੧੨. ਉਪਾਦਾਪਞ੍ਞਤ੍ਤਾਨੁਯੋਗਵਣ੍ਣਨਾ
੯੫. ਇਦਾਨਿ ਉਪਾਦਾਪਞ੍ਞਤ੍ਤਾਨੁਯੋਗੋ ਹੋਤਿ. ਤਤ੍ਥ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾਪਟਿਕ੍ਖੇਪੋ ਪਰਵਾਦਿਸ੍ਸ. ਸੋ ਹਿ ਰੁਕ੍ਖਂ ਉਪਾਦਾਯ ਛਾਯਾਯ ਵਿਯ, ਇਨ੍ਧਨਂ ਉਪਾਦਾਯ ਅਗ੍ਗਿਸ੍ਸ ਵਿਯ ਚ, ਰੂਪਾਦੀਨਿ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤਿਂ ਪਞ੍ਞਾਪਨਂ ਅਵਬੋਧਨਂ ਇਚ੍ਛਤਿ, ਤਸ੍ਮਾ ‘‘ਰੂਪਂ ਉਪਾਦਾਯਾ’’ਤਿ ਪੁਟ੍ਠੋ ਪਟਿਜਾਨਾਤਿ. ਪੁਨ ਯਥਾ ਰੁਕ੍ਖੁਪਾਦਾਨਾ ਛਾਯਾ ਰੁਕ੍ਖੋ ਵਿਯ, ਇਨ੍ਧਨੁਪਾਦਾਨੋ ਚ ਅਗ੍ਗਿ ਇਨ੍ਧਨਂ ਵਿਯ ਅਨਿਚ੍ਚਾਦਿਧਮ੍ਮੋ, ਏਵਂ ਤੇ ਰੂਪਾਦਿਉਪਾਦਾਨੋ ਪੁਗ੍ਗਲੋ ਰੂਪਾਦਯੋ ਵਿਯ ਅਨਿਚ੍ਚੋਤਿ ਇਮਮਤ੍ਥਂ ਪੁਟ੍ਠੋ ਅਤ੍ਤਨੋ ਲਦ੍ਧਿਯਂ ਠਤ੍ਵਾ ਪਟਿਕ੍ਖਿਪਤਿ.
੯੭. ਨੀਲਂ ਰੂਪਂ ਉਪਾਦਾਯ ਨੀਲੋਤਿਆਦੀਸੁ ਨੀਲਰੂਪੇਨ ਸਦ੍ਧਿਂ ਪੁਗ੍ਗਲਸ੍ਸ ਏਕਤ੍ਤਂ, ਏਕਸਰੀਰੇ ਨੀਲਾਦੀਨਂ ਬਹੂਨਂ ਵਸੇਨ ਬਹੁਭਾਵਞ੍ਚ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ.
੯੮. ਕੁਸਲਂ ਵੇਦਨਨ੍ਤਿ ਏਤ੍ਥਾਪਿ ਵੇਦਨਾਯ ਸਦ੍ਧਿਂ ਏਕਤ੍ਤਂ ਏਕਸਨ੍ਤਾਨੇ ਬਹੂਨਂ ਕੁਸਲਵੇਦਨਾਨਂ ਵਸੇਨ ਬਹੁਭਾਵਞ੍ਚ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ. ਦੁਤਿਯਨਯੇ ਮਗ੍ਗਕੁਸਲੋਤਿਆਦਿਵਚਨਸਬ੍ਭਾਵਤੋ ਛੇਕਟ੍ਠਂ ਸਨ੍ਧਾਯ ਪਟਿਜਾਨਾਤਿ. ਸਫਲੋਤਿਆਦੀਨਿ ਪੁਟ੍ਠੋ ਤਥਾਰੂਪਸ੍ਸ ਵੋਹਾਰਸ੍ਸ ਅਭਾਵਤੋ ਪਟਿਕ੍ਖਿਪਤਿ.
੯੯. ਅਕੁਸਲਪਕ੍ਖੇ ਅਛੇਕਟ੍ਠਂ ਸਨ੍ਧਾਯ ਪਟਿਜਾਨਾਤਿ.
੧੦੦. ਅਬ੍ਯਾਕਤਪਕ੍ਖੇ ਸਸ੍ਸਤਾਦਿਵਸੇਨ ਅਬ੍ਯਾਕਤਭਾਵਂ ਸਨ੍ਧਾਯ ਪਟਿਜਾਨਾਤਿ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
੧੦੪. ਚਕ੍ਖੁਂ ਉਪਾਦਾਯਾਤਿਆਦੀਸੁ ‘‘ਚਕ੍ਖੁਮਾ ਵਿਸਮਾਨੀਵ…ਪੇ… ਪਾਪਾਨਿ ਪਰਿਵਜ੍ਜਯੇ’’ਤਿ(ਉਦਾ. ੪੩) ਆਦਿਵੋਹਾਰਸਬ੍ਭਾਵਤੋ ਪਟਿਜਾਨਾਤਿ. ਚਕ੍ਖੁਮਤ੍ਤਾਦਿਨਿਰੋਧੇਨ ਪੁਗ੍ਗਲਨਿਰੋਧਂ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ.
੧੦੭. ਰੂਪਂ ਉਪਾਦਾਯ ਵੇਦਨਂ ਉਪਾਦਾਯਾਤਿ ਏਤ੍ਥ ਅਞ੍ਞੇਪਿ ਰੂਪਮੂਲਕਾ ਦੁਕਤਿਕਚਤੁਕ੍ਕਾ ਵੇਦਿਤਬ੍ਬਾ. ਯਸ੍ਮਾ ਪਨ ਖਨ੍ਧੇ ਉਪਾਦਾਯ ਪੁਗ੍ਗਲਸ੍ਸ ਪਞ੍ਞਤ੍ਤਿ, ਤਸ੍ਮਾ ਦ੍ਵੇਪਿ ਤਯੋਪਿ ਚਤ੍ਤਾਰੋਪਿ ਪਞ੍ਚਪਿ ਉਪਾਦਾਯ ਪਞ੍ਞਤ੍ਤਿਂ ਪਟਿਜਾਨਾਤਿ. ਏਕਸਨ੍ਤਾਨੇ ਪਨ ਦ੍ਵਿਨ੍ਨਂ ਪਞ੍ਚਨ੍ਨਂ ਵਾ ਅਭਾਵਾ ਪਟਿਕ੍ਖਿਪਤਿ. ਆਯਤਨਾਦੀਸੁਪਿ ਏਸੇਵ ਨਯੋ.
੧੧੨. ਇਦਾਨਿ ਯਂ ਉਪਾਦਾਯ ਯਸ੍ਸ ਪਞ੍ਞਤ੍ਤਿ, ਯਥਾ ਤਸ੍ਸ ਅਨਿਚ੍ਚਤਾਯ ਤਸ੍ਸਾਪਿ ਅਨਿਚ੍ਚਤਾ, ਤਤੋ ਚ ਅਞ੍ਞਤ੍ਤਂ ਸਿਦ੍ਧਂ, ਏਵਂ ਤਸ੍ਸ ਪੁਗ੍ਗਲਸ੍ਸਾਪਿ ਆਪਜ੍ਜਤੀਤਿ ਦਸ੍ਸੇਤੁਂ ਯਥਾ ਰੁਕ੍ਖਨ੍ਤਿਆਦਿਮਾਹ. ਤਤ੍ਥ ਉਪਾਦਾਯਾਤਿ ਪਟਿਚ੍ਚ ਆਗਮ੍ਮ, ਨ ਵਿਨਾ ਤਨ੍ਤਿ ਅਤ੍ਥੋ. ਪਰਵਾਦੀ ਪਨ ਤਥਾ ਅਨਿਚ੍ਛਨ੍ਤੋ ਲਦ੍ਧਿਯਂ ਠਤ੍ਵਾ ਪਟਿਕ੍ਖਿਪਤਿ.
੧੧੫. ਨਿਗਲ਼ੋਤਿ ਸਙ੍ਖਲਿਕਬਨ੍ਧਨਂ. ਨੇਗਲ਼ਿਕੋਤਿ ਤੇਨ ਬਨ੍ਧਕੋ ਯਸ੍ਸ ਰੂਪਂ ਸੋ ਰੂਪਵਾਤਿ ਯਸ੍ਮਾ ਯਸ੍ਸ ਰੂਪਂ ਸੋ ਰੂਪਵਾ ਹੋਤਿ, ਤਸ੍ਮਾ ਯਥਾ ਨ ਨਿਗਲ਼ੋ …ਪੇ… ਅਞ੍ਞੋ ਰੂਪਵਾਤਿ ਅਤ੍ਥੋ.
੧੧੬. ਚਿਤ੍ਤੇ ਚਿਤ੍ਤੇਤਿਆਦੀਸੁ ਸਰਾਗਾਦਿਚਿਤ੍ਤਵਸੇਨ ਸਰਾਗਾਦਿਤਂ ਸਨ੍ਧਾਯ ਚਿਤ੍ਤਾਨੁਪਸ੍ਸਨਾਵਸੇਨ ਪਟਿਜਾਨਾਤਿ. ਜਾਯਤੀਤਿਆਦਿਨਾ ਨਯੇਨ ਪੁਟ੍ਠੋ ਪੁਗ੍ਗਲਸ੍ਸ ਖਣਿਕਭਾਵਂ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ. ‘‘ਸੋ’’ਤਿ ਵਾ ‘‘ਅਞ੍ਞੋ’’ਤਿ ਵਾ ਪੁਟ੍ਠੋ ਸਸ੍ਸਤੁਚ੍ਛੇਦਭਯੇਨ ਪਟਿਕ੍ਖਿਪਤਿ. ਪੁਨ ਨ ਵਤ੍ਤਬ੍ਬਂ ‘‘ਕੁਮਾਰਕੋ’’ਤਿ ਵਾ ‘‘ਕੁਮਾਰਿਕਾ’’ਤਿ ਵਾ ਪੁਟ੍ਠੋ ਲੋਕਵੋਹਾਰਸਮੁਚ੍ਛੇਦਭਯੇਨ ਵਤ੍ਤਬ੍ਬਨ੍ਤਿ ਪਟਿਜਾਨਾਤਿ. ਸੇਸਮੇਤ੍ਥ ਪਾਕਟਮੇਵ.
੧੧੮. ਇਦਾਨਿ ਪਰਵਾਦੀ ਅਞ੍ਞੇਨਾਕਾਰੇਨ ਲਦ੍ਧਿਂ ਪਤਿਟ੍ਠਾਪੇਤੁਕਾਮੋ ਨ ਵਤ੍ਤਬ੍ਬਂ ਪੁਗ੍ਗਲੋ ਉਪਲਬ੍ਭਤੀਤਿਆਦਿਮਾਹ. ਤਤ੍ਥ ਨ ਵਤ੍ਤਬ੍ਬਨ੍ਤਿ ਕਿਂ ਤੇ ਇਮਿਨਾ ਏਵਂ ਬਹੁਨਾ ਉਪਾਦਾਪਞ੍ਞਤ੍ਤਾਨੁਯੋਗੇਨ, ਇਦਂ ਤਾਵ ਵਦੇਹਿ, ਕਿਂ ਨ ਵਤ੍ਤਬ੍ਬਂ ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ. ਤਤੋ ਸਕਵਾਦਿਨਾ ਆਮਨ੍ਤਾਤਿ ਵੁਤ੍ਤੇ ਨਨੁ ਯੋ ਪਸ੍ਸਤੀਤਿਆਦਿਮਾਹ. ਤਤ੍ਥ ਯੋਤਿ ਪੁਗ੍ਗਲੋ. ਯਨ੍ਤਿ ਰੂਪਂ. ਯੇਨਾਤਿ ਚਕ੍ਖੁਨਾ. ਸੋਤਿ ਪੁਗ੍ਗਲੋ. ਤਨ੍ਤਿ ਰੂਪਂ. ਤੇਨਾਤਿ ਚਕ੍ਖੁਨਾ. ਇਦਂ ਵੁਤ੍ਤਂ ਹੋਤਿ – ਨਨੁ ਯੋ ਯਂ ਰੂਪਂ ਯੇਨ ਚਕ੍ਖੁਨਾ ਪਸ੍ਸਤਿ, ਸੋ ਤਂ ਰੂਪਂ ਤੇਨ ਚਕ੍ਖੁਨਾ ਪਸ੍ਸਨ੍ਤੋ ਪੁਗ੍ਗਲੋਤਿ. ਸਕਵਾਦੀ ਕਿਞ੍ਚਾਪਿ ਚਕ੍ਖੁਵਿਞ੍ਞਾਣਸ੍ਸ ਨਿਸ੍ਸਯਭਾਵਂ ਗਚ੍ਛਨ੍ਤਂ ਚਕ੍ਖੁਮੇਵ ਰੂਪਂ ਪਸ੍ਸਤਿ, ਤਥਾ ਸੋਤਮੇਵ ਸਦ੍ਦਂ ਸੁਣਾਤਿ…ਪੇ… ਵਿਞ੍ਞਾਣਮੇਵ ਧਮ੍ਮਂ ਵਿਜਾਨਾਤਿ, ‘‘ਅਤ੍ਥਿ ਅਰਹਤੋ ਚਕ੍ਖੁ, ਪਸ੍ਸਤਿ ਅਰਹਾ ਚਕ੍ਖੁਨਾ ਰੂਪ’’ਨ੍ਤਿਆਦਿਸਮ੍ਮੁਤਿਵਸੇਨ ਪਨ ਆਮਨ੍ਤਾਤਿ ਪਟਿਜਾਨਾਤਿ.
੧੨੦. ਤਤੋ ਛਲਵਾਦਂ ਨਿਸ੍ਸਾਯ ਪਰਵਾਦਿਨਾ ਪੁਗ੍ਗਲਸ੍ਸ ਵਤ੍ਤਬ੍ਬਤਾਯ ਸਾਧਿਤਾਯ ਤਮੇਵ ਵਾਦਂ ਪਰਿਵਤ੍ਤੇਤ੍ਵਾ ਪੁਗ੍ਗਲੋ ਉਪਲਬ੍ਭਤੀਤਿਆਦਿਮਾਹ. ਤਤ੍ਥ ਯੋ ਨ ਪਸ੍ਸਤੀਤਿ ਅਨ੍ਧੋ ਅਸਞ੍ਞਸਤ੍ਤੋ ਅਰੂਪਂ ਉਪਪਨ੍ਨੋ ਨਿਰੋਧਂ ਸਮਾਪਨ੍ਨੋ, ਅਨਨ੍ਧੋਪਿ ਚ ਅਞ੍ਞਤ੍ਰ ਦਸ੍ਸਨਸਮਯਾ ਨ ਪਸ੍ਸਤਿ ਨਾਮ. ਸੇਸਵਾਰੇਸੁਪਿ ਏਸੇਵ ਨਯੋ. ਸੇਸਂ ਪਾਲ਼ਿਵਸੇਨੇਵ ਅਤ੍ਥਤੋ ਵੇਦਿਤਬ੍ਬਂ.
੧੨੨. ਸੁਤ੍ਤਸਂਸਨ੍ਦਨਾਯਂ ਦਿਬ੍ਬਸ੍ਸ ਚਕ੍ਖੁਨੋ ਰੂਪਗੋਚਰਤ੍ਤਾ ਰੂਪਂ ਪਸ੍ਸਤੀਤਿ ਆਹ. ਦੁਤਿਯਵਾਰੇ ‘‘ਸਤ੍ਤੇ ਪਸ੍ਸਾਮੀ’’ਤਿਵਚਨਤੋ ਪੁਗ੍ਗਲਂ ਪਸ੍ਸਤੀਤਿ ਆਹ. ਤਤਿਯਵਾਰੇ ‘‘ਰੂਪਂ ਦਿਸ੍ਵਾ ਪੁਗ੍ਗਲਂ ਵਿਭਾਵੇਤੀ’’ਤਿ ਲਦ੍ਧਿਤੋ ਉਭੋ ਪਸ੍ਸਤੀਤਿ ਆਹ. ਯਸ੍ਮਾ ਪਨ ਪਸ੍ਸਿਤਬ੍ਬਂ ਨਾਮ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਨ੍ਤਿ ਚਤੁਬ੍ਬਿਧੇ ਰੂਪਸਙ੍ਗਹੇ ਰੂਪਾਯਤਨਮੇਵ ਸਙ੍ਗਹਿਤਂ, ਤਸ੍ਮਾ ਸਕਵਾਦੀ ‘‘ਰੂਪਂ ਪੁਗ੍ਗਲੋ, ਪੁਗ੍ਗਲੋ ਰੂਪਂ, ਉਭੋ ਰੂਪ’’ਨ੍ਤਿ ਅਨੁਯੋਗਂ ਕਰੋਤਿ. ਤਸ੍ਸਤ੍ਥੋ ਪਾਕਟੋਯੇਵਾਤਿ.
ਉਪਾਦਾਪਞ੍ਞਤ੍ਤਾਨੁਯੋਗਵਣ੍ਣਨਾ.