੧੪. ਵਿਪਾਕਪਚ੍ਚਯਨਿਦ੍ਦੇਸਵਣ੍ਣਨਾ

੧੪. ਵਿਪਾਕਪਚ੍ਚਯਨਿਦ੍ਦੇਸੇ ਵਿਪਾਕਾ ਚਤ੍ਤਾਰੋ ਖਨ੍ਧਾਤਿ ਯਸ੍ਮਾ ਕਮ੍ਮਸਮੁਟ੍ਠਾਨਾਪਿ ਰੂਪਾ ਵਿਪਾਕਾ ਨ ਹੋਨ੍ਤਿ, ਤਸ੍ਮਾ ‘‘ਵਿਪਾਕਾ’’ਤਿ ਵਤ੍ਵਾ ‘‘ਚਤ੍ਤਾਰੋ ਖਨ੍ਧਾ’’ਤਿ ਵੁਤ੍ਤਂ. ਏਵਂ ਅਯਂ ਪਾਲ਼ਿ ਅਰੂਪਧਮ੍ਮਾਨਞ੍ਞੇਵ ਵਿਪਾਕਪਚ੍ਚਯਵਸੇਨ ਆਗਤਾ. ਪਞ੍ਹਾਵਾਰੇ ਪਨ ‘‘ਵਿਪਾਕਾਬ੍ਯਾਕਤੋ ਏਕੋ ਖਨ੍ਧੋ ਤਿਣ੍ਣਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਵਿਪਾਕਪਚ੍ਚਯੇਨ ਪਚ੍ਚਯੋ. ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤੋ ਏਕੋ ਖਨ੍ਧੋ ਤਿਣ੍ਣਨ੍ਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਵਿਪਾਕਪਚ੍ਚਯੇਨ ਪਚ੍ਚਯੋ’’ਤਿ ਆਗਤਤ੍ਤਾ ਚਿਤ੍ਤਸਮੁਟ੍ਠਾਨਕਮ੍ਮਸਮੁਟ੍ਠਾਨਰੂਪਾਨਮ੍ਪਿ ਵਿਪਾਕਪਚ੍ਚਯੋ ਲਬ੍ਭਤਿ. ਇਧ ਪਨ ਸਾਵਸੇਸਵਸੇਨ ਦੇਸਨਾ ਕਤਾਤਿ ਅਯਂ ਤਾਵੇਤ੍ਥ ਪਾਲ਼ਿਵਣ੍ਣਨਾ. ਅਯਂ ਪਨ ਵਿਪਾਕਪਚ੍ਚਯੋ ਵਿਪਾਕਭਾਵੇਨ ਜਾਤਿਤੋ ਏਕਵਿਧੋ, ਭੂਮਿਭੇਦਤੋ ਕਾਮਾਵਚਰਾਦਿਵਸੇਨ ਚਤੁਧਾ ਭਿਜ੍ਜਤੀਤਿ ਏਵਮੇਤ੍ਥ ਨਾਨਪ੍ਪਕਾਰਭੇਦਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.

ਏਵਂ ਭਿਨ੍ਨੇ ਪਨੇਤ੍ਥ ਕਾਮਾਵਚਰਰੂਪਾਵਚਰਵਿਪਾਕੋ ਅਤ੍ਤਨਾ ਸਮ੍ਪਯੁਤ੍ਤਧਮ੍ਮਾਨਂ ਪਵਤ੍ਤੇ ਚਿਤ੍ਤਸਮੁਟ੍ਠਾਨਰੂਪਾਨਂ ਪਟਿਸਨ੍ਧਿਯਂ ਕਟਤ੍ਤਾਰੂਪਾਨਞ੍ਚ ਵਿਪਾਕਪਚ੍ਚਯੋ ਹੋਤਿ. ਅਰੂਪਾਵਚਰਵਿਪਾਕੋ ਸਮ੍ਪਯੁਤ੍ਤਧਮ੍ਮਾਨਞ੍ਞੇਵ. ਲੋਕੁਤ੍ਤਰਵਿਪਾਕੋ ਪਞ੍ਚਵੋਕਾਰੇ ਸਮ੍ਪਯੁਤ੍ਤਧਮ੍ਮਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ, ਚਤੁਵੋਕਾਰੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇਵ ਵਿਪਾਕਪਚ੍ਚਯੋ ਹੋਤੀਤਿ ਏਵਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋਤਿ.

ਵਿਪਾਕਪਚ੍ਚਯਨਿਦ੍ਦੇਸਵਣ੍ਣਨਾ.