੧੧. ਅਤੀਤਾਨਾਗਤਸਮਨ੍ਨਾਗਤਕਥਾਵਣ੍ਣਨਾ

੫੬੮-੫੭੦. ਇਦਾਨਿ ਅਤੀਤਾਨਾਗਤੇਹਿ ਸਮਨ੍ਨਾਗਤਕਥਾ ਨਾਮ ਹੋਤਿ. ਤਤ੍ਥ ਸਮਨ੍ਨਾਗਤਪਞ੍ਞਤ੍ਤਿ ਪਟਿਲਾਭਪਞ੍ਞਤ੍ਤੀਤਿ ਦ੍ਵੇ ਪਞ੍ਞਤ੍ਤਿਯੋ ਵੇਦਿਤਬ੍ਬਾ. ਤਾਸੁ ਪਚ੍ਚੁਪ੍ਪਨ੍ਨਧਮ੍ਮਸਮਙ੍ਗੀ ਸਮਨ੍ਨਾਗਤੋਤਿ ਵੁਚ੍ਚਤਿ. ਅਟ੍ਠ ਸਮਾਪਤ੍ਤਿਲਾਭਿਨੋ ਪਨ ਸਮਾਪਤ੍ਤਿਯੋ ਕਿਞ੍ਚਾਪਿ ਨ ਏਕਕ੍ਖਣੇ ਪਵਤ੍ਤਨ੍ਤਿ, ਅਞ੍ਞਾ ਅਤੀਤਾ ਹੋਨ੍ਤਿ, ਅਞ੍ਞਾ ਅਨਾਗਤਾ, ਅਞ੍ਞਾ ਪਚ੍ਚੁਪ੍ਪਨ੍ਨਾ, ਪਟਿਵਿਜ੍ਝਿਤ੍ਵਾ ਅਪਰਿਹੀਨਤਾਯ ਪਨ ਲਾਭੀਤਿ ਵੁਚ੍ਚਤਿ. ਤਤ੍ਥ ਯੇਸਂ ਇਮਂ ਵਿਭਾਗਂ ਅਗ੍ਗਹੇਤ੍ਵਾ ਯਸ੍ਮਾ ਝਾਨਲਾਭੀਨਂ ਅਤੀਤਾਨਾਗਤਾਨਿ ਝਾਨਾਨਿਪਿ ਅਤ੍ਥਿ, ਤਸ੍ਮਾ ‘‘ਤੇ ਅਤੀਤੇਨਪਿ ਅਨਾਗਤੇਨਪਿ ਸਮਨ੍ਨਾਗਤਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ. ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ. ‘‘ਅਟ੍ਠਵਿਮੋਕ੍ਖਝਾਯੀ’’ਤਿਆਦਿ ਪਨ ਲਾਭੀਭਾਵਸ੍ਸ ਸਾਧਕਂ, ਨ ਸਮਨ੍ਨਾਗਤਭਾਵਸ੍ਸਾਤਿ.

ਅਤੀਤਾਨਾਗਤਸਮਨ੍ਨਾਗਤਕਥਾਵਣ੍ਣਨਾ.

ਨਵਮੋ ਵਗ੍ਗੋ.