੨੦. ਵਿਪ੍ਪਯੁਤ੍ਤਪਚ੍ਚਯਨਿਦ੍ਦੇਸਵਣ੍ਣਨਾ
੨੦. ਵਿਪ੍ਪਯੁਤ੍ਤਪਚ੍ਚਯਨਿਦ੍ਦੇਸੇ ਰੂਪਿਨੋ ਧਮ੍ਮਾ ਅਰੂਪੀਨਨ੍ਤਿ ਇਦਂ ਤਾਵ ਹਦਯਵਤ੍ਥੁਨੋ ਚੇਵ ਚਕ੍ਖੁਨ੍ਦ੍ਰਿਯਾਦੀਨਞ੍ਚ ਵਸੇਨ ਵੇਦਿਤਬ੍ਬਂ. ਰੂਪਧਮ੍ਮੇਸੁ ਹਿ ਏਤੇਯੇਵ ਛ ਕੋਟ੍ਠਾਸਾ ਅਰੂਪਕ੍ਖਨ੍ਧਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯਾ ਹੋਨ੍ਤਿ. ਰੂਪਾਯਤਨਾਦਯੋ ਪਨ ਆਰਮ੍ਮਣਧਮ੍ਮਾ ਕਿਞ੍ਚਾਪਿ ਵਿਪ੍ਪਯੁਤ੍ਤਧਮ੍ਮਾ, ਵਿਪ੍ਪਯੁਤ੍ਤਪਚ੍ਚਯਾ ਪਨ ਨ ਹੋਨ੍ਤਿ. ਕਿਂ ਕਾਰਣਾ? ਸਮ੍ਪਯੋਗਾਸਙ੍ਕਾਯ ਅਭਾਵਤੋ. ਅਰੂਪਿਨੋ ਹਿ ਖਨ੍ਧਾ ਚਕ੍ਖਾਦੀਨਂ ਵਤ੍ਥੂਨਂ ਅਬ੍ਭਨ੍ਤਰਤੋ ਨਿਕ੍ਖਮਨ੍ਤਾ ਵਿਯ ਉਪ੍ਪਜ੍ਜਨ੍ਤਿ. ਤਤ੍ਥ ਆਸਙ੍ਕਾ ਹੋਤਿ – ‘‘ਕਿਂ ਨੁ ਖੋ ਏਤੇ ਏਤੇਹਿ ਸਮ੍ਪਯੁਤ੍ਤਾ, ਉਦਾਹੁ ਵਿਪ੍ਪਯੁਤ੍ਤਾ’’ਤਿ. ਆਰਮ੍ਮਣਧਮ੍ਮਾ ਪਨ ਵਤ੍ਥੁਨਿਸ੍ਸਯੇਨ ਉਪ੍ਪਜ੍ਜਮਾਨਾਨਂ ਆਰਮ੍ਮਣਮਤ੍ਤਾ ਹੋਨ੍ਤੀਤਿ ਨਤ੍ਥਿ ਤੇਸੁ ਸਮ੍ਪਯੋਗਾਸਙ੍ਕਾ. ਇਤਿ ਸਮ੍ਪਯੋਗਾਸਙ੍ਕਾਯ ਅਭਾਵਤੋ ਨ ਤੇ ਵਿਪ੍ਪਯੁਤ੍ਤਪਚ੍ਚਯਾ. ਹਦਯਵਤ੍ਥੁਆਦੀਸੁ ਏਵ ਪਨਾਯਂ ਵਿਪ੍ਪਯੁਤ੍ਤਪਚ੍ਚਯਤਾ ਵੇਦਿਤਬ੍ਬਾ. ਵੁਤ੍ਤਮ੍ਪਿ ਚੇਤਂ ਪਞ੍ਹਾਵਾਰੇ – ਵਤ੍ਥੁ ਕੁਸਲਾਨਂ ਖਨ੍ਧਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਵਤ੍ਥੁ ਅਕੁਸਲਾਨਂ ਖਨ੍ਧਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਸ੍ਸ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਸੋਤ… ਘਾਨ… ਜਿਵ੍ਹਾ… ਕਾਯਾਯਤਨਂ ਕਾਯਵਿਞ੍ਞਾਣਸ੍ਸ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਵਤ੍ਥੁ ਵਿਪਾਕਾਬ੍ਯਾਕਤਾਨਂ ਕਿਰਿਯਾਬ੍ਯਾਕਤਾਨਂ ਖਨ੍ਧਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋਤਿ.
ਅਰੂਪਿਨੋ ਧਮ੍ਮਾ ਰੂਪੀਨਨ੍ਤਿ ਇਦਂ ਪਨ ਚਤੁਨ੍ਨਂ ਖਨ੍ਧਾਨਂ ਵਸੇਨ ਵੇਦਿਤਬ੍ਬਂ. ਅਰੂਪਧਮ੍ਮੇਸੁ ਹਿ ਚਤ੍ਤਾਰੋ ਖਨ੍ਧਾਵ ਸਹਜਾਤਪੁਰੇਜਾਤਾਨਂ ਰੂਪਧਮ੍ਮਾਨਂ ਵਿਪ੍ਪਯੁਤ੍ਤਪਚ੍ਚਯਾ ਹੋਨ੍ਤਿ, ਨਿਬ੍ਬਾਨਂ ਪਨ ਅਰੂਪਮ੍ਪਿ ਸਮਾਨਂ ਰੂਪਸ੍ਸ ਵਿਪ੍ਪਯੁਤ੍ਤਪਚ੍ਚਯੋ ਨ ਹੋਤਿ. ‘‘ਚਤੂਹਿ ਸਮ੍ਪਯੋਗੋ ਚਤੂਹਿ ਵਿਪ੍ਪਯੋਗੋ’’ਤਿ ਹਿ ਵੁਤ੍ਤਂ. ਇਤਿ ਚਤੁਨ੍ਨਂ ਅਰੂਪਕ੍ਖਨ੍ਧਾਨਂਯੇਵ ਵਿਪ੍ਪਯੁਤ੍ਤਪਚ੍ਚਯਤਾ ਵੇਦਿਤਬ੍ਬਾ. ਵੁਤ੍ਤਮ੍ਪਿ ਚੇਤਂ ਪਞ੍ਹਾਵਾਰੇ – ਸਹਜਾਤਾ ਕੁਸਲਾ ਖਨ੍ਧਾ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਪਚ੍ਛਾਜਾਤਾ ਕੁਸਲਾ ਖਨ੍ਧਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਾ ਖਨ੍ਧਾ ਕਟਤ੍ਤਾਰੂਪਾਨਂ ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ, ਖਨ੍ਧਾ ਵਤ੍ਥੁਸ੍ਸਾਤਿ. ਏਵਂ ਤਾਵੇਤ੍ਥ ਪਾਲ਼ਿਵਣ੍ਣਨਾ ਵੇਦਿਤਬ੍ਬਾ.
ਅਯਂ ਪਨ ਵਿਪ੍ਪਯੁਤ੍ਤਪਚ੍ਚਯੋ ਨਾਮ ਸਙ੍ਖੇਪਤੋ ਪਞ੍ਚਵੋਕਾਰਭਵੇ ਵਤ੍ਤਮਾਨਾ ਰੂਪਾਰੂਪਧਮ੍ਮਾ. ਤੇਸੁ ਰੂਪਂ ਵਤ੍ਥੁਨੋ ਚਕ੍ਖਾਦੀਨਞ੍ਚ ਵਸੇਨ ਛਧਾ ਭਿਨ੍ਨਂ, ਅਰੂਪਂ ਪਞ੍ਚਵੋਕਾਰਭਵੇ ਉਪ੍ਪਨ੍ਨਕੁਸਲਾਕੁਸਲਵਿਪਾਕਕਿਰਿਯਵਸੇਨ ਚਤੁਧਾ ਭਿਨ੍ਨਂ. ਤਸ੍ਸ ਭੂਮਿਤੋ ਕਾਮਾਵਚਰਾਦਿਵਸੇਨ ਚਤੁਧਾ, ਏਕਧਾ, ਤਿਧਾ, ਤਿਧਾਤਿ ਏਕਦਸਧਾ ਭੇਦੋ ਹੋਤਿ. ਆਰੁਪ੍ਪਵਿਪਾਕਞ੍ਹਿ ਵਿਪ੍ਪਯੁਤ੍ਤਪਚ੍ਚਯੋ ਨ ਹੋਤੀਤਿ ਏਵਮੇਤ੍ਥ ਨਾਨਪ੍ਪਕਾਰਭੇਦਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.
ਏਵਂ ਭਿਨ੍ਨੇ ਪਨੇਤ੍ਥ ਪਞ੍ਚਵੋਕਾਰਭਵੇ ਉਪ੍ਪਨ੍ਨਂ ਚਤੁਭੂਮਕਮ੍ਪਿ ਕੁਸਲਂ ਅਕੁਸਲਞ੍ਚ ਅਤ੍ਤਨਾ ਸਮੁਟ੍ਠਾਪਿਤਚਿਤ੍ਤਸਮੁਟ੍ਠਾਨਰੂਪਸ੍ਸ ਸਹਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ ਹੋਤਿ. ਉਪ੍ਪਾਦਕ੍ਖਣਂ ਪਨ ਅਤਿਕ੍ਕਮਿਤ੍ਵਾ ਠਿਤਿਕ੍ਖਣਂ ਪਤ੍ਤਸ੍ਸ ਪੁਰੇਜਾਤਸ੍ਸ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਰੂਪਕਾਯਸ੍ਸ ਪਚ੍ਛਾਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ ਹੋਤਿ. ਏਤ੍ਥ ਚ ਤਿਸਮੁਟ੍ਠਾਨਿਕਕਾਯੋਤਿ ਆਹਾਰਸਮੁਟ੍ਠਾਨਸ੍ਸ ਅਭਾਵਤੋ ਬ੍ਰਹ੍ਮਪਾਰਿਸਜ੍ਜਾਦੀਨਂ ਕਾਯੋ ਵੇਦਿਤਬ੍ਬੋ. ਕਾਮਾਵਚਰਰੂਪਾਵਚਰਵਿਪਾਕਂ ਪਨ ਪਵਤ੍ਤੇ ਚਿਤ੍ਤਸਮੁਟ੍ਠਾਨਰੂਪਸ੍ਸ, ਪਟਿਸਨ੍ਧਿਯਂ ਕਟਤ੍ਤਾਰੂਪਸ੍ਸ ਚ ਸਹਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ ਹੋਤਿ. ਲੋਕੁਤ੍ਤਰਵਿਪਾਕਂ ਚਿਤ੍ਤਸਮੁਟ੍ਠਾਨਰੂਪਸ੍ਸੇਵ. ਤਿਵਿਧਮ੍ਪਿ ਪਨੇਤਂ ਪੁਰੇਜਾਤਸ੍ਸ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਤੇਭੂਮਕਮ੍ਪਿ ਕਿਰਿਯਂ ਚਿਤ੍ਤਸਮੁਟ੍ਠਾਨਸ੍ਸ ਸਹਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ, ਪੁਰੇਜਾਤਸ੍ਸ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਛਧਾ ਠਿਤੇਸੁ ਪਨ ਰੂਪੇਸੁ ਵਤ੍ਥੁਰੂਪਂ ਪਟਿਸਨ੍ਧਿਕ੍ਖਣੇ ਕਾਮਾਵਚਰਰੂਪਾਵਚਰਵਿਪਾਕਾਨਂ ਸਹਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ, ਪਵਤ੍ਤੇ ਉਪ੍ਪਜ੍ਜਮਾਨਾਨਂ ਚਤੁਭੂਮਕਕੁਸਲਾਨਂ ਅਕੁਸਲਾਨਂ ਦ੍ਵਿਪਞ੍ਚਵਿਞ੍ਞਾਣਵਜ੍ਜਾਨਂ ਤੇਭੂਮਕਵਿਪਾਕਾਨਂ ਤੇਭੂਮਕਕਿਰਿਯਾਨਞ੍ਚ ਪੁਰੇਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ. ਚਕ੍ਖਾਯਤਨਾਦੀਨਿ ਚਕ੍ਖੁਵਿਞ੍ਞਾਣਾਦੀਨਂ ਪੁਰੇਜਾਤਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋਤਿ ਏਵਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋਤਿ.
ਵਿਪ੍ਪਯੁਤ੍ਤਪਚ੍ਚਯਨਿਦ੍ਦੇਸਵਣ੍ਣਨਾ.