੯. ਨਵਮਵਗ੍ਗੋ
੧. ਆਨਿਸਂਸਦਸ੍ਸਾਵੀਕਥਾਵਣ੍ਣਨਾ
੫੪੭. ਇਦਾਨਿ ਆਨਿਸਂਸਦਸ੍ਸਾਵੀਕਥਾ ਨਾਮ ਹੋਤਿ. ਤਤ੍ਥ ਸਕਸਮਯੇ ਸਙ੍ਖਾਰੇ ਆਦੀਨਵਤੋ ਨਿਬ੍ਬਾਨਞ੍ਚ ਆਨਿਸਂਸਤੋ ਪਸ੍ਸਨ੍ਤਸ੍ਸ ਸਂਯੋਜਨਪ੍ਪਹਾਨਂ ਹੋਤੀਤਿ ਨਿਚ੍ਛਯੋ. ਯੇਸਂ ਪਨ ਤੇਸੁ ਦ੍ਵੀਸੁਪਿ ਏਕਂਸਿਕਵਾਦਂ ਗਹੇਤ੍ਵਾ ‘‘ਆਨਿਸਂਸਦਸ੍ਸਾਵਿਨੋਵ ਸਂਯੋਜਨਪ੍ਪਹਾਨਂ ਹੋਤੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥਸ੍ਸ ‘‘ਏਕਂਸਿਕਵਾਦੋ ਤਯਾ ਗਹਿਤੋ, ਆਦੀਨਵੋਪਿ ਦਟ੍ਠਬ੍ਬੋਯੇਵਾ’’ਤਿ ਵਿਭਾਗਦਸ੍ਸਨਤ੍ਥਂ ਸਕਵਾਦੀ ਸਙ੍ਖਾਰੇਤਿਆਦਿਮਾਹ.
ਸਙ੍ਖਾਰੇ ਚ ਅਨਿਚ੍ਚਤੋ ਮਨਸਿਕਰੋਤਿ, ਨਿਬ੍ਬਾਨੇ ਚ ਆਨਿਸਂਸਦਸ੍ਸਾਵੀ ਹੋਤੀਤਿ ਪਞ੍ਹਸ੍ਮਿਂ ਅਯਮਧਿਪ੍ਪਾਯੋ – ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨਂ ਹੋਤੀਤਿ ਤੇਸਂ ਲਦ੍ਧਿ. ਨਨੁ ਸਙ੍ਖਾਰੇ ਅਨਿਚ੍ਚਤੋ ਮਨਸਿਕਰੋਤੋ ਸਂਯੋਜਨਾ ਪਹੀਯਨ੍ਤੀਤਿ ਚ ਪੁਟ੍ਠੋ ਆਮਨ੍ਤਾਤਿ ਪਟਿਜਾਨਾਤਿ. ਤੇਨ ਤੇ ਸਙ੍ਖਾਰੇ ਚ ਅਨਿਚ੍ਚਤੋ ਮਨਸਿਕਰੋਤਿ, ਨਿਬ੍ਬਾਨੇ ਚ ਆਨਿਸਂਸਦਸ੍ਸਾਵੀ ਹੋਤੀਤਿ ਇਦਂ ਆਪਜ੍ਜਤਿ, ਕਿਂ ਸਮ੍ਪਟਿਚ੍ਛਸਿ ਏਤਨ੍ਤਿ. ਤਤੋ ਪਰਵਾਦੀ ਏਕਚਿਤ੍ਤਕ੍ਖਣਂ ਸਨ੍ਧਾਯ ਪਟਿਕ੍ਖਿਪਤਿ, ਦੁਤਿਯਂ ਪੁਟ੍ਠੋ ਨਾਨਾਚਿਤ੍ਤਵਸੇਨ ਪਟਿਜਾਨਾਤਿ. ਸਕਵਾਦੀ ਪਨਸ੍ਸ ਅਧਿਪ੍ਪਾਯਂ ਮਦ੍ਦਿਤ੍ਵਾ ਅਨਿਚ੍ਚਮਨਸਿਕਾਰਸ੍ਸ ਆਨਿਸਂਸਦਸ੍ਸਾਵਿਤਾਯ ਚ ਏਕਤੋ ਪਟਿਞ੍ਞਾਤਤ੍ਤਾ ਦ੍ਵਿਨ੍ਨਂ ਫਸ੍ਸਾਨਂ ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ ਪੁਚ੍ਛਤਿ. ਇਤਰੋ ਦ੍ਵਿਨ੍ਨਂ ਸਮੋਧਾਨਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਦੁਕ੍ਖਤੋਤਿਆਦਿਪਞ੍ਹੇਸੁਪਿ ਏਸੇਵ ਨਯੋ. ਕਿਂ ਪਨੇਤ੍ਥ ਸਨ੍ਨਿਟ੍ਠਾਨਂ, ਕਿਂ ਅਨਿਚ੍ਚਾਦਿਤੋ ਮਨਸਿਕਰੋਤੋ ਸਂਯੋਜਨਾ ਪਹੀਯਨ੍ਤਿ, ਉਦਾਹੁ ਨਿਬ੍ਬਾਨੇ ਆਨਿਸਂਸਦਸ੍ਸਾਵਿਸ੍ਸ, ਉਦਾਹੁ ਦ੍ਵੇਪਿ ਏਕਤੋ ਕਰੋਨ੍ਤਸ੍ਸਾਤਿ. ਯਦਿ ਤਾਵ ਅਨਿਚ੍ਚਾਦਿਤੋ ਮਨਸਿਕਰੋਤੋ ਪਹਾਨਂ ਭਵੇਯ੍ਯ, ਵਿਪਸ੍ਸਨਾਚਿਤ੍ਤੇਨੇਵ ਭਵੇਯ੍ਯ. ਅਥ ਆਨਿਸਂਸਦਸ੍ਸਾਵਿਨੋ, ਅਨੁਸ੍ਸਵਵਸੇਨ ਨਿਬ੍ਬਾਨੇ ਆਨਿਸਂਸਂ ਪਸ੍ਸਨ੍ਤਸ੍ਸ ਵਿਪਸ੍ਸਨਾਚਿਤ੍ਤੇਨੇਵ ਭਵੇਯ੍ਯ, ਅਥ ਦ੍ਵੇਪਿ ਏਕਤੋ ਕਰੋਨ੍ਤਸ੍ਸ ਭਵੇਯ੍ਯ, ਦ੍ਵਿਨ੍ਨਂ ਫਸ੍ਸਾਦੀਨਂ ਸਮੋਧਾਨਂ ਭਵੇਯ੍ਯ. ਯਸ੍ਮਾ ਪਨ ਅਰਿਯਮਗ੍ਗਕ੍ਖਣੇ ਅਨਿਚ੍ਚਾਦਿਮਨਸਿਕਾਰਸ੍ਸ ਕਿਚ੍ਚਂ ਨਿਪ੍ਫਤ੍ਤਿਂ ਗਚ੍ਛਤਿ ਪੁਨ ਨਿਚ੍ਚਤੋਤਿਆਦਿਗਹਣਸ੍ਸ ਅਨੁਪ੍ਪਤ੍ਤਿਧਮ੍ਮਭਾਵਤੋ, ਨਿਬ੍ਬਾਨੇ ਚ ਪਚ੍ਚਕ੍ਖਤੋਵ ਆਨਿਸਂਸਦਸ੍ਸਨਂ ਇਜ੍ਝਤਿ, ਤਸ੍ਮਾ ਕਿਚ੍ਚਨਿਪ੍ਫਤ੍ਤਿਵਸੇਨ ਅਨਿਚ੍ਚਾਦਿਤੋ ਮਨਸਿਕਰੋਤੋ ਆਰਮ੍ਮਣਂ ਕਤ੍ਵਾ ਪਵਤ੍ਤਿਵਸੇਨ ਚ ਨਿਬ੍ਬਾਨੇ ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨਂ ਹੋਤੀਤਿ ਵੇਦਿਤਬ੍ਬਂ.
੫੪੮. ਨਿਬ੍ਬਾਨੇ ਸੁਖਾਨੁਪਸ੍ਸੀਤਿ ਸੁਤ੍ਤਂ ਨਿਬ੍ਬਾਨੇ ਸੁਖਾਨੁਪਸ੍ਸਨਾਦਿਭਾਵਮੇਵ ਸਾਧੇਤਿ, ਨ ਆਨਿਸਂਸਦਸ੍ਸਾਵਿਤਾਮਤ੍ਤੇਨ ਸਂਯੋਜਨਾਨਂ ਪਹਾਨਂ. ਤਸ੍ਮਾ ਆਭਤਮ੍ਪਿ ਅਨਾਭਤਸਦਿਸਮੇਵਾਤਿ.
ਆਨਿਸਂਸਦਸ੍ਸਾਵੀਕਥਾਵਣ੍ਣਨਾ.
੨. ਅਮਤਾਰਮ੍ਮਣਕਥਾਵਣ੍ਣਨਾ
੫੪੯. ਇਦਾਨਿ ਅਮਤਾਰਮ੍ਮਣਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਨਿਬ੍ਬਾਨਂ ਮਞ੍ਞਤੀ’’ਤਿਆਦੀਨਂ ਅਯੋਨਿਸੋ ਅਤ੍ਥਂ ਗਹੇਤ੍ਵਾ ਅਮਤਾਰਮ੍ਮਣਂ ਸਂਯੋਜਨਂ ਹੋਤੀਤਿ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਸਚੇ ਅਮਤਾਰਮ੍ਮਣਂ ਸਂਯੋਜਨਂ, ਅਮਤਸ੍ਸ ਸਂਯੋਜਨਿਯਾਦਿਭਾਵੋ ਆਪਜ੍ਜਤੀਤਿ ਚੋਦੇਤੁਂ ਅਮਤਂ ਸਂਯੋਜਨਿਯਨ੍ਤਿਆਦਿਮਾਹ. ਇਤਰੋ ਸੁਤ੍ਤਵਿਰੋਧਭਯੇਨ ਸਬ੍ਬਂ ਪਟਿਕ੍ਖਿਪਤਿ. ਇਮਿਨਾ ਉਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਨਿਬ੍ਬਾਨਂ ਨਿਬ੍ਬਾਨਤੋਤਿ ਆਹਟਸੁਤ੍ਤਂ ਪਨ ਦਿਟ੍ਠਧਮ੍ਮਨਿਬ੍ਬਾਨਂ ਸਨ੍ਧਾਯ ਭਾਸਿਤਂ, ਤਸ੍ਮਾ ਅਸਾਧਕਨ੍ਤਿ.
ਅਮਤਾਰਮ੍ਮਣਕਥਾਵਣ੍ਣਨਾ.
੩. ਰੂਪਂ ਸਾਰਮ੍ਮਣਨ੍ਤਿਕਥਾਵਣ੍ਣਨਾ
੫੫੨-੫੫੩. ਇਦਾਨਿ ਰੂਪਂ ਸਾਰਮ੍ਮਣਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਰੂਪਂ ਸਪ੍ਪਚ੍ਚਯਟ੍ਠੇਨ ਸਾਰਮ੍ਮਣਂ ਨਾਮ ਹੋਤਿ, ਨ ਅਞ੍ਞਂ ਆਰਮ੍ਮਣਂ ਕਰੋਤੀਤਿ ਆਰਮ੍ਮਣਪਚ੍ਚਯਵਸੇਨ. ਯੇਸਂ ਪਨ ਅਵਿਸੇਸੇਨ ਰੂਪਂ ਸਾਰਮ੍ਮਣਨ੍ਤਿ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਆਰਮ੍ਮਣਤ੍ਥਸ੍ਸ ਵਿਭਾਗਦਸ੍ਸਨਤ੍ਥਂ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਪਾਲ਼ਿਅਨੁਸਾਰੇਨੇਵ ਵੇਦਿਤਬ੍ਬਂ. ਨ ਵਤ੍ਤਬ੍ਬਨ੍ਤਿ ਪਞ੍ਹੇ ਓਲੁਬ੍ਭਾਰਮ੍ਮਣਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਦੁਤਿਯਪਞ੍ਹੇਪਿ ਪਚ੍ਚਯਾਰਮ੍ਮਣਂ ਸਨ੍ਧਾਯ ਪਟਿਞ੍ਞਾ ਤਸ੍ਸੇਵ. ਇਤਿ ਸਪ੍ਪਚ੍ਚਯਟ੍ਠੇਨੇਵੇਤ੍ਥ ਸਾਰਮ੍ਮਣਤਾ ਸਿਦ੍ਧਾਤਿ.
ਰੂਪਂ ਸਾਰਮ੍ਮਣਨ੍ਤਿਕਥਾਵਣ੍ਣਨਾ.
੪. ਅਨੁਸਯਾ ਅਨਾਰਮ੍ਮਣਕਥਾਵਣ੍ਣਨਾ
੫੫੪-੫੫੬. ਇਦਾਨਿ ਅਨੁਸਯਾ ਅਨਾਰਮ੍ਮਣਾਤਿਕਥਾ ਨਾਮ ਹੋਤਿ. ਤਤ੍ਥ ਯੇਸਂ ਅਨੁਸਯਾ ਨਾਮ ਚਿਤ੍ਤਵਿਪ੍ਪਯੁਤ੍ਤਾ ਅਹੇਤੁਕਾ ਅਬ੍ਯਾਕਤਾ, ਤੇਨੇਵ ਚ ਅਨਾਰਮ੍ਮਣਾਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਞ੍ਚੇਵ ਏਕਚ੍ਚਾਨਞ੍ਚ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਨੁਸਯਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ਅਨਾਰਮ੍ਮਣੇਨ ਨਾਮ ਏਵਂਵਿਧੇਨ ਭਵਿਤਬ੍ਬਨ੍ਤਿ ਚੋਦੇਤੁਂ ਰੂਪਨ੍ਤਿਆਦਿਮਾਹ. ਕਾਮਰਾਗੋਤਿਆਦਿ ਕਾਮਰਾਗਾਨੁਸਯਤੋ ਅਨਞ੍ਞਤ੍ਤਾ ਦਸ੍ਸਿਤਂ. ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ ਪਞ੍ਹੇ ਚਿਤ੍ਤਸਮ੍ਪਯੁਤ੍ਤਸਙ੍ਖਾਰਕ੍ਖਨ੍ਧਂ ਸਨ੍ਧਾਯ ਪਟਿਕ੍ਖਿਪਤਿ. ਅਨੁਸਯਂ ਜੀਵਿਤਿਨ੍ਦ੍ਰਿਯਂ ਕਾਯਕਮ੍ਮਾਦਿਰੂਪਞ੍ਚ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ, ਤਂ ਸਨ੍ਧਾਯ ਪਟਿਜਾਨਾਤਿ. ਇਮਿਨਾਵੁਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਸਾਨੁਸਯੋਤਿ ਪਞ੍ਹੇ ਪਨ ਅਪ੍ਪਹੀਨਾਨੁਸਯਤ੍ਤਾ ਸਾਨੁਸਯਤਾ ਅਨੁਞ੍ਞਾਤਾ. ਨ ਅਨੁਸਯਾਨਂ ਪਵਤ੍ਤਿਸਬ੍ਭਾਵਾ. ਯੋ ਹਿ ਅਪ੍ਪਹੀਨੋ, ਨ ਸੋ ਅਤੀਤੋ, ਨਾਨਾਗਤੋ, ਨ ਪਚ੍ਚੁਪ੍ਪਨ੍ਨੋ ਚ. ਮਗ੍ਗਵਜ੍ਝਕਿਲੇਸੋ ਪਨੇਸ ਅਪ੍ਪਹੀਨਤ੍ਤਾਵ ਅਤ੍ਥੀਤਿ ਵੁਚ੍ਚਤਿ. ਏਵਰੂਪਸ੍ਸ ਚ ਇਦਂ ਨਾਮ ਆਰਮ੍ਮਣਨ੍ਤਿ ਨ ਵਤ੍ਤਬ੍ਬਂ. ਤਸ੍ਮਾ ਤਂ ਪਟਿਕ੍ਖਿਤ੍ਤਂ. ਤਂ ਪਨੇਤਂ ਨ ਕੇਵਲਂ ਅਨੁਸਯਸ੍ਸ, ਰਾਗਾਦੀਨਮ੍ਪਿ ਤਾਦਿਸਮੇਵ, ਤਸ੍ਮਾ ਅਨੁਸਯਾਨਂ ਅਨਾਰਮ੍ਮਣਤਾਸਾਧਕਂ ਨ ਹੋਤੀਤਿ.
ਅਨੁਸਯਾ ਅਨਾਰਮ੍ਮਣਾਤਿਕਥਾਵਣ੍ਣਨਾ.
੫. ਞਾਣਂ ਅਨਾਰਮ੍ਮਣਨ੍ਤਿਕਥਾਵਣ੍ਣਨਾ
੫੫੭-੫੫੮. ਇਦਾਨਿ ਞਾਣਂ ਅਨਾਰਮ੍ਮਣਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਅਰਹਾ ਚਕ੍ਖੁਵਿਞ੍ਞਾਣਸਮਙ੍ਗੀ ਞਾਣੀਤਿ ਵੁਚ੍ਚਤਿ, ਤਸ੍ਸ ਞਾਣਸ੍ਸ ਤਸ੍ਮਿਂ ਖਣੇ ਆਰਮ੍ਮਣਂ ਨਤ੍ਥਿ, ਤਸ੍ਮਾ ਞਾਣਂ ਅਨਾਰਮ੍ਮਣਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਅਨੁਸਯਕਥਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਞਾਣਂ ਅਨਾਰਮ੍ਮਣਨ੍ਤਿਕਥਾਵਣ੍ਣਨਾ.
੬. ਅਤੀਤਾਨਾਗਤਾਰਮ੍ਮਣਕਥਾਵਣ੍ਣਨਾ
੫੫੯-੫੬੧. ਇਦਾਨਿ ਅਤੀਤਾਨਾਗਤਾਰਮ੍ਮਣਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਅਤੀਤਾਨਾਗਤਾਰਮ੍ਮਣਂ ਨਾਮ ਨਤ੍ਥਿ, ਤਸ੍ਮਾ ਤਦਾਰਮ੍ਮਣੇਨ ਚਿਤ੍ਤੇਨ ਆਰਮ੍ਮਣਸ੍ਸ ਨਤ੍ਥਿਤਾਯ ਅਨਾਰਮ੍ਮਣੇਨ ਭਵਿਤਬ੍ਬਨ੍ਤਿ ਅਤੀਤਂ ਅਨਾਰਮ੍ਮਣਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ, ਤੇ ਸਨ੍ਧਾਯ ਅਤੀਤਾਰਮ੍ਮਣਨ੍ਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਯਥਾਪਾਲ਼ਿਮੇਵ ਨਿਯ੍ਯਾਤੀਤਿ.
ਅਤੀਤਾਨਾਗਤਾਰਮ੍ਮਣਕਥਾਵਣ੍ਣਨਾ.
੭. ਵਿਤਕ੍ਕਾਨੁਪਤਿਤਕਥਾਵਣ੍ਣਨਾ
੫੬੨. ਇਦਾਨਿ ਵਿਤਕ੍ਕਾਨੁਪਤਿਤਕਥਾ ਨਾਮ ਹੋਤਿ. ਤਤ੍ਥ ਵਿਤਕ੍ਕਾਨੁਪਤਿਤਾ ਨਾਮ ਦੁਵਿਧਾ – ਆਰਮ੍ਮਣਤੋ ਚ ਸਮ੍ਪਯੋਗਤੋ ਚ. ਤਤ੍ਥ ਅਸੁਕਚਿਤ੍ਤਂ ਨਾਮ ਵਿਤਕ੍ਕਸ੍ਸਾਰਮ੍ਮਣਂ ਨ ਹੋਤੀਤਿ ਨਿਯਮਾਭਾਵਤੋ ਸਿਯਾ ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਂ, ਵਿਤਕ੍ਕਵਿਪ੍ਪਯੁਤ੍ਤਚਿਤ੍ਤਸਬ੍ਭਾਵਤੋ ਪਨ ਨ ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਂ. ਇਤਿ ਇਮਂ ਵਿਭਾਗਂ ਅਕਤ੍ਵਾ ਅਵਿਸੇਸੇਨੇਵ ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਪਾਲ਼ਿਵਸੇਨੇਵ ਨਿਯ੍ਯਾਤੀਤਿ.
ਵਿਤਕ੍ਕਾਨੁਪਤਿਤਕਥਾਵਣ੍ਣਨਾ.
੮. ਵਿਤਕ੍ਕਵਿਪ੍ਫਾਰਸਦ੍ਦਕਥਾਵਣ੍ਣਨਾ
੫੬੩. ਇਦਾਨਿ ਵਿਤਕ੍ਕਵਿਪ੍ਫਾਰਸਦ੍ਦਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ‘‘ਵਿਤਕ੍ਕਵਿਚਾਰਾ ਵਚੀਸਙ੍ਖਾਰਾ’’ਤਿ ਵੁਤ੍ਤਾ, ਤਸ੍ਮਾ ਸਬ੍ਬਸੋ ਵਿਤਕ੍ਕਯਤੋ ਵਿਚਾਰਯਤੋ ਅਨ੍ਤਮਸੋ ਮਨੋਧਾਤੁਪਵਤ੍ਤਿਕਾਲੇਪਿ ਵਿਤਕ੍ਕਵਿਪ੍ਫਾਰੋ ਸਦ੍ਦੋਯੇਵਾਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਸਬ੍ਬਸੋਤਿ ਪੁਚ੍ਛਾ ਸਕਵਾਦਿਸ੍ਸ ਪਟਿਞ੍ਞਾ ਇਤਰਸ੍ਸ. ਅਥ ਨਂ ਯਦਿ ਵਿਤਕ੍ਕਵਿਪ੍ਫਾਰਮਤ੍ਤਂ ਸਦ੍ਦੋ, ਫਸ੍ਸਾਦਿਵਿਪ੍ਫਾਰੋਪਿ ਸਦ੍ਦੋ ਭਵੇਯ੍ਯਾਤਿ ਚੋਦੇਤੁਂ ਸਬ੍ਬਸੋ ਫੁਸਯਤੋਤਿਆਦਿਮਾਹ. ਇਤਰੋ ਤਾਦਿਸਂ ਸੁਤ੍ਤਲੇਸਂ ਅਪਸ੍ਸਨ੍ਤੋ ਪਟਿਕ੍ਖਿਪਤਿ. ਵਿਤਕ੍ਕਵਿਪ੍ਫਾਰੋ ਸਦ੍ਦੋ ਸੋਤਵਿਞ੍ਞੇਯ੍ਯੋਤਿ ਵਿਤਕ੍ਕਸ੍ਸ ਵਿਪ੍ਫਾਰਮਤ੍ਤਮੇਵ ਸਦ੍ਦੋਤਿ ਕਤ੍ਵਾ ਪੁਚ੍ਛਤਿ, ਨ ਵਿਤਕ੍ਕਵਿਪ੍ਫਾਰਸਮੁਟ੍ਠਿਤਂ ਸੁਤ੍ਤਪਮਤ੍ਤਾਨਂ ਸਦ੍ਦਂ, ਇਤਰੋ ਪਟਿਕ੍ਖਿਪਤਿ. ਨਨੁ ਵਿਤਕ੍ਕਵਿਪ੍ਫਾਰਸਦ੍ਦੋ ਨ ਸੋਤਵਿਞ੍ਞੇਯ੍ਯੋਤਿ ਇਦਂ ਤਸ੍ਸੇਵ ਲਦ੍ਧਿਯਾ ਦਸ੍ਸੇਤਿ. ਸੋ ਹਿ ਵਿਤਕ੍ਕਵਿਪ੍ਫਾਰਮਤ੍ਤਮੇਵ ਸਦ੍ਦਂ ਵਦਤਿ, ਸੋ ਨ ਸੋਤਵਿਞ੍ਞੇਯ੍ਯੋਤਿ. ਇਤਰੋ ਪਨ ‘‘ਵਿਤਕ੍ਕਵਿਪ੍ਫਾਰਸਦ੍ਦਂ ਸੁਤ੍ਵਾ ਆਦਿਸਤੀ’’ ਤਿ (ਦੀ. ਨਿ. ੩.੧੪੮) ਵਚਨਤੋ ਸੋਤਵਿਞ੍ਞੇਯ੍ਯੋਵਾਤਿ ਵਦਤਿ.
ਵਿਤਕ੍ਕਵਿਪ੍ਫਾਰਸਦ੍ਦਕਥਾਵਣ੍ਣਨਾ.
੯. ਨਯਥਾਚਿਤ੍ਤਸ੍ਸ ਵਾਚਾਤਿਕਥਾਵਣ੍ਣਨਾ
੫੬੪. ਇਦਾਨਿ ਨਯਥਾਚਿਤ੍ਤਸ੍ਸ ਵਾਚਾਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਕੋਚਿ ਅਞ੍ਞਂ ਭਣਿਸ੍ਸਾਮੀਤਿ ਅਞ੍ਞਂ ਭਣਤਿ, ਤਸ੍ਮਾ ਨਯਥਾਚਿਤ੍ਤਸ੍ਸ ਵਾਚਾ ਚਿਤ੍ਤਾਨੁਰੂਪਾ ਚਿਤ੍ਤਾਨੁਗਤਿਕਾ ਨ ਹੋਤਿ, ਵਿਨਾਪਿ ਚਿਤ੍ਤੇਨ ਪਵਤ੍ਤਤੀਤਿ ਯੇਸਂ ਲਦ੍ਧਿ; ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਤਂਸਮੁਟ੍ਠਾਪਕਂ ਚਿਤ੍ਤਂ ਨ ਸਿਯਾ, ਫਸ੍ਸਾਦਯੋਪਿ ਤਸ੍ਮਿਂ ਖਣੇ ਨ ਸਿਯੁ’’ਨ੍ਤਿ ਚੋਦੇਤੁਂ ਅਫਸ੍ਸਕਸ੍ਸਾਤਿਆਦਿਮਾਹ. ਨ ਭਣਿਤੁਕਾਮੋਤਿਆਦੀਸੁ ਯਸ੍ਮਾ ਅਞ੍ਞਂ ਭਣਿਸ੍ਸਾਮੀਤਿ ਅਞ੍ਞਂ ਭਣਨ੍ਤੋਪਿ ਭਣਿਤੁਕਾਮੋਯੇਵ ਨਾਮ ਹੋਤਿ, ਤਸ੍ਮਾ ਨ ਹੇਵਾਤਿ ਪਟਿਕ੍ਖਿਪਤਿ.
੫੬੫. ਨਨੁ ਅਤ੍ਥਿ ਕੋਚਿ ਅਞ੍ਞਂ ਭਣਿਸ੍ਸਾਮੀਤਿਆਦੀਸੁ ਚੀਵਰਨ੍ਤਿ ਭਣਿਤੁਕਾਮੋ ਚੀਰਨ੍ਤਿ ਭਣੇਯ੍ਯ. ਤਤ੍ਥ ਅਞ੍ਞਂ ਭਣਿਤੁਕਾਮਤਾਚਿਤ੍ਤਂ, ਅਞ੍ਞਂ ਭਣਨਚਿਤ੍ਤਂ, ਇਤਿ ਪੁਬ੍ਬਭਾਗੇਨ ਚਿਤ੍ਤੇਨ ਅਸਦਿਸਤ੍ਤਾ ਅਯਥਾਚਿਤ੍ਤੋ ਨਾਮ ਹੋਤਿ, ਤੇਨਸ੍ਸ ਕੇਵਲਂ ਅਨਾਪਤ੍ਤਿ ਨਾਮ ਹੋਤਿ, ਨ ਪਨ ਚੀਰਨ੍ਤਿ ਵਚਨਸਮੁਟ੍ਠਾਪਕਚਿਤ੍ਤਂ ਨਤ੍ਥਿ, ਇਤਿ ਅਚਿਤ੍ਤਕਾ ਸਾ ਵਾਚਾਤਿ ਅਤ੍ਥਂ ਸਨ੍ਧਾਯ ਇਮਿਨਾ ਉਦਾਹਰਣੇਨ ‘‘ਨਯਥਾਚਿਤ੍ਤਸ੍ਸ ਵਾਚਾ’’ਤਿ ਪਤਿਟ੍ਠਾਪਿਤਾਪਿ ਅਪ੍ਪਤਿਟ੍ਠਾਪਿਤਾਵ ਹੋਤੀਤਿ.
ਨਯਥਾਚਿਤ੍ਤਸ੍ਸ ਵਾਚਾਤਿਕਥਾਵਣ੍ਣਨਾ.
੧੦. ਨਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿਕਥਾਵਣ੍ਣਨਾ
੫੬੬-੫੬੭. ਇਦਾਨਿ ਨਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਕੋਚਿ ਅਞ੍ਞਤ੍ਰ ਗਚ੍ਛਿਸ੍ਸਾਮੀਤਿ ਅਞ੍ਞਤ੍ਰ ਗਚ੍ਛਤਿ, ਤਸ੍ਮਾ ਨਯਥਾਚਿਤ੍ਤਸ੍ਸ ਕਾਯਕਮ੍ਮਂ ਚਿਤ੍ਤਾਨੁਰੂਪਂ ਚਿਤ੍ਤਾਨੁਗਤਿਕਂ ਨ ਹੋਤਿ, ਵਿਨਾਪਿ ਚਿਤ੍ਤੇਨ ਪਵਤ੍ਤਤੀਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਪੁਬ੍ਬਸੇਲਿਯਾਨਂਯੇਵ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.
ਨਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿਕਥਾਵਣ੍ਣਨਾ.
੧੧. ਅਤੀਤਾਨਾਗਤਸਮਨ੍ਨਾਗਤਕਥਾਵਣ੍ਣਨਾ
੫੬੮-੫੭੦. ਇਦਾਨਿ ਅਤੀਤਾਨਾਗਤੇਹਿ ਸਮਨ੍ਨਾਗਤਕਥਾ ਨਾਮ ਹੋਤਿ. ਤਤ੍ਥ ਸਮਨ੍ਨਾਗਤਪਞ੍ਞਤ੍ਤਿ ਪਟਿਲਾਭਪਞ੍ਞਤ੍ਤੀਤਿ ਦ੍ਵੇ ਪਞ੍ਞਤ੍ਤਿਯੋ ਵੇਦਿਤਬ੍ਬਾ. ਤਾਸੁ ਪਚ੍ਚੁਪ੍ਪਨ੍ਨਧਮ੍ਮਸਮਙ੍ਗੀ ਸਮਨ੍ਨਾਗਤੋਤਿ ਵੁਚ੍ਚਤਿ. ਅਟ੍ਠ ਸਮਾਪਤ੍ਤਿਲਾਭਿਨੋ ਪਨ ਸਮਾਪਤ੍ਤਿਯੋ ਕਿਞ੍ਚਾਪਿ ਨ ਏਕਕ੍ਖਣੇ ਪਵਤ੍ਤਨ੍ਤਿ, ਅਞ੍ਞਾ ਅਤੀਤਾ ਹੋਨ੍ਤਿ, ਅਞ੍ਞਾ ਅਨਾਗਤਾ, ਅਞ੍ਞਾ ਪਚ੍ਚੁਪ੍ਪਨ੍ਨਾ, ਪਟਿਵਿਜ੍ਝਿਤ੍ਵਾ ਅਪਰਿਹੀਨਤਾਯ ਪਨ ਲਾਭੀਤਿ ਵੁਚ੍ਚਤਿ. ਤਤ੍ਥ ਯੇਸਂ ਇਮਂ ਵਿਭਾਗਂ ਅਗ੍ਗਹੇਤ੍ਵਾ ਯਸ੍ਮਾ ਝਾਨਲਾਭੀਨਂ ਅਤੀਤਾਨਾਗਤਾਨਿ ਝਾਨਾਨਿਪਿ ਅਤ੍ਥਿ, ਤਸ੍ਮਾ ‘‘ਤੇ ਅਤੀਤੇਨਪਿ ਅਨਾਗਤੇਨਪਿ ਸਮਨ੍ਨਾਗਤਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ. ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ. ‘‘ਅਟ੍ਠਵਿਮੋਕ੍ਖਝਾਯੀ’’ਤਿਆਦਿ ਪਨ ਲਾਭੀਭਾਵਸ੍ਸ ਸਾਧਕਂ, ਨ ਸਮਨ੍ਨਾਗਤਭਾਵਸ੍ਸਾਤਿ.
ਅਤੀਤਾਨਾਗਤਸਮਨ੍ਨਾਗਤਕਥਾਵਣ੍ਣਨਾ.
ਨਵਮੋ ਵਗ੍ਗੋ.