੧੦. ਦਸਮਵਗ੍ਗੋ

੧. ਨਿਰੋਧਕਥਾਵਣ੍ਣਨਾ

੫੭੧-੫੭੨. ਇਦਾਨਿ ਨਿਰੋਧਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਉਪਪਤ੍ਤੇਸਿਯਨ੍ਤਿ ਸਙ੍ਖਂ ਗਤਸ੍ਸ ਭਵਙ੍ਗਚਿਤ੍ਤਸ੍ਸ ਭਙ੍ਗਕ੍ਖਣੇਨ ਸਹੇਵ ਕਿਰਿਯਾਤਿ ਸਙ੍ਖਂ ਗਤਾ ਕੁਸਲਾ ਵਾ ਅਕੁਸਲਾ ਵਾ ਚਤ੍ਤਾਰੋ ਖਨ੍ਧਾ ਚਿਤ੍ਤਸਮੁਟ੍ਠਾਨਰੂਪਞ੍ਚਾਤਿ ਪਞ੍ਚਕ੍ਖਨ੍ਧਾ ਉਪ੍ਪਜ੍ਜਨ੍ਤਿ. ਤੇਸੁ ਹਿ ਅਨੁਪ੍ਪਨ੍ਨੇਸੁ ਭਵਙ੍ਗੇ ਨਿਰੁਦ੍ਧੇ ਸਨ੍ਤਤਿਵਿਚ੍ਛੇਦੋ ਭਵੇਯ੍ਯਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਉਪਪਤ੍ਤੇਸਿਯੇਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਤ੍ਥ ਉਪਪਤ੍ਤੇਸਿਯੇਤਿ ਚਤੂਸੁਪਿ ਪਦੇਸੁ ਬਹੁਵਚਨਭੁਮ੍ਮਤ੍ਥੇ ਏਕਵਚਨਭੁਮ੍ਮਂ. ਉਪਪਤ੍ਤੇਸਿਯੇਸੁ ਪਞ੍ਚਸੁ ਖਨ੍ਧੇਸੁ ਅਨਿਰੁਦ੍ਧੇਸੂਤਿ ਅਯਞ੍ਹੇਤ੍ਥ ਅਤ੍ਥੋ. ਦਸਨ੍ਨਨ੍ਤਿ ਉਪਪਤ੍ਤੇਸਿਯਖਨ੍ਧਾਨਞ੍ਚ ਕਿਰਿਯਖਨ੍ਧਾਨਞ੍ਚ ਵਸੇਨ ਵੁਤ੍ਤਂ. ਤਤ੍ਥ ਪਠਮਪਞ੍ਹੇ ਖਨ੍ਧਲਕ੍ਖਣਵਸੇਨ ਕਿਰਿਯਵਸੇਨ ਚ ਪਞ੍ਚੇਵ ਨਾਮ ਤੇ ਖਨ੍ਧਾਤਿ ਪਟਿਕ੍ਖਿਪਤਿ. ਦੁਤਿਯਪਞ੍ਹੇ ਪੁਰਿਮਪਚ੍ਛਿਮਵਸੇਨ ਉਪਪਤ੍ਤੇਸਿਯਕਿਰਿਯਵਸੇਨ ਚ ਨਾਨਤ੍ਤਂ ਸਨ੍ਧਾਯ ਪਟਿਜਾਨਾਤਿ. ਦ੍ਵਿਨ੍ਨਂ ਪਨ ਫਸ੍ਸਾਨਂ ਚਿਤ੍ਤਾਨਞ੍ਚ ਸਮੋਧਾਨਂ ਪੁਟ੍ਠੋ ਸੁਤ੍ਤਲੇਸਾਭਾਵੇਨ ਪਟਿਕ੍ਖਿਪਤਿ.

ਕਿਰਿਯਾ ਚਤ੍ਤਾਰੋਤਿ ਰੂਪੇਨ ਵਿਨਾ ਕੁਸਲਾ ਅਕੁਸਲਾ ਵਾ ਚਤ੍ਤਾਰੋ ਗਹਿਤਾ. ਕਿਰਿਯਾਞਾਣਨ੍ਤਿ ਪਰਵਾਦਿਨਾ ਚਕ੍ਖੁਵਿਞ੍ਞਾਣਸਮਙ੍ਗਿਕ੍ਖਣੇ ਅਰਹਤੋ ਅਨੁਞ੍ਞਾਤਂ ਅਨਾਰਮ੍ਮਣਞਾਣਂ. ਨਿਰੁਦ੍ਧੇ ਮਗ੍ਗੋ ਉਪ੍ਪਜ੍ਜਤੀਤਿ ਪੁਚ੍ਛਾ ਪਰਵਾਦਿਸ੍ਸ, ਅਨਿਰੁਦ੍ਧੇ ਅਨੁਪ੍ਪਜ੍ਜਨਤੋ ਪਟਿਞ੍ਞਾ ਸਕਵਾਦਿਸ੍ਸ. ਮਤੋ ਮਗ੍ਗਂ ਭਾਵੇਤੀਤਿ ਛਲੇਨ ਪੁਚ੍ਛਾ ਪਰਵਾਦਿਸ੍ਸ. ਯਸ੍ਮਾ ਪਨ ਪਟਿਸਨ੍ਧਿਤੋ ਯਾਵ ਚੁਤਿਚਿਤ੍ਤਾ ਸਤ੍ਤੋ ਜੀਵਤਿਯੇਵ ਨਾਮ, ਤਸ੍ਮਾ ਸਕਵਾਦੀ ਨ ਹੇਵਨ੍ਤਿ ਪਟਿਕ੍ਖਿਪਤਿ.

ਨਿਰੋਧਕਥਾਵਣ੍ਣਨਾ.

੨. ਰੂਪਂਮਗ੍ਗੋਤਿਕਥਾਵਣ੍ਣਨਾ

੫੭੩-੫੭੫. ਇਦਾਨਿ ਰੂਪਂ ਮਗ੍ਗੋਤਿਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਸਮ੍ਮਾਵਾਚਾਕਮ੍ਮਨ੍ਤਾਜੀਵਾ ਰੂਪ’’ਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਮਹਿਸਾਸਕਸਮ੍ਮਿਤਿਯਮਹਾਸਂਘਿਕਾਨਂ; ਤੇ ਸਨ੍ਧਾਯ ਮਗ੍ਗਸਮਙ੍ਗਿਸ੍ਸਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤੇ ਸਮ੍ਮਾਵਾਚਾਦਯੋ ਰੂਪਂ, ਨ ਵਿਰਤਿਯੋ, ਯਥਾ ਸਮ੍ਮਾਦਿਟ੍ਠਾਦਿਮਗ੍ਗੋ ਸਾਰਮ੍ਮਣਾਦਿਸਭਾਵੋ, ਏਵਂ ਤਮ੍ਪਿ ਰੂਪਂ ਸਿਯਾ’’ਤਿ ਚੋਦੇਤੁਂ ਸਾਰਮ੍ਮਣੋਤਿਆਦਿਮਾਹ. ਤਤ੍ਥ ਪਟਿਕ੍ਖੇਪੋ ਚ ਪਟਿਞ੍ਞਾ ਚ ਪਰਵਾਦਿਨੋ ਲਦ੍ਧਿਅਨੁਰੂਪੇਨ ਵੇਦਿਤਬ੍ਬਾ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਰੂਪਂ ਮਗ੍ਗੋਤਿਕਥਾਵਣ੍ਣਨਾ.

੩. ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਮਗ੍ਗਕਥਾਵਣ੍ਣਨਾ

੫੭੬. ਇਦਾਨਿ ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਮਗ੍ਗਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਚਕ੍ਖੁਨਾ ਰੂਪਂ ਦਿਸ੍ਵਾ ਨ ਨਿਮਿਤ੍ਤਗ੍ਗਾਹੀ ਹੋਤੀ’’ਤਿ ਸੁਤ੍ਤਂ ਨਿਸ੍ਸਾਯ ‘‘ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਅਤ੍ਥਿ ਮਗ੍ਗਭਾਵਨਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਸਚੇ ਤਸ੍ਸ ਮਗ੍ਗਭਾਵਨਾ ਅਤ੍ਥਿ, ਪਞ੍ਚਵਿਞ੍ਞਾਣਗਤਿਕੇਨ ਵਾ ਮਗ੍ਗੇਨ, ਮਗ੍ਗਗਤਿਕੇਹਿ ਵਾ ਪਞ੍ਚਵਿਞ੍ਞਾਣੇਹਿ ਭਵਿਤਬ੍ਬਂ, ਨ ਚ ਤਾਨਿ ਮਗ੍ਗਗਤਿਕਾਨਿ ਅਨਿਬ੍ਬਾਨਾਰਮ੍ਮਣਤ੍ਤਾ ਅਲੋਕੁਤ੍ਤਰਤ੍ਤਾ ਚ, ਨ ਮਗ੍ਗੋ ਪਞ੍ਚਵਿਞ੍ਞਾਣਗਤਿਕੋ ਤੇਸਂ ਲਕ੍ਖਣੇਨ ਅਸਙ੍ਗਹਿਤਤ੍ਤਾ’’ਤਿ ਚੋਦੇਤੁਂ ਨਨੁ ਪਞ੍ਚਵਿਞ੍ਞਾਣਾ ਉਪ੍ਪਨ੍ਨਵਤ੍ਥੁਕਾਤਿਆਦਿਮਾਹ. ਤਤ੍ਰਾਯਂ ਅਧਿਪ੍ਪਾਯੋ – ਯਦਿ ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਮਗ੍ਗਭਾਵਨਾ ਸਿਯਾ, ਯੇਨ ਮਨੋਵਿਞ੍ਞਾਣੇਨ ਮਗ੍ਗੋ ਸਮ੍ਪਯੁਤ੍ਤੋ, ਤਮ੍ਪਿ ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਸਿਯਾ. ਏਵਂ ਸਨ੍ਤੇ ਯਦਿਦਂ ‘‘ਪਞ੍ਚਵਿਞ੍ਞਾਣਾ ਉਪ੍ਪਨ੍ਨਵਤ੍ਥੁਕਾ’’ਤਿਆਦਿ ਲਕ੍ਖਣਂ ਵੁਤ੍ਤਂ, ਤਂ ਏਵਂ ਅਵਤ੍ਵਾ ‘‘ਛ ਵਿਞ੍ਞਾਣਾ’’ਤਿ ਵਤ੍ਤਬ੍ਬਂ ਸਿਯਾ. ਤਥਾ ਪਨ ਅਵਤ੍ਵਾ ‘‘ਪਞ੍ਚਵਿਞ੍ਞਾਣਾ’’ਤ੍ਵੇਵ ਵੁਤ੍ਤਂ, ਤਸ੍ਮਾ ਨ ਵਤਬ੍ਬਂ ‘‘ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਅਤ੍ਥਿ ਮਗ੍ਗਭਾਵਨਾ’’ਤਿ. ਯਸ੍ਮਾ ਚੇਤ੍ਥ ਅਯਮੇਵ ਅਧਿਪ੍ਪਾਯੋ, ਤਸ੍ਮਾ ਸਕਵਾਦੀ ਤਂ ਲਕ੍ਖਣਂ ਪਰਵਾਦਿਂ ਸਮ੍ਪਟਿਚ੍ਛਾਪੇਤ੍ਵਾ ਨੋ ਚ ਵਤ ਰੇ ਵਤ੍ਤਬ੍ਬੇ ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਅਤ੍ਥਿ ਮਗ੍ਗਭਾਵਨਾਤਿ ਆਹ.

ਅਪਰੋ ਨਯੋ – ਪਞ੍ਚਵਿਞ੍ਞਾਣਾ ਉਪ੍ਪਨ੍ਨਵਤ੍ਥੁਕਾ, ਮਗ੍ਗੋ ਅਵਤ੍ਥੁਕੋਪਿ ਹੋਤਿ. ਤੇ ਚ ਉਪ੍ਪਨ੍ਨਾਰਮ੍ਮਣਾ, ਮਗ੍ਗੋ ਨਵਤ੍ਤਬ੍ਬਾਰਮ੍ਮਣੋ. ਤੇ ਪੁਰੇਜਾਤਵਤ੍ਥੁਕਾਵ ਮਗ੍ਗੋ ਅਵਤ੍ਥੁਕੋਪਿ. ਤੇ ਪੁਰੇਜਾਤਾਰਮ੍ਮਣਾ, ਮਗ੍ਗੋ ਅਪੁਰੇਜਾਤਾਰਮ੍ਮਣੋ. ਤੇ ਅਜ੍ਝਤ੍ਤਿਕਵਤ੍ਥੁਕਾਵ ਮਗ੍ਗੋ ਅਵਤ੍ਥੁਕੋਪਿ ਹੋਤਿ. ਤੇ ਚ ਰੂਪਾਦਿਵਸੇਨ ਬਾਹਿਰਾਰਮ੍ਮਣਾ, ਮਗ੍ਗੋ ਨਿਬ੍ਬਾਨਾਰਮ੍ਮਣੋ. ਤੇ ਅਨਿਰੁਦ੍ਧਂ ਵਤ੍ਥੁਂ ਨਿਸ੍ਸਯਂ ਕਤ੍ਵਾ ਪਵਤ੍ਤਨਤੋ ਅਸਮ੍ਭਿਨ੍ਨਵਤ੍ਥੁਕਾ, ਮਗ੍ਗੋ ਅਵਤ੍ਥੁਕੋਪਿ. ਤੇ ਅਨਿਰੁਦ੍ਧਾਨੇਵ ਰੂਪਾਦੀਨਿ ਆਰਬ੍ਭ ਪਵਤ੍ਤਨਤੋ ਅਸਮ੍ਭਿਨ੍ਨਾਰਮ੍ਮਣਾ, ਮਗ੍ਗੋ ਨਿਬ੍ਬਾਨਾਰਮ੍ਮਣੋ. ਤੇ ਨਾਨਾਵਤ੍ਥੁਕਾ, ਮਗ੍ਗੋ ਅਵਤ੍ਥੁਕੋ ਵਾ ਏਕਵਤ੍ਥੁਕੋ ਵਾ. ਤੇ ਨਾਨਾਰਮ੍ਮਣਾ ਮਗ੍ਗੋ ਏਕਾਰਮ੍ਮਣੋ. ਤੇ ਅਤ੍ਤਨੋ ਅਤ੍ਤਨੋਵ ਰੂਪਾਦਿਗੋਚਰੇ ਪਵਤ੍ਤਨਤੋ ਨ ਅਞ੍ਞਮਞ੍ਞਸ੍ਸ ਗੋਚਰਵਿਸਯਂ ਪਚ੍ਚਨੁਭੋਨ੍ਤਿ, ਮਗ੍ਗੋ ਰੂਪਾਦੀਸੁ ਏਕਮ੍ਪਿ ਗੋਚਰਂ ਨ ਕਰੋਤਿ. ਤੇ ਕਿਰਿਯਮਨੋਧਾਤੁਂ ਪੁਰੇਚਾਰਿਕਂ ਕਤ੍ਵਾ ਉਪ੍ਪਜ੍ਜਨਤੋ ਨ ਅਸਮਨ੍ਨਾਹਾਰਾ ਨ ਅਮਨਸਿਕਾਰਾ ਉਪ੍ਪਜ੍ਜਨ੍ਤਿ, ਮਗ੍ਗੋ ਨਿਰਾਵਜ੍ਜਨੋਵ. ਤੇ ਸਮ੍ਪਟਿਚ੍ਛਨਾਦੀਹਿ ਵੋਕਿਣ੍ਣਾ ਉਪ੍ਪਜ੍ਜਨ੍ਤਿ, ਮਗ੍ਗਸ੍ਸ ਵੋਕਾਰੋਯੇਵ ਨਤ੍ਥਿ. ਤੇ ਅਞ੍ਞਮਞ੍ਞਂ ਪੁਬ੍ਬਚਰਿਮਭਾਵੇਨ ਉਪ੍ਪਜ੍ਜਨ੍ਤਿ, ਮਗ੍ਗਸ੍ਸ ਤੇਹਿ ਸਦ੍ਧਿਂ ਪੁਰਿਮਪਚ੍ਛਿਮਤਾਵ ਨਤ੍ਥਿ, ਤੇਸਂ ਅਨੁਪ੍ਪਤ੍ਤਿਕਾਲੇ ਤਿਕ੍ਖਵਿਪਸ੍ਸਨਾਸਮਯੇ, ਤੇਸਂ ਅਨੁਪ੍ਪਤ੍ਤਿਦੇਸੇ ਆਰੁਪ੍ਪੇਪਿ ਚ ਉਪ੍ਪਜ੍ਜਨਤੋ. ਤੇ ਸਮ੍ਪਟਿਚ੍ਛਨਾਦੀਹਿ ਅਨ੍ਤਰਿਤਤ੍ਤਾ ਨ ਅਞ੍ਞਮਞ੍ਞਸ੍ਸ ਸਮਨਨ੍ਤਰਾ ਉਪ੍ਪਜ੍ਜਨ੍ਤਿ, ਮਗ੍ਗਸ੍ਸ ਸਮ੍ਪਟਿਚ੍ਛਨਾਦੀਹਿ ਅਨ੍ਤਰਿਤਭਾਵੋਵ ਨਤ੍ਥਿ. ਤੇਸਂ ਅਞ੍ਞਤ੍ਰ ਅਭਿਨਿਪਾਤਾ ਆਭੋਗਮਤ੍ਤਮ੍ਪਿ ਕਿਚ੍ਚਂ ਨਤ੍ਥਿ, ਮਗ੍ਗਸ੍ਸ ਕਿਲੇਸਸਮੁਗ੍ਘਾਤਨਂ ਕਿਚ੍ਚਨ੍ਤਿ. ਯਸ੍ਮਾ ਚੇਤ੍ਥ ਅਯਮ੍ਪਿ ਅਧਿਪ੍ਪਾਯੋ, ਤਸ੍ਮਾ ਸਕਵਾਦੀ ਇਮੇਹਾਕਾਰੇਹਿ ਪਰਵਾਦਿਂ ਮਗ੍ਗਸ੍ਸ ਅਪਞ੍ਚਵਿਞ੍ਞਾਣਗਤਿਕਭਾਵਂ ਸਮ੍ਪਟਿਚ੍ਛਾਪੇਤ੍ਵਾ ਨੋ ਚ ਵਤ ਰੇ ਵਤ੍ਤਬ੍ਬੇ ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਅਤ੍ਥਿ ਮਗ੍ਗਭਾਵਨਾਤਿ ਆਹ.

੫੭੭. ਸੁਞ੍ਞਤਂ ਆਰਬ੍ਭਾਤਿ ‘‘ਯਥਾ ਲੋਕੁਤ੍ਤਰਮਗ੍ਗੋ ਸੁਞ੍ਞਤਂ ਨਿਬ੍ਬਾਨਂ ਆਰਬ੍ਭ, ਲੋਕਿਯੋ ਸੁਦ੍ਧਸਙ੍ਖਾਰਪੁਞ੍ਜਂ ਆਰਬ੍ਭ ਉਪ੍ਪਜ੍ਜਤਿ, ਕਿਂ ਤੇ ਏਵਂ ਚਕ੍ਖੁਵਿਞ੍ਞਾਣ’’ਨ੍ਤਿ ਪੁਚ੍ਛਤਿ. ਇਤਰੋ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚਾ’’ਤਿ ਵਚਨਤੋ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ‘‘ਨ ਨਿਮਿਤ੍ਤਗ੍ਗਾਹੀ’’ਤਿ ਵਚਨਤੋ ਯਂ ਤਤ੍ਥ ਅਨਿਮਿਤ੍ਤਂ, ਤਦੇਵ ਸੁਞ੍ਞਤਨ੍ਤਿ ਸਨ੍ਧਾਯ ਪਟਿਜਾਨਾਤਿ. ਚਕ੍ਖੁਞ੍ਚ ਪਟਿਚ੍ਚਾਤਿ ਪਞ੍ਹਦ੍ਵਯੇਪਿ ਏਸੇਵ ਨਯੋ.

੫੭੮-੫੭੯. ਚਕ੍ਖੁਵਿਞ੍ਞਾਣਂ ਅਤੀਤਾਨਾਗਤਂ ਆਰਬ੍ਭਾਤਿ ਏਤ੍ਥ ਅਯਮਧਿਪ੍ਪਾਯੋ – ਮਨੋਵਿਞ੍ਞਾਣਸਮਙ੍ਗਿਸ੍ਸ ਅਤ੍ਥਿ ਮਗ੍ਗਭਾਵਨਾ, ਮਨੋਵਿਞ੍ਞਾਣਞ੍ਚ ਅਤੀਤਾਨਾਗਤਮ੍ਪਿ ਆਰਬ੍ਭ ਉਪ੍ਪਜ੍ਜਤਿ, ਕਿਂ ਤੇ ਏਵਂ ਚਕ੍ਖੁਵਿਞ੍ਞਾਣਮ੍ਪੀਤਿ. ਫਸ੍ਸਂ ਆਰਬ੍ਭਾਤਿਆਦੀਸੁਪਿ ਏਸੇਵ ਨਯੋ. ਚਕ੍ਖੁਨਾ ਰੂਪਂ ਦਿਸ੍ਵਾ ਨ ਨਿਮਿਤ੍ਤਗ੍ਗਾਹੀਤਿ ਏਤ੍ਥ ਜਵਨਕ੍ਖਣੇ ਨ ਨਿਮਿਤ੍ਤਗ੍ਗਾਹਿਤਾ ਵੁਤ੍ਤਾ, ਨ ਚਕ੍ਖੁਵਿਞ੍ਞਾਣਕ੍ਖਣੇ. ਤਸ੍ਮਾ ਲੋਕਿਯਮਗ੍ਗਮ੍ਪਿ ਸਨ੍ਧਾਯੇਤਂ ਅਸਾਧਕਨ੍ਤਿ.

ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਮਗ੍ਗਕਥਾਵਣ੍ਣਨਾ.

੪. ਪਞ੍ਚਵਿਞ੍ਞਾਣਾ ਕੁਸਲਾਪੀਤਿਕਥਾਵਣ੍ਣਨਾ

੫੮੦-੫੮੩. ਇਦਾਨਿ ਪਞ੍ਚਵਿਞ੍ਞਾਣਾ ਕੁਸਲਾਪੀਤਿਕਥਾ ਨਾਮ ਹੋਤਿ. ਸਾ ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥਤੋ ਵੇਦਿਤਬ੍ਬਾਤਿ.

ਪਞ੍ਚਵਿਞ੍ਞਾਣਾ ਕੁਸਲਾਪੀਤਿਕਥਾਵਣ੍ਣਨਾ.

੫. ਪਞ੍ਚਵਿਞ੍ਞਾਣਾ ਸਾਭੋਗਾਤਿਕਥਾਵਣ੍ਣਨਾ

੫੮੪-੫੮੬. ਇਦਾਨਿ ਪਞ੍ਚਵਿਞ੍ਞਾਣਾ ਸਾਭੋਗਾਤਿਕਥਾ ਨਾਮ ਹੋਤਿ. ਤਤ੍ਥ ਆਭੋਗੋ ਨਾਮ ਕੁਸਲਾਕੁਸਲਵਸੇਨ ਹੋਤਿ ਸਤ੍ਥਾਰਾ ਚ ‘‘ਚਕ੍ਖੁਨਾ ਰੂਪਂ ਦਿਸ੍ਵਾ ਨਿਮਿਤ੍ਤਗ੍ਗਾਹੀ ਹੋਤਿ, ਨ ਨਿਮਿਤ੍ਤਗ੍ਗਾਹੀ ਹੋਤੀ’’ਤਿਆਦਿ ਵੁਤ੍ਤਂ, ਤਂ ਅਯੋਨਿਸੋ ਗਹੇਤ੍ਵਾ ‘‘ਪਞ੍ਚਵਿਞ੍ਞਾਣਾ ਸਾਭੋਗਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਪੁਰਿਮਕਥਾਸਦਿਸਮੇਵਾਤਿ.

ਪਞ੍ਚਵਿਞ੍ਞਾਣਾ ਸਾਭੋਗਾਤਿਕਥਾਵਣ੍ਣਨਾ.

੬. ਦ੍ਵੀਹਿ ਸੀਲੇਹੀਤਿਕਥਾਵਣ੍ਣਨਾ

੫੮੭-੫੮੯. ਇਦਾਨਿ ਦ੍ਵੀਹਿ ਸੀਲੇਹੀਤਿਕਥਾ ਨਾਮ ਹੋਤਿ. ਤਤ੍ਥ ‘‘ਸੀਲੇ ਪਤਿਟ੍ਠਾਯ ਨਰੋ ਸਪਞ੍ਞੋ’’ਤਿਆਦਿਵਚਨਤੋ (ਸਂ. ਨਿ. ੧.੨੩) ਯਸ੍ਮਾ ਲੋਕਿਯੇਨ ਸੀਲੇਨ ਸੀਲਵਾ ਲੋਕੁਤ੍ਤਰਂ ਮਗ੍ਗਂ ਭਾਵੇਤਿ, ਤਸ੍ਮਾ ‘‘ਪੁਰਿਮੇਨ ਚ ਲੋਕਿਯੇਨ ਮਗ੍ਗਕ੍ਖਣੇ ਲੋਕੁਤ੍ਤਰੇਨ ਚਾਤਿ ਦ੍ਵੀਹਿ ਸੀਲੇਹਿ ਸਮਨ੍ਨਾਗਤੋ ਨਾਮ ਹੋਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਂਯੇਵ, ਤੇ ਸਨ੍ਧਾਯ ਮਗ੍ਗਸਮਙ੍ਗੀਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਸੋ ਏਕਕ੍ਖਣੇ ਲੋਕਿਯਲੋਕੁਤ੍ਤਰੇਹਿ ਦ੍ਵੀਹਿ ਸੀਲੇਹਿ ਸਮਨ੍ਨਾਗਤੋ, ਦ੍ਵੀਹਿ ਫਸ੍ਸਾਦੀਹਿਪਿ ਤੇਨ ਸਮਨ੍ਨਾਗਤੇਨ ਭਵਿਤਬ੍ਬ’’ਨ੍ਤਿ ਚੋਦੇਤੁਂ ਦ੍ਵੀਹਿ ਫਸ੍ਸੇਹੀਤਿਆਦਿਮਾਹ. ਇਤਰੋ ਤਥਾਰੂਪਂ ਨਯਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਲੋਕਿਯੇਨ ਚ ਲੋਕੁਤ੍ਤਰੇਨ ਚਾਤਿ ਪਞ੍ਹੇ ਪੁਬ੍ਬੇ ਸਮਾਦਿਨ੍ਨਞ੍ਚ ਮਗ੍ਗਕ੍ਖਣੇ ਉਪ੍ਪਨ੍ਨਸਮ੍ਮਾਵਾਚਾਦੀਨਿ ਚ ਸਨ੍ਧਾਯ ਪਟਿਜਾਨਾਤਿ.

ਲੋਕਿਯੇ ਸੀਲੇ ਨਿਰੁਦ੍ਧੇਤਿ ਪੁਚ੍ਛਾ ਪਰਵਾਦਿਸ੍ਸ, ਖਣਭਙ੍ਗਨਿਰੋਧਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਇਤਰੋ ਪਨ ਤਂ ਵੀਤਿਕ੍ਕਮਂ ਵਿਯ ਸਲ੍ਲਕ੍ਖੇਨ੍ਤੋ ਦੁਸ੍ਸੀਲੋਤਿਆਦਿਮਾਹ. ਲਦ੍ਧਿਪਤਿਟ੍ਠਾਪਨਂ ਪਨਸ੍ਸ ਪੁਬ੍ਬੇ ਅਭਿਨ੍ਨਸੀਲਤਂਯੇਵ ਦੀਪੇਤਿ, ਨ ਦ੍ਵੀਹਿ ਸਮਨ੍ਨਾਗਤਤਂ. ਤਸ੍ਮਾ ਅਪ੍ਪਤਿਟ੍ਠਿਤਾਵ ਲਦ੍ਧੀਤਿ.

ਦ੍ਵੀਹਿ ਸੀਲੇਹੀਤਿਕਥਾਵਣ੍ਣਨਾ.

੭. ਸੀਲਂ ਅਚੇਤਸਿਕਨ੍ਤਿਕਥਾਵਣ੍ਣਨਾ

੫੯੦-੫੯੪. ਇਦਾਨਿ ਸੀਲਂ ਅਚੇਤਸਿਕਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਸੀਲੇ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧੇਪਿ ਸਮਾਦਾਨਹੇਤੁਕੋ ਸੀਲੋਪਚਯੋ ਨਾਮ ਅਤ੍ਥਿ, ਯੇਨ ਸੋ ਸੀਲਵਾਯੇਵ ਨਾਮ ਹੋਤਿ, ਤਸ੍ਮਾ ‘‘ਸੀਲਂ ਅਚੇਤਸਿਕ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ‘‘ਦਾਨਂ ਅਚੇਤਸਿਕ’’ਨ੍ਤਿਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਲਦ੍ਧਿਪਤਿਟ੍ਠਾਪਨਮ੍ਪਿ ਅਯੋਨਿਸੋ ਗਹਿਤਤ੍ਤਾ ਅਪ੍ਪਤਿਟ੍ਠਾਪਨਮੇਵਾਤਿ.

ਸੀਲਂ ਅਚੇਤਸਿਕਨ੍ਤਿਕਥਾਵਣ੍ਣਨਾ.

੮. ਸੀਲਂ ਨ ਚਿਤ੍ਤਾਨੁਪਰਿਵਤ੍ਤੀਤਿਕਥਾਵਣ੍ਣਨਾ

੫੯੫-੫੯੭. ਇਦਾਨਿ ਸੀਲਂ ਨ ਚਿਤ੍ਤਾਨੁਪਰਿਵਤ੍ਤੀਤਿਕਥਾ ਨਾਮ ਹੋਤਿ. ਤਤ੍ਥ ਨ ਚਿਤ੍ਤਾਨੁਪਰਿਵਤ੍ਤੀਤਿ ਭਾਸਨ੍ਤਰਮੇਵ ਨਾਨਂ, ਸੇਸਂ ਪੁਰਿਮਕਥਾਸਦਿਸਮੇਵਾਤਿ.

ਸੀਲਂ ਨ ਚਿਤ੍ਤਾਨੁਪਰਿਵਤ੍ਤੀਤਿਕਥਾਵਣ੍ਣਨਾ.

੯. ਸਮਾਦਾਨਹੇਤੁਕਥਾਵਣ੍ਣਨਾ

੫੯੮-੬੦੦. ਇਦਾਨਿ ਸਮਾਦਾਨਹੇਤੁਕਥਾ ਨਾਮ ਹੋਤਿ. ਤਤ੍ਥ ‘‘ਆਰਾਮਰੋਪਾ’’ਤਿ ਗਾਥਾਯ ਅਤ੍ਥਂ ਅਯੋਨਿਸੋ ਗਹੇਤ੍ਵਾ ‘‘ਸਦਾ ਪੁਞ੍ਞਂ ਪਵਡ੍ਢਤੀ’’ਤਿ ਵਚਨਤੋ ‘‘ਸਮਾਦਾਨਹੇਤੁਕਂ ਸੀਲਂ ਵਡ੍ਢਤੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਞ੍ਞੇਵ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਚਿਤ੍ਤਵਿਪ੍ਪਯੁਤ੍ਤਂ ਸੀਲੋਪਚਯਂ ਸਨ੍ਧਾਯ ਪਟਿਞ੍ਞਾ ਪਰਵਾਦਿਸ੍ਸ. ਸੇਸਂ ਪੁਰਿਮਕਥਾਸਦਿਸਮੇਵਾਤਿ.

ਸਮਾਦਾਨਹੇਤੁਕਥਾਵਣ੍ਣਨਾ.

੧੦. ਵਿਞ੍ਞਤ੍ਤਿ ਸੀਲਨ੍ਤਿਕਥਾਵਣ੍ਣਨਾ

੬੦੧-੬੦੨. ਇਦਾਨਿ ਵਿਞ੍ਞਤ੍ਤਿ ਸੀਲਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਕਾਯਵਿਞ੍ਞਤ੍ਤਿ ਕਾਯਕਮ੍ਮਂ, ਵਚੀਵਿਞ੍ਞਤ੍ਤਿ ਵਚੀਕਮ੍ਮਨ੍ਤਿ ਗਹਿਤਤ੍ਤਾ ‘‘ਵਿਞ੍ਞਤ੍ਤਿ ਸੀਲ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਞ੍ਚੇਵ ਸਮ੍ਮਿਤਿਯਾਨਞ੍ਚ; ਤੇ ਸਨ੍ਧਾਯ ਵਿਞ੍ਞਤ੍ਤੀਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਯਸ੍ਮਾ ਸੀਲਂ ਨਾਮ ਵਿਰਤਿ, ਨ ਰੂਪਧਮ੍ਮੋ, ਤਸ੍ਮਾ ਤੇਨਤ੍ਥੇਨ ਚੋਦੇਤੁਂ ਪਾਣਾਤਿਪਾਤਾ ਵੇਰਮਣੀਤਿਆਦਿਮਾਹ. ਅਭਿਵਾਦਨਂ ਸੀਲਨ੍ਤਿਆਦਿ ਯਥਾਰੂਪਂ ਵਿਞ੍ਞਤ੍ਤਿਂ ਸੋ ‘‘ਸੀਲ’’ਨ੍ਤਿ ਮਞ੍ਞਤਿ ਤਂ ਉਦ੍ਧਰਿਤ੍ਵਾ ਦਸ੍ਸੇਤੁਂ ਵੁਤ੍ਤਂ. ਯਸ੍ਮਾ ਪਨ ਸਾ ਵਿਰਤਿ ਨ ਹੋਤਿ, ਤਸ੍ਮਾ ਪੁਨ ਪਾਣਾਤਿਪਾਤਾਤਿਆਦਿਮਾਹ. ਲਦ੍ਧਿ ਪਨਸ੍ਸ ਛਲੇਨ ਪਤਿਟ੍ਠਿਤਤ੍ਤਾ ਅਪ੍ਪਤਿਟ੍ਠਿਤਾਯੇਵਾਤਿ.

ਵਿਞ੍ਞਤ੍ਤਿ ਸੀਲਨ੍ਤਿਕਥਾਵਣ੍ਣਨਾ.

੧੧. ਅਵਿਞ੍ਞਤ੍ਤਿ ਦੁਸ੍ਸੀਲ੍ਯਨ੍ਤਿਕਥਾਵਣ੍ਣਨਾ

੬੦੩-੬੦੪. ਇਦਾਨਿ ਅਵਿਞ੍ਞਤ੍ਤਿ ਦੁਸ੍ਸੀਲ੍ਯਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਚਿਤ੍ਤਵਿਪ੍ਪਯੁਤ੍ਤਂ ਅਪੁਞ੍ਞੂਪਚਯਞ੍ਚੇਵ ਆਣਤ੍ਤਿਯਾ ਚ ਪਾਣਾਤਿਪਾਤਾਦੀਸੁ ਅਙ੍ਗਪਾਰਿਪੂਰਿਂ ਸਨ੍ਧਾਯ ‘‘ਅਵਿਞ੍ਞਤ੍ਤਿ ਦੁਸ੍ਸੀਲ੍ਯ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਮਹਾਸਂਘਿਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਸਚੇ ਸਾ ਦੁਸ੍ਸੀਲ੍ਯਂ, ਪਾਣਾਤਿਪਾਤਾਦੀਸੁ ਅਞ੍ਞਤਰਾ ਸਿਯਾ’’ਤਿ ਚੋਦੇਤੁਂ ਪਾਣਾਤਿਪਾਤੋਤਿਆਦਿਮਾਹ. ਪਾਪਕਮ੍ਮਂ ਸਮਾਦਿਯਿਤ੍ਵਾਤਿ ‘‘ਅਸੁਕਂ ਨਾਮ ਘਾਤੇਸ੍ਸਾਮਿ, ਅਸੁਕਂ ਭਣ੍ਡਂ ਅਵਹਰਿਸ੍ਸਾਮੀ’’ਤਿ ਏਵਂ ਪਾਪਸਮਾਦਾਨਂ ਕਤ੍ਵਾ. ਉਭੋ ਵਡ੍ਢਨ੍ਤੀਤਿ ਪੁਟ੍ਠੋ ਦਾਨਕ੍ਖਣੇ ਪਾਪਸ੍ਸ ਅਨੁਪ੍ਪਤ੍ਤਿਂ ਸਨ੍ਧਾਯ ਪਟਿਕ੍ਖਿਪਤਿ. ਦੁਤਿਯਂ ਪੁਟ੍ਠੋ ਚਿਤ੍ਤਵਿਪ੍ਪਯੁਤ੍ਤਂ ਪਾਪੂਪਚਯਂ ਸਨ੍ਧਾਯ ਪਟਿਜਾਨਾਤਿ. ਸੇਸਮੇਤ੍ਥ ਪਰਿਭੋਗਮਯਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਲਦ੍ਧਿਪਤਿਟ੍ਠਾਪਨਮ੍ਪਿਸ੍ਸ ਪਾਪਸਮਾਦਿਨ੍ਨਪੁਬ੍ਬਭਾਗਮੇਵ ਸਾਧੇਤਿ; ਨ ਅਵਿਞ੍ਞਤ੍ਤਿਯਾ ਦੁਸ੍ਸੀਲਭਾਵਨ੍ਤਿ.

ਅਵਿਞ੍ਞਤ੍ਤਿ ਦੁਸ੍ਸੀਲ੍ਯਨ੍ਤਿਕਥਾਵਣ੍ਣਨਾ.

ਦਸਮੋ ਵਗ੍ਗੋ.

ਦੁਤਿਯਪਣ੍ਣਾਸਕੋ ਸਮਤ੍ਤੋ.