੨੧. ਅਤ੍ਥਿਪਚ੍ਚਯਨਿਦ੍ਦੇਸਵਣ੍ਣਨਾ

੨੧. ਅਤ੍ਥਿਪਚ੍ਚਯਨਿਦ੍ਦੇਸੇ ਚਤ੍ਤਾਰੋ ਖਨ੍ਧਾਤਿਆਦੀਹਿ ਸਹਜਾਤਵਸੇਨ ਅਤ੍ਥਿਪਚ੍ਚਯੋ ਨਿਦ੍ਦਿਟ੍ਠੋ. ਚਕ੍ਖਾਯਤਨਨ੍ਤਿਆਦੀਹਿ ਪੁਰੇਜਾਤਵਸੇਨ. ਯਂ ਰੂਪਂ ਨਿਸ੍ਸਾਯਾਤਿ ਏਤ੍ਥ ਸਹਜਾਤਪੁਰੇਜਾਤਵਸੇਨ ਅਤ੍ਥਿਪਚ੍ਚਯੋ ਨਿਦ੍ਦਿਟ੍ਠੋ. ਏਵਮਯਂ ਪਾਲ਼ਿ ਸਹਜਾਤਪੁਰੇਜਾਤਾਨਞ੍ਞੇਵ ਅਤ੍ਥਿਪਚ੍ਚਯਾਨਂ ਵਸੇਨ ਆਗਤਾ. ਪਞ੍ਹਾਵਾਰੇ ਪਨ ਸਹਜਾਤਂ, ਪੁਰੇਜਾਤਂ, ਪਚ੍ਛਾਜਾਤਂ, ਆਹਾਰਂ, ਇਨ੍ਦ੍ਰਿਯਨ੍ਤਿ ਇਮੇਸਂ ਵਸੇਨ ਆਗਤਤ੍ਤਾ ਪਚ੍ਛਾਜਾਤਆਹਾਰਿਨ੍ਦ੍ਰਿਯਵਸੇਨਾਪਿ ਅਤ੍ਥਿਪਚ੍ਚਯੋ ਲਬ੍ਭਤਿ. ਇਧ ਪਨ ਸਾਵਸੇਸਵਸੇਨ ਦੇਸਨਾ ਕਤਾਤਿ ਅਯਂ ਤਾਵੇਤ੍ਥ ਪਾਲ਼ਿਵਣ੍ਣਨਾ.

ਅਯਂ ਪਨ ਅਤ੍ਥਿਪਚ੍ਚਯੋ ਨਾਮ ਦੁਵਿਧੋ – ਅਞ੍ਞਮਞ੍ਞਤੋ, ਨ ਅਞ੍ਞਮਞ੍ਞਤੋ. ਤਤ੍ਥ ਅਞ੍ਞਮਞ੍ਞਂ ਤਿਵਿਧਂ – ਅਰੂਪਂ ਅਰੂਪੇਨ, ਰੂਪਂ ਰੂਪੇਨ, ਰੂਪਾਰੂਪਂ ਰੂਪਾਰੂਪੇਨ. ‘‘ਚਤ੍ਤਾਰੋ ਖਨ੍ਧਾ ਅਰੂਪਿਨੋ’’ਤਿ ਏਤ੍ਥ ਹਿ ਸਬ੍ਬਚਿਤ੍ਤੁਪ੍ਪਤ੍ਤਿਵਸੇਨ ਅਰੂਪਂ ਅਰੂਪੇਨ ਵੁਤ੍ਤਂ. ‘‘ਚਤ੍ਤਾਰੋ ਮਹਾਭੂਤਾ’’ਤਿ ਏਤ੍ਥ ਸਬ੍ਬਸਨ੍ਤਤਿਵਸੇਨ ਰੂਪਂ ਰੂਪੇਨ. ‘‘ਓਕ੍ਕਨ੍ਤਿਕ੍ਖਣੇ ਨਾਮਰੂਪ’’ਨ੍ਤਿ ਏਤ੍ਥ ਪਟਿਸਨ੍ਧਿਖਨ੍ਧਾਨਞ੍ਚੇਵ ਵਤ੍ਥੁਨੋ ਚ ਵਸੇਨ ਰੂਪਾਰੂਪਂ ਰੂਪਾਰੂਪੇਨ ਵੁਤ੍ਤਂ. ਨ ਅਞ੍ਞਮਞ੍ਞਮ੍ਪਿ ਤਿਵਿਧਂ – ‘‘ਅਰੂਪਂ ਰੂਪਸ੍ਸ, ਰੂਪਂ ਰੂਪਸ੍ਸ, ਰੂਪਂ ਅਰੂਪਸ੍ਸ ਚਿਤ੍ਤਚੇਤਸਿਕਾ ਧਮ੍ਮਾ’’ਤਿ ਏਤ੍ਥ ਹਿ ਪਞ੍ਚਵੋਕਾਰਵਸੇਨ ਅਰੂਪਂ ਰੂਪਸ੍ਸ ਵੁਤ੍ਤਂ. ‘‘ਮਹਾਭੂਤਾ ਉਪਾਦਾਰੂਪਾਨ’’ਨ੍ਤਿ ਏਤ੍ਥ ਸਬ੍ਬਸਨ੍ਤਤਿਵਸੇਨ ਰੂਪਂ ਰੂਪਸ੍ਸ. ‘‘ਚਕ੍ਖਾਯਤਨਂ ਚਕ੍ਖੁਵਿਞ੍ਞਾਣਧਾਤੁਯਾ’’ਤਿਆਦੀਸੁ ਵਤ੍ਥਾਰਮ੍ਮਣਵਸੇਨ ਰੂਪਂ ਅਰੂਪਸ੍ਸ ਅਤ੍ਥਿਪਚ੍ਚਯੋਤਿ ਵੁਤ੍ਤਂ.

ਅਪਿਚੇਸ ਅਤ੍ਥਿਪਚ੍ਚਯੋ ਨਾਮ ਸਙ੍ਖੇਪਤੋ ਖਣਤ੍ਤਯਪ੍ਪਤ੍ਤਂ ਨਾਮਞ੍ਚੇਵ ਰੂਪਞ੍ਚ, ਵਤ੍ਤਮਾਨਾ ਪਞ੍ਚਕ੍ਖਨ੍ਧਾਤਿਪਿ ਵਤ੍ਤੁਂ ਵਟ੍ਟਤਿ. ਸੋ ਜਾਤਿਭੇਦਤੋ ਕੁਸਲਾਕੁਸਲਵਿਪਾਕਕਿਰਿਯਰੂਪਵਸੇਨ ਪਞ੍ਚਧਾ ਭਿਜ੍ਜਤਿ. ਤਤ੍ਥ ਕੁਸਲੋ ਸਹਜਾਤਪਚ੍ਛਾਜਾਤਵਸੇਨ ਦੁਵਿਧੋ ਹੋਤਿ, ਤਥਾ ਅਕੁਸਲੋ ਵਿਪਾਕਕਿਰਿਯਸਙ੍ਖਾਤੋ ਚ. ਤੇਸੁ ਕੁਸਲੋ ਕਾਮਾਵਚਰਾਦਿਭੇਦੇਨ ਚਤੁਧਾ ਭਿਜ੍ਜਤਿ, ਅਕੁਸਲੋ ਕਾਮਾਵਚਰੋਵ ਵਿਪਾਕੋ ਚਤੁਭੂਮਕੋ, ਕਿਰਿਯਾਸਙ੍ਖਾਤੋ ਤਿਭੂਮਕੋ. ਰੂਪਸਙ੍ਖਾਤੋ ਅਤ੍ਥਿਪਚ੍ਚਯੋ ਕਾਮਾਵਚਰੋਵ. ਸੋ ਪਨ ਸਹਜਾਤਪੁਰੇਜਾਤਵਸੇਨ ਦੁਵਿਧੋ. ਤਤ੍ਥ ਪਞ੍ਚ ਵਤ੍ਥੂਨਿ ਆਰਮ੍ਮਣਾਨਿ ਚ ਪੁਰੇਜਾਤਾਨੇਵ, ਹਦਯਵਤ੍ਥੁ ਸਹਜਾਤਂ ਵਾ ਹੋਤਿ ਪੁਰੇਜਾਤਂ ਵਾ. ਪਞ੍ਹਾਵਾਰੇ ਪਨ ਆਗਤੋ ਆਹਾਰੋ ਇਨ੍ਦ੍ਰਿਯਞ੍ਚ ਸਹਜਾਤਾਦਿਭੇਦਂ ਨ ਲਭਤੀਤਿ ਏਵਮੇਤ੍ਥ ਨਾਨਪ੍ਪਕਾਰਭੇਦਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.

ਏਵਂ ਭਿਨ੍ਨੇ ਪਨੇਤ੍ਥ ਚਤੁਭੂਮਕਕੁਸਲੋਪਿ ਸਹਜਾਤੋ ਅਤ੍ਥਿਪਚ੍ਚਯੋ ਪਞ੍ਚਵੋਕਾਰੇ ‘‘ਏਕੋ ਖਨ੍ਧੋ ਤਿਣ੍ਣਨ੍ਨਂ ਖਨ੍ਧਾਨ’’ਨ੍ਤਿਆਦਿਨਾ ਨਯੇਨ ਅਞ੍ਞਮਞ੍ਞਂ ਖਨ੍ਧਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਠਪੇਤ੍ਵਾ ਪਨ ਰੂਪਾਵਚਰਕੁਸਲਂ ਅਵਸੇਸੋ ਆਰੁਪ੍ਪੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇਵ ਸਹਜਾਤਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ. ਚਤੁਭੂਮਕੋ ਪਨੇਸ ਪਞ੍ਚਵੋਕਾਰੇ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤੋ ਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ. ਅਕੁਸਲੇਪਿ ਏਸੇਵ ਨਯੋ. ਸੋਪਿ ਹਿ ਪਞ੍ਚਵੋਕਾਰੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ, ਚਤੁਵੋਕਾਰੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇਵ ਸਹਜਾਤਾਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ. ਪਞ੍ਚਵੋਕਾਰੇ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਾਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ.

ਵਿਪਾਕਤੋ ਪਨ ਕਾਮਾਵਚਰਰੂਪਾਵਚਰੋ ਅਤ੍ਥਿਪਚ੍ਚਯੋ ਨਿਯਮੇਨੇਵ ਪਟਿਸਨ੍ਧਿਕ੍ਖਣੇ ਖਨ੍ਧਾਨਞ੍ਚੇਵ ਕਟਤ੍ਤਾਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ. ਪਵਤ੍ਤੇ ਪਨ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਠਿਤਿਪ੍ਪਤ੍ਤਸ੍ਸ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿਪਚ੍ਚਯੇਨ ਪਚ੍ਚਯੋ. ਅਰੂਪਾਵਚਰਵਿਪਾਕੋ ਪਨ ਆਰੁਪ੍ਪੇ ਉਪ੍ਪਨ੍ਨਲੋਕੁਤ੍ਤਰਵਿਪਾਕੋ ਚ ਅਤ੍ਤਨਾ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇਵ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ. ਪਞ੍ਚਵੋਕਾਰੇ ਲੋਕੁਤ੍ਤਰਵਿਪਾਕੋ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿਪਚ੍ਚਯੇਨ ਪਚ੍ਚਯੋ. ਕਿਰਿਯਤੋ ਰੂਪਾਵਚਰੋ ਅਤ੍ਥਿਪਚ੍ਚਯੋ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿਪਚ੍ਚਯੇਨ ਪਚ੍ਚਯੋ. ਕਾਮਾਵਚਰਾਰੂਪਾਵਚਰੋ ਪਨ ਆਰੁਪ੍ਪੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇਵ, ਪਞ੍ਚਵੋਕਾਰੇ ਚਿਤ੍ਤਸਮੁਟ੍ਠਾਨਰੂਪਸ੍ਸਾਪਿ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿ ਪਚ੍ਚਯੇਨ ਪਚ੍ਚਯੋ.

ਰੂਪਸਙ੍ਖਾਤੋ ਪਨ ਅਤ੍ਥਿਪਚ੍ਚਯੋ ਸਹਜਾਤੋ, ਪੁਰੇਜਾਤੋ, ਆਹਾਰੋ, ਇਨ੍ਦ੍ਰਿਯਨ੍ਤਿ ਚਤੁਬ੍ਬਿਧੋ. ਤਤ੍ਥ ਸਹਜਾਤਰੂਪਤ੍ਥਿਪਚ੍ਚਯੋ ਚਤੁਸਮੁਟ੍ਠਾਨਵਸੇਨ ਚਤੁਧਾ ਠਿਤੋ. ਤਤ੍ਥ ਕਮ੍ਮਸਮੁਟ੍ਠਾਨੋ ਏਕਂ ਮਹਾਭੂਤਂ ਤਿਣ੍ਣਨ੍ਨਂ ਮਹਾਭੂਤਾਨਂ, ਤੀਣਿ ਏਕਸ੍ਸ, ਦ੍ਵੇ ਦ੍ਵਿਨ੍ਨਂ, ਮਹਾਭੂਤਾ ਉਪਾਦਾਰੂਪਾਨਨ੍ਤਿ ਏਵਂ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ. ਪਟਿਸਨ੍ਧਿਕ੍ਖਣੇ ਵਤ੍ਥੁਰੂਪਂ ਕਾਮਾਵਚਰਰੂਪਾਵਚਰਵਿਪਾਕਕ੍ਖਨ੍ਧਾਨਂ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ. ਤੇਸਮ੍ਪਿ ਤਿਸਮੁਟ੍ਠਾਨਿਕਰੂਪਂ ਏਕਂ ਮਹਾਭੂਤਂ ਤਿਣ੍ਣਨ੍ਨਂ ਮਹਾਭੂਤਾਨਂ, ਤੀਣਿ ਏਕਸ੍ਸ, ਦ੍ਵੇ ਦ੍ਵਿਨ੍ਨਂ, ਮਹਾਭੂਤਾ ਉਪਾਦਾਰੂਪਾਨਨ੍ਤਿ ਏਵਂ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ. ਪੁਰੇਜਾਤਤ੍ਥਿਪਚ੍ਚਯੋ ਪਨ ਵਤ੍ਥੁਪੁਰੇਜਾਤਆਰਮ੍ਮਣਪੁਰੇਜਾਤਵਸੇਨ ਦੁਵਿਧੋ ਹੋਤਿ. ਸੋ ਦੁਵਿਧੋਪਿ ਹੇਟ੍ਠਾ ਪੁਰੇਜਾਤਪਚ੍ਚਯੇ ਵੁਤ੍ਤਨਯੇਨੇਵ ਯੋਜੇਤ੍ਵਾ ਗਹੇਤਬ੍ਬੋ. ਆਹਾਰਤ੍ਥਿਪਚ੍ਚਯੋਪਿ ਹੇਟ੍ਠਾ ਕਬਲ਼ੀਕਾਰਾਹਾਰਪਚ੍ਚਯੇ ਯੋਜਿਤਨਯੇਨੇਵ ਯੋਜੇਤਬ੍ਬੋ. ਇਧ ਪਨੇਸ ਅਤ੍ਤਨੋ ਅਨਿਰੁਦ੍ਧਕ੍ਖਣੇ ਪਚ੍ਚਯਭਾਵੇਨ ਅਤ੍ਥਿਪਚ੍ਚਯੋਤਿ ਵੁਤ੍ਤੋ. ਰੂਪਜੀਵਿਤਿਨ੍ਦ੍ਰਿਯਮ੍ਪਿ ਹੇਟ੍ਠਾ ਇਨ੍ਦ੍ਰਿਯਪਚ੍ਚਯੇ ਰੂਪਜੀਵਿਤਿਨ੍ਦ੍ਰਿਯਯੋਜਨਾਯਂ ਵੁਤ੍ਤਨਯੇਨੇਵ ਯੋਜੇਤਬ੍ਬਂ. ਇਧ ਪਨੇਤਮ੍ਪਿ ਅਤ੍ਤਨੋ ਅਨਿਰੁਦ੍ਧਕ੍ਖਣੇਯੇਵ ਪਚ੍ਚਯਭਾਵੇਨ ਅਤ੍ਥਿਪਚ੍ਚਯੋਤਿ ਵੁਤ੍ਤਨ੍ਤਿ ਏਵਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋਤਿ.

ਅਤ੍ਥਿਪਚ੍ਚਯਨਿਦ੍ਦੇਸਵਣ੍ਣਨਾ.