੧੫. ਆਹਾਰਪਚ੍ਚਯਨਿਦ੍ਦੇਸਵਣ੍ਣਨਾ

੧੫. ਆਹਾਰਪਚ੍ਚਯਨਿਦ੍ਦੇਸੇ ਕਬਲ਼ੀਕਾਰੋ ਆਹਾਰੋਤਿ ਚਤੁਸਨ੍ਤਤਿਸਮੁਟ੍ਠਾਨੇ ਰੂਪੇ ਓਜਾ ਆਹਾਰੋ ਨਾਮ. ਸੋ ਪਨ ਯਸ੍ਮਾ ਕਬਲ਼ਂ ਕਰਿਤ੍ਵਾ ਅਜ੍ਝੋਹਰਿਤੋਵ ਆਹਾਰਕਿਚ੍ਚਂ ਕਰੋਤਿ, ਨ ਬਹਿ ਠਿਤੋ, ਤਸ੍ਮਾ ਆਹਾਰੋਤਿ ਅਵਤ੍ਵਾ ‘‘ਕਬਲ਼ੀਕਾਰੋ ਆਹਾਰੋ’’ਤਿ ਵੁਤ੍ਤਂ. ਕਬਲ਼ਂ ਕਰਿਤ੍ਵਾ ਅਜ੍ਝੋਹਰਿਤਬ੍ਬਵਤ੍ਥੁਕਤ੍ਤਾ ਵਾ ਕਬਲ਼ੀਕਾਰੋਤਿ ਨਾਮਮੇਤਂ ਤਸ੍ਸ. ਅਰੂਪਿਨੋ ਆਹਾਰਾਤਿ ਫਸ੍ਸਚੇਤਨਾਵਿਞ੍ਞਾਣਾਹਾਰਾ. ਤਂਸਮੁਟ੍ਠਾਨਾਨਨ੍ਤਿ ਇਧਾਪਿ ਕਮ੍ਮਸਮੁਟ੍ਠਾਨਾਨਿ ਗਹਿਤਾਨੇਵ. ਵੁਤ੍ਤਞ੍ਹੇਤਂ ਪਞ੍ਹਾਵਾਰੇ – ਪਟਿਸਨ੍ਧਿਕ੍ਖਣੇ ਵਿਪਾਕਾਬ੍ਯਾਕਤਾ ਆਹਾਰਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਆਹਾਰਪਚ੍ਚਯੇਨ ਪਚ੍ਚਯੋਤਿ. ਅਯਂ ਤਾਵੇਤ੍ਥ ਪਾਲ਼ਿਵਣ੍ਣਨਾ.

ਅਯਂ ਪਨ ਆਹਾਰਪਚ੍ਚਯੋ ਸਙ੍ਖੇਪਤੋ ਕਬਲ਼ੀਕਾਰੋ ਆਹਾਰੋ, ਫਸ੍ਸੋ, ਚੇਤਨਾ, ਵਿਞ੍ਞਾਣਨ੍ਤਿ ਚਤ੍ਤਾਰੋਵ ਧਮ੍ਮਾ ਹੋਨ੍ਤਿ. ਤਤ੍ਥ ਠਪੇਤ੍ਵਾ ਕਬਲ਼ੀਕਾਰਾਹਾਰਂ ਸੇਸਾ ਤਯੋ ਅਰੂਪਾਹਾਰਾ ਜਾਤਿਵਸੇਨ ਕੁਸਲਾਕੁਸਲਵਿਪਾਕਕਿਰਿਯਭੇਦਤੋ ਚਤੁਧਾ ਭਿਜ੍ਜਨ੍ਤਿ. ਪੁਨ ਭੂਮਿਭੇਦੇਨ ਕੁਸਲੋ ਚਤੁਧਾ, ਅਕੁਸਲੋ ਏਕਧਾ, ਵਿਪਾਕੋ ਚਤੁਧਾ, ਕਿਰਿਯਾ ਤਿਧਾਤਿ ਏਵਂ ਅਨੇਕਧਾ ਭਿਜ੍ਜਨ੍ਤਿ. ਕਬਲ਼ੀਕਾਰਾਹਾਰੋ ਪਨ ਜਾਤਿਤੋ ਅਬ੍ਯਾਕਤੋ, ਭੂਮਿਤੋ ਕਾਮਾਵਚਰੋਵਾਤਿ ਏਵਮੇਤ੍ਥ ਨਾਨਪ੍ਪਕਾਰਭੇਦਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.

ਏਵਂ ਭਿਨ੍ਨੇ ਪਨੇਤ੍ਥ ਚਤੁਭੂਮਕਾਪਿ ਤਯੋ ਕੁਸਲਾਹਾਰਾ ਪਞ੍ਚਵੋਕਾਰੇ ਅਤ੍ਤਨਾ ਸਮ੍ਪਯੁਤ੍ਤਧਮ੍ਮਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਆਹਾਰਪਚ੍ਚਯੇਨ ਪਚ੍ਚਯੋ, ਠਪੇਤ੍ਵਾ ਪਨ ਰੂਪਾਵਚਰਂ ਅਵਸੇਸਾ ਆਰੁਪ੍ਪੇ ਸਮ੍ਪਯੁਤ੍ਤਧਮ੍ਮਾਨਞ੍ਞੇਵ ਆਹਾਰਪਚ੍ਚਯੇਨ ਪਚ੍ਚਯੋ. ਅਕੁਸਲਾਹਾਰੇਸੁਪਿ ਏਸੇਵ ਨਯੋ. ਚਤੁਭੂਮਕਵਿਪਾਕਾਹਾਰਾ ਪਨ ਸਬ੍ਬਤ੍ਥ ਸਮ੍ਪਯੁਤ੍ਤਕਾਨਂ ਆਹਾਰਪਚ੍ਚਯਾ ਹੋਨ੍ਤਿ. ਕਾਮਾਵਚਰਰੂਪਾਵਚਰਵਿਪਾਕਾ ਪਨੇਤ੍ਥ ਪਞ੍ਚਵੋਕਾਰੇ ਉਪ੍ਪਜ੍ਜਮਾਨਾ ਪਵਤ੍ਤੇ ਚਿਤ੍ਤਸਮੁਟ੍ਠਾਨਰੂਪਸ੍ਸ ਪਟਿਸਨ੍ਧਿਯਂ ਕਟਤ੍ਤਾਰੂਪਸ੍ਸਾਪਿ ਆਹਾਰਪਚ੍ਚਯਾ ਹੋਨ੍ਤਿ. ਲੋਕੁਤ੍ਤਰਾ ਪਨ ਚਿਤ੍ਤਸਮੁਟ੍ਠਾਨਰੂਪਸ੍ਸੇਵ, ਆਰੁਪ੍ਪੇ ਉਪ੍ਪਨ੍ਨਾ ਰੂਪਸ੍ਸ ਪਚ੍ਚਯਾ ਨ ਹੋਨ੍ਤਿ. ਤੇਭੂਮਕਾਪਿ ਤਯੋ ਕਿਰਿਯਾਹਾਰਾ ਪਞ੍ਚਵੋਕਾਰੇ ਸਮ੍ਪਯੁਤ੍ਤਧਮ੍ਮਾਨਞ੍ਚੇਵ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ, ਕਾਮਾਵਚਰਾਰੂਪਾਵਚਰਾ ਪਨ ਆਰੁਪ੍ਪੇ ਸਮ੍ਪਯੁਤ੍ਤਧਮ੍ਮਾਨਞ੍ਞੇਵ ਆਹਾਰਪਚ੍ਚਯੇਨ ਪਚ੍ਚਯੋ. ਚਤੁਸਨ੍ਤਤਿਸਮੁਟ੍ਠਾਨੋ ਕਬਲ਼ੀਕਾਰਾਹਾਰੋ ਕਿਞ੍ਚਾਪਿ ‘‘ਇਮਸ੍ਸ ਕਾਯਸ੍ਸਾ’’ਤਿ ਅਵਿਸੇਸਤੋ ਵੁਤ੍ਤੋ, ਵਿਸੇਸਤੋ ਪਨਾਯਮੇਤ੍ਥ ਆਹਾਰਸਮੁਟ੍ਠਾਨਰੂਪਸ੍ਸ ਜਨਕੋ ਚੇਵ ਅਨੁਪਾਲਕੋ ਚ ਹੁਤ੍ਵਾ ਆਹਾਰਪਚ੍ਚਯੇਨ ਪਚ੍ਚਯੋ ਹੋਤਿ, ਸੇਸਤਿਸਨ੍ਤਤਿਸਮੁਟ੍ਠਾਨਸ੍ਸ ਅਨੁਪਾਲਕੋਵ ਹੁਤ੍ਵਾ ਆਹਾਰਪਚ੍ਚਯੇਨ ਪਚ੍ਚਯੋ ਹੋਤੀਤਿ ਏਵਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋਤਿ.

ਆਹਾਰਪਚ੍ਚਯਨਿਦ੍ਦੇਸਵਣ੍ਣਨਾ.