞੋ ਵਾ ਅਤ੍ਤਨੋ ਪਚ੍ਚਤ੍ਥਿਕਜਨੇ ਜਿਤੇ ਜਾਤੋਤਿ ਜੇਤੋ, ਮਙ੍ਗਲਕਮ੍ਯਤਾਯ ਵਾ ਤਸ੍ਸ ਏਵਂਨਾਮਮੇਵ ਕਤਨ੍ਤਿ ਜੇਤੋ, ਵਨਯਤੀਤਿ ਵਨਂ, ਅਤ੍ਤਸਮ੍ਪਦਾਯ ਸਤ੍ਤਾਨਂ ਭਤ੍ਤਿਂ ਕਾਰੇਤਿ, ਅਤ੍ਤਨਿ ਸਿਨੇਹਂ ਉਪ੍ਪਾਦੇਤੀਤਿ ਅਤ੍ਥੋ. ਵਨੁਤੇ ਇਤਿ ਵਾ ਵਨਂ, ਨਾਨਾਵਿਧਕੁਸੁਮਗਨ੍ਧਸਮ੍ਮੋਦਮਤ੍ਤਕੋਕਿਲਾਦਿਵਿਹਙ੍ਗਾਭਿਰੁਤੇਹਿ ਮਨ੍ਦਮਾਰੁਤਚਲਿਤਰੁਕ੍ਖਸਾਖਾਵਿਟਪਪਲ੍ਲਵਪਲਾਸੇਹਿ ‘‘ਏਥ ਮਂ ਪਰਿਭੁਞ੍ਜਥਾ’’ਤਿ ਪਾਣਿਨੋ ਯਾਚਤਿ ਵਿਯਾਤਿ ਅਤ੍ਥੋ. ਜੇਤਸ੍ਸ ਵਨਂ ਜੇਤਵਨਂ. ਤਞ੍ਹਿ ਜੇਤੇਨ ਰਾਜਕੁਮਾਰੇਨ ਰੋਪਿਤਂ ਸਂਵਦ੍ਧਿਤਂ ਪਰਿਪਾਲਿਤਂ, ਸੋ ਚ ਤਸ੍ਸ ਸਾਮੀ ਅਹੋਸਿ, ਤਸ੍ਮਾ ਜੇਤਵਨਨ੍ਤਿ ਵੁਚ੍ਚਤਿ. ਤਸ੍ਮਿਂ ਜੇਤਵਨੇ. ਵਨਞ੍ਚ ਨਾਮ ਰੋਪਿਮਂ ਸਯਂਜਾਤਨ੍ਤਿ ਦੁਵਿਧਂ. ਇਦਞ੍ਚ ਵੇਲ਼ੁਵਨਾਦੀਨਿ ਚ ਰੋਪਿਮਾਨਿ, ਅਨ੍ਧਵਨਮਹਾਵਨਾਦੀਨਿ ਸਯਂਜਾਤਾਨਿ.

ਅਨਾਥਪਿਣ੍ਡਿਕਸ੍ਸ ਆਰਾਮੇਤਿ ਸੁਦਤ੍ਤੋ ਨਾਮ ਸੋ ਗਹਪਤਿ ਮਾਤਾਪਿਤੂਹਿ ਕਤਨਾਮਵਸੇਨ. ਸਬ੍ਬਕਾਮਸਮਿਦ੍ਧਤਾਯ ਪਨ ਵਿਗਤਮਚ੍ਛੇਰਤਾਯ ਕਰੁਣਾਦਿਗੁਣਸਮਙ੍ਗਿਤਾਯ ਚ ਨਿਚ੍ਚਕਾਲਂ ਅਨਾਥਾਨਂ ਪਿਣ੍ਡਮਦਾਸਿ, ਤੇਨ ਅਨਾਥਪਿਣ੍ਡਿਕੋਤਿ ਸਙ੍ਖਂ ਗਤੋ. ਆਰਮਨ੍ਤਿ ਏਤ੍ਥ ਪਾਣਿਨੋ, ਵਿਸੇਸੇਨ ਵਾ ਪਬ੍ਬਜਿਤਾਤਿ ਆਰਾਮੋ, ਤਸ੍ਸ ਪੁਪ੍ਫਫਲਾਦਿਸੋਭਾਯ ਨਾਤਿਦੂਰਨਚ੍ਚਾਸਨ੍ਨਤਾਦਿਪਞ੍ਚਵਿਧਸੇਨਾਸਨਙ੍ਗਸਮ੍ਪਤ੍ਤਿਯਾ ਚ ਤਤੋ ਤਤੋ ਆਗਮ੍ਮ ਰਮਨ੍ਤਿ ਅਭਿਰਮਨ੍ਤਿ, ਅਨੁਕ੍ਕਣ੍ਠਿਤਾ ਹੁਤ੍ਵਾ ਨਿਵਸਨ੍ਤੀਤਿ ਅਤ੍ਥੋ. ਵੁਤ੍ਤਪ੍ਪਕਾਰਾਯ ਵਾ ਸਮ੍ਪਤ੍ਤਿਯਾ ਤਤ੍ਥ ਤਤ੍ਥ ਗਤੇਪਿ ਅਤ੍ਤਨੋ ਅਬ੍ਭਨ੍ਤਰਂ ਆਨੇਤ੍ਵਾ ਰਮਾਪੇਤੀਤਿ ਆਰਾਮੋ. ਸੋ ਹਿ ਅਨਾਥਪਿਣ੍ਡਿਕੇਨ ਗਹਪਤਿਨਾ ਜੇਤਸ੍ਸ ਰਾਜਕੁਮਾਰਸ੍ਸ ਹਤ੍ਥਤੋ ਅਟ੍ਠਾਰਸਹਿ ਹਿਰਞ੍ਞਕੋਟੀਹਿ ਕੋਟਿਸਨ੍ਥਰੇਨ ਕੀਣਿਤ੍ਵਾ ਅਟ੍ਠਾਰਸਹਿ ਹਿਰਞ੍ਞਕੋਟੀਹਿ ਸੇਨਾਸਨਾਨਿ ਕਾਰਾਪੇਤ੍ਵਾ ਅਟ੍ਠਾਰਸਹਿ ਹਿਰਞ੍ਞਕੋਟੀਹਿ ਵਿਹਾਰਮਹਂ ਨਿਟ੍ਠਾਪੇਤ੍ਵਾ ਏਵਂ ਚਤੁਪਞ੍ਞਾਸਹਿਰਞ੍ਞਕੋਟਿਪਰਿਚ੍ਚਾਗੇਨ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦਿਤੋ, ਤਸ੍ਮਾ ‘‘ਅਨਾਥਪਿਣ੍ਡਿਕਸ੍ਸ ਆਰਾਮੋ’’ਤਿ ਵੁਚ੍ਚਤਿ. ਤਸ੍ਮਿਂ ਅਨਾਥਪਿਣ੍ਡਿਕਸ੍ਸ ਆਰਾਮੇ.

ਏਤ੍ਥ ਚ ‘‘ਜੇਤਵਨੇ’’ਤਿਵਚਨਂ ਪੁਰਿਮਸਾਮਿਪਰਿਕਿਤ੍ਤਨਂ, ‘‘ਅਨਾਥਪਿਣ੍ਡਿਕਸ੍ਸ ਆਰਾਮੇ’’ਤਿ ਪਚ੍ਛਿਮਸਾਮਿਪਰਿਕਿਤ੍ਤਨਂ. ਕਿਮੇਤੇਸਂ ਪਰਿਕਿਤ੍ਤਨੇ ਪਯੋਜਨਨ੍ਤਿ? ਪੁਞ੍ਞਕਾਮਾਨਂ ਦਿਟ੍ਠਾਨੁਗਤਿਆਪਜ੍ਜਨਂ. ਤਤ੍ਥ ਹਿ ਦ੍ਵਾਰਕੋਟ੍ਠਕਪਾਸਾਦਮਾਪਨੇ ਭੂਮਿਵਿਕ੍ਕਯਲਦ੍ਧਾ ਅਟ੍ਠਾਰਸ ਹਿਰਞ੍ਞਕੋਟਿਯੋ ਅਨੇਕਕੋਟਿਅਗ੍ਘਨਕਾ ਰੁਕ੍ਖਾ ਚ ਜੇਤਸ੍ਸ ਪਰਿਚ੍ਚਾਗੋ, ਚਤੁਪਞ੍ਞਾਸ ਹਿਰਞ੍ਞਕੋਟਿਯੋ ਅਨਾਥਪਿਣ੍ਡਿਕਸ੍ਸ. ਇਤਿ ਤੇਸਂ ਪਰਿਕਿਤ੍ਤਨੇਨ ਏਵਂ ਪੁਞ੍ਞਕਾਮਾ ਪੁਞ੍ਞਾਨਿ ਕਰੋਨ੍ਤੀਤਿ ਦਸ੍ਸੇਨ੍ਤੋ ਆਯਸ੍ਮਾ ਸਾਰਿਪੁਤ੍ਤੋ ਅਞ੍ਞੇਪਿ ਪੁਞ੍ਞਕਾਮੇ ਤੇਸਂ ਦਿਟ੍ਠਾਨੁਗਤਿਆਪਜ੍ਜਨੇ ਨਿਯੋਜੇਤਿ.

ਤਤ੍ਥ ਸਿਯਾ – ਯਦਿ ਤਾਵ ਭਗਵਾ ਸਾਵਤ੍ਥਿਯਂ ਵਿਹਰਤਿ, ‘‘ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ’’ਤਿ ਨ ਵਤ੍ਤਬ੍ਬਂ. ਅਥ ਤਤ੍ਥ ਵਿਹਰਤਿ, ‘‘ਸਾਵਤ੍ਥਿਯ’’ਨ੍ਤਿ ਨ ਵਤ੍ਤਬ੍ਬਂ. ਨ ਹਿ ਸਕ੍ਕਾ ਉਭਯਤ੍ਥ ਏਕਂ ਸਮਯਂ ਵਿਹਰਿਤੁਨ੍ਤਿ. ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ, ਨਨੁ ਅਵੋਚੁਮ੍ਹ ‘‘ਸਮੀਪਤ੍ਥੇ ਭੁਮ੍ਮਵਚਨ’’ਨ੍ਤਿ. ਤਸ੍ਮਾ ਯਥਾ ਗਙ੍ਗਾਯਮੁਨਾਦੀਨਂ ਸਮੀਪੇ ਗੋਯੂਥਾਨਿ ਚਰਨ੍ਤਾਨਿ ‘‘ਗਙ੍ਗਾਯ ਚਰਨ੍ਤਿ, ਯਮੁਨਾਯ ਚਰਨ੍ਤੀ’’ਤਿ ਵੁਚ੍ਚਨ੍ਤਿ, ਏਵਮਿਧਾਪਿ ਯਦਿਦਂ ਸਾਵਤ੍ਥਿਯਾ ਸਮੀਪੇ ਜੇਤਵਨਂ ਅਨਾਥਪਿਣ੍ਡਿਕਸ੍ਸ ਆਰਾਮੋ, ਤਤ੍ਥ ਵਿਹਰਨ੍ਤੋ ਵੁਚ੍ਚਤਿ ‘‘ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ’’ਤਿ. ਗੋਚਰਗਾਮਨਿਦਸ੍ਸਨਤ੍ਥਂ ਹਿਸ੍ਸ ਸਾਵਤ੍ਥਿਵਚਨਂ, ਪਬ੍ਬਜਿਤਾਨੁਰੂਪਨਿਵਾਸਟ੍ਠਾਨਨਿਦਸ੍ਸਨਤ੍ਥਂ ਸੇਸਵਚਨਂ.

ਤਤ੍ਥ ਸਾਵਤ੍ਥਿਕਿਤ੍ਤਨੇਨ ਆਯਸ੍ਮਾ ਸਾਰਿਪੁਤ੍ਤੋ ਭਗਵਤੋ ਗਹਟ੍ਠਾਨੁਗ੍ਗਹਕਰਣਂ ਦਸ੍ਸੇਤਿ, ਜੇਤਵਨਾਦਿਕਿਤ੍ਤਨੇਨ ਪਬ੍ਬਜਿਤਾਨੁਗ੍ਗਹਕਰਣਂ. ਤਥਾ ਪੁਰਿਮੇਨ ਪਚ੍ਚਯਗ੍ਗਹਣਤੋ ਅਤ੍ਤਕਿਲਮਥਾਨੁਯੋਗਵਿਵਜ੍ਜਨਂ, ਪਚ੍ਛਿਮੇਨ ਵਤ੍ਥੁਕਾਮਪ੍ਪਹਾਨਤੋ ਕਾਮਸੁਖਲ੍ਲਿਕਾਨੁਯੋਗਵਿਵਜ੍ਜਨੂਪਾਯਂ. ਅਥ ਵਾ ਪੁਰਿਮੇਨ ਚ ਧਮ੍ਮਦੇਸਨਾਭਿਯੋਗਂ, ਪਚ੍ਛਿਮੇਨ ਵਿਵੇਕਾਧਿਮੁਤ੍ਤਿਂ. ਪੁਰਿਮੇਨ ਕਰੁਣਾਯ ਉਪਗਮਨਂ, ਪਚ੍ਛਿਮੇਨ ਪਞ੍ਞਾਯ ਅਪਗਮਨਂ. ਪੁਰਿਮੇਨ ਸਤ੍ਤਾਨਂ ਹਿਤਸੁਖਨਿਪ੍ਫਾਦਨਾਧਿਮੁਤ੍ਤਤਂ, ਪਚ੍ਛਿਮੇਨ ਪਰਹਿਤਸੁਖਕਰਣੇ ਨਿਰੁਪਲੇਪਤਂ. ਪੁਰਿਮੇਨ ਧਮ੍ਮਿਕਸੁਖਾਪਰਿਚ੍ਚਾਗਨਿਮਿਤ੍ਤਂ ਫਾਸੁਵਿਹਾਰਂ, ਪਚ੍ਛਿਮੇਨ ਉਤ੍ਤਰਿਮਨੁਸ੍ਸਧਮ੍ਮਾਨੁਯੋਗਨਿਮਿਤ੍ਤਂ. ਪੁਰਿਮੇਨ ਮਨੁਸ੍ਸਾਨਂ ਉਪਕਾਰਬਹੁਲਤਂ, ਪਚ੍ਛਿਮੇਨ ਦੇਵਾਨਂ. ਪੁਰਿਮੇਨ ਲੋਕੇ ਜਾਤਸ੍ਸ ਲੋਕੇ ਸਂਵਦ੍ਧਭਾਵਂ, ਪਚ੍ਛਿਮੇਨ ਲੋਕੇਨ ਅਨੁਪਲਿਤ੍ਤਤਂ. ਪੁਰਿਮੇਨ ‘‘ਏਕਪੁਗ੍ਗਲੋ, ਭਿਕ੍ਖਵੇ, ਲੋਕੇ ਉਪ੍ਪਜ੍ਜਮਾਨੋ ਉਪ੍ਪਜ੍ਜਤਿ ਬਹੁਜਨਹਿਤਾਯ ਬਹੁਜਨਸੁਖਾਯ ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਂ. ਕਤਮੋ ਏਕਪੁਗ੍ਗਲੋ? ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ (ਅ. ਨਿ. ੧.੧੭੦) ਵਚਨਤੋ ਯਦਤ੍ਥਂ ਭਗਵਾ ਉਪ੍ਪਨ੍ਨੋ, ਤਦਤ੍ਥਪਰਿਦੀਪਨਂ, ਪਚ੍ਛਿਮੇਨ ਯਤ੍ਥ ਉਪ੍ਪਨ੍ਨੋ, ਤਦਨੁਰੂਪਵਿਹਾਰਪਰਿਦੀਪਨਂ. ਭਗਵਾ ਹਿ ਪਠਮਂ ਲੁਮ੍ਬਿਨਿਵਨੇ, ਦੁਤਿਯਂ ਬੋਧਿਮਣ੍ਡੇਤਿ ਲੋਕਿਯਲੋਕੁਤ੍ਤਰਸ੍ਸ ਉਪ੍ਪਤ੍ਤਿਯਾ ਵਨੇਯੇਵ ਉਪ੍ਪਨ੍ਨੋ, ਤੇਨਸ੍ਸ ਵਨੇਯੇਵ ਵਿਹਾਰਂ ਦਸ੍ਸੇਤੀਤਿ ਏਵਮਾਦਿਨਾ ਨਯੇਨੇਤ੍ਥ ਅਤ੍ਥਯੋਜਨਾ ਵੇਦਿਤਬ੍ਬਾ.

ਤਤ੍ਰਾਤਿ ਦੇਸਕਾਲਪਰਿਦੀਪਨਂ. ਤਞ੍ਹਿ ਯਂ ਸਮਯਂ ਵਿਹਰਤਿ, ਤਤ੍ਰ ਸਮਯੇ, ਯਸ੍ਮਿਞ੍ਚ ਜੇਤਵਨੇ ਵਿਹਰਤਿ, ਤਤ੍ਰ ਜੇਤਵਨੇਤਿ ਦੀਪੇਤਿ. ਭਾਸਿਤਬ੍ਬਯੁਤ੍ਤੇ ਵਾ ਦੇਸਕਾਲੇ ਦੀਪੇਤਿ. ਨ ਹਿ ਭਗਵਾ ਅਯੁਤ੍ਤੇ ਦੇਸੇ ਕਾਲੇ ਵਾ ਧਮ੍ਮਂ ਦੇਸੇਤਿ. ‘‘ਅਕਾਲੋ ਖੋ ਤਾਵ ਬਾਹਿਯਾ’’ਤਿਆਦਿ (ਉਦਾ. ੧੦) ਚੇਤ੍ਥ ਸਾਧਕਂ. ਖੋਤਿ ਪਦਪੂਰਣਮਤ੍ਤੇ ਅਵਧਾਰਣਤ੍ਥੇ ਆਦਿਕਾਲਤ੍ਥੇ ਵਾ ਨਿਪਾਤੋ. ਭਗਵਾਤਿ ਲੋਕਗਰੁਦੀਪਨਂ. ਭਿਕ੍ਖੂਤਿ ਕਥਾਸਵਨਯੁਤ੍ਤਪੁਗ੍ਗਲਵਚਨਂ. ਅਪਿਚੇਤ੍ਥ ‘‘ਭਿਕ੍ਖਕੋਤਿ ਭਿਕ੍ਖੁ, ਭਿਕ੍ਖਾਚਰਿਯਂ ਅਜ੍ਝੁਪਗਤੋਤਿ ਭਿਕ੍ਖੂ’’ਤਿਆਦਿਨਾ (ਵਿਭ. ੫੧੦; ਪਾਰਾ. ੪੫) ਨਯੇਨ ਵਚਨਤ੍ਥੋ ਵੇਦਿਤਬ੍ਬੋ. ਆਮਨ੍ਤੇਸੀਤਿ ਆਲਪਿ ਅਭਾਸਿ ਸਮ੍ਬੋਧੇਸਿ, ਅਯਮੇਤ੍ਥ ਅਤ੍ਥੋ. ਅਞ੍ਞਤ੍ਰ ਪਨ ਞਾਪਨੇਪਿ ਪਕ੍ਕੋਸਨੇਪਿ. ਭਿਕ੍ਖਵੋਤਿ ਆਮਨ੍ਤਨਾਕਾਰਦੀਪਨਂ. ਤੇਨ ਤੇਸਂ ਭਿਕ੍ਖੂਨਂ ਭਿਕ੍ਖਨਸੀਲਤਾਭਿਕ੍ਖਨਧਮ੍ਮਤਾਭਿਕ੍ਖਨੇਸਾਧੁਕਾਰਿਤਾਦਿਗੁਣਯੋਗਸਿਦ੍ਧੇਨ ਵਚਨੇਨ ਹੀਨਾਧਿਕਜਨਸੇਵਿਤਂ ਵੁਤ੍ਤਿਂ ਪਕਾਸੇਨ੍ਤੋ ਉਦ੍ਧਤਦੀਨਭਾਵਨਿਗ੍ਗਹਂ ਕਰੋਤਿ. ‘‘ਭਿਕ੍ਖਵੋ’’ਤਿ ਇਮਿਨਾ ਚ ਕਰੁਣਾਵਿਪ੍ਫਾਰਸੋਮ੍ਮਹਦਯਨਯਨਨਿਪਾਤਪੁਬ੍ਬਙ੍ਗਮੇਨ ਵਚਨੇਨ ਤੇ ਅਤ੍ਤਨੋ ਮੁਖਾਭਿਮੁਖੇ ਕਰੋਨ੍ਤੋ ਤੇਨੇਵ ਕਥੇਤੁਕਮ੍ਯਤਾਦੀਪਕੇਨ ਵਚਨੇਨ ਨੇਸਂ ਸੋਤੁਕਮ੍ਯਤਂ ਜਨੇਤਿ. ਤੇਨੇਵ ਚ ਸਮ੍ਬੋਧਨਤ੍ਥੇਨ ਵਚਨੇਨ ਸਾਧੁਕਸਵਨਮਨਸਿਕਾਰੇਪਿ ਤੇ ਨਿਯੋਜੇਤਿ. ਸਾਧੁਕਸਵਨਮਨਸਿਕਾਰਾਯਤ੍ਤਾ ਹਿ ਸਾਸਨਸਮ੍ਪਤ੍ਤਿ.

ਅਪਰੇਸੁ ਦੇਵਮਨੁਸ੍ਸੇਸੁ ਵਿਜ੍ਜਮਾਨੇਸੁ ਕਸ੍ਮਾ ਭਿਕ੍ਖੂਯੇਵ ਆਮਨ੍ਤੇਸੀਤਿ ਚੇ? ਜੇਟ੍ਠਸੇਟ੍ਠਾਸਨ੍ਨਸਦਾਸਨ੍ਨਿਹਿਤਭਾਜਨਭਾਵਤੋ. ਸਬ੍ਬਪਰਿਸਸਾਧਾਰਣਾ ਹਿ ਭਗਵਤੋ ਧਮ੍ਮਦੇਸਨਾ. ਪਰਿਸਾਯ ਚ ਜੇਟ੍ਠਾ ਭਿਕ੍ਖੂ ਪਠਮੁਪ੍ਪਨ੍ਨਤ੍ਤਾ, ਸੇਟ੍ਠਾ ਅਨਗਾਰਿਯਭਾਵਂ ਆਦਿਂ ਕਤ੍ਵਾ ਸਤ੍ਥੁ ਚਰਿਯਾਨੁਵਿਧਾਯਕਤ੍ਤਾ ਸਕਲਸਾਸਨਪਟਿਗ੍ਗਾਹਕਤ੍ਤਾ ਚ, ਆਸਨ੍ਨਾ ਤਤ੍ਥ ਨਿਸਿਨ੍ਨੇਸੁ ਸਤ੍ਥੁਸਨ੍ਨਿਕਤ੍ਤਾ, ਸਦਾਸਨ੍ਨਿਹਿਤਾ ਸਤ੍ਥੁਸਨ੍ਤਿਕਾਵਚਰਤ੍ਤਾ, ਧਮ੍ਮਦੇਸਨਾਯ ਚ ਤੇ ਏਵ ਭਾਜਨਂ ਯਥਾਨੁਸਿਟ੍ਠਂ ਪਟਿਪਤ੍ਤਿਸਬ੍ਭਾਵਤੋ.

ਤਤ੍ਥ ਸਿਯਾ – ਕਿਮਤ੍ਥਂ ਪਨ ਭਗਵਾ ਧਮ੍ਮਂ ਦੇਸੇਨ੍ਤੋ ਪਠਮਂ ਭਿਕ੍ਖੂ ਆਮਨ੍ਤੇਸਿ, ਨ ਧਮ੍ਮਮੇਵ ਦੇਸੇਸੀਤਿ? ਸਤਿਜਨਨਤ੍ਥਂ. ਪਰਿਸਾਯ ਹਿ ਭਿਕ੍ਖੂ ਅਞ੍ਞਂ ਚਿਨ੍ਤੇਨ੍ਤਾਪਿ ਵਿਕ੍ਖਿਤ੍ਤਚਿਤ੍ਤਾਪਿ ਧਮ੍ਮਂ ਪਚ੍ਚਵੇਕ੍ਖਨ੍ਤਾਪਿ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤਾਪਿ ਨਿਸਿਨ੍ਨਾ ਹੋਨ੍ਤਿ, ਤੇ ਅਨਾਮਨ੍ਤੇਤ੍ਵਾ ਧਮ੍ਮੇ ਦੇਸਿਯਮਾਨੇ ‘‘ਅਯਂ ਦੇਸਨਾ ਕਿਂਨਿਦਾਨਾ ਕਿਂਪਚ੍ਚਯਾ ਕਤਮਾਯ ਅਤ੍ਥੁਪ੍ਪਤ੍ਤਿਯਾ ਦੇਸਿਤਾ’’ਤਿ ਸਲ੍ਲਕ੍ਖੇਤੁਂ ਅਸਕ੍ਕੋਨ੍ਤਾ ਵਿਕ੍ਖੇਪਂ ਆਪਜ੍ਜੇਯ੍ਯੁਂ, ਦੁਗ੍ਗਹਿਤਂ ਵਾ ਗਣ੍ਹੇਯ੍ਯੁਂ. ਤੇਨ ਤੇਸਂ ਸਤਿਜਨਨਤ੍ਥਂ ਭਗਵਾ ਪਠਮਂ ਆਮਨ੍ਤੇਤ੍ਵਾ ਪਚ੍ਛਾ ਧਮ੍ਮਂ ਦੇਸੇਤਿ.

ਭਦਨ੍ਤੇਤਿ ਗਾਰਵਵਚਨਮੇਤਂ, ਸਤ੍ਥੁਨੋ ਪਟਿਵਚਨਦਾਨਂ ਵਾ. ਅਪਿਚੇਤ੍ਥ ‘‘ਭਿਕ੍ਖਵੋ’’ਤਿ ਵਦਮਾਨੋ ਭਗਵਾ ਤੇ ਭਿਕ੍ਖੂ ਆਲਪਤਿ, ‘‘ਭਦਨ੍ਤੇ’’ਤਿ ਵਦਮਾਨਾ ਤੇ ਭਗਵਨ੍ਤਂ ਪਚ੍ਚਾਲਪਨ੍ਤਿ. ਤਥਾ ‘‘ਭਿਕ੍ਖਵੋ’’ਤਿ ਭਗਵਾ ਆਭਾਸਤਿ, ‘‘ਭਦਨ੍ਤੇ’’ਤਿ ਤੇ ਪਚ੍ਚਾਭਾਸਨ੍ਤਿ. ‘‘ਭਿਕ੍ਖਵੋ’’ਤਿ ਪਟਿਵਚਨਂ ਦਾਪੇਤਿ, ਭਦਨ੍ਤੇਤਿ ਪਟਿਵਚਨਂ ਦੇਨ੍ਤਿ. ਤੇ ਭਿਕ੍ਖੂਤਿ ਯੇ ਭਗਵਾ ਆਮਨ੍ਤੇਸਿ. ਭਗਵਤੋ ਪਚ੍ਚਸ੍ਸੋਸੁਨ੍ਤਿ ਭਗਵਤੋ ਆਮਨ੍ਤਨਂ ਪਟਿਅਸ੍ਸੋਸੁਂ, ਅਭਿਮੁਖਾ ਹੁਤ੍ਵਾ ਸੁਣਿਂਸੁ ਸਮ੍ਪਟਿਚ੍ਛਿਂਸੁ ਪਟਿਗ੍ਗਹੇਸੁਨ੍ਤਿ ਅਤ੍ਥੋ. ਭਗਵਾ ਏਤਦਵੋਚਾਤਿ ਭਗਵਾ ਏਤਂ ਇਦਾਨਿ ਵਤ੍ਤਬ੍ਬਂ ਸਕਲਸੁਤ੍ਤਂ ਅਵੋਚ.

ਏਤ੍ਤਾਵਤਾ ਚ ਯਂ ਆਯਸ੍ਮਤਾ ਸਾਰਿਪੁਤ੍ਤੇਨ ਕਮਲਕੁਵਲਯੁਜ੍ਜਲਵਿਮਲਸਾਦੁਰਸਸਲਿਲਾਯ ਪੋਕ੍ਖਰਣਿਯਾ ਸੁਖਾਵਤਰਣਤ੍ਥਂ ਨਿਮ੍ਮਲਸਿਲਾਤਲਰਚਨਵਿਲਾਸਸੋਪਾਨਂ ਵਿਪ੍ਪਕਿਣ੍ਣਮੁਤ੍ਤਾਜਾਲਸਦਿਸਵਾਲਿਕਾਕਿਣ੍ਣਪਣ੍ਡਰਭੂਮਿਭਾਗਂ ਤਿਤ੍ਥਂ ਵਿਯ, ਸੁਵਿਭਤ੍ਤਭਿਤ੍ਤਿਵਿਚਿਤ੍ਰਵੇਦਿਕਾਪਰਿਕ੍ਖਿਤ੍ਤਸ੍ਸ ਨਕ੍ਖਤ੍ਤਪਥਂ ਫੁਸਿਤੁਕਾਮਤਾਯ ਵਿਯ, ਵਿਜਮ੍ਭਿਤਸਮੁਸ੍ਸਯਸ੍ਸ ਪਾਸਾਦਵਰਸ੍ਸ ਸੁਖਾਰੋਹਣਤ੍ਥਂ ਦਨ੍ਤਮਯਸਣ੍ਹਮੁਦੁਫਲਕਕਞ੍ਚਨਲਤਾਵਿਨਦ੍ਧਮਣਿਗਣਪ੍ਪਭਾਸਮੁਦਯੁਜ੍ਜਲਸੋਭਂ ਸੋਪਾਨਂ ਵਿਯ, ਸੁਵਣ੍ਣਵਲਯਨੂਪੁਰਾਦਿਸਙ੍ਘਟ੍ਟਨਸਦ੍ਦਸਮ੍ਮਿਸ੍ਸਿਤਕਥਿਤਹਸਿਤਮਧੁਰਸ੍ਸਰਗੇਹਜਨਵਿਚਰਿਤਸ੍ਸ ਉਲ਼ਾਰਿਸ੍ਸਰਿਯਵਿਭਵਸੋਭਿਤਸ੍ਸ ਮਹਾਘਰਸ੍ਸ ਸੁਖਪ੍ਪਵੇਸਨਤ੍ਥਂ ਸੁਵਣ੍ਣਰਜਤਮਣਿਮੁਤ੍ਤਾਪਵਾਲ਼ਾਦਿਜੁਤਿਵਿਸਦਵਿਜ੍ਜੋਤਿਤਸੁਪ੍ਪਤਿਟ੍ਠਿਤਵਿਸਾਲਦ੍ਵਾਰਕਵਾਟਂ ਮਹਾਦ੍ਵਾਰਂ ਵਿਯ ਅਤ੍ਥਬ੍ਯਞ੍ਜਨਸਮ੍ਪਨ੍ਨਸ੍ਸ ਬੁਦ੍ਧਾਨਂ ਦੇਸਨਾਞਾਣਗਮ੍ਭੀਰਭਾਵਸਂਸੂਚਕਸ੍ਸ ਇਮਸ੍ਸ ਸੁਤ੍ਤਸ੍ਸ ਸੁਖਾਵਗਾਹਣਤ੍ਥਂ ਕਾਲਦੇਸਦੇਸਕਪਰਿਸਾਪਦੇਸਪਟਿਮਣ੍ਡਿਤਂ ਨਿਦਾਨਂ ਭਾਸਿਤਂ, ਤਸ੍ਸ ਅਤ੍ਥਵਣ੍ਣਨਾ ਸਮਤ੍ਤਾ.

ਸੁਤ੍ਤਨ੍ਤੇ ਪਞ੍ਚਾਤਿ ਗਣਨਪਰਿਚ੍ਛੇਦੋ. ਇਮਾਨਿ ਇਨ੍ਦ੍ਰਿਯਾਨੀਤਿ ਪਰਿਚ੍ਛਿਨ੍ਨਧਮ੍ਮਨਿਦਸ੍ਸਨਂ. ਇਨ੍ਦ੍ਰਿਯਟ੍ਠੋ ਹੇਟ੍ਠਾ ਵੁਤ੍ਤੋ.

੧੮੫. ਇਦਾਨਿ ਇਮਂ ਸੁਤ੍ਤਨ੍ਤਂ ਦਸ੍ਸੇਤ੍ਵਾ ਇਮਸ੍ਮਿਂ ਸੁਤ੍ਤਨ੍ਤੇ ਵੁਤ੍ਤਾਨਂ ਇਨ੍ਦ੍ਰਿਯਾਨਂ ਵਿਸੁਦ੍ਧਿਭਾਵਨਾਵਿਧਾਨਂ ਭਾਵਿਤਤ੍ਤਂ ਪਟਿਪ੍ਪਸ੍ਸਦ੍ਧਿਞ੍ਚ ਦਸ੍ਸੇਤੁਕਾਮੋ ਇਮਾਨਿ ਪਞ੍ਚਿਨ੍ਦ੍ਰਿਯਾਨੀਤਿਆਦਿਮਾਹ. ਤਤ੍ਥ ਵਿਸੁਜ੍ਝਨ੍ਤੀਤਿ ਵਿਸੁਦ੍ਧਿਂ ਪਾਪੁਣਨ੍ਤਿ. ਅਸ੍ਸਦ੍ਧੇਤਿ ਤੀਸੁ ਰਤਨੇਸੁ ਸਦ੍ਧਾਵਿਰਹਿਤੇ. ਸਦ੍ਧੇਤਿ ਤੀਸੁ ਰਤਨੇਸੁ ਸਦ੍ਧਾਸਮ੍ਪਨ੍ਨੇ. ਸੇਵਤੋਤਿ ਚਿਤ੍ਤੇਨ ਸੇਵਨ੍ਤਸ੍ਸ. ਭਜਤੋਤਿ ਉਪਸਙ੍ਕਮਨ੍ਤਸ੍ਸ. ਪਯਿਰੁਪਾਸਤੋਤਿ ਸਕ੍ਕਚ੍ਚਂ ਉਪਨਿਸੀਦਨ੍ਤਸ੍ਸ. ਪਸਾਦਨੀਯੇ ਸੁਤ੍ਤਨ੍ਤੇਤਿ ਪਸਾਦਜਨਕੇ ਰਤਨਤ੍ਤਯਗੁਣਪਟਿਸਂਯੁਤ੍ਤੇ ਸੁਤ੍ਤਨ੍ਤੇ. ਕੁਸੀਤੇਤਿ ਕੁਚ੍ਛਿਤੇਨ ਆਕਾਰੇਨ ਸੀਦਨ੍ਤੀਤਿ ਕੁਸੀਦਾ, ਕੁਸੀਦਾ ਏਵ ਕੁਸੀਤਾ. ਤੇ ਕੁਸੀਤੇ. ਸਮ੍ਮਪ੍ਪਧਾਨੇਤਿ ਚਤੁਕਿਚ੍ਚਸਾਧਕਵੀਰਿਯਪਟਿਸਂਯੁਤ੍ਤਸੁਤ੍ਤਨ੍ਤੇ. ਮੁਟ੍ਠਸ੍ਸਤੀਤਿ ਨਟ੍ਠਸ੍ਸਤਿਕੇ. ਸਤਿਪਟ੍ਠਾਨੇਤਿ ਸਤਿਪਟ੍ਠਾਨਾਧਿਕਾਰਕੇ ਸੁਤ੍ਤਨ੍ਤੇ. ਝਾਨਵਿਮੋਕ੍ਖੇਤਿ ਚਤੁਤ੍ਥਜ੍ਝਾਨਅਟ੍ਠਵਿਮੋਕ੍ਖਤਿਵਿਧਵਿਮੋਕ੍ਖਾਧਿਕਾਰਕੇ ਸੁਤ੍ਤਨ੍ਤੇ. ਦੁਪ੍ਪਞ੍ਞੇਤਿ ਨਿਪ੍ਪਞ੍ਞੇ, ਪਞ੍ਞਾਭਾਵਤੋ ਵਾ ਦੁਟ੍ਠਾ ਪਞ੍ਞਾ ਏਤੇਸਨ੍ਤਿ ਦੁਪ੍ਪਞ੍ਞਾ. ਤੇ ਦੁਪ੍ਪਞ੍ਞੇ. ਗਮ੍ਭੀਰਞਾਣਚਰਿਯਨ੍ਤਿ ਚਤੁਸਚ੍ਚਪਟਿਚ੍ਚਸਮੁਪ੍ਪਾਦਾਦਿਪਟਿਸਂਯੁਤ੍ਤੇ ਸੁਤ੍ਤਨ੍ਤੇ, ਞਾਣਕਥਾਸਦਿਸੇ ਵਾ. ਸੁਤ੍ਤਨ੍ਤਕ੍ਖਨ੍ਧੇਤਿ ਸੁਤ੍ਤਨ੍ਤਕੋਟ੍ਠਾਸੇ. ਅਸ੍ਸਦ੍ਧਿਯਨ੍ਤਿਆਦੀਸੁ ਅਸ੍ਸਦ੍ਧਿਯਨ੍ਤਿ ਅਸ੍ਸਦ੍ਧਭਾਵਂ. ਅਸ੍ਸਦ੍ਧਿਯੇ ਆਦੀਨਵਦਸ੍ਸਾਵੀ ਅਸ੍ਸਦ੍ਧਿਯਂ ਪਜਹਨ੍ਤੋ ਸਦ੍ਧਿਨ੍ਦ੍ਰਿਯਂ ਭਾਵੇਤਿ, ਸਦ੍ਧਿਨ੍ਦ੍ਰਿਯੇ ਆਨਿਸਂਸਦਸ੍ਸਾਵੀ ਸਦ੍ਧਿਨ੍ਦ੍ਰਿਯਂ ਭਾਵੇਨ੍ਤੋ ਅਸ੍ਸਦ੍ਧਿਯਂ ਪਜਹਤਿ. ਏਸ ਨਯੋ ਸੇਸੇਸੁ. ਕੋਸਜ੍ਜਨ੍ਤਿ ਕੁਸੀਤਭਾਵਂ. ਪਮਾਦਨ੍ਤਿ ਸਤਿਵਿਪ੍ਪਵਾਸਂ. ਉਦ੍ਧਚ੍ਚਨ੍ਤਿ ਉਦ੍ਧਤਭਾਵਂ, ਵਿਕ੍ਖੇਪਨ੍ਤਿ ਅਤ੍ਥੋ. ਪਹੀਨਤ੍ਤਾਤਿ ਅਪ੍ਪਨਾਵਸੇਨ ਝਾਨਪਾਰਿਪੂਰਿਯਾ ਪਹੀਨਤ੍ਤਾ. ਸੁਪ੍ਪਹੀਨਤ੍ਤਾਤਿ ਵੁਟ੍ਠਾਨਗਾਮਿਨਿਵਸੇਨ ਵਿਪਸ੍ਸਨਾਪਾਰਿਪੂਰਿਯਾ ਸੁਟ੍ਠੁ ਪਹੀਨਤ੍ਤਾ. ਭਾਵਿਤਂ ਹੋਤਿ ਸੁਭਾਵਿਤਨ੍ਤਿ ਵੁਤ੍ਤਕ੍ਕਮੇਨੇਵ ਯੋਜੇਤਬ੍ਬਂ. ਵਿਪਸ੍ਸਨਾਯ ਹਿ ਵਿਪਕ੍ਖਵਸੇਨ ਪਹੀਨਤ੍ਤਾ ‘‘ਸੁਪ੍ਪਹੀਨਤ੍ਤਾ’’ਤਿ ਵਤ੍ਤੁਂ ਯੁਜ੍ਜਤਿ. ਤਸ੍ਮਾਯੇਵ ਚ ‘‘ਸੁਭਾਵਿਤ’’ਨ੍ਤਿ, ਨ ਤਥਾ ਝਾਨੇਨ. ਯਸ੍ਮਾ ਪਨ ਪਹਾਤਬ੍ਬਾਨਂ ਪਹਾਨੇਨ ਭਾਵਨਾਸਿਦ੍ਧਿ, ਭਾਵਨਾਸਿਦ੍ਧਿਯਾ ਚ ਪਹਾਤਬ੍ਬਾਨਂ ਪਹਾਨਸਿਦ੍ਧਿ ਹੋਤਿ, ਤਸ੍ਮਾ ਯਮਕਂ ਕਤ੍ਵਾ ਨਿਦ੍ਦਿਟ੍ਠਂ.

੧੮੬. ਪਟਿਪ੍ਪਸ੍ਸਦ੍ਧਿਵਾਰੇ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚਾਤਿ ਭਾਵਿਤਾਨਂਯੇਵ ਸੁਭਾਵਿਤਤਾ. ਪਟਿਪ੍ਪਸ੍ਸਦ੍ਧਾਨਿ ਚ ਸੁਪ੍ਪਟਿਪ੍ਪਸ੍ਸਦ੍ਧਾਨਿ ਚਾਤਿ ਪਟਿਪ੍ਪਸ੍ਸਦ੍ਧਾਨਂਯੇਵ ਸੁਪ੍ਪਟਿਪ੍ਪਸ੍ਸਦ੍ਧਤਾ ਵੁਤ੍ਤਾ. ਫਲਕ੍ਖਣੇ ਮਗ੍ਗਕਿਚ੍ਚਨਿਬ੍ਬਤ੍ਤਿਵਸੇਨ ਭਾਵਿਤਤਾ ਪਟਿਪ੍ਪਸ੍ਸਦ੍ਧਤਾ ਚ ਵੇਦਿਤਬ੍ਬਾ. ਸਮੁਚ੍ਛੇਦਵਿਸੁਦ੍ਧਿਯੋਤਿ ਮਗ੍ਗਵਿਸੁਦ੍ਧਿਯੋਯੇਵ. ਪਟਿਪ੍ਪਸ੍ਸਦ੍ਧਿਵਿਸੁਦ੍ਧਿਯੋਤਿ ਫਲਵਿਸੁਦ੍ਧਿਯੋ ਏਵ.

ਇਦਾਨਿ ਤਥਾ ਵੁਤ੍ਤਵਿਧਾਨਾਨਿ ਇਨ੍ਦ੍ਰਿਯਾਨਿ ਕਾਰਕਪੁਗ੍ਗਲਵਸੇਨ ਯੋਜੇਤ੍ਵਾ ਦਸ੍ਸੇਤੁਂ ਕਤਿਨਂ ਪੁਗ੍ਗਲਾਨਨ੍ਤਿਆਦਿਮਾਹ. ਤਤ੍ਥ ਸਵਨੇਨ ਬੁਦ੍ਧੋਤਿ ਸਮ੍ਮਾਸਮ੍ਬੁਦ੍ਧਤੋ ਧਮ੍ਮਕਥਾਸਵਨੇਨ ਚਤੁਸਚ੍ਚਂ ਬੁਦ੍ਧਵਾ, ਞਾਤਵਾਤਿ ਅਤ੍ਥੋ. ਇਦਂ ਭਾਵਿਤਿਨ੍ਦ੍ਰਿਯਭਾਵਸ੍ਸ ਕਾਰਣਵਚਨਂ. ਭਾਵਨਾਭਿਸਮਯਵਸੇਨ ਹਿ ਮਗ੍ਗਸ੍ਸ ਬੁਦ੍ਧਤ੍ਤਾ ਫਲਕ੍ਖਣੇ ਭਾਵਿਤਿਨ੍ਦ੍ਰਿਯੋ ਹੋਤਿ. ਅਟ੍ਠਨ੍ਨਮ੍ਪਿ ਅਰਿਯਾਨਂ ਤਥਾਗਤਸ੍ਸ ਸਾਵਕਤ੍ਤਾ ਵਿਸੇਸੇਤ੍ਵਾ ਅਰਹਤ੍ਤਫਲਟ੍ਠਮੇਵ ਦਸ੍ਸੇਨ੍ਤੋ ਖੀਣਾਸਵੋਤਿ ਆਹ. ਸੋਯੇਵ ਹਿ ਸਬ੍ਬਕਿਚ੍ਚਨਿਪ੍ਫਤ੍ਤਿਯਾ ਭਾਵਿਤਿਨ੍ਦ੍ਰਿਯੋਤਿ ਵੁਤ੍ਤੋ. ਇਤਰੇਪਿ ਪਨ ਤਂਤਂਮਗ੍ਗਕਿਚ੍ਚਨਿਪ੍ਫਤ੍ਤਿਯਾ ਪਰਿਯਾਯੇਨ ਭਾਵਿਤਿਨ੍ਦ੍ਰਿਯਾ ਏਵ. ਤਸ੍ਮਾ ਏਵ ਚ ਚਤੂਸੁ ਫਲਕ੍ਖਣੇਸੁ ‘‘ਪਞ੍ਚਿਨ੍ਦ੍ਰਿਯਾਨਿ ਭਾਵਿਤਾਨਿ ਚੇਵ ਹੋਨ੍ਤਿ ਸੁਭਾਵਿਤਾਨਿ ਚਾ’’ਤਿ ਵੁਤ੍ਤਂ. ਯਸ੍ਮਾ ਪਨ ਤੇਸਂ ਉਪਰਿਮਗ੍ਗਤ੍ਥਾਯ ਇਨ੍ਦ੍ਰਿਯਭਾਵਨਾ ਅਤ੍ਥਿਯੇਵ, ਤਸ੍ਮਾ ਤੇ ਨ ਨਿਪ੍ਪਰਿਯਾਯੇਨ ਭਾਵਿਤਿਨ੍ਦ੍ਰਿਯਾ. ਸਯਂ ਭੂਤਟ੍ਠੇਨਾਤਿ ਅਨਾਚਰਿਯੋ ਹੁਤ੍ਵਾ ਸਯਮੇਵ ਅਰਿਯਾਯ ਜਾਤਿਯਾ ਭੂਤਟ੍ਠੇਨ ਜਾਤਟ੍ਠੇਨ ਭਗਵਾ. ਸੋਪਿ ਹਿ ਭਾਵਨਾਸਿਦ੍ਧਿਵਸੇਨ ਫਲਕ੍ਖਣੇ ਸਯਮ੍ਭੂ ਨਾਮ ਹੋਤਿ. ਏਵਂ ਸਯਂ ਭੂਤਟ੍ਠੇਨ ਭਾਵਿਤਿਨ੍ਦ੍ਰਿਯੋ. ਅਪ੍ਪਮੇਯ੍ਯਟ੍ਠੇਨਾਤਿ ਅਨਨ੍ਤਗੁਣਯੋਗਤੋ ਪਮਾਣੇਤੁਂ ਅਸਕ੍ਕੁਣੇਯ੍ਯਟ੍ਠੇਨ. ਭਗਵਾ ਫਲਕ੍ਖਣੇ ਭਾਵਨਾਸਿਦ੍ਧਿਤੋ ਅਪ੍ਪਮੇਯ੍ਯੋਤਿ. ਤਸ੍ਮਾਯੇਵ ਭਾਵਿਤਿਨ੍ਦ੍ਰਿਯੋ.

ਪਠਮਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ

੧੮੭. ਪੁਨ ਅਞ੍ਞਂ ਸੁਤ੍ਤਨ੍ਤਂ ਨਿਕ੍ਖਿਪਿਤ੍ਵਾ ਇਨ੍ਦ੍ਰਿਯਵਿਧਾਨਂ ਨਿਦ੍ਦਿਸਿਤੁਕਾਮੋ ਪਞ੍ਚਿਮਾਨਿ, ਭਿਕ੍ਖਵੇਤਿਆਦਿਕਂ ਸੁਤ੍ਤਨ੍ਤਂ ਦਸ੍ਸੇਤਿ. ਤਤ੍ਥ ਯੇ ਹਿ ਕੇਚੀਤਿ ਅਨਵਸੇਸਪਰਿਯਾਦਾਨਂ, ਹਿ-ਕਾਰੋ ਪਦਪੂਰਣਮਤ੍ਤੇ ਨਿਪਾਤੋ. ਸਮਣਾ ਵਾ ਬ੍ਰਾਹ੍ਮਣਾ ਵਾਤਿ ਲੋਕਵੋਹਾਰਵਸੇਨ ਵੁਤ੍ਤਂ. ਸਮੁਦਯਨ੍ਤਿ ਪਚ੍ਚਯਂ. ਅਤ੍ਥਙ੍ਗਮਨ੍ਤਿ ਉਪ੍ਪਨ੍ਨਾਨਂ ਅਭਾਵਗਮਨਂ, ਅਨੁਪ੍ਪਨ੍ਨਾਨਂ ਅਨੁਪ੍ਪਾਦਂ ਵਾ. ਅਸ੍ਸਾਦਨ੍ਤਿ ਆਨਿਸਂਸਂ. ਆਦੀਨਵਨ੍ਤਿ ਦੋਸਂ. ਨਿਸ੍ਸਰਣਨ੍ਤਿ ਨਿਗ੍ਗਮਨਂ. ਯਥਾਭੂਤਨ੍ਤਿ ਯਥਾਸਭਾਵਂ. ਸਮਣੇਸੂਤਿ ਸਮਿਤਪਾਪੇਸੁ. ਸਮਣਸਮ੍ਮਤਾਤਿ ਨ ਮਯਾ ਸਮਣਾਤਿ ਸਮ੍ਮਤਾ. ‘‘ਸਮ੍ਮਤਾ’’ਤਿ ਵਤ੍ਤਮਾਨਕਾਲਵਸੇਨ ਵੁਚ੍ਚਮਾਨੇ ਸਦ੍ਦਲਕ੍ਖਣਵਸੇਨ ‘‘ਮੇ’’ਤਿ ਏਤ੍ਥ ਸਾਮਿਵਚਨਮੇਵ ਹੋਤਿ. ਬ੍ਰਾਹ੍ਮਣੇਸੂਤਿ ਬਾਹਿਤਪਾਪੇਸੁ. ਸਾਮਞ੍ਞਤ੍ਥਨ੍ਤਿ ਸਮਣਭਾਵਸ੍ਸ ਅਤ੍ਥਂ. ਬ੍ਰਹ੍ਮਞ੍ਞਤ੍ਥਨ੍ਤਿ ਬ੍ਰਾਹ੍ਮਣਭਾਵਸ੍ਸ ਅਤ੍ਥਂ. ਦ੍ਵਯੇਨਾਪਿ ਅਰਹਤ੍ਤਫਲਮੇਵ ਵੁਤ੍ਤਂ. ਅਥ ਵਾ ਸਾਮਞ੍ਞਤ੍ਥਨ੍ਤਿ ਹੇਟ੍ਠਾ ਤੀਣਿ ਫਲਾਨਿ. ਬ੍ਰਹ੍ਮਞ੍ਞਤ੍ਥਨ੍ਤਿ ਅਰਹਤ੍ਤਫਲਂ. ਸਾਮਞ੍ਞਬ੍ਰਹ੍ਮਞ੍ਞਨ੍ਤਿ ਹਿ ਅਰਿਯਮਗ੍ਗੋਯੇਵ. ਦਿਟ੍ਠੇਵ ਧਮ੍ਮੇਤਿ ਪਚ੍ਚਕ੍ਖੇਯੇਵ ਅਤ੍ਤਭਾਵੇ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨਾਯੇਵ ਅਧਿਕੇਨ ਞਾਣੇਨ ਪਚ੍ਚਕ੍ਖਂ ਕਤ੍ਵਾ. ਉਪਸਮ੍ਪਜ੍ਜਾਤਿ ਪਾਪੁਣਿਤ੍ਵਾ, ਨਿਪ੍ਫਾਦੇਤ੍ਵਾ ਵਾ.

੧੮੮. ਸੁਤ੍ਤਨ੍ਤਨਿਦ੍ਦੇਸੇ ਪਠਮਂ ਇਨ੍ਦ੍ਰਿਯਸਮੁਦਯਾਦੀਨਂ ਪਭੇਦਗਣਨਂ ਪੁਚ੍ਛਿਤ੍ਵਾ ਪੁਨ ਪਭੇਦਗਣਨਾ ਵਿਸ੍ਸਜ੍ਜਿਤਾ. ਤਤ੍ਥ ਅਸੀਤਿਸਤਨ੍ਤਿ ਅਸੀਤਿਉਤ੍ਤਰਂ ਸਤਂ. ਪਣ੍ਡਿਤੇਹਿ ‘‘ਅਸੀਤਿਸਤ’’ਨ੍ਤਿ ਵੁਤ੍ਤੇਹਿ ਆਕਾਰੇਹੀਤਿ ਯੋਜਨਾ.

ਪੁਨ ਪਭੇਦਗਣਨਾਪੁਚ੍ਛਾਪੁਬ੍ਬਙ੍ਗਮੇ ਗਣਨਾਨਿਦ੍ਦੇਸੇ ਅਧਿਮੋਕ੍ਖਤ੍ਥਾਯਾਤਿ ਅਧਿਮੁਚ੍ਚਨਤ੍ਥਾਯ ਸਦ੍ਦਹਨਤ੍ਥਾਯ. ਆਵਜ੍ਜਨਾਯ ਸਮੁਦਯੋਤਿ ਮਨੋਦ੍ਵਾਰਾਵਜ੍ਜਨਚਿਤ੍ਤਸ੍ਸ ਸਮੁਦਯੋ. ਸਦ੍ਧਿਨ੍ਦ੍ਰਿਯਸ੍ਸ ਸਮੁਦਯੋਤਿ ਸਦ੍ਧਿਨ੍ਦ੍ਰਿਯਸ੍ਸ ਪਚ੍ਚਯੋ, ਸਦ੍ਧਂ ਉਪ੍ਪਾਦੇਸ੍ਸਾਮੀਤਿ ਪੁਬ੍ਬਭਾਗਾਵਜ੍ਜਨਂ ਸਦ੍ਧਿਨ੍ਦ੍ਰਿਯਸ੍ਸ ਉਪਨਿਸ੍ਸਯਪਚ੍ਚਯੋ, ਸਦ੍ਧਿਨ੍ਦ੍ਰਿਯਜਵਨਸ੍ਸ ਆਵਜ੍ਜਨਂ ਪਠਮਸ੍ਸ ਜਵਨਸ੍ਸ ਅਨਨ੍ਤਰਪਚ੍ਚਯੋ, ਦੁਤਿਯਜਵਨਾਦੀਨਂ ਉਪਨਿਸ੍ਸਯਪਚ੍ਚਯੋ. ਅਧਿਮੋਕ੍ਖਵਸੇਨਾਤਿ ਛਨ੍ਦਸਮ੍ਪਯੁਤ੍ਤਅਧਿਮੋਕ੍ਖਵਸੇਨ. ਛਨ੍ਦਸ੍ਸ ਸਮੁਦਯੋਤਿ ਪੁਬ੍ਬਭਾਗਾਵਜ੍ਜਨਪਚ੍ਚਯਾ ਉਪ੍ਪਨ੍ਨਸ੍ਸ ਅਧਿਮੋਕ੍ਖਸਮ੍ਪਯੁਤ੍ਤਸ੍ਸ ਯੇਵਾਪਨਕਭੂਤਸ੍ਸ ਧਮ੍ਮਚ੍ਛਨ੍ਦਸ੍ਸ ਸਮੁਦਯੋ. ਸੋ ਪਨ ਸਦ੍ਧਿਨ੍ਦ੍ਰਿਯਸ੍ਸ ਸਹਜਾਤਅਞ੍ਞਮਞ੍ਞਨਿਸ੍ਸਯਸਮ੍ਪਯੁਤ੍ਤਅਤ੍ਥਿਅਵਿਗਤਵਸੇਨ ਪਚ੍ਚਯੋ ਹੋਤਿ, ਛਨ੍ਦਾਧਿਪਤਿਕਾਲੇ ਅਧਿਪਤਿਪਚ੍ਚਯੋ ਚ ਹੋਤਿ, ਸੋਯੇਵ ਦੁਤਿਯਸ੍ਸ ਅਨਨ੍ਤਰਸਮਨਨ੍ਤਰਅਨਨ੍ਤਰੂਪਨਿਸ੍ਸਯਾਸੇਵਨਨਤ੍ਥਿਵਿਗਤਵਸੇਨ ਪਚ੍ਚਯੋ ਹੋਤਿ. ਇਮਿਨਾਵ ਨਯੇਨ ਮਨਸਿਕਾਰਸ੍ਸਪਿ ਯੋਜਨਾ ਕਾਤਬ੍ਬਾ. ਕੇਵਲਞ੍ਹੇਤ੍ਥ ਮਨਸਿਕਾਰੋਤਿ ਸਾਰਣਲਕ੍ਖਣੋ ਯੇਵਾਪਨਕਮਨਸਿਕਾਰੋ. ਅਧਿਪਤਿਪਚ੍ਚਯਤਾ ਪਨਸ੍ਸ ਨ ਹੋਤਿ. ਸਮ੍ਪਯੁਤ੍ਤੇਸੁ ਇਮੇਸਂ ਦ੍ਵਿਨ੍ਨਂਯੇਵ ਗਹਣਂ ਬਲਵਪਚ੍ਚਯਤ੍ਤਾਤਿ ਵੇਦਿਤਬ੍ਬਂ. ਸਦ੍ਧਿਨ੍ਦ੍ਰਿਯਸ੍ਸ ਵਸੇਨਾਤਿ ਭਾਵਨਾਭਿਵੁਦ੍ਧਿਯਾ ਇਨ੍ਦ੍ਰਿਯਭਾਵਂ ਪਤ੍ਤਸ੍ਸ ਸਦ੍ਧਿਨ੍ਦ੍ਰਿਯਸ੍ਸ ਵਸੇਨ. ਏਕਤ੍ਤੁਪਟ੍ਠਾਨਨ੍ਤਿ ਏਕਾਰਮ੍ਮਣੇ ਅਚਲਭਾਵੇਨ ਭੁਸਂ ਠਾਨਂ ਉਪਰੂਪਰਿ ਸਦ੍ਧਿਨ੍ਦ੍ਰਿਯਸ੍ਸ ਪਚ੍ਚਯੋ ਹੋਤਿ. ਸਦ੍ਧਿਨ੍ਦ੍ਰਿਯੇ ਵੁਤ੍ਤਨਯੇਨੇਵ ਸੇਸਿਨ੍ਦ੍ਰਿਯਾਨਿਪਿ ਵੇਦਿਤਬ੍ਬਾਨਿ. ਏਵਮੇਕੇਕਸ੍ਸ ਇਨ੍ਦ੍ਰਿਯਸ੍ਸ ਚਤ੍ਤਾਰੋ ਚਤ੍ਤਾਰੋ ਸਮੁਦਯਾਤਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਵੀਸਤਿ ਸਮੁਦਯਾ ਹੋਨ੍ਤਿ. ਪੁਨ ਚਤੁਨ੍ਨਂ ਸਮੁਦਯਾਨਂ ਏਕੇਕਸ੍ਮਿਂ ਸਮੁਦਯੇ ਪਞ੍ਚ ਪਞ੍ਚ ਇਨ੍ਦ੍ਰਿਯਾਨਿ ਯੋਜੇਤ੍ਵਾ ਵੀਸਤਿ ਸਮੁਦਯਾ ਵੁਤ੍ਤਾ. ਪਠਮਵੀਸਤਿ ਨਾਨਾਮਗ੍ਗਵਸੇਨ ਦਟ੍ਠਬ੍ਬਾ, ਦੁਤਿਯਵੀਸਤਿ ਏਕਮਗ੍ਗਵਸੇਨ ਦਟ੍ਠਬ੍ਬਾਤਿ ਵਦਨ੍ਤਿ. ਏਵਂ ਚਤ੍ਤਾਲੀਸ ਆਕਾਰਾ ਹੋਨ੍ਤਿ. ਅਤ੍ਥਙ੍ਗਮਵਾਰੋਪਿ ਇਮਿਨਾਵ ਨਯੇਨ ਵੇਦਿਤਬ੍ਬੋ. ਸੋ ਪਨ ਅਤ੍ਥਙ੍ਗਮੋ ਇਨ੍ਦ੍ਰਿਯਭਾਵਨਂ ਅਨਨੁਯੁਤ੍ਤਸ੍ਸ ਅਪ੍ਪਟਿਲਦ੍ਧਾ ਪਟਿਲਾਭਤ੍ਥਙ੍ਗਮੋ, ਇਨ੍ਦ੍ਰਿਯਭਾਵਨਾਯ ਪਰਿਹੀਨਸ੍ਸ ਪਟਿਲਦ੍ਧਪਰਿਹਾਨਿ ਅਤ੍ਥਙ੍ਗਮੋ, ਫਲਪ੍ਪਤ੍ਤਸ੍ਸ ਪਟਿਪ੍ਪਸ੍ਸਦ੍ਧਿਅਤ੍ਥਙ੍ਗਮੋ. ਏਕਤ੍ਤਅਨੁਪਟ੍ਠਾਨਨ੍ਤਿ ਏਕਤ੍ਤੇ ਅਨੁਪਟ੍ਠਾਨਂ.

ਕ. ਅਸ੍ਸਾਦਨਿਦ੍ਦੇਸਵਣ੍ਣਨਾ

੧੮੯. ਅਸ੍ਸਾਦਨਿਦ੍ਦੇਸੇ ਅਸ੍ਸਦ੍ਧਿਯਸ੍ਸ ਅਨੁਪਟ੍ਠਾਨਨ੍ਤਿ ਅਸ੍ਸਦ੍ਧੇ ਪੁਗ੍ਗਲੇ ਪਰਿਵਜ੍ਜਯਤੋ ਸਦ੍ਧੇ ਪੁਗ੍ਗਲੇ ਸੇਵਤੋ ਪਸਾਦਨੀਯਸੁਤ੍ਤਨ੍ਤੇ ਪਚ੍ਚਵੇਕ੍ਖਤੋ ਤਤ੍ਥ ਯੋਨਿਸੋਮਨਸਿਕਾਰਂ ਬਹੁਲੀਕਰੋਤੋ ਚ ਅਸ੍ਸਦ੍ਧਿਯਸ੍ਸ ਅਨੁਪਟ੍ਠਾਨਂ ਹੋਤਿ. ਅਸ੍ਸਦ੍ਧਿਯਪਰਿਲ਼ਾਹਸ੍ਸ ਅਨੁਪਟ੍ਠਾਨਨ੍ਤਿ ਏਤ੍ਥ ਅਸ੍ਸਦ੍ਧਸ੍ਸ ਸਦ੍ਧਾਕਥਾਯ ਪਵਤ੍ਤਮਾਨਾਯ ਦੁਕ੍ਖਂ ਦੋਮਨਸ੍ਸਂ ਉਪ੍ਪਜ੍ਜਤਿ. ਅਯਂ ਅਸ੍ਸਦ੍ਧਿਯਪਰਿਲ਼ਾਹੋ. ਅਧਿਮੋਕ੍ਖਚਰਿਯਾਯ ਵੇਸਾਰਜ੍ਜਨ੍ਤਿ ਸਦ੍ਧਾਵਤ੍ਥੁਵਸੇਨ ਵਾ ਭਾਵਨਾਯ ਵਾ ਵਸਿਪ੍ਪਤ੍ਤਸ੍ਸ ਸਦ੍ਧਾਪਵਤ੍ਤਿਯਾ ਵਿਸਾਰਦਭਾਵੋ ਹੋਤਿ. ਸਨ੍ਤੋ ਚ ਵਿਹਾਰਾਧਿਗਮੋਤਿ ਸਮਥਸ੍ਸ ਵਾ ਵਿਪਸ੍ਸਨਾਯ ਵਾ ਪਟਿਲਾਭੋ. ਸੁਖਂ ਸੋਮਨਸ੍ਸਨ੍ਤਿ ਏਤ੍ਥ ਚੇਤਸਿਕਸੁਖਭਾਵਦਸ੍ਸਨਤ੍ਥਂ ਸੋਮਨਸ੍ਸਵਚਨਂ. ਸਦ੍ਧਿਨ੍ਦ੍ਰਿਯਸਮੁਟ੍ਠਿਤਪਣੀਤਰੂਪਫੁਟ੍ਠਕਾਯਸ੍ਸ ਕਾਯਿਕਸੁਖਮ੍ਪਿ ਲਬ੍ਭਤਿਯੇਵ. ਸੁਖਸੋਮਨਸ੍ਸਸ੍ਸ ਪਧਾਨਸ੍ਸਾਦਤ੍ਤਾ ‘‘ਅਯਂ ਸਦ੍ਧਿਨ੍ਦ੍ਰਿਯਸ੍ਸ ਅਸ੍ਸਾਦੋ’’ਤਿ ਵਿਸੇਸੇਤ੍ਵਾ ਵੁਤ੍ਤਂ. ਇਮਿਨਾਵ ਨਯੇਨ ਸੇਸਿਨ੍ਦ੍ਰਿਯਸ੍ਸਾਦਾਪਿ ਯੋਜੇਤ੍ਵਾ ਵੇਦਿਤਬ੍ਬਾ.

ਖ. ਆਦੀਨਵਨਿਦ੍ਦੇਸਵਣ੍ਣਨਾ

੧੯੦. ਆਦੀਨਵਨਿਦ੍ਦੇਸੇ ਅਨਿਚ੍ਚਟ੍ਠੇਨਾਤਿ ਸਦ੍ਧਿਨ੍ਦ੍ਰਿਯਸ੍ਸ ਅਨਿਚ੍ਚਟ੍ਠੇਨ. ਸੋ ਅਨਿਚ੍ਚਟ੍ਠੋ ਸਦ੍ਧਿਨ੍ਦ੍ਰਿਯਸ੍ਸ ਆਦੀਨਵੋਤਿ ਵੁਤ੍ਤਂ ਹੋਤਿ. ਇਤਰਦ੍ਵਯੇਪਿ ਏਸੇਵ ਨਯੋ. ਇਮੇ ਸਮੁਦਯਤ੍ਥਙ੍ਗਮਸ੍ਸਾਦਾਦੀਨਵਾ ਲੋਕਿਯਇਨ੍ਦ੍ਰਿਯਾਨਮੇਵਾਤਿ ਵੇਦਿਤਬ੍ਬਾ.

ਗ. ਨਿਸ੍ਸਰਣਨਿਦ੍ਦੇਸਵਣ੍ਣਨਾ

੧੯੧. ਨਿਸ੍ਸਰਣਨਿਦ੍ਦੇਸੇ ਅਧਿਮੋਕ੍ਖਟ੍ਠੇਨਾਤਿਆਦੀਸੁ ਏਕੇਕਸ੍ਮਿਂ ਇਨ੍ਦ੍ਰਿਯੇ ਪਞ੍ਚ ਪਞ੍ਚ ਕਤ੍ਵਾ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਪਞ੍ਚਵੀਸਤਿ ਨਿਸ੍ਸਰਣਾਨਿ ਮਗ੍ਗਫਲਵਸੇਨ ਨਿਦ੍ਦਿਟ੍ਠਾਨਿ. ਤਤ੍ਥ ਤਤੋ ਪਣੀਤਤਰਸਦ੍ਧਿਨ੍ਦ੍ਰਿਯਸ੍ਸ ਪਟਿਲਾਭਾਤਿ ਤਤੋ ਵਿਪਸ੍ਸਨਾਕ੍ਖਣੇ ਪਵਤ੍ਤਸਦ੍ਧਿਨ੍ਦ੍ਰਿਯਤੋ ਮਗ੍ਗਕ੍ਖਣੇ ਪਣੀਤਤਰਸ੍ਸ ਸਦ੍ਧਿਨ੍ਦ੍ਰਿਯਸ੍ਸ ਪਟਿਲਾਭਵਸੇਨ. ਪੁਰਿਮਤਰਸਦ੍ਧਿਨ੍ਦ੍ਰਿਯਾ ਨਿਸ੍ਸਟਂ ਹੋਤੀਤਿ ਤਸ੍ਮਿਂ ਮਗ੍ਗਕ੍ਖਣੇ ਸਦ੍ਧਿਨ੍ਦ੍ਰਿਯਂ ਪੁਰਿਮਤਰਤੋ ਵਿਪਸ੍ਸਨਾਕ੍ਖਣੇ ਪਵਤ੍ਤਸਦ੍ਧਿਨ੍ਦ੍ਰਿਯਤੋ ਨਿਕ੍ਖਨ੍ਤਂ ਹੋਤਿ. ਇਮਿਨਾਵ ਨਯੇਨ ਫਲਕ੍ਖਣੇ ਸਦ੍ਧਿਨ੍ਦ੍ਰਿਯਮ੍ਪਿ ਉਭਯਤ੍ਥ ਸੇਸਿਨ੍ਦ੍ਰਿਯਾਨਿਪਿ ਯੋਜੇਤਬ੍ਬਾਨਿ.

੧੯੨. ਪੁਬ੍ਬਭਾਗੇ ਪਞ੍ਚਹਿ ਇਨ੍ਦ੍ਰਿਯੇਹੀਤਿ ਪਠਮਜ੍ਝਾਨੂਪਚਾਰੇ ਪਞ੍ਚਹਿ ਇਨ੍ਦ੍ਰਿਯੇਹਿ ਪਠਮਜ੍ਝਾਨਾਦਿਅਟ੍ਠਸਮਾਪਤ੍ਤਿਵਸੇਨ ਅਟ੍ਠ ਨਿਸ੍ਸਰਣਾਨਿ, ਅਨਿਚ੍ਚਾਨੁਪਸ੍ਸਨਾਦਿਅਟ੍ਠਾਰਸਮਹਾਵਿਪਸ੍ਸਨਾਵਸੇਨ ਅਟ੍ਠਾਰਸ ਨਿਸ੍ਸਰਣਾਨਿ, ਸੋਤਾਪਤ੍ਤਿਮਗ੍ਗਾਦਿਵਸੇਨ ਅਟ੍ਠ ਲੋਕੁਤ੍ਤਰਨਿਸ੍ਸਰਣਾਨਿ. ਏਵਂ ਝਾਨਸਮਾਪਤ੍ਤਿਮਹਾਵਿਪਸ੍ਸਨਾਮਗ੍ਗਫਲਵਸੇਨ ਚਤੁਤ੍ਤਿਂਸ ਨਿਸ੍ਸਰਣਾਨਿ ਪੁਰਿਮਪੁਰਿਮਸਮਤਿਕ੍ਕਮਤੋ ਨਿਦ੍ਦਿਟ੍ਠਾਨਿ. ਨੇਕ੍ਖਮ੍ਮੇ ਪਞ੍ਚਿਨ੍ਦ੍ਰਿਯਾਨੀਤਿਆਦੀਨਿ ਪਨ ਸਤ੍ਤਤਿਂਸ ਨਿਸ੍ਸਰਣਾਨਿ ਪਟਿਪਕ੍ਖਪਹਾਨਵਸੇਨ ਪਟਿਪਕ੍ਖਤੋ ਨਿਦ੍ਦਿਟ੍ਠਾਨਿ. ਤਤ੍ਥ ਨੇਕ੍ਖਮ੍ਮਾਦੀਸੁ ਸਤ੍ਤਸੁ ਸਤ੍ਤ ਨਿਸ੍ਸਰਣਾਨਿ ਉਪਚਾਰਭੂਮਿਵਸੇਨ ਵੁਤ੍ਤਾਨਿ, ਫਲਾਨਿ ਪਨ ਪਟਿਪਕ੍ਖਪਹਾਨਾਭਾਵਤੋ ਨ ਵੁਤ੍ਤਾਨਿ.

੧੯੩. ਦਿਟ੍ਠੇਕਟ੍ਠੇਹੀਤਿ ਯਾਵ ਸੋਤਾਪਤ੍ਤਿਮਗ੍ਗਾ ਦਿਟ੍ਠਿਯਾ ਸਹ ਏਕਸ੍ਮਿਂ ਪੁਗ੍ਗਲੇ ਠਿਤਾਤਿ ਦਿਟ੍ਠੇਕਟ੍ਠਾ. ਤੇਹਿ ਦਿਟ੍ਠੇਕਟ੍ਠੇਹਿ. ਓਲ਼ਾਰਿਕੇਹੀਤਿ ਥੂਲੇਹਿ ਕਾਮਰਾਗਬ੍ਯਾਪਾਦੇਹਿ. ਅਣੁਸਹਗਤੇਹੀਤਿ ਸੁਖੁਮਭੂਤੇਹਿ ਕਾਮਰਾਗਬ੍ਯਾਪਾਦੇਹਿਯੇਵ. ਸਬ੍ਬਕਿਲੇਸੇਹੀਤਿ ਰੂਪਰਾਗਾਦੀਹਿ. ਤੇਸੁ ਹਿ ਪਹੀਨੇਸੁ ਸਬ੍ਬਕਿਲੇਸਾ ਪਹੀਨਾ ਹੋਨ੍ਤਿ, ਤਸ੍ਮਾ ‘‘ਸਬ੍ਬਕਿਲੇਸੇਹੀ’’ਤਿ ਵੁਤ੍ਤਂ. ਅਵੁਤ੍ਤਤ੍ਥਾਨਿ ਪਨੇਤ੍ਥ ਪਦਾਨਿ ਹੇਟ੍ਠਾ ਵੁਤ੍ਤਤ੍ਥਾਨੇਵਾਤਿ. ਸਬ੍ਬੇਸਞ੍ਞੇਵ ਖੀਣਾਸਵਾਨਂ ਤਤ੍ਥ ਤਤ੍ਥ ਪਞ੍ਚਿਨ੍ਦ੍ਰਿਯਾਨੀਤਿ ‘‘ਅਧਿਮੋਕ੍ਖਟ੍ਠੇਨਾ’’ਤਿਆਦੀਸੁ ਪੁਬ੍ਬੇ ਵੁਤ੍ਤੇਸੁ ਠਾਨੇਸੁ ਤਸ੍ਮਿਂ ਤਸ੍ਮਿਂ ਠਾਨੇ ਪਞ੍ਚਿਨ੍ਦ੍ਰਿਯਾਨਿ ਬੁਦ੍ਧਪਚ੍ਚੇਕਬੁਦ੍ਧਸਾਵਕਾਨਂ ਖੀਣਾਸਵਾਨਂ ਯਥਾਯੋਗਂ ਤਤੋ ਤਤੋ ਨਿਸ੍ਸਟਾਨਿ ਹੋਨ੍ਤਿ. ਇਮਸ੍ਮਿਂ ਵਾਰੇ ਪਠਮਂ ਵੁਤ੍ਤਨਯਾ ਏਵ ਯਥਾਯੋਗਂ ਖੀਣਾਸਵਵਸੇਨ ਵੁਤ੍ਤਾ.

ਕਥਂ ਪਨੇਤਾਨਿ ਨਿਸ੍ਸਰਣਾਨਿ ਅਸੀਤਿਸਤਂ ਹੋਨ੍ਤੀਤਿ? ਵੁਚ੍ਚਤੇ – ਮਗ੍ਗਫਲਵਸੇਨ ਵੁਤ੍ਤਾਨਿ ਪਞ੍ਚਵੀਸਤਿ, ਸਮਤਿਕ੍ਕਮਵਸੇਨ ਵੁਤ੍ਤਾਨਿ ਚਤੁਤ੍ਤਿਂਸ, ਪਟਿਪਕ੍ਖਵਸੇਨ ਵੁਤ੍ਤਾਨਿ ਸਤ੍ਤਤਿਂਸਾਤਿ ਪਠਮਵਾਰੇ ਸਬ੍ਬਾਨਿ ਛਨ੍ਨਵੁਤਿ ਨਿਸ੍ਸਰਣਾਨਿ ਹੋਨ੍ਤਿ, ਏਤਾਨਿਯੇਵ ਦੁਤਿਯਵਾਰੇ ਖੀਣਾਸਵਾਨਂ ਵਸੇਨ ਦ੍ਵਾਦਸਸੁ ਅਪਨੀਤੇਸੁ ਚਤੁਰਾਸੀਤਿ ਹੋਨ੍ਤਿ. ਇਤਿ ਪੁਰਿਮਾਨਿ ਛਨ੍ਨਵੁਤਿ, ਇਮਾਨਿ ਚ ਚਤੁਰਾਸੀਤੀਤਿ ਅਸੀਤਿਸਤਂ ਹੋਨ੍ਤਿ. ਕਤਮਾਨਿ ਪਨ ਦ੍ਵਾਦਸ ਖੀਣਾਸਵਾਨਂ ਅਪਨੇਤਬ੍ਬਾਨਿ? ਸਮਤਿਕ੍ਕਮਤੋ ਵੁਤ੍ਤੇਸੁ ਮਗ੍ਗਫਲਵਸੇਨ ਵੁਤ੍ਤਾਨਿ ਅਟ੍ਠ ਨਿਸ੍ਸਰਣਾਨਿ, ਪਟਿਪਕ੍ਖਤੋ ਵੁਤ੍ਤੇਸੁ ਮਗ੍ਗਵਸੇਨ ਵੁਤ੍ਤਾਨਿ ਚਤ੍ਤਾਰੀਤਿ ਇਮਾਨਿ ਦ੍ਵਾਦਸ ਅਪਨੇਤਬ੍ਬਾਨਿ. ਅਰਹਤ੍ਤਫਲਵਸੇਨ ਵੁਤ੍ਤਾਨਿ ਕਸ੍ਮਾ ਅਪਨੇਤਬ੍ਬਾਨੀਤਿ ਚੇ? ਸਬ੍ਬਪਠਮਂ ਵੁਤ੍ਤਾਨਂ ਪਞ੍ਚਵੀਸਤਿਯਾ ਨਿਸ੍ਸਰਣਾਨਂ ਮਗ੍ਗਫਲਵਸੇਨੇਵ ਲਬ੍ਭਨਤੋ. ਅਰਹਤ੍ਤਫਲਵਸੇਨ ਨਿਸ੍ਸਰਣਾਨਿ ਵੁਤ੍ਤਾਨੇਵ ਹੋਨ੍ਤਿ. ਹੇਟ੍ਠਿਮਂ ਹੇਟ੍ਠਿਮਂ ਪਨ ਫਲਸਮਾਪਤ੍ਤਿਂ ਉਪਰਿਮਾ ਉਪਰਿਮਾ ਨ ਸਮਾਪਜ੍ਜਨ੍ਤਿਯੇਵਾਤਿ ਹੇਟ੍ਠਾ ਤੀਣਿਪਿ ਫਲਾਨਿ ਨ ਲਬ੍ਭਨ੍ਤਿਯੇਵ. ਝਾਨਸਮਾਪਤ੍ਤਿਵਿਪਸ੍ਸਨਾਨੇਕ੍ਖਮ੍ਮਾਦੀਨਿ ਚ ਕਿਰਿਯਾਵਸੇਨ ਲਬ੍ਭਨ੍ਤਿ. ਪਞ੍ਚਪਿ ਚੇਤਾਨਿ ਇਨ੍ਦ੍ਰਿਯਾਨਿ ਪੁਬ੍ਬਮੇਵ ਪਟਿਪਕ੍ਖਾਨਂ ਪਟਿਪ੍ਪਸ੍ਸਦ੍ਧਤ੍ਤਾ ਪਟਿਪਕ੍ਖਤੋ ਨਿਸ੍ਸਟਾਨੇਵ ਹੋਨ੍ਤੀਤਿ.

ਦੁਤਿਯਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ

੧੯੪. ਪੁਨ ਅਞ੍ਞਂ ਸੁਤ੍ਤਨ੍ਤਂ ਨਿਕ੍ਖਿਪਿਤ੍ਵਾ ਇਨ੍ਦ੍ਰਿਯਵਿਧਾਨਂ ਨਿਦ੍ਦਿਸਿਤੁਕਾਮੋ ਪਞ੍ਚਿਮਾਨਿ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਸੋਤਾਪਤ੍ਤਿਯਙ੍ਗੇਸੂਤਿ ਏਤ੍ਥ ਸੋਤੋ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੋਤਸ੍ਸ ਆਪਤ੍ਤਿ ਭੁਸਂ ਪਾਪੁਣਨਂ ਸੋਤਾਪਤ੍ਤਿ, ਸੋਤਾਪਤ੍ਤਿਯਾ ਅਙ੍ਗਾਨਿ ਸਮ੍ਭਾਰਾਨਿ ਸੋਤਾਪਤ੍ਤਿਅਙ੍ਗਾਨਿ. ਸੋਤਾਪਨ੍ਨਤਾਯ ਪੁਬ੍ਬਭਾਗਪਟਿਲਾਭਅਙ੍ਗਾਨਿ. ਸਪ੍ਪੁਰਿਸਸਂਸੇਵੋ ਸੋਤਾਪਤ੍ਤਿਅਙ੍ਗਂ, ਸਦ੍ਧਮ੍ਮਸ੍ਸਵਨਂ ਸੋਤਾਪਤ੍ਤਿਅਙ੍ਗਂ, ਯੋਨਿਸੋਮਨਸਿਕਾਰੋ ਸੋਤਾਪਤ੍ਤਿਅਙ੍ਗਂ, ਧਮ੍ਮਾਨੁਧਮ੍ਮਪਟਿਪਤ੍ਤਿ ਸੋਤਾਪਤ੍ਤਿਅਙ੍ਗਂ, ਇਮਾਨਿ ਚਤ੍ਤਾਰਿ ਸੋਤਾਪਤ੍ਤਿਅਙ੍ਗਾਨਿ. ਸੇਸਾ ਹੇਟ੍ਠਾ ਵੁਤ੍ਤਾ ਏਵ. ਇਦਞ੍ਚ ਇਮੇਸਂ ਇਨ੍ਦ੍ਰਿਯਾਨਂ ਸਕਵਿਸਯੇ ਜੇਟ੍ਠਕਭਾਵਦਸ੍ਸਨਤ੍ਥਂ ਵੁਤ੍ਤਂ. ਯਥਾ ਹਿ ਚਤ੍ਤਾਰੋ ਸੇਟ੍ਠਿਪੁਤ੍ਤਾ ਰਾਜਾਤਿਰਾਜਪਞ੍ਚਮੇਸੁ ਸਹਾਯੇਸੁ ‘‘ਨਕ੍ਖਤ੍ਤਂ ਕੀਲ਼ਿਸ੍ਸਾਮਾ’’ਤਿ ਵੀਥਿਂ ਓਤਿਣ੍ਣੇਸੁ ਏਕਸ੍ਸ ਸੇਟ੍ਠਿਪੁਤ੍ਤਸ੍ਸ ਗੇਹਂ ਗਤਕਾਲੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਇਮੇਸਂ ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਗੇਹੇ ਵਿਚਾਰੇਤਿ, ਦੁਤਿਯਸ੍ਸ ਤਤਿਯਸ੍ਸ ਚਤੁਤ੍ਥਸ੍ਸ ਗੇਹਂ ਗਤਕਾਲੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਇਮੇਸਂ ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਗੇਹੇ ਵਿਚਾਰੇਤਿ, ਅਥ ਸਬ੍ਬਪਚ੍ਛਾ ਰਞ੍ਞੋ ਗੇਹਂ ਗਤਕਾਲੇ ਕਿਞ੍ਚਾਪਿ ਰਾਜਾ ਸਬ੍ਬਤ੍ਥ ਇਸ੍ਸਰੋਵ, ਇਮਸ੍ਮਿਂ ਪਨ ਕਾਲੇ ਅਤ੍ਤਨੋ ਗੇਹੇਯੇਵ ‘‘ਇਮੇਸਂ ਖਾਦਨੀਯਂ ਭੋਜਨੀਯਂ ਦੇਥ, ਇਮੇਸਂ ਗਨ੍ਧਮਾਲਾਲਙ੍ਕਾਰਾਦੀਨਿ ਦੇਥਾ’’ਤਿ ਵਿਚਾਰੇਤਿ, ਏਵਮੇਵ ਸਦ੍ਧਾਪਞ੍ਚਮਕੇਸੁ ਇਨ੍ਦ੍ਰਿਯੇਸੁ ਤੇਸੁ ਸਹਾਯੇਸੁ ਏਕਤੋ ਵੀਥਿਂ ਓਤਰਨ੍ਤੇਸੁ ਵਿਯ ਏਕਾਰਮ੍ਮਣੇ ਉਪ੍ਪਜ੍ਜਮਾਨੇਸੁਪਿ ਯਥਾ ਪਠਮਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸੋਤਾਪਤ੍ਤਿਅਙ੍ਗਾਨਿ ਪਤ੍ਵਾ ਅਧਿਮੋਕ੍ਖਲਕ੍ਖਣਂ ਸਦ੍ਧਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਦੁਤਿਯਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸਮ੍ਮਪ੍ਪਧਾਨਾਨਿ ਪਤ੍ਵਾ ਪਗ੍ਗਹਣਲਕ੍ਖਣਂ ਵੀਰਿਯਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਤਤਿਯਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਸਤਿਪਟ੍ਠਾਨਾਨਿ ਪਤ੍ਵਾ ਉਪਟ੍ਠਾਨਲਕ੍ਖਣਂ ਸਤਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਯਥਾ ਚਤੁਤ੍ਥਸ੍ਸ ਗੇਹੇ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਗੇਹਸਾਮਿਕੋਵ ਵਿਚਾਰੇਤਿ, ਏਵਂ ਝਾਨਾਨਿ ਪਤ੍ਵਾ ਅਵਿਕ੍ਖੇਪਲਕ੍ਖਣਂ ਸਮਾਧਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤਿ. ਸਬ੍ਬਪਚ੍ਛਾ ਰਞ੍ਞੋ ਗੇਹਂ ਗਤਕਾਲੇ ਪਨ ਯਥਾ ਇਤਰੇ ਚਤ੍ਤਾਰੋ ਤੁਣ੍ਹੀ ਨਿਸੀਦਨ੍ਤਿ, ਰਾਜਾਵ ਵਿਚਾਰੇਤਿ, ਏਵਂ ਅਰਿਯਸਚ੍ਚਾਨਿ ਪਤ੍ਵਾ ਪਜਾਨਨਲਕ੍ਖਣਂ ਪਞ੍ਞਿਨ੍ਦ੍ਰਿਯਮੇਵ ਜੇਟ੍ਠਕਂ ਹੋਤਿ ਪੁਬ੍ਬਙ੍ਗਮਂ, ਸੇਸਾਨਿ ਤਦਨ੍ਵਯਾਨਿ ਹੋਨ੍ਤੀਤਿ.

ਕ. ਪਭੇਦਗਣਨਨਿਦ੍ਦੇਸਵਣ੍ਣਨਾ

੧੯੫. ਸੁਤ੍ਤਨ੍ਤਸ੍ਸ ਪਭੇਦਗਣਨਾਪੁਚ੍ਛਾਪੁਬ੍ਬਙ੍ਗਮੇਵ ਪਭੇਦਗਣਨਨਿਦ੍ਦੇਸੇ ਸਪ੍ਪੁਰਿਸਸਂਸੇਵੇਤਿ ਸੋਭਨਾਨਂ ਪੁਰਿਸਾਨਂ ਸਮ੍ਮਾ ਸੇਵਨੇ. ਅਧਿਮੋਕ੍ਖਾਧਿਪਤੇਯ੍ਯਟ੍ਠੇਨਾਤਿ ਅਧਿਮੋਕ੍ਖਸਙ੍ਖਾਤੇਨ ਸੇਸਿਨ੍ਦ੍ਰਿਯੇਸੁ ਅਧਿਪਤਿਭਾਵਟ੍ਠੇਨ, ਸੇਸਿਨ੍ਦ੍ਰਿਯਾਨਂ ਪੁਬ੍ਬਙ੍ਗਮਟ੍ਠੇਨਾਤਿ ਅਤ੍ਥੋ. ਸਦ੍ਧਮ੍ਮਸਵਨੇਤਿ ਸਤਂ ਧਮ੍ਮੋ, ਸੋਭਨੋ ਵਾ ਧਮ੍ਮੋਤਿ ਸਦ੍ਧਮ੍ਮੋ. ਤਸ੍ਸ ਸਦ੍ਧਮ੍ਮਸ੍ਸ ਸਵਨੇ. ਯੋਨਿਸੋਮਨਸਿਕਾਰੇਤਿ ਉਪਾਯੇਨ ਮਨਸਿਕਾਰੇ. ਧਮ੍ਮਾਨੁਧਮ੍ਮਪਟਿਪਤ੍ਤਿਯਾਤਿ ਏਤ੍ਥ ਨਵ ਲੋਕੁਤ੍ਤਰਧਮ੍ਮੇ ਅਨੁਗਤੋ ਧਮ੍ਮੋ ਧਮ੍ਮਾਨੁਧਮ੍ਮੋ, ਸੀਲਸਮਾਧਿਪਞ੍ਞਾਸਙ੍ਖਾਤਸ੍ਸ ਧਮ੍ਮਾਨੁਧਮ੍ਮਸ੍ਸ ਪਟਿਪਤ੍ਤਿ ਪਟਿਪਜ੍ਜਨਂ ਧਮ੍ਮਾਨੁਧਮ੍ਮਪਟਿਪਤ੍ਤਿ. ਸਮ੍ਮਪ੍ਪਧਾਨਾਦੀਸੁਪਿ ਏਸੇਵ ਨਯੋ.

ਖ. ਚਰਿਯਾਵਾਰਵਣ੍ਣਨਾ

੧੯੬. ਚਰਿਯਾਵਾਰੇਪਿ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਕੇਵਲਂ ਪਠਮਵਾਰੋ ਇਨ੍ਦ੍ਰਿਯਾਨਂ ਉਪ੍ਪਾਦਨਕਾਲਵਸੇਨ ਵੁਤ੍ਤੋ, ਚਰਿਯਾਵਾਰੋ ਉਪ੍ਪਨ੍ਨਾਨਂ ਆਸੇਵਨਕਾਲਵਸੇਨ ਚ ਪਾਰਿਪੂਰਿਕਾਲਵਸੇਨ ਚ ਵੁਤ੍ਤੋ. ਚਰਿਯਾ ਪਕਤਿ ਉਸ੍ਸਨ੍ਨਤਾਤਿ ਹਿ ਅਤ੍ਥਤੋ ਏਕਂ.

ਚਾਰਵਿਹਾਰਨਿਦ੍ਦੇਸਵਣ੍ਣਨਾ

੧੯੭. ਇਦਾਨਿ ਚਰਿਯਾਸਮ੍ਬਨ੍ਧੇਨੇਵ ਚਾਰਵਿਹਾਰਨਿਦ੍ਦੇਸਵਸੇਨ ਅਪਰੇਨ ਪਰਿਯਾਯੇਨ ਇਨ੍ਦ੍ਰਿਯਵਿਧਾਨਂ ਨਿਦ੍ਦਿਸਿਤੁਕਾਮੋ ਚਾਰੋ ਚ ਵਿਹਾਰੋ ਚਾਤਿਆਦਿਕਂ ਉਦ੍ਦੇਸਂ ਉਦ੍ਦਿਸਿਤ੍ਵਾ ਤਸ੍ਸ ਨਿਦ੍ਦੇਸਮਾਹ. ਤਤ੍ਥ ਉਦ੍ਦੇਸੇ ਤਾਵ ਯਥਾ ਚਰਨ੍ਤਂ ਵਿਹਰਨ੍ਤਂ ਵਿਞ੍ਞੂ ਸਬ੍ਰਹ੍ਮਚਾਰੀ ਗਮ੍ਭੀਰੇਸੁ ਠਾਨੇਸੁ ਓਕਪ੍ਪੇਯ੍ਯੁਂ – ਅਦ੍ਧਾ ਅਯਮਾਯਸ੍ਮਾ ਪਤ੍ਤੋ ਵਾ ਪਾਪੁਣਿਸ੍ਸਤਿ ਵਾਤਿ, ਤਥਾ ਇਨ੍ਦ੍ਰਿਯਸਮ੍ਪਨ੍ਨਸ੍ਸ ਚਾਰੋ ਚ ਵਿਹਾਰੋ ਚ ਵਿਞ੍ਞੂਹਿ ਸਬ੍ਰਹ੍ਮਚਾਰੀਹਿ ਅਨੁਬੁਦ੍ਧੋ ਹੋਤਿ ਪਟਿਵਿਦ੍ਧੋਤਿ ਉਦ੍ਦੇਸਸ੍ਸ ਸਮ੍ਬਨ੍ਧੋ ਵੇਦਿਤਬ੍ਬੋ. ਉਦ੍ਦੇਸਨਿਦ੍ਦੇਸੇ ਚਰਿਯਾ ਚਾਰੋਯੇਵ. ਚਾਰੋ ਚਰਿਯਾਤਿ ਹਿ ਅਤ੍ਥਤੋ ਏਕਂ. ਤਸ੍ਮਾ ‘‘ਚਾਰੋ’’ਤਿਪਦਸ੍ਸ ਨਿਦ੍ਦੇਸੇ ‘‘ਚਰਿਯਾ’’ਤਿ ਵੁਤ੍ਤਂ. ਇਰਿਯਾਪਥਚਰਿਯਾਤਿ ਇਰਿਯਾਪਥਾਨਂ ਚਰਿਯਾ, ਪਵਤ੍ਤਨਨ੍ਤਿ ਅਤ੍ਥੋ. ਸੇਸੇਸੁਪਿ ਏਸੇਵ ਨਯੋ. ਆਯਤਨਚਰਿਯਾ ਪਨ ਆਯਤਨੇਸੁ ਸਤਿਸਮ੍ਪਜਞ੍ਞਾਨਂ ਚਰਿਯਾ. ਪਤ੍ਤੀਤਿ ਫਲਾਨਿ. ਤਾਨਿ ਹਿ ਪਾਪੁਣਿਯਨ੍ਤੀਤਿ ‘‘ਪਤ੍ਤੀ’’ਤਿ ਵੁਤ੍ਤਾ. ਸਤ੍ਤਲੋਕਸ੍ਸ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾ ਅਤ੍ਥਾ ਲੋਕਤ੍ਥਾਤਿ ਅਯਂ ਵਿਸੇਸੋ.

ਇਦਾਨਿ ਤਾਸਂ ਚਰਿਯਾਨਂ ਭੂਮਿਂ ਦਸ੍ਸੇਨ੍ਤੋ ਚਤੂਸੁ ਇਰਿਯਾਪਥੇਸੂਤਿਆਦਿਮਾਹ. ਸਤਿਪਟ੍ਠਾਨੇਸੂਤਿ ਆਰਮ੍ਮਣਸਤਿਪਟ੍ਠਾਨੇਸੁ. ਸਤਿਪਟ੍ਠਾਨੇਸੁਪਿ ਵੁਚ੍ਚਮਾਨੇਸੁ ਸਤਿਤੋ ਅਨਞ੍ਞਾਨਿ ਵੋਹਾਰਵਸੇਨ ਅਞ੍ਞਾਨਿ ਵਿਯ ਕਤ੍ਵਾ ਵੁਤ੍ਤਂ. ਅਰਿਯਸਚ੍ਚੇਸੂਤਿ ਪੁਬ੍ਬਭਾਗਲੋਕਿਯਸਚ੍ਚਞਾਣੇਨ ਵਿਸੁਂ ਵਿਸੁਂ ਸਚ੍ਚਪਰਿਗ੍ਗਹਵਸੇਨ ਵੁਤ੍ਤਂ. ਅਰਿਯਮਗ੍ਗੇਸੁ ਸਾਮਞ੍ਞਫਲੇਸੂਤਿ ਚ ਵੋਹਾਰਵਸੇਨੇਵ ਵੁਤ੍ਤਂ. ਪਦੇਸੇਤਿ ਲੋਕਤ੍ਥਚਰਿਯਾਯ ਏਕਦੇਸੇ. ਨਿਪ੍ਪਦੇਸਤੋ ਹਿ ਲੋਕਤ੍ਥਚਰਿਯਂ ਬੁਦ੍ਧਾ ਏਵ ਕਰੋਨ੍ਤਿ. ਪੁਨ ਤਾ ਏਵ ਚਰਿਯਾਯੋ ਕਾਰਕਪੁਗ੍ਗਲਵਸੇਨ ਦਸ੍ਸੇਨ੍ਤੋ ਪਣਿਧਿਸਮ੍ਪਨ੍ਨਾਨਨ੍ਤਿਆਦਿਮਾਹ. ਤਤ੍ਥ ਪਣਿਧਿਸਮ੍ਪਨ੍ਨਾ ਨਾਮ ਇਰਿਯਾਪਥਾਨਂ ਸਨ੍ਤਤ੍ਤਾ ਇਰਿਯਾਪਥਗੁਤ੍ਤਿਯਾ ਸਮ੍ਪਨ੍ਨਾ ਅਕਮ੍ਪਿਤਇਰਿਯਾਪਥਾ ਭਿਕ੍ਖੁਭਾਵਾਨੁਰੂਪੇਨ ਸਨ੍ਤੇਨ ਇਰਿਯਾਪਥੇਨ ਸਮ੍ਪਨ੍ਨਾ. ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਾਨਨ੍ਤਿ ਚਕ੍ਖਾਦੀਸੁ ਛਸੁ ਇਨ੍ਦ੍ਰਿਯੇਸੁ ਅਤ੍ਤਨੋ ਅਤ੍ਤਨੋ ਵਿਸਯੇ ਪਵਤ੍ਤਏਕੇਕਦ੍ਵਾਰਵਸੇਨ ਗੁਤ੍ਤਂ ਦ੍ਵਾਰਂ ਏਤੇਸਨ੍ਤਿ ਗੁਤ੍ਤਦ੍ਵਾਰਾ. ਤੇਸਂ ਗੁਤ੍ਤਦ੍ਵਾਰਾਨਂ. ਦ੍ਵਾਰਨ੍ਤਿ ਚੇਤ੍ਥ ਉਪ੍ਪਤ੍ਤਿਦ੍ਵਾਰਵਸੇਨ ਚਕ੍ਖਾਦਯੋ ਏਵ. ਅਪ੍ਪਮਾਦਵਿਹਾਰੀਨਨ੍ਤਿ ਸੀਲਾਦੀਸੁ ਅਪ੍ਪਮਾਦਵਿਹਾਰਵਤਂ. ਅਧਿਚਿਤ੍ਤਮਨੁਯੁਤ੍ਤਾਨਨ੍ਤਿ ਵਿਪਸ੍ਸਨਾਯ ਪਾਦਕਭਾਵੇਨ ਅਧਿਚਿਤ੍ਤਸਙ੍ਖਾਤਂ ਸਮਾਧਿਮਨੁਯੁਤ੍ਤਾਨਂ. ਬੁਦ੍ਧਿਸਮ੍ਪਨ੍ਨਾਨਨ੍ਤਿ ਨਾਮਰੂਪਵਵਤ੍ਥਾਨਂ ਆਦਿਂ ਕਤ੍ਵਾ ਯਾਵ ਗੋਤ੍ਰਭੁ, ਤਾਵ ਪਵਤ੍ਤੇਨ ਞਾਣੇਨ ਸਮ੍ਪਨ੍ਨਾਨਂ. ਸਮ੍ਮਾਪਟਿਪਨ੍ਨਾਨਨ੍ਤਿ ਚਤੁਮਗ੍ਗਕ੍ਖਣੇ. ਅਧਿਗਤਫਲਾਨਨ੍ਤਿ ਚਤੁਫਲਕ੍ਖਣੇ.

ਅਧਿਮੁਚ੍ਚਨ੍ਤੋਤਿ ਅਧਿਮੋਕ੍ਖਂ ਕਰੋਨ੍ਤੋ. ਸਦ੍ਧਾਯ ਚਰਤੀਤਿ ਸਦ੍ਧਾਵਸੇਨ ਪਵਤ੍ਤਤਿ. ਪਗ੍ਗਣ੍ਹਨ੍ਤੋਤਿ ਚਤੁਸਮ੍ਮਪ੍ਪਧਾਨਵੀਰਿਯੇਨ ਪਦਹਨ੍ਤੋ. ਉਪਟ੍ਠਾਪੇਨ੍ਤੋਤਿ ਸਤਿਯਾ ਆਰਮ੍ਮਣਂ ਉਪਟ੍ਠਾਪੇਨ੍ਤੋ. ਅਵਿਕ੍ਖੇਪਂ ਕਰੋਨ੍ਤੋਤਿ ਸਮਾਧਿਵਸੇਨ ਵਿਕ੍ਖੇਪਂ ਅਕਰੋਨ੍ਤੋ. ਪਜਾਨਨ੍ਤੋਤਿ ਚਤੁਸਚ੍ਚਪਜਾਨਨਪਞ੍ਞਾਯ ਪਕਾਰੇਨ ਜਾਨਨ੍ਤੋ. ਵਿਜਾਨਨ੍ਤੋਤਿ ਇਨ੍ਦ੍ਰਿਯਸਮ੍ਪਯੁਤ੍ਤਜਵਨਪੁਬ੍ਬਙ੍ਗਮੇਨ ਆਵਜ੍ਜਨਵਿਞ੍ਞਾਣੇਨ ਆਰਮ੍ਮਣਂ ਵਿਜਾਨਨ੍ਤੋ. ਵਿਞ੍ਞਾਣਚਰਿਯਾਯਾਤਿ ਆਵਜ੍ਜਨਵਿਞ੍ਞਾਣਚਰਿਯਵਸੇਨ. ਏਵਂ ਪਟਿਪਨ੍ਨਸ੍ਸਾਤਿ ਸਹਜਵਨਾਯ ਇਨ੍ਦ੍ਰਿਯਚਰਿਯਾਯ ਪਟਿਪਨ੍ਨਸ੍ਸ. ਕੁਸਲਾ ਧਮ੍ਮਾ ਆਯਾਪੇਨ੍ਤੀਤਿ ਸਮਥਵਿਪਸ੍ਸਨਾਵਸੇਨ ਪਵਤ੍ਤਾ ਕੁਸਲਾ ਧਮ੍ਮਾ ਭੁਸਂ ਯਾਪੇਨ੍ਤਿ, ਪਵਤ੍ਤਨ੍ਤੀਤਿ ਅਤ੍ਥੋ. ਆਯਤਨਚਰਿਯਾਯਾਤਿ ਕੁਸਲਾਨਂ ਧਮ੍ਮਾਨਂ ਭੁਸਂ ਯਤਨਚਰਿਯਾਯ, ਘਟਨਚਰਿਯਾਯ ਪਵਤ੍ਤਨਚਰਿਯਾਯਾਤਿ ਵੁਤ੍ਤਂ ਹੋਤਿ. ਵਿਸੇਸਮਧਿਗਚ੍ਛਤੀਤਿ ਵਿਕ੍ਖਮ੍ਭਨਤਦਙ੍ਗਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਵਸੇਨ ਵਿਸੇਸਂ ਅਧਿਗਚ੍ਛਤਿ. ਦਸ੍ਸਨਚਰਿਯਾਦਯੋ ਵੁਤ੍ਤਤ੍ਥਾਯੇਵ.

ਸਦ੍ਧਾਯ ਵਿਹਰਤੀਤਿਆਦੀਸੁ ਸਦ੍ਧਾਦਿਸਮਙ੍ਗਿਸ੍ਸ ਇਰਿਯਾਪਥਵਿਹਾਰੋ ਦਟ੍ਠਬ੍ਬੋ. ਅਨੁਬੁਦ੍ਧੋਤਿ ਅਨੁਮਾਨਬੁਦ੍ਧਿਯਾ. ਪਟਿਵਿਦ੍ਧੋਤਿ ਪਚ੍ਚਕ੍ਖਬੁਦ੍ਧਿਯਾ. ਯਸ੍ਮਾ ਅਧਿਮੋਕ੍ਖਟ੍ਠਾਦੀਸੁ ਅਨੁਬੁਦ੍ਧੇਸੁ ਪਟਿਵਿਦ੍ਧੇਸੁ ਚ ਚਾਰੋ ਚ ਵਿਹਾਰੋ ਚ ਅਨੁਬੁਦ੍ਧੋ ਹੋਤਿ ਪਟਿਵਿਦ੍ਧੋ, ਤਸ੍ਮਾ ਅਨੁਬੋਧਪਟਿਵੇਧੇਸੁ ਅਧਿਮੋਕ੍ਖਟ੍ਠਾਦਯੋ ਚ ਨਿਦ੍ਦਿਟ੍ਠਾ.

ਏਵਂ ਸਦ੍ਧਾਯ ਚਰਨ੍ਤਨ੍ਤਿਆਦੀਸੁ ਏਵਨ੍ਤਿ ਵੁਤ੍ਤਪ੍ਪਕਾਰਂ ਨਿਦ੍ਦਿਸਨ੍ਤੋ ਯਥਾਸਦ੍ਦਸ੍ਸ ਅਤ੍ਥਂ ਨਿਦ੍ਦਿਸਤਿ. ਵਿਞ੍ਞੂਤਿਆਦੀਸੁਪਿ ਯਥਾਸਭਾਵਂ ਜਾਨਨ੍ਤੀਤਿ ਵਿਞ੍ਞੂ. ਵਿਞ੍ਞਾਤਂ ਸਭਾਵਂ ਵਿਭਾਵੇਨ੍ਤਿ ਪਾਕਟਂ ਕਰੋਨ੍ਤੀਤਿ ਵਿਭਾਵੀ. ਅਸਨਿ ਵਿਯ ਸਿਲੁਚ੍ਚਯੇ ਕਿਲੇਸੇ ਮੇਧਤਿ ਹਿਂਸਤੀਤਿ ਮੇਧਾ, ਖਿਪ੍ਪਂ ਗਹਣਧਾਰਣਟ੍ਠੇਨ ਵਾ ਮੇਧਾ, ਮੇਧਾ ਏਤੇਸਂ ਅਤ੍ਥੀਤਿ ਮੇਧਾਵੀ. ਞਾਣਗਤਿਯਾ ਪਣ੍ਡਨ੍ਤਿ ਗਚ੍ਛਨ੍ਤਿ ਪਵਤ੍ਤਨ੍ਤੀਤਿ ਪਣ੍ਡਿਤਾ. ਬੁਦ੍ਧਿਸਮ੍ਪਦਾਯ ਸਮਨ੍ਨਾਗਤਤ੍ਤਾ ਬੁਦ੍ਧਿਸਮ੍ਪਨ੍ਨਾ. ਸਹ ਬ੍ਰਹ੍ਮਂ ਚਰਿਯਂ ਉਤ੍ਤਮਂ ਪਟਿਪਦਂ ਚਰਨ੍ਤੀਤਿ ਸਬ੍ਰਹ੍ਮਚਾਰਿਨੋ. ਅਪਲੋਕਨਕਮ੍ਮਾਦਿਚਤੁਬ੍ਬਿਧਂ ਕਮ੍ਮਂ ਏਕਤੋ ਕਰਣਵਸੇਨ ਏਕਂ ਕਮ੍ਮਂ. ਤਥਾ ਪਞ੍ਚਵਿਧੋ ਪਾਤਿਮੋਕ੍ਖੁਦ੍ਦੇਸੋ ਏਕੁਦ੍ਦੇਸੋ. ਸਮਾ ਸਿਕ੍ਖਾ ਏਤੇਸਨ੍ਤਿ ਸਮਸਿਕ੍ਖਾ, ਸਮਸਿਕ੍ਖਾਨਂ ਭਾਵੋ ਸਮਸਿਕ੍ਖਤਾ. ਸਮਸਿਕ੍ਖਾਤਾਤਿਪਿ ਪਠਨ੍ਤਿ. ਯੇਸਂ ਏਕਂ ਕਮ੍ਮਂ ਏਕੋ ਉਦ੍ਦੇਸੋ ਸਮਸਿਕ੍ਖਤਾ, ਤੇ ਸਬ੍ਰਹ੍ਮਚਾਰੀਤਿ ਵੁਤ੍ਤਂ ਹੋਤਿ. ‘‘ਝਾਨਾਨੀ’’ਤਿ ਵਤ੍ਤਬ੍ਬੇ ਝਾਨਾਤਿ ਲਿਙ੍ਗਵਿਪਲ੍ਲਾਸੋ ਕਤੋ. ਵਿਮੋਕ੍ਖਾਤਿ ਤਯੋ ਵਾ ਅਟ੍ਠ ਵਾ ਵਿਮੋਕ੍ਖਾ. ਸਮਾਧੀਤਿ ਸਵਿਤਕ੍ਕਸਵਿਚਾਰਅਵਿਤਕ੍ਕਵਿਚਾਰਮਤ੍ਤਅਵਿਤਕ੍ਕਾਵਿਚਾਰਾ ਤਯੋ ਸਮਾਧੀ. ਸਮਾਪਤ੍ਤਿਯੋਤਿ ਸੁਞ੍ਞਤਾਨਿਮਿਤ੍ਤਾਪ੍ਪਣਿਹਿਤਾ. ਅਭਿਞ੍ਞਾਯੋਤਿ ਛ ਅਭਿਞ੍ਞਾ.

ਏਕੋ ਅਂਸੋ ਭਾਗੋ, ਨ ਦੁਤਿਯੋਤਿ ਏਕਂਸੋ, ਏਕਂਸਸ੍ਸ ਅਤ੍ਥਸ੍ਸ ਵਚਨਂ ਏਕਂਸਵਚਨਂ. ਏਵਂ ਸੇਸੇਸੁਪਿ ਯੋਜਨਾ ਕਾਤਬ੍ਬਾ. ਵਿਸੇਸਤੋ ਪਨ ਸਮਂ, ਸਮਨ੍ਤਾ ਵਾ ਸੇਤਿ ਪਵਤ੍ਤਤੀਤਿ ਸਂਸਯੋ, ਨਤ੍ਥੇਤ੍ਥ ਸਂਸਯੋਤਿ ਨਿਸ੍ਸਂਸਯੋ. ਏਕਸ੍ਮਿਂਯੇਵ ਅਨਿਚ੍ਛਯਤਾ ਹੁਤ੍ਵਾ ਇਤਰਮ੍ਪਿ ਕਙ੍ਖਤੀਤਿ ਕਙ੍ਖਾ, ਨਤ੍ਥੇਤ੍ਥ ਕਙ੍ਖਾਤਿ ਨਿਕ੍ਕਙ੍ਖੋ. ਦ੍ਵਿਧਾ ਭਾਵੋ ਦ੍ਵੇਜ੍ਝਂ, ਨਤ੍ਥੇਤ੍ਥ ਦ੍ਵੇਜ੍ਝਨ੍ਤਿ ਅਦ੍ਵੇਜ੍ਝੋ. ਦ੍ਵਿਧਾ ਏਲਯਤਿ ਕਮ੍ਪੇਤੀਤਿ ਦ੍ਵੇਲ਼੍ਹਕਂ, ਨਤ੍ਥੇਤ੍ਥ ਦ੍ਵੇਲ਼੍ਹਕਨ੍ਤਿ ਅਦ੍ਵੇਲ਼੍ਹਕੋ. ਨਿਯੋਗੇਨ ਨਿਯਮੇਨ ਵਚਨਂ ਨਿਯੋਗਵਚਨਂ. ਨਿਯ੍ਯੋਗਵਚਨਨ੍ਤਿਪਿ ਪਠਨ੍ਤਿ. ਅਪਣ੍ਣਕਸ੍ਸ ਅਵਿਰਦ੍ਧਸ੍ਸ ਨਿਯ੍ਯਾਨਿਕਸ੍ਸ ਅਤ੍ਥਸ੍ਸ ਵਚਨਂ ਅਪਣ੍ਣਕਵਚਨਂ. ਅਵਤ੍ਥਾਪਨਵਚਨਨ੍ਤਿ ਨਿਚ੍ਛਯਵਚਨਂ. ਸਬ੍ਬਮ੍ਪਿ ਹੇਤਂ ਵਿਚਿਕਿਚ੍ਛਾਭਾਵਸ੍ਸ ਵੇਵਚਨਂ. ਪਿਯਸ੍ਸ ਅਤ੍ਥਸ੍ਸ ਸਬ੍ਭਾਵਤੋ ਵਚਨਂ, ਪਿਯਮੇਵਾਤਿ ਪਿਯਵਚਨਂ. ਤਥਾ ਗਰੁਵਚਨਂ. ਸਹ ਗਾਰਵੇਨ ਗਰੁਭਾਵੇਨ ਸਗਾਰਵਂ. ਪਤਿਸ੍ਸਯਨਂ ਪਤਿਸ੍ਸਯੋ ਪਰਂ ਗਰੁਂ ਕਤ੍ਵਾ ਨਿਸ੍ਸਯਨਂ ਅਪਸ੍ਸਯਨਨ੍ਤਿ ਅਤ੍ਥੋ. ਪਤਿਸ੍ਸਵਨਂ ਵਾ ਪਤਿਸ੍ਸਵੋ, ਨਿਵਾਤਵੁਤ੍ਤਿਤਾਯ ਪਰਵਚਨਸਵਨਨ੍ਤਿ ਅਤ੍ਥੋ. ਉਭਯਥਾਪਿ ਪਰਜੇਟ੍ਠਕਭਾਵਸ੍ਸੇਤਂ ਨਾਮਂ. ਸਹ ਗਾਰਵੇਨ ਵਤ੍ਤਤੀਤਿ ਸਗਾਰਵਂ. ਸਹ ਪਤਿਸ੍ਸਯੇਨ, ਪਤਿਸ੍ਸਵੇਨ ਵਾ ਵਤ੍ਤਤੀਤਿ ਸਪ੍ਪਤਿਸ੍ਸਯਂ. ‘‘ਸਪ੍ਪਤਿਸ੍ਸਵ’’ਨ੍ਤਿ ਵਾ ਵਤ੍ਤਬ੍ਬੇ ਯ-ਕਾਰਂ, ਵ-ਕਾਰਂ ਵਾ ਲੋਪਂ ਕਤ੍ਵਾ ‘‘ਸਪ੍ਪਤਿਸ੍ਸ’’ਨ੍ਤਿ ਵੁਤ੍ਤਂ. ਅਧਿਕਂ ਵਿਸਿਟ੍ਠਂ ਵਚਨਂ ਅਧਿਵਚਨਂ, ਸਗਾਰਵਞ੍ਚ ਤਂ ਸਪ੍ਪਤਿਸ੍ਸਞ੍ਚਾਤਿ ਸਗਾਰਵਸਪ੍ਪਤਿਸ੍ਸਂ, ਸਗਾਰਵਸਪ੍ਪਤਿਸ੍ਸਂ ਅਧਿਵਚਨਂ ਸਗਾਰਵਸਪ੍ਪਤਿਸ੍ਸਾਧਿਵਚਨਂ. ਉਭਯਤ੍ਥਾਪਿ ਵੇਵਚਨਵਿਕਪ੍ਪਨਾਨਤ੍ਤਵਸੇਨ ਪੁਨਪ੍ਪੁਨਂ ਏਤਨ੍ਤਿ ਵੁਤ੍ਤਂ. ਪਤ੍ਤੋ ਵਾ ਪਾਪੁਣਿਸ੍ਸਤਿ ਵਾਤਿ ਝਾਨਾਦੀਨਿਯੇਵਾਤਿ.

ਤਤਿਯਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ

੧੯੮. ਪੁਨ ਪਠਮਸੁਤ੍ਤਮੇਵ ਨਿਕ੍ਖਿਪਿਤ੍ਵਾ ਅਪਰੇਨ ਆਕਾਰੇਨ ਇਨ੍ਦ੍ਰਿਯਾਨਿ ਨਿਦ੍ਦਿਸਤਿ. ਤਤ੍ਥ ਕਤਿਹਾਕਾਰੇਹਿ ਕੇਨਟ੍ਠੇਨ ਦਟ੍ਠਬ੍ਬਾਨੀਤਿ ਕਤਿਹਿ ਆਕਾਰੇਹਿ ਦਟ੍ਠਬ੍ਬਾਨਿ. ਕੇਨਟ੍ਠੇਨ ਦਟ੍ਠਬ੍ਬਾਨੀਤਿ ਦਟ੍ਠਬ੍ਬਾਕਾਰੇ ਚ ਦਟ੍ਠਬ੍ਬਟ੍ਠਞ੍ਚ ਪੁਚ੍ਛਤਿ. ਛਹਾਕਾਰੇਹਿ ਤੇਨਟ੍ਠੇਨ ਦਟ੍ਠਬ੍ਬਾਨੀਤਿ ਛਹਿ ਆਕਾਰੇਹਿ ਦਟ੍ਠਬ੍ਬਾਨਿ, ਤੇਨੇਵ ਛਆਕਾਰਸਙ੍ਖਾਤੇਨਟ੍ਠੇਨ ਦਟ੍ਠਬ੍ਬਾਨਿ. ਆਧਿਪਤੇਯ੍ਯਟ੍ਠੇਨਾਤਿ ਅਧਿਪਤਿਭਾਵਟ੍ਠੇਨ. ਆਦਿਵਿਸੋਧਨਟ੍ਠੇਨਾਤਿ ਕੁਸਲਾਨਂ ਧਮ੍ਮਾਨਂ ਆਦਿਭੂਤਸ੍ਸ ਸੀਲਸ੍ਸ ਵਿਸੋਧਨਟ੍ਠੇਨ. ਅਧਿਮਤ੍ਤਟ੍ਠੇਨਾਤਿ ਬਲਵਟ੍ਠੇਨ. ਬਲਵਞ੍ਹਿ ਅਧਿਕਾ ਮਤ੍ਤਾ ਪਮਾਣਂ ਅਸ੍ਸਾਤਿ ਅਧਿਮਤ੍ਤਨ੍ਤਿ ਵੁਚ੍ਚਤਿ. ਅਧਿਟ੍ਠਾਨਟ੍ਠੇਨਾਤਿ ਪਤਿਟ੍ਠਾਨਟ੍ਠੇਨ. ਪਰਿਯਾਦਾਨਟ੍ਠੇਨਾਤਿ ਖੇਪਨਟ੍ਠੇਨ. ਪਤਿਟ੍ਠਾਪਕਟ੍ਠੇਨਾਤਿ ਪਤਿਟ੍ਠਾਪਨਟ੍ਠੇਨ.

ਕ. ਆਧਿਪਤੇਯ੍ਯਟ੍ਠਨਿਦ੍ਦੇਸਵਣ੍ਣਨਾ

੧੯੯. ਆਧਿਪਤੇਯ੍ਯਟ੍ਠਨਿਦ੍ਦੇਸੇ ਅਸ੍ਸਦ੍ਧਿਯਂ ਪਜਹਤੋਤਿਆਦਿ ਏਕੇਕਸ੍ਸੇਵ ਇਨ੍ਦ੍ਰਿਯਸ੍ਸ ਪਟਿਪਕ੍ਖਪਜਹਨਵਚਨਂ ਏਕਕ੍ਖਣੇਪਿ ਅਤ੍ਤਨੋ ਅਤ੍ਤਨੋ ਪਟਿਪਕ੍ਖਪਹਾਨਕਿਚ੍ਚਸਾਧਨੇ ਅਧਿਪਤਿਭਾਵਸਾਧਨਤ੍ਥਂ ਵੁਤ੍ਤਂ. ਸੇਸਾਨਿ ਚਤ੍ਤਾਰਿ ਇਨ੍ਦ੍ਰਿਯਾਨਿ ਤਂਸਮ੍ਪਯੁਤ੍ਤਾਨੇਵ ਵੁਤ੍ਤਾਨਿ. ਨਾਨਾਕ੍ਖਣੇਸੁ ਵਾ ਏਕੇਕਂ ਇਨ੍ਦ੍ਰਿਯਂ ਧੁਰਂ ਕਤ੍ਵਾ ਤਸ੍ਸ ਤਸ੍ਸ ਪਟਿਪਕ੍ਖਸ੍ਸ ਤਂ ਤਂ ਇਨ੍ਦ੍ਰਿਯਂ ਜੇਟ੍ਠਕਂ ਕਤ੍ਵਾ ਸੇਸਾਨਿ ਤਦਨ੍ਵਯਾਨਿ ਕਤ੍ਵਾ ਵੁਤ੍ਤਨ੍ਤਿਪਿ ਵੇਦਿਤਬ੍ਬਂ. ਕਾਮਚ੍ਛਨ੍ਦਂ ਪਜਹਤੋਤਿਆਦਿ ਪਨ ਏਕਕ੍ਖਣਵਸੇਨੇਵ ਵੁਤ੍ਤਂ.

ਖ. ਆਦਿਵਿਸੋਧਨਟ੍ਠਨਿਦ੍ਦੇਸਵਣ੍ਣਨਾ

੨੦੦. ਆਦਿਵਿਸੋਧਨਟ੍ਠਨਿਦ੍ਦੇਸੇ ਅਸ੍ਸਦ੍ਧਿਯਸਂਵਰਟ੍ਠੇਨ ਸੀਲਵਿਸੁਦ੍ਧੀਤਿ ਅਸ੍ਸਦ੍ਧਿਯਸ੍ਸ ਨਿਵਾਰਣਟ੍ਠੇਨ ਵਿਰਤਿਅਤ੍ਥੇਨ ਸੀਲਮਲਵਿਸੋਧਨਤੋ ਸੀਲਵਿਸੁਦ੍ਧਿ ਨਾਮ. ਸਦ੍ਧਿਨ੍ਦ੍ਰਿਯਸ੍ਸ ਆਦਿਵਿਸੋਧਨਾਤਿ ਸਦ੍ਧਿਨ੍ਦ੍ਰਿਯਸ੍ਸ ਉਪਨਿਸ੍ਸਯਵਸੇਨ ਆਦਿਭੂਤਸ੍ਸ ਸੀਲਸ੍ਸ ਵਿਸੋਧਨਾ. ਇਮਿਨਾਵ ਨਯੇਨ ਸੇਸਾਨਿਪਿ ਕਾਮਚ੍ਛਨ੍ਦਾਦਿਸਂਵਰਣਮੂਲਕਾਨਿ ਚ ਇਨ੍ਦ੍ਰਿਯਾਨਿ ਵੇਦਿਤਬ੍ਬਾਨਿ.

ਗ. ਅਧਿਮਤ੍ਤਟ੍ਠਨਿਦ੍ਦੇਸਵਣ੍ਣਨਾ

੨੦੧. ਅਧਿਮਤ੍ਤਟ੍ਠਨਿਦ੍ਦੇਸੇ ਸਦ੍ਧਿਨ੍ਦ੍ਰਿਯਸ੍ਸ ਭਾਵਨਾਯ ਛਨ੍ਦੋ ਉਪ੍ਪਜ੍ਜਤੀਤਿ ਸਦ੍ਧਸ੍ਸ ਪੁਗ੍ਗਲਸ੍ਸ ਸਦ੍ਧਾਪਟਿਸਂਯੁਤ੍ਤਂ ਧਮ੍ਮਂ ਸੁਤ੍ਵਾ ਵਾ ਸਦ੍ਧਿਨ੍ਦ੍ਰਿਯਭਾਵਨਾਯ ਅਸ੍ਸਾਦਂ ਦਿਸ੍ਵਾ ਵਾ ਸਦ੍ਧਿਨ੍ਦ੍ਰਿਯੇ ਕੁਸਲੋ ਧਮ੍ਮਚ੍ਛਨ੍ਦੋ ਜਾਯਤਿ. ਪਾਮੋਜ੍ਜਂ ਉਪ੍ਪਜ੍ਜਤੀਤਿ ਛਨ੍ਦਜਾਤਤ੍ਤਾ ਦੁਬ੍ਬਲਪੀਤਿ ਉਪ੍ਪਜ੍ਜਤਿ. ਪੀਤਿ ਉਪ੍ਪਜ੍ਜਤੀਤਿ ਪਮੁਦਿਤਤ੍ਤਾ ਬਲਵਪੀਤਿ ਉਪ੍ਪਜ੍ਜਤਿ. ਪਸ੍ਸਦ੍ਧਿ ਉਪ੍ਪਜ੍ਜਤੀਤਿ ਪੀਤਿਯਾ ਪੀਣਿਤਤ੍ਤਾ ਕਾਯਚਿਤ੍ਤਪਸ੍ਸਦ੍ਧਿ ਉਪ੍ਪਜ੍ਜਤਿ. ਸੁਖਂ ਉਪ੍ਪਜ੍ਜਤੀਤਿ ਪਸ੍ਸਦ੍ਧਕਾਯਚਿਤ੍ਤਤ੍ਤਾ ਚੇਤਸਿਕਂ ਸੁਖਂ ਉਪ੍ਪਜ੍ਜਤਿ. ਓਭਾਸੋ ਉਪ੍ਪਜ੍ਜਤੀਤਿ ਸੁਖੇਨ ਅਭਿਸਨ੍ਨਤ੍ਤਾ ਞਾਣੋਭਾਸੋ ਉਪ੍ਪਜ੍ਜਤਿ. ਸਂਵੇਗੋ ਉਪ੍ਪਜ੍ਜਤੀਤਿ ਞਾਣੋਭਾਸੇਨ ਵਿਦਿਤਸਙ੍ਖਾਰਾਦੀਨਵਤ੍ਤਾ ਸਙ੍ਖਾਰਪਵਤ੍ਤਿਯਂ ਸਂਵੇਗੋ ਉਪ੍ਪਜ੍ਜਤਿ. ਸਂਵੇਜੇਤ੍ਵਾ ਚਿਤ੍ਤਂ ਸਮਾਦਹਤੀਤਿ ਸਂਵੇਗਂ ਉਪ੍ਪਾਦੇਤ੍ਵਾ ਤੇਨੇਵ ਸਂਵੇਗੇਨ ਚਿਤ੍ਤਂ ਸਮਾਹਿਤਂ ਕਰੋਤਿ. ਸਾਧੁਕਂ ਪਗ੍ਗਣ੍ਹਾਤੀਤਿ ਲੀਨੁਦ੍ਧਤਭਾਵਂ ਮੋਚੇਤ੍ਵਾ ਸੁਟ੍ਠੁ ਪਗ੍ਗਣ੍ਹਾਤਿ. ਸਾਧੁਕਂ ਅਜ੍ਝੁਪੇਕ੍ਖਤੀਤਿ ਵੀਰਿਯਸ੍ਸ ਸਮਂ ਹੁਤ੍ਵਾ ਪਵਤ੍ਤਤ੍ਤਾ ਪੁਨ ਵੀਰਿਯਸਮਤਾਨਿਯੋਜਨੇ ਬ੍ਯਾਪਾਰਂ ਅਕਰੋਨ੍ਤੋ ਤਤ੍ਰਮਜ੍ਝਤ੍ਤੁਪੇਕ੍ਖਾਵਸੇਨ ਸਾਧੁਕਂ ਅਜ੍ਝੁਪੇਕ੍ਖਤਿ ਨਾਮ. ਉਪੇਕ੍ਖਾਵਸੇਨਾਤਿ ਸਮਵਾਹਿਤਲਕ੍ਖਣਾਯ ਤਤ੍ਰਮਜ੍ਝਤ੍ਤੁਪੇਕ੍ਖਾਯ ਵਸੇਨ. ਨਾਨਤ੍ਤਕਿਲੇਸੇਹੀਤਿ ਵਿਪਸ੍ਸਨਾਯ ਪਟਿਪਕ੍ਖਭੂਤੇਹਿ ਨਾਨਾਸਭਾਵੇਹਿ ਕਿਲੇਸੇਹਿ. ਵਿਮੋਕ੍ਖਵਸੇਨਾਤਿ ਭਙ੍ਗਾਨੁਪਸ੍ਸਨਤੋ ਪਟ੍ਠਾਯ ਨਾਨਤ੍ਤਕਿਲੇਸੇਹਿ ਵਿਮੁਚ੍ਚਨਵਸੇਨ. ਵਿਮੁਤ੍ਤਤ੍ਤਾਤਿ ਨਾਨਤ੍ਤਕਿਲੇਸੇਹਿ ਵਿਮੁਤ੍ਤਤ੍ਤਾ.

ਤੇ ਧਮ੍ਮਾਤਿ ਛਨ੍ਦਾਦਯੋ ਧਮ੍ਮਾ. ਏਕਰਸਾ ਹੋਨ੍ਤੀਤਿ ਵਿਮੁਤ੍ਤਿਰਸੇਨ ਏਕਰਸਾ ਹੋਨ੍ਤਿ. ਭਾਵਨਾਵਸੇਨਾਤਿ ਏਕਰਸਭਾਵਨਾਵਸੇਨ. ਤਤੋ ਪਣੀਤਤਰੇ ਵਿਵਟ੍ਟਨ੍ਤੀਤਿ ਤੇਨ ਕਾਰਣੇਨ ਵਿਪਸ੍ਸਨਾਰਮ੍ਮਣਤੋ ਪਣੀਤਤਰੇ ਨਿਬ੍ਬਾਨਾਰਮ੍ਮਣੇ ਵਿਵਟ੍ਟਨਾਨੁਪਸ੍ਸਨਾਸਙ੍ਖਾਤੇਨ ਗੋਤ੍ਰਭੁਞਾਣੇਨ ਛਨ੍ਦਾਦਯੋ ਧਮ੍ਮਾ ਨਿਵਤ੍ਤਨ੍ਤਿ, ਸਙ੍ਖਾਰਾਰਮ੍ਮਣਤੋ ਅਪਗਨ੍ਤ੍ਵਾ ਨਿਬ੍ਬਾਨਾਰਮ੍ਮਣੇ ਪਵਤ੍ਤਨ੍ਤੀਤਿ ਅਤ੍ਥੋ. ਵਿਵਟ੍ਟਨਾਵਸੇਨਾਤਿ ਏਵਂ ਗੋਤ੍ਰਭੁਖਣੇ ਸਙ੍ਖਾਰਾਰਮ੍ਮਣਤੋ ਵਿਵਟ੍ਟਨਵਸੇਨ. ਵਿਵਟ੍ਟਿਤਤ੍ਤਾ ਤਤੋ ਵੋਸਜ੍ਜਤੀਤਿ ਮਗ੍ਗਸਮਙ੍ਗਿਪੁਗ੍ਗਲੋ ਮਗ੍ਗਸ੍ਸ ਉਪ੍ਪਾਦਕ੍ਖਣੇਯੇਵ ਦੁਭਤੋਵੁਟ੍ਠਾਨਵਸੇਨ ਵਿਵਟ੍ਟਿਤਤ੍ਤਾ ਤੇਨੇਵ ਕਾਰਣੇਨ ਕਿਲੇਸੇ ਚ ਖਨ੍ਧੇ ਚ ਵੋਸਜ੍ਜਤਿ. ਵੋਸਜ੍ਜਿਤਤ੍ਤਾ ਤਤੋ ਨਿਰੁਜ੍ਝਨ੍ਤੀਤਿ ਮਗ੍ਗਸ੍ਸ ਉਪ੍ਪਾਦਕ੍ਖਣੇਯੇਵ ਕਿਲੇਸੇ ਚ ਖਨ੍ਧੇ ਚ ਵੋਸਜ੍ਜਿਤਤ੍ਤਾ ਤੇਨੇਵ ਕਾਰਣੇਨ ਕਿਲੇਸਾ ਚ ਖਨ੍ਧਾ ਚ ਅਨੁਪ੍ਪਤ੍ਤਿਨਿਰੋਧਵਸੇਨ ਨਿਰੁਜ੍ਝਨ੍ਤਿ. ਵੋਸਜ੍ਜਿਤਤ੍ਤਾਤਿ ਚ ਆਸਂਸਾਯਂ ਭੂਤਵਚਨਂ ਕਤਂ. ਕਿਲੇਸਨਿਰੋਧੇ ਸਤਿ ਖਨ੍ਧਨਿਰੋਧਸਬ੍ਭਾਵਤੋ ਚ ਖਨ੍ਧਨਿਰੋਧੋ ਵੁਤ੍ਤੋ. ਨਿਰੋਧਵਸੇਨਾਤਿ ਯਥਾਵੁਤ੍ਤਨਿਰੋਧਵਸੇਨ. ਤਸ੍ਸੇਵ ਮਗ੍ਗਸ੍ਸ ਉਪ੍ਪਾਦਕ੍ਖਣੇ ਦ੍ਵੇ ਵੋਸਗ੍ਗੇ ਦਸ੍ਸੇਤੁਕਾਮੋ ਨਿਰੋਧਵਸੇਨ ਦ੍ਵੇ ਵੋਸਗ੍ਗਾਤਿਆਦਿਮਾਹ. ਦ੍ਵੇਪਿ ਹੇਟ੍ਠਾ ਵੁਤ੍ਤਤ੍ਥਾ ਏਵ. ਅਸ੍ਸਦ੍ਧਿਯਸ੍ਸ ਪਹਾਨਾਯ ਛਨ੍ਦੋ ਉਪ੍ਪਜ੍ਜਤੀਤਿਆਦੀਸੁਪਿ ਇਮਿਨਾਵ ਨਯੇਨ ਵਿਤ੍ਥਾਰਤੋ ਅਤ੍ਥੋ ਵੇਦਿਤਬ੍ਬੋ. ਵੀਰਿਯਿਨ੍ਦ੍ਰਿਯਾਦਿਮੂਲਕੇਸੁਪਿ ਵਾਰੇਸੁ ਏਸੇਵ ਨਯੋ. ਇਮਿਨਾਵ ਨਯੇਨ ਅਧਿਟ੍ਠਾਨਟ੍ਠਨਿਦ੍ਦੇਸੋਪਿ ਵਿਤ੍ਥਾਰਤੋ ਵੇਦਿਤਬ੍ਬੋ. ਕੇਵਲਞ੍ਹੇਤ੍ਥ ਅਧਿਟ੍ਠਾਤੀਤਿ ਵਿਸੇਸੋ, ਪਤਿਟ੍ਠਾਤੀਤਿ ਅਤ੍ਥੋ.

ਘ-ਙ. ਪਰਿਯਾਦਾਨਟ੍ਠਪਤਿਟ੍ਠਾਪਕਟ੍ਠਨਿਦ੍ਦੇਸਵਣ੍ਣਨਾ

੨੦੨-੨੦੩. ਪਰਿਯਾਦਾਨਟ੍ਠਨਿਦ੍ਦੇਸੇ ਪਰਿਯਾਦਿਯਤੀਤਿ ਖੇਪੇਤਿ. ਪਤਿਟ੍ਠਾਪਕਟ੍ਠਨਿਦ੍ਦੇਸੇ ਸਦ੍ਧੋ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤੀਤਿ ਸਦ੍ਧਾਸਮ੍ਪਨ੍ਨੋ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ’’ਤਿ ਅਧਿਮੁਚ੍ਚਨ੍ਤੋ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤਿ. ਇਮਿਨਾ ਪੁਗ੍ਗਲਵਿਸੇਸੇਨ ਇਨ੍ਦ੍ਰਿਯਭਾਵਨਾਵਿਸੇਸੋ ਨਿਦ੍ਦਿਟ੍ਠੋ. ਸਦ੍ਧਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖੇ ਪਤਿਟ੍ਠਾਪੇਤੀਤਿ ਸਦ੍ਧਾਸਮ੍ਪਨ੍ਨਸ੍ਸ ਪੁਗ੍ਗਲਸ੍ਸ ਸਦ੍ਧਿਨ੍ਦ੍ਰਿਯਂ ਤਂਯੇਵ ਸਦ੍ਧਂ ਪਤਿਟ੍ਠਾਪੇਤਿ. ਤਥਾ ਅਧਿਮੁਚ੍ਚਨ੍ਤਂ ਅਧਿਮੋਕ੍ਖੇ ਪਤਿਟ੍ਠਾਪੇਤੀਤਿ. ਇਮਿਨਾ ਇਨ੍ਦ੍ਰਿਯਭਾਵਨਾਵਿਸੇਸੇਨ ਪੁਗ੍ਗਲਵਿਸੇਸੋ ਨਿਦ੍ਦਿਟ੍ਠੋ. ਏਵਂ ਚਿਤ੍ਤਂ ਪਗ੍ਗਣ੍ਹਨ੍ਤੋ ਪਗ੍ਗਹੇ ਪਤਿਟ੍ਠਾਪੇਤਿ, ਸਤਿਂ ਉਪਟ੍ਠਾਪੇਨ੍ਤੋ ਉਪਟ੍ਠਾਨੇ ਪਤਿਟ੍ਠਾਪੇਤਿ, ਚਿਤ੍ਤਂ ਸਮਾਦਹਨ੍ਤੋ ਅਵਿਕ੍ਖੇਪੇ ਪਤਿਟ੍ਠਾਪੇਤਿ, ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਪਸ੍ਸਨ੍ਤੋ ਦਸ੍ਸਨੇ ਪਤਿਟ੍ਠਾਪੇਤੀਤਿ ਸੇਸੇਸੁਪਿ ਯੋਜਨਾ ਵੇਦਿਤਬ੍ਬਾ. ਯੋਗਾਵਚਰੋਤਿ ਸਮਥਯੋਗੇ, ਵਿਪਸ੍ਸਨਾਯੋਗੇ ਵਾ ਅਵਚਰਤੀਤਿ ਯੋਗਾਵਚਰੋ. ਅਵਚਰਤੀਤਿ ਪਵਿਸਿਤ੍ਵਾ ਚਰਤੀਤਿ.

ਚਤੁਤ੍ਥਸੁਤ੍ਤਨ੍ਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

੫. ਇਨ੍ਦ੍ਰਿਯਸਮੋਧਾਨਵਣ੍ਣਨਾ

੨੦੪. ਇਦਾਨਿ ਸਮਾਧਿਂ ਭਾਵਯਤੋ ਵਿਪਸ੍ਸਨਂ ਭਾਵਯਤੋ ਚ ਇਨ੍ਦ੍ਰਿਯਸਮੋਧਾਨਂ ਦਸ੍ਸੇਤੁਕਾਮੋ ਪਠਮਂ ਤਾਵ ਉਪਟ੍ਠਾਨਕੋਸਲ੍ਲਪ੍ਪਭੇਦਂ ਨਿਦ੍ਦਿਸਿਤੁਂ ਪੁਥੁਜ੍ਜਨੋ ਸਮਾਧਿਂ ਭਾਵੇਨ੍ਤੋਤਿਆਦਿਮਾਹ. ਤਤ੍ਥ ਪੁਥੁਜ੍ਜਨੋ ਸਮਾਧਿਂ ਭਾਵੇਨ੍ਤੋਤਿ ਨਿਬ੍ਬੇਧਭਾਗਿਯਂ ਸਮਾਧਿਂ ਭਾਵੇਨ੍ਤੋ. ਸੇਕ੍ਖਸ੍ਸ ਵੀਤਰਾਗਸ੍ਸ ਚ ਪਨ ਲੋਕੁਤ੍ਤਰੋਪਿ ਸਮਾਧਿ ਲਬ੍ਭਤਿ. ਆਵਜ੍ਜਿਤਤ੍ਤਾਤਿ ਕਸਿਣਾਦਿਨਿਮਿਤ੍ਤਸ੍ਸ ਆਵਜ੍ਜਿਤਤ੍ਤਾ, ਕਸਿਣਾਦਿਪਰਿਕਮ੍ਮਂ ਕਤ੍ਵਾ ਤਤ੍ਥ ਉਪ੍ਪਾਦਿਤਨਿਮਿਤ੍ਤਤ੍ਤਾਤਿ ਵੁਤ੍ਤਂ ਹੋਤਿ. ਆਰਮ੍ਮਣੂਪਟ੍ਠਾਨਕੁਸਲੋਤਿ ਤਸ੍ਸ ਉਪ੍ਪਾਦਿਤਸ੍ਸ ਨਿਮਿਤ੍ਤਸ੍ਸੇਵ ਉਪਟ੍ਠਾਨੇ ਕੁਸਲੋ. ਸਮਥਨਿਮਿਤ੍ਤੂਪਟ੍ਠਾਨਕੁਸਲੋਤਿ ਅਚ੍ਚਾਰਦ੍ਧਵੀਰਿਯਤਾਦੀਹਿ ਉਦ੍ਧਤੇ ਚਿਤ੍ਤੇ ਪਸ੍ਸਦ੍ਧਿਸਮਾਧਿਉਪੇਕ੍ਖਾਸਮ੍ਬੋਜ੍ਝਙ੍ਗਭਾਵਨਾਵਸੇਨ ਚਿਤ੍ਤੋਪਸਮਨਿਮਿਤ੍ਤਸ੍ਸ ਉਪਟ੍ਠਾਨੇ ਕੁਸਲੋ. ਪਗ੍ਗਹਨਿਮਿਤ੍ਤੂਪਟ੍ਠਾਨਕੁਸਲੋਤਿ ਅਤਿਸਿਥਿਲਵੀਰਿਯਤਾਦੀਹਿ ਲੀਨੇ ਚਿਤ੍ਤੇ ਧਮ੍ਮਵਿਚਯਵੀਰਿਯਪੀਤਿਸਮ੍ਬੋਜ੍ਝਙ੍ਗਭਾਵਨਾਵਸੇਨ ਚਿਤ੍ਤਪਗ੍ਗਹਨਿਮਿਤ੍ਤਸ੍ਸ ਉਪਟ੍ਠਾਨੇ ਕੁਸਲੋ. ਅਵਿਕ੍ਖੇਪੂਪਟ੍ਠਾਨਕੁਸਲੋਤਿ ਅਨੁਦ੍ਧਤਾਲੀਨਚਿਤ੍ਤਸ੍ਸ ਸਮ੍ਪਯੁਤ੍ਤਸ੍ਸ ਸਮਾਧਿਸ੍ਸ ਉਪਟ੍ਠਾਨੇ ਕੁਸਲੋ. ਓਭਾਸੂਪਟ੍ਠਾਨਕੁਸਲੋਤਿ ਪਞ੍ਞਾਪਯੋਗਮਨ੍ਦਤਾਯ ਨਿਰਸ੍ਸਾਦੇ ਚਿਤ੍ਤੇ ਅਟ੍ਠਸਂਵੇਗਵਤ੍ਥੁਪਚ੍ਚਵੇਕ੍ਖਣੇਨ ਚਿਤ੍ਤਂ ਸਂਵੇਜੇਤ੍ਵਾ ਞਾਣੋਭਾਸਸ੍ਸ ਉਪਟ੍ਠਾਨੇ ਕੁਸਲੋ. ਅਟ੍ਠ ਸਂਵੇਗਵਤ੍ਥੂਨਿ ਨਾਮ ਜਾਤਿਜਰਾਬ੍ਯਾਧਿਮਰਣਾਨਿ ਚਤ੍ਤਾਰਿ, ਅਪਾਯਦੁਕ੍ਖਂ ਪਞ੍ਚਮਂ, ਅਤੀਤੇ ਵਟ੍ਟਮੂਲਕਂ ਦੁਕ੍ਖਂ, ਅਨਾਗਤੇ ਵਟ੍ਟਮੂਲਕਂ ਦੁਕ੍ਖਂ, ਪਚ੍ਚੁਪ੍ਪਨ੍ਨੇ ਆਹਾਰਪਰਿਯੇਟ੍ਠਿਮੂਲਕਂ ਦੁਕ੍ਖਨ੍ਤਿ. ਸਮ੍ਪਹਂਸਨੂਪਟ੍ਠਾਨਕੁਸਲੋਤਿ ਉਪਸਮਸੁਖਾਨਧਿਗਮੇਨ ਨਿਰਸ੍ਸਾਦੇ ਚਿਤ੍ਤੇ ਬੁਦ੍ਧਧਮ੍ਮਸਙ੍ਘਗੁਣਾਨੁਸ੍ਸਰਣੇਨ ਚਿਤ੍ਤਂ ਪਸਾਦੇਨ੍ਤੋ ਸਮ੍ਪਹਂਸਨਸ੍ਸ ਉਪਟ੍ਠਾਨੇ ਕੁਸਲੋ. ਉਪੇਕ੍ਖੂਪਟ੍ਠਾਨਕੁਸਲੋਤਿ ਉਦ੍ਧਤਾਦਿਦੋਸਵਿਰਹਿਤੇ ਚਿਤ੍ਤੇ ਨਿਗ੍ਗਹਪਗ੍ਗਹਾਦੀਸੁ ਬ੍ਯਾਪਾਰਾਭਾਵਕਰਣੇਨ ਉਪੇਕ੍ਖਾਯ ਉਪਟ੍ਠਾਨੇ ਕੁਸਲੋ. ਸੇਕ੍ਖੋਤਿ ਤਿਸ੍ਸੋ ਸਿਕ੍ਖਾ ਸਿਕ੍ਖਤੀਤਿ ਸੇਕ੍ਖੋ. ਏਕਤ੍ਤੂਪਟ੍ਠਾਨਕੁਸਲੋਤਿ ਸਕ੍ਕਾਯਦਿਟ੍ਠਾਦੀਨਂ ਪਹੀਨਤ੍ਤਾ ਨੇਕ੍ਖਮ੍ਮਾਦਿਨੋ ਏਕਤ੍ਤਸ੍ਸ ਉਪਟ੍ਠਾਨੇ ਕੁਸਲੋ.

ਵੀਤਰਾਗੋਤਿ ਸਬ੍ਬਸੋ ਪਹੀਨਰਾਗਤ੍ਤਾ ਵੀਤਰਾਗੋ ਖੀਣਾਸਵੋ. ਞਾਣੂਪਟ੍ਠਾਨਕੁਸਲੋਤਿ ਅਰਹਾ ਧਮ੍ਮੇਸੁ ਵਿਗਤਸਮ੍ਮੋਹਤ੍ਤਾ ਤਤ੍ਥ ਤਤ੍ਥ ਅਸਮ੍ਮੋਹਞਾਣਸ੍ਸ ਉਪਟ੍ਠਾਨੇ ਕੁਸਲੋ. ਵਿਮੁਤ੍ਤੂਪਟ੍ਠਾਨਕੁਸਲੋਤਿ ਅਰਹਤ੍ਤਫਲਵਿਮੁਤ੍ਤਿਯਾ ਉਪਟ੍ਠਾਨੇ ਕੁਸਲੋ. ਵਿਮੁਤ੍ਤੀਤਿ ਹਿ ਸਬ੍ਬਕਿਲੇਸੇਹਿ ਵਿਮੁਤ੍ਤਤ੍ਤਾ ਅਰਹਤ੍ਤਫਲਵਿਮੁਤ੍ਤਿ ਅਧਿਪ੍ਪੇਤਾ.

੨੦੫. ਵਿਪਸ੍ਸਨਾਭਾਵਨਾਯ ਉਪਟ੍ਠਾਨਾਨੁਪਟ੍ਠਾਨੇਸੁ ਅਨਿਚ੍ਚਤੋਤਿਆਦੀਨਿ ਨਿਚ੍ਚਤੋਤਿਆਦੀਨਿ ਚ ਸੀਲਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ. ਪਾਠਤੋ ਪਨ ‘‘ਆਯੂਹਨਾਨੁਪਟ੍ਠਾਨਕੁਸਲੋ ਵਿਪਰਿਣਾਮੂਪਟ੍ਠਾਨਕੁਸਲੋ ਅਨਿਮਿਤ੍ਤੂਪਟ੍ਠਾਨਕੁਸਲੋ ਨਿਮਿਤ੍ਤਾਨੁਪਟ੍ਠਾਨਕੁਸਲੋ ਅਪ੍ਪਣਿਹਿਤੂਪਟ੍ਠਾਨਕੁਸਲੋ ਪਣਿਧਿਅਨੁਪਟ੍ਠਾਨਕੁਸਲੋ ਅਭਿਨਿਵੇਸਾਨੁਪਟ੍ਠਾਨਕੁਸਲੋ’’ਤਿ ਏਤੇਸੁ ਸਾਮਿਵਚਨੇਨ ਸਮਾਸਪਦਚ੍ਛੇਦੋ ਕਾਤਬ੍ਬੋ. ਸੇਸੇਸੁ ਪਨ ਨਿਸ੍ਸਕ੍ਕਵਚਨੇਨ ਪਾਠੋ.

੨੦੬. ਸੁਞ੍ਞਤੂਪਟ੍ਠਾਨਕੁਸਲੋਤਿ ਪਨੇਤ੍ਥ ਸੁਞ੍ਞਤੋ ਉਪਟ੍ਠਾਨਕੁਸਲੋਤਿ ਵਾ ਸੁਞ੍ਞਤਾਯ ਉਪਟ੍ਠਾਨਕੁਸਲੋਤਿ ਵਾ ਪਦਚ੍ਛੇਦੋ ਕਾਤਬ੍ਬੋ. ਯਸ੍ਮਾ ਪਨ ਨਿਬ੍ਬਿਦਾਵਿਰਾਗਨਿਰੋਧਪਟਿਨਿਸ੍ਸਗ੍ਗਾਨੁਪਸ੍ਸਨਾ ਅਧਿਪਞ੍ਞਾਧਮ੍ਮਵਿਪਸ੍ਸਨਾ ਯਥਾਭੂਤਞਾਣਦਸ੍ਸਨਂ ਪਟਿਸਙ੍ਖਾਨੁਪਸ੍ਸਨਾ ਵਿਵਟ੍ਟਨਾਨੁਪਸ੍ਸਨਾਤਿ ਇਮਾ ਅਟ੍ਠ ਮਹਾਵਿਪਸ੍ਸਨਾ ਅਤ੍ਤਨੋ ਸਭਾਵਵਿਸੇਸੇਨ ਵਿਸੇਸਿਤਾ, ਨ ਆਰਮ੍ਮਣਵਿਸੇਸੇਨ, ਤਸ੍ਮਾ ਇਮਾਸਂ ਅਟ੍ਠਨ੍ਨਂ ‘‘ਅਨਿਚ੍ਚਤੋ ਉਪਟ੍ਠਾਨਕੁਸਲੋ ਹੋਤੀ’’ਤਿਆਦੀਨਿ ਵਚਨਾਨਿ ਵਿਯ ‘‘ਨਿਬ੍ਬਿਦਾਤੋ ਉਪਟ੍ਠਾਨਕੁਸਲੋ ਹੋਤੀ’’ਤਿਆਦੀਨਿ ਵਚਨਾਨਿ ਨ ਯੁਜ੍ਜਨ੍ਤਿ. ਤਸ੍ਮਾ ਏਵ ਇਮਾ ਅਟ੍ਠ ਨ ਯੋਜਿਤਾ. ਆਦੀਨਵਾਨੁਪਸ੍ਸਨਾ ਪਨ ‘‘ਸੁਞ੍ਞਤੂਪਟ੍ਠਾਨਕੁਸਲੋ ਹੋਤਿ, ਅਭਿਨਿਵੇਸਾਨੁਪਟ੍ਠਾਨਕੁਸਲੋ ਹੋਤੀ’’ਤਿ ਇਮਿਨਾ ਯੁਗਲਕਵਚਨੇਨੇਵ ਅਤ੍ਥਤੋ ‘‘ਆਦੀਨਵਤੋ ਉਪਟ੍ਠਾਨਕੁਸਲੋ ਹੋਤਿ, ਆਲਯਾਭਿਨਿਵੇਸਾਨੁਪਟ੍ਠਾਨਕੁਸਲੋ ਹੋਤੀ’’ਤਿ ਯੋਜਿਤਾਵ ਹੋਤੀਤਿ ਸਰੂਪੇਨ ਨ ਯੋਜਿਤਾ. ਇਤਿ ਪੁਰਿਮਾ ਚ ਅਟ੍ਠ, ਅਯਞ੍ਚ ਆਦੀਨਵਾਨੁਪਸ੍ਸਨਾਤਿ ਅਟ੍ਠਾਰਸਸੁ ਮਹਾਵਿਪਸ੍ਸਨਾਸੁ ਇਮਾ ਨਵ ਅਯੋਜੇਤ੍ਵਾ ਇਤਰਾ ਏਵ ਨਵ ਯੋਜਿਤਾਤਿ ਵੇਦਿਤਬ੍ਬਾ. ਞਾਣੂਪਟ੍ਠਾਨਕੁਸਲੋਤਿ ਸੇਕ੍ਖੋ ਵਿਪਸ੍ਸਨੂਪਕ੍ਕਿਲੇਸਾਨਂ ਅਭਾਵਤੋ ਵਿਪਸ੍ਸਨਾਭਾਵਨਾਯ ਞਾਣਸ੍ਸ ਉਪਟ੍ਠਾਨੇ ਕੁਸਲੋ. ਸਮਾਧਿਭਾਵਨਾਯ ਪਨ ਨਿਕਨ੍ਤਿਸਬ੍ਭਾਵਤੋ ਞਾਣੂਪਟ੍ਠਾਨੇ ਕੁਸਲੋਤਿ ਨ ਵੁਤ੍ਤੋ.

ਵਿਸਞ੍ਞੋਗੂਪਟ੍ਠਾਨਕੁਸਲੋਤਿ ‘‘ਕਾਮਯੋਗਵਿਸਞ੍ਞੋਗੋ ਭਵਯੋਗਵਿਸਞ੍ਞੋਗੋ ਦਿਟ੍ਠਿਯੋਗਵਿਸਞ੍ਞੋਗੋ ਅਵਿਜ੍ਜਾਯੋਗਵਿਸਞ੍ਞੋਗੋ’’ਤਿ (ਦੀ. ਨਿ. ੩.੩੧੨) ਚਤੁਧਾ ਵੁਤ੍ਤਸ੍ਸ ਵਿਸਞ੍ਞੋਗਸ੍ਸ ਉਪਟ੍ਠਾਨੇ ਕੁਸਲੋ. ਸਞ੍ਞੋਗਾਨੁਪਟ੍ਠਾਨਕੁਸਲੋਤਿ ਕਾਮਯੋਗਭਵਯੋਗਦਿਟ੍ਠਿਯੋਗਾਵਿਜ੍ਜਾਯੋਗਵਸੇਨ ਚਤੁਧਾ ਵੁਤ੍ਤਸ੍ਸ ਸਞ੍ਞੋਗਸ੍ਸ ਅਨੁਪਟ੍ਠਾਨੇ ਕੁਸਲੋ. ਨਿਰੋਧੂਪਟ੍ਠਾਨਕੁਸਲੋਤਿ ‘‘ਪੁਨ ਚਪਰਂ, ਭਿਕ੍ਖਵੇ, ਖੀਣਾਸਵਸ੍ਸ ਭਿਕ੍ਖੁਨੋ ਨਿਬ੍ਬਾਨਨਿਨ੍ਨਂ ਚਿਤ੍ਤਂ ਹੋਤਿ ਨਿਬ੍ਬਾਨਪੋਣਂ ਨਿਬ੍ਬਾਨਪਬ੍ਭਾਰਂ ਵਿਵੇਕਟ੍ਠਂ ਨੇਕ੍ਖਮ੍ਮਾਭਿਰਤਂ ਬ੍ਯਨ੍ਤੀਭੂਤਂ ਸਬ੍ਬਸੋ ਆਸਵਟ੍ਠਾਨਿਯੇਹਿ ਧਮ੍ਮੇਹੀ’’ਤਿ (ਅ. ਨਿ. ੧੦.੯੦; ਪਟਿ. ਮ. ੨.੪੪ ਅਤ੍ਥਤੋ ਸਮਾਨਂ) ਵੁਤ੍ਤਖੀਣਾਸਵਬਲਵਸੇਨ ਨਿਬ੍ਬਾਨਨਿਨ੍ਨਚਿਤ੍ਤਤ੍ਤਾ ਖੀਣਾਸਵੋਵ ਨਿਰੋਧਸਙ੍ਖਾਤਸ੍ਸ ਨਿਬ੍ਬਾਨਸ੍ਸ ਉਪਟ੍ਠਾਨੇ ਕੁਸਲੋ.

ਆਰਮ੍ਮਣੂਪਟ੍ਠਾਨਕੁਸਲਵਸੇਨਾਤਿਆਦੀਸੁ ਕੁਸਲਨ੍ਤਿ ਞਾਣਂ. ਞਾਣਮ੍ਪਿ ਹਿ ਕੁਸਲਪੁਗ੍ਗਲਯੋਗਤੋ ਕੁਸਲਂ ਯਥਾ ਪਣ੍ਡਿਤਪੁਗ੍ਗਲਯੋਗਤੋ ‘‘ਪਣ੍ਡਿਤਾ ਧਮ੍ਮਾ’’ਤਿ (ਧ. ਸ. ਦੁਕਮਾਤਿਕਾ ੧੦੩). ਤਸ੍ਮਾ ਕੋਸਲ੍ਲਵਸੇਨਾਤਿ ਅਤ੍ਥੋ.

੨੦੭. ਇਦਾਨਿ ਚਤੁਸਟ੍ਠਿਯਾ ਆਕਾਰੇਹੀਤਿਆਦਿ ਞਾਣਕਥਾਯਂ (ਪਟਿ. ਮ. ੧.੧੦੭) ਵੁਤ੍ਤਮ੍ਪਿ ਇਨ੍ਦ੍ਰਿਯਕਥਾਸਮ੍ਬਨ੍ਧੇਨ ਇਧਾਨੇਤ੍ਵਾ ਵੁਤ੍ਤਂ. ਤਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੨੦੮. ਪੁਨ ਸਮਨ੍ਤਚਕ੍ਖੁਸਮ੍ਬਨ੍ਧੇਨ ਇਨ੍ਦ੍ਰਿਯਵਿਧਾਨਂ ਵਤ੍ਤੁਕਾਮੋ ਨ ਤਸ੍ਸ ਅਦ੍ਦਿਟ੍ਠਮਿਧਤ੍ਥਿ ਕਿਞ੍ਚੀਤਿਆਦਿਮਾਹ. ਤਤ੍ਥ ਸਮਨ੍ਤਚਕ੍ਖੂਤਿ ਸਬ੍ਬਞ੍ਞੁਤਞ੍ਞਾਣਂ. ਪਞ੍ਞਿਨ੍ਦ੍ਰਿਯਸ੍ਸ ਵਸੇਨਾਤਿਆਦਿਨਾ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਵਿਯੋਗਿਤਂ ਦਸ੍ਸੇਤਿ. ਸਦ੍ਦਹਨ੍ਤੋ ਪਗ੍ਗਣ੍ਹਾਤੀਤਿਆਦੀਹਿ ਏਕੇਕਿਨ੍ਦ੍ਰਿਯਮੂਲਕੇਹਿ ਪਞ੍ਚਹਿ ਚਤੁਕ੍ਕੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਨ੍ਨਪਯੋਗਕਾਲੇ ਵਾ ਮਗ੍ਗਕ੍ਖਣੇ ਵਾ ਏਕਰਸਭਾਵਂ ਅਞ੍ਞਮਞ੍ਞਪਚ੍ਚਯਭਾਵਞ੍ਚ ਦਸ੍ਸੇਤਿ. ਸਦ੍ਦਹਿਤਤ੍ਤਾ ਪਗ੍ਗਹਿਤਨ੍ਤਿਆਦੀਹਿ ਏਕੇਕਿਨ੍ਦ੍ਰਿਯਮੂਲਕੇਹਿ ਪਞ੍ਚਹਿ ਚਤੁਕ੍ਕੇਹਿ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਨਿਬ੍ਬਤ੍ਤਿਕਾਲੇ ਵਾ ਫਲਕਾਲੇ ਵਾ ਏਕਰਸਭਾਵਂ ਅਞ੍ਞਮਞ੍ਞਪਚ੍ਚਯਭਾਵਞ੍ਚ ਦਸ੍ਸੇਤਿ. ਪੁਨ ਬੁਦ੍ਧਚਕ੍ਖੁਸਮ੍ਬਨ੍ਧੇਨ ਇਨ੍ਦ੍ਰਿਯਵਿਧਾਨਂ ਵਤ੍ਤੁਕਾਮੋ ਯਂ ਬੁਦ੍ਧਚਕ੍ਖੂਤਿਆਦਿਮਾਹ. ਤਤ੍ਥ ਬੁਦ੍ਧਚਕ੍ਖੂਤਿ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਂ ਆਸਯਾਨੁਸਯਞਾਣਞ੍ਚ. ਬੁਦ੍ਧਞਾਣਨ੍ਤਿ ਚ ਇਦਂ ਤਦੇਵ ਦ੍ਵਯਂ, ਸੇਸਂ ਹੇਟ੍ਠਾ ਵੁਤ੍ਤਤ੍ਥਮੇਵਾਤਿ.

ਇਨ੍ਦ੍ਰਿਯਸਮੋਧਾਨਵਣ੍ਣਨਾ ਨਿਟ੍ਠਿਤਾ.

ਸਦ੍ਧਮ੍ਮਪ੍ਪਕਾਸਿਨਿਯਾ ਪਟਿਸਮ੍ਭਿਦਾਮਗ੍ਗ-ਅਟ੍ਠਕਥਾਯ

ਇਨ੍ਦ੍ਰਿਯਕਥਾਵਣ੍ਣਨਾ ਨਿਟ੍ਠਿਤਾ.