੧੧. ਗਤਿਅਨੁਯੋਗਵਣ੍ਣਨਾ
੬੯-੭੨. ਇਦਾਨਿ ਗਤਿਪਰਿਵਤ੍ਤਨਮੁਖੇਨ ਚੁਤਿਪਟਿਸਨ੍ਧਿਅਨੁਯੋਗੋ ਹੋਤਿ. ਤਤ੍ਥ ਯਸ੍ਮਾ ਪੁਗ੍ਗਲਵਾਦੀ ‘‘ਸ ਸਤ੍ਤਕ੍ਖਤ੍ਤੁਪਰਮਂ ਸਨ੍ਧਾਵਿਤ੍ਵਾਨ ਪੁਗ੍ਗਲੋ’’ਤਿਆਦੀਨਿ (ਸਂ. ਨਿ. ੨.੧੩੩; ਇਤਿਵੁ. ੨੪) ਸੁਤ੍ਤਾਨਿ ਨਿਸ੍ਸਾਯ ਪੁਗ੍ਗਲੋ ਸਨ੍ਧਾਵਤੀਤਿ ਲਦ੍ਧਿਂ ਗਹੇਤ੍ਵਾ ਵੋਹਰਤਿ, ਤਸ੍ਮਾਸ੍ਸ ਤਂ ਲਦ੍ਧਿਂ ਭਿਨ੍ਦਿਤੁਂ ਸਨ੍ਧਾਵਤੀਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਸਨ੍ਧਾਵਤੀਤਿ ਸਂਸਰਤਿ ਗਮਨਾਗਮਨਂ ਕਰੋਤਿ. ਅਤ੍ਤਨੋ ਲਦ੍ਧਿਵਸੇਨ ਪਟਿਞ੍ਞਾ ਪਰਵਾਦਿਸ੍ਸ. ਸੋ ਪੁਗ੍ਗਲੋਤਿਆਦਯੋ ਅਨੁਯੋਗੋਪਿ ਸਕਵਾਦਿਸ੍ਸ, ਪਟਿਕ੍ਖੇਪੋ ਇਤਰਸ੍ਸ. ਤਤ੍ਥ ਸੋਤਿ ਸੋਯੇਵਾਤਿ ਅਤ੍ਥੋ. ਏਵਂ ਪਨ ਅਨੁਯੁਤ੍ਤੋ ਸਸ੍ਸਤਦਿਟ੍ਠਿਭਯੇਨ ਪਟਿਕ੍ਖਿਪਤਿ. ਅਞ੍ਞੋਤਿ ਪੁਟ੍ਠੋ ਉਚ੍ਛੇਦਦਿਟ੍ਠਿਭਯੇਨ. ਸੋ ਚ ਅਞ੍ਞੋ ਚਾਤਿ ਪੁਟ੍ਠੋ ਏਕਚ੍ਚਸਸ੍ਸਤਦਿਟ੍ਠਿਭਯੇਨ. ਨੇਵ ਸੋ ਨ ਅਞ੍ਞੋਤਿ ਪੁਟ੍ਠੋ ਅਮਰਾਵਿਕ੍ਖੇਪਦਿਟ੍ਠਿਭਯੇਨ. ਪੁਨ ਚਤ੍ਤਾਰੋਪਿ ਪਞ੍ਹੇ ਏਕਤੋ ਪੁਟ੍ਠੋ ਚਤੁਨ੍ਨਮ੍ਪਿ ਦਿਟ੍ਠੀਨਂ ਭਯੇਨ ਪਟਿਕ੍ਖਿਪਿਤ੍ਵਾ ਪੁਨ ਯਾਨਿਸ੍ਸ ਸੁਤ੍ਤਾਨਿ ਨਿਸ੍ਸਾਯ ਲਦ੍ਧਿ ਉਪ੍ਪਨ੍ਨਾ ਤਾਨਿ ਦਸ੍ਸੇਨ੍ਤੋ ਤੇਨ ਹਿ ਪੁਗ੍ਗਲੋਸਨ੍ਧਾਵਤੀਤਿਆਦਿਮਾਹ.
੭੬. ਪੁਨ ਸਕਵਾਦਿਨਾ ‘‘ਯ੍ਵਾਯਂ ਤਵ ਲਦ੍ਧਿਯਾ ਸਨ੍ਧਾਵਤਿ, ਕਿਂ ਸੋ ਅਸ੍ਮਿਞ੍ਚ ਪਰਸ੍ਮਿਞ੍ਚ ਲੋਕੇ ਏਕੋਯੇਵਾ’’ਤਿ ਅਧਿਪ੍ਪਾਯੇਨ ਸ੍ਵੇਵਾਤਿ ਨਿਯਮੇਤ੍ਵਾ ਪੁਟ੍ਠੋ ਸਸ੍ਸਤਭਯਾ ਪਟਿਕ੍ਖਿਪਿਤ੍ਵਾ ਪੁਨ ਦਲ਼੍ਹਂ ਕਤ੍ਵਾ ਤਥੇਵ ਪੁਟ੍ਠੋ ਯਸ੍ਮਾ ਸੋ ਪੁਗ੍ਗਲੋਵ ਨ ਅਞ੍ਞੋ ਭਾਵੋ, ‘‘ਸੋ ਤਤੋ ਚੁਤੋ ਇਧੂਪਪਨ੍ਨੋ’’ਤਿਆਦਿਸੁਤ੍ਤਮ੍ਪਿ (ਪਾਰਾ. ੧੨; ਦੀ. ਨਿ. ੧.੨੪੫) ਅਤ੍ਥਿ, ਤਸ੍ਮਾ ਪਟਿਜਾਨਾਤਿ. ਸ੍ਵੇਵ ਮਨੁਸ੍ਸੋਤਿ ਪੁਟ੍ਠੋ ਮਨੁਸ੍ਸਸ੍ਸੇਵ ਦੇਵਤ੍ਤਾਭਾਵਤੋ ਪਟਿਕ੍ਖਿਪਤਿ.
੭੭. ਪੁਨ ਪੁਟ੍ਠੋ ‘‘ਅਹਂ ਤੇਨ ਸਮਯੇਨ ਸੁਨੇਤ੍ਤੋ ਨਾਮ ਸਤ੍ਥਾ ਅਹੋਸਿ’’ਨ੍ਤਿਆਦਿਸੁਤ੍ਤਵਸੇਨ (ਅ. ਨਿ. ੭.੬੬ ਅਤ੍ਥਤੋ ਸਮਾਨਂ) ਪਟਿਜਾਨਾਤਿ. ਅਥਸ੍ਸ ਸਕਵਾਦੀ ਦੇਵਮਨੁਸ੍ਸੁਪਪਤ੍ਤੀਨਂ ਨਾਨਤ੍ਤਤੋ ਵਚਨਂ ਮਿਚ੍ਛਾਤਿ ਪਕਾਸੇਨ੍ਤੋ ਮਨੁਸ੍ਸੋ ਹੁਤ੍ਵਾਤਿਆਦਿਮਾਹ.
੭੮. ਤਤ੍ਥ ਹੇਵਂ ਮਰਣਂ ਨ ਹੇਹਿਤੀਤਿ ਏਵਂ ਸਨ੍ਤੇ ਮਰਣਂ ਨ ਭਵਿਸ੍ਸਤੀਤਿ ਅਤ੍ਥੋ. ਇਤੋ ਪਰਂ ਯਕ੍ਖੋ ਪੇਤੋਤਿ ਅਤ੍ਤਭਾਵਨਾਨਤ੍ਤਵਸੇਨ ਅਨੁਯੋਗਨਾਨਤ੍ਤਂ ਵੇਦਿਤਬ੍ਬਂ.
੮੨. ਖਤ੍ਤਿਯੋਤਿਆਦੀਨਿ ਜਾਤਿਵਸੇਨ ਚੇਵ ਅਙ੍ਗਵੇਕਲ੍ਲਾਦਿਵਸੇਨ ਚ ਵੁਤ੍ਤਾਨਿ.
੮੭. ਪੁਨ ਨ ਵਤ੍ਤਬ੍ਬਨ੍ਤਿ ਪਰਵਾਦਿਨਾ ਪੁਟ੍ਠੋ ਇਧਟ੍ਠਕਸ੍ਸ ਉਪਪਤ੍ਤਿਵਸੇਨ ਪਰਲੋਕਸ੍ਸ ਗਮਨਾਭਾਵਤੋ ਪਟਿਞ੍ਞਾ ਸਕਵਾਦਿਸ੍ਸ ਪੁਨ ਸੋਤਾਪਨ੍ਨਸ੍ਸ ਭਵਨ੍ਤਰੇਪਿ ਸੋਤਾਪਨ੍ਨਭਾਵਾਵਿਜਹਨਤੋ ਦੁਤਿਯਪਟਿਞ੍ਞਾਪਿ ਤਸ੍ਸੇਵ. ਹਞ੍ਚੀਤਿਆਦਿਵਚਨਂ ਪਰਵਾਦਿਸ੍ਸ.
੮੮. ਪੁਨ ਦੇਵਲੋਕੇ ਉਪਪਨ੍ਨਸ੍ਸ ਮਨੁਸ੍ਸਤ੍ਤਾਭਾਵਦਸ੍ਸਨੇਨ ਅਨੁਯੋਗੋ ਸਕਵਾਦਿਸ੍ਸ.
੮੯. ਤਤੋ ਪਰਂ ਅਨਞ੍ਞੋ ਅਵਿਗਤੋਤਿ ਏਤ੍ਥ ਅਨਞ੍ਞੋਤਿ ਸਬ੍ਬਾਕਾਰੇਨ ਏਕਸਦਿਸੋ. ਅਵਿਗਤੋਤਿ ਏਕੇਨਾਪਿ ਆਕਾਰੇਨ ਅਵਿਗਤੋਤਿ ਅਤ੍ਥੋ. ਨ ਹੇਵਨ੍ਤਿ ਦੇਵਲੋਕੇ ਉਪਪਨ੍ਨਸ੍ਸ ਮਨੁਸ੍ਸਭਾਵਾਭਾਵਤੋ ਏਵਮਾਹ.
੯੦. ਪੁਨ ਦਲ਼੍ਹਂ ਕਤ੍ਵਾ ਅਨੁਯੁਤ੍ਤੋ ‘‘ਸ੍ਵੇਵ ਪੁਗ੍ਗਲੋ ਸਨ੍ਧਾਵਤੀ’’ਤਿ ਲਦ੍ਧਿਯਾ ਅਨੁਜਾਨਾਤਿ. ਹਤ੍ਥਚ੍ਛਿਨ੍ਨੋਤਿਆਦਿ ਆਕਾਰਵਿਗਮਨਦਸ੍ਸਨੇਨ ਅਵਿਗਤੋ ਸਨ੍ਧਾਵਤੀਤਿ ਲਦ੍ਧਿਭਿਨ੍ਦਨਤ੍ਥਂ ਵੁਤ੍ਤਂ. ਤਤ੍ਥ ਅਲ਼ਚ੍ਛਿਨ੍ਨੋਤਿ ਯਸ੍ਸ ਅਙ੍ਗੁਟ੍ਠਕਾ ਛਿਨ੍ਨਾ. ਕਣ੍ਡਰਚ੍ਛਿਨ੍ਨੋਤਿ ਯਸ੍ਸ ਮਹਾਨ੍ਹਾਰੂ ਛਿਨ੍ਨਾ.
੯੧. ਸਰੂਪੋਤਿਆਦੀਸੁ ਪਠਮੇ ਪਞ੍ਹੇ ਇਮਿਨਾ ਰੂਪਕਾਯੇਨ ਸਦ੍ਧਿਂ ਅਗਮਨਂ ਸਨ੍ਧਾਯ ਪਟਿਕ੍ਖਿਪਤਿ. ਦੁਤਿਯੇ ਅਨ੍ਤਰਾਭਵਪੁਗ੍ਗਲਂ ਸਨ੍ਧਾਯ ਪਟਿਜਾਨਾਤਿ. ਸੋ ਹਿ ਤਸ੍ਸ ਲਦ੍ਧਿਯਾ ਸਰੂਪੋਵ ਗਨ੍ਤ੍ਵਾ ਮਾਤੁਕੁਚ੍ਛਿਂ ਪਵਿਸਤਿ. ਅਥਸ੍ਸ ਤਂ ਰੂਪਂ ਭਿਜ੍ਜਤਿ. ਤਂ ਜੀਵਨ੍ਤਿ ਯੇਨ ਰੂਪਸਙ੍ਖਾਤੇਨ ਸਰੀਰੇਨ ਸਦ੍ਧਿਂ ਗਚ੍ਛਤਿ, ਕਿਮਸ੍ਸ ਤਦੇਵ ਜੀਵਂ ਤਂ ਸਰੀਰਨ੍ਤਿ ਪੁਚ੍ਛਤਿ. ਪਰਵਾਦੀ ਇਧ ਸਰੀਰਨਿਕ੍ਖੇਪਾ ਸੁਤ੍ਤਵਿਰੋਧਾ ਚ ਪਟਿਕ੍ਖਿਪਤਿ.
ਸਵੇਦਨੋਤਿਆਦੀਸੁ ਅਸਞ੍ਞੂਪਪਤ੍ਤਿਂ ਸਨ੍ਧਾਯ ਪਟਿਕ੍ਖਿਪਤਿ, ਤਦਞ੍ਞਂ ਉਪਪਤ੍ਤਿਂ ਸਨ੍ਧਾਯ ਪਟਿਜਾਨਾਤਿ. ਤਂ ਜੀਵਨ੍ਤਿ ਯੇਨ ਵੇਦਨਾਦਿਸਙ੍ਖਾਤੇਨ ਸਰੀਰੇਨ ਸਦ੍ਧਿਂ ਗਚ੍ਛਤਿ. ਕਿਮਸ੍ਸ ਤਦੇਵ ਜੀਵਂ ਤਂ ਸਰੀਰਨ੍ਤਿ ਪੁਚ੍ਛਤਿ. ਤਂ ਜੀਵਂ ਤਂ ਸਰੀਰਂ, ਅਞ੍ਞਂ ਜੀਵਂ ਅਞ੍ਞਂ ਸਰੀਰਨ੍ਤਿ ਏਤਿਸ੍ਸਾ ਹਿ ਲਦ੍ਧਿਯਾ ਪਞ੍ਚਪਿ ਖਨ੍ਧਾ ਸਰੀਰਨ੍ਤਿ ਅਧਿਪ੍ਪੇਤਾ. ਪਰਵਾਦੀ ਸੁਤ੍ਤਵਿਰੋਧਾ ਪਟਿਕ੍ਖਿਪਤਿ.
੯੨. ਅਰੂਪੋਤਿਆਦੀਸੁ ਪਠਮੇ ਪਞ੍ਹੇ ਅਨ੍ਤਰਾਭਵਂ ਸਨ੍ਧਾਯ ਪਟਿਕ੍ਖਿਪਤਿ. ਦੁਤਿਯੇ ਅਰੂਪਾ ਰੂਪਂ ਉਪਪਜ੍ਜਮਾਨਂ ਸਨ੍ਧਾਯ ਪਟਿਜਾਨਾਤਿ. ਅਞ੍ਞਂ, ਜੀਵਨ੍ਤਿ ਯਂ ਰੂਪਸਙ੍ਖਾਤਂ ਸਰੀਰਂ ਪਹਾਯ ਅਰੂਪੋ ਸਨ੍ਧਾਵਤਿ, ਕਿਂ ਤੇ ਤਂ ਸਰੀਰਂ ਅਞ੍ਞਂ, ਅਞ੍ਞਂ ਜੀਵਨ੍ਤਿ ਪੁਚ੍ਛਤਿ. ਇਤਰੋ ਸੁਤ੍ਤਵਿਰੋਧਾ ਪਟਿਕ੍ਖਿਪਤਿ.
ਅਵੇਦਨੋਤਿਆਦੀਸੁ ਸਞ੍ਞੀਭਵਂ ਸਨ੍ਧਾਯ ਪਟਿਕ੍ਖਿਪਤਿ, ਤਦਞ੍ਞਂ ਉਪਪਤ੍ਤਿਂ ਸਨ੍ਧਾਯ ਪਟਿਜਾਨਾਤਿ. ਅਞ੍ਞਂ ਜੀਵਨ੍ਤਿ ਯਂ ਵੇਦਨਾਦਿਸਙ੍ਖਾਤਂ ਸਰੀਰਂ ਪਹਾਯ ਅਵੇਦਨੋ ਅਵਿਞ੍ਞਾਣੋ ਸਨ੍ਧਾਵਤਿ, ਕਿਂ ਤੇ ਤਂ ਅਞ੍ਞਂ ਸਰੀਰਂ, ਅਞ੍ਞਂ ਜੀਵਨ੍ਤਿ ਪੁਚ੍ਛਤਿ. ਇਤਰੋ ਸੁਤ੍ਤਵਿਰੋਧਾ ਪਟਿਕ੍ਖਿਪਤਿ.
੯੩. ਰੂਪਂ ਸਨ੍ਧਾਵਤੀਤਿਆਦੀਸੁ ਯੇ ਰੂਪਾਦਯੋ ਖਨ੍ਧੇ ਉਪਾਦਾਯ ਪੁਗ੍ਗਲਂ ਪਞ੍ਞਪੇਤਿ, ਕਿਂ ਤੇ ਤਸ੍ਮਿਂ ਪੁਗ੍ਗਲੇ ਸਨ੍ਧਾਵਨ੍ਤੇ ਤਮ੍ਪਿ ਰੂਪਂ ਸਨ੍ਧਾਵਤੀਤਿ ਪੁਚ੍ਛਤਿ. ਪਰਵਾਦੀ ‘‘ਅਵਿਜ੍ਜਾਨੀਵਰਣਾਨਂ ਸਤ੍ਤਾਨਂ ਤਣ੍ਹਾਸਂਯੋਜਨਾਨਂ ਸਨ੍ਧਾਵਤਂ ਸਂਸਰਤ’’ਨ੍ਤਿ ਸਤ੍ਤਸ੍ਸੇਵ ਸਨ੍ਧਾਵਨਵਚਨਤੋ ਪਟਿਕ੍ਖਿਪਤਿ. ਪੁਨ ਪੁਟ੍ਠੋ ਯਸ੍ਮਾ ਰੂਪਾਦਿਧਮ੍ਮੇ ਵਿਨਾ ਪੁਗ੍ਗਲੋ ਨਤ੍ਥਿ, ਤਸ੍ਮਾ ਤਸ੍ਮਿਂ ਸਨ੍ਧਾਵਨ੍ਤੇ ਤੇਨਪਿ ਰੂਪੇਨ ਸਨ੍ਧਾਵਿਤਬ੍ਬਨ੍ਤਿ ਸਞ੍ਞਾਯ ਪਟਿਜਾਨਾਤਿ. ਵੇਦਨਾਦੀਸੁਪਿ ਏਸੇਵ ਨਯੋ.
੯੪. ਰੂਪਂ ਨ ਸਨ੍ਧਾਵਤੀਤਿਆਦੀਸੁ ਯਸ੍ਮਾ ਤੇ ਰੂਪਂ ਪੁਗ੍ਗਲੋ ਨ ਹੋਤਿ, ਸ੍ਵੇਵ ਚ ਸਨ੍ਧਾਵਤੀਤਿ ਵਦੇਸਿ, ਤਸ੍ਮਾ ਤਂ ਪੁਚ੍ਛਾਮਿ, ਕਿਂ ਤੇ ਰੂਪਂ ਨ ਸਨ੍ਧਾਵਤੀਤਿ ਅਤ੍ਥੋ. ਇਤਰੋ ਪੁਗ੍ਗਲੇ ਸਨ੍ਧਾਵਨ੍ਤੇ ਨ ਸਕ੍ਕਾ ਤਸ੍ਸ ਉਪਾਦਾਨਭੂਤੇਨ ਰੂਪੇਨ ਸਨ੍ਧਾਵਿਤੁਨ੍ਤਿ ਸਞ੍ਞਾਯ ਪਟਿਕ੍ਖਿਪਤਿ. ਪੁਨ ਪੁਟ੍ਠੋ ਸਤ੍ਤਾਨਞ੍ਞੇਵ ਸਨ੍ਧਾਵਨਵਚਨਤੋ ਪਟਿਜਾਨਾਤਿ. ਸੇਸਮੇਤ੍ਥ ਉਤ੍ਤਾਨਮੇਵ.
ਗਾਥਾਨਂ ਪਨ ਅਯਮਤ੍ਥੋ – ਆਯਸ੍ਮਤੋ ਮਤੇਨ ਰੁਕ੍ਖਂ ਉਪਾਦਾਯ ਛਾਯਾ ਵਿਯ, ਇਨ੍ਧਨਂ ਉਪਾਦਾਯ ਅਗ੍ਗਿ ਵਿਯ ਚ, ਖਨ੍ਧੇ ਉਪਾਦਾਯ ਪੁਗ੍ਗਲੋ; ਰੂਪਾਦੀਨਂ ਸਨ੍ਧਾਵਨੇ ਅਸਤਿ ਤੇਸੁ ਖਨ੍ਧੇਸੁ ਭਿਜ੍ਜਮਾਨੇਸੁ ਸੋ ਤਵ ਪੁਗ੍ਗਲੋ ਭਿਜ੍ਜਤਿ ਚੇ, ਏਵਂ ਸਨ੍ਤੇ ਉਚ੍ਛੇਦਾ ਭਵਤਿ ਦਿਟ੍ਠਿ, ਉਚ੍ਛੇਦਦਿਟ੍ਠਿ ਤੇ ਆਪਜ੍ਜਤਿ. ਕਤਰਾ ਯਾ ਬੁਦ੍ਧੇਨ ਵਿਵਜ੍ਜਿਤਾ ਅਕੁਸਲਦਿਟ੍ਠਿ. ਯਾ ਪਨ ‘‘ਉਚ੍ਛੇਦਵਾਦੀ ਸਮਣੋ ਗੋਤਮੋ’’ਤਿ ਪਰਿਯਾਯਭਾਸਿਤਾ, ਨ ਤਂ ਵਦਾਮਾਤਿ ਦਸ੍ਸੇਤਿ. ਅਥਾਪਿ ਤੇਸੁ ਖਨ੍ਧੇਸੁ ਭਿਜ੍ਜਮਾਨੇਸੁ ਸੋ ਪੁਗ੍ਗਲੋ ਨ ਭਿਜ੍ਜਤਿ, ਏਵਂ ਸਨ੍ਤੇ ਸਸ੍ਸਤੋ ਪੁਗ੍ਗਲੋ ਹੋਤਿ. ਤਤੋ ਸੋ ਨਿਬ੍ਬਾਨੇਨ ਸਮਸਮੋ ਆਪਜ੍ਜਤਿ. ਸਮਸਮੋਤਿ ਅਤਿਵਿਯ ਸਮੋ, ਸਮੇਨ ਵਾ ਸਮੋ, ਸਮਭਾਵੇਨੇਵ ਸਮੋ. ਯਥੇਵ ਨਿਬ੍ਬਾਨਂ ਨੁਪ੍ਪਜ੍ਜਤਿ ਨ ਭਿਜ੍ਜਤਿ, ਏਵਂ ਤੇ ਪੁਗ੍ਗਲੋਪਿ ਤੇਨ ਸਮਸਮੋਤਿ.
ਗਤਿਪਰਿਵਤ੍ਤਨਮੁਖੇਨ ਚੁਤਿਪਟਿਸਨ੍ਧਾਨੁਯੋਗੋ ਨਿਟ੍ਠਿਤੋ.
ਅਨੁਯੋਗਵਣ੍ਣਨਾ.