੬. ਪਟਿਸਮ੍ਭਿਦਾਕਥਾ

੧. ਧਮ੍ਮਚਕ੍ਕਪਵਤ੍ਤਨਵਾਰਵਣ੍ਣਨਾ

੩੦. ਇਦਾਨਿ ਵਿਰਾਗਸਙ੍ਖਾਤਮਗ੍ਗਵਸੇਨ ਸਿਦ੍ਧਂ ਪਟਿਸਮ੍ਭਿਦਾਪਭੇਦਂ ਦਸ੍ਸੇਨ੍ਤੇਨ ਕਥਿਤਾਯ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਨ੍ਤਪੁਬ੍ਬਙ੍ਗਮਾਯ ਪਟਿਸਮ੍ਭਿਦਾਕਥਾਯ ਅਪੁਬ੍ਬਤ੍ਥਾਨੁਵਣ੍ਣਨਾ. ਸੁਤ੍ਤਨ੍ਤੇ ਤਾਵ ਬਾਰਾਣਸਿਯਨ੍ਤਿ ਬਾਰਾਣਸਾ ਨਾਮ ਨਦੀ, ਬਾਰਾਣਸਾਯ ਅਵਿਦੂਰੇ ਭਵਾ ਨਗਰੀ ਬਾਰਾਣਸੀ. ਤਸ੍ਸਂ ਬਾਰਾਣਸਿਯਂ. ਇਸਿਪਤਨੇ ਮਿਗਦਾਯੇਤਿ ਇਸੀਨਂ ਪਤਨੁਪ੍ਪਤਨਵਸੇਨ ਏਵਂਲਦ੍ਧਨਾਮੇ ਮਿਗਾਨਂ ਅਭਯਦਾਨਦਿਨ੍ਨਟ੍ਠਾਨਤ੍ਤਾ ਮਿਗਦਾਯਸਙ੍ਖਾਤੇ ਆਰਾਮੇ. ਤਤ੍ਥ ਹਿ ਉਪ੍ਪਨ੍ਨੁਪ੍ਪਨ੍ਨਾ ਸਬ੍ਬਞ੍ਞੁਇਸਯੋ ਪਤਨ੍ਤਿ, ਧਮ੍ਮਚਕ੍ਕਪ੍ਪਵਤ੍ਤਨਤ੍ਥਂ ਨਿਸੀਦਨ੍ਤੀਤਿ ਅਤ੍ਥੋ. ਨਨ੍ਦਮੂਲਕਪਬ੍ਭਾਰਤੋ ਸਤ੍ਤਾਹਚ੍ਚਯੇਨ ਨਿਰੋਧਸਮਾਪਤ੍ਤਿਤੋ ਵੁਟ੍ਠਿਤਾ ਅਨੋਤਤ੍ਤਦਹੇ ਕਤਮੁਖਧੋਵਨਕਿਚ੍ਚਾ ਆਕਾਸੇਨ ਆਗਨ੍ਤ੍ਵਾ ਪਚ੍ਚੇਕਬੁਦ੍ਧਇਸਯੋਪੇਤ੍ਥ ਸਮੋਸਰਣਵਸੇਨ ਪਤਨ੍ਤਿ, ਉਪੋਸਥਤ੍ਥਞ੍ਚ ਅਨੁਪੋਸਥਤ੍ਥਞ੍ਚ ਸਨ੍ਨਿਪਤਨ੍ਤਿ, ਗਨ੍ਧਮਾਦਨਂ ਪਟਿਗਚ੍ਛਨ੍ਤਾ ਚ ਤਤੋ ਚ ਉਪ੍ਪਤਨ੍ਤੀਤਿਪਿ ਇਮਿਨਾ ਇਸੀਨਂ ਪਤਨੁਪ੍ਪਤਨਵਸੇਨ ਤਂ ‘‘ਇਸਿਪਤਨ’’ਨ੍ਤਿ ਵੁਚ੍ਚਤਿ. ‘‘ਇਸਿਪਦਨ’’ਨ੍ਤਿਪਿ ਪਾਠੋ. ਪਞ੍ਚਵਗ੍ਗਿਯੇਤਿ –

‘‘ਕੋਣ੍ਡਞ੍ਞੋ ਭਦ੍ਦਿਯੋ ਵਪ੍ਪੋ, ਮਹਾਨਾਮੋ ਚ ਅਸ੍ਸਜਿ;

ਏਤੇ ਪਞ੍ਚ ਮਹਾਥੇਰਾ, ਪਞ੍ਚਵਗ੍ਗਾਤਿ ਵੁਚ੍ਚਰੇ’’ਤਿ. –

ਏਵਂ ਵੁਤ੍ਤਾਨਂ ਪਞ੍ਚਨ੍ਨਂ ਭਿਕ੍ਖੂਨਂ ਵਗ੍ਗੋ ਪਞ੍ਚਵਗ੍ਗੋ. ਤਸ੍ਮਿਂ ਪਞ੍ਚਵਗ੍ਗੇ ਭਵਾ ਤਂਪਰਿਯਾਪਨ੍ਨਤ੍ਤਾਤਿ ਪਞ੍ਚਵਗ੍ਗਿਯਾ, ਤੇ ਪਞ੍ਚਵਗ੍ਗਿਯੇ. ਭਿਕ੍ਖੂ ਆਮਨ੍ਤੇਸੀਤਿ ਦੀਪਙ੍ਕਰਦਸਬਲਸ੍ਸ ਪਾਦਮੂਲੇ ਕਤਾਭਿਨੀਹਾਰਤੋ ਪਟ੍ਠਾਯ ਪਾਰਮਿਯੋ ਪੂਰੇਨ੍ਤੋ ਅਨੁਪੁਬ੍ਬੇਨ ਪਚ੍ਛਿਮਭਵਂ ਪਤ੍ਵਾ ਪਚ੍ਛਿਮਭਵੇ ਚ ਕਤਾਭਿਨਿਕ੍ਖਮਨੋ ਅਨੁਪੁਬ੍ਬੇਨ ਬੋਧਿਮਣ੍ਡਂ ਪਤ੍ਵਾ ਤਤ੍ਥ ਅਪਰਾਜਿਤਪਲ੍ਲਙ੍ਕੇ ਨਿਸਿਨ੍ਨੋ ਮਾਰਬਲਂ ਭਿਨ੍ਦਿਤ੍ਵਾ ਪਠਮਯਾਮੇ ਪੁਬ੍ਬੇਨਿਵਾਸਂ ਅਨੁਸ੍ਸਰਿਤ੍ਵਾ ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਤ੍ਵਾ ਪਚ੍ਛਿਮਯਾਮਾਵਸਾਨੇ ਦਸਸਹਸ੍ਸਿਲੋਕਧਾਤੁਂ ਉਨ੍ਨਾਦੇਨ੍ਤੋ ਸਮ੍ਪਕਮ੍ਪੇਨ੍ਤੋ ਸਬ੍ਬਞ੍ਞੁਤਂ ਪਤ੍ਵਾ ਸਤ੍ਤ ਸਤ੍ਤਾਹਾਨਿ ਬੋਧਿਮਣ੍ਡੇ ਵੀਤਿਨਾਮੇਤ੍ਵਾ ਮਹਾਬ੍ਰਹ੍ਮੁਨਾ ਆਯਾਚਿਤਧਮ੍ਮਦੇਸਨਾ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਤ੍ਵਾ ਲੋਕਾਨੁਗ੍ਗਹੇਨ ਬਾਰਾਣਸਿਂ ਗਨ੍ਤ੍ਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਸਞ੍ਞਾਪੇਤ੍ਵਾ ਧਮ੍ਮਚਕ੍ਕਂ ਪਵਤ੍ਤੇਤੁਕਾਮੋ ਆਮਨ੍ਤੇਸਿ.

ਦ੍ਵੇਮੇ, ਭਿਕ੍ਖਵੇ, ਅਨ੍ਤਾਤਿ ਦ੍ਵੇਮੇ, ਭਿਕ੍ਖਵੇ, ਕੋਟ੍ਠਾਸਾ. ਇਮਸ੍ਸ ਪਨ ਵਚਨਸ੍ਸ ਸਮੁਦਾਹਾਰੇਨ ਸਮੁਦਾਹਾਰਨਿਗ੍ਘੋਸੋ ਹੇਟ੍ਠਾ ਅਵੀਚਿਂ ਉਪਰਿ ਭਵਗ੍ਗਂ ਪਤ੍ਵਾ ਦਸਸਹਸ੍ਸਿਂ ਲੋਕਧਾਤੁਂ ਪਤ੍ਥਰਿਤ੍ਵਾ ਅਟ੍ਠਾਸਿ, ਤਸ੍ਮਿਂਯੇਵ ਸਮਯੇ ਅਟ੍ਠਾਰਸਕੋਟਿਸਙ੍ਖਾ ਬ੍ਰਹ੍ਮਾਨੋ ਸਮਾਗਚ੍ਛਿਂਸੁ. ਪਚ੍ਛਿਮਦਿਸਾਯ ਸੂਰਿਯੋ ਅਤ੍ਥਙ੍ਗਮੇਤਿ, ਪੁਰਤ੍ਥਿਮਾਯ ਦਿਸਾਯ ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨ ਯੁਤ੍ਤੋ ਪੁਣ੍ਣਚਨ੍ਦੋ ਉਗ੍ਗਚ੍ਛਤਿ. ਤਸ੍ਮਿਂ ਸਮਯੇ ਭਗਵਾ ਧਮ੍ਮਚਕ੍ਕਪ੍ਪਵਤ੍ਤਨਸੁਤ੍ਤਨ੍ਤਂ ਆਰਭਨ੍ਤੋ ‘‘ਦ੍ਵੇਮੇ, ਭਿਕ੍ਖਵੇ, ਅਨ੍ਤਾ’’ਤਿਆਦਿਮਾਹ.

ਤਤ੍ਥ ਪਬ੍ਬਜਿਤੇਨਾਤਿ ਗਿਹਿਸਂਯੋਜਨਂ ਵਤ੍ਥੁਕਾਮਂ ਛੇਤ੍ਵਾ ਪਬ੍ਬਜਿਤੇਨ. ਨ ਸੇਵਿਤਬ੍ਬਾਤਿ ਨ ਵਲਞ੍ਜੇਤਬ੍ਬਾ. ਪਬ੍ਬਜਿਤਾਨਂਯੇਵ ਵਿਸੇਸਤੋ ਪਟਿਪਤ੍ਤਿਯਾ ਭਾਜਨਭੂਤਤ੍ਤਾ ‘‘ਪਬ੍ਬਜਿਤੇਨ ਨ ਸੇਵਿਤਬ੍ਬਾ’’ਤਿ ਵੁਤ੍ਤਂ. ਯੋ ਚਾਯਂ ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗੋਤਿ ਯੋ ਚ ਅਯਂ ਵਤ੍ਥੁਕਾਮੇਸੁ ਕਿਲੇਸਕਾਮਸੁਖਸ੍ਸ, ਕਿਲੇਸਕਾਮਸੁਖਨਿਸ੍ਸਯਸ੍ਸ ਵਾ ਅਨੁਯੋਗੋ. ਹੀਨੋਤਿ ਲਾਮਕੋ. ਗਮ੍ਮੋਤਿ ਗਾਮਵਾਸੀਨਂ ਸਨ੍ਤਕੋ. ਪੋਥੁਜ੍ਜਨਿਕੋਤਿ ਪੁਥੁਜ੍ਜਨੇਨ ਅਨ੍ਧਬਾਲਜਨੇਨ ਆਚਿਣ੍ਣੋ. ਅਨਰਿਯੋਤਿ ਨ ਅਰਿਯੋ. ਅਥ ਵਾ ਨ ਵਿਸੁਦ੍ਧਾਨਂ ਉਤ੍ਤਮਾਨਂ ਅਰਿਯਾਨਂ ਸਨ੍ਤਕੋ. ਅਨਤ੍ਥਸਂਹਿਤੋਤਿ ਨ ਅਤ੍ਥਸਂਹਿਤੋ, ਸੁਖਾਵਹਕਾਰਣਂ ਅਨਿਸ੍ਸਿਤੋਤਿ ਅਤ੍ਥੋ. ਅਤ੍ਤਕਿਲਮਥਾਨੁਯੋਗੋਤਿ ਅਤ੍ਤਨੋ ਕਿਲਮਥਸ੍ਸ ਅਨੁਯੋਗੋ, ਅਤ੍ਤਨੋ ਦੁਕ੍ਖਕਰਣਨ੍ਤਿ ਅਤ੍ਥੋ. ਦੁਕ੍ਖੋਤਿ ਕਣ੍ਟਕਾਪਸ੍ਸਯਸੇਯ੍ਯਾਦੀਹਿ ਅਤ੍ਤਮਾਰਣੇਹਿ ਦੁਕ੍ਖਾਵਹੋ. ਤਪਸ੍ਸੀਹਿ ‘‘ਉਤ੍ਤਮਂ ਤਪੋ’’ਤਿ ਗਹਿਤਤ੍ਤਾ ਤੇਸਂ ਚਿਤ੍ਤਾਨੁਰਕ੍ਖਨਤ੍ਥਂ ਇਧ ‘‘ਹੀਨੋ’’ਤਿ ਨ ਵੁਤ੍ਤਂ, ਪਬ੍ਬਜਿਤਾਨਂ ਧਮ੍ਮਤ੍ਤਾ ‘‘ਗਮ੍ਮੋ’’ਤਿ ਚ, ਗਿਹੀਹਿ ਅਸਾਧਾਰਣਤ੍ਤਾ ‘‘ਪੋਥੁਜ੍ਜਨਿਕੋ’’ਤਿ ਚ ਨ ਵੁਤ੍ਤਂ. ਤਤ੍ਥ ਪਨ ਕੇਹਿਚਿ ਪਬ੍ਬਜਿਤਪਟਿਞ੍ਞੇਹਿ ਦਿਟ੍ਠਧਮ੍ਮਨਿਬ੍ਬਾਨਵਾਦੇਹਿ ‘‘ਯਤੋ ਖੋ, ਭੋ, ਅਯਂ ਅਤ੍ਤਾ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤੋ ਸਮਙ੍ਗਿਭੂਤੋ ਪਰਿਚਾਰੇਤਿ, ਏਤ੍ਤਾਵਤਾ ਖੋ, ਭੋ, ਅਯਂ ਅਤ੍ਤਾ ਦਿਟ੍ਠਧਮ੍ਮਨਿਬ੍ਬਾਨਪ੍ਪਤ੍ਤੋ ਹੋਤੀ’’ਤਿ (ਦੀ. ਨਿ. ੧.੯੪) ਗਹਿਤਤ੍ਤਾ ਤੇਸਂ ਚਿਤ੍ਤਾਨੁਰਕ੍ਖਨਤ੍ਥਞ੍ਚ ਪਚ੍ਚੁਪ੍ਪਨ੍ਨੇ ਸੁਖਤ੍ਤਾ ਚ ਤਸ੍ਸ ਧਮ੍ਮਸਮਾਦਾਨਸ੍ਸ ‘‘ਦੁਕ੍ਖੋ’’ਤਿ ਨ ਵੁਤ੍ਤਂ. ਕਾਮਸੁਖਲ੍ਲਿਕਾਨੁਯੋਗੋ ਪਚ੍ਚੁਪ੍ਪਨ੍ਨੇ ਤਣ੍ਹਾਦਿਟ੍ਠਿਸਂਕਿਲਿਟ੍ਠਸੁਖਤ੍ਤਾ ਆਯਤਿਞ੍ਚ ਦੁਕ੍ਖਵਿਪਾਕਤ੍ਤਾ ਤਦਨੁਯੁਤ੍ਤਾਨਂ ਤਣ੍ਹਾਦਿਟ੍ਠਿਬਨ੍ਧਨਬਦ੍ਧਤ੍ਤਾ ਚ ਨ ਸੇਵਿਤਬ੍ਬੋ, ਅਤ੍ਤਕਿਲਮਥਾਨੁਯੋਗੋ ਪਚ੍ਚੁਪ੍ਪਨ੍ਨੇ ਦਿਟ੍ਠਿਸਂਕਿਲਿਟ੍ਠਦੁਕ੍ਖਤ੍ਤਾ ਆਯਤਿਞ੍ਚ ਦੁਕ੍ਖਵਿਪਾਕਤ੍ਤਾ ਤਦਨੁਯੁਤ੍ਤਾਨਂ ਦਿਟ੍ਠਿਬਨ੍ਧਨਬਦ੍ਧਤ੍ਤਾ ਚ ਨ ਸੇਵਿਤਬ੍ਬੋ, ਏਤੇ ਖੋਤਿ ਤੇ ਏਤੇ. ਅਨੁਪਗਮ੍ਮਾਤਿ ਨ ਉਪਗਨ੍ਤ੍ਵਾ. ਮਜ੍ਝਿਮਾਤਿ ਸਂਕਿਲਿਟ੍ਠਸੁਖਦੁਕ੍ਖਾਨਂ ਅਭਾਵਾ ਮਜ੍ਝੇ ਭਵਾਤਿ ਮਜ੍ਝਿਮਾ. ਸਾ ਏਵ ਨਿਬ੍ਬਾਨਂ ਪਟਿਪਜ੍ਜਨ੍ਤਿ ਏਤਾਯਾਤਿ ਪਟਿਪਦਾ. ਅਭਿਸਮ੍ਬੁਦ੍ਧਾਤਿ ਪਟਿਵਿਦ੍ਧਾ. ਚਕ੍ਖੁਕਰਣੀਤਿਆਦੀਸੁ ਪਞ੍ਞਾਚਕ੍ਖੁਂ ਕਰੋਤੀਤਿ ਚਕ੍ਖੁਕਰਣੀ. ਞਾਣਕਰਣੀਤਿ ਤਸ੍ਸੇਵ ਵੇਵਚਨਂ. ਉਪਸਮਾਯਾਤਿ ਕਿਲੇਸੂਪਸਮਾਯ. ਅਭਿਞ੍ਞਾਯਾਤਿ ਚਤੁਨ੍ਨਂ ਸਚ੍ਚਾਨਂ ਅਭਿਜਾਨਨਤ੍ਥਾਯ. ਸਮ੍ਬੋਧਾਯਾਤਿ ਤੇਸਂਯੇਵ ਸਮ੍ਬੁਜ੍ਝਨਤ੍ਥਾਯ. ਨਿਬ੍ਬਾਨਾਯਾਤਿ ਨਿਬ੍ਬਾਨਸਚ੍ਛਿਕਿਰਿਯਤ੍ਥਾਯ. ਅਥ ਵਾ ਦਸ੍ਸਨਮਗ੍ਗਞਾਣਂ ਕਰੋਤੀਤਿ ਚਕ੍ਖੁਕਰਣੀ. ਭਾਵਨਾਮਗ੍ਗਞਾਣਂ ਕਰੋਤੀਤਿ ਞਾਣਕਰਣੀ. ਸਬ੍ਬਕਿਲੇਸਾਨਂ ਉਪਸਮਾਯ. ਸਬ੍ਬਧਮ੍ਮਾਨਂ ਅਭਿਞ੍ਞਾਯ. ਅਰਹਤ੍ਤਫਲਸਮ੍ਬੋਧਾਯ. ਕਿਲੇਸਾਨਞ੍ਚ ਖਨ੍ਧਾਨਞ੍ਚ ਨਿਬ੍ਬਾਨਾਯ. ਸਚ੍ਚਕਥਾ ਅਭਿਞ੍ਞੇਯ੍ਯਨਿਦ੍ਦੇਸੇ ਵੁਤ੍ਤਾ.

ਏਵਂ ਭਗਵਾ ਸਚ੍ਚਾਨਿ ਪਕਾਸੇਤ੍ਵਾ ਅਤ੍ਤਨਿ ਕਤਬਹੁਮਾਨਾਨਂ ਤੇਸਂ ਅਤ੍ਤਨੋ ਪਟਿਵੇਧਕ੍ਕਮਂ ਸੁਤ੍ਵਾ ਪਟਿਪਤ੍ਤਿਯਾ ਬਹੁਮਾਨਾਰੋਪਨੇਨ ਪਟਿਪਤ੍ਤਿਯਂ ਠਤ੍ਵਾ ਸਚ੍ਚਪ੍ਪਟਿਵੇਧਂ ਪਸ੍ਸਨ੍ਤੋ ਇਦਂ ਦੁਕ੍ਖਂ ਅਰਿਯਸਚ੍ਚਨ੍ਤਿ ਮੇ, ਭਿਕ੍ਖਵੇਤਿਆਦਿਨਾ ਅਤ੍ਤਨੋ ਪਟਿਵੇਧਕ੍ਕਮਂ ਦਸ੍ਸੇਸਿ. ਤਤ੍ਥ ਅਨਨੁਸ੍ਸੁਤੇਸੂਤਿ ਨ ਅਨੁਸ੍ਸੁਤੇਸੁ, ਪਰਂ ਅਨੁਗਨ੍ਤ੍ਵਾ ਅਸ੍ਸੁਤੇਸੂਤਿ ਅਤ੍ਥੋ. ਚਕ੍ਖੂਤਿਆਦੀਨਂ ਅਤ੍ਥੋ ਪਰਤੋ ਆਵਿ ਭਵਿਸ੍ਸਤਿ. ਇਦਂ ਦੁਕ੍ਖਂ ਅਰਿਯਸਚ੍ਚਂ, ਇਦਂ ਦੁਕ੍ਖਸਮੁਦਯਂ, ਇਦਂ ਦੁਕ੍ਖਨਿਰੋਧਂ, ਇਦਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਨ੍ਤਿ ਚਤੁਨ੍ਨਂ ਸਚ੍ਚਾਨਂ ਦਸ੍ਸਨਪਟਿਵੇਧੋ ਸੇਖਭੂਮਿਯਂ. ਪਰਿਞ੍ਞੇਯ੍ਯਂ ਪਹਾਤਬ੍ਬਂ ਸਚ੍ਛਿਕਾਤਬ੍ਬਂ ਭਾਵੇਤਬ੍ਬਨ੍ਤਿ ਚਤੁਨ੍ਨਂ ਸਚ੍ਚਾਨਂ ਭਾਵਨਾਪਟਿਵੇਧੋ ਸੇਖਭੂਮਿਯਂਯੇਵ. ਪਰਿਞ੍ਞਾਤਂ ਪਹੀਨਂ ਸਚ੍ਛਿਕਤਂ ਭਾਵਿਤਨ੍ਤਿ ਚਤੁਨ੍ਨਂ ਸਚ੍ਚਾਨਂ ਪਚ੍ਚਵੇਕ੍ਖਣਾ ਅਸੇਖਭੂਮਿਯਂ.

ਤਿਪਰਿਵਟ੍ਟਨ੍ਤਿ ਸਚ੍ਚਞਾਣਕਿਚ੍ਚਞਾਣਕਤਞਾਣਸਙ੍ਖਾਤਾਨਂ ਤਿਣ੍ਣਂ ਪਰਿਵਟ੍ਟਾਨਂ ਵਸੇਨ ਤਯੋ ਪਰਿਵਟ੍ਟਾ ਅਸ੍ਸਾਤਿ ਤਿਪਰਿਵਟ੍ਟਂ. ਏਤ੍ਥ ਹਿ ‘‘ਇਦਂ ਦੁਕ੍ਖਂ, ਇਦਂ ਦੁਕ੍ਖਸਮੁਦਯਂ, ਇਦਂ ਦੁਕ੍ਖਨਿਰੋਧਂ, ਇਦਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚ’’ਨ੍ਤਿ ਏਵਂ ਚਤੂਸੁ ਸਚ੍ਚੇਸੁ ਯਥਾਭੂਤਞਾਣਂ ਸਚ੍ਚਞਾਣਂ ਨਾਮ. ਤੇਸੁਯੇਵ ‘‘ਪਰਿਞ੍ਞੇਯ੍ਯਂ ਪਹਾਤਬ੍ਬਂ ਸਚ੍ਛਿਕਾਤਬ੍ਬਂ ਭਾਵੇਤਬ੍ਬ’’ਨ੍ਤਿ ਏਵਂ ਕਤ੍ਤਬ੍ਬਕਿਚ੍ਚਜਾਨਨਞਾਣਂ ਕਿਚ੍ਚਞਾਣਂ ਨਾਮ. ‘‘ਪਰਿਞ੍ਞਾਤਂ ਪਹੀਨਂ ਸਚ੍ਛਿਕਤਂ ਭਾਵਿਤ’’ਨ੍ਤਿ ਏਵਂ ਤਸ੍ਸ ਕਿਚ੍ਚਸ੍ਸ ਕਤਭਾਵਜਾਨਨਞਾਣਂ ਕਤਞਾਣਂ ਨਾਮ. ਦ੍ਵਾਦਸਾਕਾਰਨ੍ਤਿ ਤੇਸਂਯੇਵ ਏਕੇਕਸ੍ਮਿਂ ਸਚ੍ਚੇ ਤਿਣ੍ਣਂ ਤਿਣ੍ਣਂ ਆਕਾਰਾਨਂ ਵਸੇਨ ਦ੍ਵਾਦਸ ਆਕਾਰਾ ਅਸ੍ਸਾਤਿ ਦ੍ਵਾਦਸਾਕਾਰਂ. ਞਾਣਦਸ੍ਸਨਨ੍ਤਿ ਏਤੇਸਂ ਤਿਪਰਿਵਟ੍ਟਾਨਂ ਦ੍ਵਾਦਸਨ੍ਨਂ ਆਕਾਰਾਨਂ ਵਸੇਨ ਉਪ੍ਪਨ੍ਨਂ ਞਾਣਸਙ੍ਖਾਤਂ ਦਸ੍ਸਨਂ. ਅਤ੍ਤਮਨਾਤਿ ਸਕਮਨਾ. ਸਤ੍ਤਾਨਞ੍ਹਿ ਸੁਖਕਾਮਤ੍ਤਾ ਦੁਕ੍ਖਪਟਿਕੂਲਤ੍ਤਾ ਪੀਤਿਸੋਮਨਸ੍ਸਯੁਤ੍ਤਮਨੋ ਸਕਮਨੋ ਨਾਮ, ਪੀਤਿਸੋਮਨਸ੍ਸੇਹਿ ਅਤ੍ਤਮਨਾ ਗਹਿਤਮਨਾ ਬ੍ਯਾਪਿਤਮਨਾਤਿ ਵਾ ਅਤ੍ਥੋ. ਅਭਿਨਨ੍ਦੁਨ੍ਤਿ ਅਭਿਮੁਖਾ ਹੁਤ੍ਵਾ ਨਨ੍ਦਿਂਸੁ. ਵੇਯ੍ਯਾਕਰਣੇਤਿ ਸੁਤ੍ਤਨ੍ਤੇ. ਨਿਗ੍ਗਾਥਕੋ ਹਿ ਸੁਤ੍ਤਨ੍ਤੋ ਕੇਵਲਂ ਅਤ੍ਥਸ੍ਸ ਬ੍ਯਾਕਰਣਤੋ ਵੇਯ੍ਯਾਕਰਣਂ ਨਾਮ. ਭਞ੍ਞਮਾਨੇਤਿ ਕਥਿਯਮਾਨੇ. ਵਤ੍ਤਮਾਨਸਮੀਪੇ ਵਤ੍ਤਮਾਨਵਚਨਂ ਕਤਂ, ਭਣਿਤੇਤਿ ਅਤ੍ਥੋ. ਵਿਰਜਨ੍ਤਿ ਵਿਗਤਰਾਗਾਦਿਰਜਂ. ਵੀਤਮਲਨ੍ਤਿ ਵਿਗਤਰਾਗਾਦਿਮਲਂ. ਰਾਗਾਦਯੋ ਹਿ ਅਜ੍ਝੋਤ੍ਥਰਣਟ੍ਠੇਨ ਰਜੋ ਨਾਮ, ਦੂਸਨਟ੍ਠੇਨ ਮਲਂ ਨਾਮ. ਧਮ੍ਮਚਕ੍ਖੁਨ੍ਤਿ ਕਤ੍ਥਚਿ ਪਠਮਮਗ੍ਗਞਾਣਂ, ਕਤ੍ਥਚਿ ਆਦੀਨਿ ਤੀਣਿ ਮਗ੍ਗਞਾਣਾਨਿ, ਕਤ੍ਥਚਿ ਚਤੁਤ੍ਥਮਗ੍ਗਞਾਣਮ੍ਪਿ. ਇਧ ਪਨ ਪਠਮਮਗ੍ਗਞਾਣਮੇਵ. ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ ਵਿਪਸ੍ਸਨਾਵਸੇਨ ਏਵਂ ਪਵਤ੍ਤਸ੍ਸ ਧਮ੍ਮਚਕ੍ਖੁਂ ਉਦਪਾਦੀਤਿ ਅਤ੍ਥੋ.

ਧਮ੍ਮਚਕ੍ਕੇਤਿ ਪਟਿਵੇਧਞਾਣੇ ਚ ਦੇਸਨਾਞਾਣੇ ਚ. ਬੋਧਿਪਲ੍ਲਙ੍ਕੇ ਨਿਸਿਨ੍ਨਸ੍ਸ ਹਿ ਭਗਵਤੋ ਚਤੂਸੁ ਸਚ੍ਚੇਸੁ ਦ੍ਵਾਦਸਾਕਾਰਂ ਪਟਿਵੇਧਞਾਣਮ੍ਪਿ ਇਸਿਪਤਨੇ ਨਿਸਿਨ੍ਨਸ੍ਸ ਦ੍ਵਾਦਸਾਕਾਰਮੇਵ ਸਚ੍ਚਦੇਸਨਾਯ ਪਵਤ੍ਤਕਦੇਸਨਾਞਾਣਮ੍ਪਿ ਧਮ੍ਮਚਕ੍ਕਂ ਨਾਮ. ਉਭਯਮ੍ਪਿ ਹੇਤਂ ਦਸਬਲਸ੍ਸ ਪਵਤ੍ਤਞਾਣਮੇਵ. ਤਂ ਇਮਾਯ ਦੇਸਨਾਯ ਪਕਾਸੇਨ੍ਤੇਨ ਭਗਵਤਾ ਧਮ੍ਮਚਕ੍ਕਂ ਪਵਤ੍ਤਿਤਂ ਨਾਮ. ਤਂ ਪਨੇਤਂ ਧਮ੍ਮਚਕ੍ਕਂ ਯਾਵ ਅਞ੍ਞਾਤਕੋਣ੍ਡਞ੍ਞਤ੍ਥੇਰੋ ਅਟ੍ਠਾਰਸਹਿ ਬ੍ਰਹ੍ਮਕੋਟੀਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਨ ਪਤਿਟ੍ਠਾਤਿ, ਤਾਵ ਭਗਵਾ ਪਵਤ੍ਤੇਤਿ ਨਾਮ, ਪਤਿਟ੍ਠਿਤੇ ਪਨ ਪਵਤ੍ਤਿਤਂ ਨਾਮ. ਤਂ ਸਨ੍ਧਾਯ ‘‘ਪਵਤ੍ਤਿਤੇ ਚ ਭਗਵਤਾ ਧਮ੍ਮਚਕ੍ਕੇ’’ਤਿ ਵੁਤ੍ਤਂ.

ਭੁਮ੍ਮਾ ਦੇਵਾਤਿ ਭੂਮਟ੍ਠਕਾ ਦੇਵਾ. ਸਦ੍ਦਮਨੁਸ੍ਸਾਵੇਸੁਨ੍ਤਿ ਏਕਪ੍ਪਹਾਰੇਨੇਵ ਸਾਧੁਕਾਰਂ ਦਤ੍ਵਾ ਏਤਂ ਭਗਵਤਾਤਿਆਦੀਨਿ ਵਦਨ੍ਤਾ ਸਦ੍ਦਂ ਅਨੁਸ੍ਸਾਵਯਿਂਸੁ. ਅਪ੍ਪਟਿਵਤ੍ਤਿਯਨ੍ਤਿ ‘‘ਨਯਿਦਂ ਤਥਾ’’ਤਿ ਪਟਿਲੋਮਂ ਵਤ੍ਤੇਤੁਂ ਅਸਕ੍ਕੁਣੇਯ੍ਯਂ. ਸਨ੍ਨਿਪਤਿਤਾ ਚੇਤ੍ਥ ਦੇਵਬ੍ਰਹ੍ਮਾਨੋ ਦੇਸਨਾਪਰਿਯੋਸਾਨੇ ਏਕਪ੍ਪਹਾਰੇਨੇਵ ਸਾਧੁਕਾਰਂ ਅਦਂਸੁ, ਸਨ੍ਨਿਪਾਤਂ ਅਨਾਗਤਾ ਪਨ ਭੁਮ੍ਮਦੇਵਾਦਯੋ ਤੇਸਂ ਤੇਸਂ ਸਦ੍ਦਂ ਸੁਤ੍ਵਾ ਸਾਧੁਕਾਰਮਦਂਸੂਤਿ ਵੇਦਿਤਬ੍ਬਂ. ਤੇਸੁ ਪਨ ਪਬ੍ਬਤਰੁਕ੍ਖਾਦੀਸੁ ਨਿਬ੍ਬਤ੍ਤਾ ਭੁਮ੍ਮਦੇਵਾ. ਤੇ ਚਾਤੁਮਹਾਰਾਜਿਕਪਰਿਯਾਪਨ੍ਨਾ ਹੋਨ੍ਤਾਪਿ ਇਧ ਵਿਸੁਂ ਕਤ੍ਵਾ ਵੁਤ੍ਤਾ. ਚਾਤੁਮਹਾਰਾਜਿਕਾਤਿ ਚ ਧਤਰਟ੍ਠਵਿਰੂਲ਼੍ਹਕਵਿਰੂਪਕ੍ਖਕੁਵੇਰਸਙ੍ਖਾਤਾ ਚਤੁਮਹਾਰਾਜਾ ਦੇਵਤਾ ਏਤੇਸਨ੍ਤਿ ਚਾਤੁਮਹਾਰਾਜਿਕਾ. ਤੇ ਸਿਨੇਰੁਵੇਮਜ੍ਝੇ ਹੋਨ੍ਤਿ. ਤੇਸੁ ਪਬ੍ਬਤਟ੍ਠਕਾਪਿ ਅਤ੍ਥਿ ਆਕਾਸਟ੍ਠਕਾਪਿ. ਤੇਸਂ ਪਰਮ੍ਪਰਾ ਚਕ੍ਕਵਾਲ਼ਪਬ੍ਬਤਂ ਪਤ੍ਤਾ. ਖਿਡ੍ਡਾਪਦੋਸਿਕਾ ਮਨੋਪਦੋਸਿਕਾ ਸੀਤਵਲਾਹਕਾ ਉਣ੍ਹਵਲਾਹਕਾ ਚਨ੍ਦਿਮਾ ਦੇਵਪੁਤ੍ਤੋ ਸੂਰਿਯੋ ਦੇਵਪੁਤ੍ਤੋਤਿ ਏਤੇ ਸਬ੍ਬੇਪਿ ਚਾਤੁਮਹਾਰਾਜਿਕਦੇਵਲੋਕਟ੍ਠਾ ਏਵ. ਤੇਤ੍ਤਿਂਸ ਜਨਾ ਤਤ੍ਥ ਉਪ੍ਪਨ੍ਨਾਤਿ ਤਾਵਤਿਂਸਾ. ਅਪਿਚ ‘‘ਤਾਵਤਿਂਸਾ’’ਤਿ ਤੇਸਂ ਦੇਵਾਨਂ ਨਾਮਮੇਵਾਤਿਪਿ ਵੁਤ੍ਤਂ. ਤੇਪਿ ਅਤ੍ਥਿ ਪਬ੍ਬਤਟ੍ਠਕਾ ਅਤ੍ਥਿ ਆਕਾਸਟ੍ਠਕਾ. ਤੇਸਂ ਪਰਮ੍ਪਰਾ ਚਕ੍ਕਵਾਲ਼ਪਬ੍ਬਤਂ ਪਤ੍ਤਾ, ਤਥਾ ਯਾਮਾਦੀਨਂ. ਏਕਦੇਵਲੋਕੇਪਿ ਹਿ ਦੇਵਾਨਂ ਪਰਮ੍ਪਰਾ ਚਕ੍ਕਵਾਲ਼ਪਬ੍ਬਤਂ ਅਪ੍ਪਤ੍ਤਾ ਨਾਮ ਨਤ੍ਥਿ. ਦਿਬ੍ਬਂ ਸੁਖਂ ਯਾਤਾ ਪਯਾਤਾ ਸਮ੍ਪਤ੍ਤਾਤਿ ਯਾਮਾ. ਤੁਟ੍ਠਾ ਪਹਟ੍ਠਾਤਿ ਤੁਸਿਤਾ. ਪਕਤਿਪਟਿਯਤ੍ਤਾਰਮ੍ਮਣਤੋ ਅਤਿਰੇਕੇਨ ਰਮਿਤੁਕਾਮਕਾਲੇ ਯਥਾਰੁਚਿਤੇ ਭੋਗੇ ਨਿਮ੍ਮਿਨਿਤ੍ਵਾ ਨਿਮ੍ਮਿਨਿਤ੍ਵਾ ਰਮਨ੍ਤੀਤਿ ਨਿਮ੍ਮਾਨਰਤੀ. ਚਿਤ੍ਤਾਚਾਰਂ ਞਤ੍ਵਾ ਪਰਨਿਮ੍ਮਿਤੇਸੁ ਭੋਗੇਸੁ ਵਸਂ ਵਤ੍ਤੇਨ੍ਤੀਤਿ ਪਰਨਿਮ੍ਮਿਤਵਸਵਤ੍ਤੀ. ਬ੍ਰਹ੍ਮਕਾਯੇ ਬ੍ਰਹ੍ਮਘਟਾਯ ਨਿਯੁਤ੍ਤਾਤਿ ਬ੍ਰਹ੍ਮਕਾਯਿਕਾ. ਸਬ੍ਬੇਪਿ ਪਞ੍ਚਵੋਕਾਰਬ੍ਰਹ੍ਮਾਨੋ ਗਹਿਤਾ.

ਤੇਨ ਖਣੇਨਾਤਿ ਵਚਨਂ ਵਿਸੇਸੇਤ੍ਵਾ ਤੇਨ ਮੁਹੁਤ੍ਤੇਨਾਤਿ ਵੁਤ੍ਤਂ. ਮੁਹੁਤ੍ਤਸਙ੍ਖਾਤੇਨ ਖਣੇਨ, ਨ ਪਰਮਤ੍ਥਖਣੇਨਾਤਿ ਵੁਤ੍ਤਂ ਹੋਤਿ. ਯਾਵ ਬ੍ਰਹ੍ਮਲੋਕਾਤਿ ਬ੍ਰਹ੍ਮਲੋਕਂ ਅਨ੍ਤੋਕਤ੍ਵਾ. ਸਦ੍ਦੋਤਿ ਸਾਧੁਕਾਰਸਦ੍ਦੋ. ਦਸਸਹਸ੍ਸੀਤਿ ਦਸਸਹਸ੍ਸਚਕ੍ਕਵਾਲ਼ਵਤੀ. ਸਙ੍ਕਮ੍ਪੀਤਿ ਉਦ੍ਧਂ ਉਗ੍ਗਚ੍ਛਨ੍ਤੀ ਸੁਟ੍ਠੁ ਕਮ੍ਪਿ. ਸਮ੍ਪਕਮ੍ਪੀਤਿ ਉਦ੍ਧਂ ਉਗ੍ਗਚ੍ਛਨ੍ਤੀ ਅਧੋ ਓਕ੍ਕਮਨ੍ਤੀ ਸੁਟ੍ਠੁ ਪਕਮ੍ਪਿ. ਸਮ੍ਪਵੇਧੀਤਿ ਚਤੁਦਿਸਾ ਗਚ੍ਛਨ੍ਤੀ ਸੁਟ੍ਠੁ ਪਵੇਧਿ. ਸਮ੍ਬੁਦ੍ਧਭਾਵਾਯ ਮਾਤੁਕੁਚ੍ਛਿਂ ਓਕ੍ਕਮਨ੍ਤੇ ਚ ਬੋਧਿਸਤ੍ਤੇ ਤਤੋ ਨਿਕ੍ਖਮਨ੍ਤੇ ਚ ਮਹਾਪਥਵੀ ਪੁਞ੍ਞਤੇਜੇਨ ਅਕਮ੍ਪਿਤ੍ਥ, ਅਭਿਸਮ੍ਬੋਧਿਯਂ ਪਟਿਵੇਧਞਾਣਤੇਜੇਨ. ਧਮ੍ਮਚਕ੍ਕਪ੍ਪਵਤ੍ਤਨੇ ਦੇਸਨਾਞਾਣਤੇਜੇਨ ਸਾਧੁਕਾਰਂ ਦਾਤੁਕਾਮਾ ਵਿਯ ਪਥਵੀ ਦੇਵਤਾਨੁਭਾਵੇਨ ਅਕਮ੍ਪਿਤ੍ਥ, ਆਯੁਸਙ੍ਖਾਰੋਸ੍ਸਜ੍ਜਨੇ ਮਹਾਪਰਿਨਿਬ੍ਬਾਨੇ ਚ ਕਾਰੁਞ੍ਞੇਨ ਚਿਤ੍ਤਸਙ੍ਖੋਭਂ ਅਸਹਮਾਨਾ ਵਿਯ ਪਥਵੀ ਦੇਵਤਾਨੁਭਾਵੇਨ ਅਕਮ੍ਪਿਤ੍ਥ. ਅਪ੍ਪਮਾਣੋਤਿ ਵੁਦ੍ਧਪ੍ਪਮਾਣੋ. ਉਲ਼ਾਰੋਤਿ ਏਤ੍ਥ ‘‘ਉਲ਼ਾਰਾਨਿ ਉਲ਼ਾਰਾਨਿ ਖਾਦਨੀਯਾਨਿ ਖਾਦਨ੍ਤੀ’’ਤਿਆਦੀਸੁ (ਮ. ਨਿ. ੧.੩੬੬) ਮਧੁਰਂ ਉਲ਼ਾਰਨ੍ਤਿ ਵੁਤ੍ਤਂ. ‘‘ਉਲ਼ਾਰਾਯ ਵਤ੍ਥਭੋਗਾਯ ਚਿਤ੍ਤਂ ਨ ਨਮਤੀ’’ਤਿਆਦੀਸੁ (ਅ. ਨਿ. ੯.੨੦) ਪਣੀਤਂ ਉਲ਼ਾਰਨ੍ਤਿ ਵੁਤ੍ਤਂ. ‘‘ਉਲ਼ਾਰਾਯ ਖਲੁ ਭਵਂ ਵਚ੍ਛਾਯਨੋ ਸਮਣਂ ਗੋਤਮਂ ਪਸਂਸਾਯ ਪਸਂਸਤੀ’’ਤਿਆਦੀਸੁ ਸੇਟ੍ਠਂ ਉਲ਼ਾਰਨ੍ਤਿ ਵੁਤ੍ਤਂ. ਇਧ ਪਨ ‘‘ਵਿਪੁਲੋ ਉਲ਼ਾਰੋ’’ਤਿ ਵੁਤ੍ਤੋ. ਓਭਾਸੋਤਿ ਦੇਸਨਾਞਾਣਾਨੁਭਾਵੇਨ ਚ ਦੇਵਤਾਨੁਭਾਵੇਨ ਚ ਜਾਤਓਭਾਸੋ. ਲੋਕੇਤਿ ਚਕ੍ਕਵਾਲ਼ਸ੍ਸ ਦਸਸਹਸ੍ਸਿਯਂਯੇਵ. ਅਤਿਕ੍ਕਮ੍ਮੇਵ ਦੇਵਾਨਂ ਦੇਵਾਨੁਭਾਵਨ੍ਤਿ ਦੇਵਾਨਂ ਅਯਮਾਨੁਭਾਵੋ – ਨਿਵਤ੍ਥਵਤ੍ਥਪ੍ਪਭਾ ਦ੍ਵਾਦਸ ਯੋਜਨਾਨਿ ਫਰਤਿ, ਤਥਾ ਸਰੀਰਸ੍ਸ ਅਲਙ੍ਕਾਰਸ੍ਸ ਵਿਮਾਨਸ੍ਸ ਚ. ਤਂ ਦੇਵਾਨਂ ਦੇਵਾਨੁਭਾਵਂ ਅਤਿਕ੍ਕਮਿਤ੍ਵਾਯੇਵਾਤਿ ਅਤ੍ਥੋ. ਉਦਾਨਨ੍ਤਿ ਸੋਮਨਸ੍ਸਞਾਣਮਯਿਕਂ ਉਦਾਹਾਰਂ. ਉਦਾਨੇਸੀਤਿ ਉਦਾਹਰਿ. ਅਞ੍ਞਾਸਿ ਵਤ, ਭੋ ਕੋਣ੍ਡਞ੍ਞੋਤਿ ਇਮਸ੍ਸਪਿ ਉਦਾਨਸ੍ਸ ਉਦਾਹਰਣਘੋਸੋ ਦਸਸਹਸ੍ਸਿਲੋਕਧਾਤੁਂ ਫਰਿਤ੍ਵਾ ਅਟ੍ਠਾਸਿ. ਅਞ੍ਞਾਸਿਕੋਣ੍ਡਞ੍ਞੋਤਿ ਭੁਸਂ ਞਾਤਕੋਣ੍ਡਞ੍ਞੋਤਿ ਅਤ੍ਥੋ.

ਚਕ੍ਖੁਆਦੀਨਂ ਨਿਦ੍ਦੇਸੇ ਦਸ੍ਸਨਟ੍ਠੇਨਾਤਿਆਦੀਸੁ ਏਕਮੇਵ ਞਾਣਂ ਯਥਾਵੁਤ੍ਤਸ੍ਸ ਨੇਯ੍ਯਸ੍ਸ ਚਕ੍ਖੁ ਵਿਯ ਦਸ੍ਸਨਕਿਚ੍ਚਕਰਣੇਨ ਚਕ੍ਖੁ. ਞਾਣਕਿਚ੍ਚਕਰਣੇਨ ਞਾਣਂ. ਨਾਨਪ੍ਪਕਾਰਤੋ ਜਾਨਨਕਿਚ੍ਚਕਰਣੇਨ ਪਞ੍ਞਾ. ਅਨਵਸੇਸਪਟਿਵੇਧਕਰਣੇਨ ਵਿਜ੍ਜਾ. ਸਬ੍ਬਥਾ ਓਭਾਸਕਿਚ੍ਚਕਰਣੇਨ ਆਲੋਕੋ ਨਾਮਾਤਿ ਅਤ੍ਥੋ. ਚਕ੍ਖੁਂ ਧਮ੍ਮੋਤਿਆਦੀਸੁਪਿ ਏਕਂਯੇਵ ਞਾਣਂ ਕਿਚ੍ਚਨਾਨਤ੍ਤੇਨ ਪਞ੍ਚਧਾ ਵਣ੍ਣਿਤਂ. ਆਰਮ੍ਮਣਾਤਿ ਉਪਤ੍ਥਮ੍ਭਨਟ੍ਠੇਨ. ਗੋਚਰਾਤਿ ਵਿਸਯਟ੍ਠੇਨ. ਦਸ੍ਸਨਟ੍ਠੇਨਾਤਿਆਦੀਸੁ ਞਾਣਕਿਚ੍ਚਂ ਪਞ੍ਚਧਾ ਵੁਤ੍ਤਂ. ਇਮਿਨਾ ਨਯੇਨ ਤੀਸੁ ਵਾਰੇਸੁ ਏਕੇਕਸ੍ਮਿਂ ਪਞ੍ਚ ਪਞ੍ਚ ਕਤ੍ਵਾ ਪਨ੍ਨਰਸ ਧਮ੍ਮਾ, ਪਨ੍ਨਰਸ ਅਤ੍ਥਾ, ਦ੍ਵੀਸੁ ਪਨ੍ਨਰਸਕੇਸੁ ਤਿਂਸ ਨਿਰੁਤ੍ਤਿਯੋ, ਪਨ੍ਨਰਸਸੁ ਧਮ੍ਮੇਸੁ ਪਨ੍ਨਰਸਸੁ ਅਤ੍ਥੇਸੁ ਤਿਂਸਾਯ ਨਿਰੁਤ੍ਤੀਸੂਤਿ ਸਟ੍ਠਿ ਞਾਣਾਨਿ ਵੇਦਿਤਬ੍ਬਾਨਿ. ਸੇਸਅਰਿਯਸਚ੍ਚੇਸੁਪਿ ਏਸੇਵ ਨਯੋ. ਚਤੂਸੁ ਅਰਿਯਸਚ੍ਚੇਸੁ ਏਕੇਕਸ੍ਮਿਂ ਅਰਿਯਸਚ੍ਚੇ ਪਨ੍ਨਰਸਨ੍ਨਂ ਪਨ੍ਨਰਸਨ੍ਨਂ ਧਮ੍ਮਾਨਂ ਅਤ੍ਥਾਨਞ੍ਚ ਵਸੇਨ ਸਟ੍ਠਿ ਧਮ੍ਮਾ, ਸਟ੍ਠਿ ਅਤ੍ਥਾ, ਸਟ੍ਠਿਯਾ ਧਮ੍ਮੇਸੁ ਸਟ੍ਠਿਯਾ ਅਤ੍ਥੇਸੁ ਚ ਵੀਸਸਤਂ ਨਿਰੁਤ੍ਤਿਯੋ, ਵੀਸਾਧਿਕਂ ਸਤਨ੍ਤਿ ਅਤ੍ਥੋ. ਸਟ੍ਠਿਯਾ ਧਮ੍ਮੇਸੁ ਸਟ੍ਠਿਯਾ ਅਤ੍ਥੇਸੁ ਵੀਸੁਤ੍ਤਰਸਤੇ ਨਿਰੁਤ੍ਤੀਸੂਤਿ ਏਵਂ ਚਤ੍ਤਾਰੀਸਞ੍ਚ ਦ੍ਵੇ ਚ ਞਾਣਸਤਾਨਿ.

੨-੩. ਸਤਿਪਟ੍ਠਾਨਵਾਰਾਦਿਵਣ੍ਣਨਾ

੩੧-੩੨. ਸਤਿਪਟ੍ਠਾਨਸੁਤ੍ਤਨ੍ਤਪੁਬ੍ਬਙ੍ਗਮੇ ਇਦ੍ਧਿਪਾਦਸੁਤ੍ਤਨ੍ਤਪੁਬ੍ਬਙ੍ਗਮੇ ਚ ਪਟਿਸਮ੍ਭਿਦਾਨਿਦ੍ਦੇਸੇ ਇਮਿਨਾਵ ਨਯੇਨ ਅਤ੍ਥੋ ਚ ਗਣਨਾ ਚ ਵੇਦਿਤਬ੍ਬਾ.

੪-੮. ਸਤ੍ਤਬੋਧਿਸਤ੍ਤਵਾਰਾਦਿਵਣ੍ਣਨਾ

੩੩-੩੭. ਸਤ੍ਤਨ੍ਨਂ ਬੋਧਿਸਤ੍ਤਾਨਂ ਸੁਤ੍ਤਨ੍ਤੇਸੁ ਏਕੇਕਸ੍ਮਿਂਯੇਵ ਸਮੁਦਯੇ ਚਕ੍ਖਾਦਯੋ ਪਞ੍ਚ, ਨਿਰੋਧੇ ਪਞ੍ਚਾਤਿ ਦਸ ਧਮ੍ਮਾ, ਸਮੁਦਯੇ ਦਸ੍ਸਨਟ੍ਠਾਦਯੋ ਪਞ੍ਚ, ਨਿਰੋਧੇ ਪਞ੍ਚਾਤਿ ਦਸ ਅਤ੍ਥਾ, ਤੇਸਂ ਵਸੇਨ ਵੀਸਤਿ ਨਿਰੁਤ੍ਤਿਯੋ ਚਤ੍ਤਾਰੀਸਂ ਞਾਣਾਨਿ. ਸਤ੍ਤ ਏਕਤੋ ਕਤ੍ਵਾ ਵੁਤ੍ਤਗਣਨਾ ਸੁਵਿਞ੍ਞੇਯ੍ਯਾ ਏਵ. ਸਬ੍ਬਞ੍ਞੁਤਞ੍ਞਾਣਵਸੇਨ ਵੁਤ੍ਤਪਟਿਸਮ੍ਭਿਦਾਨਿਦ੍ਦੇਸੇ ਏਕੇਕਮੂਲਕੇਸੁ ‘‘ਞਾਤੋ ਦਿਟ੍ਠੋ ਵਿਦਿਤੋ ਸਚ੍ਛਿਕਤੋ ਫਸ੍ਸਿਤੋ ਪਞ੍ਞਾਯਾ’’ਤਿ (ਪਟਿ. ਮ. ੧.੧੨੧) ਇਮੇਸੁ ਪਞ੍ਚਸੁ ਵਚਨੇਸੁ ਏਕੇਕਸ੍ਮਿਂਯੇਵ ਚਕ੍ਖਾਦਯੋ ਪਞ੍ਚ, ਦਸ੍ਸਨਟ੍ਠਾਦਯੋ ਪਞ੍ਚਾਤਿ ਪਞ੍ਚਪਞ੍ਚਕਾਨਂ ਵਸੇਨ ਪਞ੍ਚਵੀਸਤਿ ਧਮ੍ਮਾ, ਪਞ੍ਚਵੀਸਤਿ ਅਤ੍ਥਾ, ਤਦ੍ਦਿਗੁਣਾ ਨਿਰੁਤ੍ਤਿਯੋ, ਤਦ੍ਦਿਗੁਣਾਨਿ ਞਾਣਾਨਿ ਞੇਯ੍ਯਾਨਿ. ਪਞ੍ਚ ਏਕਤੋ ਕਤ੍ਵਾ ਵੁਤ੍ਤਵਾਰੇਪਿ ਪਞ੍ਚਕ੍ਖਤ੍ਤੁਂ ਪਞ੍ਚ ਪਞ੍ਚਵੀਸਤਿ ਕਤ੍ਵਾ ਪਞ੍ਚਵੀਸਸਤਂ ਧਮ੍ਮਾ, ਪਞ੍ਚਵੀਸਸਤਂ ਅਤ੍ਥਾ, ਤਦ੍ਦਿਗੁਣਾ ਨਿਰੁਤ੍ਤਿਯੋ, ਤਦ੍ਦਿਗੁਣਾਨਿ ਞਾਣਾਨਿ ਞੇਯ੍ਯਾਨਿ. ਅਡ੍ਢਤੇਯ੍ਯਾਨੀਤਿ ਚੇਤ੍ਥ ਦ੍ਵੇ ਸਤਾਨਿ ਚ ਪਞ੍ਞਾਸਞ੍ਚ. ਖਨ੍ਧਾਦੀਸੁਪਿ ਏਸੇਵ ਨਯੋ. ਇਮਿਨਾਵ ਨਯੇਨ ਸਚ੍ਚਵਾਰਪਟਿਸਮ੍ਭਿਦਾਵਾਰੇ ਚ ਧਮ੍ਮਾਦਿਗਣਨਾ ਵੇਦਿਤਬ੍ਬਾ.

੯. ਛਬੁਦ੍ਧਧਮ੍ਮਵਾਰਵਣ੍ਣਨਾ

੩੮. ਬੁਦ੍ਧਧਮ੍ਮਵਾਰੇ ਦਿਯਡ੍ਢਸਤਨ੍ਤਿ ਛਕ੍ਖਤ੍ਤੁਂ ਪਞ੍ਚਵੀਸਤਿ ਸਤਞ੍ਚ ਪਞ੍ਞਾਸਞ੍ਚ ਹੋਨ੍ਤਿ, ਤਦ੍ਦਿਗੁਣਾ ਨਿਰੁਤ੍ਤਿਯੋ ਤਦ੍ਦਿਗੁਣਾਨਿ ਞਾਣਾਨਿ. ਪਟਿਸਮ੍ਭਿਦਾਧਿਕਰਣੇਤਿ ਪਟਿਸਮ੍ਭਿਦਾਧਿਕਾਰੇ. ਅਡ੍ਢਨਵਧਮ੍ਮਸਤਾਨੀਤਿ ਪਠਮਂ ਵੁਤ੍ਤੇਸੁ ਚਤੂਸੁ ਸਚ੍ਚੇਸੁ ਸਟ੍ਠਿ, ਚਤੂਸੁ ਸਤਿਪਟ੍ਠਾਨੇਸੁ ਸਟ੍ਠਿ, ਚਤੂਸੁ ਸਮ੍ਮਪ੍ਪਧਾਨੇਸੁ ਸਟ੍ਠਿ, ਸਤ੍ਤਬੋਧਿਸਤ੍ਤਵੇਯ੍ਯਾਕਰਣੇਸੁ ਸਤ੍ਤਤਿ, ਅਭਿਞ੍ਞਟ੍ਠਾਦੀਸੁ ਪਞ੍ਚਸੁ ਪਞ੍ਚਵੀਸਸਤਂ, ਖਨ੍ਧਟ੍ਠਾਦੀਸੁ ਪਞ੍ਚਸੁ ਪਞ੍ਚਵੀਸਸਤਂ, ਪੁਨ ਚਤੂਸੁ ਅਰਿਯਸਚ੍ਚੇਸੁ ਸਤਂ, ਚਤੂਸੁ ਪਟਿਸਮ੍ਭਿਦਾਸੁ ਸਤਂ, ਛਸੁ ਬੁਦ੍ਧਧਮ੍ਮੇਸੁ ਦਿਯਡ੍ਢਸਤਨ੍ਤਿ ਏਵਂ ਅਟ੍ਠਸਤਾਨਿ ਚ ਪਞ੍ਞਾਸਞ੍ਚ ਧਮ੍ਮਾ ਹੋਨ੍ਤਿ. ਏਵਂ ਅਤ੍ਥਾਪਿ ਤਤ੍ਤਕਾ ਏਵ ਹੋਨ੍ਤਿ. ਏਵਮੇਵ ਸਚ੍ਚਾਦੀਸੁ ਤੀਸੁ ਠਾਨੇਸੁ ਵੀਸਸਤਂ ਨਿਰੁਤ੍ਤਿਯੋ, ਸਤ੍ਤਸੁ ਵੇਯ੍ਯਾਕਰਣੇਸੁ ਚਤ੍ਤਾਰੀਸਸਤਂ ਨਿਰੁਤ੍ਤਿਯੋ, ਅਭਿਞ੍ਞਟ੍ਠਾਦੀਸੁ ਖਨ੍ਧਟ੍ਠਾਦੀਸੁ ਚ ਅਡ੍ਢਤੇਯ੍ਯਾਨਿ ਅਡ੍ਢਤੇਯ੍ਯਾਨਿ ਨਿਰੁਤ੍ਤਿਸਤਾਨਿ, ਅਰਿਯਸਚ੍ਚੇਸੁ ਪਟਿਸਮ੍ਭਿਦਾਸੁ ਚ ਦ੍ਵੇ ਦ੍ਵੇ ਨਿਰੁਤ੍ਤਿਸਤਾਨਿ, ਬੁਦ੍ਧਧਮ੍ਮੇਸੁ ਤੀਣਿ ਨਿਰੁਤ੍ਤਿਸਤਾਨੀਤਿ ਏਵਂ ਨਿਰੁਤ੍ਤਿਸਹਸ੍ਸਞ੍ਚ ਸਤ੍ਤਨਿਰੁਤ੍ਤਿਸਤਾਨਿ ਚ ਹੋਨ੍ਤਿ. ਏਵਮੇਵ ਸਚ੍ਚਾਦੀਸੁ ਤੀਸੁ ਠਾਨੇਸੁ ਚਤ੍ਤਾਰੀਸਾਧਿਕਾਨਿ ਦ੍ਵੇ ਦ੍ਵੇ ਞਾਣਸਤਾਨਿ, ਸਤ੍ਤਸੁ ਵੇਯ੍ਯਾਕਰਣੇਸੁ ਅਸੀਤਿਅਧਿਕਾਨਿ ਦ੍ਵੇ ਞਾਣਸਤਾਨਿ, ਅਭਿਞ੍ਞਟ੍ਠਾਦੀਸੁ ਖਨ੍ਧਟ੍ਠਾਦੀਸੁ ਚ ਪਞ੍ਚਪਞ੍ਚਞਾਣਸਤਾਨਿ, ਸਚ੍ਚੇਸੁ ਪਟਿਸਮ੍ਭਿਦਾਸੁ ਚ ਚਤ੍ਤਾਰਿ ਚਤ੍ਤਾਰਿ ਞਾਣਸਤਾਨਿ, ਬੁਦ੍ਧਧਮ੍ਮੇਸੁ ਛ ਞਾਣਸਤਾਨੀਤਿ ਏਵਂ ਤੀਣਿ ਚ ਞਾਣਸਹਸ੍ਸਾਨਿ ਚਤ੍ਤਾਰਿ ਚ ਞਾਣਸਤਾਨਿ ਹੋਨ੍ਤੀਤਿ.

ਪਟਿਸਮ੍ਭਿਦਾਕਥਾਵਣ੍ਣਨਾ ਨਿਟ੍ਠਿਤਾ.