੧੩. ਪੁਰਿਸਕਾਰਾਨੁਯੋਗਵਣ੍ਣਨਾ

੧੨੩. ਇਦਾਨਿ ਪੁਰਿਸਕਾਰਾਨੁਯੋਗੋ ਹੋਤਿ. ਤਤ੍ਥ ਕਮ੍ਮੇ ਸਤਿ ਨਿਯਮਤੋ ਤਸ੍ਸ ਕਾਰਕੇਨਪਿ ਭਵਿਤਬ੍ਬਨ੍ਤਿ ਲਦ੍ਧਿਯਾ ਪੁਚ੍ਛਾ ਪਰਵਾਦਿਸ੍ਸ, ਤਥਾਰੂਪਾਨਂ ਕਮ੍ਮਾਨਂ ਅਤ੍ਥਿਤਾਯ ਪਟਿਞ੍ਞਾ ਸਕਵਾਦਿਸ੍ਸ. ਪੁਨ ਕਤ੍ਤਾ ਕਾਰੇਤਾਤਿ ਪੁਚ੍ਛਾ ਪਰਵਾਦਿਸ੍ਸ. ਤਤ੍ਥ ਕਤ੍ਤਾਤਿ ਤੇਸਂ ਕਮ੍ਮਾਨਂ ਕਾਰਕੋ. ਕਾਰੇਤਾਤਿ ਆਣਤ੍ਤਿਦੇਸਨਾਦੀਹਿ ਉਪਾਯੇਹਿ ਕਾਰਾਪਕੋ. ਇਦਾਨਿ ਯਸ੍ਮਾ ਪਰਵਾਦੀ ਪੁਗ੍ਗਲਂ ਸਨ੍ਧਾਯ ਕਤ੍ਤਾਤਿ ਪੁਚ੍ਛਤਿ, ਨ ਕਰਣਮਤ੍ਤਂ, ਤਸ੍ਮਾ ਪਟਿਕ੍ਖੇਪੋ ਸਕਵਾਦਿਸ੍ਸ.

੧੨੪. ਤਸ੍ਸ ਕਤ੍ਤਾ ਕਾਰੇਤਾਤਿ ਏਤ੍ਥ ਯਦਿ ਯਂ ਯਂ ਉਪਲਬ੍ਭਤਿ, ਤਸ੍ਸ ਤਸ੍ਸ ਕਤ੍ਤਾ ਪੁਗ੍ਗਲੋ ਤੇ ਉਪਲਬ੍ਭਤਿ, ਕਿਂ ਤਸ੍ਸਾਪਿ ਕਾਰਕੋ ਚ ਕਾਰਾਪਕੋ ਚ ਅਞ੍ਞੋ ਪੁਗ੍ਗਲੋ ਉਪਲਬ੍ਭਤੀਤਿ ਅਤ੍ਥੋ. ਪਰਵਾਦੀ ਤਥਾ ਅਨਿਚ੍ਛਨ੍ਤੋ ਇਸ੍ਸਰਨਿਮ੍ਮਾਨਵਾਦਭਯੇਨ ਪਟਿਕ੍ਖਿਪਤਿ. ਪੁਨ ਪੁਟ੍ਠੋ ਯਸ੍ਮਾ ਪੁਗ੍ਗਲਂ ਮਾਤਾਪਿਤਰੋ ਜਨੇਨ੍ਤਿ ਨਾਮਂ ਕਰੋਨ੍ਤਿ ਪੋਸੇਨ੍ਤਿ, ਤਸ੍ਮਾਸ੍ਸ ਤੇ ਕਾਰਕਾ. ਯੇ ਚ ਪਨ ਤਂ ਕਲ੍ਯਾਣਮਿਤ੍ਤਾ ਵਾ ਆਚਰਿਯਾ ਵਾ ਤਾਨਿ ਤਾਨਿ ਵਿਜ੍ਜਾਟ੍ਠਾਨਸਿਪ੍ਪਾਯਤਨਾਨਿ ਸਿਕ੍ਖਾਪੇਨ੍ਤਿ, ਤੇ ਕਾਰਾਪਕਾ ਨਾਮਾਤਿ ਇਮਮਤ੍ਥਂ ਸਨ੍ਧਾਯ ਪਟਿਜਾਨਾਤਿ. ਪੁਰਿਮਕਮ੍ਮਮੇਵ ਤਸ੍ਸ ਕਤ੍ਤਾ ਚੇਵ ਕਾਰਾਪੇਤਾ ਚਾਤਿ ਅਧਿਪ੍ਪੇਤਂ.

੧੨੫. ਤਸ੍ਸ ਤਸ੍ਸੇਵਾਤਿ ਇਮਿਨਾ ਇਦਂ ਪੁਚ੍ਛਤਿ – ਯਦਿ ਕਮ੍ਮਾਨਂ ਕਾਰਕਸ੍ਸ ਕਤ੍ਤਾ ਤਸ੍ਸਾਪਿ ਕਤ੍ਤਾ ਤਸ੍ਸਾਪਿ ਕਤ੍ਤਾ ਅਤ੍ਥੇਵ, ਏਵਂ ਸਨ੍ਤੇ ਪੁਰਿਮੇਨ ਪੁਰਿਮੇਨ ਅਵਸ੍ਸਂ ਪਚ੍ਛਾ ਪਚ੍ਛਾ ਪੁਗ੍ਗਲੋ ਕਾਤਬ੍ਬੋਤਿ ਇਮਿਨਾਪਿ ਤੇ ਕਮ੍ਮਾਨਂ ਕਾਰਕੇਨ ਪੁਗ੍ਗਲੇਨ ਆਯਤਿਂ ਅਞ੍ਞੋ ਪੁਗ੍ਗਲੋ ਕਾਤਬ੍ਬੋ, ਤੇਨਾਪਿ ਅਞ੍ਞੋਤਿ ਨਤ੍ਥਿ ਦੁਕ੍ਖਸ੍ਸ ਅਨ੍ਤਕਿਰਿਯਾ, ਨਤ੍ਥਿ ਵਟ੍ਟਸ੍ਸ ਉਪਚ੍ਛੇਦੋ, ਨਤ੍ਥਿ ਅਪ੍ਪਚ੍ਚਯਪਰਿਨਿਬ੍ਬਾਨਂ. ਪਚ੍ਚਯਾਭਾਵੇਨ ਪਚ੍ਚਯਪਟਿਬਦ੍ਧਸ੍ਸ ਦੁਕ੍ਖਸ੍ਸ ਅਭਾਵਾ ਯਂ ਨਿਬ੍ਬਾਨਂ ਵੁਤ੍ਤਂ, ਨਤ੍ਥਿ ਤੇ ਤਨ੍ਤਿ. ਅਥ ਵਾ ਤਸ੍ਸ ਤਸ੍ਸੇਵਾਤਿ ਯਦਿ ਕਮ੍ਮਂ ਕਮ੍ਮਮਤ੍ਤਂ ਨ ਹੋਤਿ, ਤਸ੍ਸ ਪਨ ਕਾਰਕੋ ਪੁਗ੍ਗਲੋ, ਤਸ੍ਸਾਪਿ ਕਾਰਕੋ, ਤਸ੍ਸਾਪਿ ਕਾਰਕੋਤਿ ਏਵਂ ਪੁਗ੍ਗਲਪਰਮ੍ਪਰਾ ਅਤ੍ਥਿ. ਏਵਂ ਸਨ੍ਤੇ ਯਾ ਏਸਾ ਕਮ੍ਮਵਟ੍ਟਸ੍ਸ ਅਪ੍ਪਵਤ੍ਤਿਕਰਣੇਨ ਦੁਕ੍ਖਸ੍ਸ ਅਨ੍ਤਕਿਰਿਯਾ ਵੁਤ੍ਤਾ, ਸਾ ਨਤ੍ਥੀਤਿ ਅਤ੍ਥੋ. ਪਰਵਾਦੀ ਤਂ ਅਨਿਚ੍ਛਨ੍ਤੋ ਪਟਿਕ੍ਖਿਪਤਿ. ਇਤੋ ਅਪਰਾਸੁਪਿ ਉਪਲਬ੍ਭਤਿ ਸਾਮਞ੍ਞੇਨ ਕਾਰਕਪੁਚ੍ਛਾਸੁ ਪੁਗ੍ਗਲਂਯੇਵ ਸਨ੍ਧਾਯ ‘‘ਕਤ੍ਤਾ ਕਾਰੇਤਾ’’ਤਿ ਵੁਤ੍ਤਂ, ਨ ਪਚ੍ਚਯੇ. ਨ ਹਿ ਮਹਾਪਥਵੀਆਦੀਨਂ ਪਚ੍ਚਯਾ ਨਤ੍ਥਿ.

੧੩੫. ਅਞ੍ਞੋ ਕਲ੍ਯਾਣਪਾਪਕਾਨਂ ਕਮ੍ਮਾਨਂ ਕਤ੍ਤਾਤਿ ਪਞ੍ਹੋ ‘‘ਸਙ੍ਖਾਰਵਨ੍ਤਂ ਵਾ ਅਤ੍ਤਾਨ’’ਨ੍ਤਿਆਦਿਦਿਟ੍ਠਿਭਯਾ ਪਟਿਕ੍ਖਿਤ੍ਤੋ.

੧੩੬. ਵਿਪਾਕੋ ਉਪਲਬ੍ਭਤੀਤਿਆਦਿ ਵਿਪਾਕਪਟਿਸਂਵੇਦੀਵਸੇਨ ਪੁਗ੍ਗਲਂ ਦਸ੍ਸੇਨ੍ਤਸ੍ਸ ਲਦ੍ਧਿਭਿਨ੍ਦਨਤ੍ਥਂ ਵੁਤ੍ਤਂ. ਤਤ੍ਥ ਵਿਪਾਕਪਟਿਸਂਵੇਦੀਤਿ ਅਨੁਯੋਗੋ ਪਰਵਾਦਿਸ੍ਸ, ਵਿਪਾਕਪਵਤ੍ਤਿਤੋ ਅਞ੍ਞਸ੍ਸ ਵੇਦਕਸ੍ਸ ਅਭਾਵਾ ਪਟਿਕ੍ਖੇਪੋ ਸਕਵਾਦਿਸ੍ਸ. ਪੁਨ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ.

੧੩੮. ਤਸ੍ਸ ਪਟਿਸਂਵੇਦੀਤਿ ਤਸ੍ਸ ਵਿਪਾਕਪਟਿਸਂਵੇਦਕਸ੍ਸ ਪਟਿਸਂਵੇਦੀ ਯਸ੍ਮਾ ਪਨ ਪਟਿਸਂਵੇਦਿਤਬ੍ਬੋ ਨਾਮ ਵਿਪਾਕੋ, ਨ ਚ ਪੁਗ੍ਗਲੋ ਵਿਪਾਕੋ, ਤਸ੍ਮਾ ਪਟਿਕ੍ਖੇਪੋ ਪਰਵਾਦਿਸ੍ਸ. ਪੁਨ ਪੁਟ੍ਠੋ ਯਸ੍ਮਾ ਪੁਞ੍ਞਵਿਪਾਕੇ ਠਿਤਤ੍ਤਾ ਵਿਪਾਕਪਟਿਸਂਵੇਦੀ ਪੁਤ੍ਤਂ ਵਾ ਪਤਿਂ ਵਾ ਮਾਤਾ ਵਾ ਜਾਯਾ ਵਾ ਪਰਿਚੁਮ੍ਬਤਿ ਪਰਿਸਜ੍ਜਤਿ, ਤਸ੍ਮਾ ਤਥਾਰੂਪਂ ਪਟਿਸਂਵੇਦਿਤਂ ਸਨ੍ਧਾਯ ਪਟਿਜਾਨਾਤਿ ਪਰਵਾਦੀ.

ਤਸ੍ਸ ਤਸ੍ਸੇਵਾਤਿ ਯਦਿ ਵਿਪਾਕੋ ਵਿਪਾਕਮਤ੍ਤਂ ਨ ਹੋਤਿ, ਤਸ੍ਸ ਪਨ ਪਟਿਸਂਵੇਦੀ ਪੁਗ੍ਗਲੋ, ਤਸ੍ਸਾਪਿ ਪਟਿਸਂਵੇਦੀ ਤਸ੍ਸਾਪਿ ਪਟਿਸਂਵੇਦੀਤਿ ਏਵਂ ਪੁਗ੍ਗਲਪਰਮ੍ਪਰਾ ਅਤ੍ਥਿ. ਏਵਂ ਸਨ੍ਤੇ ਯਾ ਏਸਾ ਵਿਪਾਕਵਟ੍ਟਸ੍ਸ ਅਪ੍ਪਵਤ੍ਤਿਕਰਣੇਨ ਦੁਕ੍ਖਸ੍ਸ ਅਨ੍ਤਕਿਰਿਯਾ ਵੁਤ੍ਤਾ, ਸਾ ਨਤ੍ਥੀਤਿ ਅਤ੍ਥੋ. ਇਤੋ ਪਰਂ ਉਪਲਬ੍ਭਤਿਸਾਮਞ੍ਞੇਨ ਪਟਿਸਂਵੇਦੀਪੁਚ੍ਛਾਸੁ ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ.

੧੪੨. ਅਞ੍ਞੋ ਕਲ੍ਯਾਣਪਾਪਕਾਨਂ ਕਮ੍ਮਾਨਂ ਵਿਪਾਕਪਟਿਸਂਵੇਦੀਤਿ ਪਞ੍ਹੋ ‘‘ਵੇਦਨਵਨ੍ਤਂ ਵਾ ਅਤ੍ਤਾਨ’’ਨ੍ਤਿਆਦਿਦਿਟ੍ਠਿਭਯਾ ਪਟਿਕ੍ਖਿਤ੍ਤੋ.

੧੪੩. ਦਿਬ੍ਬਂ ਸੁਖਨ੍ਤਿਆਦਿ ਕਲ੍ਯਾਣਪਾਪਕਾਨਂ ਕਮ੍ਮਾਨਂ ਵਿਪਾਕਂ ਭਾਜੇਤ੍ਵਾ ਦਸ੍ਸਨਵਸੇਨ ਆਰਦ੍ਧਂ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸਕਵਾਦਿਨੋ ਚੇਤ੍ਥ ਪੁਗ੍ਗਲਵਸੇਨੇਵ ਪਟਿਸਂਵੇਦੀਪਟਿਕ੍ਖੇਪੋ ਵੇਦਿਤਬ੍ਬੋ, ਨ ਵੇਦਯਿਤਵਸੇਨ.

੧੪੮. ਮਹਾਪਥਵੀਆਦੀਨਿ ਹਿ ਆਰਮ੍ਮਣਂ ਕਤ੍ਵਾ ਵੇਦਯਿਤਾਨਂ ਉਪ੍ਪਤ੍ਤਿ ਅਪ੍ਪਟਿਸਿਦ੍ਧਾ.

੧੭੦. ਕਤ੍ਤਾ ਕਾਰੇਤਾ ਵਿਪਾਕਪਟਿਸਂਵੇਦੀਤਿਆਦਿ ਵੋਮਿਸ੍ਸਕਨਯਵਸੇਨ ਆਰਦ੍ਧਂ. ਤਤ੍ਥ ਸੋ ਕਰੋਤੀਤਿ ਯਂ ਤ੍ਵਂ ਕਤ੍ਤਾਤਿ ਚ ਪਟਿਸਂਵੇਦੀਤਿ ਚ ਵਦੇਸਿ, ਕਿਂ ਸੋਯੇਵ ਕਰੋਤਿ, ਸੋ ਪਟਿਸਂਵੇਦੇਤਿ. ਅਯਮਨੁਯੋਗੋ ਸਕਵਾਦਿਸ੍ਸ, ਸੁਤ੍ਤਵਿਰੋਧਭਯੇਨ ਪਟਿਕ੍ਖੇਪੋ ਪਰਵਾਦਿਸ੍ਸ.

੧੭੧. ਪੁਨ ਪੁਟ੍ਠੋ ‘‘ਇਧ ਨਨ੍ਦਤਿ ਪੇਚ੍ਚ ਨਨ੍ਦਤੀ’’ਤਿਆਦਿਸੁਤ੍ਤਵਸੇਨ (ਧ. ਪ. ੧੮) ਪਟਿਞ੍ਞਾ ਤਸ੍ਸੇਵ. ਅਥਸ੍ਸ ਵਚਨੋਕਾਸਂ ਪਟਿਬਾਹਨ੍ਤੋ ਸਕਵਾਦੀ ਸਯਂਕਤਂ ਸੁਖਦੁਕ੍ਖਨ੍ਤਿ ਆਹ.

੧੭੨. ਤਤ੍ਥ ਅਞ੍ਞੋ ਕਰੋਤੀਤਿ ਕਾਰਕਵੇਦਕਾਨਂ ਅਞ੍ਞਤ੍ਤਪੁਚ੍ਛਾਵਸੇਨ ਵੁਤ੍ਤਂ. ਤਤੋ ਪਰਵਾਦੀ ਸੁਤ੍ਤਵਿਰੋਧਭਯੇਨ ਪਟਿਕ੍ਖਿਪਿਤ੍ਵਾ ਪੁਨ ਪੁਟ੍ਠੋ ‘‘ਮਨੁਸ੍ਸਭੂਤੋ ਕਤ੍ਵਾ ਦੇਵਭੂਤੋ ਪਟਿਸਂਵੇਦੇਤੀ’’ਤਿ ਮਞ੍ਞਮਾਨੋ ਪਟਿਜਾਨਾਤਿ. ਏਵਂਵਾਦਿਨੋ ਪਨ ਪਰਂਕਤਂ ਸੁਖਦੁਕ੍ਖਂ ਆਪਜ੍ਜਤੀਤਿ ਤਸ੍ਸ ਵਸੇਨ ਪੁਟ੍ਠੋ ਪੁਨ ਪਟਿਕ੍ਖਿਪਤਿ.

੧੭੪. ਸੋ ਚ ਅਞ੍ਞੋ ਚਾਤਿ ਕਾਰਕਵੇਦਕਾਨਂ ਏਕਤ੍ਤਅਞ੍ਞਤ੍ਤਪੁਚ੍ਛਾਵਸੇਨ ਵੁਤ੍ਤਂ. ਤਤੋ ਪਰਵਾਦੀ ਸੁਤ੍ਤਵਿਰੋਧਭਯੇਨੇਵ ਪਟਿਕ੍ਖਿਪਿਤ੍ਵਾ ਪੁਨ ਪੁਟ੍ਠੋ ਪੁਰਿਮੇ ਦ੍ਵੇਪਿ ਨਯੇ ਏਕਤੋ ਕਤ੍ਵਾ ਪਟਿਜਾਨਾਤਿ. ਏਵਂਵਾਦਿਨੋ ਪਨ ਸਯਂਕਤਞ੍ਚ ਪਰਂਕਤਞ੍ਚ ਸੁਖਦੁਕ੍ਖਂ ਆਪਜ੍ਜਤੀਤਿ ਤਸ੍ਸ ਵਸੇਨ ਪੁਟ੍ਠੋ ਪੁਨ ਪਟਿਕ੍ਖਿਪਤਿ.

੧੭੬. ਨੇਵ ਸੋ ਕਰੋਤੀਤਿ ਕਾਰਕਵੇਦਕਾਨਂ ਏਕਤ੍ਤਅਞ੍ਞਤ੍ਤਪਟਿਕ੍ਖੇਪਵਸੇਨ ਵੁਤ੍ਤਂ. ਤਤੋ ਪਰਵਾਦੀ ਸੁਤ੍ਤਵਿਰੋਧਵਸੇਨੇਵ ਪਟਿਕ੍ਖਿਪਿਤ੍ਵਾ ਪੁਨ ਪੁਟ੍ਠੋ ਯਸ੍ਮਾ ਮਨੁਸ੍ਸੋ ਦੇਵਲੋਕੂਪਪਤ੍ਤਿਯਾ ਕਮ੍ਮਂ ਕਤ੍ਵਾ ਨ ਮਨੁਸ੍ਸਭੂਤੋਵ ਪਟਿਸਂਵੇਦੇਤਿ, ਨਾਪਿ ਯੇਨ ਕਮ੍ਮਂ ਕਤਂ, ਤਤੋ ਅਞ੍ਞੋਵ ਪਟਿਸਂਵੇਦੇਤਿ, ਤਸ੍ਮਾ ਕਾਰਕਤੋ ਵੇਦਕੋ ਨੇਵ ਸੋ ਹੋਤਿ, ਨ ਅਞ੍ਞੋਤਿ ਮਞ੍ਞਮਾਨੋ ਪਟਿਜਾਨਾਤਿ. ਲਦ੍ਧਿਮਤ੍ਤਮੇਵੇਤਂ? ਏਵਂਵਾਦਿਨੋ ਪਨ ਅਸਯਂਕਾਰਂ ਅਪਰਂਕਾਰਂ ਅਧਿਚ੍ਚਸਮੁਪ੍ਪਨ੍ਨਂ ਸੁਖਦੁਕ੍ਖਂ ਆਪਜ੍ਜਤੀਤਿ ਤਸ੍ਸ ਵਸੇਨ ਪੁਟ੍ਠੋ ਪੁਨ ਪਟਿਕ੍ਖਿਪਤਿ. ਅਪਿਚ ਇਮਸ੍ਮਿਂ ਵੋਮਿਸ੍ਸਕਨਯੇ ਆਦਿਤੋ ਪਟ੍ਠਾਯ ਇਮਿਨਾਪਿ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਯਸ੍ਮਾ ਹਿ ਅਯਂ ਪੁਗ੍ਗਲਵਾਦੀ ਕਮ੍ਮਾਨਂ ਕਾਰਕਞ੍ਚੇਵ ਵੇਦਕਞ੍ਚ ਇਚ੍ਛਤਿ, ਤਸ੍ਮਾਸ੍ਸ ਯੋ ਕਾਰਕੋ, ਤੇਨੇਵ ਵਾ ਵੇਦਕੇਨ ਭਵਿਤਬ੍ਬਂ, ਅਞ੍ਞੇਨ ਵਾ ਉਭੋਹਿ ਵਾ ਭਵਿਤਬ੍ਬਂ, ਉਭੋਹਿ ਵਾਪਿ ਨ ਭਵਿਤਬ੍ਬਨ੍ਤਿ ਇਦਮਾਪਨ੍ਨਂ ਹੋਤਿ. ਏਵਮਾਪਨ੍ਨਮੇਵ ਅਨੁਯੋਗਂ ਅਨੁਯੁਞ੍ਜਨ੍ਤੋ ਸਕਵਾਦੀ ‘‘ਸੋ ਕਰੋਤੀ’’ਤਿਆਦਯੋ ਚਤ੍ਤਾਰੋਪਿ ਵਿਕਪ੍ਪੇ ਆਹ. ਸੇਸਂ ਵੁਤ੍ਤਪ੍ਪਕਾਰਮੇਵ.

ਪਰਿਯੋਸਾਨੇ ਪਨ ਚਤ੍ਤਾਰੋਪਿ ਪਞ੍ਹਾ ਏਕਤੋ ਪੁਟ੍ਠਾ. ਤਤ੍ਥ ਪਟਿਕ੍ਖੇਪੋ ਚ ਪਟਿਜਾਨਨਾ ਚ ਸਯਂਕਤਾਦਿਦੋਸਪ੍ਪਤ੍ਤਿ ਚ ਪੁਰਿਮਨਯੇਨੇਵ ਵੇਦਿਤਬ੍ਬਾ. ਇਤੋ ਪਰਂ ‘‘ਕਲ੍ਯਾਣਪਾਪਕਾਨੀ’’ਤਿ ਅਵਤ੍ਵਾ ਹੇਟ੍ਠਾ ਵੁਤ੍ਤਨਯਾ ਏਵ ‘‘ਕਮ੍ਮਂ ਅਤ੍ਥੀ’’ਤਿਆਦਿਨਾ ਵਿਕਪ੍ਪੇਨ ਦਸ੍ਸਿਤਾ. ਤੇਸਮ੍ਪਿ ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ.

ਪੁਰਿਸਕਾਰਾਨੁਯੋਗਵਣ੍ਣਨਾ.

ਕਲ੍ਯਾਣਵਗ੍ਗੋਤਿਪਿ ਏਤਸ੍ਸੇਵ ਨਾਮਂ.