੧੦. ਪਞ੍ਞਤ੍ਤਾਨੁਯੋਗਵਣ੍ਣਨਾ

੬੧-੬੬. ਇਦਾਨਿ ਪਞ੍ਞਤ੍ਤਾਨੁਯੋਗੋ ਨਾਮ ਹੋਤਿ. ਰੂਪਧਾਤੁਯਾ ਹਿ ਪੁਗ੍ਗਲਵਾਦੀ ਰੂਪਿਂ ਪੁਗ੍ਗਲਂ ਪਞ੍ਞਪੇਤਿ, ਤਥਾ ਅਰੂਪਧਾਤੁਯਾ ਅਰੂਪਿਂ. ਤਸ੍ਸ ਤਂ ਲਦ੍ਧਿਂ ਭਿਨ੍ਦਿਤੁਂ ਸਬ੍ਬਾਪਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਚ ਪਟਿਕ੍ਖੇਪੋ ਚ ਇਤਰਸ੍ਸ. ਸੋ ਹਿ ਰੂਪੀਤਿ ਵੁਤ੍ਤੇ ਰੂਪਕਾਯਸਬ੍ਭਾਵਤੋ ਚੇਵ ਤਥਾਰੂਪਾਯ ਚ ਪਞ੍ਞਤ੍ਤਿਯਾ ਅਤ੍ਥਿਤਾਯ ਪਟਿਜਾਨਾਤਿ. ਕਾਮੀਤਿ ਵੁਤ੍ਤੇ ਵੀਤਰਾਗਸਬ੍ਭਾਵਤੋ ਚੇਵ ਤਥਾਰੂਪਾਯ ਚ ਪਞ੍ਞਤ੍ਤਿਯਾ ਨਤ੍ਥਿਤਾਯ ਪਟਿਕ੍ਖਿਪਤਿ. ਅਰੂਪੀਤਿ ਵੁਤ੍ਤੇਪਿ ਅਰੂਪਕ੍ਖਨ੍ਧਸਬ੍ਭਾਵਤੋ ਚੇਵ ਤਥਾਰੂਪਾਯ ਚ ਪਞ੍ਞਤ੍ਤਿਯਾ ਅਤ੍ਥਿਤਾਯ ਪਟਿਜਾਨਾਤਿ. ਦ੍ਵੀਸੁਪਿ ਨਯੇਸੁ ਸਤ੍ਤੋਤਿ ਪੁਗ੍ਗਲਸ੍ਸ ਵੇਵਚਨਵਸੇਨ ਵੁਤ੍ਤਂ.

੬੭. ਇਦਾਨਿ ਯਸ੍ਮਾ ਸੋ ‘‘ਕਾਯੇ ਕਾਯਾਨੁਪਸ੍ਸੀ’’ਤਿ ਆਗਤਟ੍ਠਾਨੇ ਅਞ੍ਞੋ ਕਾਯੋ ਅਞ੍ਞੋ ਪੁਗ੍ਗਲੋਤਿ ਇਚ੍ਛਤਿ, ਤਸ੍ਮਾ ਤਂ ਲਦ੍ਧਿਂ ਭਿਨ੍ਦਿਤੁਂ ਕਾਯੋਤਿ ਵਾ ਸਰੀਰਨ੍ਤਿ ਵਾਤਿਆਦਿ ਸਕਵਾਦੀਪੁਚ੍ਛਾ ਹੋਤਿ. ਤਤ੍ਥ ਕਾਯਂ ਅਪ੍ਪਿਯਂ ਕਰਿਤ੍ਵਾਤਿ ਕਾਯਂ ਅਪ੍ਪੇਤਬ੍ਬਂ ਅਲ੍ਲੀਯਾਪੇਤਬ੍ਬਂ ਏਕੀਭਾਵਂ ਉਪਨੇਤਬ੍ਬਂ ਅਵਿਭਜਿਤਬ੍ਬਂ ਕਤ੍ਵਾ ਪੁਚ੍ਛਾਮੀਤਿ ਅਤ੍ਥੋ. ਏਸੇਸੇਤਿ ਏਸੋ ਸੋਯੇਵ. ਏਸੇ ਏਸੇਤਿਪਿ ਪਾਠੋ. ਏਸੋ ਏਸੋਯੇਵਾਤਿ ਅਤ੍ਥੋ. ਏਕਟ੍ਠੇਤਿ ਏਕਟ੍ਠੋ. ਸਮੇ ਸਮਭਾਗੇ ਤਜ੍ਜਾਤੇਤਿ ਸਮੋ ਸਮਭਾਗੋ ਤਜ੍ਜਾਤਿਕੋ. ਵਚਨਮਤ੍ਤੇਯੇਵੇਤ੍ਥ ਭੇਦੋ. ਅਤ੍ਥਤੋ ਪਨ ਕਾਯੋਵ ਏਸੋਤਿ ਪੁਚ੍ਛਤਿ. ਪਰਵਾਦੀ ਨਾਨਤ੍ਤਂ ਅਪਸ੍ਸਨ੍ਤੋ ਆਮਨ੍ਤਾਤਿ ਪਟਿਜਾਨਾਤਿ. ਪੁਗ੍ਗਲੋਤਿ ਵਾ ਜੀਵੋਤਿ ਵਾਤਿ ਪੁਚ੍ਛਾਯਪਿ ਏਸੇਵ ਨਯੋ. ਅਞ੍ਞੋ ਕਾਯੋਤਿ ਪੁਟ੍ਠੋ ਪਨ ਕਾਯਾਨੁਪਸ੍ਸਨਾਯ ਏਵਂਲਦ੍ਧਿਕਤ੍ਤਾ ਪਟਿਜਾਨਾਤਿ. ਅਞ੍ਞਂ ਜੀਵਨ੍ਤਿ ਪੁਟ੍ਠੋ ਪਨ ਆਹਚ੍ਚ ਭਾਸਿਤਂ ਸੁਤ੍ਤਂ ਪਟਿਕ੍ਖਿਪਿਤੁਂ ਅਸਕ੍ਕੋਨ੍ਤੋ ਅਵਜਾਨਾਤਿ. ਤਤੋ ਪਰਂ ‘‘ਆਜਾਨਾਹਿ ਨਿਗ੍ਗਹ’’ਨ੍ਤਿਆਦਿ ਉਤ੍ਤਾਨਤ੍ਥਮੇਵ.

੬੮. ਪਰਵਾਦੀਪਕ੍ਖੇ ਪਨ ਅਞ੍ਞੋ ਕਾਯੋ ਅਞ੍ਞੋ ਪੁਗ੍ਗਲੋਤਿ ਪੁਟ੍ਠੋ ਸਕਵਾਦੀ ਠਪਨੀਯਪਞ੍ਹਤ੍ਤਾ ਪਟਿਕ੍ਖਿਪਤਿ, ਪਰਵਾਦੀ ਛਲਵਸੇਨ ਪਟਿਕਮ੍ਮਂ ਕਰੋਤਿ. ਤਮ੍ਪਿ ਉਤ੍ਤਾਨਤ੍ਥਮੇਵਾਤਿ.

ਪਞ੍ਞਤ੍ਤਾਨੁਯੋਗਵਣ੍ਣਨਾ ਨਿਟ੍ਠਿਤਾ.